2015/09/22 (e)ko  saioa 
Aurkibidea

LEHENDAKARITZA X. LEG.

EUSKO JAURLARITZAK BIKTIMAK ETA GIZARTEA BATZEA SUSTATUKO DU BATERA KONPROMISOAREKIN.

LABURPENA

Iñigo Urkullu lehendakariak Batera Konpromisoa aurkeztu du astearte honetako gobernu-kontseiluan. Dokumentu horrek azken urteetan egindako biktimen politikak ditu oinarri, eta, bizikidetza eraikitzeko, biktimak eta gizartea batzea sustatuko duen etapa berri bat hasi nahi du.

Eusko Jaurlaritzaren aburuz, Euskadi egindakoa baloratzeko eta etorkizunari buruz hausnartzeko une aproposean dago, ETAk 2011n indarkeria amaitu ondoren. Batera Konpromisoa orain arte biktimei errekonozimendua eta ordaina emateko egindako politikekin jarraitzearen eta politikok berritzearen artean dago. Etapa berri bat ireki nahi du, biktimen politikek iraganaz gain etorkizuna ere kontuan izan dezaten, biktimek bizikidetza eraikitzeko duten rola sustatuz.

Biktimak eta gizartea batzea
Denborak aurrera egin ahala, biktimak eta gizartea urruntzen edo hurbiltzen dituzten faktoreak agertzen dira, eta politika publikoek distantzia hori handitu, txikitu edo murriztu dezakete. Gurean, Eusko Jaurlaritzak biktimen arloan egiten dituen jarduera guztiek lehentasunezko balio bat dute buru: biktimen eta gizartearen arteko interakzioa, bateratzea eta lotura sustatzea.

Joan den ekainaren 5eko biktimen eta gizartearen arteko topaketak, Batera Konpromisoarekin batera, jarraitutasuna eta urrats berriak dakartza. Erronka honek «biktimak, gizartea, etorkizuna eta bizikidetza» kontzeptuak biltzen ditu, eta denen ekarpena behar du: erakundeena, alderdi politikoena, hedabideena, gizarte-eragileena, biktimena eta herritarrena.

Hiru printzipio
Batera Konpromisoak hiru printzipiotan oinarritutako hausnarketa proposatzen du:

- Benetakotasun-printzipioa: autokritika egitea
1990. hamarkadaren hasierara arte, erakundeak berandu heldu ginen biktimen kausara. Hurrengo urteetan, desadostasun politikoek desitxuratu egin zituzten maiz elkartasunarekiko batasuna eta indarkeriarekiko ukoa. Eusko Jaurlaritzak barkamena eskatu die horregatik indarkeriaren eta terrorismo guztien biktimei. Lehenago erreakzionatu behar genuen, eta lana hobeto eta elkartuago egin. Autokritika hori da Batera Konpromisoaren abiapuntua.

- Zintzotasun-printzipioa: gutxieneko etikoa argi eta garbi definitzea
ETAren amaierak ezin du ekarri besterik gabe orria pasatzea gertatutakoari buruzko kritika espliziturik gabe. Memoria-politikek ezinbestean dakarte edozer indarkeria- edo terrorismo-mota bidegabeak direla errekonozitzea; hortaz, baita ETAren indarkeria eta terrorismoa ere. Iragana ahaztuta etorkizunera begiratzen duen begirada batek ez ditu biktimen memoria eta ohorea zokoratuko. Horrelakorik ez gertatzeko konpromisoa hartzen dugu. Hori da Batera Konpromisoak oinarri duen gutxieneko etikoa.

- Berdintasun-printzipioa: biktimen eskubideak betetzea
Biktimen politikak egia-, justizia- eta konponketa-eskubideak betetzera bideratzen jarraituko dugu. Eta hori biktimen eskubide-berdintasunaren printzipioari jarraiki egingo dugu, pairatutako indarkeriaren zeinuari erreparatu gabe. Printzipio horri jarraiki, batetik, ez dugu onartuko biktimen arteko diskriminaziorik, eta halakorik bada lehengoratu egingo dugu, eta, bestetik, ukatu eta eragotzi egingo dugu biktima batzuk edo beste batzuk daudela justifikatzen duen edozer asmo.

2013ko azaroaren 26an onartutako Bake eta Bizikidetza Planaren lehentasunetako bat biktimen politika kudeatzea eta bultzatzea da. Batera Konpromisoak IV. Ekimenari erantzuten dio. Ekimen horrek, bada, bi ardatz ezartzea aurreikusten du: batetik, biktimei laguntza, errekonozimendua eta ordaina emateko ildo nagusiekin jarraitzea eta, bestetik, politika hauek berritzea, uneko testuinguruaren bilakaerara egokituta.
 

 

EUSKO JAURLARITZAK 260.000 EURO BIDERATUKO DITU TERRORISMOAREN BIKTIMEN ELKARTEEI LAGUNTZEKO.

LABURPENA

Eusko Jaurlaritzak aurten guztira 260.000 euro bideratuko ditu terrorismoaren biktimei arreta, elkartasuna eta babesa eskaintzea bultzatzen duten erakunde eta elkarteentzako laguntzetara. Jaurlaritzaren Kontseiluak laguntza horien deialdia onartu du gaurko bileran. Laguntazk Biktimen eta Giza Eskubideen Zuzendaritzaren bitartez izapidetuko dira. Diru laguntzen kopurua beste urteetan ere berdina izan da.

Terrorismoaren biktimen edo giza-eskubideen arloan jardun ohi duten erakunde eta elkarteek jasoko dituzte laguntzok, Euskal Autonomia Erkidegoan badute egoitza. Laguntzen onuradun izan daitezke, halaber, honako erakunde hauek: EAEtik kanpo egoitza duten terrorismoaren biktimen elkarteak, EAEn gertatutako ekintza terroristen biktimak izanez gero beraien kideen artean; eta irabazi asmorik gabeko beste pertsona juridiko pribatu batzuk, EAEn gertatutako ekintza terroristen biktimei laguntzeko berezko helburua badute.

Elkarteek sustatutako programa eta jarduerek honako helburuak izango dituzte, besteak beste: terrorismoaren biktimei arreta, orientazioa eta giza babesa ematea; biktimak edo bere senitartekoak laguntzea biktimak izatera eraman dituzten delituekin lotutako epaiketetara; terrorismoaren biktimei eta zaintzailearen lana betetzen duten familiako pertsonei laguntza psikosoziala eskaintzea; eta, oro har, terrorismoaren biktimei buruzko eztabaida-guneak, ikastaroak edo mintegiak antolatzea.

Laguntza horietara biltzeko eskabideak hilabeteko epean aurkeztuko dira, deialdia Euskal Herriko Agintaritzaren Aldizkarian argitaratzen den egunaren biharamunetik aurrera.
 

 

HERRI ADMINISTRAZIO ETA JUSTIZIA SAILA X. LEG.

GOBERNU-KONTSEILUAK GAZTE-JUSTIZIAREN IV. PLANA ONARTU DU, ETA 80 MILIOI INBERTITUKO DITU 2018RA BITARTEAN.

Txostena, Euskal Autonomia Erkidegoko IV Gazte Justizia Plana.

LABURPENA

• Planaren erronka nagusien artean, honako hauek: esku-hartze psikosozial pertsonalizatuagoa, ingurunean eragina izatea, neurriak gauzatzeko denbora arintzea, arau-haustea berriro egin ez dezaten lortzea eta gazteen arau-hausteak prebenitzea.
• Gobernuak adingabeentzako zentroetako langileen segurtasuna bermatzeko gidaliburua eguneratuko du, eta ertzain eta udaltzain berriek trebakuntza jasoko dute adingabeekiko esku-hartzea hobetze aldera.
• Jaurlaritzak, halaber, protokolo bat prestatuko du legea hausten duten adingabeek eta haien familiartekoek zer gizarte-zerbitzu eta laguntza lor ditzaketen zehazteko.
• 2015eko lehen seihilekoan, Euskal Autonomia Erkidegoko auzitegiek 480 neurri ezarri dizkiete Euskadin arau-hausteren bat egin duten adingabekoei.

Gobernu-kontseiluak Gazte Justiziaren IV. Plana onartu du 2014-2018 aldirako, 80,2 milioi euroko inbertsioarekin. Helburua arau-haustea egin duten eta neurri judizialen bat bete behar duten adingabeei Eusko Jaurlaritzak eskaintzen dien laguntza osoa hobetzea eta horretan aurrerabideak egitea da.

Zenbateko horri esker, ikastetxe itxiak (60,5 milioi euro), erregimen irekiko edo erdi-irekiko ikastetxeetako hezkuntza-programak (10,5 milioi euro) eta esku-hartze psikosozialerako langileen gastuak (9,2 milioi euro) finantzatu eta kudeatu ahal izango dira.

Gazte Justiziaren IV. Planak bost erronka nagusi ditu:

. Prebentzioa. Arau-haustearen eragile diren inguruak gutxiarazteko asmoz, heziketaren bidez familiaren, gizartearen eta hezkuntzaren eremuetan esku hartzea da helburua. Hartara, arreta berezia jarriko zaio gurasoen aurkako indarkeria, osasun mentaleko arazoak, estupefazienteen neurrigabeko kontsumoa eta halako beste zenbait gairi heltzen dion hezkuntza integralari.
. Neurri judizialak gauzatzeko beharrezko denbora arintzea, esku-hartzea ahalik eta azkarrena eta eraginkorrena izan dadin.
. Esku-hartzea pertsonalizatuagoa izatea, arau-haustea egin duen adingabekoaren gizarte-egoeraren araberakoa dena.
. Gazteen eremuan bertan jardutea. Hezitzaileek, psikologoek, gizarte-langileek eta esku-hartze sozialeko langileek, zuzenbideko langileek eta beste zenbaitek neska-mutikoen ingurunean (familian, ikastetxean, auzoan, lagunengan, ...) duten eragina areagotuko dute, haien gizarteratzea errazteko.
. Arau-hausteetan berriro ez erortzea. Diziplina anitzeko programak jarriko dira abian, besteak beste, sozializaziorako gaitasunak eta ohiturak hartzeko, neska-mutikoen pentsaera, jarrerak eta balioak berregituratzeko edota legea berriro ez hausteko teknikak bereganatzeko. Euskadik berrerortze-maila baxuenetakoa du estatuan: arau-haustearen bat egin izanagatik justiziarekin harremanik izan duen adingabekoen % 80,4k ez du berriro legerik hausten.

EKINTZA ZEHATZAK

Erronka horiei ekiteko, plana Gobernuaren tresna transbertsaltzat sortu da, eta bost sail hartuko ditu barne. Sail bakoitzak ekintza jakin batzuk abiaraziko ditu. Hona hemen nabarmenenak:

Herri Administrazio eta Justizia Saila:

- Gazte-justiziako zentroen sarean lan egiten dutenen segurtasunerako gidaliburua eguneratuko du, eta kontratupeko segurtasun-langileei berariazko prestakuntza eskainiko die.
- Bitartekaritza bultzatuko du gazte-justiziaren arloan, epaiketez eta neurriak ezartzeaz aparteko irtenbideak eskaintzeko asmoz. Gaur egun, bitartekaritzadun gazte-justiziaren kasuen % 84 emaitza onekin konpondu ahal izan da biktima eta erasotzailearen artean.
- Ikerkuntza zientifikoa sustatuko du, EHUrekin batez ere, gazte-justiziaren sistema hobetuko duten esku-hartzerako ereduak erauzteko. Halaber, neurriak eraginkorrak diren ala ez aztertuko du, bitartekaritza-prozesuak ebaluatuko ditu eta berrerortzeari buruzko datuak ikertuko ditu.

Segurtasun Saila:

- Egun adingabeekin egiten den jardunaren arloan indarrean dagoen polizia-instrukzioa berrikusi eta, hala badagokio, eguneratu egingo du.
- Ertzain eta udaltzain izangai direnei prestakuntza eskainiko die gazte-justiziaren arloan.
- Legea hautsi duten adingabeekin harremanetan daudenean, segurtasuna bermatzeko prestakuntza eskainiko die gazte-justiziaren zerbitzuetan diharduten langileei.
- Adingabeek maizen egiten dituzten arau-hausteen sailkapena egingo du, esku-hartzeak egoera jakinetara hobeto egokitu daitezen.

Etxebizitza eta Gizarte Gaietako Saila:

- Adingabeek eta haien familiartekoek zer laguntza lor dezaketen zehazten duen protokoloa prestatuko du: zentruetatik atera osteko sorospena, DSBE, prestakuntza-ikastaroak jasotzeko aukera, etab.
- Justiziako eta Lanbideko zenbait teknikariz osatutako lantaldea sortuko du, neurriak bete behar dituzten pertsonak lan-munduan txertatzeari begira, berariazko ekintzak azter eta proposa ditzan.

 Osasun Saila:

- Legea hautsi duten adingabekoei osasun-txartel indibidual bana (OTI) emango die, haien osasun-laguntza bermatzeko asmoz.
- Aldizkako arreta psikiatrikoan jarriko du arreta, eta zentro itxietan egunerokoa izango da arreta hori.
- Osasun-laguntzarako indarrean dagoen protokoloa berrikusi eta, hala badagokio, eguneratu egingo du.
- Adingabeen droga-kontsumoa prebenitzeko eta jarduera fisikoa eta elikadura osasungarria sustatzeko prestakuntza-ikastaroa antolatuko du.

Hezkuntza, Hizkuntza Politika eta Kultura Saila:

- Ikastetxeetako bizikidetzaren eta eskola-uzte goiztiarrak gutxitzearen alde lan egingo du.
- Ikasleentzako zein irakasleentzako prestakuntza- eta dibulgazio-jarduerak egingo ditu gazte-justiziaren arloan.

2015EKO LEHEN SEIHILEKOAREN BALANTZEA

2015eko lehen seihilekoaren datuen arabera, euskal organo judizialek 480 neurri ezarri zizkieten arau-hustearen bat egin zuten adingabeei.

2015eko lehen datuek azken urteotako joera berresten dute ondorengo alderdi hauei dagokienez:

- Profila: adin txikiko mutila (% 80,7), 14 eta 18 urte bitartekoa eta Euskadin jaiotakoa (% 66).
- Maizen egindako arau-hustea: Indarkeria erabiliz lapurreta (18,42%), indarra erabiliz egindako lapurreta (16,17%) ebasketa (13,25%) eta familiakiko eta genero indarkeria (13,03%).
   - Neurri-mota: neurri irmoa (% 92,7), «erdi-irekian» betetzen duena (% 40). Hau da: adingabeak euren familia-eremuan geratzen dira baina eguneko zentroetara joan behar izaten dute, tratamendu anbulatorioa jasotzen dute, zaintzapeko askatasun-erregimenean egoten dira, gizarte-heziketako lanak egiten dituzte, gizartearentzako lanetan parte hartzen dute, asteburuko egonaldia etxean egiten dute, etab. 2015eko lehen seihilekoan, 480 neurrietatik 4 besterik ez ziren izan barneratze itxiak (% 0,8).
 

 

Dokumentuak
NEURRIAK
MEDIDAS

ENPLEGU ETA GIZARTE POLITIKETAKO SAILA X. LEG.

EUSKO JAURLARITZAK ETA BIZKAIKO FORU ALDUNDIAK ENPLEGAGARRITASUNA ETA PRODUKTIBITATEA HOBETZERA BIDERATUTAKO BITARTEKOAK KOORDINATUKO DITUZTE.

Erabakia, Bizkaiko Foru Aldundiari zuzeneko diru-laguntza emateko dena, 2015ean enplegagarritasuna hobetzera, eta euskal enpresak modernizatzera eta produktibitatea handitzera bideratutako baliabideak koordinatzeko.

LABURPENA

Enplegu eta Gizarte Politiketako sailburu Ángel Toñak onartu du Bizkaiko Foru Aldundiari 824.842,50 euroko zuzeneko diru-laguntza ematea Lanbide-Euskal Enplegu Zerbitzuaren aurrekontuaren kontura. Euskal enpresa-ehunaren enplegagarritasuna hobetzera, modernizaziora eta produktibitatea handitzera 2015ean bideratutako bitartekoak koordinatzea da helburua.

Honako programa hauek bultzatuko dira diru-laguntzaren bidez:
1.- Ekintzailetza-kulturaren gaineko sentsibilizazioa eta ezagutza areagotzeko jarduerak.

1.1.- EGIN ETA EKIN ENPRESARI. Lanbide-heziketan oinarritutako ekintzailetza.
Parte-hartzaileei ikusarazi nahi zaie enpresa bat sortzea egingarria eta laneratzeko zein norberaren garapen pertsonalerako bide baliozkoa dela. Hala, etorkizun profesionalari begira, enpresa sortzea erabakitzen duten gazteen kopurua handitu nahi da. Horretarako, honako ekintza hauek egingo dira:
   • Sentsibilizazio- eta sormen-tailerrak.
   • Negozio-ideien lehiaketa.
   • Ideiak garatzeko tailerrak.
   • Enpresa-proiektuen lehiaketa.
   • Irakasleen prestakuntza-jardunaldiak (Eragile).
   • Enpresetara bisitaldiak.

1.2.- Lanbideren webguneko autoenpleguaren atala (www.lanbide.euskadi.eus) eta hala nola DEMA webguneko baliabide-zentroa (Bizkaiko Foru Aldundia) mantentzea eta eguneratzea.

2.- Ekintzaileek enpresak sortzea sustatzea, negozio-ideiak enpresa-proiektu bihurtuta. SORTU programa.
Negozio-ideiak enpresa-proiektu bihurtzearen bitartez bideragarritasun- eta zehaztapen-indize handiko enpresa-negozioak sortzea eta abiaraztea da helburua, horretarako aldian behingo aholkularitza banakakoa eskainita.

3.- Bizkaiko lan-merkatua eta produkzio-egitura aztertzea: BIZKAIKER Behatokia.
Lan- eta enpresa-arloen egoeraren gaineko txostenak egitea.

4.- Enpresak kontsolidatzeko zerbitzuak, aholkularitza espezializatuko zerbitzuak eskainita.

4.1.- INDARTU programa: enpresa-aholkularitza, enpresa-lehiakortasuna sustatzeko.
Bi urtetik gorako antzinatasuna duten enpresen lehiakortasuna eta jarraikortasuna laguntzea da helburua, horretarako aholkularitza espezializatua eskainiz:
   - Marketin estrategikoa.
   - Plangintza estrategikoa.
   - Bideragarritasun-plana

4.2.- ENPRESA SENDIAN programa: familia-enpresak laguntzea.
Bizkaiko familia-enpresen lehiakortasuna, gobernagarritasuna eta, oinordetza prozesuetan, jarraikortasuna sustatzea da helburua.

Bizkaiko Foru Aldundiak jarduera guztiak Enpresa Garapenerako Agentziaren-DEMA (aurrerantzean, DEMA) bitartez gauzatuko ditu.

Enplegu-plana
Eusko Jaurlaritzaren 2014-2016 aldirako Enplegu-planaren helburu estrategikoen artean dago ekintzailetza erraztu eta autoenpleguari pizgarriak ematea, aberastasun- eta enplegu-iturri delako, hala nola erakundearteko lankidetza sustatzea eta batera jardutea enpleguaren alde.
Eusko Jaurlaritza, Lanbide-Euskal Enplegu Zerbitzua organismo autonomoaren bidez, eta Bizkaiko Foru Aldundia lankidetzan jardun dira aurreko ekitaldietan ere helburu horiek lortzearren.

Bi erakundeek eginahalak eta baliabideak koordinatu dituzte 2012az geroztik, ahalik eta pertsona gehienek enplegu egonkor eta kalitatezkoa lortzera bideratutako jarduerak abiaraziz, tokiko hazkunde ekonomikoa bultzatuz, enpresa-sena sustatuz eta enpresen lehiakortasuna hobetuz. Horietan guztietan lortutako emaitza positiboek ekimen honek jarraipena izatea bermatzen dute.
 

 

HEZKUNTZA, HIZKUNTZA POLITIKA ETA KULTURA SAILA X. LEG.

2.400.000 EURO KULTUR ONDAREA ZAINDU ETA BABESTEKO.

LABURPENA

Gobernu Kontseiluak Hezkuntza, Hizkuntza Politika eta Kultura sailburuaren proposamenez, 2015-2017 urteen tartean euskal kultur ondarea zaindu, aberastu, babestu eta sustatzeko jardueretarako diru laguntzak arautzen dituen Agindua onartu du. Agindu honek, era berean, ondare horri eragiten dioten hiri antolaketarako instrumentuak idatzi eta aldatzeko diru-laguntzak ere arautzen ditu.

Bi diru-laguntza mota bereizten dira: bata, euskal kultur ondarea zaindu, aberastu, babestu eta sustatzekoa, 2.250.000 euroko diru kopurua duena; eta bigarrena, aipaturiko ondare horri eragiten dioten hiri antolaketarako instrumentuak idatzi eta aldatzekoa, 150.000 euroko diru kopuruarekin (2.400.000 euro orotara).

Agindu honek, aurreko deialdiaren bidez, euskal kultura ondarea bultzatu eta sustatzeko 32 proiektu lagundu zituen diruz. Horien artean, aipagarriak dira diru-laguntza jaso zuten jarduera hauek: Arabako erromanikoa ezagutzeko zentroa sortzea (Estibalitzen); Punta Begoñako Galerietan egindako esku-hartzea (Getxon); Kanpezuko harresirako sarbidea hobetzea; Egiar estazio megalitikoari balioa ematea (Oiartzunen); Done Jakue Bidean dauden ermitei balioa ematea eta haiek ezagutaraztea Getarian eta Bermeon; edo Santa Ana Biltegian zahar berritze lanak burutzea (Añanako Gatz Haranean).

Diru-laguntza hauen onuradun izan daitezke Euskadiko pertsona fisiko edo juridikoak, publiko nahiz pribatuak, toki entitateak edo euren menpeko organoak, bai eta hiri birgaikuntzarako sozietateak ere. Eskaerak aurkezteko epea hilabetekoa izango da, Agindua EHAAn agertu eta hurrengo egunean hasita.
 

 

IZENDAPENAK ETA KARGU UZTEAK EUSKADIKO ORKESTRAREN ADMINISTRAZIO KONTSEILUAN.

Erabakia, Euskadiko Orkestra sozietate publikoaren Administrazio Kontseiluko kontseilaria kargutik kendu eta beste batzuk izendatzeari buruzkoa.

LABURPENA

Gobernu Kontseiluak, gaurko bileran onartu ditu Hezkuntza, Hizkuntza Politika eta Kultura sailburuaren proposamenez Euskadiko Orkestra sozietate publikoaren Administrazio Kontseiluan ordezkaritza duten Foru Diputatuen izendapen berriak eta kargu uzteak.

Kargua uzten dute, beraz, sozietate publikoan: Itziar Lamarain Cenitagoyak, Ikerne Badiola Garciandiak eta Miren Josune Ariztondo Akarregik. Hauen ordez, kontseilari izendatu dira: Igone Martinez de Luna Unanue, Denis Itxaso Gonzalez eta Lorea Bilbao Ibarra.
 

 

INGURUMEN ETA LURRALDE POLITIKA SAILA X. LEG.

ALEXANDER BOTO, URDAIBAIKO BIOSFERA ERRESERBAREN PATRONATUKO KIDE BERRIA.

Erabakia, Euskal Autonomia Erkidegoko Administrazioak Urdaibai Biosfera Erreserbako Patronatuko eta Batzorde Iraunkorreko ordezkari bat izendatzeko dena.

LABURPENA

Gobernu Kontseiluak Urdaibaiko Biosfera Erreserbaren Patronatuko Osoko Bilkurako eta Batzorde Iraunkorreko kide izendatu du Alexander Boto Bastegieta, Ingurumen eta Lurralde Politika Saileko Natura Ingurunearen eta Ingurumen Plangintzaren zuzendaria, Euskal Autonomia Erkidegoaren ordezkari gisa, Amaia Barredoren ordez. Azken hori kargugabetu egin du, orain Arabako Foru Aldundiko Ingurumeneko zuzendaria baita.

 

UNAI REMENTERIA, BIZKAIKO GARRAIO PARTZUERGOKO KONTSEILU NAGUSIKO ETA BATZORDE EXEKUTIBOKO PRESIDENTE BERRIA .

Dekretua, Bizkaiko Garraio Partzuergoko Kontseilu Nagusiko eta Batzorde Betearazleko lehendakariari kargua kendu eta berria izendatzeko dena.

LABURPENA

Gobernu Kontseiluak Bizkaiko Garraio Partzuergoko Kontseilu Nagusiko eta Batzorde Exekutiboko presidente izendatu du Unai Rementeria, Bizkaiko Foru Aldundiko ahaldun nagusia, José Luis Bilbaoren ordez.