Lehendakaria + Euskadi 09´ aurkeztu duen prentsaurrekoan. (JB)

Patxi López lehendakariak + Euskadi 09 programa aurkeztu du; 367 miloi euro esleitu zaizkion programa horren bitartez, Eusko Jaurlaritzak euskal ekonomia suspertu eta 10.000 lanpostu sortu nahi ditu. Jaurlaritzaren Kontseiluak plan hori onartu duen bilera bukatu ondoko prentsaurrekoan Lehendakariak esan duenez, neurri sorta horren helburua "enplegua sustatzea, enpresei laguntzea eta lana sortzea" eta "azpiegitura eta ikerketa eta berrikuntza garatzen laguntzea" da.
Lopezek nahi du "erakunde guztiek" - horien artetik aldundiak nabarmendu zituen- bat egitea ahalegin honekin krisi ekonomikoaren eraginei aurre egiteko. Izan ere, gaur aurkeztu diren neurri asko beste erakunde batzuekin batera burutuko dira, udalekin esaterako. Udalek 50 milioi euroko partida berezia jasoko dute krisiak zerga bilketan eragin dien murrizketa arintzeko.

Lehendakaria + Euskadi 09´ aurkezten komunikabideei. (JB)

+ Euskadi 09´ planak 8 jardun arlo nagusi ezarri ditu Jaurlaritzak esleitutako 367 milioi euro banatzeko. Horietako 4k jasoko dute inbertsioaren ehuneko gehiena: azpiegiturak (75 milioi euro); enplegua eta prestakuntza (67 milioi euro); enpresentzako laguntzak (63 milioi euro) eta herri lana (48 miloi euro).
Partida horiei esker, aukera izango da, besteak beste, lanik gabe dauden eta oinarrizko errenta jasotzen duten pertsonak kontratatzeko plan bat sortzeko eta 7.000 laguni lana emateko; autonomoei langileak kontratatzen laguntzeko (gutxi gorabehera 4.000 autonomo ingururi eragingo die) eta merkataritza alorrari beste 2.000 kontratu berrirekin; Errekalden Metroko 4. linearen lanei eta Leioan EHUko tranbiarenei ekiteko; Eskuinaldean ospitale bat eta 12 udalerritan 559 apartamentu eraikitzeko; 58 ikastetxetan energia gehiago aurrezteko; gaixo kronikoei teleasistentzia eskaintzeko eta udalentzat 50 milioi eroko partida berezia ezartzeko.