Aurkezpena:
Eusko Jaurlaritzak bere erakundeak Madrilen ordezkatzeko eta euskal errealitatea ezagutzera emateko Eusko Jaurlaritzaren Madrilgo ordezkaritza sortu zuen. Urtarrilaren 28ko 9/2003 DEKRETUAREN bidez sortu zuen aipatutako ordezkaritza, Kanpo Ekintzarako Idazkaritza Nagusiaren baitan.
Eusko Jaurlaritzaren interesak Estatuko hiriburuan ordezkatzeko lanean, Lehendakariari, Gobernuko kideei eta Administrazioko langileei bere zerbitzuak eskaintzen dizkie eta, era berean, Eusko Jaurlaritzak Estatuko Administrazioaren aurrean egin beharreko lan instituzionala errazten du. Zentzu horretan, Eusko Jaurlaritzak abiarazitako politikak eta jarduerak Madrilgo komunikabideen artean ezagutzera ematen ditu ordezkaritza honek.
Madrilgo ordezkaritzak harremanak ditu Atzerri Arazoetako Ministerioarekin eta Estatuaren kanpo politikaren jarraipena egiten du. Horrela, Eusko Jaurlaritzak ordezkaritzaren laguntza jasotzen du Estatuak kanpo politikan egiten duen esku hartzeak Euskadiko interesak eragiten dituen guztietan.
Bestalde, Europako autonomia erkidego eta eskualdeetako ordezkaritzekin (ordezkaritzak Madrilen dituztenekin) harremanetan dago Eusko Jaurlaritzaren Madrilgo ordezkaritza eta Europar Batasunaren politiken jarraipena egiten du Madrilen dauden Europar Batasunaren Ordezkaritza Bulegoen eta Europako Parlamentuaren bidez.
Eusko Jaurlaritzak Madrilen duen ordezkaritzaren egoitzari dagokionez, euskal barrutietan aukeratutako diputatuen eta senatarien eskura jartzen da azpiegitura; era berean, euskal erakunde publikoen eta pribatuen eta Estatuko erakundeen arteko bilerak edo topaguneak antolatzeko erabiltzen da.
Azkenik, Madrilen dagoen Gorputz Diplomatikoarekin aldiroko harremanak eduki nahi dira. Gainera, Euskadiren irudia Madrilen zabaltzeko jardueren plangintza, diseinua eta gauzatzea egiteko beharra dago, batez ere kultura, adimen, ekonomia eta gizartearekin erlazionatutako alderdietan.
|