2015/01/27 (e)ko  saioa 
Aurkibidea

ENPLEGU ETA GIZARTE POLITIKETAKO SAILA X. LEG.

ERABAKIA, BAIMENA EMATEKO DENA AZALERA-ESKUBIDEZ HIGIEZIN JAKIN BATZUK ERAIKITA DAUDEN LURZORUAREN KOSTUBIDEZKO BESTERENTZEA EGITEKO ETA, HALABER, BAIMENA EMATEKO DENA ALDI BATERAKO JABETZA-ERREGIMENEAN ESKUALDATUTAKO HIGIEZIN JAKIN BATZUEN GAINEKO JABARIA ITZULTZEKO ESKUBIDEARI UKO EGITEKO.

LABURPENA

JAURLARITZAK BABES OFIZIALEKO ETXEBIZITZEN LURZORUA EROSTEKO BESTE DEIALDI BAT ONARTU DU

Juan María Aburto Enplegu eta Gizarte Politiketako sailburuak proposatuta, Gobernu Kontseiluak EAEn azalera-eskubidean eraikitako 19.340 higiezinen lurzoruaren gaineko kostubidezko besterentzea baimendu du.

2010. urteaz geroztik, bosgarren aldia da Jaurlaritzak aukera hori eskaintzen duena; horrela, babes ofizialeko etxebizitzen jabeek bere etxea eraikita dagoen lurzorua erosi dezakete eta trukean etxebizitza horiek izaera iraunkorreko etxebizitza publiko gisa sailkatuko dira.

Jaurlaritzak gaur erabaki duenak EAEko 19.340 higiezini eragiten die (etxebizitzak, etxebizitzen eranskin atxikiak edo ez-atxikiak eta merkataritza-lokalak). Horien guztien lurzorua otsailaren 2tik maiatzaren 29ra artean jarriko da salgai. Jarraitu beharreko izapideak, balorazioa eta lurzorua besterentzea gauzatzeko epeak Enplegu eta Gizarte Politiketako Sailaren hurrengo deialdian zehaztuko dira.

Aurreko deialdian bezalaxe, babes ofizialeko etxebizitza baten esleipendunek parte hartu ahal izango dute, diru-sarrera mugarik gabe.

Deialdian sartu ahalko dira aurreko faseetako higiezin guztiak, jabeek hainbat arrazoirengatik erosi ezin izan zituzten horiek hain zuzen ere. Higiezin horien artean egongo dira denborarekin deskalifikatu diren promozioak eta 2013ko bigarren seihilekotik aurrera kalifikatutakoak.

Lurzorua erostea aukera ona da babes ofizialeko etxebizitzak (BOE) erosi dituzten pertsonek ez dezaten etxea gal epea amaitzean. Izan ere, eraikitakoa eroslearen jabetzakoa den arren, eraikina kokatua dagoen lurzorua izaera publikokoa da. Horrenbestez, 75 urte igaro eta gero, babes ofizialeko etxea administrazioaren esku geratuko da berriz ere, azalera-eskubidea iraungi delako. Gainera, jabeek kalte-ordainik jasotzeko eskubiderik ez dute.
 

 

700.000 EUROKO LAGUNTZA GENERO INDARKERIAREN EMAKUMEZKO BIKTIMENTZAT.

LABURPENA

Jaurlaritzak argi berdea eman dio genero-indarkeriaren emakumezko biktimei bideratutako 2015eko laguntza-deialdiari.

Enplegu eta Gizarte Politiketako Sailak ematen dituen laguntzok –2015ean, orotara, 700.000 euro– Genero Indarkeriaren Aurkako Babes Integralerako Neurrien gaineko abenduaren 28ko 1/2004 Lege Organikoaren 27. artikuluan aurreikusita daude, eta errenta maila jakin bat duten genero-indarkeriaren emakumezko biktimei ematen zaizkie.

2.556 eta 10.224 euro arteko laguntzak izango dira, kasuan kasuko emakumearen egoera pertsonal eta familiarra gorabehera. Laguntzok adinagatik, prestakuntza orokor edo espezializatu faltagatik edota bestelako gizarte arrazoiengatik lana aurkitzeko zailtasun bereziak dituzten emakumeei bideratuta daude. Baldintza hauek bete behar dira laguntzok eskuratu ahal izateko:

a) Eskaera egiterako orduan gutxienez sei hilabete eramatea Euskal Autonomia Erkidegoan erroldatuta.
b) Indarrean dagoen lanbide arteko gutxieneko soldataren % 75etik gorako errentarik ez izatea (hilabeteko zenbaketan), bi aparteko ordainsariren zati proportzionala kontuan izan gabe.
c) Lana bilatzeko zailtasun bereizia izatea, Lanbide Euskal Enplegu Zerbitzuaren bitartez egiaztatuko dena.
d) Aurretik 1/2004 Lege Organikoaren gerizpean ezarritako laguntza hau jaso ez izana, ez Euskal Autonomia Erkidegoan ez Estatu espainiarreko beste edozein erkidegotan.
e) Genero-indarkeriaren egoera ezarritako moduan egiaztatzea, urtebete baino gehiago igaro gabe babes-neurriak indarrean jarri zirenetik eta laguntza hau eskatu arte:
- Genero-indarkeriatzat hartzen diren egintzak zigortzen dituen epaia; bertan, biktima babesteko neurriak jaso behar dira.
- Biktima babesteko agindua, eskabidea aurkeztean indarrean dagoena.
- Salbuespen gisa, eta harik eta babes agindua eman arte, salatzailea genero-indarkeriaren biktima delako zantzuak daudela dioen Fiskaltzaren txostena aurkeztu ahal izango da indarkeria mota hori egon dela egiaztatzeko.
f) Erasotzailearekin ez bizitzea (eta berarekin harremana amaitu izana).

 Eusko Jaurlaritzak telefono bidezko informazio eta arreta zerbitzu espezializatu bat du genero-indarkeriaren emakumezko biktimentzat. Telefono-zenbakia 900 840 111 da eta 51 hizkuntzatan erantzuteko gai da. Biktimen senideek eta hurbilekoek ere dei dezakete.

Zerbitzu honek ez ditu bikotekideak edota bikotekide-ohiak eragindako genero-indarkeriaren emakumezko biktimak bakarrik artatzen. Era berean, beste kasu batzuei ere erantzuten diete: familia barruko genero-indarkeria, laneko sexu-jazarpena, sexu-erasoak, behartutako prostituzioa eta pertsonak sexu-ustiapenerako tratatzea.

 

OSASUN SAILA X. LEG.

DEKRETUA, KANPO-DESFIBRILADORE AUTOMATIKO ETA ERDIAUTOMATIKOEN EZARPENA ETA ERABILERA ARAUTZEN DITUENA, ETA HAIEK OSASUN-ESPARRUTIK KANPOKO ERABILERA PUBLIKOKO GUNE JAKIN BATZUETAN JARTZEA BEHARREZKOA DELA XEDATZEN DUENA.

LABURPENA

EUSKADIK OSASUN ARLOTIK KANPOKO ERABILERA PUBLIKOKO ESPAZIO JAKIN BATZUETAN DESFIBRILADOREAK IPINI BEHARRA ONARTU DU

Gobernu-kontseiluak, Osasun Sailak proposatuta, dekretu berri bat onartu du gaur kanpoko desfibriladore automatikoak eta erdi automatikoak ipintzea eta erabiltzea arautzeko eta osasun arlotik kanpoko erabilera publikoko espazio jakin batzuetan horiek nahitaez ipini beharra xedatzeko.

Besteak beste, desfibriladoreen erabilerari buruzko lehen araudiak onartu zirenetik pilatutako esperientziak (16/2005 Dekretua eta 8/2007 Dekretua), gaur egun dagoen ebidentzia zientifikoak eta bat-bateko heriotzaren arazoaren aurrean gizartean dagoen kontzientziazio-maila handiak (Eusko Jaurlaritzako talde politikoek egindako legez besteko proposamenetan agerian geratu dena) eragin dute erregulazio berria, baita Eusko Jaurlaritzak osasun-esparrutik kanpo desfibriladoreen erabilera bultzatzeko eta errazteko duen interesak ere.

Hala bada, araudi berriari esker, pertsona bati bihotza eta arnasa gelditzen bazaizkio, aukera handiagoa izango du bizirik irteteko; eta horrez gain, beharrezkoa izango da desfibriladore automatikoak eta erdi automatikoak edukitzea pertsona asko biltzen diren tokietan.

Osasun-arlotik kanpoko langileek erabili ahal izango dituzte desfibriladore horiek, Osakidetzaren larrialdi-zerbitzuek lagunduta.

Fibrilazio bentrikularraren aurkako tratamendu eraginkor bakarra desfibrilazio elektriko goiztiarra da; horrenbestez, funtsezkoa da desfibriladoreak edukitzea pertsona asko biltzen diren tokietan.

Norbaiti bihotza eta arnasa gelditzen zaizkionean eman beharreko arretan ekintza batzuk goiz aplikatu behar dira, biziraupeneko katea deritzonaren barruan biltzen direnak. Aipatutako kateak lau kate-begi ditu, elkarri lotutakoak: egoeraren errekonozimendua eta berehalako alerta, bihotz-biriketako oinarrizko bizkortzea goiz hastea, desfibrilazio goiztiarra eta, azkenik, bizi-euskarri aurreratua minutu gutxi batzuetan.

Osagai horiek guztiak, desfibriladoreak nahitaez eduki beharra orain gehituta eta oso eraginkorra den 112 bezalako larrialdien egiturarekin batera, biziki garrantzitsuak dira arrazoi horrengatik ahalik eta bizitza gutxien gal daitezen.

Dekretuak desfibriladoreak honako toki hauetan ezartzea xedatzen du:

 -Merkataritza-establezimendu handietan, banako eta kolektiboetan.
 -Merkataritzako aireportu eta portuetan, 50.000 biztanletik gorako udalerrietako autobus- edo tren-geltokietan, eta batez beste gutxienez 2.000 lagun egunero biltzen dituzten metro-, tren- edo autobus-geltokietan.
 -Establezimendu publiko, instalazio, ikuskizun eta jolas-jardueretan, 700 pertsona edo gehiagorentzako tokia baimenduta badute.
 2.000 pertsona edo gehiagorentzako tokia duten hezkuntza-zentroetan.

Halaber, kanpoko desfibriladore automatikoek bete beharreko baldintza teknikoak ere jaso ditu arauak, bereziki ipintzeko baldintzak, gailua nola seinaleztatu behar duten eta horrelakoak erabiltzeko baldintzak, hala nahitaez ipini beharrekoei nola beren borondatez ipintzen dituztenei dagokienez.

Berritasun gisa, gainera, Kanpoko Desfibriladore Automatizatuen Euskadiko Erregistroa sortu da. Osasun Sailera atxikitako erregistro horri jakinarazi beharko diote KDA bat ipini zein kentzen denean.

Azkenik, tokiko administrazioei, udalei eta aldundiei beren arauak egiteko ere eskatzen die, legearen aplikazio-esparruak osatu eta zabaltzeko Osasunaren Tokiko Planen bitartez edota beste baliabide batzuk erabiliz, beren eskumenen esparruan.Oinarrizko bizi-euskarriari eta kanpoko desfibriladore automatikoa erabiltzeari buruzko prestakuntza ere bultzatuko du.

Euskadiko egoera

Gaur egun, Euskadin 550 kanpoko desfibriladore automatiko daude erroldatuta.
Osakidetzaren Larrialdi Zerbitzuak aztertutako azken datuen arabera, urtebetean, 2013ko abuztuaren 1etik 2014ko uztailaren 31ra bitartean, 150 aldiz erabili behar izan dute KDA bat:

• 140, oinarrizko bizi-euskarriko langile batek.
• 9, osasun-zentroetako langileek.
• 1, kirol-instalazioetan.
• Gainera, 2013ko lehen seihilekoan osasun-arlotik kanpoko KDAren hiru deskarga jakinarazi zioten larrialdi-zerbitzuari.

 

INGURUMEN ETA LURRALDE POLITIKA SAILA X. LEG.

ERABAKIA, BAIMENA EMATEKO DENA USURBILGO UDAL-MUGARTEAN DAUDEN HIRU FINKAREN JABARI PUBLIKOA GAITZUSTEKO, GERO BESTERENDU DAITEZEN. ERAIKINEK AZALERA HAUEK DITUZTE: 936,14 M2, 112,30 M2 ETA 162,95 M2.

LABURPENA

GOBERNU KONTSEILUAK USURBILGO HIRU FINKA DESAFEKTATZEKO BAIMENA EMAN DU BILBO-DONOSTIA TRENBIDEKO LASARTE-ERREKALDE TARTEA BIDEBANATZEKO

Gobernu Kontseiluak jabari publikotik hiru finka (936,14 m2, 112,30 m2 eta 162,95 m2, hurrenez hurren) desafektatzeko baimena eman du Usurbilgo udalerrian. Finka horiek trenbidera atxikita daude eta Victorio Luzuriaga Usurbil SA enpresaren jabetzako 001 zenbakidun finka nahitaez desjabetzeagatiko balio justua gauzaz ordaintzeko erabiliko dira, azken finka horri Bilbo-Donostia trenbideko Lasarte-Errekalde tartearen bidebanatzea eraikitzeko proiektuak eragiten baitio.

Bilbo-Donostia trenbideko Lasarte-Errekalde tartearen bidebanatzea eraikitzeko proiektua gauzatzearen barruan, Luzuriaga Usurbil SA enpresaren jabetzako finka bat desjabetu da.

Desjabetze horri dagokion balio justua, elkarrekin adostuta, finkatzeko aktan balio justua gauzaz ordaintzea erabaki da; hala, autonomia-erkidegoko administrazio orokorraren titulartasuneko lurrak horretarako lagatzea adostu da, bai eta hainbat lan egitea eta notario- eta erregistro-gastuak ordaintzea ere.

Lur horiek lagatzeko, Euskal Trenbide Sarearen maiatzaren 21eko 6/2004 Legearen arabera, gobernu-kontseiluak baimena eman du aurretik, eta horixe da, hain zuzen, erabaki-proposamen honen xedea. Aldez aurretik, espediente honen eraginpeko ondasun higiezinak trenbide-zerbitzua emateko ez direla behar adierazi du ETSko administrazio-kontseiluak.

«Bilbo-Donostia trenbideko Lasarte-Errekalde tartearen bidebanatzea eraikitzeko proiektuak» eragindako lursaila 392.852,41 eurotan baloratu da. Administrazioak balio justua ordaintzeko guztira eman beharreko zenbatekoa, honela banakatuta dago:

1. Lurrak lagatzea …………………………………………...140.727,18 €
2. Beheko igarobidea gauzatzea ……………………….…213.385,87 €
3. Lurren itxitura egitea ………………………………….…...28.395,72 €
4. Not-, erreg- zerg-gastuak ………………………………...10.343,64 €
Guztira …………………………………………………...…...392.852,41 €