2015/01/20 (e)ko  saioa 
Aurkibidea

HERRI ADMINISTRAZIO ETA JUSTIZIA SAILA X. LEG.

ERABAKIA, ZEINAREN BIDEZ JAKINARAZTEN BAITA JAURLARITZAK ZER IRITZI DUEN EUSKAL TALDE POPULARRA LEGEBILTZAR-TALDEAK ARARTEKO ERAKUNDEA ARAUTZEKO AURKEZTUTAKO LEGE-PROPOSAMENA AINTZAT HARTZEARI BURUZ.

LABURPENA

ARARTEKOAREN EGITEKOA INDARTZEKO ETA HAREN OBJEKTIBITATEA ETA INDEPENDENTZIA HOBETZEKO LEGE PROPOSAMENAREN ALDEKOA DA EUSKO JAURLARITZA

• Planteatutako aldaketen artean, herritarrek egindako kexen berri emateko 20 egun natural izango ditu Arartekoak, eta ezohiko kasuetan 30 egun ere har litzake.

• Ekimena Arartekoak berak proposatu du, eta VIII. Legegintzalditik izapidetzeko dago. Garai hartan, Legebiltzarreko talde guztiek babestu zuten proposamena.

Gobernu Kontseiluak adierazi du gaur Arartekoaren erakundea erregulatzeko Lege proposamena kontuan hartzearen aldekoa dela. Proposamen horrek erakundearen egitekoa indartu nahi du, eta, haren zereginak hobeto betetzeko, objektibotasuna eta independentzia handitu nahi ditu.

Legebiltzarreko ekimenak, beste hainbaten artean, jasotzen du Arartekoak arrazoizko epe bat ezarriko duela eskatutako informazioa, espedienteak edota beste edozer datu emateko. Jasotako kexen ikerketen inguruan eta Arartekoak eperik ezarri ezean, gehieneko epea 20 egun naturalera murriztuko da, eta ezohiko kasuetan 30 egun natural ere har litzake.

Legebiltzarreko testuan Arartekoak berak egindako proposamenak daude bilduta, erakundearen izaera objektibo eta inpartzialari eusteko. Hala, ezartzen du «arartekoaren erakundeak ez duela batere aginduzko mandaturik jarraituko, betiere Legebiltzarrak helarazten dizkion instrukzio eta gomendioei kalterik egin gabe». Horrez gain, Arartekoaren egitekoei, eskubideei eta ahalei dagokienez, erakundeak administrazioaren espediente eta dokumentuetara duen zuzeneko sarbidea arautzen du. Hori egun ere gertatzen da, baina indarrean den legediak ez du erregulatzen.

Era berean, lege-proposamenak jasotzen du Arartekoaren ordezkoa ere Legebiltzarrak aukeratzea, Arartekoarekin egiten duen moduan, (bakanteetan, ezinezkotasun fisikoetan edota aldi baterako absentzietan jardungo luke ordezkoak).

Ekimena VIII. Legegintzalditik izapidetzeko dago. Garai hartan, Legebiltzarreko talde guztiek babestu zuten proposamena.
 

 

OGASUN ETA FINANTZA SAILA X. LEG.

GOBERNUAK KONTSULTA PUBLIKO ETA ALEGAZIOEN FASEA HASTEN DU, EUSKADIKO AURREZKI KUTXA ETA BANKU FUNDAZIOEN LEGE AURREPROIEKTURAKO.

LABURPENA

Euskadiko aurrezki kutxa eta banku fundazioen Lege Aurreproiektua aztertu du gaur Gobernu Kontseiluak, eta gaurtik aurrera egongo da abian hari dagokion kontsulta-publiko eta alegazio-fasea.

Euskadiko aurrezki kutxa eta banku fundazioen Lege Aurreproiektuak bi helburu nagusi lortu nahi ditu:

a) Euskal Autonomia Erkidegoko Aurrezki Kutxei buruzko uneko arautegia aurrezki kutxen eta banku fundazioen Estatuko oinarrizko Legera egokitzea.

b) Berriki sortutako erakunde juridiko diren Euskadiko banku fundazioen erregimen juridikoa erregulatzea, Estatuko oinarrizko arautegi berarekin bat.

Hain zuzen ere, aurrezki kutxen eta banku fundazioen oinarrizko Legea indarrean sartzeak aldaketa nabarmena ekarri du arlo horretako Estatuko oinarrizko arautegietara. Gainera, aurreikusten du Autonomia Erkidegoek aurrezki kutxei buruzko legedia egokitu behar dutela Legean xedatutakora.

Lege-aurreproiektuak, beraz, lehenik eta behin, Euskadin egoitza duten aurrezki kutxen arautegia moldatzea jorratzen du.

Aurreproiektuaren edukiari dagokionez, aurrezki kutxen erregulazioaren abiapuntua une honetan indarrean dagoen arautegia da, hots, Euskal Autonomia Erkidegoko Aurrezki Kutxei buruzko ekainaren 14ko 11/2012 Legea. Izaera orokorrarekin, aurreproiektuak indarrean dagoen uneko arautegia mantentzen du eta horren edukia Estatuko oinarrizko arautegi berrira egokitzen du.

Horrenbestez, egun indarrean dagoen arauaren egitura eta edukia lehengo berak dira; esaterako, aurrezki kutxen izaerari eta eginkizunei, sorrerari, bat-egiteari eta likidazioari dagokienez.

Aurrezki kutxen gobernu-organoen kasuan, oro har, egungo arautegiari eutsiko zaio, Estatuko oinarrizko arautegi berrira egokituko den arren.

Bigarrenik, lege-aurreproiektuak, aurrezki kutxekin erlazio estua izaki, Euskal Autonomia Erkidegoko banku fundazioen erregimenaren erregulazioa jorratzen du, arlo horretako oinarrizko arautegiaren ezarpenak betez.

Aurreproiektuak barne hartzen ditu banku fundazioen jardueraren elementu nagusiak; alegia, estatutuak, eraketa-zuzkidura eta fundazioaren ondarea.

Gobernu-organoei dagokienez, arautu egin dira patronatua, osaera eta patronoak, horien betekizunak ezartzeaz gain. Betekizunok, aurrezki kutxen administrazio kontseiluko kideek bete beharrekoak izango dira.

Horren harira, halaber, aurrezki kutxetan bezala, inbertsioen batzordea eta gizarte ekintzako batzordea gobernu-organo gehigarri izango dira aurrerantzean, araututakoaren arabera.

Aurrezki kutxen eta banku fundazioen ikuskaritza-erregimenari dagokionez, aurreproiektuan aurreikusitakoaren arabera, eginkizun horien ardura Eusko Jaurlaritzako finantza arloko Sail eskudunari egokituko zaio, euskal kutxen jardueran ohikoa izan den bezala.

Azkenik, lege-aurreproiektuak gizarte ekintzaren kudeaketa eta garapena arautzen du, bai aurrezki kutxetan bai banku fundazioetan, honako alderdi hauetan: gizarte ekintza motak, kudeaketa motak edota gizarte ekintzara bideratutako aurrekontuen osaera, gauzapena eta likidazioa. 
 

 

Erlazionaturiko temak
Aurreproiektua
Anteproyecto

DEKRETUA, ZEINAREKIN HONAKO PROGRAMA GARAZTEN BAITA: ENPRESA TXIKI ETA ERTAINAK, BANAKO ENPRESARIOAK ETA PROFESIONAL AUTONOMOAK FINANTZARIOKI LAGUNTZEKO 2015ERAKO PROGRAMA.

LABURPENA

ENPRESA TXIKI ETA ERTAINEI ETA PROFESIONAL AUTONOMOEI FINANTZA-LAGUNTZA EMATEKO 2015EKO PROGRAMA ONARTU DU EUSKO JAURLARITZAK

Euskadiko ETEei eta profesional autonomoei finantza-laguntza emateko 2015eko programa eratzen duen dekretua onartu du Gobernu Kontseiluak gaurko bileran. Kolektibo horiek bankuen finantzazioa lortu ahal izatea da programaren helburua, aukera izan dezaten, hartara, beren zirkulatzaile-premiak bideratzeko, epe laburreko zorra berritzeko eta epe laburreko zor hori epe ertain edo luzeko zor bihurtzeko.

Iazkoaren aldean, 2015eko programan, murriztu egin da maileguen interes-tasa; hala, sei hilerako Euriborrari (% 0,2) eragiketaren epearen araberako gehieneko diferentzial batzuk gehituta finkatu da gehieneko interes-tasa: % 2 gehituko zaio hiru urterako eragiketetan; % 2,25 bost urterako eragiketetan, eta % 2,50 zazpi urterako eragiketetan. Programaren gainerako ezaugarriak ez dira aldatu.

Ogasun eta Finantza Sailak programa inplementatzeko behar diren hitzarmenak sinatuko ditu elkarren bermerako sozietateekin eta finantza-erakundeekin.
 

 

DEKRETUA, 2015 EKITALDIRAKO ZORPETZE-ERAGIKETAK EGITEA ERABAKI ETA BAIMENTZEN DUENA.

LABURPENA

EAEko AURREKONTU OROKORRAK ONARTZEN DUEN LEGEAK AURREIKUSTEN DUENAREN ARABERA 2015RAKO ZORPETZEKO ERAGIKETAK EGITEA BAIMENTZEN DUEN DEKRETU PROIEKTUA

Euskal Autonomia Erkidegoko 2015. urteko aurrekontu orokorrak onartzen dituen abenduaren 23ko 5/2014 Legean aurreikusten eta onartzen duenez, Gobernu Kontseiluak ekitaldi honetako zorpetze-eragiketak egitea baimendu du. Aurrekontuen Legean onartutako zorpetze-eragiketak urte honetan egingo dira. (1.290 M).
 

 

HEZKUNTZA, HIZKUNTZA POLITIKA ETA KULTURA SAILA X. LEG.

ERABAKIA, 5.000.000 EUROTIK GORAKO GASTURAKO BAIMENTZEKO 2014/15 IKASTURTEKO 2015KO URTARRILATIK ABUZTUA BITARTEKO ALDIRAKO IKASTETXE PRIBATUEN HEZKUNTZA-ITUNEN FINANTZIATZEKO.

LABURPENA

370,6 MILIOI IKASTETXE PRIBATUEN HEZKUNTZA-ITUNAK FINANTZATZEKO

Gobernu Kontseiluak, Hezkuntza, Hizkuntza Politika eta Kultura sailburuaren proposamenez, gaurko bileran akordio hau hartu du: 370.619.673,59 euroko gastua baimentzea, baita 20014/15 ikasturtearen hezkuntza-itunak aldatzearen ondorioz sor litezkeen aldaketak ere, 2014/15 ikasturtean 2015eko urtarriletik abuztura arteko aldian ikastetxe pribatuen hezkuntza-itunak finantzatzeko.
 

 

OSASUN SAILA X. LEG.

ERABAKIA, 5.000.000 EUROTIK GORAKO GASTUA BAIMENTZEN DUENA, EUSKADIKO OSASUN SISTEMAKO LANGILEEK AGINDUTAKO 2014. ETA 2015. EKITALDIETAKO TRATAMENDU MEDIKUETARAKO ATXIKIMENDUA ERRAZTEKO DIRU-LAGUNTZEN DEIALDIA FINANTZATZEKO.

LABURPENA

EUSKO JAURLARITZAREN LAGUNTZAK ESKATU AHALKO DIRA BERRIZ 2015EKO OTSAILAREN 2TIK AURRERA, MEDIKAMENTUEN GASTUARI AURRE EGIN ETA TRATAMENDUEI EUTSI AHAL IZATEKO

Eusko Jaurlaritzak, Osasun Sailaren bidez, 2015ean ere botiken kopagoa konpentsatzeko laguntza-deialdia egingo du, gaixotasun- eta premia-egoera objektiboan dauden herritar-taldeek tratamendu medikoak jarraitzen dituztela bermatzeko konpromisoari eutsiz.

2015eko otsailaren 2tik aurrera eskatu ahalko zaizkio laguntzok Eusko Jaurlaritzari, botika-gastuari aurre egin, tratamenduari eutsi ahal izan eta egoera ahulean dauden pertsonei arreta bermatzeko. Osasuneko desberdintasunak ekiditea da laguntza horien xedea.

Aurtengo laguntzak Euskadiko Osasun Sistemako langileek 2014ko abenduaren 1etik 2015eko azaroaren 30era artean agindutako tratamenduak betetzea erraztera bideratuta egongo dira. Horretarako, Osasun Sailak 11,5 milioi inguruko kontu-saila xedatuko du. Behar izanez gero, kopurua handitu ahalko da, laguntzaren onuradun guztiei arreta emateko.

Horrenbestez, agindua onartu eta Euskal Herriko Agintaritzaren Aldizkarian argitaratu ondoren, eskaerak aurkezteko epea otsailaren 2an abiaraziko da eta 2015eko laguntza eskuratzeko interesa duten pertsonek data horretatik aurrera aurkeztu ahalko dituzte eskabideak. Horrenbestez, Osasun Sailak nabarmendu nahi du «2014an laguntza eskatu zuten pertsonek eta 2015ean ere laguntza jaso nahi dutenek 2015ean berriz aurkeztu beharko dutela eskabidea».

Laguntzen onuradunak honako hauek izan ahalko dira:
• Gizarte Segurantzan pentsiodun gisa aseguratuta daudenak –eta horien onuradunak–, urtean 18.000 eurotik beherako diru-sarrerak dituztenak eta Euskadiko Osasun Sistema bermatzaile gisa duten banako osasun txartelaren titularrak.

• Langabezia-egoera legalean dauden eta langabezia-prestaziorik eta diru sarrerak bermatzeko errentarik jasotzen ez duten pertsonak –eta horien onuradunak–, Euskadiko Osasun Sistema bermatzaile gisa duten banako osasun txartelaren titularrak badira.

• Osasun Sistema Nazionaleko aseguratu edo onuradun ez izan arren, ekainaren 26ko 114/2012 Dekretuaren, Euskal Autonomia Erkidegoaren eremuan Osasun Sistema Nazionalaren osasun-prestazioak emateko araubideari buruzkoaren, aplikazio-arloan sartzen diren pertsonak, baldin eta baliabiderik ez badute.

• MUFACEren, MUGEJUren eta ISFASen pentsiodunak, EAEn erroldatuta daudenak eta 18.000 eurotik beherako urteko errentak dituztenak, eta horien onuradunak.

Eskabideak aurkezteko lekuari dagokionez, hainbat bide erabili daitezke; adibidez, Internet bidez, Eusko Jaurlaritzaren egoitza elektronikoan: http://www.euskadi.net/nirekudeaketak. Horrez gain, Osakidetzako osasun-etxeetan edo anbulatorioetan; norberari dagozkion Osasuneko ordezkaritzetan; edo herritzarrei arreta emateko Zuzenean zerbitzuaren bidez.

Izapide telematikoa edota aurrez aurrekoa hautatuta, bi eskabide-eredu daude; sinplifikatua, pertsona gehienek aurkeztuko dutena, eta arrunta, bi kasuetarako balio duena.

• bakuna, bere erraztasunagatik posible denean aholkatzen dena; kasu honetan, datu pertsonalak eta diru-sarrera egingo den kontu-korrontea soilik eman behar dira.
• ohikoa, kasu honetan, erosketen tiketak, errezetak eta dirulaguntza hauen onuraduna izateko frogagiriak aurkeztu behar dira. Azken eredu hau, honako bi kasutan aholkatuta dago:
   a) Euskaditik kanpo sendagaiak erosi dituzten dirulaguntzen onuradunak
   b) MUFACE, MUGEJU eta ISFAS-eko pentsiodunak -eta euren onuradunak-, EAEn erroldatuta eta urteko 18.000 eurotik beherako diru-sarrerak dituztenak

2014ko diru-laguntzen deialdia

2013ko uztailaren 1etik 2014 azaroaren 30era arte agindutako botikak barnen hartzen zituen 2014ko Laguntza-deialdiari dagokionez, eskabideak aurkezteko epea iragan abenduaren 10ean amaitu zen. Egiteko dauden ordainketak 2015eko lehen lauhilekoan ordainduko dira.

2014ko diru-laguntzen deialdian, 17 hileko iraupena izan duenak, guztira, 126.225 eskabide aurkeztu dira.