2013/03/19 (e)ko  saioa 
Aurkibidea

HERRI ADMINISTRAZIO ETA JUSTIZIA SAILA X. LEG.

ERABAKIA, 2013RAKO ESTATUKO AURREKONTU OROKORREI BURUZKO ABENDUAREN 27KO 17/2012 LEGEAREN ZENBAIT ARAUREN AURKA KONSTITUZIOKONTRAKOTASUN-ERREKURTSOA JARTZEA BAIMENTZEKO.
ERABAKIA, HEZKUNTZA, LANBIDE HEZIKETA ETA UNIBERTSITATEKO ESTATUKO IDAZKARITZAREN 2012KO AZAROAREN 26KO EBAZPENAREN KONTRA ADMINISTRAZIOAREKIKO AUZI-ERREKURTSOA AURKEZTEARI BURUZKOA. EBAZPEN HORREN BIDEZ, 2012-2013 IKASTURTERAKO EKARPEN OSAGARRIAK EMATEN ZAIZKIE EUROPAKO GOI-MAILAKO HEZKUNTZAREN ESPARRUKO IKASTETXEEI, ERASMUS PROGRAMAN PARTE HARTZEN DUTEN UNIBERTSITATE-IKASLEENTZAT ETA GOI-MAILAKO IRAKASKUNTZAKO ETA GOI-MAILAKO PRESTAKUNTZA-ZIKLOETARAKO ERAKUNDEENTZAT.

LABURPENA

JAURLARITZAK 2013RAKO ESTATUAREN AURREKONTU OROKORRAREN AURKAKO ERREKURTSOA JARRI DU KONSTITUZIO AUZITEGIAN ESKUMENAK URRATZEN DITUELAKOAN

Jaurlaritzak, gainera, Hezkuntza, Lanbide Heziketa eta Unibertsitateko estatu-idazkariaren ebazpen baten aurkako errekurtsoa ere jarriko du ikasleei Erasmus bekak eskaintzeko laguntzetatik kanpo uzten dituelako LHko zentroak.

Gobernu Kontseiluak baimena eman du gaur 2013rako Estatuaren Aurrekontu Orokorraren abenduaren 27ko 17/2012 Legearen artikulu batzuen aurkako errekurtsoa jartzeko Konstituzio Auzitegian.

Errekurtsoak Estatuko legea inpugnatu egingo du hainbat eskumen urratzen baititu lau esparrutan:

1. Espainiako gobernuak BGAEra egindako ekarpenen bidez ordainsari geroratuak ordaintzea debekatu die herri-administrazioei. Eusko Jaurlaritzak ordainsari-politika finkatzeko ahalmena urratzen duen esku-sartzea dela deritzo.
2. Espainiako Gobernuak langileen plantilletako hutsuneak betetzeko langileak sar daitezkeen sektoreak zein diren adierazi die herri-administrazioei. Jaurlaritzaren iritziz autoantolatzeko eskumena urratzen duen esku-sartzea da.
3. Espainiako Gobernuak kreditu-erreserbak egiten ditu Estatuko Enplegu Zerbitzu Publikorako; esaterako, langabezia agortu duten langabeentzako 400 euroko laguntzaren programarako. Eusko Jaurlaritzak uste du LANBIDEk kudeatu behar duela programa hori, baina Estatuak funts horiek atxikitzen ditu eta jardutea eragozten dio.
4. Gobernuak berriro eten du 2013an mendekotasun-sistemarako finantzaketa. Eusko Jaurlaritzak uste du Estatuak mendekotasunean esku hartzeari utzi behar diola, eskumena duten euskal erakundeek egin dezaten.

Eskumen-urraketa horiek ez dira berriak, 2012an ere gertatu zirelako; horrenbestez, Konstituzio Auzitegian iazko aurrekontuaren aurkako errekurtsoa jartzeko aukera aztertuko du Jaurlaritzak.

 ERASMUS BEKAK

Jaurlaritzak, bestalde, administrazioarekiko auzi-errekurtso bat ere jarriko du Hezkuntza, Lanbide Heziketa eta Unibertsitateko estatu-idazkariaren ebazpen baten aurka, ikasleei Erasmus bekak eskaintzeko laguntzetatik kanpo uzten dituelako LHko zentroak.

2012ko azaroaren 26ko ebazpenak ikasleei Erasmus bekak eskaintzeko laguntzetatik kanpo utzi ditu Lanbide Heziketako zentroak 2012-2013 ikasturtean, aurrekontu-murrizketak arrazoituta.

Jaurlaritzak uste du ikastetxe horiek gainerakoekiko baztertuta gelditu direla, eta, gainera, justifikazio edo motibazio juridikorik gabe egin dutela.
 

 

ENPLEGU ETA GIZARTE POLITIKETAKO SAILA X. LEG.

ERABAKIA, ENPLEGUAREN INGURUKO EKINTZA ETA ZERBITZUENTZAKO LAGUNTZAK FINANTZATZEKO 5.000.000 EUROTIK GORAKO GASTUA BAIMENTZEKO, LANBIDE-EUSKAL ENPLEGU ZERBITZUAREKIN ELKARLANEAN

LABURPENA

EUSKO JAURLARITZAK 9 MILIOI EUROKO GASTUA ONARTU DU ENPLEGUA LORTZEKO ORIENTAZIOAN ERABILTZEKO

Jaurlaritzaren Kontseiluak onartu du, gaurko bileran, bederatzi milioi berrehun eta bat mila euroko gastua baimentzea, enplegurako ekintzak eta lanbide-orientazioko zerbitzuak garatzeko eta enplegu zentroak abian jartzeko diru-laguntzak emateko, Lanbideren lankidetzaz (guztira, 42 zentro ezarriko dira EAE osoan). Kopuru horretatik, 7.820.850 euro 2013ko ordainketa-kredituari dagozkio, eta gainerakoa, 1.380.150 euro, 2014ko konpromiso-kredituari.

Diru-laguntzen deialdi honek enplegua bilatzeko informazio-, laguntza-, motibazio- eta aholku-inguruko ekintzak eta neurriak zehazten ditu, betiere hartzaileen zirkunstantzia pertsonalak eta profesionalak kontuan hartuta. Izan ere, aholkularitza-zerbitzu horien bidez pertsonen gaitasunak eta interesak zehazten dira, eta haien ikasketa-ibilbide indibiduala kudeatzen da, bai eta enplegu bilaketa edo enpresa-ekimenak gauzatzea ere.

Zerbitzu horren helburua da, hain zuzen, lehentasunezkotzat jotako kolektiboei laguntzea, bereziki gazteei, prestakuntza-defizita duten pertsonei edo luzaroko langabetuei, emakumeei, 45 urtetik gorakoei eta ezintasunen bat dutenei edo gizarte-bazterketa nozitzen dutenei.

Enplegurako orientazioa Euskal Autonomia Erkidegoko enplegurako politika aktiboen parte da, eta zerbitzu publikoek eman behar dituzten zerbitzuen katalogoaren barruan dago. Lanbide Euskal Enplegu Zerbitzuaren bidez gauzatzen dira politika horiek; hala, haren Administrazio Kontseiluak onartu zuen, joan den urtarrilaren 21ean, laguntzen deialdia egitea. Jende asko izan daitekeenez laguntzon hartzaile, Euskal Enplegu Zerbitzuak erakundeen sare bat premiaz aukeratzeko prozedura ezarrita dauka, sare hori Lanbideko bulegoekin lankidetzan arituko baita, Lanbideren erabiltzeentzat ezartzen diren ibilbide pertsonalizatuetatik ondorioztatzen diren orientazioko ekintzak eta zerbitzuak ematen.

Berebiziko garrantzia dauka pertsonak teknologia berrietara iristea errazteko berrogeita bi enplegu-zerbitzu abian jartzeak, teknologia horiek enplegua bilatzeko funtsezko tresnak diren heinean. Enplegu-zentro horietatik hiru bereziki prestatu dira enplegua lortzeko zailtasun handiak dituzten pertsonentzat.
 

 

OGASUN ETA FINANTZA SAILA X. LEG.

DEKRETUA, ENPRESA TXIKI ETA ERTAIN, BAKARKAKO ENPRESABURU ETA PROFESIONAL AUTONOMOEI FINANTZA-LAGUNTZA EMATEKO PROGRAMA GARATZEKOA.

LABURPENA

EUSKO JAURLARITZAK ETE, BANAKAKO ENPRESABURU ETA PROFESIONAL AUTONOMOEI FINANTZA LAGUNTZA EMATEKO 600 MILIOI EUROKO PROGRAMA BAT ONARTU DU

Gobernu Kontseiluak Euskadiko ETE, banakako enpresaburu eta profesional autonomoei bideratutako Finantza Laguntza Programa bat eratzen duen dekretua onartu du gaurko bileran. 600 milioi euroko zuzkidura izango du, gehienez ere, eta kolektibo horiek bankuen finantzaketa eskuratu ahal izatea du helburu, horiek dituzten kapital zirkulatzailearen beharrei erantzuteko eta zorra berregituratzeko –epe laburrerako zorra berritzea edo epe laburrerako zorra epe ertain eta luzerako zor bihurtzea–.

Egungo ekonomia- eta finantza-krisialdian, ekoizpen-sektoreek zailtasun handia izaten dute finantzaketa lortzeko, finantza-merkatuek dituzten murrizketak direla-eta. Arazo hori are larriagoa izaten da ETE, banakako enpresaburu eta profesional autonomoen kasuan, eta Euskadin enpresa-sarearen % 90 dira.

Jaurlaritzak salbuespenezko mekanismo hau ezartzea erabaki du, egoera berezi horri aurre egiteko; batetik, kolektibo horien finantza-beharrei erantzuteko eta oztopoak arintzeko, eta bestetik, zailtasun handiagoa duten talde horiek gure lurraldean garrantzi handia dutelako.

Jaurlaritzak onartutako dekretuak programa honen bidez ezarritako finantza-laguntzaren hainbat ezaugarri arautzen ditu (onuradurak, baldintzak, baliabideen erabilgarritasuna, maileguen baldintzak eta izapidetzeko prozedurak).

Ogasun eta Finantza Sailak, programa inplementatzeko, dagozkion hitzarmenak sinatuko ditu horren garapenean esku hartu nahi duten elkarren bermerako sozietateekin, finantza-erakundeekin eta borondatezko gizarte-aurreikuspeneko erakundeekin.

Programaren onuradunak

Enpresa txiki eta ertainak Europako definizioaren araberako enpresa txikiak eta ertainak (ETEak), Euskadin egoitza dutenak eta baldintza hauek betetzen dituztenak:

  1) Jarduera ekonomikoren bat egitea.
  2) 250 langile baino gutxiago edukitzea.
  3) Urteko negozio-bolumena 50 milioi eurotik gorakoa ez izatea, edo urteko balantze orokorra 43 milioi eurotik gorakoa ez izatea.
  4) Beste enpresa batek edo enpresa batzuek elkarrekin % 25 edo gehiagoko partaidetza zuzenean edo zeharka ez edukitzea aurretik azaldutako eskakizunetakoren bat ez betetzea.

Banakako enpresaburuak eta profesional autonomoak Euskadin egoitza dutenak eta baldintza hauek betetzen dituztenak:

1) Norberaren konturako langileen edo autonomoen Gizarte Segurantzaren araubide berezian alta emanda izatea.
2) Pertsona Fisikoen Errentaren Zergari lotutako jarduera ekonomikoen edo profesionalen bidez etekinak lortzea.

Jarduera ekonomikoko sektore guztiek jo dezakete programara, baina ezin dira onuradun izan erakunde eta sozietate publikoak, finantza-erakundeak edo higiezinen arloko jarduerak, besteak beste.

Programari heldu nahi dioten enpresak ez dira krisi-egoeran egon behar –Europako Batzordeak horren gainean emandako definizioaren arabera–, eta Foru Ogasunarekin eta Gizarte Segurantzarekiko betebeharren ordainketa egunean eduki behar dute.

Programaren inplementazio operatiboa

Finantzazio-ildo honen bitartez, EAEko Herri Administrazioak programa agituratzeaz gain, gaur Jaurlaritzak onartu duen dekretuaren bidez hitzartuko diren mailegu-eragiketak bermatuko ditu.

Hortik aurrera, elkarren bermerako sozietate batek bermatu behar ditu erregulazio horri jarraiki gauzatutako mailegu-eragiketa guztiak; horretarako, Euskadiko administrazioak eta programan parte hartzen duten elkarren bermerako sozietateek hitzarmen bat sinatuko dute, finantza-eragiketa horiei berme-sistema bat ematearren. Elkarren bermerako sozietateek emandako abalek onuradunen finantza-arriskuak bermatuko dituzte finantza-erakunde laguntzaileen aurrean, alegia.

Bestalde, Euskadiko administrazioak eta programan parte hartzen duten finantza-erakundeek lankidetza-hitzarmenak sinatuko dituzte onuradunen aldeko maileguak gauzatzeko.

Halaber, Euskadiko administrazioak, finantza-erakundeek eta programan parte hartu nahi duten borondatezko gizarte-aurreikuspeneko erakundeek lankidetza-hitzarmenak sinatu ahal izango dituzte finantza-erakunde laguntzaileetan banku-gordailuak eratuz finantzaketa bideratzeko moduak bilatzeko.

Horrenbestez, finantza-erakundeek programara bideratzen dituzten funtsak hauetatik aterako dira: haien baliabideetatik, SGR bermeko ICO lineatik, baita, hala badagokio, Euskadiko borondatezko gizarte-aurreikuspeneko erakundeek xede horrekin eratzen dituzten gordailuetatik ere.

Elkarren bermerako sozietateek aztertu eta ebaluatuko dituzte aurkeztutako eskabideak eta, hala badagokio, bermerako baimena ere emango dute; hala, berau onetsitakoan, enpresa, enpresaburu edo autonomo eskatzaileak mailegu-eragiketa gauzatuko du lankidetza-hitzarmena sinatu duen finantza-erakunderen batekin.

Programaren onuradunek Ogasun eta Finantza Sailak jakinarazi ez dituen egiaztatze-, ikertze- eta ikuskatze-jarduerak jasoko dituzte.

Programa jarraitzeko eta ebaluatzeko batzorde bat eratuko da, hauexek osatuta: Eusko Jaurlaritzako Ogasun eta Finantza Sailaren ordezkariek, eta programan parte hartzen duten elkarren bermerako sozietateen, finantza-erakundeen eta borondatezko gizarte-aurreikuspeneko erakundeen ordezkariek. Batzorde horrek programaren aplikazioa eta bilakaera aztertuko ditu.

Finantza-laguntzarako linea honek estatu-laguntzak arautzen dituen Europako araudiak betetzen ditu, eta bateragarria da beste edozer herri-administrazio, sail, erakunde edo entitate publiko edo pribatuk emandakoekin, betiere, laguntzak batzean erkidego-arau horiek ezarritako zenbatekoa gainditzen ez bada.

Mailegu-eragiketaren ezaugarriak

Mailegu-eragiketek ezaugarri hauek edukiko dituzte:

  1) Tresnak: mailegu amortizagarria.
  2) Interes-tasa: Hamabi hilabeterako euriborra, gehi % 3,5.
  3) Epea: 3, 5 eta 7 urte, eta beste bat aukerako gabealdikoa zenbateko nagusia amortizatzeko.
Interesen eta amortizazioaren likidazioa hiruhilekoan behin egingo da; interes-tasa berrikusteko epe bera izango da mailegua tasa aldakorrarekin gauzatuz gero.
Mailegu-hartzaileek aurretiaz ezeztatu edo amortizatu ahal izango dituzte maileguak, inolako kosturik gabe.
  4) Maileguek ez dute inolako komisio edo gastu gehigarririk izango.
  5) Hauxe izango da maileguen zenbatekoa:
    - 50.000 € eta 650.000 € artean, enpresa txiki eta ertainentzat.
    - 10.000 € eta 100.000 € artean, banakako enpresaburuentzat eta profesional autonomoentzat.

Deialdiak

Jaurlaritzak gaur onetsitako dekretuak araututako finantza-laguntzarako lineak eskuratzeko deialdia egingo da; Euskal Herriko Agintaritzaren Aldizkarian argitaratuko da hori, eta publizitate-, lehia- eta objektibotasun-printzipioei jarraitu beharko zaie.

Ogasun eta Finantzako sailburuaren aginduaren bitartez egingo da deialdia, eta erabilgarri dauden baliabideen guztizko zenbatekoa, eskabideak aurkezteko epe eta lekua eta gainerako prozedura-alderdiak zehaztu beharko dira bertan. Era berean, programan lagunduko duten finantza-erakundeen eta elkarren bermerako sozietateen zerrenda ere zehaztuko da.

Lehen deialdia ere onartu da gaur, eta dekretuarekin batera argitaratuko da EHAAn; 300 milioi €-koa izango da: 280 milioi € enpresa txiki eta ertainentzat eta 20 milioi € banakako enpresaburu eta profesional autonomoentzat.

Interesdunek www.euskadi.net atarian edo Zuzenean arreta-zerbitzuaren bitartez (012 telefono-zenbakia) eskuratu ahal izango dute informazio gehiago, baita eskaera-orriak ere.
 

 

HEZKUNTZA, HIZKUNTZA POLITIKA ETA KULTURA SAILA X. LEG.

AGINDUA, GARAPEN-LANKIDETZARAKO ENTITATEEI DEI EGITEN DIENA EUSKADIKO AUTONOMIA ERKIDEGOKO ADMINISTRAZIO OROKORRAREN 2013KO «EUSKADIKO GAZTEAK EKINEAN» PROGRAMARAKO PROIEKTUAK AURKEZTEKO.

LABURPENA

GARAPEN LANKIDETZAREKO ENTITATEEI DEIALDIA, PROIEKTUAK AURKEZ DITZATEN

Gobernu Kontseiluak, Hezkuntza, Hizkuntza Politika eta Kultura Sailburuaren proposamenez, onartu du Agindu bat, zeinaren bidez garapen-lankidetzarako entitateei dei egiten baitie 2013ko «Euskadiko Gazteak Lankidetzan» programarako proiektuak aurkez ditzaten. Era berean, Agindu honen bidez ezarri nahi dira programa horretarako lankidetza-proiektuak aurkezteko arauak, bai eta proiektu egokienak aukeratzekoak ere. Agindu honen helburua da, orobat, Euskadiko Gazteak Lankidetzan programan hautatutako gazteak partaide direneko proiektuak dituzten entitate onuradunei diru-laguntza bat emateko baldintzak ezartzea

Eskaera aurkeztu ahal izango dute irabazi asmorik gebeko erakundeek, beti ere Euskadiko Autonomia Erkidegoan egoitza zentrala edo ordezkaritza iraunkorra badute.

Deialdiaren zenbatekoa 45.000 eurokoa da. Agindu honek Euskal Herriko Agintaritzaren Aldizkarian argitaratu eta hurrengo egunean sortuko ditu ondorioak.
 

 

AGINDUA, EUSKADIKO GAZTEAK LANKIDETZAN PROGRAMARAKO AURTENGO DEIALDIA EGITEKO DENA.

 LABURPENA

155.000 EURO «EUSKADIKO GAZTEAK LANKIDETZAN» PROGRAMAREN DEIALDIRAKO

Gobernu Kontseiluak, Hezkuntza, Hizkuntza Politika eta Kultura Sailburuaren proposamenez, onartu du «Euskadiko Gazteak Lankidetzan» programarako 2013ko deialdia egiten duen Agindua, bai eta bertan parte hartzeko modua arautu ere.

Euskadiko gazteak garapenerako elkarlanean sentsibilizatzea da aipatutako programaren helburua. Aurtengo ekitaldi honetan ere, Euskadiko gazteak lankidetza kontzeptura hurbil daitezen lortu nahian jarraitzen dugu, era berean, ekintza horiek nola burutzen diren bertatik ezagutzeko aukera emanez.

Programa hau diru-laguntza da. Pertsona onuradunak ez du zuzenean jasoko diru-kopururik, Gazteria Zuzendaritzak kudeatuko baititu laguntzari dagozkion bidaia-txartelak eta gainerako prestazioak. Programa honek 2013ko ekitaldirako guztira duen gehieneko zenbatekoa 155.000 eurokoa da. Zenbateko hori handitu egin ahalko da agindu honen Xedapen Gehigarrian zehaztutakoaren arabera.

Hautatutako herrialde eta lankidetza-proiektu jakinetara 20 eta 30 urte bitarteko (1983 eta 1993 artean jaioak, biak barne) 100 pertsona aukeratuko dira gehienez.

Eskabideak aurkezteko epea hilabetekoa izango da, agindu hau indarrean sartzen den egunetik kontatzen hasita.
 

 

INGURUMEN ETA LURRALDE POLITIKA SAILA X. LEG.

ERABAKIA, 5.000.000 EURO BAINO GEHIAGOKO AURREKONTUKO OBRA-KONTRATUAREN LEHEN ALDAKETA BAIMENTZEKO, EUSKAL TRENBIDE SARE BERRIAREN PLATAFORMA ERATZEKO. BIDE-TARTEA: BERGARA-ANTZUOLA.

LABURPENA

EUSKO JAURLARITZAK ONTZAT EMAN DU BERGARA ETA ANTZUOLA ARTEKO «Y» TRENBIDEAREN LANEN KOSTUEN GEHIKUNTZA

Gobernu Kontseiluak onartu egin du Euskadiko trenbide-sare berriaren plataforma eraikitzeko obra-espedienteari loturiko lan-kontratuaren lehen aldaketaren gastua. Bergara eta Antzuola arteko bide-zatiari eragiten dio (6M/12-14/09-C01/019/2009) eta 2013 ekitaldirako Euskal Autonomia Erkidegoko Aurrekontu Orokorren kontura finantzatuko da eta 6.109.876,26 euroko exekuzio-aurrekontua izango du.

Ingurumen eta Lurralde Politika Sailak, Estatuko Administrazio Orokorrak eta ADIFek Euskadiko trenbide-sare berria eraikitzeko 2006ko apirilaren 24ean sinatutako hitzarmenaren harira onartutako betebeharren arabera, «Y» trenbidearen Bergara eta Antzuola arteko bide-zatiaren lan-espedientea izapidetu du, 6.109.876,26 euroko (BEZ barne) aurrekontu-gehikuntza barne hartuta.
 

 

ERABAKIA, URAREN KONTSEILU NAZIONALEKO EUSKAL AUTONOMIA ERKIDEGOAREN ORDEZKARITZA IZENDATZEKOA

LABURPENA

IÑIGO ANSOLA IZANGO DA EAEREN ORDEZKARIA ESPAINIAKO URAREN KONTSEILUAN

Gobernu Kontseiluak Iñigo Ansola Euskadiko Uraren Agentziako zuzendari nagusia izendatu du EAEren ordezkari izateko Espainiako Uraren Kontseiluan. Gainera, José María Sanz de Galdeano Plangintza eta Lanen zuzendaria hautatu du Ansolaren ordezko izateko.

 

 

DEKRETUA, ZEINAREN BIDEZ URGENTZIAKO DEKLARATZEN BAITA BILBAO BIZKAIA UR PATZUERGOAK, NAHITAEZ DESJABETZEKO, HONAKO ESKUBIDE ETA ONDASUNAK OKUPATZEA: DIMA ETA ZEANURIKO GOIKO AUZOAK HORNITZEKO PROIEKTUA. II. FASEA: BERETXIKORTA-ORTUZAR HODITERIA» BURUTZEKO BEHARREZKO ONDASUN ETA ESKUBIDEAK.

LABURPENA

EUSKO JAURLARITZA DIMAKO ETA ZEANURIKO GOI AUZOEK UR HORNIDURA IZATEKO IZAPIDETZE ADMINISTRATIBOA GAUZATZEN ARI DA

Eusko Jaurlaritzak premiazkotzat jo du hainbat lursail desjabetzea Dimako eta Zeanuriko goi-auzoen ur-hornidurarako. Bilbao Bizkaia Ur Partzuergoak lursail horiek erabili ahal izatea beharrezkoa da Dimako eta Zeanuriko goi-auzoak hornitzeko proiektuaren bigarren fasea, Beretxikorta-Ortuzar hoditeriari dagokiona, gauzatzeko.