2012/07/17 (e)ko  saioa 
Aurkibidea

HERRIZAINGO SAILA

ONARTU DA IKUSKIZUN PUBLIKOEN ETA JOLAS JARDUEREN LEGEAREN AURREPROIEKTUA

Jendaurreko ikuskizun eta jolas-jarduerei buruzko legearen aurre-proiektua.

Europako araudiaren markoa EAE mailan garatuko du, eta enpresek horrelako jarduerak kudeatzea erraztuko du

Gobernu Kontseiluak gaur onartu du Herrizaingo Sailak aurkeztutako Ikuskizun Publikoen eta Jolas Jardueren Legearen Aurreproiektua. Ikuskizun publikoek, jolas jarduerek eta aisialdi ekintzak egiteko toki edo espazioek bete beharko dituzten baldintzak eta eskakizunak arautzeko eremu juridikoa finkatu du Gobernuak gaur onartu duen arau honek. Hala, EAEko araudiak Europako marko legala jasoko du, eta herritarrentzako berme zabalagoa eskainiko du; horrez gain, enpresek ekitaldi horiek kudeatzeko malgutasun eta erraztasun gehiago izatearen aldeko apustua ere egin da.

Aurreproiektuaren oinarrizko xedeetako bat ikuskizunen eta jolas jardueren eremuan herritarren eskubideak bermatzea da. Horretarako, areto eta esparru guztiek nahitaez bete beharko dituzten zenbait baldintza tekniko ezarri ditu, zorrotzak eta zehatzak. Halaber, aurreproiektuak funtsezko beste jomuga bat ere badu, sektoreko jarduerak dinamizatzeari dagokiona: aurreproiektuaren bidez, antolatzaileek jarraitu beharreko administrazio izapideak errazagoak eta irisgarriagoak izango dira, eta hala, gutxitu egingo dira bai kostua, bai denbora. Horrek, bidenabar, sektoreari lotutako egitasmo eta proiektu berriak abiatzeko marko egokia lortzen lagunduko du. Ildo berari jarraiki, aurreproiektuak Barne Merkatuko Zerbitzuei dagokienez Erkidegoaren zuzentarauak finkatutako printzipioak ere jaso ditu, zerbitzuak eskaintzea eta horiek ezartzeko askatasuna ahalbidetzeari buruzkoak.

Aurreproiektuak erantzukizunpeko adierazpena ardatz gisa duen araubide orokorra ezarri du; horren bidez, ikuskizun publikoak eta jolas jarduerak antolatu ahalko dira, baita establezimendu edo areto berriak ireki ere, antolatzaileak jarduerari ekingo diola eta horren berezko erantzukizunak bere gain hartzen dituela dioen agiri bat aurkezte hutsarekin. Administrazioak inguruabar horiek kontrolatuko ditu, interes orokorren berme emailea den aldetik.

Hala, baimenak eta lizentziak igortzeko araubidea zenbait kasu zehatzetan baino ez da aplikatu beharko, interes orokorreko arrazoiak direla medio hala justifikatuta dagoen kasuetan, hain zuzen; tartean dira, besteak beste, arrisku handiko areto gisa sailkatuta dauden aretoak, edo ingurumen edo kultura ondareari buruzko legedia bete behar duten aretoak.

Horrez gain, arauak adingabeak babesteari eta pertsonak esparruetara sartzeari lotutako makina bat neurri ere aurrez ikusi ditu.

Gainera, administrazioen arteko elkarlana ere bultzatuko du, eta Eusko Jaurlaritzaren eta udalen arteko koordinazioa ahalbidetuko du Ikuskizun Publiko eta Jolas Jardueretarako Euskal Kontseiluaren bitartez. Izan ere, kontseilua kontsulta, azterketa, koordinazio eta aholkularitza organoa da, eta bertan biltzen dira gobernua, udalak, sektoreko erakunde ordezkariak eta kontsumitzaile eta erabiltzaileen elkarteak.

Horrenbestez, arau modernoa, argia eta irekia da, modu zabalean adostu dena eta parte hartze handia izan duena. Horrez gain, Europar Batasunak finkatutako printzipioak jaso ditu, konfiantza gehiago eman die herritarrei, ekintzaileei eta interesdun nagusi gisa dagokien erantzukizunari; bidenabar, administrazio bidea erraztearen alde egin du, betiere administrazioari dagozkion ardurak ahaztu gabe.
 

 

HAUTESKUNDE AUTONOMIKOETAN ERABILITAKO BALIABIDE MATERIAL ETA DOKUMENTALAK ESTATUKO OINARRIZKO LEGEDIAREN AZKEN ALDAKETETARA EGOKITZEN DITUEN DEKRETUA ONETSI DA

Dekretua: Euskal Legebiltzarreko hauteskundeetan erabiltzeko kutxa, kabina, boto-txartela, kartazal eta gainerako agirien eredu ofizialak eta ezaugarriak eta material hori eskura emateko prozedura zehazten dituen Dekretua aldatzeko dena.

Gobernu Kontseiluak 2008ko Dekretua aldatzen duen Dekretua onetsi du. Horren bidez, Eusko Legebiltzarrerako hauteskundeak egiteko behar diren baliabide material eta dokumentalen eredu ofizialak eta ezaugarriak zehazten dira. Dekretu honen xedea, funtsean, hau da: gaur egun dagoen araudia hauteskunde arloko estatuko oinarrizko legediaren azken aldaketetara egokitzea.

Zehazki, Hauteskunde Araubide Orokorrari buruzko 2011ko Lege Organikoaren aldaketaren ondorioz Dekretu honetan sartutako aldaketetako bat honakoa da: modu iraunkorrean atzerrian bizi diren hautesleek bozkatzeko prozedura berria (CERA); horren ondorioz, hauteskunde inprimakiak eta gutun-azalak sortu behar dira.

Halaber, Dekretu honetan zenbait hobekuntza sartu dira hautagaitzek eta hautesleek erabili ohi dituzten hauteskunde-inprimaki batzuetan. Horren helburua hauteskunde Administrazioarekiko komunikazioa erraztea eta azkartzea da. Adibide modura, hautagaitzak aurkezteko inprimakian laukitxo bat gehitu da zerrendetako ordezkariaren helbide elektronikorako. Era berean, Mahaiko kideak izendatzeko inprimakian, Mahaiko kidearen izendapena egin duen hauteskunde-batzordeko harremanetarako datu guztiak agertuko dira.

Bestalde, bozketarako inprimaki, gutun-azal eta txartel gehienak egiteko, Dekretu honek beste paper-mota bat jasotzen du: offset paper zuria, baso-kudeaketa arduratsuko ingurumen-ziurtagiriarekin. Horrela, alde batera utzi da 2008ko Dekretuak exijitzen zuen 1005 paper ekologikoa eta birziklatua; Eusko Legebiltzarrerako 1994ko hauteskundeetatik hona, paper-mota hori erabili izan da. Aldaketaren arrazoia, batez ere, hauxe da: aipatutako papera ekoitzi eta hornitzeko arazoak daude, eta, horregatik, paper hori lortzea zaila da. Hori ez da gertatzen Dekretu honetan arautzen den paper-motarekin.

Azkenik, Dekretu honek informazioaren eta telekomunikazioen teknologia sartzen du hauteskunde-prozesuak garatzeko. Horri esker, herritarrei eta alderdi politikoei erraztu egingo zaie euskal hauteskunde-administrazioarekiko komunikazioa, bitarteko elektronikoen bidez. Horrela, 19 inprimaki elektroniko lortu eta, hala badagokio, autoeditatu ahal izango dira, Eusko Jaurlaritzako web ofizialetik deskarga telematikoa eginez.

Laburbilduz, Dekretu honetan sartu diren aldaketei eta egokitzapenei esker, hauteskunde autonomikoetan parte hartzen dutenek hauteskunde-prozesuaren kudeaketa erraz eta azkarragoa egin ahal izango dute. Horrela, bozketa- eta zenbaketa-prozedura modernizatu eta sinplifikatuko da, eta erabilitako bitartekoen eraginkortasuna handituko da.
 

 

HEZKUNTZA, UNIBERTSITATE ETA IKERKETA SAILA

26,66 MILIOI EURO 0-3 URTERA ARTEKO HAUR-ESKOLENTZAT

Erabakia, titulartasun pribatuko haur hezkuntzako lehen zikloko haur-eskolentzako diru-laguntzetarako deia egiten duen Agindua finantzatzeko 5.000.000 eurotik gorako gastua egiteko baimena emateko dena.

Gobernu Kontseiluak, Hezkuntza, Unibertsitate eta Ikerketa Sailburuaren proposamenez, gaurko bileran onartu du 2012/2013 ikasturterako titularitate pribatuko zerotik hiru artera bitarteko haur-eskolentzat dirulaguntzak deitzen dituen Agindua.

Dirulaguntza horiek, 26,66 milioi euroko zenbateko globala dutenek, titularitate pribatuko haur-eskolak mantentzen laguntzea, familien kuotak gutxitu eta bateratzea eta zerotik hiru urtera arteko haurrentzako eskola horietan ematen diren hezkuntza eta laguntzea hobetzea dituzte helburu, dagoen eskaintza finkatzeko eta, beharrezkoa izanez gero, handitzeko asmoz.
 

 

ESKOLA IBILTARIAK

Erabakia, Eskola Ibiltarien Programari buruz 1990. urtean Hezkuntza eta Zientzia Ministerioarekin izenpetutako hitzarmenari 2012. urtean gehitzeko eranskin ekonomikoa izenpetzea baimentzen duena.

Gobernu Kontseiluak gaurko bileran Hezkuntza, Unibertsitate eta Ikerketa Sailaren eta Hezkuntza eta Zientzia Ministerioaren eta Hezkuntza, Unibertsitate eta Ikerketa Sailaren eta Arabako Foru Aldundiko Gaztediaren Foru Erakundearen arteko hitzarmenen 2012rako eranskin ekonomikoak, 48.238 euroko gehienezko zenbatekoan, izenpetzeko baimena eman dio Hezkuntza, Unibertsitate eta Ikerketa Sailburuari, Eskola Ibiltarien programa dela eta.

 

 

2.0 ESKOLA PROIEKTUA

Agindua, Hezkuntza, Unibertsitate eta Ikerketako sailburuarena, itunpeko ikastetxe pribatuentzat diru-laguntzen deialdia egiten duena 2.0 Eskola Proiektuan jasotako ekintzak gauzatzeko.

Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko bileran onartu du 2.0. Eskola Proiektuan agertzen diren jarduerak gauzatzeko itunpeko ikastetxeetarako dirulaguntzak deitzen dituen agindua.

2012-13 ikasturtean Derrigorrez Bigarren Hezkuntzako lehenengo kurtso irakasten duten EAEko itunpeko ikastetxe pribatuei eman beharreko dirulaguntzak, 1.164.396 euroko zenbateko globalean, deitzea du agindu honek helburu, ikastetxe horiek Informazio eta Komunikazio Teknologiak hezkuntzaren esparruan integratzeko 2.0. Eskola Proiektuan sartu ahal izateko.
 

 

LITERATURA IBILBIDEAK

Erabakia, Literatura Ibilbideak programa garatzeko Hezkuntza Ministerioarekin 2009. urtean izenpetutako hitzarmenarenaren 2012. urteko eranskin ekonomikoa izenpetzeko baimena emateko.

Gobernu Kontseiluak gaurko bileran Hezkuntza, Unibertsitate eta Ikerketa Sailaren eta Hezkuntza Ministerioaren arteko hitzarmenaren 2012rako eranskin ekonomikoa, 14.659 euroko gehienezko zenbatekoan, izenpetzeko baimena eman dio Hezkuntza, Unibertsitate eta Ikerketa Sailburuari, Literatura ibilbideen programa dela eta.

 

 

 

ZEROTIK HIRU URTERA BITARTEKO HAUR ESKOLAK

Erabakia: zero eta hiru urte arteko haur-eskolen titularitea duten udalekin izenpetzeko hitzarmen-eredua eta hitzarmen horiek izenpetzeko 5.000.000 eurotik gorako gastua baimentzeko dena.

Hezkuntza, Unibertsitate eta Ikerketa Sailburuak aurkeztuta, Gobernu Batzordeak Hezkuntza, Unibertsitate eta Ikerketa Sailaren eta zerotik hiru urtera bitarteko Haur Eskoletako titularrak diren Toki Korporazioen artean Lankidetza Hitzarmenak egiteko deialdi publikoa irekitzeari buruzko Agindua onartu du gaur.

Deituriko dirulaguntza hauen zenbateko osoa 5.865.000 eurokoa da. Jasotzaileak zerotik hiru urtera bitarteko Haur Eskoletako titularrak diren Euskal Autonomia Erkidegoko Udalak izango dira, beti ere, aipatutako eskolak mantentzeak eragindako gastuak finantzatzearren.
 

 

ETXEBIZITZA, HERRI LAN ETA GARRAIO SAILA

ERAIKIN MULTZOAK BIRGAITZEKO JABEKIDEEN ERKIDEGOEI ZUZENDUTAKO REVIVE PROGRAMA ONARTU DA

Jaurlaritzaren Kontseiluak argi berdea eman dio etxebizitzak eta eraikinak birgaitzeko laguntza-programa arautzen duen (REVIVE programa) Aginduari, Euskal Autonomia Erkidegoan eraikita dagoen ondarean esku-hartzeko proiektuak egin eta horien ondoriozko obrak gauzatzeko.Guztira, 9,3 milioi euro bideratuko dira programa horretara. Laguntzak Jabekideen Erkidegoei zuzenduta daude, baita etxebizitzen sustatzaile publikoei ere, baldin eta jarduketen eremuan sartuta dauden etxebizitzen jabeak badira.

Proposatutako jarduketen helburua erabilera nagusia etxebizitzarena duten eraikinetako edo eraikin-multzoetako esku hartzeak izango dira, bloke edo etxaldeetan bilduta, 1980a aurretik eraikitakoak badira, hirigintzara moldatuta badaude eta egitura egokia badute.

Euskal hirietako eraikinek gabezia nabarmenak dituzte, eraikin horietan bizi den populazioaren kalteberatasuna azaleratzen laguntzen dutelarik.

Arriskuetariko bat da hirian bazterkeria-eremuak sortzea, baina ez bakarrik populazioaren sektore batzuk ezin dituztelako baliabideak eskuratu, baizik eta eraikinak dauden baldintzetan daudelako, bizigarritasunari, irisgarritasunari eta energia-efizientziari dagokionez.

Eraikita dagoen higiezinen multzoan esku hartzea halabeharrezko helburua da, Etxebizitzaren aldeko Itun Sozialean eta Jaurlaritzako lau sailburuk eta Lehendakaritzako idazkari nagusiak joan den astean aurkeztutako Bultzatu 2025 Eraikingintza Iraunkorraren Planean finkatutako erronkekin bat egin, eta eraikinen birgaitze alorrean hartutako konpromisoak betetze aldera.

Planean zehazten den moduan, mantentze lanetatik haratago joan behar da eta eraikitako higiezinen jarduketa integralak bultzatu, higiezinen bizialdia luzatzeko, gaur egungo erosotasun eta kalitate betekizunetara egokitzeko, bizigarritasun eta irisgarritasunari dagokionez gutxieneko baldintzak betetzeko eta energia-kontsumoa murrizteko. Azken batean, bizilagunen bizi-kalitatearen eta gizarte-kohesioaren mesederako.

Hori guztia lortze aldera, Revive programa jarri da martxan.

Eraikitako ondarean esku hartzeko laguntza-programa honetara bildutako proiektuak eraikinen irisgarritasun- eta bizigarritasun-baldintzak hobetzeko eta energia-efizientzia hobetzeko izango dira. Jarduketetan jasangarritasun irizpideak jarraituko dira.

Jarraian zehaztutako jarduketak biltzen dituzten eskuhartze-proposamenak jaso ahal izango dituzte laguntzak:

a) Eraikinen inguratzailearen gaineko jarduketa -eskari termikoa gutxitzeko- eta ekoizpen termikoko instalazioen gaineko jarduketa –energia kontsumoa murrizteko-. Eraberritzea egin ondoren C motako energia ziurtapena lortzea izango litzateke helburua, urtarrilaren 19ko 47/2007 Errege Dekretuak zehaztutako prozeduraren arabera. Errege Dekretu horretan, oin berriko eraikinen energia-efizientziari buruzko ziurtapena lortzeko prozedura zehazten da, energia sortzeko iturri berriztagarriez baliatuta ahal den neurrian.

b) Airea behar bezala berrituta, barruko airearen kalitatea bermatuko duen aireztatze-sistema ezarri edota hobetu, oin berriko eraikinentzat Eraikingintzaren Kode Teknikoak (EKT) eskatutako gutxieneko parametroekin bat etorrita.

c) Eraikinen irisgarritasun-baldintzak hobetu, etxebizitza bakoitzera iristeko bide publikotik sarbidea izango dela bermatzeko, koskadun desnibelak saihesten ibili beharrik gabe, alegia.

d) Eraikitako perimetroa handitzeko jarduketak, bizigarritasun-baldintzetara egokitzea lortzeko.

e) Hartutako neurrien funtzionamendua eta eraginkortasuna egiaztatzeko sistemen monitorizazioa. Sistema horren bidez, Etxebizitza, Herri Lan eta Garraio Sailak urrutitik egin ahal izango ditu tele-irakurketa, kontsumoari eta ingurumen-baldintzei buruzko datuen bilketa eta ustiaketa.

Orain arte deskribatutako eremuetan ez baldin bada eskuhartzerik egin behar, betekizunak bermatuta daudelako, ez da atal horretako jarduketarik egin beharko, baina aurkeztutako dokumentazioan justifikatu egin beharko da.

Proiektuak idazteko, ordainsarien kostu garbiaren % 90 emango da gehienez ere.

Obrak gauzatzeko, diruz lagun daitezkeen jarduketen kontrataren aurrekontuaren %50 emango da gehienez ere.

Aipatutako portzentajeen batuketa esku-hartze proiektuaren aplikazio eremuan sartutako etxebizitzen kopurua 15.000 eurorekin biderkatuta ematen duen kopurua izango da gehienez ere.

Diru-laguntzak lehiaketa bidez esleituko dira, aurrekontu-kreditua agortu arte, eta hurrenkera honen arabera:

1.- Onartutako proposamenak eremuko jabekideek lortutako adostasunaren eta haiek ordezkatzen duten partaidetza-kuotaren arabera ordenatuko dira. Lehenengo, jabekideen eta partaidetza-kuoten %100en adostasuna duten proposamenak hautatuko dira, eta horrela jarraituko da modu korrelatiboan eta beheranzko hurrenkeran.

Jabeen arteko adostasun portzentaje bera duten proposamenak badaude, hautaketan lehentasuna emango zaie onuradun gisa etxebizitza-kopuru handiena duten esku-hartze proposamenei.

Adostasun eta etxebizitza-kopuruen parametroetan berdindutako proposamenak aurkeztuz gero, babestutako errentamenduko etxebizitza-kopurua handienari eragiten dioten jarduketak hautatuko dira, eta horrela jarraituko da modu korrelatiboan eta beheranzko hurrenkeran.

Aurreko adostasun parametroetan (eremuko etxebizitza-kopurua eta babestutako errentamenduen kopurua) bat egiten duten proposamenak aurkeztuz gero, batez besteko diru-sarrera txikienak dituzten eskabideak hautatuko dira, eta horrela jarraituko da, modu korrelatiboan eta goranzko hurrenkeran.

Diruz lagundutako jarduketak amaituta egon beharko dute 2014ko abenduaren 31 baino lehen.

 

Egungo egoera Euskadin

• 1.004.740 etxebizitzez osatutako parke bat dago, etxekoen unitate bakoitzeko bi laguneko okupazio-ratioarekin, gutxi gorabehera.

• 39 urtetik gorako antzinatasuna du. Europako etxebizitza-parke zaharrenen artean bigarrena da, Erresuma Batukoaren atzetik.

• Edukitze-erregimen "mediterraneoa", jabetzako edukitze-erregimena nagusituz, etxebizitzen % 93raino iristen baita, eta horrek zailagoa egiten du bizitegi-eraikinetan esku-hartze integralak egitea.

• Portaerari dagokionez, euskal gizartearen % 31 kalteberatasun handiko edo oso handiko tipologia duten etxebizitzetan bizi da, eta bizitegi-eraikinen % 15ek berehalako esku-hartzea behar dute. % 9,7k urritasunak ditu, gutxienez, bere kontserbazio-egoeran.

 • Bizitegi-eraikinen % 76,8 jotzen dira sartzeko ezintzat, eta euskal gizartearen % 18,8k identifikatzen du eraikina beren mugikortasun-arazoen gune nagusi gisa. Etxebizitzen % 29k ez dute igogailurik.

 • Bizitegi-sektoreak azken energiaren % 11,66 kontsumitzen du.

 

 Eraikuntza Iraunkorraren Aukera

• Eraikinetan beste esku-hartze batzuekin batera garatzen diren energia-birgaitzeak bi edo hiru aldiz eraginkorragoak dira kostuari dagokionez.

• Eraikuntzak eta etxebizitzak funtsezko papera dute adinekoen eta mendekoen bizitza-kalitatean eta arretan

• Bizitegi-parkean irisgarritasunaren eta erosotasunaren hobekuntzak etorkizuneko kostu handiak ekidin ditzake arreta soziosanitarioari dagokionez.

• Aukera eraginkorrena da Klima Aldaketari eta energia-mendekotasunaren arriskuei aurre egiteko, hain zuzen ere epe laburreko emaitzekin energia-eraginkortasunerako neurriak ezartzeko ahalegin txikiagoak eskatzen dituelako, eta Klima Aldaketarekin lotutako helburuak betetzen eta energia-tarifa murrizte laguntzen duelako.

• Merkatu-aukera paregabea da, eraikuntzaren sektorea birmoldatzea bultzatzeko aukerarekin, hain zuzen ere sektorea aldatu eta berrikuntzarekin bultzatutako eta klima-aldaketaren edo zahartzearen moduko etorkizuneko erronkei aurre egitera bideratutako sektore bat egiteko aukera ematen duelako, birgaitzean eremuko aukerak bultzatu eta aprobetxatzeko gai dena.

 • Enplegu-nitxo nagusietako bat da: eraikinen berrikuntza oso bizia da laneskuan (enplegua sortzeko duen gaitasuna garraio-azpiegituretan inbertsio berbera eginez lortzen dena baino bost aldiz handiagoa da). Inbertitutako milioi euro bakoitzeko zuzeneko 8-14 enplegu sortzeko gaitasuna dauka birgaitzeak. Enpleguaren zati handiena tokikoa da, modu homogeneoan banatua lurraldean barrena, eta ETEek eta profesionalek garatua.

 • Zerga-itzulkin handiak eta finantziazio-aukerak dituen inbertsioa da: Laguntza-euro bakoitzeko zuzeneko inbertsioko 6,9 euro mobilizatzen dira (16,3 euro guztira, eragindako ondorioak kontuan hartuta), eta 1,37 euroko zerga-itzulkina lortzen da (0,55 euro Jaurlaritzak berreskuratua).
 

 

ENPLEGU ETA GIZARTE GAIETAKO SAILA

OSALANEK 650.000 EURO EMANGO DITU LANEKO ARRISKUEI AURREA HARTZEKO PROIEKTUAK DIRUZ LAGUNTZEKO

Ebazpena, Osalan-Laneko Segurtasun eta Osasunerako Euskal Erakundeko zuzendari nagusiarena, laneko arriskuen prebentzioaren arloko ikerketa-proiektuetarako diru-laguntzak ematea arautzen duena.

OSALANek 650.000 euroko kontusaila bideratuko du laneko arriskuei aurrea hartzeko ikerketa-proiektuak diruz laguntzeko. Gobernu Kontseiluak gaur egin duen bileran baiezkoa eman die Laneko Segurtasun eta Osasunerako Euskal Erakundeak 2012an emango dituen diru-laguntza horiei. EAEn erroldatuta dauden pertsona fisikoek eta enpresa publiko zein pribatuek eskuratu ahal izango dituzte diru-laguntza horiek.

Laguntzak eskuratzeko, interesa duten pertsonek edo enpresek administrazioko agiriekin batera beste agiri hauek ere aurkeztu behar dituzte: ikerketa-proiektuaren memoria, zeinetan proiektuaren alderdirik garrantzitsuenak eta helburuak zehaztu behar diren, aurrekariak, gaiak gaur egun duen egoera eta bibliografia nagusia, helburuak, metodologia, lan-plana, ikertzaile-taldeak gai jakin horretan duen esperientzia, laneko arriskuei aurrea hartzeari dagokionez proiektuko emaitzen baliagarritasun praktikoa, proiektua aurrera eramateko dauden baliabideak, eskatutako diru-laguntzaren justifikazioa eta proiektuaren aurrekontua.

Era berean, eskaerarekin batera, ikerketa-proiektuaren bideragarritasunari buruzko txostena aurkeztu behar da, bai eta proiektuan parte hartuko duten ikertzaile guztien curriculum normalizatuak ere (ikertzaileek azken bost urtean egindako argitalpenak hartuko dira kontuan).

Aurreko urtean, kapitulu honen barnean, Osalanek gai hauekin erlazionatutako proiektuak lagundu zituen diruz: laneko arriskuen prebentzioa plataforma altxagarri mugigarriak erabiltzeko metodologia didaktikoan nola integratu, lan-baldintzak eta horien eragina laneko gogobetetasunean, eta jardunbide onei buruzko tresna bat sortzea, metalaren sektoreko euskal ETEtako langileei zuzendutako laneko arriskuen prebentzioari buruzko informazioa eta komunikazioa hobetzeko.
 

 

OSASUN ETA KONTSUMO SAILA

OSASUN ETA KONTSUMO SAILAK 1,6 MILIOI EURO BIDERATUKO DITU 2012AN OSASUN-IKERKETAKO PROIEKTUETARAKO LAGUNTZETARA

Agindua, 2012. urtean hastekoak diren osasun-arloko ikerketa-proiektuetarako laguntzen deialdia egiten duena.

Eusko Jaurlaritzaren Osasun eta Kontsumo Sailak 1.613.235 euro bideratuko ditu 2012an abian jarriko diren osasun-ikerketako proiektuak laguntzera. I+G arloko EAEko zentro publiko eta pribatuei zuzendutako diru-laguntza horien helburua da osasun-zientzien esparruko ikerketa-jarduera sustatzea, Euskadiko osasun-sistemaren etengabeko garapen eta hobekuntzan funtsezko elementu direlako.

Deialdi honetako proiektuak Osasun eta Kontsumo Sailak legegintzaldi honetarako ezarritako estrategiaren arlo berekoak izango dira: gaixotasun kronikoak, ospitaleko medikuntza eta lehen mailako arreta, etxeko arreta eta arreta sozio-sanitarioa bateratzea eta teknologia berriak garatu eta pazienteari aplikatzea.

Ildo horretan, laguntza hauen xede diren proiektuak ikerketa biomedikokoak, teknologien eta zerbitzu sanitarioen ebaluazioko ikerketakoak edo jarduneko ikerketakoak izan ahalko dira.

Ikerketa biomedikotzat hartzen dira oinarrizko ikerketa (gaixotasunera bideratutakoa), ikerketa klinikoa (pazienteari zuzendutakoa), epidemiologikoa –osasun publikoan eta zerbitzu sanitarioetan– nahiz osasuna edo ikerketa biomedikoko prozesu eta teknologiak hobetzera zuzendutako garapen ekonomikoa ere.

 Osasun-teknologia eta -zerbitzuen ebaluazioko ikerketa izango da pertsona osasuntsu edo gaixoen osasun-beharrak estaltzeko erabiltzen diren osasun-teknologien epe labur eta luzerako ondorio kliniko, sozial, ekonomiko, legal eta etikoen ebaluaziora zuzentzen da. Hauek dira osasun-teknologiak: medikamentuak; ekipo, gailu eta prozedura medikoak; antolamendu-ereduak eta langileen babes-sistemak –telemedikuntza, e-osasuna, informazio-sistemak–, osasun-zerbitzuetako ikerketa, osasun-estrategiak, pazientearen segurtasunerako estrategiak, Osakidetzako asistentzia praktika hobetzea, sektore estrategikoetako ikerketa sustatzea eta ekitatea bultzatzea.

 Jarduneko ikerketa lankidetzako eta partaidetzako ikerketa-metodoa da, ikerketa eta ekintza bateratzen dituena osasun-sisteman hobekuntza aplikatuak lortzeko.

Laguntza honen ematea arautzen duen agindua uztailaren 19an argitaratutako da Euskal Herriko Agintaritzaren Aldizkarian (EHAA) eta, eskabideak aurkezteko epea, hilabetekoa izango da, hurrengo egunetik kontatzen hasita.
 

 

EUSKO JAURLARITZAREN OSASUN ETA KONTSUMO SAILAK 200.000 EURO BIDERATUKO DITU 2012AN JARDUERA FISIKO BULTZATZEKO HELBURUA DUTEN TOKIKO EKINTZETARA

Eusko Jaurlaritzaren Osasun eta Kontsumo Sailak 200.000 euro bideratuko ditu 2012an jarduera fisikoa sustatzeko jarduerak burutzen dituzten toki-erakundeetara, herritarren osasuna hobetzeko.

Toki-eremuetan eta osasun-arlokoak ez diren beste zenbait sektoretan egiten diren jardueren bidez osasuna sustatzeko, Osasun eta Kontsumo Sailak laguntzak emango dizkie toki-erakundeei, gure autonomia erkidegoko biztanleen osasuna eta ongizatea zaindu eta babestu ditzaten, jarduera fisikoa sustatzen duten esku hartzeen bidez, Euskadin jarduera fisikoa sustatzeko AKTIBILI estrategian ezarritakoaren ildoan.

2012ko diru-laguntzak, alde batetik, hiriko espazioek desplazamendu aktibo eta seguruetarako eta, bestetik, landa-inguruneek jarduera fisikoa egiteko eskaintzen dituzten aukerak aprobetxatzera zuzendutako jarduera dinamizatzeko soilik izango dira.

Laguntza horietarako 200.000 euro bideratu dira eta honela banatuko dira: diruz lagundu daitezkeen gastuen % 80ra artekoa, gehienez ere 5.000 euro, 7.000 biztanle baino gutxiagoko udalerrietan; eta, % 50era artekoa, gehienez ere 8.000 euro, 7.000 biztanle baino gehiagoko udalerrietan.

Laguntzak lehiaketa bidez esleituko dira, eta eskabideak aurkezteko epea deialdia EHAAn argitaratzen denetik (uztailaren 26rako aurreikusita dago) bi hilabetekoa izango da.
 

 

INGURUMEN, LURRALDE PLANGINTZA, NEKAZARITZA ETA ARRANTZA SAILA

785.000 ¿ LANDA INGURUNEA ETA NEKAZARITZA SEKTOREA TEKNOLOGIA BERRIETAN ETA INTERNETEN TXERTATZEA SUSTATZEKO

Erabakia, honako hauei zuzeneko dirulaguntza emateko: Asociación para el Progreso del Desarrollo Rural - MENDINET, Hazi Kontsultoria S.A, AZTI-AZTI Fundazioa eta Idiazabalgo Udalari; helburua: "Landako eta Nekazaritzako agenda digitala" eta "Landako Euskadi sarean" izeneko ekimenak garatzea.

Jaurlaritzaren Kontseiluak gaurko bileran onetsi du guztira 785.000 euro bideratzea EAEko landa-ingurunea eta nekazaritzako eta elikagaien ingurunea teknologia digitaletan eta interneten txertatzeko hainbat jardunetarako. Laguntza horiek 2015eko Agenda Digitalean barne hartuta daude, eta landa-ingurunea eraginpean hartzen duen hesi digitala gainditzea da 2015eko Agenda Digitalaren jomuga.

Jaurlaritzaren Kontseiluak, horrela, argi berdea eman dio Pilar Unzalu sailburuak egindako proposamenari, hots, Hazi Consultoría sozietateari, Azti Fundazioari, Mendinet Landa Garapenaren Aurrerapenerako Elkarteari eta Idiazabalgo Udalari zuzeneko diru-laguntza horiek ematea onartzen duen proposamenari.

Eustaten Informazioaren Gizarteari buruzko inkestaren adierazleek atzeman dute lehen sektorea –nekazaritza-sektorea– eraginpean hartzen duen hesi digital bat dagoela, ordenagailuen ekipamenduari (% 14,8) nahiz posta elektronikorako irisgarritasunari (% 11,8) eta interneterako sarbideari (% 13,6) dagokienez. Egoera hori, sektore horretan gertatzeaz gain, landa-inguruneko biztanlerian ere jazotzen da, eta horrenbestez, hiri-inguruneekiko desoreka eragiten du.

Egoera hori zuzentzeko, 2015eko Agenda Digitalak bi jardun-ardatz planteatzen ditu; jardun-ardatz horiek, batetik, lehiakortasuna hobetzeko bitarteko gisa ikusten dituzte Informazioaren eta Komunikazioaren Teknologiak –IKTak– (Nekazaritza eta Landa Agenda Digitala), eta bestetik, ongizatea eta bizi-kalitatea hobetzeko baliabide gisa (Landa Euskadi Sarean).

Helburua zera da, lehenik eta behin, herritar autonomo eta parte-hartzaileak izatea esparru digitalean, bigarrenik, sareko enpresa berritzailez osaturiko enpresa-sarea edukitzea, hirugarrenik, zerbitzu digital aurreratu eta irisgarriz osaturiko eskaintza zabal bat garatzea, eta azkenik, gizarte osorako irisgarriak izango diren azpiegiturak zabaltzea.

Horrela, Hazi Consultoría sozietateari emandako diru-laguntzen xedea da Nekazariaren Agenda Digitala proiektua (lehen sektorerako Prestakuntza digitala) eta Landa Euskadi Plataforma sustatzea; Mendinet Elkarteari emandakoena, berriz, tokiko produktuekin negozio elektronikoa bultzatzea eta landa- eta kosta-ingurunerako erreserben zentrala indartzea.

Azti Fundazioaren proiektuak nekazaritzako elikagaien sektorerako negozio-tresnak modernizatzeko jomuga du, eta Idiazabalgo Udalarenak, ostera, ‘Idiazabal Unibertsoa’ bultzatzekoa, Idiazabalgo gaztaren ekoizpenari balioa emateko eta sarean jartzeko, sukaldaritza-aktibo gisa nahiz kulturarekin, paisaia mantentzearekin edota mendiko ekosistemak kontserbatzearekin duen loturagatik.

785.000 euro horien barruan, 600.000 2012rako ordainketa-kredituetarako dira, eta 185.000 euro, berriz, 2013rako konpromiso kredituak.
 

 

277.923 EUROKO KREDITUA GAITU DA EUSKADIKO ESTUARIOETAN EUROPAKO ERKIDEGORAKO INTERESA DUTEN HABITATAK LEHENERATZEKO

Dekretua, "Ingurumenaren Babesa" 4421 Programan 277.923,60 euroko kreditua gaitzeko dena, Euskal Autonomia Erkidegoko Administrazioaren 2012. urterako Aurrekontuko "Europar Batasunarekiko finantza-harremanak" 9311 Programan lortutako sarrerak direla eta.

Jaurlaritzaren Kontseiluak 277.923 euroko kreditua gaitzea onartu du, "Euskadiko estuarioetan Europako Erkidegorako interesa duten habitatak leheneratzeko" proiektua finantzatzeko.

Carlos Aguirre eta Pilar Unzalu sailburuek kreditu hori gaitzeko eginiko proposamenari argi berdea eman dio Jaurlaritzaren Kontseiluak, Europako Batzordearen eskutik zenbateko bereko diru-sarrera gehigarriak lortu ondoren.

LIFE+ programan bilduta daude laguntza horiek, Natura eta Biodibertsitatearen ildoan, "Euskadiko estuarioetan Europako Erkidegorako interesa duten habitatak leheneratzea" proiektuari buruzkoak.

Programa horren barruan, hainbat esku-hartze egin dira Txingudi-Bidasoko Urdaibaiko eta Learen itsasadarreko estuarioetan Baccharis halimifolia landare inbaditzailea kentzeko, eta trataturiko guneak mantendu eta landareak bertan berriz hazteko. Jardun horiei buruzko dibulgazio eta komunikazioko hainbat jarduera ere garatu dira.
 

 

ATUNONTZIEN SEGURTASUN PRIBATUAREN KOSTUAREN % 25 FINANTZATZEKO 1.396.500 EUROKO KREDITUA ONARTU DU JAURLARITZAK

Erabakia, Ingurumen, Lurralde Plangintza, Nekazaritza eta Arrantza Sailaren kreditu-beharrei erantzuteko orotariko kredituaz baliatzekoa -(1.396.500 euro). Helburua: EAEn portu basea duten atunketari izozkailuen segurtasuna finantzatzea.

Jaurlaritzaren Kontseiluak 1.396.500 euroko kreditu gehigarri bat onartu du gaurko bileran, Indiako Ozeanoan aritzen diren atunontzi izoztaileetako eskifaia-kideen segurtasun pribatuaren finantziazioan parte hartzeko.

Horrela, Pilar Unzaluk zuzentzen duen Ingurumen, Lurralde Plangintza, Arrantza eta Nekazaritza departamentuak berretsi egin du akordio hau. Hitzarmen horren arabera, segurtasun-neurrien kostuaren ehuneko 25 ordainduko du Eusko Jaurlaritzak.

2012. urteko kanpainari begira, Indiako uretan aritzen diren barkuetako armadoreek 5.586.000 euroko aurrekontua aurkeztu dute babes-neurrien kostuari aurre egiteko (10 atunontzi eta 3 itsasontzi laguntzaile). Horietatik Eusko Jaurlaritzak 1.396.500 euro ordainduko ditu.

Hitzarmen hori onartzeak, ‘Alakrana’ bahitu baino lehen Eusko Jaurlaritzak hartutako konpromisoa berresten du: atunontzietan jarri diren segurtasun-neurrien kostuaren laurden bat ordaintzekoa.