2011/04/19 (e)ko  saioa 
Aurkibidea

HEZKUNTZA, UNIBERTSITATE ETA IKERKETA SAILA

HEZKUNTZA ITUNAK

2011-2012 ikasturteetarako Hezkuntza-itun berriak izenpetzeko baldintzak arautzen dituena, eta ituntze-araubide lehenengo aldiz baliatu nahi duten ikastetxeei 2011-2012 ikasturtea ituntzeko dei egiten dien aginduak

Gobernu Kontseiluak, Hezkuntza, Unibertsitate eta Ikerketa sailburuaren proposamenez, onartu du 2011/2012 ikasturtean hezkuntza-itun berriak izenpetzeko baldintzak arautzen dituen eta itunen erregimenean lehen aldiz sartu nahi duten ikastetxeak 2011/2012 ikasturterako itunak izenpetzera deitzen dituen agindua.

Itunen erregimenera sartu nahi duten Euskal Autonomia Erkidegoko ikastetxe pribatuak 2011/2012 ikasturterako beste hezkuntza-itun bat izenpetzera deitzea du agindu honek helburu, Haur Hezkuntzako (2. zikloa), Lehen Hezkuntzako, Derrigorrezko Bigarren Hezkuntzako, Hezkuntza Bereziko, Batxilergoetako eta erdi eta goi mailako Lanbide Heziketako heziketa-zikloetako irakaskuntzetarako.

 

140.000 EURO UNIBERTSITATE KANPOKO IRAKASLEEN PRESTAKUNTZARAKO ( 2011/12 GARATU PLANA )

Agindua. Honen bidez, Euskal Autonomia Erkidegoko unibertsitatez kanpoko irakasleak prestatu eta hobetzeko jardueren erakunde-eskaintza argitaratzen da eta Garatu 2011-2012 Planaren barruan arautu egiten dira jarduera horiek Euskal Autonomia Erkidegoan egiteko deialdia eta jarduera horietan parte hartzen duten irakasleentzako laguntza ekonomikoen deialdia.

Gobernu Bilerak, gaurko bilkuran, Hezkuntza, Unibertsitate eta Ikerketa Sailburuak proposatuta, 2011/2012 Garatu Planak jasotzen dituen ikastaroetarako deialdiak arautzeari buruzko Agindua onartu du,

Ikastaro hauek prestakuntza- eta hobetze-ikastaroak izango dira eta Euskal Autonomia Erkidegoko unibertsitate kanpoko irakasleei zuzenduta daude.

Agindu honen helburu nagusia honako hau da: 2011/2012 Garatu Planaren alorrean zehaztutako ikastaroetarako deialdi-prozesua eta hauen parte-hartzaileen aukeratze-prozesua zehaztea. Era berean, ikastaro hauek gainditzen dituzten irakasleei diru-laguntzak emateari buruzko arauketa ezartzen da, beti ere, ikastaro bakoitzeko deialdiak berak zehaztutakoa kontutan harturik. Helburu hauek lortzearren 140.000 €tako zuzkidura onartzen da.

 

1,071 MILIOI EURO NAZIOARTE MAILAKO UNIBERTSITATE-MUGIKORTASUNERAKO

Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko egunez onartu du 2011-2012 ikasturtean unibertsitate- eta goi mailako arte-irakaskuntzetako ikasleentzat nazioarte mailako unibertsitate-mugikortasunerako bekak deitzen dituen agindua.

Euskal Herriko Unibertsitatean, Deustuko Unibertsitatean, Mondragon Unibertsitatean, Donostian egoitza duen Nafarroako Unibertsitateko Ingeniarien Goi Eskolan (TECNUN) eta Euskal Autonomia Erkidegoko goi mailako arte-irakaskuntzetako ikastegietan matrikulatuta dauden unibertsitate- eta goi mailako arte-irakaskuntzetako ikasleentzat 2011-2012 ikasturtean nazioarte mailako unibertsitate-mugikortasunerako bekak deitzea du agindu honek, 1.071.200 euroko zenbateko globalekoak, helburu.

 

780.000 EURO GURASO ELKARTEETARAKO

Agindua, laguntzetarako deia egiten duena, hain zuzen, Helduen Hezkuntzako ikasleen elkarteentzat eta unibertsitate-mailakoak ez diren ikastetxeetako ikasleen guraso-elkarteentzat.

Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko egunean onartu du Helduen Hezkuntzako ikasleen elkarteentzako eta unibertsitateaz kanpoko irakaskuntzako ikastetxeetako ikasleen guraso elkarteentzako dirulaguntzak deitzen dituen agindu bat.

780.000 euroko zenbateko globalean dirulaguntzak deitzea du agindu honek helburu, ondorengo gastuak finantzatzen laguntzeko: HHIko ikasleen elkarteek eta guraso elkarteek funtzionatzeko jarduerek eta azpiegiturek eragindakoak; ikastetxe desberdinetako guraso eta ikasleei zuzendutako jarduerek eragindakoak.

 

275.000 EURO HEZKUNTZA PRESTAKUNTZA/BERRIZTAPENEKO PROIEKTUETARAKO

Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko egunez agindu bat onartu du, Hezkuntza Prestakuntza/Berriztapeneko proiektuak egiteko unibertsitateaz kanpoko itunpeko ikastetxe pribatuak deitzen dituena eta 2011/2012 ikasturtean aurrera eraman beharreko proiektu horiek egiteko dirulaguntzak jasotzeko baldintzak zehazten dituena.

Unibertsitateaz kanpoko irakaskuntza maila eta mota desberdinak, heziketa-zikloak izan ezik, ematen dituzten itunpeko ikastetxeak, curriculuma eta oinarrizko gaitasunen garapena hobetzeko planak aurkez ditzaten, deitzea eta 2011-2012 ikasturtean aurrera eraman beharreko proiektu horiek gauzatzeko dirulaguntzak jasotzeko baldintzak zehaztea ditu agindu honek, 275.000 euroko zenbateko globalekoak, helburu.

 

IRAKASKUNTZA-KOOPERATIBEI DIRULAGUNTZAK EMATEKO DEIALDIA

Agindua, unibertsitate-mailakoak ez diren ikastetxeak jabetzan dituzten Irakaskuntza Kooperatibentzako laguntzen deia egiten duena.

Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko egunean onartu du unibertsitateaz kanpoko irakaskuntzako ikastetxeen titularrak diren kooperatibentzat dirulaguntzak deitzen dituen agindu bat.

Irakaskuntza-kooperatibentzat dirulaguntzak deitzea, 53.000 euroko zenbateko globalean, du agindu honek helburu, ikastetxe desberdinetako ikasleentzako jarduerak egiteagatik dituzten gastuetan laguntzeko eta ikasleen gurasoen prestakuntzarako.
 

GRADUKO UNIBERTSITATE-IRAKASKUNTZA OFIZIALETARA SARTZEKO ERA.

Dekretua, Euskal Autonomia Erkidegoan graduko unibertsitate-ikasketa ofizialetara sartzeko arauak ezartzekoa.

Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko egunez onartu du Euskal Autonomia Erkidegoan graduko unibertsitate-irakaskuntza ofizialetara sartzeko era arautzen duen dekretua.

Dekretu honen bidez garatzen da graduko unibertsitate-irakaskuntza ofizialetara sartzeko baldintzak eta unibertsitate publiko espainoletan onartzeko prozedurak arautzen dituen errege dekretuan xedatutakoa, Euskal Autonomia Erkidegoan aplikatzeko.

 

HELDUEN HEZKUNTZAN GARATUTAKO JARDUERETARAKO DIRULAGUNTZAK

Agindua, helduen hezkuntzaren alorrean jarduerak garatzen dituzten eta irabazi-asmorik gabekoak diren erakundeei diru-laguntzak emateko deialdia egiteko dena.

Jaurlaritzaren Kontseiluak, Hezkuntza, Unibertsitate eta Ikerketa sailburuaren proposamenez, agindu bat onartu du gaur izandako bileran, hain zuzen, irabazizko xederik ez duten erakundeek helduen hezkuntzaren arloan garatutako jarduerak egiteko dirulaguntzetarako deialdirako.

Deialdi horren xede da dirulaguntzak ematea, guztira 47.958 eurokoak, Euskal Autonomia Erkidegoan kokatuta egonik irabazizko xederik ez duten eta 2010/2011 ikasturtean helduen hezkuntzan oinarrizko heziketaren arloan jarduten duten erakundeei.

 

EKONOMIA ETA OGASUN SAILA

JAURLARITZAREN KONTSEILUAK 2011KO AUDITORETZEN URTEKO PLANA ONARTU DU

Erabakia, Azkoitiko Udalarekin eta Azkoitia Lantzen Sarekin lankidetza-hitzarmena izenpetzeko baimena emateari buruzkoa. Helburua: Urola Ikastola BHIrentzat eraikin berria egitea.

Eusko Jaurlaritzak onartu egin du, Carlos Aguirre Ekonomia eta Ogasuneko sailburuak proposatuta, Auditoretzen Urteko Plana. Planak Kontrol Ekonomikoko Bulegoak egiten dituen ekonomia- eta finantza-kontroleko jarduerak eta kudeaketa-jarduerak finkatzen ditu.

Onartutako agirian, besteak beste, Euskal Autonomia Erkidegoko enpresa-sektore publikoan integratutako erakunde publikoen eta zuzenbide pribatuko erakunde publikoen eta sozietate publikoen finantza-auditoretzak egitea ezarri da. Era berean, Sektore Publikoko Kontratuen Legeak adierazitako alderdiak betetzen diren egiaztatuko da.

Lan Harremanen Kontseiluaren eta Datuak Babesteko Euskal Bulegoaren finantza-auditoretzak ere egingo dira. Nabarmentzekoa da Euskal Autonomia Erkidegoko Administrazioak partaidetza duen erakunde ia guztien datuak hartu eta aztertuko direla. Halaber, diru-laguntzen ordainketan laguntzen duten erakundeen kudeaketa berrikusiko da.

Azpimarratzekoak dira, ekitaldi honetan, SPRI, EEE eta LANGAIren diru-laguntzen programen gainean egingo diren auditoretzak; era berean, Enplegu eta Gizarte Gaietako Sailaren 2009ko azaroaren 25eko Aginduaren egiaztapena egingo da. Agindu horrek Euskal Autonomia Erkidegoan langabezian dauden eta/edo diru-sarrerak bermatzeko errenta jasotzen duten pertsonen kontratazioa sustatzeko ezohiko laguntzak iragartzen ditu.

Planean aurreikusten denez, Nekazaritza Bermatzeko Europako Funtsaren eta Landa Garapenerako Europako Nekazaritza Funtsaren laguntzak ordaintzen dituen erakundearen urteko kontuei buruzko auditoretzaren txostena eta ziurtagiria emango dira eta Europar Batasuneko Egitura Funtsak eta Kohesio Funtsak batera finantzatutako esku-hartze moduen kontrola egingo da.

Azkenik, kudeaketa-autonomia duten ikastetxe publikoren auditoretza egingo da.

 

ETXEBIZITZA, HERRI LAN ETA GARRAIO SAILA

LEZO ETA JUNDIZKO TERMINAL LOGISTIKO INTERMODALAK GARATZEKO PROTOKOLOA

Erabakia, Sustapen Ministerioaren eta Euskadiko Autonomia Erkidegoko Administrazioaren arteko lankidetza-protokoloa sinatzeko baimena ematen duena. Salgaien trenbide bidezko garraioa bultzatzeko plan estrategikoaren barruan salgaiak garraiatzeko oinarrizko sarean sartutako terminal logistiko intermodalak garatzea du helburu.

Jaurlaritzaren Kontseiluak baimena eman du, salgaien trenbideko garraioa bultzatzeko plan estrategikoko salgaien oinarrizko sarean sartuta dauden Euskal Autonomia Erkidegoko terminal logistiko intermodalak garatu ahal izateko Sustapen Ministerioarekin adostutako lankidetza-hitzarmena sinatzeko.

Jundizko terminala eta Lezokoa dira Planak Euskadin aurreikusi dituen terminalak eta ondorioz protokoloan sartuta direnak.

Terminal horietako bakoitzerako, Sustapen Ministerioak eta Eusko Jaurlaritzako Etxebizitza, Herri Lan eta Garraio Sailak terminalaren bideragarritasun logistikoa eta ekonomikoa ebaluatzeko behar diren azterlanak egingo dituzte, eta bideragarri badira, egokiena den sustapen- eta kudeaketa-eredua zehaztuko dute.

Terminalen sustapen eta kudeaketarako, ahal dela, ekimen publikoa eta pribatua uztartzen dituen eskema bat baliatuko da.

Etxebizitza, Herri Lan eta Garraio Sailak bere gain hartuko ditu terminala lurralde eta hirigintza aldetik ondo txertatzeari buruzko azterlanak, bai eta merkatu logistikoaren gainekoak ere.

Lan horiek Sustapen Ministerioaren esku jarriko ditu ondoren, Estatu osorako proiektu bateratua sasoiz gara dezan.

Lan horiek oinarri hartuta, eta betiere protokoloaren indarraldia amaitu baino lehen –indarraldi hori urtebetekoa izango da, baina beste urtebete luzatzeko aukerarekin–, Sustapen Ministerioak terminalen bideragarritasun ekonomikoari buruzko azterlan bat egingo du, eta, kasuaren arabera, horiek sustatu eta kudeatzeko formularik egokienak proposatuko ditu, bai eta trenbidearen eta logistikoaren ikuspuntutik eraginkorrena izango den diseinu funtzionala ere.

Salgaien trenbideko garraioa bultzatzeko plan estrategikoa

Sustapen Ministerioaren helburu behinenetako bat da trenbideko salgaien garraioa sustatzea eta intermodalitatea garatzea, garraio-sistema orekatu eta iraunkor bat lortu ahal izateko. Eta politika hori garatzeko, Ministerioak salgaien trenbideko garraioa bultzatzeko plan estrategikoa egin du (PEITFM). Plana 2010eko irailaren 14an egin zen sektoreko konferentzian aurkeztu zitzaien autonomia erkidegoei.

Planaren barruan salgaien oinarrizko sare bat zehazten da. Sare horrek autonomia erkidego guztietako terminal logistikoak hartzen ditu bere baitan, trenbidea katea logistikoan erabat txertatzeko asmoarekin.

Terminal intermodal berri horiek benetako zentro logistiko izateko pentsatuta daude, eta horrek esan nahi du garraioari halako balio erantsi bat eman ahal izango diotela; horretarako, errepideko eta trenbideko sarbideei arreta berezia eskainiko zaie, bai eta zentroen barne diseinuari ere, hartara ibilgailuek egin beharreko maniobrak eta alferrikako kostu operatiboak murriztteko.

Terminal logistiko intermodalen zehaztapenak, Sustapen Ministerioarekin eta beste autonomia erkidegoekin koordinatuta erabaki dira, arlo horretan zerikusia duten eragile ekonomiko eta sozialek ere parte hartu dutelarik. Eusko Jaurlaritza bat dator planaren printzipioekin eta uste du onena dela gure lurraldean egitekoak diren terminal logistiko intermodalak garatzen laguntzea.

Horregatik, lankidetza-protokolo bat sinatuko du, Lezoko eta Jundizko terminalen garapenaren inguruko elkarlana nola mamitu zehazteko.

 

INGURUMEN, LURRALDE PLANGINTZA, NEKAZARITZA ETA ARRANTZA SAILA

2.319.000 EUROKO LAGUNTZEN DEIALDIA, INGURUMEN BABESERAKO ENPRESEN INBERTSIOETARAKO

Agindua, enpresei ingurumena babesteko inbertsioak egiteko diru-laguntzak emateko baldintzak arautzen dituen urriaren 19ko 260/2010 Dekretuan aurreikusitako diru-laguntzetara biltzeko 2010eko deia egiten duena

Jaurlaritzaren Kontseiluak gaurko bileran erabaki du 2011n 2.319.000 euro bideratzea ingurumena babesteko inbertsioak egiten dituzten enpresentzako dirulaguntzetara.

Jaurlaritzaren Kontseiluak Pilar Unzalu Ingurumen, Lurralde Plangintza, Nekazaritza eta Arrantza sailbururen aginduari argi berdea eman dio. Agindu horren bidez, dirulaguntzen deialdia egiten da, enpresek legeak eskatutakoz gaindiko ingurumen babeserako neurriak har ditzaten.

Deialdi honen baitan, laguntzak ondokoetarako emango dira: ingurumen babeserako indarreko neurriak gainditzeko inbertsioei zuzenean lotutako ingurumen azterlanak egiteko; hirugarrenek sortutako hondakinak "puntako teknologia" edo teknologia konbentzionalak modu berritzailean erabili kudeatzeko; eta kutsatutako orubeak saneatzeko, noiz eta kutsaduraren arduraduna ezin denean identifikatu edo ezin zaionean behartu kostua ordaintzera.

Ondokoak ere lagun daitezke diruz: berotegi-efektua eragiten duten gas emisioa gutxitzeko inbertsioak; galdaketako moldatzeko hareei balioa emateko ekipoak; ingurumena babesteko indarreko neurriak gainditzeko inbertsioen aurreko ingurumen bideragarritasuneko azterlanak, Berotegi-efektua eragiten duten gasak sortzeari, lehengaiak kontsumitzeari, hondakinak, isuriak eta emisioak sortzeari dagozkion Eskuragarri dauden Teknikarik Onenak edota inbertsioaren bizitza aztertzeko azterlanak, alegia.

Halaber, ETEentzako laguntzak azaldu dira, ingurumen aholkularitzako kanpoko zerbitzua kontratatzearen ondoriozko kostuak finantzatzeko, hain zuzen, EMAS ingurumena kudeatzeko europar erregistroan inskribatzeko; UNE 150.301 Ekodiseinuaren arauaren ziurtagiria, ekoetiketak (I mota edo III mota), karbono-lorratza edo baso aprobetxamendu jasangarriaren ziurtagiriak ezartzeko; Enpresa Baliabideak Kudeatzeko Sistemak (ERP) Ingurumen Informazioaren Kudeaketa Integralaren Sistemetara, IKS eeM sistemetara, egokitzeko.

 

KULTURA SAILA

1.800.000 EURO ONARTU DIRA TOKI-ENTITATEETAN EUSKARA BIZIBERRITZEKO PLAN NAGUSIA (EBPN) GARATZEKO

Jaurlaritzaren Kontseiluak Euskal Autonomia Erkidegoko toki-entitateetan Euskara Biziberritzeko Plan Nagusia (EBPN) garatu edo entitateotako administrazioetan euskararen erabilera normalizatzeko planak onartzeko diru-laguntzak emateko modua arautzen duen Kulturako sailburuaren Agindua onartu du. Horretarako, 1.800.000 euro erabiliko dira.
Aginduaren xedea Euskal Autonomia Erkidegoko toki-entitateetan Euskara Biziberritzeko Plan Nagusia garatu edo entitateotako administrazioetan euskararen erabilera normalizatzeko planak onartzeko diru-laguntzak emateko modua arautzea.
EBPNren helburu nagusia hauxe da: «Euskaraz bizi nahi duten herritarrei horretarako aukerak eskaintzeko behar diren hizkuntza politikako neurriak erabakitzea eta bultzatzea; maila pertsonalean, sozialean eta ofizialean, euskararen berreskurapen osoa lortzeko euskararen aldeko urratsak areagotzea». Hori horrela, toki-entitateek barruko jardunari begira bi egiteko nagusi dituzte: batetik, herri-administrazioetan euskararen erabilera normalizatzeko plana onartzea eta garatzea eta, bestetik, Euskara Zerbitzua eratzea edota sendotzea. Kanpoko jardunari begira, berriz, hiru eginbehar nagusi dituzte: hiztunek euskara ikastea edota duten gaitasuna sendotzea; harreman-sare euskaldunak egituratzen laguntzea, eta euskarazko produktuak eta zerbitzuak zein horien gaineko informazioa zehatza bideratzea.
Agindu honen bidez ezarritako diru-laguntzetarako kopurua 1.800.000 eurokoa da. Onuradunak izango dira euren xedeen artean hizkuntza normalizazioa duten Euskal Autonomia Erkidegoko toki-entitateak eta toki-entitateen menpeko edo haiei lotutako zuzenbide publikoko entitateak; era berean, onuradun izan daitezke xede horrekin lankidetza-hitzarmen bidez elkartutako toki-entitateak.

 

1.576.000 EURO INFORMAZIOAREN ETA KOMUNIKAZIOAREN TEKNOLOGIETAN EUSKARA SUSTATU, GARATU EDOTA NORMALIZATZEKO

Kulturako sailburuaren proposamenez, Jaurlaritzaren Kontseiluak Informazioaren eta Komunikazioaren Teknologietan euskara sustatu, garatu edota normalizatzeko diru-laguntzak emateko araubidea ezarri eta deialdia egiteko den Agindua onartu du IKT deialdi honetarako aurrekontua 1.576.000 eurokoa da.
Aginduaren xedea da Informazioaren eta Komunikazioaren Teknologietan euskara sustatu, garatu edota normalizatzeko diru-laguntzak arautzea. Laguntza deialdi honek 2011n burutuko diren egitasmoak baino ez ditu gogoan hartuko. Hori dela-eta, deialdi honetara biltzen diren egitasmoak gauzatzearen ondorioz eskaini, eman edota gizarteratu beharreko jardunak, zerbitzuak eta produktuak 2011ko abenduaren 31 baino lehen eskaini, eman edota gizarteratuko dira.
Laguntza-modalitate bat euskarazko atari eta web guneek edo Interneterako euskarazko eduki berriek osatuko dute. Talde honetarako 876.000 euro erabiliko dira. Beste laguntza-modalitatea softwarea euskaraz sortzeko edo euskarara lokalizatzeko egitasmoek osatuko dute, eta horretarako 700.000 euro erabiliko dira.
Lehenengo modalitaterai dagozkion baldintzak hauek dira:
a) Euskarazko atari eta web guneek zerbitzu anizkoitzak eskaini beharko dituzte.
b) Euskarazko atari edo webguneek etengabe eguneratzeko plangintza eduki beharko dute, bai eta gunea ezagutarazteko proposamena ere.
c) Euskarazko eduki berrien kasuan, horiek zabaltzeko edo ezagutarazteko proposamena zehaztuko da.
d) Webguneek agerian edo ezkutuan egongo den bisita-neurgailua eduki behar dute. Ezkutuan bada, entitate eskatzaileak izandako bisita-kopurua ikusi ahal izateko beharrezkoa den aukera teknikoa emango dio Hizkuntza Ikerketa eta Koordinaziorako Zuzendaritzari.
Beste multzoko egitasmoek Interneten kokatzeko edo publiko zabalarentzako eskuragarri egoteko moduko plan jakina izan beharko dute nahitaez.
Laguntza-mota hau egitasmoen gauzatze-lanei zuzen-zuzenean egotzitako gastuei partez aurre egitera dator. Nolanahi ere, aurreko urteetan diruz lagundutako egitasmoen kasuan, berrikuntzak baino ez dira diruz lagunduko.

 

1.280.000 EURO INFORMAZIOAREN ETA KOMUNIKAZIOAREN TEKNOLOGIETAN EUSKARA SUSTATU, GARATU EDOTA NORMALIZATZEKO

Kulturako sailburuaren proposamenez, gizarte-bizitzan euskara sustatu, garatu edota normalizatzeko diru-laguntzak emateko araubidea ezarri eta deialdia egiteko den Agindua onartu du Euskalgintza izeneko deialdi honetarako 1.280.000 euroko aurrekontu-partida erabiliko da.
Agindu honen xedea da gizarte-bizitzan euskara sustatzeko, garatzeko edota normalizatzeko lanean diharduten pertsona fisikoek edo juridiko pribatuek 2011n burutuko dituzten egitasmoei zuzenduriko diru-laguntzak arautu eta dei egitea.
Laguntza deialdi honek 2011n burutuko diren egitasmoak baino ez ditu gogoan hartuko. Hori dela-eta, deialdi honetara biltzen diren egitasmoak gauzatzearen ondorioz eskaini, eman edota gizarteratu beharreko jardunak, zerbitzuak eta produktuak 2011ko abenduaren 31 baino lehen eskaini, eman edota gizarteratuko dira.
Honako hauek dira diruz lagun daitezkeen egitasmoak:
- Aisialdi-taldeen jardunean euskararen erabilera areagotu eta sendotzeko egitasmoak: aisialdirako begiraleei zuzendutako prestakuntza eta material-prestakuntza; eskola-ordutegitik kanpo dauden jardunen garapena.
- Ezagutzatik erabilerarako jauzia egite aldera, harreman-sareetan euskararen erabilera sustatu eta indartzeko egitasmoak, bai ahozkoan bai irakurri-idatzian, zenbait gizarte-talderi zuzendutakoak lehenetsiz: haur eta gazteak, euskaldun berriak.
- Haur eta gazteen aisialdiko kirol ekintzetan euskararen erabilera areagotu, sustatu eta indartzeko egitasmoak.
- Euskara ez dakiten euskal herritarrak euskarara hurbiltzea eta beroriei euskaraz sortu eta burututako jardunaren berri ematea helburu duten egitasmoak.
- Euskararen ondareari buruzko informazioa jaso, gorde edota digitalizatu eta hedatzea helburu duten egitasmoak.
- Euskarari zuzenean lotutako alderdiak aztertzea helburu duten jardunaldiak.
- Euskalgintzan ibilbide oparoa izateagatik nabarmendutako pertsonak edo elkarteak omentzeko egitasmoak.
- Euskararen familia bidezko transmisioa sendotzea helburu duten egitasmoak.
- Euskaraz irakurtzeko zaletasuna sustatzea helburu duten egitasmoak: irakurketa- eta idazketa-trebetasunak garatze aldera buruturiko jardunak, sariak, lehiaketak, idazleen eta irakurleen arteko topaketak eta literatura-gidak.
- Emakumeen euskarazko sormen kulturala bultzatzea helburu duten egitasmoak: hitzaldiak, erakusketak eta tailerrak.
- Etorkinen artean euskararen erabilera sustatzera zuzendutako jarduerak eta proiektuak bultzatzea helburu duten egitasmoak.
- Euskaraz landu eta plazaratutako kalitatezko ekarpenak bikaintasunaren irizpideen arabera bultza eta babesteko egitasmoak.
- Euskarazko jostailu, joko eta denbora-pasak.
- Euskararen Aholku Batzordeak “Euskara 21. Itun Berritu Baterantz. XXI. Mende hasierako hizkuntza politikaren oinarriak” izeneko hausnarketaren ondorengo lan–ildo estrategikoak lagungarri izanik, aurreko atalean zein Hizkuntza Politikarako Sailburuordetzak kudeatzen dituen laguntza-motetan laguntza gai ez diren bestelako egitasmoak.
Begiz jotako xedeari aurre egiteko 1.280.000 euro erabiliko dira eta laguntza-mota hau egitasmoen gauzatze-lanei zuzen-zuzenean egotzitako gastuei partez aurre egitera dator. Nolanahi ere, kanpoan utziko dira honako hauek: egitasmoa erdaraz egiteari dagozkion gastuak eta patrimonializa daitekeen ibilgetu materialean egindako inbertsioak.
Egitasmo orok gastu eta sarrera-aurrekontu orekatua izan behar du, ezinbestean. Ondorioz, aurrekontu orekaturik ez duen egitasmoa kanpo utziko da. Egitasmo orok, gainera, gutxieneko finantzaketa-maila propioa izan behar du, ezinbestean. Ondorioz, finantzaketa-maila horretara iristen ez den egitasmoa kanpo utziko da. Finantzaketa hori gastu-aurrekontuaren % 45, gutxienez, izango da, merkaturatu eta salduko diren produktuak burutzea helburu duten egitasmoen kasuan, eta gastu-aurrekontuaren % 35, gutxienez, gainerako kasuetan.
Aurreko puntuan aipaturiko finantzaketa propioa honako diru-sarrera hauez osatuta egongo da: eskatzailearen diru-ekarpenak, zerbitzu-salmentatik eskuratutakoak, produktu-salmentatik eskuratutakoak, publizitatetik eskuratutakoak edo entitate pribatuetatik jasotakoak.
Defizitarioak diren egitasmoei bakarrik eman ahal izango zaie diru-laguntza, hots, aurreikusitako gastuak, eskatzaileak ezinbestean jarri beharreko finantzaketa propioarekin berdindu ezin dituzten egitasmoei. Ondorioz, defizitarioak ez diren egitasmoak kanpo utziko dira.
Euskalgintza deialdiaren bidez eskuratutako diru-laguntza bateragarria da beste erakunde publiko zein pribatuek helburu berbererako emandakoekin, betiere gainfinantzaketarik gertatzen ez bada. Agindu honen epe-barrutia amaitu eta 21. artikuluan finkatutako justifikazioari ekin eta gero gainfinantzaketarik gertatu dela ikusten bada, diru-laguntzaren zenbatekoa murriztu egingo da. Murrizketa hori gainfinantzaketaren bestekoa izango da.
Laguntza-deialdi honetan parte hartu nahi duen orok nahi dituen beste eskabide-orri aurkezteko aukera izango du, Agindu hau Euskal Herriko Agintaritzaren Aldizkarian argitaratzen den egunaren biharamunetik hilabeteko epean.

 

JAURLARITZAK 5.480.000 EURO BIDERATUKO DITU EUSKARAZKO HEDABIDEAK SENDOTU, GARATU ETA NORMALIZATZEKO

Kulturako sailburuaren proposamenez, Jaurlaritzaren Kontseiluak euskarazko hedabideak sendotu, garatu eta normalizatzeko diru-laguntzak emateko araubidea ezarri eta deialdia egiteko den Agindua onartu du, Hedabideak izeneko deialdia alegia. Deialdi honetan begiz jotako xedeari aurre egiteko, 5.480.000 euro erabiliko dira.
Hedabideak deialdiak hedabideen 2011ko jarduna hartuko du kontuan, hau da, urtarrilaren 1etik abenduaren 31ra bitartekoa, eta beraren helburua da euskarazko hedabideak sendotu, garatu eta normalizatzea.
Laguntzak emateko, Aginduak honela sailkatzen ditu hedabideak:
- A taldea: euskara hutsezko eguneroko prentsa inprimatua, barne hartzen dituena bai euskararen esparru geografiko osoan zabaltzen diren egunkariak bai udalerri eta eskualde jakinetan zabaltzen diren egunkariak. Euskara hutsezko eguneroko prentsa inprimatuaren talde honetarako 2.000.000 euro erabiliko dira.
- B taldea: euskara hutsezko aldizkari inprimatuak. Hemen euskararen esparru geografiko osoan zabaltzen diren informazio orokorreko aldizkariak zein aldizkari espezializatuak (pentsamendua, zientzia, musika, natura, haur eta gazteei zuzendutakoak...) sartzen dira, bai eta udalerri, eskualde edo lurralde jakinetan zabaltzen diren informazio orokorreko aldizkariak ere. Talde honetarako 2.050.000 euro erabiliko dira, honela banatuta: 1.250.000 euro informazio orokorreko aldizkarietarako eta aldizkari espezializatuetarako, eta 800.000 euro informazio orokorreko aldizkarietarako.
- C taldea: nagusiki gaztelania darabilten egunkariek prestatu eta zabaldutako euskara hutsezko gehigarriak. Honako kasu honetan, eskatzailea eta onuraduna gehigarria zabaltzen duen egunkariaren edizio-enpresa izango da. Gehigarri hauek argitaratzeko 250.000 euro erabiliko dira.
- D taldea: emititu ahal izateko beharrezkoak diren gaikuntza tituluen jabe izanik, zati batean edo osorik euskaraz ari diren uhin bidezko irratiak. Atal honetarako 250.000 euro erabiliko dira.
- E taldea: emititu ahal izateko beharrezkoak diren gaikuntza tituluen jabe izanik, zati batean edo osorik euskaraz ari diren telebistak. Talde honetarako 550.000 euro erabiliko dira.
- F taldea: Internet bidezko hedabideak eta berri-agentziak. Atal honek euskara hutsezko egunkari eta aldizkariak hartzen ditu, zati batean edo osorik euskaraz ari diren irratiak, eta notiziak euskaraz ematen dituzten berri-agentziak. Talde honetarako 380.000 euro erabiliko dira.
Laguntza-deialdi honetan parte hartu nahi duen orok nahi dituen beste eskabide-orri aurkezteko aukera izango du, Agindu hau Euskal Herriko Agintaritzaren Aldizkarian argitaratzen den egunaren biharamunetik hilabeteko epean.

 

2.400.000 EURO EUSKADIKO ENPRESETAN EUSKARAREN ERABILERA ETA PRESENTZIA AREAGOTZEKO

Gaur egindako bilkuran, Jaurlaritzaren Kontseiluak entitate pribatuek EAEn dituzten lantokietan 2011n euskararen erabilera eta presentzia areagotzeko diru-laguntzak ematea arautzen duen Kulturako sailburuaren Agindua onartu du. Deialdia Lanhitz deitzen da, eta 2.400.000 euroko aurrekontua du.
Laguntza-deialdi honek 2011n burutuko diren egitasmoak baino ez ditu kontuan hartuko. Hori dela eta, deialdi honetara jotzen duten egitasmoak gauzatzearen ondorioz eskaini, eman edo gizarteratu beharreko jarduerak, zerbitzuak eta produktuak 2011ko abenduaren 31 baino lehen eskaini, eman edota gizarteratuko dira. Laguntza-deialdi honetan parte hartu nahi duen orok eskabide-orri bat aurkezteko aukera izango du, agindu hau Euskal Herriko Agintaritzaren Aldizkarian argitaratzen den egunaren biharamunetik hilabeteko epean.
Lanhitz deialdirako erabiliko den diru-zuzkidura 2.400.000 eurokoa da, eta irizpide hauen arabera banatuko da:
1.- 2010ean BIKAIN-Euskararen Kalitate Ziurtagiria eskuratu duten entitateak. Gainera, deialdi honetako baldintzak betetzen badituzte, diru-laguntza gehigarri bat jaso ahal izango dute, baldin eta diru-laguntza jasotzeko lortu beharreko gutxieneko puntuak lortzen badituzte.
2.- Gainerakoa, plana diseinatzeko eta 2011ko kudeaketa-plana garatzeko eskabidea egiten duten entitateen artean banatuko da, Agindu honetan ezarritako puntuen eta mugen arabera.
Beraz, agindu honetako diru-laguntzak ondoren aipatzen diren jardueretarako erabiliko dira: EAEn lantokiak dituzten entitate pribatuen lehen erabilera-planaren diseinurako eta kudeaketa-planerako.
Entitateak lehen euskara-planaren diseinurako laguntza eska dezake, lehendik laguntzarik jaso ez badu, ez diseinurako, ez kudeaketa-planerako. Lehen euskara-planaren diseinua aurkeztuz gero, urteko kudeaketa-plana ere aurkeztu beharko du entitate eskatzaileak. Kudeaketa-plana garatzeko ekintzek 2011ko urtarrilaren 1etik urte bereko abenduaren 31ra bitartean egindakoak izan behar dute.

 

JAURLARITZAK 8.235.000 EURO BIDERATUKO DITU EUSKADIKO IKUS-ENTZUNEZKOEN EKOIZPENA FINANTZATZEKO

Jaurlaritzaren Kontseiluak Euskal Autonomia Erkidegoan ikus-entzunezkoen produkzioa sustatzeko finantzaketa-erregimenaren 2011rako deialdia egiten duen Kulturako sailburuaren Agindua onartu du. Deialdian aurreikusitako diru-kopurua 8.235.000 euro dira.
Aginduaren helburua da euskal ikus-entzunezkoen sektorean ekoizpena, lehiakortasuna eta enplegua ikus-entzunezko proiektuak finantzatzearen bidez bultzatzeko sustapen lerroen erregimena eta baldintzak ezartzea. Horretarako, bi sustapen-lerro ezarri dira, interes-tasarik gabeko maileguen bidez eta kontratuak finantzatzeko maileguen bidez.
Programaren kostu orokorra 8.235.000 eurokoa da, eta urtez urte honela banatuko da: 5.000.000 euro Interes-tasarik gabeko mailegu itzulgarrien lerroan, eta 3.235.000 euro Kontratuak finantzatzeko maileguen lerroan. Biak ala biak aurrekontuetan aurreikusitako zuzkiduren kargura joango dira.
Euskadiko Autonomia Erkidegoko ikus-entzunezkoen ekoizpena sustatzeko finantzaketa-araubidea 2007ko ekainaren 26ko 107/2007 Dekretuaren bidez araututa dago (abenduaren 16ko 214/2008 Dekretuaren bidez aldatua), eta bertan xedatzen da sustapen-lerrootara jo dezaketela ikus-entzunezko produkzio berriek eta, horien barruan, bai atalkakoak ez diren sorkuntza-lanek bai bestelako ekoizpenek.
Lanek ondoren aipatzen diren kultura-irizpideetatik hiru gutxienez, bete beharko dituzte; ikus-entzunezko animazio-lanen kasuan, gutxienez bi:
– Gidoia Euskadin girotuta egotea.
– Pertsonaia nagusietako batek, gutxienez, loturarik edukitzea euskal kulturarekin edo Europako kulturarekin.
– Gidoia euskaraz idatzita egotea.
– Gidoia jatorrizko literatura-lan baten egokitzapena izatea.
– Ikus¬-entzunezko ekoizpenaren argumentua artean edo artista batean oinarrituta egotea, edozein dela ere arte-diziplina, artista hori Euskal Herrikoa izan edo Europako beste herrialderen batekoa izan.
– Ikus¬-entzunezko ekoizpenaren argumentua oinarrituta egotea pertsonaia edo gertakari historikoren batean.
– Ikus-¬entzunezko ekoizpenaren argumentuak euskal gizartearentzat garrantzitsuak diren gai politikoak, sozialak edo kulturalak jorratzea.
– Ikus¬-entzunezko lanak Euskadiko ondare arkitektonikoa, arkeologikoa edo naturala baliatzea, Europako ingurumari kulturala islatzeko.
Lanen aurrekontuaren %40 inbertitu beharko da Euskal Autonomia Erkidegoan egoitza duten sortzaileak, pertsonal teknikoa eta artistikoa, bai eta profesional edo enpresek emandako zerbitzuak kontratatzeko.
Dekretuaren arabera atalkakoak ez diren ikusentzunezko sorkuntza lanak sustapen-modalitate bietara aurkez daitezke; bestelakoak, berriz, kontratuak finantzatzeko maileguetako modalitatera baino ez.
Atalkakoak ez diren ikus-entzunezko sorkuntza-lanen produktoreek finantziazio-modalitate biak erabili ahal izango dituzte batera, betiere, muga hauekin:
– ¬ Ikus-entzunezko proiektu bati ezin izango zaio esleitu, modalitate biak kontuan hartuta, 600.000 euro baino gehiago.
–¬ Ez da onartuko subjektu batek dekretu honetako modalitateen bitartez jasotako dirutik 1.500.000 euro baino gehiago itzuli gabe izatea.
Modalitate biak bateragarriak dira beste edozein laguntza edo diru-laguntzarekin. dena den, esleitutako diru-laguntza publiko guztiek, dekretuan araututakoak barne, sekula ere ezingo dute gainditu laguntza jasotzen duen ikus-entzunezko produkzioaren erabateko kostuaren % 50, non eta ez den euskara hutsean gauzatzen edo ez diren produkzio esperimentalak, dokumentalak, animazio ataletako pilotoak eta aurrekontu txikiko produkzioak. Aipatu mugak gaindituz gero, laguntzaren zenbatekoa ahalik gehien murriztuko da, ezarritakoaren arabera. Horrelakorik gertatuz gero, gehienez murritz dakiokeen kopurua murriztuko zaio emandako diru-laguntzaren zenbatekoari.
Dekretu honetan xedatutakoaren ondorioetarako, zenbait definizio:
a) Ikus-entzunezko produkzioa: telebistarako edo multimediarako egindako ikus-entzunezko lan produzitu berriak, bai atalkakoak ez direnak, bai bestelakoak.
b) Ikus-entzunezko lan produzitu berriak: emisio-eskubideak eskuratzen diren urtean edo hurrengoan produzitzen direnak.
c) Atalkakoak ez diren ikus-entzunezko sorkuntza-lana: film luzeak, sorkuntza-dokumentalak, atalkako edo multimediako lanen pilotuak eta film laburrak, hala zinemetan nola telebistan ematekoak. Era berean, multzo honetan sartuko dira izaera kultural edo esperimental irmoa duten ikus-entzunezko sorkuntzak, euskarria edozein izanik ere, eta bereziki, atalkako animazioak, honetarako formalki ezarritakoaren arabera.
Euskadiko ikus-entzunezkoen ekoizpena sustatzeko ezarritako bi finantzaketa-lerrotara jotzeko eskabideak aurkezteko epea hasiko da Agindua Euskal Herriko Agintaritzaren Aldizkarian argitaratu eta biharamunean, eta 2011ko uztailaren 15ean amaituko da.