2012/05/08 (e)ko  saioa 
Aurkibidea

HEZKUNTZA, UNIBERTSITATE ETA IKERKETA SAILA

1,071 MILIOI EURO NAZIOARTE MAILAKO UNIBERTSITATE-MUGIKORTASUNERAKO

Agindua, 2012-2013 ikasturtean nazioarteko unibertsitate-mugikortasunerako laguntzak eskatzeko deialdia egiten duena unibertsitateko eta goi-mailako arte-ikasketak egiten ari diren ikasleentzat.

Gobernu Kontseiluak, Hezkuntza, Unibertsitate eta Ikerketa sailburuaren proposamenez, gaurko egunez onartu du 2012-2013 ikasturtean unibertsitate- eta goi mailako arte-irakaskuntzetako ikasleentzat nazioarte mailako unibertsitate-mugikortasunerako bekak deitzen dituen agindua.

Euskal Herriko Unibertsitatean, Deustuko Unibertsitatean, Mondragon Unibertsitatean, Donostian egoitza duen Nafarroako Unibertsitateko Ingeniarien Goi Eskolan (TECNUN) eta Euskal Autonomia Erkidegoko goi mailako arte-irakaskuntzetako ikastegietan matrikulatuta dauden unibertsitate- eta goi mailako arte-irakaskuntzetako ikasleentzat 2012-2013 ikasturtean nazioarte mailako unibertsitate-mugikortasunerako bekak deitzea du agindu honek, 1.071.200 euroko zenbateko globalekoak, helburu.
 

 

IKERKETA EGINTZA BEREZIETARAKO LAGUNTZAK

Agindua, ikerketa-egintza berezietarako laguntzak emateko deialdia egiten duena.

Jaurlaritzaren Kontseiluak, Hezkuntza, Unibertsitate eta Ikerketa sailburuaren proposamenez, Agindu bat onartu du ikerketa egintza berezietarako laguntzetarako deia egiten duena.

120.000 euroko diru-kopuru osoa duen deialdi honen helburua Euskal Autonomia Erkidegoko oinarrizko ikerketa eta ikerketa aplikatuaren kalitate zientifiko-teknikoa hobetzea da, eta EAEko giza baliabideen parte-hartzea, lehiakortasuna eta gaitasuna gehitzea.

Era berean, deialdi honek beste laguntza batzuk ere izango ditu kontuan: Europako Batasuneko I+G programa markoko berariazko programen barruan onartutako proiektu europarrak aurkezteko laguntzak.
 

 

485.032 EURO ATZERRIAN ESPEZIALIZAZIO IKASKETAK EGITEKO

Agindua: honen bidez, EAErentzat interesgarriak diren gaietan, 2012-2013 ikasturtean, atzerrian espezializazio-ikasketak egiteko beketarako deia egiten da.

Jaurlaritzaren Kontseiluak, Hezkuntza, Unibertsitate eta Ikerketa sailburuak proposatuta, gaurko bilkuran onartu duen aginduak beketarako deia egiten du 2012/2013 ikasturtean EAErako interesgarriak diren gaiei buruz atzerrian espezializazio ikasketak egiteko.

485.032 euroko kopuru osoa duten laguntza hauen programaren helburua unibertsitateko goi mailako tituludunen espezializazioa erraztea da, batez ere, Lehikortasuna, Ingurumena eta Energia, Informazio-Gizartea, Bizi-Kalitateaa eta Baliabide-Biziak, horretarako atzerrian espezializazio ikastaroak eginez, beti ere irakaskuntza arautuko programa baten barruan.
 

 

EKONOMIA ETA OGASUN SAILA

GOBERNU-KONTSEILUAK ONTZAT EMAN DU EAEKO ADMINISTRAZIOAREN ETA ELKARGI ETA OINARRI EBS-EN ARTEAN SINATUTAKO BIRFINKATZE-HITZARMENAK, GEHIENEZ 550 MILIOI EUROKOAK

Erabakia: Elkargi S.G.R.kin eta Oinarri, S.G.R.kin hitzarmen bana sinatzea baimentzeko dena; hitzarmenotan, 2012. urtean zehar aipatu sozietateei dagokienez, finkatu egiten dira Administrazioak eman beharreko bir-finantzaketaren ezaugarriak.

Gobernu-kontseiluak ontzat eman ditu Euskal Autonomia Erkidegoko administrazioaren eta Elkargi eta Oinarri elkarrekiko berme-sozietateen arteko 2012. urterako birfinkatze-hitzarmen berriak. Euskadiko enpresek, ETEek eta autonomoek finantzazioa errazago lortzeko helburuz sinatu dira akordiook. 2012rako Euskadiko aurrekontu orokorretan enpresak finantzatzeko jarrita dagoen lerroan doaz hitzarmenak, eta lerro horrek 550 milioi euro eman ditzake gehienez.

Hitzarmenak enpresen inbertsio-proiektuak laguntzeko edo euskal enpresen jarduerak martxan jarraitzen laguntzeko dira, premia nagusia horixe dute-eta; alegia, zirkulatzailea finantzatzea. Gobernua beti dago eta egongo da gure enpresen alde, gure ekoizpen-sistema hobetzeko, finkatzeko eta gerora begira bermatzeko, sistema hori baita enplegua sortzeko pizgarri funtsezkoena.

Birfinkatzeko hitzarmen berri hauek sinatuta, besteak beste, Euskadiko enpresa-sektoreko inbertsio- edo zirkulatzaile-proiektu berrietarako finantzazio-bideak irekiko dira, enpresa, ETE nahiz autonomoentzat. Esan beharrik ez dago finantzazio-premia aspaldiko urteetako larriena dela orain euskal enpresentzat, bankuen jarrera ezkorra ikusita, eta horretarakoxe dira hitzarmen hauek.

Horretarako, finantzatzeko aukera gehiago sortuko dira euskal enpresentzat, hein bateko estalduraren bidez, nagusiki, hitzarmen honen baitan EBSek, Elkargik eta Oinarrik, ematen dituzten abalak diru publikoaren bidez birfinkatuta.

Zirkulatzaile-eragiketen finantzazioari emango dioten indarra kontuan hartuta, zenbait baldintza ezarri dira eragiketa hauetarako: berme publikoa indartzea.

Zirkulatzaile-eragiketetarako finantzazioa sendotzeaz gain, Eusko Jaurlaritzak berak ere berme osagarria jarriko du, hain justu, Diru Funtsa, EBSek aukera izan dezaten kobraezinei aurre egiteko, eta dotazioak taxutzeko, beren ustiatze-kontuari kalte egin gabe.

Hitzarmenen iraupenari buruz, sinatzen denetik hasi eta aurtengo abenduaren 31 bitartean egongo dira indarrean, baina aukera emango dute aurtengo urtarrilaren 1etik hitzarmenak sinatu bitartean formalizatutako eragiketan ere hitzarmenean sartzeko, baldin hitzarmenean bete beharrezkotzat jotako baldintza guztiak betetzen badituzte.

Eusko Jaurlaritzak, Enpresari Laguntza Finantzarioa Emateko Programa berezia sinatzeaz argi adierazi zuen, ekoizpen-ehuna sendotzen laguntzen duten eta enpresei likidoa ematen dieten lanabesen alde egiten du beti. Horrexegatik handitu du azken hiru urteotan hainbeste Elkarrekiko Berme Sozietateei orain artean ere ematen zien abala.
 

 

ETXEBIZITZA, HERRI LAN ETA GARRAIO SAILA

JAURLARITZAK HONDARRIBIAN 25 ETXEBIZITZA EROSIKO DITU ALOKATZEKO

Erabakia: horren bidez, Hondarribiko udalerriko A.I.U. 36 Muliate eremuan dauden 25 etxebizitza sozial eta bere eranskinak erosiko dira, zuzeneko kontratazio bidez, errentamendu babesturako.

Gobernu Kontseiluak 25 etxebizitza sozial erosiko ditu alokatzeko Hondarribiko Muliate arloan. Etxebizitza Sailak bi milioi hirurogeitahamar mila euro ordainduko du etxe horiek erosteko.

Esleitu beharreko etxebizitza horietatik honakoak gordeko dira:

   a) Etxebizitza bat, mugikortasun urri iraunkorra duten elbarriei egokitutakoak. Kupo honetan gurpil-aulkira mugatuta daudenak sartuko dira.

    b) 11 etxebizitza babes bereziko gizarte egoerak dituztenentzat: 
            Beren kargura adin txikiko seme-alabak dituzten guraso  bakarreko familiak
            Genero-indarkeriaren biktimak
            Bananduak
            70 urtetik gorakoak .
            Ezintasun psikikoa duten pertsonak

    c) 4 etxebizitza, izen ematearen antzinatasuna 4 urtetik gorakoa dutenentzat.
Antzinatasun edo aldi hori honela zenbatuko da: Etxebiden izena emateko eskariaren datatik Agindua argitaratu den egunera arte.

    d) 9 etxebizitza, gainerako eskatzaileentzat.

 

Eskatzaileek hainbat kupotan aldi berean parte hartzeko baldintzak betetzen badituzte, atal honetan finkatutako lehentasun-hurrenkera jarraituko da.

Etxeebiden izena emateko 2011ko azaroaren 30era arte erregistroan sarrera izan duten eskabideak hartuko dira kontuan.

Onartutakoen zerrendetan, besteak beste, onartutako eskaera bakoitzari orotara dagokion zenbaki kopurua agertuko da.

2010. urteko zergaldiko diru-sarrera haztatuak 3.000 euro baino txikiagoak ez direla eta 25.000 euro baino handiagoak ez direla egiaztatzea eskatzen da. Mugikortasun urria duten ezgaituak edo ezgaitu psikikoak izanez gero, ez da eskatuko gutxieneko diru-sarrerarik egiaztatzea.

Itxaron-zerrenda agortuz gero, esleitu gabe geratzen diren etxebizitzak, Gipuzkoako lurralde ordezkariak zozketa bidez esleituko ditu araudiak ezartzen dituen baldintzak betetzen dituzten eskabideen artean.
 

 

INGURUMEN, LURRALDE PLANGINTZA, NEKAZARITZA ETA ARRANTZA SAILA

ARRANTZA-ONTZIAK DESEGITEKO 1,8 MILIOI EUROKO KREDITUA ONARTU DA

Dekretua, 9211 Programan (Euskal Autonomia Erkidegoko Administrazioaren 2012rako Aurrekontuaren Sektore Publikoarekiko Beste Finantza Harreman Batzuk) lortutako sarrerengatik 7112 Programan (Arrantza) kredituak gaitzeko dena. Zenbatekoa: 1.853.058,06 euro.

Gobernu Batzordeak egin duen gaurko bileran nazioarteko arrantza-tokietan eta atzerrian erroldaturik dauden arrantza-ontziak desegiteko 2012. urterako 1.853.000 euroko kreditua bideratzeko dekretua onartu du.

Pilar Unzalu sailburuak Espainiako Gobernuarekin sinatutako akordioari esker Euskal Autonomi Erkidegoak 3.706.116 euro jasoko ditu Gobernu zentraletik nazioarteko arrantza-tokietan eta atzerrian erroldaturik dauden arrantzuntziak desegiteko. Beti ere, ontzi horiek ez badaude kudeaketa, berreskuratze, neurri larri planen barruan edota ez badituzte arrantza eskubideak berritu.

Joan den urriaren 6an onartu zen Erret Dekretuak biltzen duen Plan horretan arrantza ahalmen gutxitzea, dagokien ontzien gelditzearekin bideratuko dela jasotzen du. Horretarako, dirulaguntzen erregulazioa egin behar dute Erkidego Autonomoek.

Ekonomia eta Ogasuneko eta Ingurumen, Lurralde Plangintza, Nekazaritza eta Arrantza departamentuetako sailburuek proposatutako eta gaur onartutako dekretuak 1.853.000 euroko diru kopurua bideratuko du 2012. urterako, oso-osorik Estatuko Administrazio Orokorretik iritsiko dena.
 

 

LEHEN SEKTORE ETA ELIKAGAIETARAKO IKERKETA, GARAPEN ETA BERRIKUNTZA TEKNOLOGIKORAKO 6 MILIOI EUROKO DIRULAGUNTZA DEIALDIA ONARTU DA

Erabakia, azaroaren 23ko 230/2004 Dekretuan aurreikusitako diru-laguntzak finantzatzeko 5000.000 eurotik gorako gastua baimentzekoa dena, Euskal Autonomia Erkidegoko nekazaritza-, arrantza- eta elikagaigintza sektoreetan ikerketa, garapena eta berrikuntza teknologikoa laguntzeko (Ikerketa Programa), 2012an urtean.

Gobernu Batzordeak sei milioi euroko laguntza lerroa onartu du gaurko bileran Euskadiko arrantza eta elikagai eta nekazaritza sektoretan ikerketa, garapena eta berrikuntza teknologikoa diruz babesteko. Laguntza horiek aurrerapen itzulgarriak izango dira.

Gobernu batzordeak horrela, Pilar Unzalu sailburuaren proposamena onartu eta 6 milioi euro bideratuko ditu Ikerketa Programarako. Horren helburua, nekazaritza, arrantza eta elikagaietako sektoreetan ikerketa, garapena eta berrikuntza sustatzea eta bultzatzea da aurrerapen itzulgarrien bitartez.

Dirulaguntza programa horren finantzaziorako, Ingurumen, Lurralde Plangintza, Nekazaritza eta Arrantza sailak sei milioi euroko kopurua aurreikusi du. Horietatik 700.000 euro 2012. urteko kreditu ordainketei dagozkie eta gainontzeko diru kopurua 2019. urtera arte banatuko diren aurrerapen itzulgarriak dira.

Pilar Unzalu sailburuak, gainera, 2012. urteko Ikerketa Programaren eskaintzak aurkezteko epe irekiera iragartzen duen Ordena onartu du.
 

 

KULTURA SAILA

JAURLARITZAK 449.000 EURO ONARTU DITU MUSIKA-JARDUERA PROFESIONALETARAKO

Agindua, musika jarduera profesionaletarako diru-laguntzak emateko modua arautzen duena.

Kulturako sailburuaren proposamenez, 2012ko urtealdian musika-jarduera profesionaletarako diru-laguntzak emateko araubidea ezartzen duen Agindua onartu du Jaurlaritzaren Kontseiluak. Laguntzen gehienezko diru-zenbatekoa 449.000 euro da, eta honela banatuko da: Musika-partituren ediziorako, 32.000 euro; banakako musika-proiektuetarako, 92.000 euro; musika-ekimen enpresarialetarako, 180.000 euro, eta musika programaziorako, 145.000 euro.

Kultura Sailak egoki deritzo musika sustatzeko aukera emango duen bidea antolatzeari. Horretarako, hainbat laguntza emango ditu jarduera profesionalak egiteko zenbait modalitatetan (musika-partituren edizio inprimatua, banakako musika-proiektuak, musika-ekimen enpresarialak, eta musika programazioa), alegia, euskal musikarien sorkuntza-lana sustatzeko formula bat izan nahi du eta, gainera, musikari horien ahalegina aitortzeaz gain, beren lanak beste merkatu batzuetara zabaltzeko aukerak eskaini, beren finantzabideak ugaritu daitezen.

 

Modalitateak eta diru-baliabideak

- Musika-partituren edizio inprimatua

Laguntza hauek musika-partituren edizio inprimatua dute helburu, gero zuzenean interpretatu ahal izateko zabaldu daitezen. Espresuki geratuko da deialdi honetatik kanpo material didaktikoen edizioa.
Modalitate honetan proiektu bat baino ezingo da lagundu onuradun bakoitzeko, nahiz eta proiektuan edizio bat baino gehiago aurreikusi. Dena den, onuradun bakoitzari ezingo zaio 10.000 euro baino gehiago eman.

- Banakako musika-proiektuak

Modalitate honetan zuzeneko musika-ekoizpena edo formatu fonografikokoa bultzatuko da, bai eta musika-proiektu bat sustatzea eta zabaltzea (dela euskal musikariena, dela euskal musika taldeena), baita ere ikus-entzuleen sentsibilizazioa, eta modalitatearen barruko jarduerak gerora garatzeko ikerketa edo prestakuntza espezifikoa.
Modalitate honetan proiektu bat baino ezingo da lagundu onuradun bakoitzeko, nahiz eta proiektuan jarduera bat baino gehiago aurreikusi. Onuradunek proiektu bakoitzean jaso dezaketen gehienezko diru-kopurua 10.000 euro da.

- Musika-ekimen enpresarialak

Modalitate honetan Euskadin jardunean dauden musikari edo musika-taldeen zuzeneko musika-ekoizpena edo formatu fonografikoa bultzatuko da, bai eta haien musika-proiektuak sustatzea eta zabaltzea ere, eta ikus-entzuleen sentsibilizazioa eta prestakuntza, eta entitatea gaur egungo musikaren jardunera eta industriara egokitzeko ekintza espezifikoak.
Modalitate honetan proiektu bat baino ezingo da lagundu onuradun bakoitzeko, nahiz eta proiektuan jarduera bat baino gehiago aurreikusi eta aurrekontuan sartu. Onuradun bakoitzari ezingo zaio 28.000 euro baino gehiago eman.

- Musika programazioa

Modalitate honen helburua da 2012ko urriaren 1etik 2013ko apirilaren 30era bitartean egiten diren euskal musika-taldeen programazioak laguntzea, non eta ‘Zuzen-Zuzenean’ goiburupean sustatzen diren, Kultura Sailaren ‘Musika Bultzatuz’ eta ‘Euskadiko Soinuak’ programen esparruan.

Proiektuak, edo haien tartekako faseak, 2012ko urtarrilaren 1etik 2013ko abenduaren 31ra bitartean gartu behar dira, eta, halaber, lagundutako lan edo jardueraren jendaurreko aurkezpenen bat aurreikusi behar da denbora-tarte horretan.
 

 

EUSKO JAURLARITZA ETA NAFARROAKO GOBERNUAREN ARTEKO LANKIDETZA-HITZARMENA HIZKUNTZA POLITIKARAKO ARLOAN

Erabakia; Nafarroako Foru Komunitateko Euskarabidea-Euskararen Institutua erakunde autonomoarekin lankidetza-hitzarmen bat izenpetzeko baimena emateko dena. Helburua: hizkuntza politikari buruzko berariazko.

Gobernu Kontseiluak Eusko Jaurlaritzaren Kultura Sailari baimena eman dio gaur, Nafarroako Foru Komunitateko Hezkuntza Departamentuko Euskarabidea-Euskararen Institutuarekin hizkuntza politikari buruzko berariazko lankidetza-hitzarmena sinatzeko.

Hitzarmen horren helburua da, bi erakunde sinatzaileen arteko lankidetza bultzatzea euskarari dagozkion alderdi jakin batzuetan. Administrazio bakoitzak hitzarmen honetan bildutako programak egin edo garatuko ditu, nork bere ahal ekonomikoen heinean.

Bi erakundeek sinatuko duten lankidetza hau teknikoa da, Eusko Jaurlaritzak nahiz Nafarroako Gobernuak egoki ikusten baitute ondorengo esparru hauek zehaztea: euskararen babesa eta garapena, ikerketa, dokumentazioa eta ezagutzen nahiz informazioaren trukea.

Bi aldeak elkarlanean arituko dira, hortaz, beharrezkoak ez diren bikoiztasunak eta gastuak saihesteko, eta ahalik eta eraginkortasunik handiena lortzeko, Lankidetzarako Protokolo Nagusian zehazturik dauden arrazionaltasuna, soiltasuna, gardentasuna eta baliabideen ekonomia gordez. Aipatutako protokolo nagusi hori 2009ko uztailaren 3an izenpetu zuten Nafarroako Foru Komunitateko lehendakariak eta Euskal Autonomia Erkidegoko lehendakariak eta, besteak beste, hizkuntza-politikaren alorrean lankidetza garatzeko oinarriak ezarri ziren.

Lankidetza-hitzarmen honek, hain zuzen ere, ondorengo ezarpen-esparruak izango ditu: euskara helduei irakastea; hizkuntza gaitasunen ebaluazioa eta egiaztapena; ikerketa eta mapa soziolinguistikoak; euskara-gaztelania eta gaztelania-euskara itzulpenak; itzulpen-memoriak; terminologia; informazioaren eta komunikazioaren teknologiak; euskara nazioartean hedatzeko programak eta euskarazko irakurleak atzerriko unibertsitateetan; eta hizkuntzaren kultur sustapena.

Hitzarmen hau, sinatzen den unean indarrean jarriko da urtero luzatzeko asmoarekin, eta bi erakundeek adostutako batzorde misto batek burutuko du haren betetze-mailaren jarraipena.
 

 

1.152.000 EURO GIZARTE-BIZITZAN EUSKARA SUSTATU, GARATU EDOTA NORMALIZATZEKO

Agindua, gizarte-bizitzan euskara sustatzeko, garatzeko edota normalizatzeko 2012ko diru-laguntzak emateko araubidea ezarri eta deialdia egiteko dena (Euskalgintza deialdia).

Kulturako sailburuaren proposamenez, gizarte-bizitzan euskara sustatu, garatu edota normalizatzeko diru-laguntzak emateko araubidea ezarri eta deialdia egiteko den Agindua onartu du Euskalgintza izeneko deialdi honetarako 1.152.000 euroko aurrekontu-partida erabiliko da.

Agindu honen xedea da gizarte-bizitzan euskara sustatzeko, garatzeko edota normalizatzeko lanean diharduten pertsona fisikoek edo juridiko pribatuek 2012an burutuko dituzten egitasmoei zuzenduriko diru-laguntzak arautu eta dei egitea.

Laguntza deialdi honek 2012an burutuko diren egitasmoak baino ez ditu gogoan hartuko. Hori dela-eta, deialdi honetara biltzen diren egitasmoak gauzatzearen ondorioz eskaini, eman edota gizarteratu beharreko jardunak, zerbitzuak eta produktuak 2012ko abenduaren 31 baino lehen eskaini, eman edota gizarteratuko dira.

Honako hauek dira diruz lagun daitezkeen egitasmoak:

  - Aisialdi-taldeen jardunean euskararen erabilera areagotu eta sendotzeko egitasmoak: aisialdirako begiraleei zuzendutako prestakuntza eta material-prestakuntza; eskola-ordutegitik kanpo dauden jardunen garapena.
  - Ezagutzatik erabilerarako jauzia egite aldera, harreman-sareetan euskararen erabilera sustatu eta indartzeko egitasmoak, bai ahozkoan bai irakurri-idatzian, zenbait gizarte-talderi zuzendutakoak lehenetsiz: haur eta gazteak, euskaldun berriak.
  - Haur eta gazteen aisialdiko kirol ekintzetan euskararen erabilera areagotu, sustatu eta indartzeko egitasmoak.
  - Euskara ez dakiten euskal herritarrak euskarara hurbiltzea eta beroriei euskaraz sortu eta burututako jardunaren berri ematea helburu duten egitasmoak.
  - Euskararen ondareari buruzko informazioa jaso, gorde edota digitalizatu eta hedatzea helburu duten egitasmoak.
  - Euskarari zuzenean lotutako alderdiak aztertzea helburu duten jardunaldiak.
  - Euskalgintzan ibilbide oparoa izateagatik nabarmendutako pertsonak edo elkarteak omentzeko egitasmoak.
  - Euskararen familia bidezko transmisioa sendotzea helburu duten egitasmoak.
  - Euskaraz irakurtzeko zaletasuna sustatzea helburu duten egitasmoak: irakurketa- eta idazketa-trebetasunak garatze aldera buruturiko jardunak, sariak, lehiaketak, idazleen eta irakurleen arteko topaketak eta literatura-gidak.
  - Emakumeen euskarazko sormen kulturala bultzatzea helburu duten egitasmoak: hitzaldiak, erakusketak eta tailerrak.
  - Etorkinen artean euskararen erabilera sustatzera zuzendutako jarduerak eta proiektuak bultzatzea helburu duten egitasmoak.
  - Euskaraz landu eta plazaratutako kalitatezko ekarpenak bikaintasunaren irizpideen arabera bultza eta babesteko egitasmoak.
  - Euskarazko jostailu, joko eta denbora-pasak.

Begiz jotako xedeari aurre egiteko 1.152.000 euro erabiliko dira eta laguntza-mota hau egitasmoen gauzatze-lanei zuzen-zuzenean egotzitako gastuei partez aurre egitera dator. Nolanahi ere, kanpoan utziko dira honako hauek: egitasmoa erdaraz egiteari dagozkion gastuak eta patrimonializa daitekeen ibilgetu materialean egindako inbertsioak.

Egitasmo orok gastu eta sarrera-aurrekontu orekatua izan behar du, ezinbestean. Ondorioz, aurrekontu orekaturik ez duen egitasmoa kanpo utziko da. Egitasmo orok, gainera, gutxieneko finantzaketa-maila propioa izan behar du, ezinbestean. Ondorioz, finantzaketa-maila horretara iristen ez den egitasmoa kanpo utziko da. Finantzaketa-maila hori gastu-aurrekontuaren %40 izango da, gutxienez.

Aurreko puntuan aipaturiko finantzaketa propioa honako diru-sarrera hauez osatuta egongo da: eskatzailearen diru-ekarpenak, zerbitzu-salmentatik eskuratutakoak, produktu-salmentatik eskuratutakoak, publizitatetik eskuratutakoak edo entitate pribatuetatik jasotakoak.

Defizitarioak diren egitasmoei bakarrik eman ahal izango zaie diru-laguntza, hots, aurreikusitako gastuak, eskatzaileak ezinbestean jarri beharreko finantzaketa propioarekin berdindu ezin dituzten egitasmoei. Ondorioz, defizitarioak ez diren egitasmoak kanpo utziko dira.

Euskalgintza deialdiaren bidez eskuratutako diru-laguntza bateragarria da beste erakunde publiko zein pribatuek helburu berbererako emandakoekin, betiere gainfinantzaketarik gertatzen ez bada. Agindu honen epe-barrutia amaitu eta 21. artikuluan finkatutako justifikazioari ekin eta gero gainfinantzaketarik gertatu dela ikusten bada, diru-laguntzaren zenbatekoa murriztu egingo da. Murrizketa hori gainfinantzaketaren bestekoa izango da.

Laguntza-deialdi honetan parte hartu nahi duen orok nahi dituen beste eskabide-orri aurkezteko aukera izango du, Agindu hau Euskal Herriko Agintaritzaren Aldizkarian argitaratzen den egunaren biharamunetik hilabeteko epean.
 

 

JAURLARITZAK 120.000 EURO JARRIKO DITU GAZTEAK BALIO DEMOKRATIKOETAN ETA BAKEAREN KULTURAN HEZTEKO JARDUERAK GARATZEKO

Agindua, gazteak balio demokratikoetan eta bakearen kulturan hezteko programak eta jarduerak garatzeko diru-laguntzak emateko arauak ezartzen dituena.

Jaurlaritzaren Kontseiluak onartu egin du balioetan eta bakearen kulturan hezteko programak eta jarduerak gazteen artean zabaltzeko diru-laguntzak emateko arauak ezartzen dituen Kulturako sailburuaren Agindua. Laguntza-programa honetarako 120.000 euro erabiliko dira.

Agindu honek nahi duena da gazteak balio demokratikoetan eta bakearen kulturan hezteko programak zabaltzen laguntzea. Horretarako, Kultura Sailak beste tresna baten gisara mahairatzen du laguntza hori, hain zuzen ere, gazteak eta beste zenbait sektore berezi gizartean integra daitezen lagunduko duena. Laguntza horren bitartez, Euskal Autonomia Erkidegoko erakundeei aukera emango zaie balio demokratiko eta bakearen kulturako programak burutzeko, betiere beren kabuz egindako diseinuaren arabera, eta, aldi berean, ez zaie muga estuegirik ezarriko, arlo horretan lanean diharduten agenteen ekintza berriak eta berriztatzaileak ez oztopatzeko.

Diruz lagunduko diren jarduerek ardura handiz errespetatu behar dituzte bizitzeko eskubidea eta 1948ko Adierazpen Unibertsalean jasotako giza-eskubide guztiak, bai eta 1966ko Eskubide Zibil eta Politikoei buruzko Nazioarteko Itunean eta 1966ko Ekonomia, Gizarte eta Kulturako Eskubideen Nazioarteko Itunean jasotakoak ere; horrenbestez, terrorismoa goratu edo justifikatzen duten jarduerak baztertu egingo dira.

Horrenbestez, 120.000 euro erabiliko dira xedapen honetan zehazten diren eremuetako batean sartzen den jarduera bat garatzea helburu duten pertsona juridiko, publiko edo pribatuei beren xedea gauzatzen laguntzeko bideak emateko.
 

 

2.750.000 EURO FEDERAZIOEN KIROL-JARDUERAK FINANTZATZEKO

Agindua, zeinen bidez arautzen baita Euskadiko kirol-federazioen 2012ko kirol-programak finantzatzeko diru-laguntzen deialdia.

Gobernu Kontseiluak agindu bat onartu du, Kulturako sailburuaren proposamenez, Euskal kirol federazioek 2012rako antolatutako kirol-programak finantzatzeko diru-laguntzen deialdia arautzen duena. Horretarako aurrekontua 2.750.000 euro da.

Deialdiaren helburu nagusia da kirol-federazioei laguntza ematea beren kirol-programak finantzatzeko. Euskadiko Kirolaren Legearen arabera, kirol-federazioak administrazio-egiteko publikoak eskuordetzan burutzen dituzten entitate pribatuak dira eta, kasu honetan, herri-administrazioaren ordezkari laguntzaile gisa aritzen dira.

Horrenbestez, diru-laguntza hauen bitartez euskal federazioen kirol-programetan sartuta dauden kirol jarduera eta lehiaketen ohiko gastuak finantzatuko dira, bai eta egin ohi dituzten egokiteko publiko administratiboak ere.

Alde horretatik, federazio-programak finantzatzearekin batera honako ekintza hauek aurrera eramango dira:

   - Euskadiko txapelketa ofizialak antolatzea
   - Lehiaketa ofizialetan parte hartzea
   - Federazio-lizentziak ematea eta tramitatzea
   - Federazioaren esparruan kirol arloko diziplina-ahalmena erabiltzea
   - Federazioaren esparruan erregelamenduak egiteko ahala
   - Kirol-teknifikaziorako programak garatzea
   - Goi-mailako kirolerako programak garatzea
   - Jolas-kirolerako programak garatzea

Kirol-programetarako finantzaketa publikorik ezean, federazioek ezinezkoa dute jardunik aurrera eramatea zeren eta federazio gehienek beste diru-iturririk ez baitute beren urteko programak finantzatzeko, diru-laguntzen deialdietatik datozenak baino.
 

 

2.285.000 EURO EUSKADIKO ENPRESETAN EUSKARAREN ERABILERA ETA PRESENTZIA AREAGOTZEKO

Agindua, entitate pribatuek EAEn dituzten lantokietan 2012n euskararen erabilera eta presentzia areagotzeko diru-laguntzak (LANHITZ) ematea arautzen duena.

Gaur egindako bilkuran, Jaurlaritzaren Kontseiluak entitate pribatuek EAEn dituzten lantokietan 2012an euskararen erabilera eta presentzia areagotzeko diru-laguntzak ematea arautzen duen Kulturako sailburuaren Agindua onartu du. Deialdia Lanhitz deitzen da, eta 2.285.000 euroko aurrekontua du.

Laguntza-deialdi honek 2012an burutuko diren egitasmoak hartuko ditu kontuan. Hori dela eta, deialdi honetara jotzen duten egitasmoak gauzatzearen ondorioz sortzen diren jarduerak, zerbitzuak eta produktuak 2012ko abenduaren 31 baino lehen gauzatu eta aurkeztuko dira jendaurrean. Entitate pribatuek EAEn dituzten lantokietan 2012an euskararen erabilera eta presentzia areagotzea helburu duen deialdi honetan parte hartu nahi duten entitateek eskabide-orri bat aurkezteko dute, agindu hau Euskal Herriko Agintaritzaren Aldizkarian argitaratzen den egunaren biharamunetik hilabeteko epean.

Lanhitz deialdirako erabiliko den diru-zuzkidura 2.285.000 eurokoa da, eta irizpide hauen arabera banatuko da:

    1.- 2011n BIKAIN-Euskararen Kalitate Ziurtagiria eskuratu duten entitateak. Gainera, deialdi honetako baldintzak betetzen badituzte, diru-laguntza gehigarri bat jaso ahal izango dute, baldin eta diru-laguntza jasotzeko lortu beharreko gutxieneko puntuak lortzen badituzte.
    2.- Gainerakoa, plana diseinatzeko eta 2012ko kudeaketa-plana garatzeko eskabidea egiten duten entitateen artean banatuko da, Agindu honetan ezarritako puntuen eta mugen arabera.

Beraz, agindu honetako diru-laguntzak erabiliko dira EAEn lantokiak dituzten entitate pribatuen lehen erabilera-planaren diseinurako eta kudeaketa-planerako jarduerak egiteko.

Entitateak lehen euskara-planaren diseinurako laguntza eska dezake, lehendik laguntzarik jaso ez badu, ez diseinurako, ez kudeaketa-planerako. Lehen euskara-planaren diseinua aurkeztuz gero, urteko kudeaketa-plana ere aurkeztu beharko du entitate eskatzaileak. Kudeaketa-plana garatzeko ekintzek 2012ko urtarrilaren 1etik urte bereko abenduaren 31ra bitartean egindakoak izan behar dute.
 

 

KULTURA SAILAK HITZARMEN BAT IZENPETUKO DU HEZKUNTZA, KULTURA ETA KIROL MINISTERIOAREKIN ARABAKO, BIZKAIKO ETA GIPUZKOAKO PROBINTZIETAKO ARTXIBO HISTORIKOAK KUDEATZEKO

Erabakia, Estatuaren titularitatepeko artxiboak kudeatzeari dagokionez, Hezkuntza, Kultura eta Kiroletarako Ministerioarekin hitzarmen bat sinatzeari baimena emateko dena.

Gobernu Kontseiluak Kultura Sailari Hezkuntza, Kultura eta Kirol Ministerioarekin hitzarmen bat izenpetzeko baimena eman dio; hitzarmen hori, Euskal Autonomia Erkidegoko lurraldeetan dauden eta estatuarenak diren artxiboen kudeaketa arautzeko da.

Hitzarmen horrek eragina izango du Arabako Probintziako Artxibo Historikoan, Bizkaiko Probintziako Artxibo Historikoan eta Gipuzkoako Probintziako Artxibo Historikoan; Eusko Jaurlaritzari dagokio horien kudeaketa eta Kultura Sailaren bitartez burutuko du. Hitzarmen horrek ondoko helburua du: EAEn dauden estatuaren titulartasun publikoko artxibo guztiak Euskadiko Artxiboen Sistema Nazionalarekin koordinatzea, horien guztien eta erkidegokoen koordinazio tekniko eta administratiboa lortzeko, baita artxibo-zerbitzu guztien sistematizazio eraginkorra lortzeko ere. Ekimen horrekin, gainera, herritarrei zerbitzu publiko egokia eman eta kultura ikerketa eta hedapena erraztu nahi dute.

Estatuak hiru artxibo horien funtsen gainean dagokion titulartasuna izaten jarraituko du, baita eraikinen eta instalazioen titulartasuna ere. Estatuaren titulartasunekoak ez diren funtsen sarrerak, Autonomia Erkidegoko organoek sortutako dokumentazioa edo Autonomia Erkidegoko titulartasuneko beste dokumentu-funts batzuk izan ezik, gordailuan utziko dira. Autonomia Erkidegoak egokiak jotzen dituen gordailuak egin ditzake, jabea edo hirugarren baten ordezkaria baita.

Gainera, Euskal Autonomia Erkidegoari dagokio lanpostuen zerrenda onestea eta lanpostu horiek betetzea eta artxiboen lan egiten dutenak Euskal Autonomia Erkidegoko Funtzio Publikoko araubide juridikoaren pean egongo dira.