2014/12/30 (e)ko  saioa 
Aurkibidea

HERRI ADMINISTRAZIO ETA JUSTIZIA SAILA X. LEG.
Erabakia, zeinaren bidez baimena ematen baita lege honen zenbait aginduren aurka konstituzioaren aurkakoak direla adieraziz errekurtsoa jartzeko: 18/2014 Legea, urriaren 15ekoa, hazkundea, lehiakortasuna eta eraginkortasuna bultzatzeko premiazko neurriak onartzen dituena.
Erabakia, zeinaren bidez jakinarazten baita Jaurlaritzak zer iritzi duen Euskal Talde Popularra legebiltzar-taldeak Familiei laguntzeari buruzko abenduaren 12ko 13/2008 Legea aldatzeko aurkeztutako lege-proposamena aintzat hartzeari buruz.
EKONOMIAREN GARAPEN ETA LEHIAKORTASUN SAILA X. LEG.
Lege-proiektua, Merkataritza Jarduerari buruzko Legea hirugarren aldiz aldatzen duena.
ENPLEGU ETA GIZARTE POLITIKETAKO SAILA X. LEG.
Erabakia, Lanbide-Euskal Enplegu Zerbitzuaren giza baliabideak berrantolatzeko plana onartzeko eta abian jartzeko.
HEZKUNTZA, HIZKUNTZA POLITIKA ETA KULTURA SAILA X. LEG.
Erabakia, 2015-18 Unibertsitario Plana onesten duena.
HERRI ADMINISTRAZIO ETA JUSTIZIA SAILA X. LEG.

ERABAKIA, ZEINAREN BIDEZ BAIMENA EMATEN BAITA LEGE HONEN ZENBAIT AGINDUREN AURKA KONSTITUZIOAREN AURKAKOAK DIRELA ADIERAZIZ ERREKURTSOA JARTZEKO: 18/2014 LEGEA, URRIAREN 15EKOA, HAZKUNDEA, LEHIAKORTASUNA ETA ERAGINKORTASUNA BULTZATZEKO PREMIAZKO NEURRIAK ONARTZEN DITUENA.

LABURPENA

JAURLARITZAK ERREKURTSOA AURKEZTUKO DU KONSTITUZIO AUZITEGIAREN AURREAN, MERKATARITZA ORDUTEGIAK GUZTIZ LIBERALIZATZEN DITUEN LEGEAREN AURKA, ETA IKASTEN ARI EZ DIREN ETA LANIK EZ DUTEN GAZTEENTZAKO LAGUNTZAK ARAUTZEN DITUENA

• 18/2014 Legeak barne-merkataritzako eta merkataritza-ordutegiak arautzeko euskal eskumenak urratzen ditu, baita 2010ean transferitutako enplegu-politika aktiboak ere.
• Eusko Jaurlaritzak bi eskumenok urratu direla salatu du eta, legegintzaldi honetan lehen aldia ez dela adierazten du.

Gobernu Kontseiluak gaur onartu du Konstituzio-kontrakotasun errekurtsoa aurkeztea hazkuntzaren, lehiakortasunaren eta eraginkortasunaren aldeko premiazko neurriak onartzeko urriaren 15eko 18/2014 Legearen aurka. Izan ere, Lege horrek bi eskumen urratzen ditu:

• Barne-merkataritzaren eta merkataritza-ordutegien gaineko eskumena: 18/2014 Legeak merkataritza-ordutegien guztizko liberalizazioarako baldintzak jartzea Estatuari dagokiola dio eta horrek de facto eragingo lioke Donostiari, Udalaren eskaerarik ez balego edota Euskal Autonomia Erkidegoko erresoluziorik ez balego, «establezimenduei urte osoan eta hirian edonon daudela ere irekitzeko askatasun osoa emango baitzaie». (4., 5. eta 7. artikuluak eta I. eranskina errekurritu dira).
• Enplegu-politika aktiboen gaineko eskumena: 18/2014 Legeak Gizarte Segurantzaren kuoten hobariak arautzen ditu, ikasten ari ez diren eta lanik ez duten gazteen kontratazioa sustatzeko. (107. artikuluaren 2., 6., 12. eta 13. paragrafoak errekurritu dira).

Eusko Jaurlaritzak eskumen-urraketok errepikakorrak direla salatzen du eta orain arteko negoziazioek –legegintzaldi honetan, gutxienez birritan abiatu dira negoziazioak, Konstituzio Auzitegian errekurtsoa aurkeztu behar izatea beste emaitzarik ez dutenak izan– porrot egin dutela adierazten du:

20/2010 Errege Lege-dekretua, uztailaren 13koa, aurrekontu-egonkortasuna bermatzeko eta lehiakortasuna bultzatzeko neurriei buruzkoa. (merkataritza-ordutegiak, beheraldiak, promozioak, salgai-hondarren araudia, etab.).
1/2013 Errege Lege-dekretua, urtarrilaren 25ekoa, langabezia-prestazioa agortzen zaien pertsonen lanbide-prestakuntza eguneratzeko programa luzatzen duena eta langabeen enplegurako eta babes sozialerako premiazko beste neurri batzuk ezartzen dituena. (Prepara plana, luzaroko langabetuentzako 400 euroko laguntza, etab.).

MERKATARITZA ORDUTEGIEN LIBERALIZAZIOA

Lehenik, 18/2014 Legeak biztanle-kopuruaren (100.000 biztanle) eta hotel-okupazioaren (600.000 ostatu-gau urtean) atalaseak mailaz beheratu ditu, eremu bati «turista-etorri handiko eremu» izendatzeari dagokionez. Atalaseok beheratu izanak, Euskadiren kasuan, Donostiako merkataritza-ordutegien guztizko liberalizazioa de facto ekarriko du eta «merkatariek askatasun osoa izango dute urte osoan zehar establezimendua ireki ahal izateko», hirian edonon daudela ere, baldin eta Eusko Jaurlaritzak, Udalak eskatuta, 6 hilabete baino lehen ez badu mugatzen «turista-etorri handiko» eremu zeintzuk diren.

Eusko Jaurlaritzak neurri horiek bere eskumenak urratu dituztela salatu du; izan ere, Euskadin, udal-eremuak «turista-etorri handiko eremu» gisa izendatzeko, udal interesdunak aurretiaz egin behar dio eskaera Eusko Jaurlaritzari, erkidego-eskumeneko prozesua eta izapidetzea abiaraziz. Espainiako gobernuak, barne-merkataritzaren esparruko araudiari eginiko aldaketen eta eguneraketen bidez, Euskadiren eskumenei koska handia jan die, harik eta, azken erreformarekin, barne-merkataritzako eskumena eta bere errealitate sozioekonomikoari egokitutako merkataritza-politika diseinatzeko gaitasuna, Gernikako Estatutuaren 10.27. artikuluan jasota daudenak, erabat hutsaldu arte.

Gainera, Jaurlaritzak gogora ekarri nahi du Konstituzio Auzitegiak hainbatetan esana duela Estatuak, bere oinarrizko eskumenak gauzatzean, ezin duela esparru baten gaineko araudia agortu, eta autonomia-erkidegoei beren legediak osatzeko tarterik ez utzi, erkidegoek esparru horretan bertan eskumenak badituzte.

IKASTEN ARI EZ DIREN ETA LANIK EZ DUTEN PERTSONENTZAKO LAGUNTZAK

Bigarrenik, 18/2014 legeak neurri-sorta bat arautu du, ikasten ari ez diren eta lanik ez duten 16 eta 30 urte arteko pertsonei zuzendua, eskolaratu edo laneratu daitezen. Neurri horien artean dago Gizarte Segurantzaren kuotan 300 euroko hobaria ematea enpresei 6 hilabetez, aipatutako egoeran dauden gazteak kontratatzen badituzte.

Eusko Jaurlaritzak Espainiako gobernuari gogorarazi nahi dio 2010ean transferitu zitzaiola Euskadiri enplegu-politika aktiboen eta enplegu-sustapenaren gaineko eskumena, eta lan-bitartekaritzako, enplegua sustatzeko eta laguntzeko edota lanbide-heziketako ekimen oro Euskal Autonomia Erkidegoaren eskumenekoa izan behar dela eta Lanbideren bidez kudeatu behar dela.

10 ERREKURTSO KONSTITUZIO AUZITEGIAN

Hizpide dugunaz gain, legegintzaldi honetan, Eusko Jaurlaritzak beste 9 errekurtso aurkeztu ditu Konstituzio Auzitegian, hainbat legeren eta errege lege-dekreturen eskumen-urraketak direla medio. Ebazpena eman gabe daude guztiak ere:

• 1/2013 Errege Lege-dekretua, urtarrilaren 25ekoa, langabeziagatiko prestazioa agortzen zaien pertsonen lanbide-prestakuntza eguneratzeko programa luzatzen duena. (Prepara Plana, 400 €-en kudeaketa)
• 2012rako Aurrekontuen Espainiako Legea. (Funtzionarioen aparteko ordainketa eta funtzionarioen barne-antolaketa)
• 2013rako Aurrekontuen Espainiako Legea. (Funtzionarioen aparteko ordainketa eta funtzionarioen barne-antolaketa)
• Estatuko 20/2012 Errege Lege-dekretua, uztailaren 13koa, aurrekontu-egonkortasuna bermatzeko eta lehiakortasuna bultzatzeko neurriei buruzkoa. (Merkataritzaren gaia: 27. eta 28. artikuluak, eta funtzionarioen gaia: 2., 8. eta 10. artikuluak)
• 4/2013 Errege Lege-dekretua, otsailaren 22koa, eta 11/2013 Legea, uztailaren 26koa, ekintzaileari laguntzeko eta hazkundea eta enpleguaren sorrera bultzatzeko neurriei buruzkoa. (Interes orokorrekotzat jotako trenbideak)
• Hezkuntzaren arloko gastu publikoa arrazionalizatzeko premiazko neurriei buruzko 14/2012 Errege Lege-dekretua.
• Osasun Sistema Nazionalaren iraunkortasuna bermatzeko eta sistemaren prestazioen kalitatea eta segurtasuna hobetzeko premiazko neurriei buruzko apirilaren 20ko 16/2012 Errege Lege-dekretuaren zati bat.
• 8/2013 Legea, abenduaren 9koa, Hezkuntza Kalitatea hobetzekoa. (LOMCE)
• 1/2014 Legea, otsailaren 28koa, lanaldi partzialeko langileak babesteari eta arlo ekonomiko eta sozialeko beste premiazko neurri batzuei buruzkoa.
 

 

ERABAKIA, ZEINAREN BIDEZ JAKINARAZTEN BAITA JAURLARITZAK ZER IRITZI DUEN EUSKAL TALDE POPULARRA LEGEBILTZAR-TALDEAK FAMILIEI LAGUNTZEARI BURUZKO ABENDUAREN 12KO 13/2008 LEGEA ALDATZEKO AURKEZTUTAKO LEGE-PROPOSAMENA AINTZAT HARTZEARI BURUZ.

LABURPENA

EUSKO JAURLARITZAK USTE DU DESEGOKIA DELA LANA ETA FAMILIA BATERAGARRI EGITEKO LAGUNTZAK ESKUBIDE SUBJEKTIBO BIHURTZEA, EGOERA EKONOMIKOA DELA ETA

• Estatuan parekorik ez duen babes sozialeko sistema mantentzeko euskal gizartea Euskadin ahalegin handia egiten ari dela gogorarazi du Eusko Jaurlaritzak.
• Gainera, gaur egungo langile guztiek ezin dituzte eskuratu bateragarritasun-neurri horiek eta, horregatik, jaiotza-tasaren eta familien aldeko euskal estrategia berri bat diseinatzea funtsezkoa dela uste du gobernuak.

Gobernu-kontseiluak familiei laguntzeko abenduaren 12ko 13/2008 legea aldatzeko Euskal Talde Popularrak egindako lege-proposamena kontuan hartzearen kontra dagoela adierazi du. Aldaketa honen bidez, alderdi popularrak bizitza pertsonala, familia-bizitza eta laneko bizitza bateragarri egiteko laguntzak eskubide subjektibo bihurtu nahi ditu.

Lehenik eta behin, Estatuan parekorik ez duen babes sozialeko sistema mantentzeko euskal gizartea Euskadin ahalegin handia egiten ari dela gogorarazi du Eusko Jaurlaritzak.

Laguntza horiek eskubide subjektibo bihurtzea, gaur egungo egoera ekonomikoa eta epe laburrerako nahiz ertainerako aurreikusitako egoera kontuan izanda, desegokia eta garaiz kanpokoa da. 2015erako aurreikusitako aurrekontu-kopuruekin, herritarrek alor horretan aurkezten dituzten eskaerei arreta emango zaie, baina ezinezkoa izango da alor honetako aurrekontu-gastua handitzea.

Gainera, autonomo gisa lan egiteagatik edo langilearen enpresako egoerarengatik, langile guztiek bateragarritasun-neurri hauek ezin dituztela eskuratu gogorarazi du gobernuak; beraz, Eusko Jaurlaritzak hasitako gogoeta-prozesuan aurrera egitea beharrezkoa da. Prozesu horretan, babes sozialeko sistemako laguntza guztiak aztertuko dira eta jaiotza-tasaren eta familien aldeko euskal estrategia berri bat egingo da.

Azkenik, gobernuak gogorarazi du agente sozialekin laneko bizitza eta familia-bizitza bateratzeko baldintzak negoziatzeko eta hitzartzeko gunea elkarrizketa sozialaren mahaiak direla.
 

 

EKONOMIAREN GARAPEN ETA LEHIAKORTASUN SAILA X. LEG.

LEGE-PROIEKTUA, MERKATARITZA JARDUERARI BURUZKO LEGEA HIRUGARREN ALDIZ ALDATZEN DUENA.

LABURPENA

MERKATARITZA JARDUERAREN LEGEA ALDATZEKO PROPOSAMEN BAT BIDALIKO DIO JAURLARITZAK LEGEBILTZARRARI.

Merkataritza-jardueraren maiatzaren 27ko 7/1994 Legeak, bere garaian eman baitzuten Autonomia Estatutuaren 10.27 artikuluak aurreikusitakoaren babesean, bideak ezarri zituen merkataritza-banaketa modernizatzeko, hargatik ahaztu gabe zailtasun bat: ohiko txikizkako merkataritzaren eta sortzen ari ziren banaketa-modu berrien arteko oreka. Hasierako erredakzioan, oso erregulazio gutxi zuen merkataritza-establezimenduen ordutegiei eta irekitzeko egunei buruz.

Legearen aldaketaren xedapen-zatiak hiru artikulu ditu, bai eta azken xedapen bat ere. Artikuluetan lehenak euskararen erabilera bultzatzea sartu du legearen antolamendu-printzipioetan. Bigarrenak, lehenengo xedapen gehigarria gehitu dio legeari, joan-etorri turistiko handiko lekuak izendatu edo deklaratzeko prozesua arautzeko. Hirugarren artikuluak, bere aldetik, erregelamenduetara jotzen du merkataritza-ordutegien geroko erregulaziorako, eta beste xedapen gehigarri bat erantsi dio legeari, bigarrena. Azken xedapena, atzenik, legeak indarra hartzeari buruzkoa da.

Orobat, kontuan izan dira Emakumeen eta Gizonen arteko Berdintasunerako otsailaren 18ko 4/2005 Legean ezarritako neurriak.

Lehenengo artikulua.- Paragrafo bat eransten zaio merkataritza-jardueraren maiatzaren 27ko 7/94 Legearen 49. artikuluari, eta idazkera hau izango du:

"49. artikulua.- Antolamendu-printzipioak

Administrazio-ekintzak gidaritzat izango ditu lehia aske eta leialaren printzipioa eta kontsumitzaileen eta bezeroen bidezko interesen defentsaren printzipioa; horrenbestez, behar adina neurri hartuko da merkataritza-jardueraren arrazionalizazioa eta modernizazioa bilatzeko, bai eta euskararen erabilera bultzatzeko ere."

Bigarren artikulua.- Xedapen gehigarri bat eransten zaio merkataritza-jardueraren maiatzaren 27ko 7/94 Legearen 49. artikuluari, eta idazkera hau izango du:

"LEHENENGO XEDAPEN GEHIGARRIA.- JOAN-ETORRI TURISTIKO HANDIKO LEKUAK IZENDATZEA

1.- Lege honen ondorioetarako, joan-etorri turistiko handiko lekutzat hartuko da ondorengo inguruabarretatik edozein betetzen duena:

a) Nahikoa ostatu-plaza eta turismo-establezimendu izatea, kuantitatiboki zein kualitatiboki, edo nahikoa bigarren etxebizitza, ohiko etxebizitzen kopuruarekin alderatuta.
b) Gizadiaren Ondare izendatua izatea, edo euskal kultura-ondarea osatzen duten kategorietako baten barruko ondasunak izatea, Euskal Kultur Ondareari buruzko uztailaren 3ko 7/1990 Legeak edo lege horren ordezko legeriak ezarritakoaren arabera.
c) Muga-guneen eragin-eremua izatea edo haien ondoan egotea.
d) Estatu-mailako edo nazioarteko kirol- edo kultura-ekitaldi handiak egitea.
e) Itsas bidaia turistikoak gelditzen diren eta bisitari asko dituzten portuetatik hurbil egotea.
f) Erakargarritasun nagusia erosketa-turismoa duen gunea izatea.
g) Hala justifikatzen duten baldintza bereziak izatea.

2.- Joan-etorri turistiko handiko lekuak zehazteko, egoki deritzoten udalek proposamen zehatza egingo diote merkataritzaren alorrean eskumena duen sailburuordetzari. Proposamen hori zio eta guztikoa izango da; gutxienez, aurreko puntuan agertutako irizpideen araberakoa. Gainera, zehatz-mehatz zedarrituko ditu barne hartutako lekua edo lekuak, bai eta urteko zer alditarako izango den (bat baino gehiago izan daiteke).

Udalek, udal-proposamenari onarpena eman baino lehen, entzunaldiaren izapidea eskainiko diete hauei, egoki iritzitako alegazioan egin ditzaten: dena delako udalerriko merkataritza- eta turismo-sektoreetako ordezkaritza handieneko enpresaburu-antolamenduei eta ordezkaritza handieneko kontsumitzaile- eta erabiltzaile-antolamenduei, halakorik bada, eta, halakorik ezean, dagokion lurralde historikoko eremukoei edo EAEkoei.

Lege honek xedatuaren ondorioetarako, ordezkaritza handieneko enpresaburu-antolamendutzat hartuko dira laneko legeriak erabilitako irizpideen arabera halakotzat jotzen direnak.

3.- Proposamena jasota, hari buruzko ebazpena emango du merkataritzaren alorrean eskumena duen sailburuordetzak; eman ere, proposamena jaso eta lau hilabeteko epean, eta aldez aurretik entzunda merkataritza- eta turismo-gai horietan eskumena duen saileko (edo eskumena duten sailetako) aholkularitza- eta kontsulta-organoak. Hauek zehaztuko dira ebazpenean: izendapenaren edo deklarazioaren iraunaldia eta zer leku edo gunetan aplikatuko den. Epe hori igarota ebazpenik eman ez bada, proposamenari onespena eman zaiola ulertuko da.

4.- Joan-etorri turistiko handiko leku izendatzeak hau ekarriko du bertan dauden merkataritza-establezimenduentzat: ordutegietarako eta irekitze-egunetarako askatasuna.

5.- Joan-etorri turistiko handiko leku izendatzeko arrazoiak desagertuz gero, aipatu sailburuordetzak bere esku izango du izendapena bertan behera uztea, interesa duen udalari entzun ondoren."

Hirugarren artikulua.- Xedapen gehigarri bat eransten zaio merkataritza-jardueraren maiatzaren 27ko 7/94 Legearen 49. artikuluari, eta idazkera hau izango du:

“BIGARREN XEDAPEN GEHIGARRIA.- GAIKUNTZA EDO HABILITAZIOA

Baimena ematen zaio Eusko Jaurlaritzari merkataritza-ordutegiei buruzko erregelamendu-xedapenak eman ditzan, lege hau garatzeko beharrezkoak diren neurrian. Xedapen horietan arautuko dira guztizko ordutegiaren gehienezko mugak, eragindako merkataritza-establezimenduak eta baldintza berezietan egon daitezkeenak".
 

 

ENPLEGU ETA GIZARTE POLITIKETAKO SAILA X. LEG.

ERABAKIA, LANBIDE-EUSKAL ENPLEGU ZERBITZUAREN GIZA BALIABIDEAK BERRANTOLATZEKO PLANA ONARTZEKO ETA ABIAN JARTZEKO.

LABURPENA

EUSKO JAURLARITZAK LANBIDEKO GIZA BALIABIDEAK BERRANTOLATZEKO PLANA ETA LANBIDEKO LANPOSTUEN ZERRENDA BERRIKO LEHEN FASEA ONARTU DITU

Berrantolatzeko planaren emaitza:

• egitura berria zehaztea
• Bulegoen egitura sinplifikatzea eta homogeneizatzea.
• Bulego bakoitzeko zuzkidurak kuantifikatzea, lan-kargak eta bestelako ezaugarri kualitatibo batzuk aztertuta.
• Lurralde-bulegoak sortzea, tokiko bulegoak koordinatzeko eta horiei laguntzeko, eta Lanbideren eta lurralde historikoetako erakundeen arteko harremanak hobetzeko.
• Zerbitzu zentraletako administrazio-unitateak berrantolatzea, 14 arloak 12 zerbitzu bihurtuta. Aldaketa horren ondorioz, Europarekin lotutako gaien arloa desagertu da, eta zeregin hori Sailak hartuko du bere gain; enpleguaren sustapeneko eta tokiko eta eskualdeko arloek bat egitea; eta Lanbide Hezkuntzako azpisistemako trebakuntza eta integrazio arloek bat egitea.
• Barne kontrolerako unitatea sortu da, Lanbideren estatutuetan jasota egon arren, ez baita orain arte garatu. Barne Kontroleko Unitatea 18 lagunek osatuko dute eta errekurtsoei, erreklamazioei, behar ez bezala ordaindutako kopuruen itzulketei, eta abarrei buruzko administrazio espedienteak behar bezala tramita daitezela zainduko dute.

Lanbide-Euskal Enplegu Zerbitzuaren giza baliabideak berrantolatzeko planaren ondorioz, lanpostuen zerrendako lehen fasea onartu dute. Lehen fasean 180 lanpostu beteko dira, eta horietatik 53 oraindik hutsik daude. Lanpostuak betetzeko EAEko funtzionario guztien artean lehiaketa antolatuko da. Lanpostuen behin betiko zerrenak 918 postu ditu, lehen faseko 180ak barne. Ziurrenik apirilean onartuko dute.
 

 

HEZKUNTZA, HIZKUNTZA POLITIKA ETA KULTURA SAILA X. LEG.

ERABAKIA, 2015-18 UNIBERTSITARIO PLANA ONESTEN DUENA.

LABURPENA

2015-2018 UNIBERTSITATE PLANA

Gobernu Kontseiluak 2015-2018 aldirako Unibertsitate Plana onartu du. Plan honek, ondorengo lau urteetarako Euskal Unibertsitate Sistema osatzen duten unibertsitateentzat orientazio estrategikoak eta finantziazio publikoa ezartzen ditu. Euskal Unibertsitate Sisteman unibertsitate publiko bakarra izaki, Euskal Herriko Unibertsitatea da plan honek helburu duen eragile nagusia.

2015-2018 Unibertsitate Plana, Euskal Unibertsitate Sistemak 2004an legez sortu zenetik izan duen hirugarren plan integrala da.

Aurreko planek egindako ahaleginen bultzada berri gisa sortu da, bai gaitasunen sorkuntzari dagokionean, bai Euskadiren erronka sozioekonomikoei erantzun emango dieten erremintak finkatzerakoan.

2015-2018 aldirako Unibertsitate Planak, aurreko planekin alderatuta, errealitate eta testuinguru desberdinean du abiapuntua. Testuinguru honetan, argiro, ezinbestekoa da baliabideen planifikazio eraginkor eta errealista egitea, Euskal Unibertsitate Sistemak bere inguruan duen inpaktua maximizatzea ahalbidetuko duena. Horretarako, Planaren bidez 2015-2018 aldirako hitzemandako baliabideek, eta finantzatzen dituen jarduerek, efikazia, eraginkortasuna eta jasangarritasuna izan beharko dituzten oinarrizko irizpide. Efikazia eta eraginkortasuna, behar-beharrezko baliabideak erabilita hitzartutako emaitzak lortzeko; eta jasangarritasuna, abian jarritako jarduerek denboran bideragarritasuna izango dutela ziurtatzeko. Beraz, plan errealista, zuhurra eta malgua da.

Zeharkako plana

Aipaturiko aurrekarietatik abiatuta, 2015-2018 Unibertsitate Planak Euskal Unibertsitate Sistemarekiko ikuspegi partekatua proposatzen du. Ikuspegi hau unibertsitateekin landua izan da orientazio estrategikoari, jardun-ildoei eta jomuga kuantitatiboak ezartzeari dagokionean.

Eusko Jaurlaritzak hazkunde adimentsuan duen helburuak sostengu berria aurkitzen du Unibertsitate Planean –honek zientziari, teknologiari eta formazioari egiten dion ekarpenaren bidez-, Zientzia, Teknologia eta Berrikuntza Planarekin eta Lanbide Heziketaren Euskal Planarekin batera.

Herrialdearen beharrekin lerrokatze horretan, Euskadiko Espezializazio Adimentsurako Estrategia (RIS3) da erreferentzia-marko nagusia, prestakuntza-eskaintza egokia sortzearen bidez: herrialdearentzat lehentasunezko diren eremuetara eta aukera-zokoetara bideratutako ikerketa-jardueraren bidez; eta helburuetarantz hobeto bideratutako ikerketan oinarrituko den transferentziaren bidez.

Unibertsitate Planak bake eta bizikidetza eta giza garapenerako planen ardatzei egingo dizkien ekarpenez berriz, zera esan daiteke: Unibertsitate Planak bere egiten dituela genero berdintasunean, zerbitzu sozialetan eta osasunean ezartzen diren printzipio eta helmugak. Era berean, Unibertsitate Plana Euskararen Agenda Estrategikoak ezartzen dituen helburuekin ere lerrokatzen da, euskara unibertsitate-hizkuntza izateko apustu eginez.

Ezaugarri nagusiak

Unibertsitate Plana bi printzipiotan oinarritzen da: Euskal Unibertsitate Sistemaren nazioarteko proiekzioa, kalitate bereizgarri gisa, eta espezializazioa.

Euskal Unibertsitate Sistemaren nazioarteko proiekzioa izango da 2015-2018 Unibertsitate Planaren zeharkako jardueretan ardatzetako bat, horrekin zerikusia duten ekintzak eremu guztietan burutuko direlarik: formazioan, ikerketan eta transferentzian.

2015-2018 Unibertsitate Planak lau helburu estrategiko jasotzen ditu:

1. Euskal Gizarteak dituen goi mailako prestakuntza beharrei erantzutea, irakaskuntza-eredu eta metodologia berritzaileen bitartez.

2. Euskal Unibertsitate Sistemaren baliabide eta gaitasunak garatzea, bikaintasunezko ikerketa eta nazioarteko proiekziodun ikerketa egiteko.

3. Euskal gizartearen erronka ekonomiko eta sozialei ekarpen erabakigarriak egitea, ezagutza-transferentziaren bidez eta profesionalen etengabeko prestakuntzaren bidez.

4. Zerbitzu-eskaintza inklusiboa eta kalitatezkoa izango duen Euskal Unibertsitate Sistema bermatzea, baliabideen eta teknologia berrien erabilera jasangarria, gardena eta ingurumenarekiko arduratsua egingo duena, eta finantziazio eredu orekatua eta jasangarria izango duena.

Lau helburu estrategiko hauen hedapena hamasei lan-ildoren bidez gauzatzen da. Lan-ildo hauek, 2015-2018 Unibertsitate Planak sustatuko dituen ekintzei zentzua ematen diete eta taldekatu egiten dituzte.

Azalduriko lau helburuen garapenaren bidez, agerian gelditzen da Planak pertsonekiko duen konpromisoa: lan-munduan txertatzea, ekintzailetzari bultzada, enplegagarritasunaren edo ekitatearen sustapena, inklusioa eta aukera-berdintasuna.

Unibertsitate publikoari dagokionez, pertsonekiko konpromiso horrek lanpostuak bermatzea eta enplegua sortzea ditu helburu. Formazioan arituko diren ikertzaileak kontratatzea aurreikusten du planak, hauek Euskadin ikerketaren etorkizuna berma dezaten, eta unibertsitateko irakasleria berritzeko harrobi izan daitezen. Gainera, aurreko planean aldi baterako sorturiko lanpostuak finkatu ahal izan daitezen bidea ezartzen du, aurreko aldian sortutako enpleguaren jarraipena bermatuz horrela.

Finantziazioa

Finantziazioari dagokionez, planak lau urtean 1.287.200.090 euro aurreikusten ditu, Euskal Unibertsitate Sistemako itunpeko jarduerak eta UPV/EHUren ohiko funtzionamendua finantzatzera bideratuak. Unibertsitateei egingo zaizkien diru-ekarriak ondorengo taulan ageri dira, eurotan emanak.
 

Unibertsitatea    2015              2016              2017               2018             Guztira 2015-2018 

Universidad del País Vasco/Euskal Herriko Unibertsitatea

300.370.805         302.629.542         306.509.416          320.808.650        1.230.318.413   

Universidad de Deusto/Deustuko Unibertsitatea

7.286.762 7.396.063 7.543.985 7.845.744 30.072.554

Mondragon Unibertsitatea

6.496.013 6.593.453 6.725.322 6.994.335 26.809.123
Guztira 314.153.580 316.619.058 320.778.723 335.648.729 1.287.200.090