Euskal Herriko Agintaritzaren Aldizkaria

34. zk., 2014ko otsailaren 19a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO BATZAR NAGUSIAK

798

2/2014 FORU ARAUA, urtarrilaren 17koa, Gipuzkoako Lurralde Historikoko Sozietateen gaineko Zergarena.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onartu dutela «2014ko urtarrilaren 17ko 2/2014 Foru Araua, Gipuzkoako Lurralde Historikoko Sozietateen gaineko Zergarena»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2014ko urtarrilaren 17a.

Diputatu nagusia,

MARTIN GARITANO LARRAÑAGA.

HITZAURREA

Hamabost urte baino gehiago bete direnean Sozietateen gaineko Zergari buruzko uztailaren 4ko 7/1996 Foru Araua indarrean jarri zenetik, hura osorik berritzeko prozesuari ekin beharra dago, ordutik oso bilakaera garrantzitsua izan dutelako nazioarteko Zerga Zuzenbideak eta gertaleku ekonomiko eta sozialak berak, bai Gipuzkoako Lurralde Historikoan zein Euskal Autonomia Erkidego osoan, Espainiako Estatuan nahiz Europar Batasunean, eremu zabalagoak ez aipatzeagatik. Gauza asko gertatu dira –besteak beste ekonomiaren globalizazioa edo Europar Batasuneko Zuzenbidearen bilakaera bera eta horrek enpresen zuzeneko fiskalitatean izandako eragina– ezinbestez eskatzen dutenak Zergaren erabateko erreformarako prozesuari ekitea, eta horretarako egin da honako foru-arauaren proposamena.

Krisi ekonomiko sakonak 2006an lortu ziren mailetara jaitsi du diru sarrera publikoen bilketa, eta ez dirudi epe laburrean zergen bidezko sarrerak nabarmen suspertuko direnik. Gainera, gastuen aldetik, ongizate-estatuari eusteko beharrizan gero eta handiagoak sortzen ari dira. Horiek horrela, beharrezkoa da aztertzea gaur egun zer eginkizun betetzen duen zerga bakoitzak eta zenbateraino ari den betetzen bere izaeragatik dagokion eginkizuna; hala, behar izanez gero, neurri egokiak proposatuko dira azterketa horretan agerian jarritako akatsak zuzentzeko.

Enpresa-ehuna eta gure enpresen lehiakortasuna sendotuta Euskal Autonomia Erkidegoan enpresa-jarduera indarberritzeko eta aberastasuna zein lanpostuak sortzeko helburuak lor daitezen, erreforma sakona egin behar zaio 1996tik, ukitu txikiak gorabehera, bere horretan indarrean egon den Sozietateen gaineko Zergari, albora utzi gabe haren erreforma gidatu behar duten printzipioak eta arrazoiak. Enpresen zerga-ordainketaren arloko neurri fiskalik aurreratuenez hornitu behar da lurralde historikoetako zerga-sistema, gaur egungo globalizazio ekonomikoaren eta kapital mugimendu askeen testuinguruan. Aipatutako printzipio horiek are beharrezkoagoak dira, litekeena bada, gaur egungo egoera ekonomiko honetan, krisiak ez baitu epe laburrean alde egiteko itxurarik. Horregatik, Sozietateen gaineko Zergaren erreforman xede eta gidaritzat hartu dira inbertsiorako eta enplegurako neurri erakargarriak, enpresen kapitalizazioa eta ekoizpen jarduerak sustatzekoak eta ikerketa, garapen eta berrikuntza arloari bultzada ematekoak.

Beste alde batetik, Gipuzkoako Lurralde Historikoaren azken urteotako bilakaera ekonomikoak goitik behera aldarazi du haren ikuspegi ekonomikoa bai magnitude makroekonomikoei begira bai lurraldeko enpresa-ehunaren izaerari dagokionez. Hori dela eta, Sozietateen gaineko Zergari buruzko araudian ezarritako zerga-pizgarriak berrikusi eta eguneratu beharra dago errealitate berriari egokitzeko eta ahalik eta eraginkorrenak izan daitezen lortzeko, betiere kontuan izanik hazkunde ekonomiko etengabeko garaiak bizi izan ditugula (1996-2007) eta baita, horiekin batera, ekonomia eta finantza-krisia ere (2008-2013), oraindik ezin iragarri den tamaina izango duena, gure historia ekonomikoan aurrekaririk gabekoa.

Gainera, azkenaldi honetan bai Europako Batzordeak bai, batez ere, Europar Batasuneko Justizia Auzitegiak lagundu egin dute doktrina bat garatzen Europar Batasuneko estatu kideek enpresen zuzeneko zerga-ordainketari buruzko euren arauak garatzeko duten ahalmenaren inguruan, Europar Batasunaren Itunean jasotako oinarrizko askatasunak erabat errespetatuz, eta zerga-politiken koordinazioa sustatzeko zenbait neurri ezarri dituzte, batetik zerga-arloko lehia kaltegarria eta bestetik Europar Batasunaren Itunaren ondorioetarako estatu-laguntzatzat har litezkeen neurrien ezarpena galarazten dituztenak.

Foru-arauaren proposamen honetan Zergari buruz jaso diren arau berriek erabat errespetatzen dituzte doktrina hori eta koordinazio ahalegin horiek. Beraz, arauak egitean arreta berezia jarri zaie kontu hauei: entitate ez-egoiliarrek lortutako zenbait errenta zerga-oinarrian sartzea, azpikapitalizazio-egoeren tratamendua, zergapetze bikoitza ezabatzearen tratamendua, euren egoitza edo aktiboak atzerrira aldatzen dituzten entitateen irteerako zergapetzea edota Transferentzia Prezioei buruzko Europar Batasuneko Baterako Foroaren lanetatik abiatuta sortutako gomendioei jarraitzea elkarri lotutako pertsona edo entitateen arteko eragiketen tratamenduan.

Beste alde batetik, honezkero ezin da zalantzan jarri foru-erakundeek badutela eskumena araubide erkideko lurraldean indarra duen zerga-araubideaz bestelako bat ezartzeko Sozietateen gaineko Zergan, Europar Batasunaren Funtzionamenduari buruzko Itunaren 107. artikuluan xedatutakoarekin bat datorren ikuspegitik; izan ere manu horretan ezarritako estatu-laguntzaren kontzeptutik guztiz baztertuta geratu dira Gipuzkoako Lurralde Historikoaren zerga-neurri orokorrak, lurralde horrek autonomia osoa duelako, Europar Batasuneko Justizia Auzitegiak C-88/03 auzian –Portugalgo Errepublika Europako Erkidegoetako Batzordearen aurka– 2006ko irailaren 6ko epaian xedatutakoaren ildotik. Horrelaxe adierazi dute bai Europar Batasuneko Justizia Auzitegiak berak 2008ko irailaren 11ko epaian (C-428/06 eta C-434/06 bitarteko auzi metatuak) bai barruko auzitegiek, hau da, Euskal Autonomia Erkidegoko Justizia Auzitegi Nagusiak, 2009ko maiatzaren 25eko epaiaren bitartez, baita Auzitegi Gorenak ere, 2012ko martxoaren 30eko, 2012ko apirilaren 3ko eta 2013ko martxoaren 12ko epaien bitartez, zerga-neurri horien kontra jarritako kasazio-errekurtsoak ezestean.

Foru-arauaren proposamen honetan gehiago erraztu dira eta berrantolatu egin dira zerga-oinarria lortzeko kontabilitateko emaitzari egin beharreko zuzenketak ezartzen dituzten manuak. Zuzenketak sistematizatu egin dira, doikuntzak argiago araututa edukitzeko eta araubide orokorrari ahal izan den neurrian erantsi zaizkion zerga-araubide bereziak nabarmen murriztea lortzeko.

Neutraltasunaren ikuspuntutik, zergapetze bikoitza eragozteko tratamendua berrikusi behar izan da eta apustu sendoa egin da salbuespenaren mekanismoaren alde. Gainera, orain arte indarra izan duten zerga-pizgarriak birplanteatu eta eguneratu egin behar izan dira, errealitateari egokitzeko eta ahalik eta eraginkorrenak izan daitezen lortzeko.

Zergapetze bikoitza eragozteko kontuari dagokionez, apustu sendoa egin da salbuespenaren mekanismoaren alde: jarraipen logiko eta zentzuzkoa eman zaio Sozietateen gaineko Zergari buruzko uztailaren 4ko 7/1996 Foru Arauaren 19. artikuluan xedatutakoaren bitartez hasitako ildoari, baina errenta guztietara zabaldu da tratamendu hori, bai dibidenduetara bai partaidetzak eskualdatuz lortutako errentetara, iturria atzerrian egon zein ez, betiere zenbait baldintza betetzen badira, gaur egungo nazioarteko joerei eta nazioarteko erakundeen gomendioei jarraituz eta, horrekin batera, aurrea hartuz Sozietateen gaineko Zergari buruzko araudian egin beharreko doikuntzei, zergapetzerik gabeko egoerarik gerta ez dadin; horrekin bat etorriz, tratamendua aldatu zaie merkataritza-funts finantzarioari edo baloreen eguneratzeari enpresen berrantolatze prozesuetan.

Arauketa berriarekin bat, sustatu egin da nazioarteko zergapetze bikoitzaren kasurik arazotsuenen ezabapena, Espainiarekin nazioarteko zergapetze bikoitza saihesteko eta zerga-itzurpenari aurrea hartzeko zerga-hitzarmenik sinatuta eta indarrean ez duten herrialdeen kasuak, hain zuzen.

Indarrean dauden zerga-pizgarriak birplanteatu eta eguneratzeari dagokionez, batez ere honako jarduketa ildo hauen inguruan egin da Sozietateen gaineko Zergaren erreforma:

1.– Enpresen kapitalizazioa sendotzeko neurriak ezartzea, funts propioen gehikuntzan oinarritutako egituren tratamendua hobetzeari eta zorpetu beharra murrizteari lotutakoak, ekintzailetzaren babesa barne.

Gure enpresek behar duten kapitalizazioa lortuko da neurri positiboak hartzen badira haien funts propioak indartzeko. Horrekin loturik, enpresen kapitalizazioa sustatzeko konpentsazio berri bat jaso izana da berrikuntza nabarmenetariko bat, zerga-oinarria zehazteko zuzenketei dagokienez; orain dela gutxi Europar Batasuneko beste estatu batzuetan ezarritako neurriak hartu dira eredutzat, eta horrela lortu nahi da, alde batetik, enpresei bermatzea erraz eskuratu ahal izango dituztela kapitalizazio egokia eta euren pasiboaren egitura ona, kaudimenez eta segurtasunez lehiatzeko bidea emango diena, eta bestetik, Sozietateen gaineko Zergan norberaren finantzaketaren eta inoren finantzaketaren artean dagoen leizea ixtea, enpresen funts propioak handitzearen erakargarritasuna areagotuz eta, horrenbestez, enpresen azpikapitalizazio egoera kaltegarriak murrizten lagunduz.

Ildo beretik aipatzekoa da kontabilitateko emaitzaren zuzenketa bat jaso dela emaitzaren aplikazioaren arloan, zeinaren bitartez tratamendu berariazkoa ezarri baita enpresek mozkinak nibelatzeko erreserba berezi batean egiten dituzten zuzkiduretarako. Tratamendu horrek enpresei bidea eman behar die berme handiagoekin aurre egiteko ziklo ekonomikoaren gorabeherei eta euren indar finantzarioa handitzeko, kanpoko kredituarekiko mendekotasuna arinduz, egiaztatu baita elementu hori funtsezkoa dela jarduerari eta enpleguari eutsi ahal izateko, azken urteotan bizi dugun egoera ekonomiko gogorrean.

2.– Mikroenpresei arreta ematea, enpresa proiektuen ezarpena eta garapena errazteko, haien zerga-kostu zuzenak eta zeharkakoak jaitsiz, haien mozkinen berrinbertsioa sustatuz, ahalmena eta tamaina handitu ahal izan ditzaten, eta haien zergapetzea sinplifikatuz.

Ikuspegi horretatik nabarmentzekoa da beren beregiko tratamendua ezarri dela mikroenpresentzat, hau da, 10 langile baino gutxiago eta urtean 2 milioi eurotik beherako eragiketen eta aktiboen zenbatekoa duten enpresentzat. Horrelakoentzat, foru-arauaren proposamen honetan jasotako babesak eta erraztasunak benetako inboluzioa dira.

Helburu horretan sakonduz, emaitzaren aplikazioaren arloan kontabilitateko emaitzaren zuzenketa aurkituko dugu, halaber, ekintzailetza sustatzeko eta ekoizpen jarduera indartzeko erreserba berezi baten zuzkidurari dagokionez. Erreserba hori baliatzeko aukeren artean baditugu enpresa proiektuen garapena, hainbat enpresaburuk batera proiektuak abian jartzea eta bussiness angel edo inbertsiogile informal pribatuen figura erakundetuz ekintzailetza babestea.

3.– Patenteen eta ikerketa eta garapen arloko jarduketetatik datozen beste emaitza batzuen zerga-tratamendua indartzea.

Horren haritik, gure ekoizpen-ehunean kezka eragiten duen elementu nagusietariko bat da beste estatu batzuetan dihardutenen aldean lehiakortasun erlatiboa lortu beharra, kontuan izanik gure enpresek gero eta nazioartekotuago dagoen jokaleku globalizatuan lan egin behar dutela.

Horregatik, lehiakortasuna handitzeko gako nagusia ez da eragiketa-kostuen murrizketa, nahiz eta faktore hori ere garrantzitsua izan litekeen, baizik eta aukera izatea merkatuan balio erantsi handiko produktu edo zerbitzuak eskaintzeko, osagai teknologiko edo funtzional bereziren bat dutenak, lehiakideek eskaintzen dituzten produktuen aldean.

Ikerketaren eta garapen eta berrikuntza teknologikoaren arloko jardueren aldeko apustua, beraz, lehen mailako elementua da gogoeta horien artean, eta foruarauaren proposamen honetan sakonago landu da dagoeneko irekitako ildoa: jabetza intelektualaren eta industria jabetzaren eskubideak lagapen bidez ustiatzeko ezarritako tratamendua orokortu egin da, zergadunak berak bere ikerketa eta garapen arloko jardueren emaitza bere ekoizpen prozesuan erabiltzen duen kasuetara hedatuz.

Neurri horren arrakasta ikusirik, eta ikerketa eta berrikuntza arloko jarduera horien emaitzak Gipuzkoako Lurralde Historikoan bertan ustiatu behar direla sinetsita, haren ertzak hobeto marraztu dira eta haren edukiak eguneratu egin dira oraingo beharrizanak kontuan hartuz.

4.– Zenbait gasturen kengarritasuna mugatzea.

Zenbait gasturen kengarritasuna murriztea helburu nagusi duten neurriak ezarri dira, gastu horiek jarduera ekonomikoaren garapenerako beharrezkoak ote diren zalantzan jartzekoa baita.

Ildo horretatik, foru-arauaren proposamen honetan eutsi egin zaie Zerga iruzurraren aurkako neurriei, kredituak kobratzeko elkarren laguntzari eta zergen arloko beste aldaketa batzuei buruzko uztailaren 17ko 5/2013 Foru Arauak 2013ko urtarrilaren 1etik aurrera hasitako zergaldietarako egin dituen aldaketei. Hain zuzen ere foru-arau horretan ezarritako arauek zehaztu egiten dute zeintzuk kasutan joko diren kengarritzat zenbait gastu, sarrerekin korrelazio ez oso argia dutenak; beraz, jarraibideak ezarri behar dira zehaztasunez erabaki ahal izateko zeintzuk diren gastu kengarriak, sarrerekiko korrelazioa dutenak, eta zeintzuk ez.

Batez ere, ordezkaritza gastuak edo hornitzaile eta bezeroentzako opariak noiz diren kengarriak eta noiz ez zehazten dituzten arauei eutsi zaie, gastu horien helburua eta xedea kontrolatu ahal izateko bitartekoak barne; eta hasitako ahaleginean jarraitu da zehatz-mehatz argitzeko noiz jo behar diren ibilgailuak, itsasontziak eta aireontziak zergadunen jarduera ekonomikoei bakarrik atxikitzat eta noiz ez, haiek eskuratu eta erabiltzeko gastuen kengarritasuna zehazte aldera. Jarduera ekonomikoetarako eta helburu pribatuetarako aldi berean erabiltzen diren ibilgailuen % 50 egotzi behar dela dioen araua mantendu da, eta zehaztu egin da, halaber, zeintzuk kasutan ez diren jarduerari atxikitzat joko aipatutako ondare-elementu horiek eta, horrenbestez, ez diren kengarritzat joko haiekin zerikusia duten gastuak.

Horrez gainera, ordea, automobil eta antzekoei dagokienez ere foru-arauaren proposamen honetan eutsi egin zaio zentzuzkotzat jotzen den gehieneko erosketa prezioari (25.000 euro), eta erosketa prezio hori gainditzen ez duten ibilgailuen gastuak bakarrik izango dira kengarriak, edo, gehieneko prezioa gainditzen badute, zenbateko horri dagokion zatia izango da kengarria, bai erosketa gastuetan zein ibilgailuaren erabilerarekin zerikusia duten gainerakoetan. Beraz, prezio handiagoko ibilgailuak erosten dituzten zergadunen kontura izango da horrek eragiten duen gastu gehikuntza.

Azken batean, gai hori dela eta, azpimarratu behar dugu ahalegin handia egin dela agerian uzteko zeintzuk kasutan ezkutatzen den, sozietate baten jabetzaren mozorropean, zergadunen erabilera pribatu soilerako diren horrelako ondare-elementuen titulartasuna. Hala, mekanismoak ezarri dira aktibo horiekin zerikusia duten gastuak kengarriak izan ez daitezen, eta trabak ezarri dira zergadunen ondare pertsonala ez dadin haien jabetzako pertsona juridikoen baitan kokatu zergadunari zerga-zama arintzeko eta errentaren aplikazioa baino ez dena gastu kengarritzat aurkezteko.

Ahalegin hori areagotu egin da Zergaren araubide orokorrari atxikita egon arren tratamendu berezia hartzeko moduko soslai bereizgarria duten ondare-sozietateen tratamendu berriarekin. Tratamendu horretan sartu dira zergadunek errenta pasiboen iturri diren ondasun eta eskubideen edukitza sozietateen baitan koka zezaketen kasuak.

Zenbait gasturen kengarritasuna mugatzearen arlo honetan badago nabarmendu beharreko azken elementu bat: entitateen azpikapitalizazioa saihesten saiatzen den araua berriro egituratu da, hots, haren aplikazioa orokortu egin da Europar Batasunaren Funtzionamenduari buruzko Itunean aitortutako oinarrizko askatasunekin erabat bateragarria izan dadin eta Gipuzkoako Lurralde Historikoko Sozietateen gaineko Zergaren kargapeko zerga-oinarriak higatu ez daitezen elkarri lotutako entitateen mesedetan. Bitarteko hori egokiagoa da, eta neurrikoagoa, entitateen palanka-efektuaren eta haien berezko kapitalizazioaren arteko oreka eragiteko.

Tamaina handia ez duten enpresentzat edo lotutako beste entitate edo pertsona batzuekin zor ordaindua dutenentzat arau horren aplikazioa ez dadin izan kudeaketa-zama astunegia, gutxieneko atalase bat ezarri da, arau hori aplikatzeko aukera mugatzen duena.

5.– Araubide bereziak berrikustea. Zergaren sinplifikazioaren esparruan, araubide bereziak mugatzeko prozesuari ekin zaio. Hala behar izan denean haietariko batzuk araubide orokorrean sartu dira, beharrezko moldaketak eginda, eta haiek aplikatzeko baldintzak birformulatu egin dira; araubide berezi batzuk kendu egin dira, jada ez dituztelako betetzen sorreran ezarri zitzaizkien helburuak edo bilakaera ekonomiko orokorrak aurrea hartu dielako.

Horregatik, araubide orokorrean sartu dira enpresa txiki eta ertainen araubide berezia, ondare-sozietateena, meatzaritzarena, hidrokarburoen ikerketa eta ustiapenarena, nazioarteko zerga-gardentasunarena, finantza-errentamenduko zenbait kontraturena eta salbuespen partziala duten entitateena.

Beste alde batetik, mantendu eta eguneratu egin dira interes ekonomikoko elkarte eta aldi baterako enpresa elkarteen araubide berezia, talde inbertsioko entitateena, zerga-baterakuntzarena eta enpresen berrantolaketarena.

Arreta berezia merezi du higiezinen errentamenduko jarduera kualifikatua duten entitateen araubide berezi berriak, jarraipena ematen dielako etxebizitzen errentamenduan diharduten entitateen lehengo araubide bereziak gure herrian alokairuaren merkatua indarberritzeko egindako ahaleginei. Izan ere merkatu hori oraindik ere txikiegia da gure ingurune hurbileneko herrialde aurreratuagoen aldean. Horrez gain, itsas garraioko enpresentzako araubide berezi berri bat txertatu da.

Kendu egin dira, azkenik, lurraldeko industria garapenerako sozietateen araubide berezia, enpresak sustatzeko sozietateena (horiek kentzea aurreikusi zuen 2012ko abenduaren 27ko 13/2012 Foru Arauak, zerga-alorreko zenbait aldaketa onartzen dituenak), Higiezinen Merkatuan Inbertitzeko Sozietate Anonimo Kotizatuena eta atzerriko baloreak edukitzeko entitateena, kasu horietan guztietan egokitzat jo delako araubide berezia kentzea, bai zergaren sinplifikazioan sakontzeko baita haren egitura egungo beharrizanei egokitzeko ere.

Azpimarratu behar dira, aurrekoari dagokionez, zuzenbide iragankorrean atzerriko baloreak edukitzeko entitateentzat aurreikusten diren arauak, baita foru-arauaren proposamen honetako xedapen gehigarrietan aurreikusita dauden berariazko tratamendu batzuk ere, araubide erkideko lurraldeko arauen pean dauden Higiezinen Merkatuan Inbertitzeko Sozietate Anonimo Kotizatuetako bazkide gipuzkoarrentzat edo zenbait balore edukitzeko entitateentzat ezarritakoak, hain zuzen ere. Tratamendu horiek kanpoko inbertsioa eta gure enpresen nazioartekotzea garatzearen ordezko aukera eskaini nahi dute, baina araubidea haztatuz kasu horietan zerga-bilketak izan behar dituen berezitasunekin.

Enpresak sustatzeko sozietateei dagokionez, 2012ko abenduaren 27ko 13/2012 Foru Arauak –zerga-alorreko zenbait aldaketa onartzen dituenak– araubide hori kentzeko agintzen duena mantentzen da, bai eta zuzenbide iragankorrerako dituen arauak ere.

6.– Kenkariak berrikustea. Zenbait kenkariri eustea erabaki da, eraginkortasun handiko pizgarriak direlako, garrantzi handia dutelako ekoizpen-ehunaren iraupenerako eta lagundu egiten dutelako jarduera ekonomikoa indarberritzeko eta enplegua sortzeko helburuak lortzen. Kendu egin dira aplikazio praktiko urria edo pizgarri moduan eraginkortasun mugatua zuten kenkariak.

Oraingo egoeran zerga-neurrien bidezko bultzada publikoa merezi izateko modukotzat jotzen diren enpresa-portaeren bizkarrezurra osatzen duten lau kenkariak mantendu dira, alegia, aktibo ez-korronte berriak erostearen ziozko kenkariak, ikerketa, garapen eta berrikuntza teknologikoko gastuei dagozkienak, garapen iraunkorrarekin eta ingurumenaren kontserbazio eta hobekuntzarekin zerikusia dutenak eta enplegu egonkorraren sorkuntzarekin zerikusia dutenak. Horixe da botere publikoek egungo egoera gainditzeko ezarri duten lehentasunetariko bat.

Kenkari horietan guztietan teknika aldetik hobetu egin dira lehengo araudian zeuden kontzeptuak eta erregela berriak ezarri dira, zergen bidezko pizgarriak ematen egindako ahaleginen eraginkortasunik onena eta emaitzarik oparoenak ahalbidetuko dituztenak.

Gainerako kenkariak kendu egin dira, ez zirelako pizgarri eraginkorrak edo arazoak sor zitzaketelako ukitutako zergadunen arteko ekitate horizontalaren ikuspegitik.

Azkenik, foru-arauaren proposamenak euren zerga-tratamendu berariazkoa mantendu die merkataritza-funts finantzarioari, merkataritza-funts esplizituari (erosketa bidezkoa edo enpresak berregituratzeko eragiketen ondoriozkoa) eta bizitza baliagarri mugagabea duten beste aktibo ukiezin batzuei, baina horrelako aktiboen zerga-tratamenduaren intentsitatea aldatu du, bost urtetik zortzira luzatuz hura aplikatu ahal izateko gutxieneko epealdia eta, horrenbestez, zerga-pizgarriaren eta zerga-administrazioak egungo egoerari aurre egiteko beharrezkoa duen zerga-bilketaren arteko oreka berria lortuz. Horrek bidea ematen digu Sozietateen gaineko Zergari buruzko foru-araudiaren ezaugarri garrantzitsuenetako batzuei eusteko.

Zerga-karga modulatzearen aldeko joeraren ildotik jarraituta, arau berria ezarri da: kuota efektiboa ezin da izan ezarritako kopurua baino gutxiago, hau da, ekitaldiko kenkariak aplikatuta zergadunak jasaten duen zerga-zama ezin da murriztu kopuru jakin batetik behera. Muga hau ez zaie aplikatuko ikerketa eta garapeneko jarduerei, ez eta berrikuntza teknologikoko jarduerei ere, estrategikoak baitira ekonomia indarberritzeko eta gizartea aurreratzeko.

Foru-arauaren proposamen honek 134 artikulu ditu, 10 titulutan banatuta, eta jarraian 19 xedapen gehigarri, 19 xedapen iragankor, xedapen indargabetzaile bat eta azken bi xedapen. Hona hemen aurkibidea:

I. TITULUA: ZERGAREN IZAERA ETA APLIKAZIO-EREMUA.

1. artikulua.– Izaera.

2. artikulua.– Aplikazio-eremu subjektiboa.

3. artikulua.– Zergaren ordainarazpena.

4. artikulua.– Zerga-egoitza.

5. artikulua.– Eragiketa bolumena.

6. artikulua.– Eragiketak egiten diren tokia.

7. artikulua.– Tratatuak eta hitzarmenak.

II. TITULUA: ZERGA-EGITATEA.

8. artikulua.– Zerga-egitatea.

9. artikulua.– Errenten zenbatespena.

10. artikulua.– Errentak esleitzea.

III. TITULUA: ZERGADUNA.

11. artikulua.– Zergadunak.

12. artikulua.– Salbuespenak.

13. artikulua.– Mikroenpresa, enpresa txikia eta enpresa ertaina: zer diren.

14. artikulua.– Ondare-sozietateen kontzeptua.

IV. TITULUA: ZERGA-OINARRIA.

I. KAPITULUA: Arau orokorrak.

15. artikulua.– Zerga-oinarriaren kontzeptua eta zerga-oinarria zehaztea.

II. KAPITULUA: Zuzenketak gastuen atalean.

16. artikulua.– Amortizazioak: arau orokorrak.

17. artikulua.– Amortizazioak: ibilgetu materiala eta higiezinetako inbertsioak.

18. artikulua.– Amortizazioak: finantza-errentamenduko kontratuak.

19. artikulua.– Amortizazioak: ondasunen erabilera lagatzen den beste kasu batzuk.

20. artikulua.– Amortizazioak: ibilgetu ukiezina.

21. artikulua.– Amortizatzeko askatasuna, amortizazio azeleratua eta baterako amortizazioa.

22. artikulua.– Ondare-elementuen balio-narriaduraren ondoriozko galera: kaudimengabezia.

23. artikulua.– Ondare-elementuen balio-narriaduraren ondoriozko galera: balio-galera.

24. artikulua.– Finantza-merkataritzako funtsaren zerga-tratamendua.

25. artikulua.– Bizitza baliagarri mugagabea duten zenbait ukiezinen zerga-tratamendua.

26. artikulua.– Hornidurak.

27. artikulua.– Gizarte aurreikuspeneko sistemetara egindako ekarpenak.

28. artikulua.– Agortze-faktorea meatzaritzako jardueretan.

29. artikulua.– Agortze-faktorea hidrokarburo guneak arakatu, ikertu eta ustiatzeko jardueretan.

30. artikulua.– Aurrezki kutxen ongintza eta gizarte ekintza.

31. artikulua.– Gastu kenezinak.

32. artikulua.– Gastuei buruzko arau bereziak.

III. KAPITULUA: Zuzenketak sarreren atalean.

33. artikulua.– Dibidenduen eta mozkin-partaidetzen gaineko zergapetze bikoitza ezabatzea.

34. artikulua.– Entitateetako partaidetza eskualdatuz lortutako errenten zergapetze bikoitza kentzea.

35. artikulua.– Establezimendu iraunkorrek lortutako errentak.

36. artikulua.– Aparteko mozkinak berrinbertitzea.

37. artikulua.– Jabetza intelektuala edo industriala ustiatzeagatiko murrizketa.

38. artikulua.– Salbuespen partziala duten entitateak.

39. artikulua.– Sarreren arloko beste zuzenketa batzuk.

IV. KAPITULUA: Balorazio arauen arloko zuzenketak eta abusuaren aurkako neurriak.

40. artikulua.– Balorazio-arauak: arau nagusia eta arau bereziak kostu gabeko eskualdaketetan eta sozietate eragiketetan.

41. artikulua.– Egoitza aldaketak eta establezimendu iraunkorrak uztea.

42. artikulua.– Lotutako pertsona edo entitateen arteko eragiketen tratamendua: arau orokorrak.

43. artikulua.– Lotutako pertsona edo entitateen arteko eragiketen tratamendua: dokumentazioaren inguruko betebeharrak.

44. artikulua.– Lotutako pertsona edo entitateen arteko eragiketen tratamendua: talde barruko zerbitzu prestazioak eta kostuak banatzeko akordioak.

45. artikulua.– Lotutako pertsona edo entitateen arteko eragiketen tratamendua: interpretazio irizpideak eta prozedura arauak.

46. artikulua.– Lotutako pertsona edo entitateen arteko eragiketen tratamendua: zehapen araubidea.

47. artikulua.– Azpikapitalizazioa.

48. artikulua.– Entitate ez-egoiliarrek lortutako zenbait errenta positiboren zerga-oinarriaren barruan sartzea.

49. artikulua.– Egoitza zerga-paradisuetan duten pertsona eta entitateekin egindako eragiketak edo pertsona eta entitate horiek egindakoak.

50. artikulua.– Kontabilitateko balioaren ordez merkatuko ohiko balioa jartzearen ondoreak.

V. KAPITULUA: Emaitzaren aplikazioari dagozkion zuzenketak.

51. artikulua.– Enpresen kapitalizazioa sustatzeko konpentsazioa.

52. artikulua.– Mozkinak nibelatzeko erreserba berezia.

53. artikulua.– Ekintzailetza sustatzeko eta ekoizpen jarduera sendotzeko erreserba berezia.

VI. KAPITULUA: Aldi-egozketa eta kontabilitateko inskripzioak: baterako arauak.

54. artikulua.– Aldi-egozketa. Sarrera eta gastuak kontabilitatean inskribatzea.

VII. KAPITULUA: Zerga-oinarri negatiboen konpentsazioa.

55. artikulua.– Zerga-oinarri negatiboen konpentsazioa.

V. TITULUA: ZERGA-ZORRA.

I. KAPITULUA: Karga-tasa, kuota osoa, kuota efektiboa eta gutxienez ordaindu beharrekoa.

56. artikulua.– Karga-tasa.

57. artikulua.– Kuota osoa.

58. artikulua.– Kuota likidoa.

59. artikulua.– Kuota efektiboa eta gutxienez ordaindu beharrekoa.

II. KAPITULUA: Zergapetze bikoitza saihesteko kenkaria.

60. artikulua.– Zergapetze bikoitza saihesteko kenkaria.

III. KAPITULUA: Beste kenkari batzuk.

61. artikulua.– Aktibo finko berrietako inbertsioen ziozko kenkaria.

62. artikulua.– Ikerketa eta garapen jardueren ziozko kenkaria.

63. artikulua.– Berrikuntza teknologikorako jarduerengatiko kenkaria.

64. artikulua.– Ikerketa eta garapenaren eta berrikuntza teknologikoaren kontzeptutik kanpo gelditzen direnak, eta kenkariak interpretatzeko eta aplikatzeko arauak.

65. artikulua.– Garapen iraunkorra, ingurumenaren zaintza eta hobekuntza zein energia iturrien aprobetxamendu eraginkorragoa lortzera zuzentzen diren proiektuekin loturiko inbertsio eta gastuengatiko kenkaria.

66. artikulua.– Enplegua sortzeagatiko kenkaria.

67. artikulua.– Kapitulu honetan ezarritako kenkariei buruzko arau orokorrak.

IV. KAPITULUA: Konturako ordainketengatiko kenkaria.

68. artikulua.– Atxikipen eta konturako sarrerengatiko kenkaria.

VI. TITULUA: ZERGA ARAUBIDE BEREZIAK

I. KAPITULUA: Definizioa.

69. artikulua.– Definizioa.

II. KAPITULUA: Itsas Garraioko Enpresen araubidea.

70. artikulua.– Aplikazio eremu subjektiboa eta objektiboa eta zerga-oinarriaren kalkulua.

71. artikulua.– Araubide bereziari atxikitako ontziak.

72. artikulua.– Komunikazioa.

III. KAPITULUA: Interes Ekonomikoko Taldeak, Espainiakoak zein Europakoak, eta aldi baterako enpresa elkarteak.

73. artikulua.– Interes ekonomikoko espainiar elkarteak.

74. artikulua.– Interes ekonomikoko europar elkarteak.

75. artikulua.– Enpresen aldi baterako batasunak.

76. artikulua.– Bazkideen edo enpresa kideen egozketarako eta identifikaziorako irizpideak.

IV. KAPITULUA: Arrisku Kapitaleko Sozietateak eta Funtsak.

77. artikulua.– Kapital-arriskuko sozietate eta funtsak.

V. KAPITULUA: Talde Inbertsioko Entitateak.

78. artikulua.– Talde inbertsioko entitateen zerga-ordainketa.

79. artikulua.– Talde-inbertsioetarako entitateetako kideen edo partaideen zerga-ordainketa.

80. artikulua.– Talde inbertsioko entitateen akzio edo partaidetzetatik eratorritako errenta kontabilizatuak.

81. artikulua.– Zerga-paradisutzat jotzen diren herrialde edo lurraldeetan eratutako talde inbertsioko entitateetako bazkide eta partaideen zergapetzea.

VI. KAPITULUA: Zerga-Baterakuntzaren Araubidea.

82. artikulua.– Definizioa.

83. artikulua.– Zergaduna.

84. artikulua.– Zerga-baterakuntzako araubidearen ezarpenagatik eratorritako zerga-ordainketarako erantzukizunak.

85. artikulua.– Zerga-taldearen definizioa. Sozietate nagusia. Menpeko sozietateak.

86. artikulua.– Zerga-taldean sozietateak sartzea edo kentzea.

87. artikulua.– Zeharkako nagusitasunaren zehaztapena.

88. artikulua.– Zerga-baterakuntzako araubidearen ezarpena.

89. artikulua.– Zerga-taldeen zerga-oinarriaren zehaztapena.

90. artikulua.– Ezabaketak.

91. artikulua.– Eransketak.

92. artikulua.– Zerga-oinarri negatiboen konpentsazioa.

93. artikulua.– Aparteko mozkinen berrinbertsioa.

94. artikulua.– Zergaldia.

95. artikulua.– Zerga-taldearen kuota osoa.

96. artikulua.– Zerga-taldearen kuota osoan aplika daitezkeen kenkariak.

97. artikulua.– Informazioa eman beharra.

98. artikulua.– Zerga-baterakuntzaren araubidea galtzea.

99. artikulua.– Zerga-baterakuntzako araubidearen galeraren eta zerga-taldearen iraungipenaren ondoreak.

100. artikulua.– Zerga-taldearen aitorpena eta autolikidazioa.

VII. KAPITULUA: Ondokoen araubide berezia: bat-egiteak, zatiketak, aktibo ekarpenak, balore trukeak, aktiboaren eta pasiboaren lagapen osoak, eta Europako Sozietate edo Sozietate Kooperatibo baten egoitza Europar Batasuneko Estatu Kide batetik beste batera aldatzea.

101. artikulua.– Definizioak.

102. artikulua.– Eskualdaketak eratorritako errenten araubidea.

103. artikulua.– Eskuratutako ondasunen zerga-balorazioa.

104. artikulua.– Ekarpenaren kontraprestazio gisa jasotako akzio edo partaidetzen zerga-balorazioa.

105. artikulua.– Balore-trukearen zerga araubidea.

106. artikulua.– Bazkideen zerga-ordainketa bategite-, irespen- eta erabateko zein zatikako banaketa-eragiketetan.

107. artikulua.– Entitate eskualdatzailearen eta entitate eskuratzailearen kapitaleko partaidetzak.

108. artikulua.– Zergen arloko eskubideetan eta betebeharretan subrogatzea eta errentak egoztea.

109. artikulua.– Establezimendu iraunkorren galerak.

110. artikulua.– Kontabilitateko betebeharrak.

111. artikulua.– Diruzkoak ez diren ekarpenak.

112. artikulua.– Aktiboaren eta pasiboaren lagapen orokorra.

113. artikulua.– Zergapetze bikoitza saihesteko arauak.

114. artikulua.– Zerga-araubidea ezartzea.

VIII. KAPITULUA: Higiezinen errentamenduaren kualifikazioa daukan jarduera egiten duten entitateak.

115. artikulua.– Aplikazio-eremua.

116. artikulua.– Zerga-araubidea.

VII. TITULUA: ZERGALDIA ETA ZERGAREN SORTZAPENA.

117. artikulua.– Zergaldia.

118. artikulua.– Zergaren sortzapena.

VIII. TITULUA: ZERGAREN KUDEAKETA.

I. KAPITULUA: Entitateen indizea.

119. artikulua.– Entitateen indizea.

120. artikulua.– Entitateei behin-behineko baja ematea indizean.

121. artikulua.– Lagundu beharra.

II. KAPITULUA: Kontabilitateko betebeharrak. Kontabilizatu gabeko ondasunak eta eskubideak. Borondatezko birbalorazioak.

122. artikulua.– Kontabilitateko betebeharrak. Administrazioaren ahalmenak.

123. artikulua.– Kontabilizatu gabeko edo aitortu gabeko ondasunak eta eskubideak: errentak lortzen direlako ustezkotasuna.

124. artikulua.– Zergaren kudeaketa administrazio bati baino gehiagori ordainduz gero.

125. artikulua.– Kontabilitateko borondatezko birbalorazioak.

III. KAPITULUA: Aitorpena, autolikidazioa eta behin-behineko likidazioa.

126. artikulua.– Aitorpenak.

127. artikulua.– Autolikidazioa eta zerga-zorraren sarrera.

128. artikulua.– Behin-behineko likidazioa.

IV. KAPITULUA: Ofiziozko itzulketa.

129. artikulua.– Ofiziozko itzulketa.

V. KAPITULUA: Konturako ordainketak.

130. artikulua.– Konturako ordainketak.

VI. KAPITULUA: Egiaztatzeko ahalmenak.

131. artikulua.– Administrazioaren ahalmena zerga-oinarria zehazteko.

132. artikulua.– Zergaren ikuskapena.

IX. TITULUA: ZEHAPEN-ARAUBIDEA.

133. artikulua.– Arau-hausteak eta zigorrak.

X. TITULUA: JURISDIKZIO ORDENA.

134. artikulua.– Jurisdikzio eskuduna.

XEDAPEN GEHIGARRIAK

Lehenengoa.– Arau aipamenak.

Bigarrena.– Zergapetze bikoitza ezabatzea: mugak.

Hirugarrena.– Finantza-aktiboei eta beste balore higikor batzuei dagozkien atxikipen, eskualdaketa eta betebehar formalei buruzko arauak.

Laugarrena.– Kanarietako ekonomia eta zerga araubidea.

Bosgarrena.– Ondare-sozietateetako bazkideen tratamendua.

Seigarrena.– Lege mailako xedapenak eta lehia babesteari buruzko arauak betetzeko egiten diren aktibo-eskualdaketen zerga-araubidea.

Zazpigarrena.– Kreditu-entitateak berregituratzeko eragiketa batzuk.

Zortzigarrena.– Babes sistema instituzional bateko kreditu-entitateek eratutako taldeen eta aurrezki-kutxen finantza-jarduna zeharka egitearen ondoriozko taldeen zerga-baterakuntzako araubidea.

Bederatzigarrena.– Sozietateen gaineko Zergaren karga-tasa orokorra aplikatzen ez zaien kapital aldakorreko inbertsio-sozietateek egindako kapital-txikipenak (ekarpenak itzulita) eta jaulkipen-primen banaketak.

Hamargarrena.– Higiezinen errentamendua ustiapen ekonomikotzat hartzea.

Hamaikagarrena.– Enpresa emakidadunek azpiegiturak eraikitzeko edo eskuratzeko egindako inbertsioak.

Hamabigarrena.– Zergadunei aplikatu beharreko kontabilitate-planaren aldaketa.

Hamahirugarrena.– Higiezinen merkatuko inbertsioetako sozietate anonimo kotizatuetako bazkideen zerga-tratamendua.

Hamalaugarrena.– Balore jakin batzuk dauzkaten entitateak.

Hamabosgarrena.– Kultura sustatzeko pizgarriak.

Hamaseigarrena.– Kooperatiben Zerga Araubideari buruzko maiatzaren 22ko 2/1997 Foru Arauaren aldarazpena.

Hamazazpigarrena.– Hiri Lurren Balioaren Gehikuntzaren gaineko Zergaren araubidea eragiketa jakin batzuetan.

Hemezortzigarrena.– Esne-kuota saltzearen ondorioz lortutako errentak.

XEDAPEN IRAGANKORRAK

Lehenengoa.– Kontabilitatez kanpoko doikuntzak.

Bigarrena.– Aparteko mozkinen berrinbertsioa.

Hirugarrena. –Foru-arau hau indarrean jarri aurretik eskuratutako baloreen finantza-merkataritzako funtsa.

Laugarrena.– Foru-arau hau indarrean jarri aurretik eskuratutako edo agerian jarritako ukiezinak.

Bosgarrena.– Foru-arau hau indarrean jarri aurreko zerga-oinarri negatiboak.

Seigarrena.– Aplikatzeko dauden kenkariak.

Zazpigarrena.– Finantza-eragiketen gaineko mozkinen araubide iragankorra.

Zortzigarrena.– Zerga-paradisutzat jotzen diren herrialdeetan eta lurraldeetan eratutako talde inbertsioko entitateen mozkinak.

Bederatzigarrena.– Partaidetza-kontuetako dibidenduen zergapetze bikoitza ezabatzea.

Hamargarrena.– Enpresen kapitalizazioa sustatzeko konpentsazioa.

Hamaikagarrena.– Aparteko mozkinen berrinbertsioa zerga-taldeetan.

Hamabigarrena.– Enpresak sustatzeko sozietateak.

Hamahirugarrena.– Atzerriko baloreak dauzkaten entitateak.

Hamalaugarrena.– Ustezko errenten egozketa.

Hamabosgarrena.– Eguneratzen diren ondasunen gaineko zerga-ondoreak.

Hamaseigarrena.– Mikroenpresen baterako amortizazioa.

Hamazazpigarrena.– Aitorpen bateratuaren araubidea.

Hemezortzigarrena.– 2009 eta 2010ean eskuratutako ibilgetuko elementu berrientzako amortizazio-askatasuna.

Hemeretzigarrena.– Ibilgailu jakin batzuen eskualdaketa.

XEDAPEN INDARGABETZAILEA

Araudiaren indargabeketa.

AZKEN XEDAPENAK

Lehenengoa.– Indarrean jartzea.

Bigarrena.– Gaikuntzak.

I. TITULUA

ZERGAREN IZAERA ETA APLIKAZIO-EREMUA

1. artikulua.– Izaera.

Sozietateen gaineko Zerga zuzeneko tributu bat da, izaera pertsonala duena eta sozietateen eta bestelako entitate juridikoen errenta kargatzen duena, foru-arau honetan xedatutako eran.

2. artikulua.– Aplikazio-eremu subjektiboa.

1.– Foru-arau honetan xedatutakoa zerga-egoitza Gipuzkoan duten zergadunei aplikatuko zaie.

Hala ere, aurreko lerroaldean xedatutakoa ez zaie aplikatuko inguruabar hauetan dauden zergadunei:

– Haien aurreko ekitaldiko eragiketa bolumena 7 milioi eurotik gorakoa izan bada.

– Aurreko ekitaldi horretako eragiketa bolumenaren % 75 edo gehiago lurralde erkidean egin badute, edo, bestela, Euskal Autonomia Erkidegoan egindako eragiketa guztiak beste bi lurralde historikoetako batean edo bietan egin badituzte.

2.– Zerga-egoitza Araban edo Bizkaian duten zergadunei ere foru-arau honetan xedatutakoa aplikatuko zaie, honako hauek gertatuz gero:

– Aurreko ekitaldiko eragiketen bolumena 7 milioi eurotik gorakoa izan bada.

– Aurreko ekitaldiko eragiketa bolumenaren % 75 edo gehiago ez badute lurralde erkidean egin.

– Ekitaldi horretan Euskal Autonomia Erkidegoan egindako eragiketa guztiak Gipuzkoan egin badituzte, edo, eragiketok Gipuzkoan eta zerga-egoitza ez duten beste lurralde historikoan egin dituztela ere, eragiketa bolumenaren proportzio handiena Gipuzkoan egin badute.

3.– Zerga-egoitza lurralde erkidean duten zergadunei ere foru-arau honetan xedatutakoa aplikatuko zaie, honako hiru baldintza hauek betetzen dituztenean:

– Haien aurreko ekitaldiko eragiketa bolumena 7 milioi eurotik gorakoa izan bada.

– Eragiketa guztiak EAEn egin badituzte.

– Gipuzkoan beste lurralde historiko bakoitzean baino eragiketa bolumenaren proportzio handiagoa egin badute.

4.– Foru-arau honetan ezarritakoa aplikatuko zaie interes ekonomikodun elkartzeei eta aldi baterako enpresa-elkarteei, kide guztiak edozein lurralde historikoren foru-araudiaren mende baldin badaude eta elkarte horiek zerga-egoitza Gipuzkoan badute; egoitza lurralde erkidean dagoenean, Gipuzkoan beste edozein lurralde historikotan baino eragiketa bolumenaren proportzio handiagoa egin behar dute.

Aurreko paragrafoan aipatutako interes ekonomikoko elkarteek edo aldi baterako enpresa elkarteek zerga-egoitza Araban edo Bizkaian badute baina lurralde historiko horretan ez badute euren eragiketa bolumena kalkulatzeko zenbatu behar den eragiketarik egiten, ordea, foru-arau honetan xedatutakoa aplikatu beharko dute baldin eta Gipuzkoan eragiketa bolumen handiagoa badute beste lurralde historiko horretan baino.

Entitate horiek lurralde bakoitzean egindako eragiketa kopuruan dagokien zatia egotziko diete beren bazkideei, eta hori da, hain zuzen ere, eragiketen proportzioa zehazteko aintzat hartuko dutena.

5.– Foru-arau honetan ezarritako zerga-taldeen tributazio-araubidea aplikatu ahal izateko bi baldintza hauek bete behar dira: batetik, entitate nagusia, aurreko lehen hiru zenbakietan xedatutakoarekin bat etorriz, foru-arau honen mende egon behar da; bestetik, mendeko sozietate guztiei aplikatu behar zaie Pertsona Fisikoen Errentaren gaineko Zergari buruzko lurralde historikoetako baten arautegia.

Ondorio hauetarako, lurralde erkideko araubidearen mendedauden sozietateak zerga-taldetik kanpo daude.

3. artikulua.– Zergaren ordainarazpena.

1.– Zergaren ordainarazpena Gipuzkoako Foru Aldundiari dagokio:

a) Ordainarazpena Aldundiari bakarrik dagokio zergadunak zerga-egoitza Gipuzkoako Lurralde Historikoan badu eta, horretaz gain, aurreko ekitaldiko eragiketa bolumena 7 milioi eurotik gorakoa izan ez bada.

b) Ekitaldian zehar Gipuzkoan egindako eragiketa bolumenaren proportzioan, aurreko ekitaldiko eragiketa bolumena 6 milioi eurotik gorakoa izan bada.

2.– Zerga-taldeek Gipuzkoako Foru Aldundiari tributatuko diote, lurralde horretan egindako eragiketa bolumenaren arabera..

Ondore horietarako, Gipuzkoan egindako eragiketa bolumena zerga-taldeko sozietate bakoitzak lurralde horretan egiten duen eragiketen batura izango da, taldea desegin aurretik bertan egin dituen eragiketa guztien batura izango da, talde barruan egin beharreko ezabatzeak egin ondoren.

4. artikulua.– Zerga-egoitza.

1.– Zergadunen zerga-egoitza beren egoitza soziala izango da, baldin eta bertan zentralizatuta badituzte administrazio-kudeaketa eta negozioen zuzendaritza. Osterantzean, zerga-egoitza kudeaketa edo zuzendaritza hori egiten den lekua izango da.

Aurreko irizpideak jarraituz ezinezkoa bada zehaztea zerga-egoitza non dagoen, ulertuko da entitateek Gipuzkoan dutela zerga-egoitza, baldin eta, ibilgetuaren baliorik handiena Euskal Autonomia Erkidegoan egonik, Gipuzkoako Lurralde Historikoan duten ibilgetuaren balioa handiagoa bada beste bi lurralde historikoetariko edozeinetan duten ibilgetuarena baino.

2.– Kontrakoaren frogarik ezean, ulertuko da ez dela izan pertsona juridikoen zerga-egoitzaren aldaketarik, aldaketa horren aurreko urtean edo hurrengoan ez aktibo bihurtu edo jarduerari utziz gero.

5. artikulua.– Eragiketa bolumena.

1.– Eragiketa bolumentzat, berriz, honako hau joko da: zergadunak, bere jardueran egindako ondasun-emateak eta zerbitzuak direla-eta, ekitaldi batean hartutako kontraprestazioen zenbateko osoa, Balio Erantsiaren gaineko Zerga eta baliokidetasun-errekargua kenduta, halakorik badago.

2.– Ekitaldian lurralde bakoitzean egindako eragiketa bolumenaren proportzioa kalkulatzeko hurrengo artikuluko erregelak erabiliko dira, eta proportzioa ehunekotan emango da, bi hamartarrekin biribilduta.

Aurreko ekitaldia urtebete baino laburragoa bada, ekitaldian egindako eragiketetatik abiatuta urte osoari zer bolumen legokiokeen kalkulatuko da.

3.– Jarduera ekitaldi horretan hasi denean, lehenengo ekitaldian egindako eragiketa bolumenari begiratuko zaio; lehenengo ekitaldi hori urtebete baino laburragoa izan bada, berriz, ekitaldian egindako eragiketetatik abiatuta urte osoari zer bolumen legokiokeen kalkulatuko da.

Harik eta ekitaldi horretako eragiketak zenbat izan diren eta non egin diren jakin arte, ekitaldiko eragiketatzat hartuko dira, ondorio guztietarako, zergadunak aurrez kalkulatzen dituenak, jardueraren hasierako ekitaldian ustez egingo dituen eragiketen arabera.

4.– Artikulu honen eta hurrengoaren ondorioetarako, ondasun- edo zerbitzu-ematetzat joko dira, hain zuzen ere, Balio Erantsiaren gaineko Zerga arautzen duen legerian halakotzat definituta dauden eragiketak.

5.– Balio Erantsiaren gaineko Zerga arautzen duen legedian halakotzat hartzen diren ondasun- eta zerbitzu-ematerik egiten ez duten entitateek Gipuzkoako Foru Aldundiari tributatuko diote, lurralde horretan baldin badute zerga-egoitza.

6. artikulua.– Eragiketak egiten diren tokia.

1.– Zergadun batek Gipuzkoan diharduela ulertuko da baldin eta honako irizpide hauen arabera Gipuzkoan egiten baditu ondasun- edo zerbitzu-emateak:

I.– Ondasun-emateak.

A) Ondasun higigarri gorpuzkorren emateak, ondasun horiek Gipuzkoako Lurralde Historikotik jartzen direnean eskuratzailearen eskueran.

Ondasunak eskuratzailearen eskueran jartzeko beharrezkoa bada ondasunok garraiatzea, bidalketa edo garraioa hasterakoan ondasunak Gipuzkoan badaude. Erregela horrek honako salbuespenok ditu:

a) Ematea egiten duenak transformaturiko ondasunak badira, Gipuzkoan egin bada emandako ondasunen azken transformazio-prozesua.

b) Emateetan industria-elementuak instalatu behar badira Gipuzkoatik kanpo, prestaketa- eta fabrikazio-lanak lurralde horretan egin badira eta instalazio edo muntaketaren kostua kontraprestazioaren % 15etik gorakoa ez bada.

Horrekin loturik, emateetan industria-elementuak instalatu behar badira Gipuzkoan, emate horiek ez dira Gipuzkoan egindakotzat joko elementuok prestaketa- eta fabrikazio-lanak lurralde horretatik kanpo egin badira eta instalazio edo muntaketaren kostua kontraprestazioaren % 15etik gorakoa ez bada.

B) Argindarraren ekoizleek egindako emateak, haien sorkuntza-zentroak Gipuzkoako Lurralde Historikoan badaude.

C) Ondasun higiezinen emateak, emandako ondasunak Gipuzkoan badaude.

II.– Zerbitzu-emateak.

A) Zerbitzu-emateak, zerbitzuok Gipuzkoatik ematen badira.

B) Aurreko letran xedatutakotik salbuetsita daude ondasun higiezinekin zerikusi zuzena duten zerbitzu-emateak, ondasunak Gipuzkoan kokaturik badaude Gipuzkoan egintzat joko baitira.

C) Halaber, aurreko letretan salbuetsita daude aseguru eta kapitalizazioko eragiketak; eragiketa horiei Aseguru Sarien gaineko Zergari buruz 1997ko urriaren 21eko 70/1997 Foru Dekretu Arauemaileko 4. artikuluan jasotzen diren erregelak aplikatuko zaizkie –70/1997 Foru Dekretu Arauemailearen bidez Gipuzkoako Lurralde Historikoko zerga-araudia, aseguru-primen gaineko zergari dagokionez, 1996ko abenduaren 30eko 13/1996 Legeari egokitzen zaio, zeina zerga, administrazio eta gizarte-alorreko neurriei buruzkoa den–.

III.– Aurreko I. eta II. zenbakietan xedatutakoa gorabehera, jarraian zehaztuko diren eragiketak Gipuzkoan egintzat joko dira, haien zergadunak zerga-egoitza Gipuzkoako Lurralde Historikoan duenean:

A) Nekazaritza, basogintza, abeltzaintza edo arrantzako ustiategiek eta arrainontzi-jabeek beren laborantza-lan, ustiapen edo harrapaketetatik zuzenean etorri eta transformazio-prozesurik jasan gabe egiten dituzten produktu naturalen emateak.

B) Garraio-zerbitzuak, etxe-aldaketa, atoi eta garabi zerbitzuak barne.

C) Garraiobideen errentamendua.

2.– Hori dela eta, Gipuzkoako Lurralde Historikoak hauek hartzen ditu: lurzorua, zorupea, aire eremua eta alboko urak, jurisdikziopeko urak barne.

3.– Artikulu honetako irizpideen arabera atzerrian egintzat jotzen diren eragiketak Gipuzkoako zerga-administrazioari esleituko zaizkio, gainerako eragiketen proportzio berdinean.

7. artikulua.– Tratatuak eta hitzarmenak.

Foru-arau honetan xedatutakoa gorabehera, indarrean jarraituko du Espainiako barne-ordenamenduaren parte bihurtu diren nazioarteko tratatu eta hitzarmenetan xedatutakoak.

II. TITULUA

ZERGA-EGITATEA

8. artikulua.– Zerga-egitatea.

Zergadunak errenta lortzea da zerga-egitatea, errentaren sorburua edo jatorria edozein dela ere.

Halaber, foru-arau honetan ezarritako oinarri, errenta, mozkin edo galeren egozpenak errenta lortzetzat joko dira.

9. artikulua.– Errenten zenbatespena.

Mota guztietako ondasun-lagapenetan eta eskubide-lagapenetan, haien truke zergadunaren kontabilitatearen araberako zenbatekoa ordaindu dela pentsatuko da.

Kontabilitatearen irregulartasunak direla eta, kontabilitatean ez bada islatzen zergadunaren ondarearen benetako egoera, ordainketa merkatuko ohiko balioaren arabera konputatuko da, kontrakoaren frogarik ezean.

10. artikulua.– Errentak esleitzea.

1.– Sozietate zibilek (nortasun juridikoa izan zein ez), jaraunspen jasogabeek, ondasun-erkidegoek eta Zergei buruzko Foru Arauko 35. artikuluko 3. zenbakian aipatutako gainerako entitateek lortutako errentak, bai eta jasandako atxikipenak eta konturako sarrerak ere, Pertsona Fisikoen Errentaren gaineko Zergari buruzko Foru Arauko IV. tituluko VI. kapituluko 2. atalean ezarritakoaren arabera esleituko zaizkie bazkideei, jaraunsleei, erkideei edo partaideei, hurrenez hurren.

2.– Errentak esleitzeko araubidean dauden entitateek ez dute zerga hau dela-eta tributatuko.

3.– Errentak esleitzeko araubidea ez zaie aplikatuko zerga honetan tributatzen duten eraldaketarako nekazaritza-sozietateei.

III. TITULUA

ZERGADUNA

11. artikulua.– Zergadunak.

1.– Honako hauek dira zergadunak, egoitza Espainiako lurraldean edukiz gero:

a) Pertsona juridikoak, foru-arau honetako 10. artikuluan ezarritakoaren arabera, errentak esleitzeko araubidea aplikatu behar zaien sozietate zibilak izan ezik.

b) Foru-arau honetako VI. tituluko VI. kapituluan ezarritako araubidean tributatzen duten zerga-taldeak.

c) Aldi baterako enpresa-elkarteak.

d) Inbertsio-funtsak, Inbertsio Kolektiboko Erakundeei buruzko 2003ko azaroaren 4ko 35/2003 Legean arautuak.

e) Arrisku-kapitaleko funtsak, arrisku-kapitaleko entitateak eta haien sozietate kudeatzaileak arautzen dituen 2005eko azaroaren 24ko 25/2005 Legean arautuak.

f) Pentsio funtsak, azaroaren 29ko 1/2002 Legegintzako Errege Dekretuaren bidez onetsitako Pentsio Plan eta Funtsei buruzko Legearen Testu Bateginean arautuak.

g) Hipoteka merkatua erregulatzeko funtsak, Hipoteka Merkatua arautzen duen martxoaren 25eko 2/1981 Legean arautuak.

h) Hipoteka titulazioko funtsak, higiezinetan inbertitzeko sozietate eta funtsen araubideari eta hipoteka titulazioko funtsei buruzko uztailaren 7ko 19/1992 Legean arautuak.

i) Aktiboen titulazioko funtsak, Kredituaren arloan Espainiako legeria Bankuen Koordinaziorako Bigarren Zuzentarauari egokitzen dion eta finantza-sisteman beste aldaketa batzuk egiten dituen apirilaren 14ko 3/1994 Legeko bosgarren xedapen gehigarriko 2. idatz-zatian aipatzen direnak.

j) Inbertsioen berme funtsak, Balore Merkatuari buruzko uztailaren 28ko 24/1988 Legean arautuak.

k) Banku-aktiboen funtsak; funts horiek Kreditu-erakundeak berregituratu eta konpontzeari buruzko 2012ko azaroaren 14ko 9/2012 Legeko hamargarren xedapen gehigarrian aipatzen dira.

2.– Entitateen egoitza Espainiako lurraldean dagoela joko da baldintza hauetako bat betetzen dutenean:

a) Espainiako legeen arabera eratuta egotea.

b) Egoitza soziala Espainiako lurraldean edukitzea.

c) Benetako zuzendaritzaren egoitza Espainiako lurraldean egotea.

Ondorio horietarako, ulertuko da entitate baten benetako zuzendaritzaren egoitza Espainiako lurraldean dagoela handik zuzendu eta kontrolatzen direnean entitatearen jarduera guztiak.

3.– Zerga-administrazioak ulertu ahal izango du tributazio eza dagoen herrialde edo lurralde batean (Gipuzkoako Lurralde Historikoko Zergei buruzko Foru Arauko hamargarren xedapen gehigarrian ezartzen da zer den tributazio eza) kokatutako entitate batek edo paradisu fiskaltzat jotzen den herrialde edo lurralde batean kokatutako entitate batek Espainiako lurraldean duela bere egoitza, baldin eta entitatearen aktibo nagusiak, zuzenean zein zeharka, Espainiako lurraldean kokatutako ondasunak edo lurralde horretan bete edo erabiltzen diren eskubideak badira, edo entitatearen jarduera nagusia Espainiako lurraldean egiten bada, non eta entitate horrek ez duen frogatzen bere zuzendaritza eta benetako kudeaketa beste herrialde edo lurralde hartan egiten direla, edo frogatzen badu arrazoi ekonomiko baliodunak eta funtsezko arrazoi enpresarialak daudela entitatea eratzeko eta haren jardunerako eta frogatzen badu, orobat, entitatearen eraketa eta jardunerako arrazoia ez dela baloreen eta bestelako aktiboen kudeaketa soila.

4.– Foru-arau honetan, zerga honen zergadunei sozietate nahiz entitate esango zaie, modu laburrean.

12. artikulua.– Salbuespenak.

1.– Zergatik salbuetsita daude:

a) Lurraldeko administrazio publikoak, haien organismo autonomoak eta azken horien antzeko izaera duten zuzenbide publikoko entitate edo organismoak.

b) Gizarte Segurantzaren kudeaketaren ardura duten erakunde publikoak.

c) Eusko Ikaskuntza-Sociedad de Estudios Vascos, Euskaltzaindia-Real Academia de la Lengua Vasca, eta Real Sociedad Bascongada de los Amigos del País Vasco-Euskal Herriaren Adiskideen Elkartea.

d) Portuko agintaritzak.

2.– Honako hauek salbuespen partziala edukiko dute, foru-arau honetako 38. artikuluan ezarritakoarekin bat etorriz:

a) Irabazizkoak ez diren erakundeen zerga-araubideari eta mezenasgoari emandako zerga-pizgarriei buruzko Foru Arauan ezarritako zerga-araubidea edukitzeko baldintzak betetzen ez dituzten irabazteko asmorik gabeko entitate eta instituzioak.

b) Kooperatibaen batasun, federazio eta konfederakundeak.

c) Profesionalen elkargoak, enpresaburu eta profesionalen elkarteak, ganbera ofizialak, arrantzaleen kofradiak, langileen sindikatuak eta alderdi politikoak.

d) Enplegua sustatzeko funtsak.

e) Gizarte Segurantzako lan-istripu eta lanbide-gaixotasunen mutualitateak, halako mutualitateen arautegi erregulatzailean ezarritako betekizunak betetzen dituztenean.

13. artikulua.– Mikroenpresa, enpresa txikia eta enpresa ertaina: zer diren.

1.– Foru-arau honen ondorioetarako, mikroenpresatzat hartuko dira ondoko baldintzak betetzen dituztenak:

a) Ustiapen ekonomikoa egin behar du.

b) Aktiboa edo eragiketa bolumena, Euskal Autonomia Erkidegoarekiko Ekonomia Itunean zehaztu bezala, 2 milioi eurotik gorakoa ez izatea.

c) Batez beste, plantillan 10 pertsona baino gutxiago eduki behar ditu.

d) Lehen adierazitako betekizunetako bat betetzen ez duen beste enpresa batek haien gaineko % 25etik gorako partaidetzarik ez edukitzea –ez zuzenean, ez zeharka–, salbu eta beste enpresa hori arrisku-kapitaleko funts edo sozietateak direnean eta haiei aplikagarri bazaie foru-arau honetako VI. tituluko IV. kapituluan ezarritako araubide berezia, eta partaidetza sozietatearen xedea betetzearen ondorio denean.

2.– Foru-arau honen ondorioetarako, enpresa txikitzat hartuko dira baldintza hauek betetzen dituztenak:

a) Ustiapen ekonomikoa egin behar du.

b) Aktiboa edo eragiketa bolumena, Euskal Autonomia Erkidegoarekiko Ekonomia Itunean zehaztu bezala, 10 milioi eurotik gorakoa ez izatea.

c) Batez beste, plantillan 50 pertsona baino gutxiago eduki behar ditu.

d) Lehen adierazitako betekizunetako bat betetzen ez duen beste enpresa batek haien gaineko % 25etik gorako partaidetzarik ez edukitzea –ez zuzenean, ez zeharka–, salbu eta beste enpresa hori arrisku-kapitaleko funts edo sozietateak direnean eta haiei aplikagarri bazaie foru-arau honetako VI. tituluko IV. kapituluan ezarritako araubide berezia, eta partaidetza sozietatearen xedea betetzearen ondorio denean.

3.– Foru-arau honen ondorioetarako, enpresa ertaintzat hartuko dira baldintza hauek betetzen dituztenak:

a) Ustiapen ekonomikoa egin behar du.

b) Aktiboa ez izatea 43 milioi eurotik gorakoa edo, bestela, eragiketa bolumena, Euskal Autonomia Erkidegoarekiko Ekonomia Itunean zehaztu bezala, ez izatea 50 miloi eurotik gorakoa.

c) Batez beste, plantillan 250 pertsona baino gutxiago eduki behar ditu.

d) Lehen adierazitako betekizunetako bat betetzen ez duen beste enpresa batek haien gaineko % 25etik gorako partaidetzarik ez edukitzea –ez zuzenean, ez zeharka–, salbu eta beste enpresa hori arrisku-kapitaleko funts edo sozietateak direnean eta haiei aplikagarri bazaie foru-arau honetako VI. tituluko IV. kapituluan ezarritako araubide berezia, eta partaidetza sozietatearen xedea betetzearen ondorio denean.

4.– Artikulu honetako goiko zenbakietako a) letran xedatutakoari dagokionez, entitate batek ustiapen ekonomikoa egiten duela joko da baldin eta ekitaldian lortzen dituen sarreren % 85, gutxienez, enpresa- edo lanbide-jardueretatik datozen errentak badira; ez dira errenta horietan inola ere sartuko foru-arau honetako 48. artikuluan, entitate ez-egoiliarren errenta positibo batzuk zerga-oinarrian sartzeari buruzkoan, aipatzen diren errenta motak.

Aurreko paragrafoan xedatutakoa gorabehera, enpresa-jardueretatik datozen errentatzat joko dira foru-arau honetako 48. artikuluko 2. zenbakian xedatutakoaren arabera baztertuta daudenak, hots, pertsona edo entitate lotuekin egindako eragiketetan sortzen direnak, foru-arau honetako 42. artikuluko 3. zenbakian adierazi bezala, edo talde bateko entitateen arteko eragiketetan sortzen direnak, Merkataritza Kodeko 42. artikuluan xedatutakoa aplikatuta.

Zenbaki honetan aipatutako sarrerak konputatzeko, kontuan hartuko dira beste entitate batzuetako dibidenduak edo mozkinetako partaidetzak, baldin eta, batetik, zergadunak zuzeneko edo zeharkako partaidetza badu entitate horietan, zeinak foru-arau honetako 33. artikuluko 1. zenbakiko a) letran portzentajeari eta antzinatasunari buruz azaltzen diren baldintzak betetzen baditu, eta, bestetik, aipatutako mozkin eta entitate horiek, gainera, idatz-zati honetan xedaturikoa betetzen badute. Entitate horietako partaidetza eskualdatuz lortutako errentak ere konputatuko dira, foru-arau honetako 34. artikuluan ezarritako baldintzak betetzen direnean.

Ez dira inola ere enpresa-jardueretatik datozen errentatzat hartuko laga diren edo haien gaineko eskubide errealak eratu diren ondasun higiezinetatik ateratakoak, tartean direla haien errentamendua, azpierrentamendua edo erabilera nahiz luperketarako eskubide edo ahalmenen eraketa edo lagapena, edozein izanda ere haien izena edo izaera, ezta aktibo korrontetzat jotzen direnak ere, salbu eta higiezinen sustapen, salerosketa edo errentamendu ekonomia-jarduera bati atxikita daudenean, entitateak plantillan izan ditzan, gutxienez, urtean batez beste bost langile, inoren kontura enplegatuak, lanaldi osoarekin eta jarduera horretarako dedikazio esklusiboarekin. Horretarako, ez dira konputatuko foru-arau honetako 42. artikuluan ezarritakoaren arabera zergadunarekin lotutzat jotzen diren langileak.

Batez besteko plantilla zenbatzean, aurreko lerroaldean ezarritako baldintzak betetzen dituzten langileak hartu behar dira kontuan, hain zuzen ere foru-arau honetako 42. artikuluan ezarritakoaren arabera zergadunari lotutako ondare-sozietate ez bestelako entitateetan enplegatuta daudenak.

5.– Aurreko 1etik 3ra arteko zenbakietan azaldutako betekizunak zergaren sortzapenaren aurreko zergaldian bete behar dira.

Zergaldi hori urte naturala baino laburragoa izan bada, urtekoratu egingo da eragiketa bolumenari dagokion magnitudea. Gauza bera egingo da entitate sortu berria denean, baina, kasu horretan, edo jardunik gabe zeuden eta ustiapen ekonomiko bati ekiten dioten entitateen kasuan, zergaren sortzapena gertatzen den ekitaldian bete beharko dira baldintza horiek.

Aurreko lerroaldeko bigarren tartekian aipatzen diren kasuetan, aurreko zergaldia edo sortzapenaren zergaldia urtebete baino laburragoa izan bada, eragiketa bolumenari dagokion magnitudea bakarrik urtekoratuko da. Erregela bera aplikatuko da jardunik gabe zeuden entitateek jarduna hasten badute, baldin eta jarduna zergaldia hasi ondoren hasten badute.

Artikulu honetako 1etik 3ra arteko zenbakietako d) letran xedatutakoa aplikatzeko, partaidetza duten enpresek bakarrik bete beharko dituzte zenbaki horietako b) eta c) letretan dauden baldintza kuantitatiboak.

6.– Aurreko 1etik 3ra arteko zenbakietako c) letran xedatutakoaren ondorioetarako, batez besteko plantilla kalkulatzeko urtean lanaldi osoan dauden langileak hartuko dira kontuan. Lanaldi partzialeko langileak lan egin duten ordu kopuruaren proportzioan konputatuko dira.

7.– Entitateasozietate-talde bateko kidea bada, Merkataritza Kodeko 42. artikuluaren arabera, lehenago aipatutako magnitudeak talde horretako entitateen multzoari dagozkio.

Aktibo osoa eta eragiketa bolumena kalkulatzeko kontuan hartu behar dira Merkataritza Kodeko 46. artikuluan eta kode hori garatzen duten arauetan ezarritakoaren arabera egin beharreko ezabaketak.

14. artikulua.– Ondare-sozietateen kontzeptua.

1.– Foru-arau honetan ezarritakoaren ondorioetarako, inguruabar hauetan dauden zergadunak joko dira ondare-sozietatetzat:

a) Zergaldiko laurogeita hamar egunetan gutxienez, zergadunaren aktiboaren erdia baino gehiago baloreek osatua izatea, edo haren aktiboaren erdia baino gehiago ez egotea ekonomia-jarduerei atxikita.

Ekonomia-jarduerarik dagoen edo ondare-elementu bat hari atxikita dagoen erabakitzeko, Pertsona Fisikoen Errentaren gaineko Zergan xedatutakoari jarraituko zaio.

Hala aktiboaren balioa nola ekonomia-jarduerei loturik ez dauden ondare-elementuen balioa kontabilitatetik ateratzen dena izango da, baldin eta kontabilitateak sozietatearen ondarearen benetako egoera islatzen badu.

b) Entitatearen kapitaleko partaidetzen edo boto-eskubideen % 75 gutxienez ordezkatzen duten bazkideak izatea edo pertsona fisikoak, edo ondare-sozietatetzat jotzen diren entitateak, edo pertsona fisiko eta entitate horiekin foru-arau honetako 42. artikuluan azaltzen den moduan loturik dauden beste entitate batzuk. Baldintza hori zergaldi osoan bete behar da.

c) Entitatearen sarreren % 80, gutxienez, errenta-iturri hauetatik etortzea:

– Pertsona Fisikoen Errentaren gaineko Zergari buruzko Foru Arauko 63. artikuluan aipatutakoak.

– Hurrengo 2. zenbakiko c) eta d) letretan aipatutako ondasunen ustiapenetik datozenak.

– Kapital propioak hirugarrenei lagata edo zerbitzuak eginda lortutako sarrerei dagozkienak,baldin eta lagapen-hartzailea edo zerbitzuaren hartzailea hartu zergadunari lotutako pertsona edo entitatea bada, foru- arau honetako 42. artikuluan ezarritakoaren arabera, eta, betiere, eragiketa horiek entitateak dituen giza baliabideen eta materialen antolaketaren bitartez burutzen ez badira eta baliabideok eragiketen neurrikoak badira.

2.– Aurreko 1. zenbakiko a) letran xedatutakoa betetzeari dagokionez, honako hau hartuko da kontuan:

a) Honako hauek ez dira konputatuko balore gisa:

– Legezko eta erregelamenduzko obligazioak betetzeko edukitzen direnak.

– Ekonomia-jarduerak egitearen ondorioz finkatutako kontratu-harremanetatik sorturiko kreditu-eskubideak jasotzen dituzten aktiboak.

– Balore-sozietateek beren xedea den jardueran aritzearen ondorioz dauzkatenak.

– Boto-eskubideen % 5, gutxienez, ematen duten eta partaidetza zuzentzeko eta kudeatzeko helburuarekin eskuratu diren baloreak, baldin eta materialen eta pertsonen behar bezalako antolaketa badago horretarako eta partaidetutako entitateak ez badu betetzen aurreko 1. zenbakiko a) letran ezartzen den baldintza.

b) Elementuok ez dira konputatuko ez balore gisa ez ekonomia-jarduerei lotuta ez dauden elementu gisa baldin eta hauen eskuraketa-prezioa ez bada entitateak lortutako mozkin banatu gabeen zenbatekoa baino handiagoa (mozkinok ekonomia-jardueren emaitza izan behar dira), urte horretan zein aurreko azken hamar urteetan lortutako mozkinen zenbatekoaren mugarekin.

Horren ondorioetarako, berdintzat joko dira zenbaki honetako a) letrako azken tartekian aipatutako baloreen dibidenduak eta ekonomia-jardueren mozkinak, baldin eta partaidetutako entitateak lortutako sarreren % 80 gutxienez ekonomia-jarduerak eginez lortu bada.

c) Ez dira ekonomia-jarduerei atxikitako ondasuntzat hartuko, era berean, laga diren edo haien gaineko eskubide errealak eratu diren ondasun higiezinak, tartean direla haien errentamendua, azpierrentamendua edo erabilera nahiz luperketarako eskubide edo ahalmenen eraketa edo lagapena, edozein izanda ere haien izena edo izaera, ezta aktibo korrontetzat jotzen direnak ere, salbu eta higiezinen sustapen, salerosketa edo errentamendu jarduera ekonomiko bati lotuta daudenean, entitateak plantillan izan ditzan, gutxienez, urtean batez beste bost langile, inoren kontura enplegatuak, lanaldi osoarekin eta jarduera horretarako dedikazio esklusiboarekin. Horretarako, ez dira konputatuko foru-arau honetako 42. artikuluan ezarritakoaren arabera zergadunarekin lotutzat jotzen diren langileak.

Batez besteko plantilla zenbatzean, aurreko paragrafoan ezarritako baldintzak betetzen dituzten langileak hartu behar dira kontuan, hain zuzen ere foru-arau honetako 42. artikuluan ezarritakoaren arabera zergadunari lotutako ondare-sozietate ez bestelako entitateetan enplegatuta daudenak.

d) Foru-arau honetako 31. artikuluko 3. eta 3 bis idatz-zatietan aipatutako aktiboak atxikitzat joko dira haien gastuak manu horren arabera kengarritzat jo daitezkeen proportzio berberean.

3.– Artikulu honetako aurreko zenbakietan ezarritako baldintzak betetzen dituzten entitateak ez dira ondare-sozietatetzat joko haien partaidetza ordezkatzen duten baloreak bigarren mailako balore-merkatu ofizialetako batean negoziatzeko onartuta dauden zergaldietan.

4.– Ondare-sozietatetzat jotzen diren entitateek beren kapitaleko partaidetza ordezkatzen duten balore edo partaidetzak mantendu edo izendun bihurtu beharko dituzte.

5.– Aurreko paragrafoan ezarritako betebeharra ez betetzea zerga arloko arau-haustetzat joko da.

Zehapena 3.000 euroko diru-isun finkoa izango da, ez-betetzea gertatu den zergaldi bakoitzeko, baldin eta hari buruzko administrazio-errekerimendurik ez bada egin.

Administrazio-errekerimendurik egin bada, zehapena 6.000 euro izango da, ez-betetzeak irauten duen zergaldi bakoitzeko.

Sozietatearen administratzaileak arau-hauste horren erantzule subsidiarioak izango dira, aurreko lerroaldean ezarritakoa betetzeko neurriak berariaz proposatzen dituztenak salbu, nahiz eta gainerako administratzaileek neurriok onartu ez.

IV. TITULUA

ZERGA-OINARRIA

I. KAPITULUA

ARAU OROKORRAK

15. artikulua.– Zerga-oinarriaren kontzeptua eta zerga-oinarria zehaztea.

1.– Zerga-oinarria zergaldiko errenten zenbatekoa izango da, baina, hala badagokio, zenbateko hori txikitu egingo da, foru-arau honetako 55. artikuluan aipatzen diren zerga-oinarri negatiboak konpentsatuz.

2.– Hiru araubide erabiliko dira zerga-oinarria kalkulatzeko: zuzeneko zenbatespena; zenbatespen objektiboa, foru-arau honek araubide hori aplikatzea xedatzen duenean, eta, subsidiarioki, zeharkako zenbatespena, Gipuzkoako Lurralde Historikoko Zergei buruzko Foru Arauko 52. artikuluan xedatutakoaren arabera.

3.– Zuzeneko zenbatespenaren araubidean, zerga-oinarria kalkulatzeko zuzendu egin behar da kontabilitateko emaitza, foru-arau honetan ezarritako manuak aplikatuz. , Kontabilitateko emaitza hori zehazteko, Merkataritza Kodean, emaitza hori zehazteari buruzko gainerako legeetan eta arauok garatzeko ematen diren xedapenetan ezarritako arauak aplikatuko dira.

4.– Zenbatespen objektiboaren araubidean, berriz, zerga-oinarria osorik edo zati batean zehaztu ahal izango da, zeinu, indize edo moduluak aplikatuz foru-arau honetan ezarritako jarduera-arloei.

5.– Zerga honen ondorioetarako, likidazio-oinarria zerga-oinarria da.

II. KAPITULUA

ZUZENKETAK GASTUEN ATALEAN

16. artikulua.– Amortizazioak: arau orokorrak.

1.– Kengarriak izango dira ibilgetu materialaren, ibilgetu ukiezinaren zein higiezinetako inbertsioen amortizazioren barruan elementuok jardunbide, erabilera, luperketa edo zaharkitzapenagatik jasaten duten benetako baliogalerari dagozkion kopuruak.

2.– Ibilgetu materialaren eta higiezinetako inbertsioen baliogalera honelako hauetan joko da benetakotzat:

a) Foru-arau honetako 17tik 19ra arteko artikuluetan xedatutakoa aplikatzearen ondorio denean.

b) Zergadunak egindako eta zerga-administrazioak onartutako plan bati jarraitzen dionean, arauz ezarritakoarekin bat etorriz.

c) Zergadunak zenbatekoa frogatzen duenean.

3.– Ibilgetu ukiezinaren balio-galera benetakotzat joko da foru-arau honetako 20. artikuluan ezarritakoaren arabera.

4.– Erosketa-prezioa zein ekoizpen-kostua izango dira amortizagarriak, hondar-balioa kenduta, halakorik badago. Eraikinak direnean, ezingo da amortizatu eskuraketa-prezioan lurzoruaren balioari dagokion zatia, birgaikuntza-kostuak izan ezik. Lurzoruaren balioa zein den jakin ezean, eskuraketa-prezioa lurzoruak eta eraikuntzak eraikina erosi den urtean duten katastro-balioen artean hainbanatuz kalkulatuko da lurzoruaren balio hori.

Hala ere, zergadunak beste irizpide bat erabili ahal izango du eskuraketa-prezioa banatzeko, frogatzen baldin bada irizpide hori lurzoruaren eta eraikuntzaren eskuraketa-urteko merkatu-balio normalean oinarrituta dagoela.

5.– Amortizazioa elementuz elementu egingo da. Aitzitik, ondare-elementu baten zatiak modu independentean amortiza daitezke, baldin eta zati bakoitzak kostu esanguratsua badu elementuaren kostu osoari dagokionez, eta zatiaren balio-bizitza eta elementuaren gainerako zatiena ezberdina bada.

Antzeko elementuak badira edo erabilera maila bertsua badute, denak batera amortizatu ahal izango dira, baldin eta uneoro jakin badaiteke amortizazio metatuaren zer zati dagokion ondare-elementu bakoitzari.

Instalazio teknikoak elementu bakar gisa amortiza daitezke. Instalazio teknikotzat joko dira, hain zuzen, ekoizpen-prozesuan erabilera espezializatua duten unitate konplexuak, eta horien artean hauek: eraikinak, makineria, materialak, piezak edo elementuak, sistema informatikoak barne, izaeraz bereizgarriak izan arren, funtzionamendurako elkarri behin betiko lotuta badaude eta baliogalera erritmo bera badute. Mota horretako instalazioetarako bakarrik balio duten ordezko piezak edo aldagarriak ere hemen sartuko dira.

6.– Ondare-elementu bati ezin zaio aplikatu amortizaziometodo bat baino, ez aldi berean ez elkarren segidan.

7.– Ondare-elementuak beren balio-bizitzareren barruan amortizatu behar dira. Epe hori hauxe da: hautatu den amortizazio-metodoaren arabera haien balioa –hondar-balioa bazter utzita– erabat estali behar den epea. Konponketa handiek dakartzaten kostuak konponketa egin arte igarotzen den denboraldian amortizatuko dira.

Aurreko lerroaldean xedatutakoa gorabehera, itzuli beharreko aktiboak badira eta haien balio-bizitza emakidaldia baino luzeagoa badira, amortizazio kengarriaren urteko gehieneko muga kalkulatzeko orduan, emakidaldia hartuko da kontuan. Errentamendu operatiboetan, erabileran laga den edo errentan eman den aktibotik bereizi ezin badaitezke errentariaren inbertsioak, amortizazio kengarriaren urteko gehieneko muga kalkulatzeko orduan errentamendu- edo lagapen-kontratuaren iraupena hartuko da kontuan, berrikuntza-aldia barne, aldi hori balio-bizitza baino laburragoa bada.

Amortizazioa foru-arau honetako 17. artikuluan ezarritako metodoak erabiliz egiten denean, balio-bizitza ezin da izan artikulu horretako 6. zenbakian ezarritako gehieneko amortizazio-aldia baino luzeagoa.

Jarduna aldi baterako eteten bada, etenaldiak dirauen denbora beste luzatuko da elementuen balio-bizitza, honako inguruabarrok gertatuz gero:

a) Etenaldiak urtebete baino gehiago irautea.

b) Entitateak ez egitea amortizaziorik etenaldian zehar.

c) Etenaldiak ukitutako instalazioak identifikatzea eta etenaldiaren arrazoiak frogatzea.

8.– Ibilgetuko elementuen balioa eguneratu egin bada arau-xedapenen babesean, elementuon amortizazioa xedapenotan ezarritako irizpideen arabera egingo da, haien balio-bizitza amaitu arte.

9.– Bat-egitea, zatiketa (osoa zein partziala), ekarpena edo aktibo eta pasibo guztiaren lagapena gertatuz gero, elementuak aurretik zuen amortizazio araubidea aplikatu behar zaio eskuratutako ondare-elementu bakoitzari, salbuespen honekin: gerta liteke zergadunak nahiago izatea sistema berezia aplikatzea ondare-elementuak amortizatzeko; horrelako kasuetan, amortizazio-plana egin beharko du, erregelamendu bidez ezarritako eran.

17. artikulua.– Amortizazioak: ibilgetu materiala eta higiezinetako inbertsioak.

1.– Ibilgetu materialaren eta higiezinetako inbertsioen balio-galera benetakotzat joko da hurrengo taulan ezarritako amortizazio koefizienteak aplikatzearen emaitza denean:

(Ikus .PDF)

2.– Balio-galera benetakotzat joko da, halaber, erabilita erosten diren eraikin, altzari, tresna eta elementuen kasuan izan ezik, baldin eta erabili diren amortizazio metodoek, irizpide tekniko-ekonomiko baten arabera, kuota gero eta txikiagoak ematen badituzte ondasunaren bizitza baliagarrian zehar, eta, betiere, lehenengo bi ekitaldietan ez badira gainditzen aurreko idatz-zatiko taulan ageri den gehieneko koefizientea 2ko koefizienteaz eta 1,5 koefizienteaz biderkatuta, hurrenez hurren, aplikatuz ateratzen diren zenbatekoak, eta hirugarren ekitalditik aurrera ez bada gainditzen taula horretako gehieneko koefizientea.

Idatz-zati honetan adierazitako kasuetan, amortizazio aldia edozein izan daiteke bitarte honen barruan: artikulu honetako 6. idatz-zatian aipatutako gehieneko epealdiaren eta aurreko idatz-zatiko taulako gehieneko amortizazio-koefizientea erabiliz kalkulatzen den epealdiaren artean.

3.– Elementuak erabilita eskuratzen direnean, eraikinak izan ezik, gehieneko koefizienteak aplikatuko dira ken daitekeen amortizazioa kalkulatzeko (muga: aurreko 1. idatz-zatian aipatutako amortizazio taulako koefizienteak halako bi), eta artikulu honetako 6. idatz-zatian aipatutako gehieneko aldia erdira laburtuko da.

4.– Elementu bat egunero erabiltzen denean lan txanda arrunt batean baino gehiagotan, gehieneko amortizazio-koefizienteak handitu egin ahal izango dira, honela kalkulatutako zenbatekoa gehituz: aurreko 1. idatz-zatiko amortizazio-taulatik jasotako gehieneko koefizientearen eta gutxieneko amortizazio-koefizientearen (100 zati artikulu honetako 6. idatz-zatian aipatutako gehieneko amortizazio-aldia) arteko diferentzia egunero egin ohi diren lanorduen zati zortzi eginez ateratzen den kopuruaz biderkatu. Eragiketa horren emaitza izango da kasu horretan onar daitekeen gehieneko amortizazio-koefizientea.

Aurreko lerroaldean xedatutakoa ez zaie aplikatuko eraikinei, garraio-elementuei, merkataritzako altzariei eta instalazioei eta tresneria informatikoari.

5.– Ibilgetu materialeko ondare-elementuen eta higiezinetako inbertsioen berrikuntzak, zabalkuntzak edo hobekuntzak ondare-elementu horiei atxikitzen bazaizkie, eragiketa horien zenbatekoa ondare-elementuon balio-bizitza amaitu arteko zergaldietan amortizatuko da. Horretarako, zergaldi bakoitzari aipatu zenbatekoari ondoko zatiketaren emaitzako ehunekoa aplikatzearen ondoriozko kopurua egotziko zaio: zergaldi bakoitzean konputatutako ondare-elementuaren amortizazioaren (benetako balio galerari dagokion heinean) eta ondare-elementuak berriztapena, zabalkuntza edo hobekuntza gertatu den zergaldiaren hasieran izan duen kontabilitate-balioaren arteko zatiketa.

Berriztatu, zabaldu edo hobetutako ondare-elementuak berriztatu, zabaldu edo hobetu aurretik aplikatzen zitzaien metodoaren arabera amortizatuko dira aurrerantzean ere.

Aurreko lerroaldean aipatutako eragiketek aktiboaren ustezko balio-bizitza luzatzen badute, balio-bizitza berria hartu beharko da kontuan ondare-elementuaren nahiz berrikuntza, zabalkuntza edo hobekuntzaren zenbatekoaren amortizatzeko.

Zenbaki honetan xedatutakoa kontabilitate-birbaloraketetan ere aplikatuko da, baldin eta birbaloraketa horiek haien zenbatekoa kontabilitateko emaitzan sartzera behartzen duten lege edo erregelamenduen arabera egin badira, foru-arau honetako hamabosgarren xedapen iragankorrean ezarritakoa gorabehera.

6.– Foru-arau honen ondorioetarako, artikulu honetan aipatutako ondare-elementuak amortizatzeko gehieneko epea 15 urte izango da, higiezinen eta itsasontzi zein aireontzien kasuan izan ezik: higiezinetarako 50 urteko epea egongo da; itsasontzi eta aireontzietarako, 25 urtekoa.

Zergadunek eskatu ahal izango dute amortizazio-plan berezia onets dadila, foru-arau honetako 16.2.b) artikuluan araututa dauden horietarikoa, baldin eta, inguruabar ekonomiko edo teknikoengatik, beharrezkoa bada gehieneko amortizazio-aldia zenbaki honetan ezarritakoa baino luzeagoa izatea. Ondorioz, aurkeztutako proposamenaren arabera zehaztuko da zergaldi bakoitzeko amortizazio kengarria.

7.– Foru-arau honetako 31. artikuluko 3. idatz-zatian aipatzen diren ibilgailuen kasuan, amortizazioaren oinarria aterako da idatz-zati horretan kasu bakoitzerako aurreikusten diren depreziazio-mugak aplikatuta, hala aplikatzea badagokio.

8.– Foru-arau honetako 31. artikuluko 3 bis idatz-zatian aipatzen diren garraio-elementuen kasuan, artikulu honetan xedatutakoa aplikatzeko erregela hauei jarraituko zaie:

a) 3 bis idatz-zati horretako lehenengo paragrafoan aipatutako elementuengatik, ez da kopuru kengarririk izango amortizazio-kontzeptupean.

b) 3 bis idatz-zati horretako bigarren paragrafoan aipatutako elementuengatik, artikulu honetan ezarritako metodoak eta sistemak aplikatuko dira. Letra honetan xedatutakotik ondorioztatzen den amortizazioa konputatu egingo da aipatutako bigarren paragrafoan jasotako urteko mugaren ondorioetarako.

c) 3 bis idatz-zati horretako hirugarren paragrafoan aipatutako elementuengatik, artikulu honetan ezarritako metodoak eta sistemak aplikatuko dira.

18. artikulua.– Amortizazioak: finantza-errentamenduko kontratuak.

1.– Artikulu honetan ezarritakoa finantza-errentamenduko kontratuei aplikatu ahal izango zaie, baldintza hauek betez gero:

a) Ondasun higigarri edo higiezinen erabilera lagatzea izan dadila helburu bakarra; ondasunok etorkizuneko erabiltzailearen zehaztapenei jarraituz xede horretarako eskuratutakoak izan behar dute, eta erabiltzaile horrek, trukean, kontraprestazioa ordaindu beharko du: hurrengo e) letran aipatzen diren aldian aldiko kuotak, hain zuzen.

b) Erabiltzaileak bere ustiapen ekonomikoei bakarrik atxiki behar dizkie lagatako ondasun horiek.

c) Kontratuan nahitaez jaso behar da erabiltzaileak ondasunak erosteko aukera izango duela kontratuaren amaieran.

Edozein arrazoi dela-eta erabiltzaileak ez badu eskuratzen kontratuaren xede den ondasuna, errentatzaileak beste erabiltzaile bati laga ahal izango dio, eta aurreko a) letran ezarri den betekizuna ez da urratutzat joko ondasuna erabiltzaile berri horren zehaztapenen arabera eskuratua ez izanagatik.

d) Kontratuek, gutxienez, bi urterako izango dira, iraungo dute ondasun higigarriei buruzkoak direnean, eta hamar urterako, berriz, ondasun higiezin edo industria-establezimenduei buruzkoak direnean. Dena den, abusuzko jokabideak saihesteko, gutxieneko beste iraupen batzuk ezarri ahal izango zaizkie kontratuei, erregelamendu bidez, kontuan hartuz kontratuok nolako ondasunei dagozkien.

e) Finantza-errentamenduaren kuotak kontratuetan adierazita agertu beharko dira, eta desberdindu egin behar da zer zati dagokion entitate errentatzaileak ondasunaren kostuaren berreskuratzeari –erosteko aukeraren balioa alde batera utzita– eta zer zati dagokion, berriz, entitate errentatzaileak galdatzen duen finantza-zamari, eragiketa honetan aplikatu beharreko zeharkako karga gorabehera.

f) Finantza-errentamenduko kuotetan ondasunaren kostua berreskuratzeari dagokion zatiaren urteko zenbatekoak berdin jarraitu beharko du kontratuak dirauen epe osoan, edo, bestela, hazi egin beharko epe horretan zehar.

2.– Aurreko zenbakian ezarritako baldintzak betetzen dituzten kontratuetan, entitate lagapen-hartzaileak ordaintzen dituen kuotetan ondasunaren kostua berreskuratzeari dagokion zatia kontratuaren xede diren ondare-elementuen benetako baliogalera izango da entitate lagapen-hartzailearentzat, salbu eta kontratuaren bidez lurrak, orubeak eta bestelako aktibo amortizaezinak lagatzen direnean. Baldintza hori eragiketaren xede den ondasunaren zati batean baino betetzen ez denean, amortizagarriak diren elementuei dagokien zatia bakarrik izango da kengarria, eta zati hori bereizita adierazi beharko da kontratuan.

3.– Aurreko zenbakiaren arabera kengarria den zenbatekoa ez da handiagoa izango honako eragiketa hau eginez ateratzen dena baino: ondasunaren kostua bider foru-arau honetako 17. artikuluan xedatutakoaren arabera ondasunari dagokion amortizazio-koefizientearen bikoitza. Gaindikina hurrengo zergaldietan izango da kengarria, aurreko muga berbera errespetatuz. Bada, muga hori kalkulatzeko, ondasuna jarduteko moduan jartzen den unea hartuko da kontuan.

Hori dela eta, entitate errentariek aukeratu ahal izango dute aktiboa eraikitzen hasten den unea izan dadila aurreko lerroaldean aipatutako une hori, eta, horretarako, jakinarazpena egin behar diote zerga-administrazioari, erregelamendu bidez ezartzen den moduan; dena dela, aurrekoaz gainera, honako baldintza hauek guztiak ere aldi berean bete beharko badira.

a) Aktiboak finantza-errentamenduko kontratu baten xede diren ibilgetu materialeko elementuak izatea, eta kontratu horren kuotak era esanguratsuan ordain daitezela aktiboaren eraikuntza amaitu baino lehen.

b) Aktibo horien eraikuntzarako gutxienez 12 hilabete behar izatea.

c) Aktiboek betekizun tekniko nahiz diseinuko betekizun bereziak izatea, eta ez izatea serieko ekoizpenekoak.

Foru-arau honetako 13. artikuluan aipatutako mikroenpresa eta enpresa txiki eta ertainei dagokienez, honela kalkulatuko da zenbateko hori: ondasunaren kostua bider foru-arau honetako 17. artikuluan xedatutakoaren arabera ondasunari dagokion amortizazio-koefizientearen bikoitza; eraikinen kasuan, aldiz, bider 1,5 egingo da.

4.– Fiskalki gastu kengarritzat joko da, betiere, artikulu honetan aipatutako ondasunak errentan ematen edo lagatzen dituen entitateari ordaindutako finantza-karga. Dena den, foru-arau honetako 31. artikuluko 3. idatz-zatiko b) letran aipatzen diren ibilgailuetatik eratorritako finantza-gastuak konputatu egingo dira, idatz-zati horretan aipatzen den erabilera-kontzeptupean jarritako mugaren ondorioetarako.

5.– Aurreko zenbakietan aipatutako zenbatekoengatiko kenkaria aplikatu ahal izateko ez da beharrezkoa zenbateko horiek kontabilitateko galera-irabazien kontuan egoztea.

6.– Finantza-errentamenduaren bidez aktiboak eskuratzen dituzten zergadunek, artikulu honetako baldintzak betez gero, artikulu honetan ezarritako zerga-araubidea ez aplikatzea hautatu ahal izango dute. Hala egiten badute, zerga honen erregela orokorren arabera amortizazio-kuoten baliokidea den zenbatekoa izango da kengarria.

7.– Dena dela, artikulu honetan aurreikusitako araubidea ez zaie aplikatuko foru-arau honetako 31. artikuluko 3. idatz-zatiko a) letran eta c) letrako bigarren paragrafoan eta 3 bis idatz-zatiko lehenengo eta bigarren paragrafoetan aipatzen diren garraio-elementuei.

8.– Ondasuna galtzen bada edo behin betiko erabili gabe geratuz gero zergadunari egotzi ezin zaion eta behar bezala frogatu beharko den arrazoiren batengatik, errentariaren zerga-oinarrian ez da sartuko ondasunaren kostuaren berreskurapena dela-eta kendutako kopuruaren eta haren kontabilitate-amortizazioaren arteko diferentzia positiboa.

19. artikulua.– Amortizazioak: ondasunen erabilera lagatzen den beste kasu batzuk.

1.– Aktiboen erabilera aktibook erosi edo lagapena berritzeko aukerarekin lagatzen bada, aukera bat edo bestea erabiltzeari buruzko zentzuzko zalantzarik ez dagoela ulertuko da baldin eta, beste batzuen artean, aukera hori erabiltzeko ordaindu behar den zenbatekoa txikiagoa bada aktiboaren balioari aktibo horri lagapenak dirauen artean dagozkion gehieneko amortizazio-kuoten batura kenduz gero lortzen den zenbatekoa baino: eragiketa hori finantza-errentamendutzat joko da.

2.– Finantza-errentamenduko kontratuetan –erosteko aukera jaso zein ez–, entitate lagatzailearentzat kengarria izango da foru-arau honetako 16. artikuluan ezarritakoaren arabera lagatako aktiboei dagozkien amortizazio-kuoten zenbatekoa.

Finantza-karga osoa finantza-errentamenduaren epe osoan zehar banatuko da, sortzapen-printzipioaren arabera.

3.– Aktibo hori, aurretik, lagapen-hartzaileak eskualdatu badio lagatzaileari, orduan eragiketa hori finantziazio-metodotzat joko da, eta lagatzaileak eskualdaketaren aurreko baldintza berberetan eta balio beraren gainean jarraituko du egiten aktibo horren amortizazioa.

4.– Artikulu honetan aipatzen diren aktiboak ere era librean amortizatu ahal izango dira foru-arau honetako 21. artikuluan ezarritako kasuetan.

20. artikulua.– Amortizazioak: ibilgetu ukiezina.

1.– Balio-bizitza definitua duen ibilgetu ukiezina amortizatzeko zuzkidurak kengarriak izango dira, eta horretarako gehieneko muga, urtean, zuzkidura horien bosten bat izango da. Kengarriak izateko, baina, honako baldintza hauek bete behar dira:

a) Ibilgetua kostu bidezko eskuratze baten bitartez agerian jarri izana.

b) Entitate eskuratzailea eta eskualdatzailea ez izatea sozietate-talde bereko kide, Merkataritza Kodeko 42. artikuluan ezartzen diren irizpideen arabera, entitateen egoitza eta urteko kontu bateratuak egiteko betebeharra gorabehera. Entitate biak talde bereko kide badira, entitate eskualdatzaileak ibilgetua pertsona edo entitate ez-lotuei erosterakoan ordaindu zuen eskuraketa prezioaren gainean egingo da kenkaria.

Dena dela, ibilgetu ukiezineko elementuaren balio-bizitza definitua bost urte baino gutxiago bada, bizitza horri dagokion amortizazioaren zuzkidura izango da kengarria.

Ibilgetu ukiezinaren amortizaziorako zuzkidurak kengarriak izango dira nahiz eta aurreko a) eta b) letretan jasotzen diren baldintzak bete ez, baldin eta frogatzen bada ibilgetu horren galera itzulezin bati dagozkiola.

2.– Aplikazio informatikoak amortizatzeko bost eta hamar urte bitarteko epearen barruan egiten diren zuzkidura linealak kengarriak izango dira.

3.– Estatuaren lurraldean eta jurisdikzio uretako nahiz Espainiako Erresumaren subiranotasunpeko itsas hondoetan, Hidrokarburoen Sektoreari buruzko 1998ko urriaren 7ko 34/1998 Legean ezarritako moduan, hidrokarburo naturalen (likidoak edo gaseosoak) hobiak eta lurpeko guneak arakatu, ikertu eta ustiatzea xede sozial bakartzat duten sozietateek, baimen eta emakida indardun, iraungi edo azkenduak direla bide, ikerketarako eta, osagarri gisa, ateratako produktuak garraiatu, biltegiratu, araztu eta saltzeko erabilitako aktibo ukiezinak eta egindako gastuak ibilgetu ukiezintzat joko dira burutzen diren unetik aurrera, eta urtean gehienez % 50eko kuotarekin amortizatu ahal izango dira.

Aurretiko lan geologiko, geofisiko eta sismikoak eta sarbideak egiteko eta lurrak prestatzeko obrak zein ustiaketa-, ebaluazio- eta garapen-zundaketak eta putzuak berregokitu eta meatokiak artatzeko eragiketak kontzeptu honen barruan sartuko dira.

Ikerketa-gastuek eta aktibo ukiezinek ez dute gehieneko amortizazio-eperik.

Halaber, zenbaki honetan aipatutako sozietateek «ekoizpen unitate»aren irizpideari jarraituz amortizatu ahal izango dituzte aktiboko elementu ukigarriak, Administrazioak foru-arau honetako 16. artikuluko 2. zenbakiko b) letran ezarritako moduan onartutako planaren arabera.

21. artikulua.– Amortizatzeko askatasuna, amortizazio azeleratua eta baterako amortizazioa.

1.– Honako hauek askatasunez amortiza daitezke:

a) Ibilgetu materialeko eta ukiezineko elementuak, unitateko balioa 1.500 eurotik gorakoa ez bada, haien eskuraketa-eguna edozein dela ere.

b) Foru-arau honetako 13. artikuluan aipatutako mikroenpresek eta enpresa txikiek erosten dituzten ibilgetu materialeko elementu berriak (artikulu honetako 4. zenbakiko lehenengo paragrafoan ezarritakoak izan ezik), bai eta enpresak berak eraikitako ibilgetu materialeko elementuak ere, eta zergaldian sinatutako obra-kontratuen bidez enkargatutakoak ere bai, baldin eta kontratua amaitzen denetik hamabi hilabete pasatu baino lehen jartzen badira enpresaren esku.

c) Ibilgetu materialeko eta ukiezineko elementuak, eraikinak izan ezik, ikerketa- eta garapen-jarduerei lotuta badaude.

Eraikinak zati berdinetan amortizatu ahal izango dira, hamar urtean zehar, eraikinok ikerketa- eta garapen-jarduerei loturik dauden zatian.

d) Ibilgetu ukiezin moduan aktibatu diren ikerketa- eta garapen-gastuak, amortizazio askatasuna duten elementuen amortizazioak salbu.

e) Ibilgetu materialeko elementu berriak, baldin eta enpresaren jarduerak duen eragin kutsagarria murrizteari eta zuzentzeari zuzenean lotuta badaude.

f) Lurzoru poluituak garbitzearekin zuzenean lotuta dauden ibilgetu materialeko eta ukiezineko elementuak, Euskal Autonomia Erkidegoko organismo ofizialek onetsi dituzten proiektuetarako badira.

Zergadunak berak eskatu beharko du aurreko e) eta f) letretan aipatutako amortizazio askatasuna aplikatzeko, eta zerga-administrazioak onartu beharko du, erregelamendu bidez ezartzen diren baldintzetan, gaiaren arabera eskumena duten organoek txostena eman ondoren.

Idatz-zati honetan araututako amortizazio askatasuna aplikagarri zaien ondare-elementuak funtzionatzen hasten diren egunetik hasita erabili ahal izango da, elementu horien balio-bizitzan zehar. Balio-bizitza zer den foru-arau honetako 16. artikuluko 7. zenbakian zehaztu da.

2.– Foru-arau honetako 13. artikuluan aipatutako enpresa ertainek erosten dituzten ibilgetu materialeko elementu berriak (artikulu honetako 4. zenbakiko lehenengo paragrafoan ezarritakoak izan ezik) foru-arau honetako 17. artikuluko taulan ezarritako gehieneko amortizazio-koefizientea 1,5ez biderkatuta ateratzen den koefizientearen arabera amortizatu ahal izango dira funtzionatzen hasten direnetik aurrera, baita enpresak berak eraikitako ibilgetu materialeko elementuak ere, eta zergaldian sinatutako obra kontratuen bidez enkargatutakoak ere bai, baldin eta kontratua amaitzen denetik hamabi hilabete pasatu baino lehen jartzen badira enpresaren esku.

3.– Foru-arau honetako 13. artikuluan aipatutako mikroenpresek, ibilgetu materialaren, ukiezinaren eta higiezinetako inbertsioen baterako amortizazio gisa (artikulu honetako 4. zenbakiko lehenengo paragrafoan ezarritakoak izan ezik), hautatu ahal izango dute zergaldi bakoitzean kengarritzat jotzea horrelako ondare-elementuen zerga-balio garbiaren % 25, elementu amortizaezinen balioa alde batera utzita.

Hautu hori eginez gero, batera amortizatutako ondare-elementuen amortizazio edo balio-narriaduraren ziozko galera gisa kontabilizatutako zenbatekoak ezingo dira kengarritzat jo, eta egindako hautuari eutsi beharko zaio zergaduna mikroenpresa den bitartean. Halaber, letra honetan ezarritako hautua egiten duten mikroenpresek ezin dituzte aplikatu artikulu honetako 1. zenbakian ezarritako arauak.

4.– Edonola ere, foru-arau honetako 31. artikuluko 3. zenbakiko a) letran eta c) letrako bigarren paragrafoan eta 3 bis zenbakiko lehenengo eta bigarren paragrafoetan adierazitako erregelak aplikatzen zaizkien eraikinek eta garraiobideek ez dute izango aplikatzerik artikulu honetako aurreko idatz-zatietan jasotako amortizazio askatasuna, amortizazio azeleratua eta baterako amortizazioa.

Bestetik, foru-arau honek 31. artikuluko 3. zenbakiko b) letran eta c) letrako lehenengo paragrafoan aipatutako ibilgailuek artikulu honetan jasotako amortizazio askatasuna edo amortizazio azeleratua aplikatuko dute, xedapen haietan kontzeptu horretarako jarritako mugak aplikatuz ateratzen den kopuruan.

Foru-arau honetako 31. artikuluko 3. zenbakiko e) letran eta 3 bis zenbakiko hirugarren paragrafoan aipatzen diren ibilgailuei dagokienez, artikulu horretan ibilgailu horien depreziazioaren kengarritasunarentzako mugarik jasotzen ez den neurrian, amortizazio askatasuna eta amortizazio azeleratua erabat aplikatu ahal izango dute.

5.– Artikulu honetako aurreko zenbakietan ezarritakoaren arabera amortizatu daitekeen zenbatekoak benetan kontabilizatutako balio-galeraren aldean duen gaindikinarengatik kenkaria aplikatu ahal izateko ez da beharrezkoa izango hura kontabilitateko galera eta irabazien kontuan egoztea.

6.– Amortizazio askatasunari, amortizazio azeleratuari edo baterako amortizazioari aplikatzen zaizkien diru kopuruek, idatz zati honetan jasotzen direnek, zerga-oinarria handituko dute askatasun hori aplikatutako elementuen amortizazioan, eskualdaketan edo, hala denean, jaregitean.

Elementu horien eskualdaketan sortutako errentak foru-arau honetako 36. artikuluan xedatutakoaren babesean jartzen badira aparteko mozkinen berrinbertsioa dela eta, honako errenta honek bakarrik izango du zerga-onura hori: eskualdaketa-balioaren eta kontabilitateko balioaren arteko kendura, diruaren balio-galeraren araberako zuzenketa egin eta gero.

22. artikulua.– Ondare-elementuen balio-narriaduraren ondoriozko galera: kaudimengabezia.

1.– Zordunek izan ditzaketen kaudimen-gabezien ondorioz kredituak narriatu direla-eta kredituok izan ditzaketen galerak ere kengarriak izango dira, baldin eta, zergaren sortzapenaren unean honako hauetakoren bat suertatuz gero:

a) Betebeharraren mugaegunetik sei hilabeteko epea igaroz gero.

b) Zorduna konkurtsoan dagoela adieraziz gero.

c) Zorduna edo, zordun hori entitatea izatekotan, haren administratzaile edo ordezkarietako bat ondasunak ostentzeagatiko delitua dela-eta prozesatuta egonez gero.

d) Betebeharrak judizio bidez erreklamatuz gero, edo betebehar horiek kobratzea prozedura judizial baten edo arbitraje-prozedura baten ebazpenaren menpe egonez gero.

2.– Kredituen narriaduragatiko galerak ez dira kengarriak izango zordunen kaudimengabezia honelako kasuetan gertatzen denean:

a) Jarraian aipatuko diren kredituen narriaduragatiko galerak, salbu horien existentziari edo zenbatekoari buruz arbitraje edo epai prozedura egiten denean:

– Zuzenbide publikoko entitateek zordundakoak edo fidantzan emanikoei dagozkienak.

– Kreditu-entitateek edo elkarrekiko berme-sozietateek fidantzan emanikoei dagozkienak.

– Eskubide erreal, jabaria erreserbatzeko itun eta atxikitzeko eskubidearen bidez bermatutakoei dagozkienak, bermea bera galtzean edo balioa galtzen duenean izan ezik.

– Kreditu-aseguru edo gaude kontratuaren bidez bermatutakoei dagozkienak.

– Beren beregiko berritu edo luzatu direnei dagozkienak.

b) Hartzekodunari lotutako pertsona edo entitateen kaudimengabeziaren ondorioz narriatutako kredituengatiko galerak, salbu eta epaileak kaudimengabezia deklaratzen duenean.

c) Bezero eta zordunen kaudimengabezia-arriskuaren zenbatespen orokorretan oinarritutako galerak, hurrengo 3. idatz-zatian xedatutakoa salbu.

3.– Aurreko idatz-zatiko c) letran xedatutakoa gorabehera, foru-arau honetako 13. artikuluan aipatutako mikroenpresa eta enpresa txiki edo ertainek zerga-oinarrian honako kenkari hau aplikatu ahal izango dute balizko kaudimengabezien ondoriozko kreditu-narriadurek ekar ditzaketen galerengatik: zergaldiaren amaieran dauden zordunen kontuen zenbatekoaren % 1, gehienez. Kalkulu horretan ez dira kontuan hartuko artikulu honetako 1. zenbakian ezarritakoaren arabera kaudimengabezien ondoriozko kreditu-narriaduragatiko galera eragin duten zordunak, ez eta aurreko zenbakiko a) eta b) letretan xedatutakoaren arabera kengarriak ez diren narriaduragatiko galerak ere.

Idatz-zati honetan ezarritakoarekin bat etorriz kalkulatutako narriaduragatiko galeraren saldoak ezin izango du gainditu aurreko paragrafoan aipatutako muga.

Entitateak mikroenpresa edo enpresa txiki edo ertain izateari utzi dion zergaldian zordunen kaudimengabeziengatik kredituetan gertatutako narriaduren ondoriozko galerak ez dira kengarriak izango zenbaki honetan aipatutako narriaduragatiko galeraren saldoaren zenbatekoraino.

4.– Finantza-entitateei dagokienez, Espainiako Bankuaren araudia erabiliko da, Gipuzkoako Lurralde Historikoko araudian berariaz zehazten dena salbu. Arau bidez ezarri ahal izango dira zordunak, zordun talde bati eragiten dioten inguruabarren arabera, kaudimengabetzat jotzeko baldintzak.

23. artikulua.– Ondare-elementuen balio-narriaduraren ondoriozko galera: balio-galera.

1.– Merkatu arautuan kotizatzen ez duten entitateen kapitaleko partaidetza edo halako merkatu batean kotizatu arren taldeko edo talde anitzeko sozietateen edo sozietate elkartuen (merkataritza legerian zehaztutakoaren arabera) kapitala ordezkatzen duten baloreen narriaduraren ondoriozko galeraren ziozko kenkariaren zenbatekoa ezin da izan ekitaldi hasierako funts propioetako partaidetzaren balioaren eta itxierakoaren arteko diferentzia baino gehiago, ekitaldian egindako ekarpenak eta ekarpen itzulketak.

Aipatutako diferentzia kalkulatzeko ekitaldiaren itxierako balioak hartuko dira aintzat, baldin eta organo eskudunak formulatu edo onetsitako balantzeetan jasotzen badira.

2.– Aurreko zenbakian xedatutakoa gorabehera, aipatutako entitateen kapitaleko partaidetza % 5etik gorakoa bada (edo % 3tik gorakoa, partaidetutako sozietatearen akzioek bigarren mailako merkatu antolatu batean kotizatzen dutenean), kenkariaren zenbatekoa ezin da izan partaidetzak eskuraketa-prezioaren eta partaidetutako entitatearen ondare garbiaren arteko kendura baino gehiago, partaidetzaren proportzioan eta balorazio-egunean dauden isilbidezko gainbalioekin zuzenduta. Balio hori kalkulatzean, eta enpresak partaidetzarik badauka beste batean, kontuan eduki beharko da urteko kontu bateratuetan jasotzen den ondare garbia, Merkataritza Kodean eta garatu duten arauetan ezarritako irizpideak aplikatuta.

Idatz-zati honetan xedatutakoa ez zaie aplikatuko partaidetzaren balio-narriaduragatiko galerei, foru-arau honetako 34. artikuluan xedatutakoa aplikatu zaion zenbatekoaren mugaraino, salbu eta aipatutako manuko 6. idatz-zatian araututako kasuetan, partaidetzaren aurreko eskualdaketa batean, balio-narriaduragatiko galera hori partaidetza eskuratzen den unean dauden isilbidezko gainbalioen balio-galerarekin bat datorrenean.

3.– Egoitza zerga-paradisutzat jotzen diren lurralde edo herrialdeetan daukaten entitateetako partaidetzen narriaduragatiko galerek ez dute kenkaririk sortuko, ondoko kasuetan izan ezik: entitateak bere kontuak partaidetzaren titularra den entitatearen kontuekin bateratzen baditu (Merkataritzako Kodeko 42. artikulua aplikatuta) edo egoitza Europar Batasuneko estatu batean badauka eta zergadunak frogatzen badu eratzeko eta jarduteko arrazoi ekonomiko baliozkoak izan direla eta enpresa jarduerak egiten dituela.

4.– Dibidenduen banaketaren edo entitateen mozkinetako partaidetzaren ondorioz partaidetzaren balio-narriadura dela eta izandako galera ez da kengarria izango, era berean, aipatutako dibidenduei aplikatu ahal bazaie foru-arau honetako 33. artikuluko 1. idatz-zatian xedaturikoa edo foru-arau honetako 60. artikuluko 4. idatz-zatian ezarritako kenkaria, edozein izanda ere balio-narriaduragatiko galera hori agerian jartzen den modua eta zergaldia.

Entitateen dibidenduen banaketaren ondorioz partaidetzaren balio-narriadura dela eta izandako galera foru-arau honetako 33. artikuluko 2. idatz-zatian xedatutakoa aplikatu ahal zaien dibidenduei badagokie, aipatutako balio-narriaduragatiko galeraren % 50 bakarrik izango da kengarria zerga-oinarria zehazterakoan, edozein izanda ere balio-narriaduragatiko galera hori agerian jartzen den modua eta zergaldia.

5.– Aurreko idatz-zatian xedatutakoarekin loturik, balio-narriaduragatik kontabilizatutako galera onargarria izango da baldin eta dibidenduak haien kargura banatzen diren mozkinen zenbatekoagatik benetan ordaindu bada zerga hau, edo Pertsona Fisikoen Errentaren gaineko Zerga, edo Ez-egoiliarren Errentaren gaineko Zerga, aldez aurretik partaidetzarekin egindako edozein eskualdaketatan.

Horren ondorioetarako, balio-narriaduragatiko galera kengarriak ezingo du gainditu honela kalkulatutako zenbatekoa: dibidendua edo mozkinetako partaidetza bider partaidetzaren aurretiazko eskualdaketa horretatik ateratako errentari aplikatutako karga-tasak zergadunari aplikatu ahal zaion karga-tasaren aldean egiten duen ehunekoa.

Aurreko bi paragrafoetan aipatutako benetako zerga-ordainketa partziala denean, balio-narriaduragatiko galera kengarria izango da frogatuta dagoen zerga-ordainketaren proportzioan.

6.– Aurreko idatz-zatian aipatutako kasuetan, eragiketa kontabilizatu behar den moduagatik entitateak ez badu inolako errentarik sartzen zerga-oinarrian eta partaidetzaren balioa kendu behar badu, honela kalkulatutako gastua konputatu ahal izango du: aurreko idatz-zatiko bigarren paragrafoan ezarritako erregela partaidetzaren eskualdaketa dela eta aipatutako zergetarikoren batez kargatu diren mozkinen zenbatekoari aplikatuta ateratzen dena.

7.– Kengarritzat hartuko dira zorra adierazten duten eta merkatu arautuetan kotizatzeko onartuta dauden baloreen narriaduragatik izandako galerak; zergadunak dauzkan eta merkatu horietan kotizatzeko onartuta dauden balore horien multzoak zergaldian izan duen galera osoa izango da muga, balio aldakuntza positiboak eta negatiboak kontuan hartuta.

Ez dira kengarriak izango berreskuraketa-balio zehatza duten baloreen narriatzeak eraginda sortzen diren galerak, baldin eta balore horiek merkatu arautuetan kotizatzeko onartuta badaude edo paradisu fiskaltzat hartzen diren herrialde edo lurraldeetan kokatzen diren merkatu arautuetan kotizatzeko onartuta badaude.

24. artikulua.– Finantza-merkataritzako funtsaren zerga-tratamendua.

1.– Aurreko artikuluko 2. idatz-zatian aipatzen diren partaidetzak eskuratzen direnean, partaidetzaren eskuraketa-prezioaren eta entitate partaidetuak eskuraketa-egunean eduki duen ondare garbiaren arteko diferentzia, eskuratzaileak daukan partaidetzaren arabera, entitatearen ondasun eta eskubideei egotziko zaie. Horretarako Merkataritzako Kodeko 46. artikuluan eta hura garatzeko gainerako arauetan ezartzen den integrazio orokorreko metodoa aplikatuko da. Diferentzia horretatik egotzi ez den zatia, berriz, zerga-oinarritik kendu ahal izango da, baina gehienez ere zenbatekoaren % 12,50 urtean, aplikatzekoa den kontabilitateko araudian ezarritakoa eragotzi gabe.

Zenbateko horretatik kenduko da, artikulu honetan araututako kenkaria zein oinarriren gainean aplikatu behar den zehazteko, partaidetzaren lehengo jabeek lortu dituzten eta foru-arau honetako 34. artikuluan xedatutakoa aplikatu ahal izan zaien errenten zenbatekoa.

Horrela kalkulatutako diferentziaren kenkaria bateragarria izango da, hala badagokio, aurreko artikuluko 2. idatz-zatian aipatutako balio-narriaduragatiko galerekin.

2.– Erosi diren partaidetzei dagokien entitatea, hau da, partaidetua, bere aldetik, beste entitate baten partaidea bada, kontuan hartu beharko dira Merkataritza Kodean eta hura garatzeko arauetan jasotzen diren irizpideak aplikatuz prestatu diren urteko kontu bateratuetatik ateratzen den ondare garbia eta ondasun-eskubideak hartu beharko dira kontuan.

3.– Artikulu honetan xedaturikoa aplikatzeko, beharrezkoa izango da eskuratutako partaidetzetatik sortutako errentak foru-arau honetako 33. eta 34. artikuluetan ezarritako tratamendua jaso ahal izateko modukoak izatea.

4.– Merkatu arautu baten bidez erosi ez diren partaidetzei dagokienez, artikulu honetan xedatutakoa aplikatu beharko da partaidetza erosten duen entitatea ez bada sartzen, pertsona edo entitate eskualdatzaileari dagokionez, Merkataritzako Kodeko 42. artikuluan jasotako kasuetako batean.

Idatz-zati honetan jasotako baldintza ez da pertsona edo entitate eskualdatzaileak partaidetza erosteko ordaindutako prezioari dagokionez aplikatuko, aldi berean Merkataritzako Kodeko 42. artikuluan jasotako kasuetako batean ere sartuta ez dauden pertsona edo entitateei erosi dienean.

5.– Artikulu honetan xedatutakoaren arabera aplikatutako kenkarien zenbatekoa zerga-oinarriari gehituko zaio artikulu honetan aipatzen den diferentziaren ondoriozko narriadurak sortutako galerak edo partaidetzen eskualdaketa gertatzen direnean, eta inoiz ezin izango diote foru-arau honetako 33. eta 34. artikuluetan jasotakoari heldu.

6.– Partaidetzak eskualdatzean foru-arau honetako 36. artikuluan aparteko mozkinak berrinbertitzeko jasotako xedapenetara biltzen diren errentak sortzen badira, artikulu honetan jasotakoaren arabera kendu diren kopuruak ez dira sartuko zerga-oinarrian integratu ez diren errenten barruan.

25. artikulua.– Bizitza baliagarri mugagabea duten zenbait ukiezinen zerga-tratamendua.

1.– Zerga-oinarria kalkulatzean kengarria izango da merkataritza-funtsen ibilgetu ukiezinaren jatorrizko erosketa-prezioa, urteko gehieneko kopurua haren zenbatekoaren % 12,50 dela, baldintza hauek betetzen badira:

a) Ibilgetua kostu bidezko eskuratze baten bitartez agerian jarri izana.

b) Entitate eskuratzailea eta eskualdatzailea ez izatea sozietate-talde bereko kide, Merkataritza Kodeko 42. artikuluan ezartzen diren irizpideen arabera, entitateen egoitza eta urteko kontu bateratuak egiteko betebeharra gorabehera. Entitate biak talde bereko kide badira, kenkaria entitate eskualdatzaileak merkataritza-fondoa eskuratzeko ordaindu duen prezioaren gainean egingo da, lotuta ez dauden pertsonei edo entitateei erosi dienean.

c) Erreserba xedaezin bat zuzkitu izana, merkataritzako legeriak ezartzen duenaren arabera. Erreserba hori zuzkitu ezin bada, orduan, kenkaria erabili ahal izateko, erreserba hori hurrengo ekitaldietako lehenengo mozkinen kargura zuzkitu beharko da.

Aurreko a) eta b) letretan zehazten diren baldintzak betetzen ez badira, merkataritza-fondoaren balioak izan duen narriatzea dela-eta sortzen diren galeren artean kredita daitezkeenak soilik izango dira kengarriak.

2.– Aurreko idatz-zatiko a) eta b) letretan jarritako baldintzak betetzen direnean, bizitza baliagarri mugagabea duen ibilgetu ukiezina kengarria izango da zerga-oinarria zehazteko; urteko gehieneko kopurua horren zenbatekoaren % 12,50 izango da.

Bestela, bizitza baliagarri mugagabea duen ibilgetu ukiezinaren balioak izan duen narriatzea dela-eta sortzen diren galeren artean kredita daitezkeenak soilik izango dira kengarriak.

3.– Artikulu honetan aipatutako zenbatekoen kenkaria aplikatzeko (aurreko bi zenbakietako azken paragrafoetan araututakoa izan ezik), ez da beharrezkoa izango galera eta irabazien kontuan haren kontabilitate egozketa egitea.

4.– Artikulu honetako goiko zenbakietan xedatutakoa dela bide zerga-oinarria zehazterakoan aplikatzen diren kenkariak zerga-oinarriari gehituko zaizkio kenkari horiek aplikatzeko eskubidea sortu duten aktibo ukiezinen narriaduraren edo eskualdaketaren ondorioz haien balioa zuzentzen denean.

5.– Merkataritza-funtsaren edo bizitza baliagarri mugagabea duten beste aktibo ukiezinen eskualdaketan sortutako errentak foru-arau honetako 36. artikuluan xedatutakoaren babesean jartzen badira aparteko mozkinen berrinbertsioa dela eta, honako errenta honek bakarrik izango du zerga-onura hori: eskualdaketa balioaren eta kontabilitateko balioaren arteko kendura, diruaren balio-galeraren araberako zuzenketa egin eta gero.

26. artikulua.– Hornidurak.

1.– Honako gastu hauek ez dira kengarriak izango:

a) Betebehar inplizitu edo isilekoen ondoriozkoak.

b) Langileentzako epe luzerako ordainsariei dagozkienak.

c) Kontratuak betetzeko kostuei dagozkienak, kontratuotatik jasoko bide diren onura ekonomikoak baino handiagoak badira.

d) Berregituraketen ondoriozkoak, legezko edo kontratuzko betebeharrei, eta ez soilik isilekoei, lotutakoak direnean izan ezik.

e) Erosketen itzulketa-arriskuari dagozkionak.

f) Pertsonal-gastuak, langileei ordaintzeko formula gisa era-bili diren ondare tresnetan oinarritutako ordainketak badira, bai dirutan ordaintzen direnak, bai eta tresna horiek emanez gauzatzen direnak ere.

g) Foru-arau honetan ezarritakoaren arabera zerga-oinarria zehazterakoan kengarriak ez diren gastu edo galerei aurre egiteko horniduretarako zuzkidurak.

2.– Ingurumen alorreko jarduketei dagozkien gastuak kengarriak izango dira zergadunak egindako plan bati egokitu eta zerga-administrazioak plan hori onartzen duenean.

3.– Aurreko paragrafo bien arabera zergan kengarriak izan ez diren gastuak hornidura hori bere helbururako erabiltzen den zergaldiko zerga-oinarrian sartuko dira.

4.– Aseguru entitateek egindako hornikuntza teknikoen gastuak kengarriak, baina muga honekin: arau aplikagarrietan ezarritako gutxieneko zenbatekoa. Aurreko mugarekin, zerga-oinarriaren kalkuluan kengarria izango da ekitaldian egonkortze erreserbarako egindako zuzkiduraren zenbatekoa, nahiz eta galeren eta irabazien kontuan sartu ez. Erreserbako diru kopururen bat erabili bada, erabili den zergaldiko zerga-oinarrian integratu behar da.

Primen narriaduraren ziozko zuzenketak eta kobratzeko dauden kuotak ezin dira bateratu, saldo beretarako, zordunen kaudimen-gabezien ondoriozko kreditu narriadurek eragindako galerekin.

5.– Elkarrekiko berme-sozietateek hornidura teknikoak direla-eta galera-irabazien kontuaren kargura egindako gastuak kengarriak izango dira, fondo horrek Elkarrekiko Berme Sozietateen Araubide Juridikoari buruzko martxoaren 11ko 1/1994 Legeko 9. artikuluan zehazten den nahitaezko gutxieneko zenbatekoa erdietsi arte. Derrigorrezko zenbatekoetatik gorako zuzkidurek % 75 kenkaria izango dute.

Ez dira zerga-oinarrian sartuko herri-administrazioek elkarrekiko berme-sozietateei emandako diru-laguntzak, ezta diru-laguntza horietatik eratorritako errentak ere, baldin eta bai batzuk eta bai besteak hornidura teknikoen fondorako erabiltzen badira. Paragrafo honetan ezarritakoa birfidantzamenduko sozietateei ere aplikatuko zaie, Elkarrekiko Berme Sozietateen Araubide Juridikoari buruzko1/1994 Legeko 11. artikuluan ezartzen denaren arabera nahitaez haien helburu soziala osatu behar duten jarduerei dagokienez.

6.– Konponketa- eta berrikusketa-bermeen ondoriozko arriskuei dagozkien gastuak kengarriak izango dira, horniduraren saldoa zehazteko beharrezkoa den zenbateraino. Baina saldo hori ez da izan behar eragiketa baten emaitza baino handiagoa; eragiketa honako hau da: zergaldiaren amaieran berme biziduna duten salmentei portzentaje bat aplikatuko zaie, zergaldian eta aurreko zergaldi bietan dauden bermeei aurre egiteko egindako gastuen eta zergaldiotan egindako bermedun salmenten arteko proportzioa, hain zuzen ere.

Aurreko lerrokadan xedatutakoa salmenten itzulketen ondorioz sortzen diren gainerako gastuen estaldurarako zuzkidurei ere aplikatuko zaie.

Entitate sortu berriak, jarduera berriak hasten dituzten entitateak edo beren jarduerak hiru ekitaldi igaro gabe berriz hasten dituzten entitateak baleude, paragrafo honen lehenengo lerrokadan finkatutako portzentajea izango da entitateak eragiketak egin dituen ekitaldiari edo ekitaldiei egozgarriak zaizkien gastuen eta sarreren artean dagoen proportzioa.

7.– Ez dira kengarriak izango kengarriak ez diren horniduren balioak eguneratzearen ondorioz sortzen diren doikuntzek eragindako finantza gastuak.

27. artikulua.– Gizarte aurreikuspeneko sistemetara egindako ekarpenak.

1.– Kengarriak izango dira azaroaren 29ko 1/2002 Legegintzako Errege Dekretuaren bidez onetsitako Pentsio Plan eta Funtsei buruzko Legearen testu bateginean araututa dauden pentsio planen sustatzaileek egindako ekarpenak eta bazkide babesleek Borondatezko Gizarte Aurreikuspeneko Erakundeen gizarte aurreikuspeneko planetara, Borondatezko Gizarte Aurreikuspeneko Erakundeei buruzko otsailaren 23ko 5/2012 Legean araututa daudenetara, egindako ekarpenak, bai eta enpresen gizarte aurreikuspeneko planetara egindakoak ere.

Ekarpen horiek partaide, aseguratu edo bazkide oso edo arrunt bakoitzari berari dagokion heinean egotziko zaizkio, aparteko kasuetan Pentsio Plan eta Funtsei buruzko Legearen Testu Bategineko 5. artikuluko 3. idatz-zatiko c) letran ezarritakoa aplikatuz pentsio planetara egiten direnak izan ezik.

2.– Era berean, kengarriak izango dira pentsio planen antzeko gertakizunen estaldurarako kontribuzioak, honako beharkizunok betetzen badituzte:

a) Prestazioak lotzen zaizkien pertsonei egotzi behar zaizkie zergen ondoreetarako.

b) Etorkizuneko prestazioak hartzeko eskubidea era ezeztaezinean eskualdatu behar da.

c) Ekarpenetako baliabideen titulartasuna eta kudeaketa eskualdatu behar dira.

3.– Halaber, kengarriak izango dira Laneko pentsio funtsen jarduerak eta ikuskapena arautzen dituen Europako Parlamentuaren eta Kontseiluaren 2003ko ekainaren 3ko 2003/41/EE Zuzentarauan ezarritako enpresa sustatzaileek egindako ekarpenak, baldin eta aurreko idatz-zatiko a), b) eta c) letretan adierazitako betekizunak betetzen badira eta Pentsio Plan eta Funtsei buruzko Legearen Testu Bategineko 8. artikuluko 6. idatz-zatian azaltzen diren gertakizunak estaltzen badira.

28. artikulua.– Agortze-faktorea meatzaritzako jardueretan.

1.– Meatzeei buruzko uztailaren 21eko 22/1973 Legearen babesean honako baliabide hauetako baten aprobetxamendua egiten duten zergadunek zerga-oinarria kalkulatzean kengarritzat jo ditzakete artikulu honetako hurrengo idatz-zatian aipatzen diren jarduerak egiteko agortze-faktore gisa erabiltzen dituzten diru kopuruak. Hona baliabideak:

a) Meatzeei buruzko uztailaren 21eko 22/1973 Legeko 3. artikuluko C atalean eta Meatzeei buruzko Legea aldatzen duen azaroaren 5eko 54/1980 Legeak sortutako D atalean sailkaturikoak.

b) Aipatutako artikuluaren B atalean sailkatutako jatorri ez-naturaleko meaguneetatik lortutako baliabideak, baldin eta berreskuratu edo eraldatutako produktuak C atalean edo Meatzeei buruzko Legea aldatzen duen azaroaren 5eko 54/1980 Legeak sortutako D atalean sailkatuta badaude.

Agortze-faktorea ez da handiagoa izango idatz-zati honetan aipatutako aprobetxamenduei dagokien zerga-oinarri zatiaren % 25 baino.

Hornikuntza Plan Nazionalean lehentasunezkotzat jotako lehengai mineral bat edo batzuk ustiatzen dituzten entitateek, ordea, aukera izango dute agortze-faktorea, baliabide horiei dagokien jardueran, saldutako mineralen balioaren % 12raino irits dadin. Halakotzat hartuko dira enpresek gero tratatu edo eraldatzeko kontsumitzen dituztenak ere. Kasu horretan, agortze-faktorerako zuzkidura ezin izango da izan aipatu aprobetxamenduetatik, eta substantzia horiek eta horiek eratorritako beste batzuk barnean dituzten ekoizkinetatik eta jasotako substantzien tratamendu, eraldaketa, merkaturatze eta salketei dagokien zerga-oinarriaren zatia baino handiagoa izan.

2.– Agortze-faktorea dela eta zerga-oinarritik kentzen diren diru kopuruak jarraian zerrendatuko diren meatzaritzako jarduerekin zuzenean lotutako gastu, lan eta ibilgetuetan bakarrik inbertitu ahal izango dira:

a) Beste meatoki batzuen eta bestelako geologi baliabideen araketa eta ikerketa.

b) Lortutako ekoizkinen errekuperazioa edo kalitatea hobetzeko ikerketak.

c) Zenbaki honetako a), b) eta d) letretan aipatzen diren jarduerak eta Meatzeei buruzko uztailaren 21eko 22/1973 Legeko 3. artikuluko C ataleko eta Meatzeei buruzko Legea aldatzen duen azaroaren 5eko 54/1980 Legeak sortutako D ataleko meaguneak eta gainerako baliabide geologikoak ustiatzeko jarduerak soilik egiten dituzten enpresen kapital soziala adierazten duten baloreak harpidetu edo eskuratzea, mineral erradiaktiboei, baliabide geotermikoei, harri bituminosoei eta atal horretan sar daitezkeen interes energetikoko beste meagune edo baliabide geologiko guztiei dagokienez, baldin eta, bi kasuetan, baloreek hamar urte jarraian irauten badute entitatearen ondarean.

Zergadunari akzio edo partaidetzak saldu zizkioten enpresek, horiek harpidetu ondoren, aipatutakoez besteko jarduerak burutzen badituzte, zergadunak artikulu honetako 4. idatz-zatian aipatzen den likidazioa egin beharko du edo, bestela, harpidetza horren zenbatekoa berrinbertitu, beharkizunak betetzen dituzten beste inbertsio batzuetan. Berrinbertsio berria c) letra honetan aipatutako baloreetan eginez gero, hamar urteko epealdia amaitzeko falta den aldia iraun beharko dute balore horiek.

d) Ustiapena burutzen ari den meatokiaren gordelekuari buruzko ezaguera hobea lortzeko ikerketa.

e) Enpresako meatzaritzako jardueretan ezarri ahal diren ikerketa-laborategiak eta ekipoak.

f) Erauzketaren industrien hondakinak kudeatzeari buruzkoa, eta meatzeetako jarduerek ukitutako lekuak babestu eta leheneratzeari buruzko ekainaren 12ko 975/2009 Errege Dekretuan ezarritako eraberritze-planetan sartzen diren jarduerak.

3.– Zergaldi bakoitzean zerga-oinarria zehazterakoan agortze-faktore gisa kentzen den zenbatekoa hamar urteko epealdian inbertitu beharko da, zergaldia amaitzen denetik hasita. Inbertsio hori burututzat joko da aurreko idatz-zatian aipatutako gastuak edo lanak egindakoan edo ibilgetua jasotakoan.

Horretaz gainera, zergaldi bakoitzean entitatearen erreserben kontuei gehitu beharko zaie agortze-faktore gisa zerga-oinarria kalkulatzean kendutako zenbatekoa. Erreserba horiek askatasunez baliatu ahal izango dira inbertsioak amortizatzen diren neurrian soilik, edo, bestela, funts horiekin finantzatutako akzio edo partaidetzak harpidetu zirenetik hamar urte pasatutakoan.

Agortze-faktorea gauzatzen duten inbertsioei ez zaizkie aplikatuko foru-arau honetako V. tituluko III. kapituluan araututako kenkariak.

Zergadunek artikulu honetan xedatutakoaren aplikazioari buruzko inguruabar guztiak azaldu beharko dituzte memorian.

4.– Hamar urteko epealdia pasatzen bada inbertitu beharreko zenbatekoa inbertitu gabe, edo epealdi horren barruan modu desegokian inbertitzen bada, zenbateko bera sartuko da zerga-oinarrian aldi horren amaieran bukatuta dagoen zergaldian edo inbertsio desegokia egin den zergaldian, eta berandutze-korrituak gehituko zaizkio kuotari.

Modu berean jokatuko da entitatea likidatzen den kasuetan, agortze-faktoretik aplikatu gabe dagoen zenbatekoari dagokionez, bai eta mea ustiategi osoa edo zati bat lagatzen edo besterentzen denean eta bat-egitea, zatiketa, aktiboaren eta pasiboaren lagapen orokorra edo jarduera-adarraren ekarpena egiten den kasuetan ere, salbu eta ondoriozko entitateak, meatzaritzako jarduera egiten jarraitzen duenak, bere gain hartzen badu entitate eskualdatzaileak izandako onura sendotzeko betekizunak bete beharra, lehengo entitateak zituen baldintza berberekin.

29. artikulua.– Agortze-faktorea hidrokarburo guneak arakatu, ikertu eta ustiatzeko jardueretan.

1.– Zerga-oinarria kalkulatzean kengarritzat jo daitezke artikulu honetako hurrengo idatz-zatian aipatzen diren jarduerak egiteko agortze-faktore gisa erabiltzen diren diru kopuruak, hori egiten duen zergadunak xede sozial bakarra badu Estatuaren lurraldean eta jurisdikzio-uretako nahiz Espainiako Erresumaren subiranotasunpeko itsas hondopeetan, Hidrokarburoen Sektoreari buruzko urriaren 7ko 34/1998 Legean ezarritako moduan, hidrokarburo naturalen (likidoak edo gaseosoak) hobiak eta lurpeko guneak arakatu, ikertu eta ustiatzea, eta, jarduera horien osagarri gisa, ateratako produktuak garraiatu, biltegiratu, araztu eta saltzea.

Zerga-oinarria kalkulatzean agortze-faktorea dela eta aplikatzen den kenkaria hurrengo bietako edozein izan daiteke, entitateak aukeratzen duena:

a) Hidrokarburoen salmentaren kontraprestazioaren eta gordetzeko zerbitzuen prestazioaren zenbatekoaren 100eko 25, murrizketa horren aurretiazko zerga-oinarriaren 100eko 50eko mugarekin.

b) Murrizketa honen aurretiazko zerga-oinarriaren zenbatekoaren 100eko 40.

2.– Zerga-oinarria zehaztean agortze-faktorea dela eta kentzen diren zenbatekoak sozietatearen xedeko jardueretan bakarrik inbertitu ahal izango dira, bai eta eremuak bertan behera uzteko eta itsas plataformak eraisteko jardueretan ere, hamar urteko epean, zerga-oinarria zehazterakoan agortze-faktorea dela eta diru kopurua kentzen den zergaldia amaitzen denetik hasita. Are, kenkaria aplikatzen den lehenengo zergaldiaren aurreko lau urteetan egindako arakatze, ikerketa eta ustiapen jardueretan inbertitutzat ere jo ahal izango dira.

Ondore horietarako, araketa edo ikerketa aurretiazko azterlan geologiko, geofisiko edo sismikoak izango dira, baita arakatu edo ikertzeko baimenaren eremuan egindako gastu guztiak ere, hala nola, araketa sundatzeak, eta ebaluazio eta garapen gastuak, negatiboak badira, lurretara heldu eta lurrak prestatzeko obren gastuak, eta sundatze horiek kokapenenak. Emakida batean egin eta, emandako ustiapenaren sorburua daukanaz bestelako egitura bat, hidrokarburoak eduki edo gordetzeko gai dena, kokatu eta zulatzeko lanak hartzen dituztenak ere araketa eta ikerketa gastutzat joko dira. Eremuak bertan behera uztea eta itsas plataformak eraistea lehorreko edo itsasoko ekoizpen instalazioak desegiteko lanak direla ulertuko da. Lan horien bitartez libre eta garbi uzten da instalazio horiek okupatzen zuten lurzorua edo itsas eremua, emakidan zehaztutako moduan.

Ondore horietarako, ustiapeneko inbertsioak ustiapen baten emakidaren eremuan egindakoak izango dira, hala nola, putzuen diseinu, zulaketa eta eraikuntza, ustiapeneko instalazioak, eta ustiapen lanak egin ahal izateko beharrezkoa den bestelako edozein inbertsio, ageriko edo ez-agerikoa, betiere emakidadunak arestian esandako araketa eta ikerketa jardueretan egindako inbertsioak ez badira.

Ondore horietarako, positibo ateratzen diren ebaluazio eta garapeneko sundatzeak ustiapen gisa sartuko dira.

3.– Zergaldi bakoitzean entitatearen erreserba kontuei gehitu beharko zaie zerga-oinarria zehazterakoan agortze-faktorea dela eta kentzen den zenbatekoa, eta erreserba horiek askatasunez baliatu ahal izango dira funts horiekin finantzatutako ondasunak amortizatzen joaten diren neurrian, ez lehenago.

Agortze-faktorea gauzatzen duten inbertsioei ez zaizkie aplikatuko foru-arau honetako V. tituluko III. kapituluan araututako kenkariak.

Zergadunek artikulu honetan xedatutakoaren aplikazioari buruzko inguruabar guztiak azaldu beharko dituzte memorian.

4.– Hamar urteko epealdia pasatzen bada inbertitu beharreko zenbatekoa inbertitu gabe, edo epealdi horren barruan modu desegokian inbertitzen bada, zenbateko bera sartuko da zerga-oinarrian aldi horren amaieran bukatuta dagoen zergaldian edo inbertsio desegokia egin den zergaldian, eta berandutze-korrituak gehituko zaizkio kuotari.

Modu berean jokatuko da entitatea likidatzen den edo haren xede soziala aldatzen den kasuetan, agortze-faktoretik aplikatu gabe dagoen zenbatekoari dagokionez, bai eta lagapen edo besterentze osoa nahiz partziala, bat-egitea, eraldaketa, zatiketa, aktiboaren edo pasiboaren lagapen orokorra edo jarduera-adarren ekarpena egiten den kasuetan ere, salbu eta ondoriozko entitateak, jarduera egiten jarraitzen duenak, xede sozial bakartzat badu artikulu honetako 1. idatz-zatian ezarritakoa eta bere gain hartzen badu entitate eskualdatzaileak izandako onura sendotzeko betekizunak bete beharra, lehengo entitateak zituen baldintza berberekin.

30. artikulua.– Aurrezki kutxen ongintza eta gizarte ekintza.

1.– Aurrezki kutxek, zerga-oinarria zehazterakoan, euren emaitzen zati bat kendu ahal izango dute, ongintza eta gizarte ekintza finantzatzeko erabiltzen duten zenbatekoa, hain zuzen ere, euren arauekin bat etorriz.

2.– Aurrezki kutxen ongintzarako eta gizarte ekintzarako obrari esleitutako kopuruak, gutxienez, 100eko 25ean, esleipena zein ekitaldiri dagokion, horretantxe, edo ondorengoan, inbertsio lotuak egiteko, edo horri heldutako entitate eta establezimenduen euspen gastuak ordaintzeko ezarriko dira.

3.– Aurreko idatz-zatian adierazitako epealdian erabili beharreko zenbatekoak erabili gabe, edo epealdi horren barruan modu desegokian erabiltzen badira, zenbateko bera sartuko da zerga-oinarrian epealdi horren amaieran bukatuta dagoen zergaldian edo xedapen desegokia egin den zergaldian, eta berandutze-korrituak gehituko zaizkio kalkulatutako kuotari.

Entitatea likidatzen denean gauza bera egingo da ongintza eta gizarte ekintzarako esleitutako diru kopuruetatik erabili gabe dagoen zenbatekoari dagokionez, baita bat-egitea, zatiketa edo aktiboaren eta pasiboaren lagapen orokorra egiten denean ere, salbu eta horrela sortzen den aurrezki kutxak bere gain hartzen duenean entitate eskualdatzaileak izandako onura sendotzeko betekizunak bete beharra, lehengo entitateak zituen baldintza berberetan.

4.– Finantza-jarduera zeharka egiten denean, aurrezki kutxen gobernu organoei eta haien araubide juridikoaren beste alderdi batzuei buruzko uztailaren 9ko 11/2010 Errege Lege Dekretuan finantza-jarduera banku entitate baten bitartez zeharka egiteari buruz ezarritakoaren babesean diharduten aurrezki kutxek gizarte ekintzarako jartzen duten diru kopuruak bankuaren zerga-oinarria murriztu dezake, baterakuntza araubidea aplikatu gabe, edo babeseko entitate sistemako entitate nagusiarena, eta murriztu ere jasotako dibidenduek guztizko sarreretan duten proportzio berean, artikulu honetako goiko idatz-zatietan ezarritakoarekin bat etorriz (murrizketaren gehieneko zenbatekoa dibidenduena izango da).

Horretarako, aurrezki kutxak murrizketaren zenbatekoa jakinarazi behar dio dibidenduak ordaindu dizkion bankuari edo entitate nagusiari. Gainera, murrizketaren zenbatekoari artikulu honetako goiko idatz-zatietan xedatutakoa aplikatu nahi ez badio, horren berri ere eman behar dio. Hala ere, aurrezki kutxak aurreikusitako kopuruak jarri beharko ditu ongintzarako eta gizarte ekintzarako artikulu honetan ezarritako baldintzekin; baldintzaren bat bete ezean, bankuari edo entitate nagusiari jakinarazi beharko dio, kendutako kopuruak erregulariza ditzan, foru-arau honetako 127. artikuluko 2. idatz-zatian ezarri den bezala.

5.– Aurrezki kutxek ez dituzte euren zerga-oinarrian sartuko ongintza eta gizarte ekintza mantentzeko gastuak, nahiz eta horietara zuzendutako diru kopurua baino handiagoak izan, etorkizuneko esleipenen aplikaziotzat jotzea eragotzi gabe.

31. artikulua.– Gastu kenezinak.

1.– Ez dira zergetatik ken litezkeen gastutzat hartuko honako hauek:

a) Norbere fondoen ordainketa direnak.

b) Sozietateen gaineko Zerga kontabilizatzeak eratorriak. Ez dira sarreratzat hartuko kontabilizazio horretatik datozenak.

c) Isunak, zigor- eta administrazio-zehapenak, betearazpen aldiko errekarguak eta aurretiazko errekerimendurik gabe epez kanpo aurkeztutako aitorpenengatiko errekarguak.

d) Jokoko galerak.

e) Dohaintzak eta eskuzabaltasunak.

Honako gastu hauek ez dira letra honetan sartuko: bezero edo hornitzaileekiko harreman publikoengatiko gastuak, ezta usadio eta ohituren arabera enpresako langileei dagokienez egiten direnak ere, ezta, zuzenean edo zeharbidetik, ondasunen salmenta eta zerbitzuen prestazioa sustatzekoak ere, ezta sarrerekin zerikusirik dutenak ere. Horrek ez du eragotziko hurrengo zenbakian, 2.ean, xedatzen dena.

f) Azaroaren 29ko 1/2002 Legegintzako Errege Dekretuaren bidez onetsitako Pentsio Funts eta Planei buruzko Legearen testu bateginak eta borondatezko gizarte aurreikuspeneko entitateen zerga-araubideari buruzko foru-arauek jasotako kontingentzien bezalakoak edo antzekoak estaltzeko horniduretarako edo barne funtsetarako zuzkidurak.

g) Arau bidez zerga-paradisutzat jotako herrialde edo lurraldeetan egoitza duten pertsona edo entitateekin zuzenean edo zeharka burututako eragiketei dagozkien zerbitzuen gastuak, edo haietan egoitza duten pertsona edo entitateen bitartez ordaintzen diren gastuak, salbu zergadunak frogatzen badu gastua benetan burututako eragiketa edo transakzio bati dagokiola.

Entitate ez-egoiliarrek lortutako zenbait errenta positibo zerga-oinarrian sartzeko araubidea, foru-arau honetako 48. artikuluan ezarritakoa, ez zaie aplikatuko aurreko paragrafoan xedatutakoaren arabera zerga-kenkaririk ez duten gastuekin lotutako errentei.

h) 2012ko urriaren 29ko 7/2012 Legearen 7. artikuluan eskudiruzko ordainketez xedatzen dena hausten duten eragiketetatik eratorritako gastuak. Lege horrek aurrekontuen araudia aldatu eta finantza-araudia egokitzen du, iruzurraren kontrako prebentzio-ekintzak eta iruzurraren kontra borrokatzeko ekintzak areagotzearren.

i) Eroskeria.

2.– Aurreko ataleko e) letraren bigarren paragrafoan aipatzen diren gastuak kengarri izango dira, diru-sarrerekin loturik dauden kasuan, honako zenbateko eta baldintza hauen arabera:

a) Harreman publikoak direla eta jatetxe, ostatu, bidaia eta joan-etorrietan egiten diren gastuen % 50. Gehieneko muga, kontzeptu guztiak batera hartuta, zergadunaren eragiketen bolumenaren % 5 izango da, Euskal Autonomia Erkidegoarekiko Ekonomia Itunean definitzen den bezala.

b) Opariak eta bestelako esku-erakutsiak, baldin eta hartzaile bakoitzari dagokionaren prezioa ez bada (zergaldi bakoitzeko) 300 euro baino gehiago, eta hartzailearen nortasuna agiriren batean jasota geratzen bada. Baldin eta aipaturiko gastuak goian zehazturiko zenbatekoa baino gehiago badira, zenbateko horretaraino soilik izango dira kengarri.

3.– Honako erregela hauek aplikatuko dira automobilak eta horien atoiak, ziklomotorrak eta motozikletak erabiltzetik sortzen diren gastuei dagokienez:

a) Horiek erosi, errentatu, konpondu, mantendu eta balioa galtzearekin zerikusia duten gastuen eta horien erabilerari lotutako beste edozein gasturen % 50 kendu ahal izango da, gehienezko muga hauekin ibilgailu eta urte bakoitzeko:

a’) Subjektu pasiboak erabilitako amortizazio ehunekoa bider 25.000 euro eginda ateratzen den zenbatekoaren % 50aren edo 2.500 euroren artean txikiena den kopurua, errentamendua, lagapena edo balio galera dela eta.

Ibilgailu bat eskualdatzean edo aktibotik baja ematean, horretatik eratorritako errenta kalkulatzeko, ibilgailuaren erosketa prezioa edo produkzio-kostua aintzat hartuko da, behin aurreko paragrafoan jasotakoaren arabera kendutako amortizazioak gutxituta; gainera, erregela hauek aplikatuko dira:

– Galera bat agerian jartzen bada, hura kengarria izango da, muga hau ezarrita: 25.000 euroren % 50etik a’ letra honek lehen paragrafoan jasotakoaren arabera ibilgailua eduki den denboran kendutako kopuruak gutxituta ateratzen den zenbatekoa. Kalkulu horretatik lortutako zenbatekoa ehuneko ehunean izango da kengarria.

– Irabaziak lortzen badira, foru-arau honetako 40. artikuluaren 9. idatz-zatian jasotako moneta-zuzenketa kalkulatzeko, kontuan hartuko dira ibilgailuaren erosketa-prezioa edo produkzio-kostua, gehienez 25.000 euroren % 50eraino, bai eta a’ letra honetako lehenengo paragrafoan xedatutakoari jarraiki kendutako amortizazioak ere. Kalkulu horretatik lortutako zenbatekoa ehuneko ehunean izango da kengarria, nahiz eta ezingo den izan eskualdaketarengatik lortutako errenta positiboa baino handiagoa.

b’) Ibilgailuaren erabilerarekin zerikusia duten gainerako kontzeptuengatik, 3.000 euro.

b) Modu sinesgarrian frogatzen denean ibilgailua jarduera ekonomiko bat egiteko baino ez dela erabiltzen, erabilera horretatik eratorritako gastuak kengarriak izango dira, gehienezko muga hauekin ibilgailu eta urte bakoitzeko:

a’) Zergadunak erabilitako amortizazio ehunekoa bider 25.000 euro eginda ateratzen den zenbatekoaren edo 5.000 euroren artean txikiena den kopurua, errentamendua, lagapena edo balio galera dela eta.

Jarduera ekonomikoari bakarrik atxikitako ibilgailu bat eskualdatzean edo aktibotik baja ematean, horretatik eratorritako irabazia edo galera kalkulatzeko, ibilgailuaren erosketa-prezioa edo produkzio-kostua aintzat hartuko da, behin aurreko paragrafoan jasotakoaren arabera kendutako amortizazioak gutxituta; gainera, erregela hauek aplikatuko dira:

– Galera bat agerian jartzen bada, hura kengarria izango da, muga hau ezarrita: 25.000 eurotik a’ letra honetako lehenengo paragrafoan jasotakoaren arabera ibilgailua eduki den denboran kendutako kopuruak gutxituta ateratzen den zenbatekoa.

– Irabaziak lortzen badira, foru-arau honetako 40. artikuluaren 9. idatz-zatian jasotako monetazuzenketa kalkulatzeko, kontuan hartuko dira erosketa-prezioa edo produkzio-kostua, gehienez 25.000 euroraino, eta a’ letra honetako lehenengo paragrafoari jarraituz kendutako amortizazioak. Horrela kalkulatutako moneta-zuzenketaren zenbatekoa ezingo da izan eskualdaketarengatik lortutako errenta positiboa baino handiagoa.

b’) Ibilgailuaren erabilerarekin zerikusia duten gainerako kontzeptuengatik, 6.000 euro.

Halaber, b) letra honetan xedatutakoa aplikagarri izango da, baldin eta Zergaren autolikidazioa aurkeztu aurretik garraio-elementua erabiltzen duen pertsonari gauzazko ordainsari gisa dagozkion kopuruak egotzi badira, Pertsona Fisikoen Errentaren gaineko Zergaren Foru Arauko 60. artikuluan jasotako arauei jarraiki.

c) Kengarri izango dira ordezkariek edo merkataritza-agenteek joan-etorri profesionaletan darabiltzaten ibilgailuekin zerikusia duten gastuak, alegia, halakoak erostea, alokatzea, konpontzea, mantentze-lanak egitea, haien depreziazio, galera, moneta-zuzenketa eta haiek erabiltzearekin lotutako beste edozein gastu, 3. zenbaki honetako b.a’) letrako mugarekin.

Edonola ere, foru-arau honetako 42. artikuluan adierazten den bezala lotutako pertsona batek erabiltzen baditu ibilgailuak, 3. zenbaki honetako a) letran ezarritakoa aplikatuko da.

d) Aurreko a), b) eta c) letretan aipatutako ibilgailuetako bat baino gehiago erabiltzen baditu batera pertsona berak, adierazitako mugak pertsona eta urte bakoitzeko aplikatuko dira, alde batera utzita zenbat ibilgailu erabiltzen dituen.

Ibilgailua ez bada erabili urte osoan, letra horietan aipatzen diren kenkariak egiteko gehienezko mugak ibilgailu hori erabili den denboraren proportzioan kalkulatuko dira.

e) Kengarri izango dira ondoren jasotzen diren ibilgailuen erosketarekin, alokairuarekin, konponketarekin, mantentze-lanekin, depreziazioarekin eta erabilerarekin lotutako beste edozerekin zerikusirik duten gastuak:

a') Salgaien garraioan erabilitako ibilgailu mistoak.

b’) Bidaiariak kontraprestazio bat ordainduta garraiatzeko zerbitzuetan erabiltzen direnak.

c’) Fabrikatzaileek probak, saioak, erakusketak edo salmenten sustapena egiteko erabilitakoak.

d’) Gidariei edo pilotuei kontraprestazio bat ordainduta irakasteko zerbitzuetan erabilitakoak.

e’) Zaintza-zerbitzuetan erabilitakoak.

f’) Eskuarki ibilgailuak alokatzen jarduten duten entitateek kontraprestazio bidezko alokairu-jarduera horretan soil-soilik erabiltzen dituztenak.

3. idatz-zati honetan xedatutakoaren ondorioetarako, turismoko ibilgailu, atoi, ziklomotor eta motozikletatzat hartuko dira martxoaren 2ko 339/1990 Errege Dekretu Legegileak, Trafikoari, Ibilgailu Motordunen Zirkulazioari eta Bide Segurtasunari buruzko Legearen testu artikulatua onartzen duenak, I. eranskinean halakotzat definitzen dituenak, eranskin horretan ibilgailu misto gisa definitutakoak eta, nolanahi ere, lur orotariko ibilgailuak edo «jeep» motakoak.

3 bis.– Ez dira kengarri izango itsasontziekin, laketontziekin zein itsas kiroletarako ontziekin edo aireontziekin zerikusia duten gastuak; alegia, halakoak erostea, alokatzea, konpontzea, mantentze-lanak egitea, haien depreziazioa eta haiek erabiltzearekin zerikusia duen beste edozein gastu.

Modu sinesgarrian frogatzen bada elementu horiek jarduera ekonomiko bati bakarrik atxikirik daudela, aurreko paragrafoan aipatzen diren gastuak kengarri izango dira, gehienezko muga honetaraino: paragrafo honetan aipatzen diren elementuetatik eratorritako gastuak murriztu aurretiko eta zerga-oinarri negatiboen, baldin badaude, konpentsazioaren aurretiko zerga-oinarriaren zenbatekoa.

Baina ez da muga hori aplikatuko subjektu pasiboak frogatzen badu badituela behar beste baliabide material eta giza baliabide jarduera ekonomiko hau egiteko: aipatutako garraiobideak etenik gabe ustiatzea.

4.– Kengarriak izango dira dohaintza gisa ordaindutako kopuruak eta emandako ondasunen kontabilitate-balioa, kirol federazioen eta kirol kluben xedeak lortzeko erabil badaitezke, kirol jarduera ez-profesionalen sustapen eta garapenerako kirol sozietate anonimoek emandako diru kopuruei dagokienez, betiere entitate horien artean aipatutako kirol federazio eta kluben helburua lortzeko beharrezkoa den kontratu bidezko eta kostu bidezko lokarria badago.

5.– Aurreko 1. idatz-zatiko a) letran xedatutakoa gorabehera, partaidetza-mailegu baten ondorioz sortzen diren korrituak, finkoak zein aldakorrak, foru-arau honetako 47. artikuluan xedatutakoa aplikatu behar zaienak izan ezik, kengarriak izango dira, baldin eta mailegu horrek betekizun eta baldintza hauek betetzen baditu:

a) Entitate mailegu-emaileak korritu aldakorra jasotzea, enpresa mailegu-hartzailearen jardueraren bilakaeraren arabera zehazten dena.

Bilakaera hori zehazteko irizpide hauek erabili ahal izango dira: mozkin garbia, negozio bolumena, ondare osoa edo kontratuko alderdiek askatasunez adosten duten beste edozein.

b) Kontratuko alderdiek adostu ahal izango dute korritu finkoa jartzea, jardueraren bilakaerarekin zerikusirik ez duena.

c) Kontratuko alderdiek amortizazio aurreratua zigortzeko klausula adostu ahal izango dute.

Aurreikusita eduki beharko da, mailegu-hartzaileak garaiz aurretik amortizatzen badu partaidetza-mailegua, amortizazio hori konpentsatu egingo dela haren funts propioak beste hainbeste handituz eta hori ez dela aktiboen eguneratzetik aterako.

32. artikulua.– Gastuei buruzko arau bereziak.

1.– Foru-arau honetako 14. artikuluan aipatzen diren ondare-sozietateek ezingo dute inongo gasturik kengarritzat jo, nahiz eta euren galera eta irabazien kontuan edo erreserben kontu batean kontabilizatuta eduki, eta ezingo dute aplikatu kapitulu honetako gainerako artikuluetan xedatutakoa. Euren zerga-oinarria zehazteko kontuan hartuko dituzte, bakar-bakarrik, lortzen dituzten sarrera osoak, titulu honetako III., IV. eta VI. kapituluetan xedatutakoa aplikatuz zuzenduta.

2.– Aurreko idatz-zatian aipatutako entitatearen sarreren artean etxebizitzetatik lortu diren kapital higiezinaren etekinak, Pertsona Fisikoen Errentaren gaineko Zergari buruzko Foru Arauko 32. artikuluko 1. idatz-zatian aipatzen direnak, baldin badaude, ondare-sozietateek manu horretan xedatutakoa aplikatu ahal izango dute errenta horiei dagokienez.

Halaber, entitatearen sarreren artean baldin badaude beste ondasun higiezin batzuk lagata edo haien gaineko erabilera eta gozamen eskubideak eratuta lortutako etekinak, kengarritzat jo ahal izango dira higiezin bakoitzetik ateratako sarrera osoen % 30, eta etekinak sortu dituzten ondasunak, eskubideak edo erabili eta lupertzeko ahalmenak eskuratzeko, birgaitzeko edo hobetzeko inbertitu diren inoren kapitalen korrituen eta gainerako finantzaketa gastuen zenbatekoa. Ken daitezkeen bi zenbateko horien baturak ezin du, higiezin bakoitzeko, etekin garbi negatiboa sortu.

Entitatearen sarreren artean Pertsona Fisikoen Errentaren gaineko Zergari buruzko Foru Arauko 34. artikuluko a) eta b) letretan aipatzen diren dibidenduak eta mozkinetako partaidetzak badaude, ondare-sozietateek foru-arau horren 9. artikuluko 24. zenbakian xedatutakoa aplikatu ahal izango dute errenta horiekiko.

Hala ere, ondare-sozietateek Pertsona Fisikoen Errentaren gaineko Zergari buruzko Foru Arauko 66. artikuluan xedatutakoa aplikatu ahal izango dute.

3.– Salbuespen partziala duten sozietateek, foru-arau honetako 12. artikuluko 2. zenbakian aipatutakoek, ezin izango dituzte kenkari fiskala duten gastutzat jo, foru-arau honetako 31. artikuluan azaldutakoez gainera, honako hauek:

a) Foru-arau honetako 38. artikuluan aipatutako errenta salbuetsiei soilik egotzi ahal zaizkien gastuak.

Salbuetsi gabeko errentei neurri batean egozteko modukoak diren gastuak kengarriak izango dira, salbuetsi gabeko ustiapen ekonomikoen ekitaldian lortutako eragiketa bolumenak entitatearen guztizko eragiketa bolumenaren aldean egiten duen ehunekoan.

b) Oro har emaitzak aplikatzearen ziozko zenbatekoak, eta, zehazki, foru-arau honetako 38. artikuluko 1. idatz-zatiko a) letran aipatzen diren jarduera salbuetsiak mantentzeko bideratzen direnak aplikatzearen ziozkoak.

4.– Foru-arau honetako 13. artikuluko 1. idatz-zatian aipatutako mikroenpresek euren zerga-oinarritik kengarritzat jo ahal izango dute euren zerga-oinarri positiboaren % 20, zenbaki honetan ezarritakoa aplikatu baino lehen, euren tamainari datxezkion zailtasunen zerga-konpentsazio gisa.

Zenbaki honetan xedatutakoa aplikatzea bateraezina izango da titulu honetako V. kapituluan ezarritako zuzenketak egitearekin.

III. KAPITULUA

ZUZENKETAK SARREREN ATALEAN

33. artikulua.– Dibidenduen eta mozkin-partaidetzen gaineko zergapetze bikoitza ezabatzea.

1.– Ez dira zergadunaren zerga-oinarrian sartuko dibidenduak edo mozkin-partaidetzak, honako baldintza hauek betetzen badira:

a) Dibidendua banatzen duen entitatearen kapitalean edo funts propioetan zuzeneko edo zeharkako partaidetza gutxienez % 5 izatea, edo % 3, partaidetutako sozietatearen akzioek bigarren mailako merkatu antolatuan kotizatzen badute; eta partaidetza hori edukitzea banaturiko etekina eska daitekeen eguna baino urtebete lehenagotik jarraian, edo, bestela, epe hori betetzeko behar beste denbora edukitzea geroago.

Epe hori kalkulatzeko, honako epealdi hau ere kontuan hartuko da: Merkataritzako Kodeko 42. artikuluan aipatzen den baterakuntza talde bereko beste entitate batek partaidetza etenik gabe izan duen epealdia.

b) Partaidetutako entitatea Sozietateen gaineko Zergaren edo zerga hori bezalako edo horren antzeko beste zergaren baten kargapean eta hartatik salbuetsi gabe egotea banatzen diren edo parte hartzen den mozkinak lortu diren ekitaldian.

Ondorio horietarako, partaidetutako entitate ez-egoiliarren kasuan, atzerriko zerga hauek hartuko dira kontuan: zati batean bederen, partaidetutako entitateak lortutako errentaren zergapetzea helburu duten atzerriko zergak, zergaren xedea errenta bera, sarrerak edo errentaren beste edozein elementu indiziario izan edo ez.

Subjektu pasiboa partaide den entitatearen egoitza Espainiako erresumak nazioarteko zergapetze bikoitza saihesteko hitzarmena sinatua duen herrialde batean badago eta hitzarmena aplikatzen bada eta elkarri informazioa eman beharra ezartzen duen klausula badu, zerga hau bezalako edo beronen antzeko zerga baten kargapean eta hartatik salbuetsi gabe dagoela pentsatuko da.

Artikulu honetan xedatutakoa ez zaie aplikatuko egoitza zerga-paradisutzat jotzen den herrialde edo lurralde batean duten entitateei, kasu honetan izan ezik: egoitza Europar Batasuneko estatu batean edukitzea eta zergadunak frogatzea eratzeko eta jarduteko arrazoi ekonomiko baliozkoak izan dituela eta enpresa jarduerak egiten dituela.

c) Banatzen diren edo parte hartzen den mozkinak enpresa jardueretatik etortzea. Horretarako ezinbestekoa izango da dibidendua banatzen duen entitateak ekitaldian lortutako sarreren % 85, gutxienez, horrelako errenta motak izatea; ez dira errenta horietan inola ere sartuko foru-arau honetako 48. artikuluan, entitate ez-egoiliarren errenta positibo batzuk zerga-oinarrian sartzeari dagokionez, aipatzen diren errenta motak.

Aurreko lerroaldean xedatutakoa gorabehera, dibidendua banatzen duen entitatea Espainiako lurraldeko egoiliarra denean, enpresa jardueretatik datozen errentatzat joko dira foru-arau honetako 48. artikuluko 2. idatz-zatian xedatutakoaren arabera baztertuta daudenak, hots, talde bateko entitateen artean egindako eragiketetan sortzen direnak, Merkataritzako Kodeko 42. artikuluan xedatutakoa aplikatuta.

Letra honetan aipatutako sarrerak zenbatzeko, kontuan hartuko dira beste entitate batzuetako dibidenduak edo mozkinetako partaidetzak, zergadunak zeharkako partaidetza badu entitate horietan, a) letran ehunekoari eta antzinatasunari buruz azaltzen diren baldintzak betetzen dituena, aipatutako mozkin eta entitate horiek, gainera, idatz-zati honetako gainerako letretan xedaturikoa betetzen dutenean; eta entitate horietako partaidetza eskualdatuz lortutako errentak ere zenbatuko dira, foru-arau honetako 34. artikuluan ezarritako baldintzak betetzen direnean.

Bereziki, letra honetan xedatutakoari dagokionez, artikulu honetan xedatutakoa aplikatzeko baldintzak betetzen dituzten enpresa jardueretatik sortutako etekintzat hartuko dira, bakar-bakarrik, atzerrian honako jarduera hauetatik ateratako errentak, horietako bakoitzerako ezarritako baldintzak betetzen dituztenean:

– Handizkako merkataritza, ondasunen eskuratzaileak subjektu pasiboa partaide duen entitatea egoiliar den herrialdean edo lurraldean daudenean, edo Espainia ez beste herrialde edo lurralde batean, baldin eta eragiketak entitate haren langile eta baliabide materialak erabiliz egiten badira.

– Zerbitzuak, subjektu pasiboa partaide duen entitatea egoiliar den herrialdean edo lurraldean egiten direnean, edo Espainia ez beste herrialde edo lurralde batean, baldin eta eragiketak entitate haren langile eta baliabide materialak erabiliz egiten badira.

– Kreditu eta finantza eragiketak, maileguak eta kredituak jasotzen dituzten pertsonak subjektu pasiboa partaide duen entitatea egoiliar den herrialdean edo lurraldean bizi direnean, edo Espainia ez beste herrialde edo lurralde batean, baldin eta eragiketak entitate haren langile eta baliabide materialak erabiliz egiten badira.

– Aseguruak eta berraseguruak, aseguratzen diren arriskuak subjektu pasiboa partaide duen entitatea egoiliar den herrialdean edo lurraldean daudenean, edo Espainia ez beste herrialde edo lurralde batean, baldin eta eragiketak entitate haren langile eta baliabide materialak erabiliz egiten badira.

2.– Artikulu honetako aurreko idatz-zatian ezarritako baldintzak betetzen ez direnean eta Espainiako lurraldean egoitza duten entitateetatik dibidenduak edo mozkinetako partaidetzak jasotzen direnean, horien zenbatekoaren % 50 sartuko da zergadunaren zerga-oinarrian, salbu eta aseguru orokorretako mutuek, gizarte aurreikuspeneko entitateek, elkarrekiko bermerako sozietateek edo elkarteek banatutako dibidenduak direnean; horrelakoetan dibidenduak ez dira zerga-oinarrian sartuko.

3.– Ez da bidezkoa izango aurreko zenbakietan xedatutakoa aplikatzea, berriz, honako sarrera hauek direla eta:

a) Kapital murrizketak nahiz akzio edo partaidetzak jaulkitzeko primaren banaketak sortutako errentak, salbu eragiketa horiek berekin badakarte ekarpenak itzultzea.

Horrelako itzulketak gertatzen direnean, onuradunek ez dituzte zerga-oinarrian sartuko jasotako errentak, eragiketan bazkideei eman lekizkiekeen mozkin banatu gabeen proportzioan.

b) Jasotako dibidenduak, baldin eta, horiek banatu aurretik, kapitala murriztu bada erreserbak eratzeko edo galerak konpentsatzeko, edo jaulkipen-prima erreserbetara intsuldatu bada, edo bazkideek ekarpena egin badute ondarea birjartzeko. Dibidenduak zerga-oinarrian sartuko dira murrizketaren, intsuldaketaren edo ekarpenaren zenbatekoraino.

Aurreko lerroaldean xedatutakoa ez zaie aplikatuko Espainiako lurraldean egoitza duten entitateek banatutako errentei, errenta horiek entitateen zerga-oinarrian sartu badira zerga-oinarri negatiboen konpentsaziorik egin gabe haiei dagokienez, salbu eta konpentsaziorik eza foru-arau honetako 55. artikuluko 2. idatz-zatian ezarritakoaren ondorio denean.

c) Sozietateen gaineko Zergan edo horren berdina edo antzekoa den beste zergaren batean % 10etik beherako karga-tasa izan duten entitateek banatutako errentak, inguruabar hauek gertatzen direnean izan ezik: partaidetutako entitateak egoitza duen herrialdeak Espainiako Erresumarekin hitzarmena edukitzea nazioarteko zergapetze bikoitza saihesteko, hitzarmen hori partaidetutako entitateari aplikagarria izatea, eta barruan edukitzea informazioa trukatzeko klausula.

d) Foru-arau honetako 14. artikuluan aipatutako ondare-sozietateek banatutako dibidenduak eta mozkinetako partaidetzak, entitate banatzaileak izaera hori eduki duen ekitaldietan sortutako mozkinen kargura banatuak badira.

e) Foru-arau honetako 14. artikuluan aipatzen diren ondare-sozietateek jasotako dibidenduak eta mozkinetako partaidetzak.

4.– Ez dira zerga-oinarrian sartuko entitate ez-egoiliarrek jasotako dibidenduak edo mozkinetako partaidetzak, entitate horien errentak zerga honen zerga-oinarrian sartu badira foru-arau honetako 48. artikuluan xedatutakoaren aplikazioaren ondorioz, zerga-oinarrian sartu den errenta positiboari dagokion zatian.

Tratamendu bera ezarriko zaie konturako dibidenduei.

Errenta positibo bera behin baino ez da sargai izango, agertzen den era eta entitatea edozein izanik ere.

5.– Artikulu honetan xedatutakoa aplikatzeko, erreserbak banatzean sozietate-erabakian agertarazitakoa hartuko da kontuan eta, halakorik egon ezean, erreserba horietarako ordaindutako azken kopuruak aplikatu direla uste izango da.

6.– Aurreko idatz-zatietan ezarritakoaren arabera zergadunaren zerga-oinarrian sartzen ez diren errentei dagokienez zerga-ondoreak izango dituzten datu guztiak eman behar zaizkio zerga-administrazioari, zerga honen aitorpenarekin batera, Ogasun eta Finantza Saileko foru-diputatuak zehazten duen moduan.

34. artikulua.– Entitateetako partaidetza eskualdatuz lortutako errenten zergapetze bikoitza kentzea.

1.– Ez dira zergadunaren zerga-oinarrian sartuko entitateen kapitalaren edo funts propioen erakusgarri diren baloreak eskualdatuz lortutako errenta positiboak, betiere aurreko artikuluko 1. idatz-zatian ezarritako baldintzak betetzen badira partaidetza horrek dirauen ekitaldi guztietan, a) letran aipatutako kasuan izan ezik; kasu horretan eskualdaketa egiten den egunean bete behar da baldintza.

2.– Aurreko idatz-zatian xedatutakoa gorabehera, aurreko artikuluko 1. idatz-zatiko b) edo c) letran ezarritako baldintzak ez badira betetzen partaidetzak dirauen ekitaldietakoren batean, artikulu honetan aurreikusitako integraziorik eza honako arau hauei jarraituz aplikatuko da:

– Partaidetzak iraun duen bitartean entitate partaidetuak sortu dituen eta banatu ez diren mozkinen gehikuntza garbiari dagokion errentatik, ez da zerga-oinarrian sartuko zati bat, aurreko artikuluko 1. idatz-zatiko b) eta c) letretan ezarritako baldintza guztiak bete diren ekitaldietan sortutako mozkinei dagokiena, hain zuzen ere.

– Partaidetzak iraun duen bitartean entitate partaidetuak sortu dituen eta banatu ez diren mozkinen gehikuntza garbiari dagokion errenta zatia partaidetza eduki den aldi osoan jarraian sortutzat hartuko da, kontrako frogarik ezean, eta ez da zerga-oinarrian sartuko zati bat, aurreko artikuluko 1. idatz-zatiko b) eta c) letretan ezarritako baldintza guztiak batera bete diren ekitaldietan izandako partaidetzari dagokiona, hain zuzen ere.

Aurreko lerroaldean aipatutako moduan zerga-oinarritik kanpo uzteko eskubiderik ez duen errenta zatia zerga-oinarrian sartuko da, eta foru-arau honetako 60. artikuluko 1. idatz-zatiko bigarren lerroaldean ezarritako kenkarirako eskubidea izango du.

3.– Aurreko bi idatz-zatietan jasotako araubidea honako kasuetan ere aplikatuko da: sozietateen likidazioan, bazkideen banantzean, amortizaziorako akzio edo partaidetza propioen eskuraketan eta bat-egite, zatiketa oso edo aktibo eta pasiboaren lagapen orokorreko eragiketetako likidaziorik gabeko desegitean, eragiketa horietatik etorritako errenta konputatuei dagokienez, baldin eta artikulu honetako 1. idatz-zatian adierazitako betekizunak betetzen badira.

4.– Hurrengo kasuetan, artikulu honetako aurreko idatz-zatietan aipatutako integraziorik ezaren aplikazioak berezitasun hauek izango ditu:

a) Zergadunak zerga-salbuespena izan duen balio-zuzenketaren bat egin badio eskualdatutako partaidetzari, zuzenketa horren zenbatekotik gora eskualdaketan lortutako errenta gaindikina bakarrik utziko da zerga-oinarritik kanpo.

b) Merkataritzako Kodeko 42. artikuluan azaltzen diren inguruabarrak dituen beste entitate batek aldez aurretik partaidetza eskualdatu badu sozietate talde bereko kidea izan nahian zergadunarekin batera, eta horrela errenta negatiboa lortu eta Zergaren zerga-oinarrian sartu bada, partaidetzaren eskualdaketan lortutako errenta positiboa taldeko beste entitate horrek lortutako errenta negatiboaren zenbatekoraino zergapetuko da.

Halaber, aurreko artikuluko 1. idatz-zatiko b) edo c) letran ezarritako baldintzak ez badira betetzen partaidetzak dirauen ekitaldietakoren batean, artikulu honetako 2. idatz-zatian xedatutakoa aplikatuko da, taldearen barruan partaidetza eduki den ekitaldi guztiak kontuan hartuta, taldeko beste entitateak lortutako errenta negatiboa kendu zaion errenta positiboari dagokionez.

c) Eskualdatutako partaidetza foru-arau honetako VI. tituluko VII. kapituluko araubide bereziko erregelak erabiliz baloratu bada eta erregela horien aplikazioak, are lehenagoko eskualdaketa batean, berekin ekarri badu errentak ez sartzea zerga honen zerga-oinarrian, Pertsona Fisikoen Errentaren gaineko Zergarenean edo Ez-egoiliarren Errentaren gaineko Zergarenean, errenta horiek entitate bateko partaidetza eskualdatuz sortu badira eta ekitaldiren batean entitate horrek ez baditu bete foru-arau honetako 33. artikuluko 1. idatz-zatiko b) eta c) letretan ezarritako betekizunak, edo beste ondare-elementu batzuen ekarpen ez-diruzkoak sortu baditu errenta horiek, errentaren zati hau bakarrik utziko da zerga-oinarritik kanpo: partaidetzaren eskualdaketa-balioaren eta entitate eskualdatzaileak hura eskuratu zuenean partaidetzak izandako merkatu-balio normalaren arteko kendura positiboa, aurreko 2. idatz-zatian ezarritako baldintzetan. Eskualdaketan lortutako gainerako errenta modu berean sartuko da zergaldiko zerga-oinarrian.

5.– Entitate bateko partaidetza eskualdatzean errenta negatiboa lortzen bada, partaidetza hori aurretik beste entitate batek eskualdatu badu eta beste entitate horrek Merkataritzako Kodeko 42. artikuluan azaltzen diren inguruabarrak biltzen baditu zergadunarekin batera sozietate talde bereko kidea izateko, errenta negatibo horri aurreko eskualdaketan lortu eta zerga-oinarrian sartu ez den errenta positiboaren zenbatekoa kenduko zaio, artikulu honetako aurreko idatz-zatietan ezarritakoarekin bat etorriz.

6.– Espainiako lurraldean egoitza duten entitateen kapitalaren edo funts propioen erakusgarri diren baloreak eskualdatuz errenta positiboak lortzen direnean, artikulu honetako 1. idatz-zatian ezarritako baldintzak bete ez arren, foru-arau honetako 33. artikuluko 1. idatz-zatiko a) letran xedatutakoa betetzen bada, ez da zergadunaren zerga-oinarrian sartuko haren partaidetzari egotzi ahal zaizkion eta eskualdatutako partaidetza eduki duen bitartean entitate partaidetuak sortu dituen mozkin banatu gabeek, baita kapital sozialean sartutakoek ere, izan duten gehikuntza garbiaren zenbatekoa, konputatutako errenten mugaraino.

Baldin eta partaidetza eskuratu den egunaren ondorioz ezin bada kalkulatu partaidetzaren eskurapen egunean banatu gabe zeuden mozkinen zenbatekoa, eskurapen balioa ondare garbiarekin bat datorrela ulertuko da.

Idatz-zati honetan xedatutakoa ezingo zaio aplikatu banatu gabeko mozkinen gehikuntza garbiaren zatiari, baldin eta zati hori zerga-oinarri negatiboen konpentsazioaren ondorioz partaidetutako entitatearen zerga-oinarrian sartu ez diren errenten zatia bada.

Idatz-zati honetan jasotako araubidea honako kasuetan ere aplikatuko da: sozietateen likidazioan, bazkideen banantzean, amortizaziorako akzio edo partaidetza propioen eskuraketan eta bat-egite, zatiketa oso edo aktibo eta pasiboaren lagapen orokorreko eragiketetako likidaziorik gabeko desegitean, eragiketa horietatik etorritako errenta konputatuei dagokienez, bai eta aipatutako eragiketak egiten dituen entitateak foru-arau honetako 40. artikuluko 3. idatz-zatian ezarritakoaren arabera zerga-oinarrian sartu behar duen errentan ere.

7.– Artikulu honetako aurreko idatz-zatietan xedatutakoa ez zaie aplikatuko foru-arau honetako 14. artikuluan aipatutako ondare-sozietateetako partaidetzen eskualdaketa dela eta agerian jartzen diren errentei, salbu eta partaidetza eduki den bitartean sortutako mozkin banatu gabeen gehikuntza garbiari dagokionez, entitate partaidetua ondare-sozietatea izan ez den ekitaldietan.

Artikulu honetan xedatutakoa ez zaie aplikatuko, halaber, foru-arau honetako 14. artikuluan aipatutako ondare-sozietateek lortutako errentei, entitateen kapitaleko edo funts propioetako partaidetzaren erakusgarri diren baloreen eskualdaketatik sortutako errentak badira.

8.– Aurreko idatz-zatietan ezarritakoaren arabera zergadunaren zerga-oinarrian sartzen ez diren errentei dagokienez zerga-ondoreak izango dituzten datu guztiak eman behar zaizkio zerga-administrazioari, zerga honen aitorpenarekin batera, Ogasun eta Finantza Saileko foru-diputatuak zehazten duen moduan.

35. artikulua.– Establezimendu iraunkorrek lortutako errentak.

1.– Ez dira zergadunaren zerga-oinarrian sartuko atzerrian diren establezimendu iraunkorren bitartez lortutako errenta positiboak, betiere:

a) Errenta horiek zerga hau bezalako edo antzeko zerga baten kargapean badaude eta salbuetsita ez badaude, foru-arau honetako 33. artikuluko 1. idatz-zatiko b) letran ezarritakoarekin bat etorriz, eta haiek lortzen dituzten establezimenduak ez badaude zerga-paradisutzat jotzen den herrialde edo lurralde batean kokatuta, salbuespen honekin: egoitza Europar Batasuneko estatu batean edukitzea eta zergadunak frogatzea hura eratzeko eta jarduteko arrazoi ekonomiko baliozkoak izan direla eta enpresa jarduerak egiten dituela.

b) Establezimendu iraunkorraren errenta enpresa jarduerak egitetik sortua bada, foru-arau honetako 33. artikuluko 1. idatz-zatiko c) letran ezartzen den moduan, hain zuzen.

2.– Aurreko idatz-zatian xedatutakoa gorabehera, zergadunak, aurreko zergaldi batean, halako establezimenduetatik eratorritako errenta negatiboak sartu baditu zerga-oinarrian, errenta positiboak ez sartzeak –artikulu honetan aipatzen dena– muga izango du errenta positibo horien eta aldez aurretik zerga-oinarrian sartutako errenta negatiboen arteko diferentzia.

3.– Foru-arau honen ondorioetarako, entitate bat atzerriko establezimendu iraunkor baten bitartez ari dela pentsatuko da baldin eta Espainiako lurraldetik kanpo dauden instalazioak edo lantokiak erabiltzen baditu, zeinahi tituluz baliatuta, etengabean edo maiztasun jakinarekin, bere jarduera osoa zein haren zati bat egiteko.

Bereziki, Ez-egoiliarren Errentaren gaineko Zergari buruzko 12. artikuluko 1. idatz-zatian aipatutakoak hartuko dira establezimendu iraunkortzat.

Establezimendu iraunkorra dagoen herrialdeak hitzarmena sinatu badu Espainiarekin nazioarteko zergapetze bikoitza saihesteko, bertan ezarritakoa aplikatuko da.

4.– Aurreko idatz-zatietan ezarritakoaren arabera zergadunaren zerga-oinarrian sartzen ez diren errentei dagokienez zerga-ondoreak izango dituzten datu guztiak eman behar zaizkio zerga-administrazioari, zerga honen aitorpenarekin batera, Ogasun eta Finantza Saileko foru-diputatuak zehazten duen moduan.

36. artikulua.– Aparteko mozkinak berrinbertitzea.

1.– Nahi izanez gero, zerga-oinarrian sartu gabe utz daitezke ustiapen ekonomikoei loturiko ibilgetu material edo ukiezineko edo higiezinetako inbertsioetako ondare-elementuen kostu bidezko eskualdaketetan edo eskualdatu aurretik saltzeko mantendutako aktibo ez-korronte gisa sailkatutako elementu hauen eskualdaketan lortutako errentak, foru-arau honetako 40. artikuluko 9. idatz-zatian araupetutako moneta-balio galera aplikatuz zuzendu ondoren, hala dagokionean.

Foru-arau honetako 31. artikuluko 3. idatz-zatian aipatutako ibilgailuak eskualdatzen badira, ez-sartzea haren e) letran aipatutako ibilgailuei dagokienez bakarrik aplikatu ahal izango da. Era berean, aipatutako 31. artikuluko 3 bis idatz-zatian aipatutako garraio-elementuak eskualdatzen badira, ez-sartzea haren hirugarren paragrafoan aipatutako elementuei dagokienez bakarrik aplikatu ahal izango da.

Zerga-oinarrian ez sartzeko aukeraz baliatu ahal izateko, eskualdaketaren bidez lortutako zenbatekoa aurrean aipatutako ondare-elementuetako batean berrinbertitu behar da, hura eman edo eskura jarritako aurreko urtetik eta hurrengo hiru urteen bitarteko epealdian.

Berrinbertsioari dagokionez, ez dira kontuan hartuko berrinbertsioa egingo den aktiboei lotutako eraiste edo kentzeen ondorioz hartuko diren betebeharrei dagozkien kostuak, kostuok berrinbertsioa balioesteko kontuan har daitezkeen arren.

Partaidetzetatik sortutako errentak zerga-oinarritik kanpo utzi ahal izateko foru-arau honetako 33. artikuluko 1. idatz-zatian ezarritako baldintzak betetzen dituzten entitateen kapitaleko edo funts propioetako partaidetzen eskuraketan ere gauzatu ahal izango da berrinbertsioa, baina sekula ere ez talde inbertsioko entitateen partaidetzetan edo kapital sozialeko partaidetzarik ematen ez duten baloreetan.

Dena den, berrinbertsioa egin gabekotzat hartuko da talde bereko entitateen artean egindako eragiketen bitartez gauzatzen denean erosketa, foru-arau honetako 42. artikuluak ezarritako zentzuan, baldin eta entitate horiek foru-arau honetako VI. tituluko VII. kapituluan ezarritako araubide berezira bilduta badaude.

Berrinbertsioa egin gabekotzat hartuko da, orobat, talde bereko entitate bati egiten zaionean erosketa, foru-arau honetako 42. artikuluan ezarritako zentzuan, ibilgetu materialaren elementu berriak direnean izan ezik.

Hala ere, baldin eta errenta agerian jarri bada entitateei dirua ez bestelako ondare-elementu batzuen ekarpena eginda, berrinbertsioa ezingo da gauzatu ekarpen hori jaso duen entitatearen kapitaleko edo funts propioetako partaidetzaren erakusgarri diren baloreetan.

Berrinbertsioa hura gauzatzen den ondare-elementuak eskura jartzen diren egunean egindakotzat joko da.

Ondare-elementuak finantza-errentamenduaren kontratuen helburu direnak izanez gero, berrinbertsioa egintzat emango da kontratua egiten den egunean. Haren zenbatekoa ondare-elementuaren kontabilitateko balioaren berdina da. Berrinbertsioaren ondorioak erosteko aukerak baldintzatuta egongo dira eta izaera ebazgarria dute.

2.– Ondare-elementuen balio-narriaduragatik izandako galeren zenbatekoa ez da sartuko zerga-oinarritik kanpo uzten diren errenten multzoan, baldin eta galera horiek kenkari fiskala izan badute, ezta foru-arau honetako 25. artikuluan xedatutakoari jarraituz kendu diren zenbatekoak ere, edo amortizazio askatasunari, amortizazio azaleratuari nahiz baterako amortizazioari aplikatutakoak, aipatutako zerga-oinarrian sartu behar badira, onura horiek izan zituzten ondare-elementuen eskualdaketa dela eta.

3.– Zerga-administrazioak berrinbertsiorako plan bereziak onetsi ahal izango ditu hori bidezkotzen duten inguruabarrak biltzen direnean.

Aurreko lerroaldean aipatutako inguruabarrak gertatzen direla ulertuko da, frogatzen baldin bada ezen, inbertsioaren ezaugarri teknikoak edo ekonomikoak direla eta, 1. idatz-zatian ezarritakoa baino epe luzeagoa behar dela inbertsioa egin ahal izateko, edo, behar bezala arrazoitutako ezusteko inguruabarrengatik, ezin dela inbertsio prozesua aipatutako epe horretan burutu.

Berrinbertsio plan berezia onesteko eskaera egingo da arauz zehazten diren prozedura eta baldintzak betez. Ondare-elementua eskualdatu aurreko edo ondorengo sei hilabeteko epean aurkeztuko da eskaera hori, edo, hala behar denean, berrinbertsio aurreratua egitekoa den egunaren aurreko sei hilabeteko epean, salbu eta ezusteko inguruabarren ondorio denean; halakoetan, artikulu honetako 1. idatz-zatian ezarritako epea amaitu aurretik aurkeztu beharko da eskaera, eta bertan zehaztu egin beharko dira egindako berrinbertsio zatia eta hura osatzeko behar den denbora-plana.

4.– Berrinbertsioaren xede diren ondare-elementuek zergadunaren ondarean iraun beharko dute, artikulu honetako 1. idatz-zatian ezarritako betekizunak betez, justifikatutako galerak salbu, bost urtean, edo, ondasun higigarriak badira, hiru urtean, berrinbertsioa gauzatzen denetik hasita, non eta ez duten bizitza baliagarri laburragoa, foru-arau honetako 16. artikuluan xedatutakoaren arabera.

Aipatutako epea amaitu baino lehen elementu horiek eskualdatzeak berekin ekarriko du sartu gabeko errenta zatia zerga-oinarrian sartzea, lortutako zenbatekoa eskualdaketaren osteko hiru hilabeteko epean aurreko 1. idatz-zatian araututako baldintzetan berrinbertizen den kasuetan izan ezik.

5.– Berrinbertsioa adierazitako epean egiten ez bada, epea amaitu den zergaldiko zerga-oinarrian sartuko dira ez-betetzea dagokien zenbatekoak, zerga-oinarrian sartu gabe utzi direnak, eta euren zenbatekoaren % 15 gehituko zaie.

Aurreko paragrafoan ezarritakoa eragotzi gabe, Espainiako eta Europako interes ekonomikoko elkarteen araubide bereziak dituzten entitateen eta aldi baterako enpresa elkarteen kasuan, lortutako errenta positiboei dagokien zerga-oinarriaren zatia bazkideei egotzi beharko zaie, bere zenbatekoaren % 15 gehituta, foru-arau honetako VI. tituluko III. kapituluan ezarritakoarekin bat etorriz, berrinbertsioa egiteko epea mugaeguneratu den zergaldian.

6.– Berrinbertitutako diru kopurua eskualdaketan jasotakoa baino gutxiago denean, berrinbertitutako diru kopuruari dagokion zati proportzionala baino ezingo da utzi zerga-oinarrian sartu gabe.

Artikulu honetan jasotako araubidea ez da bateragarria izango eskualdatutako zenbatekoa berrinbertitzen den elementuei legokiekeen beste edozein zerga-onurarekin, albo batera utzita amortizatzeko askatasunari, amortizazio azeleratuari eta baterako amortizazioari dagokiena.

Berrinbertitutako kopurua eskualdaketan guztira lortutakoa baino gehiago bada, gaindikinari, hala badagokio, foru-arau honetako V. tituluko III. kapituluan araututa dauden inbertsioaren ziozko kenkariak aplikatu ahal izango zaizkio, edo gai izango da foru-arau honetako 53. artikuluan aipatzen den erreserba gauzatzeko.

37. artikulua.– Jabetza intelektuala edo industriala ustiatzeagatiko murrizketa.

1.– Entitatearen jabetza intelektuala edo industriala erabiltzeko edo ustiatzeko eskubidea hirugarrenei lagatzearen bidez egindako ustiaketari dagozkion sarreren % 30 ez da zerga-oinarrian sartuko, baldin eta lagapen hori aldi baterako egiten bada eta ez badu eragiten lagapenean sartuta dauden ondare-elementuak besterentzerik.

Jabetza intelektual edo industriala entitateak berak garatu badu, berriz, sarreren % 60 ez da zerga-oinarrian sartuko.

Literatur, arte edo zientzia obrak zinemarako pelikulak barne, laga daitezkeen eskubide pertsonalak esaterako, irudi eskubideak, eta aplikazio komertziala besterik ez duten informatika programak erabiltzeko edo ustiatzeko eskubidea lagatzetik datozen sarrerek ez dute inola ere murrizketarako eskubiderik emango.

Informatika programa bat aurreko lerroaldean azaldutako kasuan ez dagoela ulertuko da, ondorio horietarako, ez baldin bada programa estandar bat, baizik eta zergadunak berariaz garatu eta hobetutakoa, eta lagapen-hartzailearentzat beren beregi ezarritako funtzionalitateak baditu, haren ekoizpen prozesuarekin zerikusia dutenak, eta prozesu horretako elementu garrantzitsua bada.

2.– Aurreko paragrafoan ezartzen dena aplikatzeko honako baldintza hauek bete behar dira:

a) Lagapen-hartzaileak erabilera- edo ustiapen-eskubideak jarduera ekonomiko batean erabili behar ditu eta horren emaitzak ezin daitezke izan entitate lagatzaileari gastu kengarriak eragiten dizkioten ondasun-emateak edo zerbitzugintzak (azken kasu horretan, entitatea eta lagapen-hartzailea lotuta egon behar dira).

b) Lagapen-hartzaileak ez du egoitza izan behar batere zergarik ez duen edo zerga-paradisutzat jotzen den herrialde edo lurralde batean, salbuespen honekin: egoitza Europar Batasuneko estatu batean edukitzea eta zergadunak frogatzea eratzeko eta jarduteko arrazoi ekonomiko baliozkoak izan dituela eta enpresa jarduerak egiten dituela.

3.– Murrizketa hori kontuan eduki behar da foru-arau honetako 60. artikuluko 7. idatz-zatian aipatutako kuota osoaren zenbatekoa zehazteko.

4.– Halaber, zergadunak bere jabetza intelektual edo industrialaren erosketa prezioaren edo ekoizpen kostuaren % 5eko murrizketa egingo du bere zerga-oinarrian, jabetza hori jarduera ekonomikoren bat egiteko erabiltzen badu eta jabe osoa bada, eta aurreko 1. zenbakian ezarritako salbuespenak salbu. Murrizketa horrek ezin du gainditu jabetza intelektuala edo industriala erabiltzen den jarduera ekonomikoaren sarreren zenbatekoaren % 0,5.

Murrizketa muga horretaraino iritsi ez bada, zergadunak diferentziaren adinako murrizketa egin ahal izango du, konpentsazio gisa, entitateak sortu eta erregistratu dituen eta beraren jarduera ekonomikoa garatzeko erabiltzen diren marken erabileragatik.

Zenbaki honetan ezarritako murrizketa bateragarria izango da haren kalkuluan kontuan hartzen diren aktibo ukiezinen amortizazioagatiko edo balio-narriaduraren ondoriozko galerengatiko kenkariarekin.

38. artikulua.– Salbuespen partziala duten entitateak.

1.– Foru-arau honetako 12. artikuluko 2. idatz-zatiaren arabera salbuespen partziala duten entitateek ez dituzte zerga-oinarrian sartuko errenta hauek:

a) Euren helburu soziala edo xede berezia osatzen duten jarduerak egitearen ondoriozkoak.

b) Irabazizko eskuratzeen eta eskualdatzeen eraginezkoak, baldin eta batzuk eta besteak euren helburua edo xedea betetzeko lortzen edo egiten badira.

c) Xede edo helburu zehatza betetzeko diren ondasunak kostu bidez eskualdatzean sortzen direnak, baldin eta lortutako zenbatekoa xede edo helburu horrekin lotutako inbertsio berrietarako erabiltzen bada.

Berrinbertitutako diru kopurua eskualdaketan jasotakoa baino gutxiago denean, berrinbertitutako diru kopuruari dagokion zati proportzionala baino ezingo da zerga-oinarrian sartu gabe utzi.

Inbertsio berriak ondareko elementua eman edo eskura jarri den egunaren aurreko urtearen eta hurrengo hiru urteen barruan egin behar dira, eta bost urte egon behar dira entitatearen ondarean, haien bizitza baliagarria, foru-arau honetako 16. artikuluan xedatutakoaren arabera, hori baino laburragoa izan ezean.

Inbertsio berria, berriz, kasuan kasuko ondare-elementuak ematen direnean egindakotzat hartuko da.

Berrinbertsioa adierazitako epean egiten ez bada, epea amaitzen den zergaldiko zerga-oinarrian sartuko dira integratu gabeko diru kopuruak, ez-betetzea dagokienak, eta euren zenbatekoaren % 15 gehituko zaie.

Elementu horiek aipatutako epea amaitu orduko eskualdatuz gero, zergapetu gabeko errenta-zatiaren zerga-oinarria ordainduko da, lorturiko zenbatekoa berriro inbertitzen denean izan ezik.

2.– Aurreko idatz-zatian adierazitako integraziorik eza ez zaie ustiapen ekonomikoen etekinei edo ondaretik lortutako errentei aplikatuko, ez eta goian aipatutakoak ez beste eskualdaketa batzuetatik datozen errentei ere.

Alderdi politikoen ondareko ondasunen eta eskubideen etekinak ez dira zerga-oinarrian sartuko. Alderdi politikoen ustiapen ekonomikoen ondoriozko etekinak ere ez dira sartuko, zerga-administrazioak hala adierazten badu, aurrez eskatuta.

Alderdi politikoek lortzen dituzten errentetatik, artikulu honetan ezarritakoa dela eta haien zerga-oinarrian sartzen ez direnei ez zaie aplikatuko atxikipenik ez konturako sarrerarik.

Arauz zehaztuko da alderdi politikoek atxikitzeko betebeharretik salbuetsita geratzeko behar duten kreditazioa lortzeko prozedura.

3.– Ustiapen ekonomiko baten etekintzat joko dira, lan pertsonaletik eta kapitaletik batera sortuak edo faktore horietariko bakar batetik sortuak izanik, zergadunak bere kabuz ekoizpen baliabideak eta giza baliabideak edo bietako bat antolatzea dakartenak, ondasun edota zerbitzuen ekoizpenean eta banaketan esku hartzeko helburuarekin.

39. artikulua.– Sarreren arloko beste zuzenketa batzuk.

1.– Toki Araubidearen Oinarriei buruzko apirilaren 2ko 7/1985 Legearen 25. artikuluko 2. idatz-zatian edo 36. artikuluko 1. idatz-zatiko a), b) eta c) letretan, lurraldeko, udalerriko eta probintziako toki entitateen eskumenei buruzkoetan, azaltzen diren zerbitzuetariko edozein emateak sortzen dituen errentak ez dira zerga-oinarrian sartuko, zerbitzuok enpresa mistoaren edo kapital erabat pribatuaren sistemaren bidez ustiatzen direnean izan ezik.

Aurreko lerroaldean aipaturiko zerbitzuak Estatuaren edo autonomia erkidegoen erabat mendekoak diren entitateek egiten dituztenean ere ez dira zerga-oinarrian sartuko zerbitzu horietatik sortutako errentak.

2.– Zerga honen kontura atxikipena egin behar zaien kopuruen hartzaileak sortutako kontraprestazio osoaz zenbatuko ditu kopuru haiek.

Atxikipena egin ez bada edo behar adinakotik beherako zenbatekoz egin bada, hartzaileak atxiki behar izan zen kopurua kenduko du kuotatik.

Legez ezarriak eta herri arloak ordainduak diren ordainsarietan, hartzaileak benetan atxikitako kopuruak soilik kendu ahal izango ditu.

Sortutako kontraprestazio osoa frogatzerik ez badago, zerga-administrazioak zenbatu ahal izango duen zenbateko osotik dagokion atxikipena kentzerakoan benetan jasotakoa geratu beharko da. Kasu honetan, kuotatik kenduko da, konturako atxikipen legez, benetan jasotakoaren eta zenbateko osoaren arteko diferentzia.

3.– Zergadunek ez dituzte zerga-oinarrian sartuko foru-arau honetako 31. artikuluko 5. idatz-zatian aipatutako partaidetza-maileguak emanez lortu dituzten errentak, entitate mailegu-hartzailearen mozkinen ondorioz errenta horiek ordainsari diren neurrian; ez da halakotzat joko korritu finkoaren ondoriozko ordaina, betiere mailegua finantzabide gisa erabiltzen bada jarduera edo enpresa-proiektu berriak garatzeko, ez entitate mailegu-emaileak, ez mailegu-hartzaileak, ez foru-arau honetako 42. artikuluan azaldutako moduan haiei lotutako inongo pertsona edo entitatek aurretik garatu ez dituztenak.

Idatz-zati honetan ezarritakoa aplikatu ahal izateko, zergadunak, zuzenean edo zeharka, entitate mailegu-hartzailearen kapitalean edo funts propioetan gutxienez % 25eko partaidetza izan behar du, edo, partaidetutako sozietatearen akzioek bigarren mailako merkatu antolatuan kotizatzen badute, % 15ekoa; eta partaidetza hori lehendik eduki behar da, banaturiko etekin aldakorra eska daitekeen eguna baino urtebete lehenagotik jarraian, edo, bestela, epe hori betetzeko behar beste denboran eutsi behar zaio, geroago, partaidetza ehuneko horri.

Idatz-zati honetan araututako integraziorik ezak ez du gaindituko korritu aldakorra haien kargura ordaintzen den entitate mailegu-hartzailearen mozkinen (partaidetza-maileguaren ordainketari dagokion gastua konputatu aurretik kalkulatutako mozkinak, zergadunari egotzi ahal zaizkionak haren partaidetza graduaren arabera) % 20, eta ez da izango honako zenbateko hau baino handiagoa: partaidetza-maileguaren zergaldiko batez besteko saldoari berandutzeagatiko korritu-tasa indardunaren % 150 aplikatuz ateratzen den zenbatekoa.

Aurreko idatz-zatian ezarritakoari jarraituz, zerga-oinarrian sartzen ez den errenta ondoko helburuetakoren bat betetzeko erabiliko da:

a) Foru-arau honetako 51. eta 53. artikuluetan aipatutako erreserbak zuzkitzeko. Erreserba horien barruan eduki behar da dena delako zenbatekoa, baliaezin, aipatutako manuetan ezarritako moduan, eta ezingo dira aplikatu bi manuotan araututa dauden zerga-oinarriaren murrizketak idatz-zati honetan xedaturikoa aplikatuz zerga-oinarritik kanpo utzi den errentari dagozkion diru kopuruetarako.

b) Idatz-zati honetan ezarritako baldintzak betetzen dituzten partaidetza-mailegu gehiago emateko, korrituak jasotzen diren zergaldian bertan edo hurrengoan.

Aurreko lerroaldean xedatutakoa bete ezean, ez-betetzea gertatu den zergaldiko zerga-oinarrian sartu beharko dira integratu gabeko errentak, eta foru-arau honetako 51. eta 53. artikuluetan erreserbari eutsi beharra betetzen ez denerako ezarritako araubidea aplikatuko da, edo, b) letrako kasuan, errentei euren zenbatekoaren % 5 gehituko zaie.

4.– Aurrezki kutxek ez dituzte zerga-oinarrian sartuko euren ongintzari eta gizarte ekintzari atxikitako inbertsioak eskualdatuz lortutako errentak.

5.– Ez dira zerga honen zerga-oinarrian sartuko honako inguruabar hauek direla eta agerian jartzen diren errenta positiboak:

a) Europar Batasunak nekazaritzako politikaren barruan esne ekoizpenari, mahastizaintzari eta madariaren, mertxikaren, nektarinaren, azukre-erremolatxaren eta azukre-kanaberaren laborantzari behin betiko uzteagatik edo bananondoak, sagarrondoak, madariondoak, mertxikondoak eta nektarinondoak erauzteagatik ematen dituen laguntzak jasotzea.

b) Europako Erkidegoko arrantza-politikako ondorengo laguntzak jasotzea:

1) Arrantza jarduerari behin betiko uztea.

2) Itsasontzi baten arrantza jarduera behin betiko uztea.

3) Beste herrialde batzuetan sozietate mistoak eratzeko edo eratzearen ondoriozko eskualdaketak.

c) Arrantzontzi bat besterenganatzea, besterenganatze-datatik urtebeteko epea igarotakoan, hori zatitzeari ekiten dionean eta arrantza jarduera gerarazteko dagokion Europako Erkidegoko laguntza jasotzen duenean.

d) Enpresa jarduerak egiteari lotuta dauden ondare-elementuen suntsipena, bai suak, uholdeak edo hondorapenak eragindakoa, konpontzeko diren laguntza publikoak jasotzea..

e) Fomento Ministerioak eta Eusko Jaurlaritzako arlo horretan aginpidea duen Sailak errepide garraioa behin betiko uzteagatik emandako diru-laguntzak, laguntza emateko araudian ezarritako betekizunak betetzen dituzten garraiolariek jasotakoak badira.

f) Abereak nahitaez hiltzeagatik kalte-ordain publikoak jasotzea abereen izurri edo gaitzen kontrako jarduketetan.

Xedapen hau ugalketarako diren abereei baino ez dagokie.

Idatz-zati honetan xedatutakoaren arabera zerga-oinarrian sartuko ez den errenta kalkulatzeko kontuan hartuko dira bai jasotako diru-laguntzen zenbatekoa edo, bestela, aurreko c) letraren kasuan, lortutako errentarena, baita jarduerei atxikitako elementuetan gertatzen diren ondare-galerak ere. Diru-laguntza horien zenbatekoa aipatu elementuetan gertatutako galerak baino txikiagoa denean, diferentzia negatiboa zerga-oinarrian sartu ahal izango da. Galerarik ez dagoenean, laguntzen zenbatekoa baino ez da kargatik libre geratuko, edota, aurreko c) letraren kasuan, lortutako errenta.

6.– Ekitaldiko sarreren kontu batean abonatuz hornidurak kentzeari dagokion zenbatekoa ez da zerga-oinarrian sartuko, horniduretarako zuzkidura gastu kengarritzat jo ez bada.

7.– 1936-1939 bitarteko erantzukizun politikoei buruzko araudia aplikatuz, Alderdi Politikoei Konfiskatutako Ondasun eta Eskubideak Itzuli edo Konpentsatzeari buruzko abenduaren 15eko 43/1998 Legean xedatutako moduan, ondare-izaerako ondasun eta eskubideak itzuli direlako edo diruzko konpentsazioak eman direlako agerian jartzen diren errenta positiboak ez dira alderdi politikoen eta horiei lotutako pertsona juridikoen zerga-oinarrietan sartuko.

8.– Foru-arau honetako 14. artikuluan aipatutako ondare-sozietateek ez dute zergaldi bakoitzeko zerga-oinarrian sartuko Pertsona Fisikoen Errentaren gaineko Zergari buruzko Foru Arauko 9. artikuluko 24. zenbakian aipatzen den zenbatekoa, entitateen dibidenduak jasotzeari edo haien mozkinetan parte hartzeari dagokiona.

Zergaldia hamabi hilabete baino laburragoa denean, aurreko lerroaldean aipatutako zerga-oinarrian sartzen ez den zenbatekoa zergaldiaren iraupenaren proportzioan murriztuko da.

IV. KAPITULUA

BALORAZIO ARAUEN ARLOKO ZUZENKETAK ETA ABUSUAREN AURKAKO NEURRIAK

40. artikulua.– Balorazio-arauak: arau nagusia eta arau bereziak kostu gabeko eskualdaketetan eta sozietate eragiketetan.

1.– Ondare-elementuak Merkataritza Kodeak ezartzen dituen irizpideen arabera balioetsiko dira. Nolanahi ere, arrazoizko balioaren irizpidea aplikatuz sortzen diren balio-aldaketek ez dute zerga ondoriorik izango aldaketok galera-irabazien kontuari egotzi behar ez zaizkion bitartean.

Kontabilitateko errebalorizazioen zenbatekoa ez da zerga-oinarrian sartuko, errebalorizazio horiek beren zenbatekoa galera-irabazien kontuan sartzera behartzen duten legezko edo arauzko arauak direla-eta burutzen direnean izan ezik. Zerga-oinarrian sartu gabeko errebalorizazioaren zenbatekoak ez du ekarriko, zergaren ondoreetarako, errebalorizatutako elementuen balioa handiagoa izatea.

2.– Hurrengo ondare-elementuak beren merkatuko balio normalean baloratuko dira:

a) Kostu bidez eskualdatu edo eskuratutakoak.

b) Entitateei ekarrikoak eta kontraprestazioan hartutako baloreak.

c) Bazkideei, sozietatearen desegitean, bazkideen banaketan, ekarpenen itzulketarekin egiten diren kapital txikipenetan, jaulkipen-sariaren banaketan, eta mozkinen banaketan eskualdatutakoak.

d) Aktiboaren eta pasiboaren bategitea, desegite oso edo partziala eta lagapen osoa direla bide eskualdatutakoak.

e) Trukaketetan eskuratutakoak.

f) Trukean edo bihurketan eskuratutakoak.

Merkatuko balio normaltzat hartuko da alderdi independenteek merkatuko baldintza arruntetan adostuko luketena. Balio hori kalkulatzeko, foru-arau honetako 42. artikuluko 4. paragrafoan aurreikusitako metodoak aplikatuko dira.

3.– Aurreko idatz-zatiko a), b), c) eta d) letretan ezarritakoetan, entitate eskualdatzaileak bere zerga-oinarrian eskualdatutako elementuen merkatuko balio normalaren eta kontabilitateko balioaren arteko diferentzia sartuko du.

Aurreko idatz-zatiko e) eta f) letretan aurreikusitako kasuetan, entitateak bere zerga-oinarrian sartuko du eskuratutako elementuen merkatuko balio normalaren eta emandako elementuen kontabilitateko balioaren arteko diferentzia.

Aurreko lerroaldean xedatutakoa ez da ezarri behar sozietate batek bere akzioen edo partaidetzen balio izendatua aldarazi baino egiten ez duenean, akziodunen partaidetzaren portzentajea aldatu gabe eta ekarpenen bihurketarik gabe. Orduan akzio edo partaidetza horiek ez dira merkatuko balio normalean baloratuko.

Irabazizko eskuraketan, entitate eskuratzaileak bere zerga-oinarrian sartuko du eskuratutako ondare-elementuaren merkatuko balio normala.

Artikulu honetan aipatzen diren errentak zerga-oinarrian sartzea errenta horien jatorri diren eragiketak egiten diren zergaldian egingo da.

Idatz-zati honetan aurreikusten denaren ondoreetarako, ez zaie irabazizko eskuraketa iritziko diru-laguntza publikoei.

Idatz-zati honetan xedatutakoa ez zaie aplikatuko foru-arau honetako 31. artikuluko 4. idatz-zatian aipatutako kirol federazio eta kirol klubentzako dohaintzei, haien xede propioak lortzeko erabiltzen badira.

4.– Ekarpenen itzulketarekin egiten den kapital txikipenean bazkideen zerga-oinarrian sartuko da partaidetzaren kontabilitateko balioaren gainetik hartutako elementuen merkatuko balio normalaren gaindikina.

Erregela bera ezarriko da akzio edo partaidetzen jaulkipen-sariaren banaketan.

5.– Mozkin-banaketan, bazkideen zerga-oinarrian sartuko da hartutako elementuen merkatuko balio normala.

6.– Entitateak desegin edo bazkideak banatzen direnean, horien zerga-oinarrian sartuko da hartutako elementuen merkatuko balio normalaren eta partaidetza deuseztatuaren kontabilitateko balioaren arteko diferentzia.

7.– Bategitean eta zatiketa osoan edo partzialean, bazkideen zerga-oinarrian sartuko da hartutako partaidetzaren merkatuko balio normalaren eta partaidetza deuseztatuaren kontabilitateko balioaren arteko diferentzia.

8.– Ekarpenen itzulketaz bestelako helburua duen kapital txikipenak ez ditu ekarriko bazkideentzat zerga-oinarrian sar daitezkeen errentak, positiboak zein negatiboak.

9.– Ibilgetu materialaren eta ukiezinaren zein ibilgetuko inbertsioen ondare-elementuak edo salmentarako mantendu diren aktibo ez korronte moduan sailkatu diren elementu horiek eskualdatzean lortu diren errenta positiboak zerga-oinarrian sartzeko, errenta horietatik honako hau kenduko da, eta betiere errenta horien mugarekin: eskualdatutako elementuei dagokienez, legez baimendutako azken egunerapenetik edo elementu hori eskuratu zen egunetik, gerokoa bada, gertatutako monetaren balio-galeraren zenbatekoa; zenbateko hori honako erregela hauen arabera kalkulatuko da:

a) Eskualdatutako ondare-elementuen eta haiei dagozkien amortizazioen eskuraketa-prezioa edo ekoizpen-kostua, batetik, eta arauz ezartzen diren koefizienteak, bestetik, biderkatuko dira.

b) Aurreko idatz-zatian ezarritakoa aplikatuz zehazten diren kopuruen arteko diferentziak eskualdatutako ondare-elementuaren kontabilitateko balioa gutxituko du.

10.– Foru-arau honetako 48. artikuluan xedatutakoa aplikatuz euren errentak zerga honen zerga-oinarrian sartu zaizkien entitate ez-egoiliarretako zuzeneko nahiz zeharkako partaidetza eskualdatzetik sortutako errenta kalkulatzeko, partaidetza horien eskuraketa-balioari gehituko zaio benetako banaketarik gabe bazkideen zerga-oinarrian, haien akzio edo partaidetzen errenta gisa, horiek eskuratu zirenetik eskualdatu ziren arte sartutako errenta positiboaren zenbatekoa.

Idatz-zati honetan xedatutakoa aplikatzeko, foru-arau honetako 14. artikuluan aipatutako ondaresozietateetan, zenbatu beharreko eskualdatzearen balioak, gutxienez, itxitako azken balantzeko balio teorikoa izan beharko du, behin aktiboen kontabilitate-balioa Aberastasunaren eta Fortuna Handien gaineko Zergaren ondorioetarako izango luketenaz ordezkatuta, edota merkatuko balio normalaz ordezkatuta, azken hori txikiagoa izanez gero.

41. artikulua.– Egoitza aldaketak eta establezimendu iraunkorrak uztea.

1.– Zerga-oinarrian sartuko da merkatuko balio normalaren eta kontabilitateko balioaren arteko diferentzia, ondare-elementuak ondokoetarikoak direnean:

a) Egoitza Espainiako lurraldetik kanpo lekualdatzen duen entitate baten jabetza diren ondare-elementuak, elementuok entitate horrek Espainiako lurraldean duen establezimendu iraunkor bati lotuta geratu ezean. Kasu horretan, ondare-elementu horiei foru-arau honetako 103. artikuluan ezarritakoa aplikatuko zaie.

b) Espainiako lurraldean egoitza iraunkorra edukirik, jarduerari uzten dion establezimenduari lotuak.

c) Espainiako lurraldean era iraunkorren finkatutako establezimendu bati loturik egon ondoren atzerrira transferitzen direnak.

2.– Egoitza Europar Batasuneko beste estatu batera aldatzen denean edo Espainiako lurraldean dagoen establezimendu iraunkor bati atxikitako elementuak Europar Batasuneko beste estatu batera eskualdatzen direnean, ordea, zergadunak aukera izango du aurreko idatz-zatian xedatutakoaren aplikazioari dagokion kuotaren ordainketa geroratzeko, osorik edo zati batean, harik eta aipatutako ondare-elementuak hirugarren bati eskualdatu arte, Europar Batasunetik kanpo dagoen establezimendu iraunkor bati atxiki arte edo entitatearen balantzean elementu horiei baja eman arte, betiere honako baldintza hauek betetzen badira:

a) Zergadunak zerrenda bat aurkeztu behar du, zerga honengatik aurkeztu behar duen azken autolikidazioarekin batera edo aurreko 1. idatz-zatiko b) eta c) letretan azaldutako inguruabarrak gertatzen diren zergaldikoarekin batera. Aurreko 1. idatz-zatian xedatutakoa aplikatu behar zaien ondare-elementuak agertuko dira banan-banan zerrenda horretan, eta elementu bakoitzaren kontabilitate-balioa, eta bakoitzaren merkatu-balio normalaren eta kontabilitate-balioaren arteko diferentzia, bai eta kuota likidoan elementu bakoitzari dagokion zatiaren zenbatekoa ere.

b) Bermatu egin behar da, kreditu entitate batek edo elkarren bermerako sozietate batek emandako abal solidarioaren bidez edo kauzio-aseguruaren ziurtagiriaren bidez, kuota kobratuko dela, zergadunak idatz-zati honetan ezarri den moduan geroratu nahi duen ordainketaren zenbatekoraino, gehi % 30, berandutze-korrituak eta, halakorik balego, zerga-bilketaren kostuak bermatzeko.

c) Zergadunak urtero aitorpena aurkeztu behar du, Ogasun eta Finantzen foru-diputatuak beren beregi onesten duen ereduan. Bertan ondare-elementuetako bakoitzaren egoera azaldu behar da, aurreko a) letran aipatutako zenbatekoak jaso behar dira, eta, idatz-zati honetako lehen lerroaldean aipatutako inguruabarrak gertatu badira, noiz gertatu diren adierazi behar da.

Idatz-zati honetan azaldutako kasuetan, zergadunak, c) letran aipatutako aitorpenarekin batera, kuota geroratuaren zenbateko hau sartu beharko du: idatz-zati honetako lehen lerroaldean aipatutako inguruabarrak urte horretan gertatu zaizkien ondore-elementuei dagokien zenbatekoa, gehi sortutako berandutze-korrituak.

Zergadunak eskatu ahal izango du murriztu egin dadila b) letran xedatutakoa aplikatzearen ondorioz eman beharreko bermea, egindako ordainketak kuota geroratu osoan hartzen duen proportzio berean.

42. artikulua.– Lotutako pertsona edo entitateen arteko eragiketen tratamendua: arau orokorrak.

1.– Pertsona edo entitate lotuen artean egindako eragiketak beren merkatuko balio normalaren arabera baloratuko dira.

Merkatuko balio normala da pertsona edo entitate lokabeek lehia librean adosten dutena, eta merkatuko balio normal hori zehazteko alderatu egingo dira, batetik, eragiketa lotuen inguruabarrak, eta bestetik, eragiketa horien parekoak izan litezkeen pertsona edo entitate lokabeen arteko eragiketen inguruabarrak.

Bi eragiketa edo gehiago parekoak diren zehazteko, honako inguruabar hauek hartuko dira aintzat, garrantzitsuak diren neurrian eta zergapekoak horiek behar bezala baliatu ahal izan dituen neurrian:

a) Eragiketa lotuen xede diren ondasunen edo zerbitzuen ezaugarri espezifikoak.

b) Aztertzen diren eragiketei dagokienez, alderdiek euren gain hartzen dituzten eginkizunak; onartzen dituzten arriskuak identifikatuko dira eta, hala badagokio, erabili dituzten aktiboak haztatuko dira.

c) Eragiketaren sorburu diren kontratu-baldintzak, kontuan hartuta alderdi kontratatzaile bakoitzak bere gain hartzen dituen erantzukizunak, arriskuak eta onurak kontuan hartuz.

d) Ondasunak ematen diren edo zerbitzuak eskaintzen diren merkatuen ezaugarriak, edo eragiketa lotuetan eragina izan dezaketen gainerako faktore ekonomikoak.

e) Kasu bakoitzean garrantzitsuak diren gainerako inguruabar guztiak, esaterako, merkataritzako estrategiak. Enpresa independenteen eragiketa bateragarriei buruzko daturik ez badago edo erabilgarri dauden datuen fidagarritasuna mugatua bada, zergapekoak dokumentatu beharko ditu inguruabar horiek.

Aurrean aipatutako inguruabarrak ez badira aintzat hartu zergapekoaren ustez garrantzitsuak ez direlako, analisitik kanpo utzi izanaren arrazoiak justifikatu beharko dira. Beti adierazi behar dira konparaziorako kontuan hartu behar diren elementuak, barnekoak zein kanpokoak.

Zergapekoak egiten dituen eragiketa lotuak elkarrekin estu lotuta badaude edo etenik gabe egiten badira –halako moduan non bakoitza bereiz baloratzea ez baita egokia–, alderagarritasunaren azterketa eragiketa horien multzo osoa kontuan hartuta egingo da.

Bi eragiketa edo gehiago parekagarriak dira euren artean desberdintasun nabarmenik ez badute idatz-zati honetan aipatutako inguruabarretan, ondasunaren edo zerbitzuaren prezioari edo eragiketaren marjinari dagokionez, edo, desberdintasunak egon arren, horiek ezabatu badaitezke, beharrezko zuzenketak eginez.

2.– Zerga-administrazioak egiaztatu ahal izango du pertsona edo entitate lotuen artean egindako eragiketak merkatuko balio normalaren arabera baloratu direla. Behar izanez gero, eskumena izango du eragiketen baloratzeak zuzentzeko, baldin eta zerga honen, Pertsona Fisikoen Errentaren gaineko Zergaren edo Ez-egoiliarren Errentaren gaineko Zergaren kargapeko eragiketak merkatuko balio normalaren arabera baloratu ez badira. Zergadunak aurkeztutako dokumentazioa, foru-arau honetako 43. artikuluan aipatutakoa alegia, eta Administrazioaren esku dauden datuak eta informazioa erabiliz egingo dira zuzenketak.

Zerga-administrazioak balio horri eutsiko dio gainerako pertsona edo entitate lotuei dagokienez.

Administrazioaren baloratzeak ez du berekin ekarriko ez zerga honetan, ezta, hala bada, Pertsona Fisikoen Errentaren gaineko Zergan edo Ez-egoiliarren Errentaren gaineko Zergan ere, eragiketa burutu duten pertsona edo entitate guztiek eragiketan benetan lortutakotik gorako errentaren gaineko zerga ordaintzea. Zenbatespen objektiboko metodoren bat aplikatzeagatik oinarri ezargarritik kanpo geratzen den errentaren zatia hartuko da kontuan konparazioa egiteko.

3.– Ondoko hauek izango dira pertsona edo entitate lotuak:

a) Entitate bat eta bertako bazkide edo partaideak.

b) Entitate bat eta bertako kontseilari edo administratzaileak.

c) Entitate bat eta bertako bazkide, partaide, kontseilari edo administratzaileen ezkontideak, maiatzaren 7ko 2/2003 Legearen arabera eratutako izatezko bikoteko bikote-lagunak, edo ahaidetasun harreman batek lotutako pertsonak. Harreman hori zuzenekoa zein zeharkakoa izan daiteke, odolkidetasunezkoa, ezkontza bidezkoa edo izatezko bikoteak ekar lezakeena, hirugarren mailaraino.

d) Talde bereko bi entitate.

e) Entitate bat eta beste entitate bateko bazkide edo partaideak, baldin eta bi entitateak talde berekoak badira.

f) Entitate bat eta beste entitate bateko kontseilari edo administratzaileak, baldin eta bi entitateak talde berekoak badira.

g) Entitate bat eta beste entitate bateko bazkide, partaide, kontseilari edo administratzaileen ezkontideak, maiatzaren 7ko 2/2003 Legearen arabera eratutako izatezko bikoteko bikote-lagunak, edo ahaidetasun harreman batek lotutako pertsonak, entitate biak talde berekoak direnean. Harreman hori zuzenekoa zein zeharkakoa izan daiteke, odolkidetasunezkoa, ezkontza bidezkoa edo izatezko bikoteak ekar lezakeena, hirugarren mailaraino.

h) Bi entitate, baldin eta lehenengoak gutxienez % 25eko zeharkako partaidetza baldin badu bigarrenaren kapital sozialean edo haren fondo propioetan.

i) Bi entitate, baldin eta bertako bazkideek edo partaideek edo haien ezkontideek, maiatzaren 7ko 2/2003 Legearen arabera eratutako izatezko bikoteko bikote-lagunek, edo ahaidetasun harreman batek lotutako pertsonek, zuzenean edo zeharka, gutxienez % 25eko partaidetza baldin badute kapital sozialean edo fondo propioetan. Ahaidetasun harremana zuzenekoa zein zeharkakoa izan daiteke, odolkidetasunezkoa, ezkontza bidezkoa edo izatezko bikoteak ekar lezakeena, hirugarren mailaraino.

j) Espainiako lurraldean egoitza duen entitate bat eta atzerrian dituen establezimendu iraunkorrak.

k) Espainiako lurraldean egoitzarik ez duen entitate bat eta lurralde horretan dituen establezimendu iraunkorrak.

l) Talde bereko bi entitate, talde horrek sozietate kooperatiboen taldeen araubidean tributatzen duenean.

Lotura hori bazkide edo partaideen eta entitatearen arteko harremanaren arabera definitzen bada, partaidetzak % 5ekoa edo handiagoa izan beharko du, edo % 1ekoa edo handiagoa merkatu arautu batean negoziatzeko onartzen diren baloreak izanez gero. Administratzaileei egindako aipamenak zuzenbidezkoak eta izatezkoak hartuko ditu.

Taldea existitzen da zenbait sozietatek unitate erabakitzaile bat eratzen dutenean Merkataritza Kodeak 42. artikuluan ezarritako irizpideei jarraikiz, egoitza nonahi dutela ere eta urtero kontu bateratuak aurkezteko obligazioa eragotzi gabe.

4.– Merkatuko balio normala kalkulatzeko, metodo hauetako bat aplikatuko da:

a) Prezio libre alderagarriaren metodoa. Pertsona edo entitate lotuen arteko eragiketa batean ondasun edo zerbitzu batek duen prezioa eta pertsona edo entitate independenteen arteko eragiketa batean ondasun edo zerbitzu berdinak edo antzeko batek pareko zirkunstantzietan duena alderatzen dira. Beharrezkoa izanez gero, bidezko zuzenketak egiten dira baliokidetasuna lortzeko eta eragiketaren berezitasunak aintzat hartzeko.

b) Kostu gehituaren metodoa. Ondasunaren edo zerbitzuaren eskurapen balioari edo produkzio kostuari gehitu egiten zaio pertsona edo entitate independenteekin egindako eragiketa berdinetan edo antzekoetan ohikoa den marjina, edo halakorik ezean, pertsona edo entitate independenteek pareko eragiketei aplikatzen dietena. Beharrezkoa izanez gero, bidezko zuzenketak egiten dira baliokidetasuna lortzeko eta eragiketaren berezitasunak aintzat hartzeko.

c) Birsalmenta prezioaren metodoa. Ondasun edo zerbitzuaren salmenta preziotik kendu egiten da birsaltzaileak pertsona edo entitate independenteekin egindako eragiketa berdinetan edo antzekoetan aplikatzen duen marjina, edo halakorik ezean, pertsona edo entitate independenteek pareko eragiketei aplikatzen dietena. Beharrezkoa izanez gero, bidezko zuzenketak egiten dira baliokidetasuna lortzeko eta eragiketaren berezitasunak aintzat hartzeko.

d) Emaitza banatzeko metodoa. Eragiketa bat edo gehiago batera egiten dituen pertsona edo entitate bakoitzari egozten zaio eragiketa horretan edo horietan lortutako emaitza osoaren zatia, pertsona edo entitate independenteek antzeko egoeretan adostuko lituzketen baldintzak egoki biltzen dituzten irizpideak erabiliz.

e) Eragiketa guztien marjina garbiaren metodoa. Pertsona edo entitate lotu batekin egindako eragiketei egozten zaie zergadunak, edo hirugarren batzuek, pertsona independenteen arteko eragiketa berdinetan edo antzekoetan lortuko zuten emaitza garbia, kostuen gainean, salmenten gainean edo eragiketen ezaugarrien arabera egokien den magnitudearen gainean kalkulatua. Beharrezkoa izanez gero, bidezko zuzenketak egiten dira baliokidetasuna lortzeko eta eragiketaren berezitasunak aintzat hartzeko.

Artikulu honetako 1. idatz-zatian aipatzen den alderagarritasun azterketa eta pareka daitezkeen eragiketei buruzko informazioa hartuko dira kontuan baloratze metodorik egokiena aukeratzeko kasu bakoitzean, idatz-zati honetan xedatzen denaren arabera.

43. artikulua.– Lotutako pertsona edo entitateen arteko eragiketen tratamendua: dokumentazioaren inguruko betebeharrak.

1.– Pertsona edo entitate lotuek artikulu honetan aipatutako dokumentazioa eduki beharko dute zerga-administrazioaren eskura.

Lotutako pertsona edo entitateen arteko eragiketen merkatu-balioa kalkulatzeko, zerga-administrazioak eskatuz gero, zergadunak artikulu honetan eta artikulu hau garatzen duten arauetan adierazitako agiriak aurkeztu beharko ditu. Agiri horiek zerga-administrazioaren eskura egon beharko dira Zergaren autolikidazioa aurkezteko borondatezko epealdia amaitzen denetik aurrera.

Betebehar hori gorabehera, zerga-administrazioak bere eginkizunak betetzeko beharrezkotzat jotzen dituen agiri eta datu guztiak eskatu ahal izango ditu, Gipuzkoako Lurralde Historikoko Zergei buruzko Foru Arau Orokorrean eta hura garatzen duen arautegian xedatutakoaren arabera.

2.– Artikulu honetan aipatzen diren agiriak prestatzeko, kontuan hartu behar dira eragiketen konplexutasuna eta bolumena, Administrazioak egiaztatu ahal izan dezan eragiketen balorazioa bat datorrela foru-arau honetako 42. artikulutik 46.era bitartekoetan ezarritakoarekin. Dokumentazioa prestatzeko, zergadunek beste xede batzuetarako erabilgarri duten informazio garrantzitsu guztia erabil dezakete. Hauxe da aurkeztu beharreko dokumentazioa:

a) Zergadunaren taldeari buruzko dokumentazioa. Horren ondorioetarako, taldea foru-arau honetako 42. artikuluko 3. idatz-zatian ezarritakoa da, bai eta entitate batek (egoiliarra zein ez-egoiliarra) eta atzerrian edo Espainiako lurraldean dituen establezimendu iraunkorrek eratutakoa ere.

Foru-arau honetako 42. artikuluko 3. idatz-zatian ezarritakoaren arabera eratutako taldeen kasuan, entitate nagusiak berak presta eta gorde dezake talde osoaren dokumentazioa. Entitate nagusia ez badago foru-arau honen eraginpean, taldeko sozietate bat izendatu behar du, foru-arau honen eraginpean dagoena, dokumentazioa gordetzeko.

Aurreko paragrafoan xedatutakoa gorabehera, zerga-administrazioak eskatuz gero, zergadunek taldeari buruzko dokumentazioa aurkeztu beharko dute, hain zuzen ere behar diren agiri guztiak, egiazko datuekin, ezarritako epealdiaren barruan.

b) Zergadunari buruzko dokumentazioa.

3.– Honako hauek jaso behar dira taldeari buruzko dokumentazioan:

a) Taldearen antolaketa alorreko egituraren, egitura juridikoaren eta operatiboaren deskripzio orokorra, bai eta aipatu egituretan izandako edozein aldaketa garrantzitsu ere.

b) Taldea osatzen duten eta eragiketa lotuak egiten dituzten entitateen identifikazioa, baldin eta zergadunak egindako eragiketei zuzenean edo zeharka eragiten badiete.

c) Taldeko entitateen arteko eragiketa lotuen izaeraren, zenbatekoen eta fluxuen deskripzio orokorra, baldin eta zergadunak egindako eragiketei zuzenean edo zeharka eragiten badiete.

d) Taldeko entitateek betetzen dituzten eginkizunen eta entitateok euren gain hartzen dituzten arriskuen deskripzio orokorra, baldin eta zergadunak egindako eragiketei zuzenean edo zeharka eragiten badiete, aurreko zergaldiarekin konparatuta izandako aldaketak barne.

e) Patente, marka, izen komertzial eta gainerako aktibo ukiezinen titularren zerrenda, baldin eta zergadunak egindako eragiketei zuzenean edo zeharka eragiten badiete, bai eta haiek erabiltzean izandako kontraprestazioen zenbatekoa ere.

f) Taldeak transferentzia-prezioen alorrean duen politikaren deskripzioa, politika hori lehia librearen printzipioarekin bat datorrela justifikatzearren; deskripzioan jaso behar dira taldeak prezioak finkatzeko onartu duen metodoa edo metodoak.

g) Zerbitzuak emateko kontratuen eta kostuen banaketari buruz taldeko entitateen artean egindako akordioen zerrenda, baldin eta akordio horiek zergadunak egindako eragiketei zuzenean edo zeharka eragiten badiete.

h) Taldeko entitateei buruzko aurretiazko balorazio akordioen eta eginak diren edo egiten ari diren adiskidetasunezko prozeduren zerrenda, baldin eta zergadunak egindako eragiketei zuzenean edo zeharka eragiten badiete.

i) Taldearen memoria edo, halakorik ez bada, urteko txosten baliokidea.

Zergadunak taldeko beste edozein entitaterekin eragiteka lotuak egin dituen zergaldiari buruzkoak izango dira idatz-zati honetan ezarritako dokumentazio betebeharrak, eta foru-arau honetako 13. artikuluko 1. eta 2. idatz-zatietan xedatutakoa betetzen ez duten taldeei eskatu ahal izango zaizkie, artikulu bereko 7. idatz-zatian ezarritakoa aintzat hartuta.

Zergaldi baterako prestatutako agiriek ondorengo beste batzuetan baliozkoak izaten jarraitzen badute, ez da beharrezkoa izango agiri berriak prestatzea, baina, behar izanez gero, egokitzapenak egingo dira.

4.– Zergadunaren dokumentazio berariazkoan honakoak jaso beharko dira:

a) Zergadunaren eta horrekin batera eragiketa egiten duten pertsona edo entitateen izen-deiturak edo sozietatearen izena edo izendapen osoa, zerga-egoitza eta identifikazio fiskaleko zenbakia, bai eta eragiketaren izaeraren deskripzio zehatza, ezaugarriak eta zenbatekoa ere.

Era berean, paradisu fiskaltzat hartutako herrialde edo lurraldeetan egoiliar diren pertsona edo entitateekin egindako eragiketak direnean, pertsona edo entitate horien izenean eragiketan esku hartu duten pertsonak identifikatu behar dira, eta, eragiketak entitateekin egiten badira, horien administratzaileen identifikazioa aurkeztu behar da.

b) Alderagarritasun azterketa, foru-arau honetako 42. artikuluko 1. idatz-zatian azaldutako moduan egina.

c) Aukeratutako balorazio-metodoa hautatzeari buruzko azalpena; bertan adierazi behar da zergatik hautatu den metodo jakin hori, metodoa nola aplikatuko den, eta zehaztu behar da zein den hartatik eratorritako balioa edo balio-tartea.

d) Hainbat pertsona edo entitate loturi elkarrekin emandako zerbitzuengatiko gastuak banatzeko irizpideak, eta dagozkien akordioak, halakorik bada, eta kostuak banatzeko akordioak, foru-arau honetako 44. artikuluan aipatzen direnak.

e) Zergadunak bere eragiketa lotuen balorazioa zehazteko erabilitako beste edozein informazio garrantzitsu, eta beste bazkide batzuekin sinatutako itun parasozialak.

Zergadunak eragiteka lotua egin duen zergaldiari buruzkoak izango dira idatz-zati honetan ezarritako dokumentazio betebeharrak.

Zergaldi baterako prestatutako agiriek ondorengo beste batzuetan baliozkoak izaten jarraitzen badute, ez da beharrezkoa izango agiri berriak prestatzea, baina, behar izanez gero, egokitzapenak egingo dira.

Idatz-zati honetan ezarritako dokumentazio betebeharrak beren osoan eskatu ahal izango dira, salbu eta eragiketan esku hartzen duen alderdiren bat foru-arau honetako 13. artikuluko 1. eta 2. idatz-zatietan aipatzen diren entitateetako bat denean edo pertsona fisikoa denean, eta zerga-paradisutzat jotzen diren herrialde edo lurraldeetan egoitza duten pertsona edo entitateekin egindako eragiketak ez direnean; kasu horretan, zergadunaren berariazko dokumentazio betebehar erraztuak ezarri ahal izango dira arau bidez.

5.– Ez dira artikulu honetan ezarritako dokumentazio betebeharrak eskatuko eragiketa lotu hauek egiten direnean:

a) Zerga-baterakuntzaren araubideko talde berean dauden entitateen arteko eragiketak, baldin eta taldeak foru-arau honetako VI. tituluko VI. kapituluan jasotako araubidea hautatu badu.

b) Ekonomia intereseko taldeek, Ekonomia Intereseko Taldeei buruzko apirilaren 29ko 12/1991 Legean ezarritakoari jarraiki, eta aldi baterako enpresa elkarteek, Enpresa taldeen eta aldi baterako elkarteen eta eskualdeko industria garapenerako sozietateen zerga-araubideari buruzko maiatzaren 26ko 18/1982 Legean araututa eta dagokien erregistro berezian inskribatuta daudenek, euren kideekin edo foru-arau honetako VI. tituluko VI. kapituluan jasotako araubidea hautatu duen talde bereko beste entitate batzuekin egiten dituzten eragiketak.

c) Baloreak saltzeko eskaintza publikoen edo baloreak eskuratzeko eskaintza publikoen barruan egindako eragiketak.

d) Foru-arau honetako 13. artikuluan xedatutakoaren arabera mikroenpresa zein enpresa txiki edo ertain diren zergapekoek egindako eragiketak, baldin eta dena delako zergaldian pertsona edo entitate lotuekin egindako eragiketa guztien zenbatekoa ondokoa baino gehiago ez bada:

– Mikroenpresen edo enpresa txikien kasuan, 250.000 euroko merkatu-balioa (gainera ezin da izan eragiketa guztien % 20 baino gehiago), eta

– Enpresa ertainen kasuan, 400.000 euroko merkatu-balioa (gainera ezin da izan eragiketa guztien % 15 baino gehiago).

Letra honetan aipatzen diren zenbatekoak zehazteko, zergapekoak hurrengo 6. idatz-zatian aipatzen diren eragiketak eginez gero, eragiketa bakoitzeko kontuan hartu beharreko gutxieneko zenbatekoa idatz-zati horretan ezarritakoa aplikatuta kalkulatuko da; bestela, zergapekoak bere autolikidazioan aitortutako baliorik handiena izango da.

e) Ez-egoiliarren Errentaren gaineko Zergaren zergadunek egindako eragiketak, baldin eta zergadunok establezimendu iraunkorrik gabe ari badira.

f) Espainiako Bankuak onartutako babes-sistema instituzional batean sartuta dauden kreditu-entitateek haien artean egindako eragiketak, baldin eta eragiketok zerikusia badute sistema horrek maiatzaren 25eko 13/1985 Legearen 8. artikuluko 3. paragrafoaren d) idatz-zatian zehazten diren baldintzak betetzearekin. Lege hori, hain zuzen ere, finantza-bitartekarien inbertsio-koefizienteei, baliabide propioei eta informazio obligazioei buruzkoa da.

g) Zergaldian zehar pertsona edo entitate lotu berarekin egindako eragiketak, baldin eta eragiketa horien guztien kontraprestazioaren merkatuko balioa 500.000 euro baino txikiagoa bada. Batuketa hori egiterakoan, ez dira batuko idatz-zati honetako 1.a, 2.a, 3.a eta 4.a zenbakietan zein hurrengoetan aipatzen diren eragiketak.

Salbuespenerako arrazoi hori ez da aplikatuko kasu honetan:

1.a Artikulu honetako 6. eta 7. paragrafoetan aipatzen diren eragiketak badira; izan ere, kasu horretan, manu haietan zehazten dena aplikatuko da.

2.a Pertsona Fisikoen Errentaren gaineko Zergaren zergadunek, zenbatespen objektiboko araubidea aplikagarria zaion ekonomi jarduera bat egiterakoan, sozietateekin egiten dituzten eragiketak, baldin eta zergadunek beraiek edo haien ezkontideek, izatezko bikote lagunek –bikotea maiatzaren 7ko 2/2003 Legearen arabera osatu bada–, aurreko ahaideek edo ondorengo ahaideek, banaka edo horiek guztiek batera, sozietateon kapital sozialaren edo funts propioen % 25 edo gehiago badute.

3.a Eragiketa bada edo negozioen eskualdaketa, edo, bestela, 2004/39/EE Zuzentarauan definitutako balore-merkatu batean negoziatzeko onartuta ez dauden entitateetako baloreen edo entitateotako funts propioetako partaidetza ordezkatzen duten partaidetzen eskualdaketa.

4.a Eragiketa bada edo higiezinen eskualdaketa, edo kontabilitate-irizpideen arabera ukiezintzat jotzen diren aktiboen gaineko edozein eragiketa.

6.– Aurreko idatz-zatian xedatutakoa gorabehera, dokumentazioaren inguruko betebeharrak ez zaizkie aplikatuko foru-arau honetako 13. artikuluan xedatutakoaren arabera mikroenpresa edo enpresa txiki nahiz ertain diren pertsona edo entitate lotuei ere, ondoko eragiketa hauetan:

a) Zerbitzugintzak, baldin eta haien ordainsariak lanaren edo jarduera ekonomikoen etekinak badira hartzailearentzat Pertsona Fisikoen Errentaren gaineko Zergari buruzko Foru Arauan xedatutakoaren ondoreetarako; betiere, egindako zerbitzuen truke jasotzen diren diruzko ordainsarien zenbatekoak honako hauetatik handiena gainditzen badu:

– Urtean 36.000 euro edo 60.000 euro, hurrenez hurren mikroenpresa eta enpresa txikien kasuan edo enpresa ertainen kasuan, lanaldi osoko dedikazioa duten pertsona fisiko lotuentzat, edo horren zati proportzionala, bestela.

– Lotutako pertsona fisikoaren antzeko lanak egiten dituzten besteren konturako langileen artean gehien kobratzen duenaren ordainsaria.

– Lotutako pertsona fisikoak zerbitzu beraiengatik azken bi urteetan jasotako ordainsarien batez bestekoa.

Horrelako ordainsariak aurreko bi urteetako batean soilik jaso badira, ekitaldi horretan jasotako zenbatekoa hartuko da aintzat.

Ordainsari horiek egutegiko urtea baino aldi laburragoan jaso badira, urtebetean jasoko zen zenbatekoa kalkulatuko da letra honetan hizpide dugun zenbatekoa zehazteko.

b) Finantzaketa eragiketak, baldin eta egindako finantzaketa eragiketen truke jasotzen diren diruzko ordainsarien zenbatekoak honako hauetatik handiena gainditzen badu:

– Oro har, urteko korritu tasa nominala aplikatzearen emaitzako kopurua; tasa hori erreferentziakoari («Euribor urtebetera») bi puntu gehituta kalkulatuko da.

Hala ere, finantza-eragiketa batean mailegaria lotutako pertsona fisikoa bada, zenbatekoa kalkulatzeko aplikatu beharreko urteko korritu tasa nominala hauxe izango da: erreferentziako tasa («Euribor urtebetera») gehi bost puntu.

Atal honetan xedatutakoaren ondoreetarako, «Euriborra urtebetera» deritzon erreferentziako tasa ofiziala Espainiako Bankuak Estatuko Aldizkari Ofizialean argitaratzen duena izango da. Finantzaketa eragiketa bakoitzerako hura formalizatu aurretik argitaratu den azken tasa hartuko da aintzat.

– Lotutako pertsona edo entitateen artean aurreko bi urteetan egindako finantzaketa-eragiketen ondoriozko batez besteko tasa.

Finantzaketa-eragiketei aurreko gutxieneko atalasea aplikatuko zaie, iraupena bost urte baino luzeagoa izan ezean. Hori baino aldi luzeagorako ituntzen diren eragiketen kasuan, korritu tasa bost urtean behin eguneratuko da: bost urteko aldiko lehen egunean indarrean dagoena izango da.

c) Ondasun higiezinen errentamendua, azpierrentamendua edo haiek erabili eta lupertzeko eskubide errealen eraketa edo lagapena; betiere, errentamenduen, azpierrentamenduen edo ondasun higiezinak erabili eta lupertzeko eskubide errealen eraketaren nahiz lagapenaren truke jasotzen diren diruzko ordainsarien zenbatekoak honako hauetatik handiena gainditzen badu:

– Higiezinaren balio katastral eratxikigarriari urteko % 4ko tasa aplikatuta ateratzen den zenbatekoa. Higiezinak balio katastralik ez badu, arauz zehazten den balioa hartuko da.

– Lotutako pertsonak edo entitateak mota bereko errentamendu edo azpierrentamenduengatik edo erabiltzeko eta gozatzeko eskubide errealen eraketa edo lagapenengatik azken bi urteetan jasotako ordainsarien batez bestekoa.

Horrelako ordainsariak aurreko bi urteetako batean soilik jaso badira, ekitaldi horretan jasotako zenbatekoa hartuko da aintzat.

Ordainsari horiek egutegiko urtea baino aldi laburragoan jaso badira, urtebetean jasoko zen zenbatekoa kalkulatuko da letra honetan hizpide dugun zenbatekoa zehazteko.

Idatz-zati honetan ezarritako salbuespena aplikatzeko ezinbestekoa da eragiketa bakoitzean betetzea arauz ezartzen diren betekizunak, bai eta zergapekoek eragiketen balioa aitortzea eta balio hori, gutxienez, aurreko a), b) eta c) letretan ezarritako atalaseetara iristea ere.

Idatz-zati honetan xedatutakoa aplikatuko zaie, halaber, foru-arau honetako 12. artikuluan aipatzen diren entitateei edo 14. artikuluko 1. idatz-zatiko a) letran ezarritako baldintzak betetzen dituztenei, bai eta higiezinen errentamenduaren arloko jarduera kualifikatua duten entitateen eta kooperatiba sozietateen araubide bereziak aplikagarri zaizkien entitateei ere, baldin eta entitate horiek kasu guztietan betetzen badituzte foru-arau honetako 13. artikuluko 1. eta 2. eta 3. idatz-zatietako b), c) eta d) letretan zehazten diren baldintzak.

Idatz-zati honetan ezarritako zenbatekoak egokitu ahal izango dira, arau bidez, prezioen bilakaerari erreparatuta, edo zerga-administrazioak erabilitako azterlan eta egiaztapenen arabera zehazten diren batez besteko ordainsariak kontuan hartuta.

7.– Aparteko kasuetan, aurreko idatz-zatian aipatutako eragiketen balioa ez bada iristen idatz-zati horretako a), b) eta c) letretan ezarritako gutxieneko atalaseetara baina zergapekoak frogatu ahal badu dokumentazioaren inguruko betebeharrek neurriz kanpoko administrazio-zama ezartzen diotela, eta arauz ezarritako gainerako betekizunak betetzen baditu eragiketa guztietan, Ogasun Zuzendaritza Nagusiari eskatu ahal izango dio betebehar horietatik salbu utz dezala.

Idatz-zati honetan ezarritako dokumentazio betebeharretatik salbuesteko prozedura arau bidez zehaztuko da.

8.– Aurreko 5. paragrafoko d) eta g) idatz-zatietan eta 6. eta 7. paragrafoetan zehazten dena ez zaie aplikatuko honako eragiketa hauei:

a) Egoitza zerga-paradisutzat jotzen den herrialde edo lurralde batean duten pertsona edo entitate lotuekin egindako eragiketak; salbuespena: egoitza Europar Batasuneko estatu batean dutenekin egindakoak, baldin eta zergadunak frogatzen badu eragiketa baliozko arrazoi ekonomikoengatik egin dela eta pertsona edo entitate horiek jarduera ekonomikoak egiten dituztela.

b) Gipuzkoako Lurralde Historikoko Zergei buruzko martxoaren 8eko 2/2005 Foru Arau Orokorreko 14. edo 15. artikuluetan ezarritako guztia betetzen duten eragiketak.

c) Pertsona edo entitate lotuen artean egindako eragiketen balioa frogatzeko araubide berariazkoa arau bidez ezartzen den gainerako kasuetan.

9.– Artikulu honetan aipatzen den bezala zergapeko bat dokumentazioaren inguruko betebeharretatik aske geratu arren zerga-administrazioak lotutako eragiketei aplikatu beharreko merkatuko balioa egiaztatu ahal izango du eta behar diren likidazio-egintza administratiboak eman ahal izango ditu.

Nolanahi ere, zergapekoari ezin ezarri izango zaio zehapenik horregatik, baldin eta eragiketei artikulu honetako 6. idatz-zatian ezarritako gutxieneko atalaseak aplikatzearen emaitzako balioa edo handiagoa aplikatu badie.

44. artikulua.– Lotutako pertsona edo entitateen arteko eragiketen tratamendua: talde barruko zerbitzu prestazioak eta kostuak banatzeko akordioak.

1.– Entitate lotuen arteko zerbitzuengatik izandako gastuak, foru-arau honetako 42. artikuluko 4. idatz-zatian ezarritakoaren arabera baloratuak, kengarriak izango dira baldin eta emandako zerbitzuek abantaila edo onura ekartzen badiote edo ekar badiezaiokete hartzaileari.

Zerbitzuak hainbat pertsona edo entitate loturen alde egindakoak direnean, eta betiere jasotako zerbitzua ezin bada indibidualizatu edo ordainsariaren elementuak kuantifikatzerik ez badago, zilegi izango da kontraprestazio osoa pertsona edo entitate onuradunen artean banatzea arrazionaltasun irizpideak beteko dituzten banaketa erregelei jarraikiz.

Irizpide hori betetzen dela joko da baldin eta aplikatutako metodoak, zerbitzuaren izaerari eta zirkunstantziei begiratzeaz gainera, pertsona edo entitate hartzaileek lortutako edo lor ditzaketen onurak ere kontuan hartzen baditu.

2.– Pertsona edo entitate lotuek ondasun edo zerbitzuen kostuak banatzeko izenpetzen duten akordiotik eratorritako gastuak, foru-arau honetako 42. artikuluko 4. idatz-zatian jasotakoaren arabera baloratuak, kengarriak izango dira honako baldintzak betetzen badira:

a) Nahitaezkoa da akordioa izenpetzen duten pertsona edo entitateek akordioaren ondorioz eskuratu, produzitu edo garatzen diren aktibo edo eskubideen jabe egitea edo antzeko ondorio ekonomikoak dituen beste eskubideren bat eskuratzea.

b) Parte hartzen duen pertsona edo entitate bakoitzaren ekarpenak kontuan izan behar du zein onura edo abantaila espero dituen haietako bakoitzak jasotzea akordiotik arrazionaltasun irizpideen arabera.

c) Akordioak aurreikusiko du zirkunstantziak edo bertan parte hartzen duten pertsona zein entitateak aldatu daitezkeela, eta hori aintzat hartuta, egoki iritzitako doikuntzak eta konpentsazio-ordainketak ezarriko ditu.

d) Pertsona edo entitate lotuen artean sinatutako akordioan identifikatu egin beharko dira gainerako pertsona edo entitate parte-hartzaileak, foru-arau honetako 43. artikuluko 4. idatz-zatiko a) letran ezarritako moduan, akordioek estaltzen dituzten jarduera eta proiektu berariazkoen eremua, haien iraupena, espero diren mozkinak partaideen artean banatzeko irizpideak, partaideen ekarpenak kalkulatzeko era, partaideen eginkizun eta erantzukizun zehatzak, partaideak atxikitzearen edo banantzearen ondorioak eta, oro har, inguruabar ekonomikoen aldaketak akordioan islatzearren horren baldintzak egokitu litezkeela aurreikusten duen beste edozein xedapen.

3.– Artikulu honetan xedatutakoa aplikatzeko kontuan hartu beharko dira foru-arau honek hurrengo artikuluan ezartzen dituen interpretazio irizpideak eta prozedura arauak. Halaber aplikagarriak izango dira, dagokien neurrian, pertsona eta entitate lotuen arteko eragiketetako dokumentazio betebeharrei buruzko arauak, foru-arau honetako 43. artikuluan ezarritakoak.

45. artikulua.– Lotutako pertsona edo entitateen arteko eragiketen tratamendua: interpretazio irizpideak eta prozedura arauak.

1.– Foru-arau honetako aurreko hiru artikuluetan xedatutakoa interpretatu eta aplikatzerakoan aintzat hartu beharko dira, lehentasunez, Ekonomia Lankidetza eta Garapenerako Antolakundeak transferentzia prezioen arloan emandako jarraibideak, bai eta Transferentzia Prezioei buruzko Europar Batasuneko Baterako Foroaren lanen ildotik ezarritako irizpideak ere.

2.– Eragiketetan hitzartutako balioa merkatuko balio normalarekin bat ez datorrenean, bi balio horien arteko aldeari pertsona edo entitate lotuentzat emango zaion tratamendu fiskala alde horren ondorioz agerian jarritako errenten izaerari dagokiona izango da.

Hori dela eta, lotura bazkide edo partaideek entitatearekin duten harremanaren arabera definitzen den kasuetan, diferentzia horrek honako tratamendu hau jasoko du, kontrakorik frogatzen ez bada:

a) Diferentzia bazkidearen edo partaidearen aldekoa denean, entitatearentzat, bazkide edo partaide horrek entitatean duen partaidetza-portzentajearekin bat datorren diferentziaren zatia fondo propioen ordainsaria izango da, eta bazkidearentzat, berriz, entitateen mozkinen gaineko partaidetza, berriz.

Entitateko partaidetzaren ehunekoari ez dagokion diferentzia zatia, entitatearentzat, funts propioen ordainketa gisa hartuko da, eta bazkide edo partaidearentzat, berriz, bazkide, akziodun, elkartekide edo partaide izateagatik entitate batetik jasotako onura gisa, Pertsona Fisikoen Errentaren gaineko Zergari buruzko Foru Arauko 34. artikuluko d) letran xedatutakoarekin bat etorriz.

b) Diferentzia entitatearen aldekoa denean, bazkide edo partaide horrek entitatean duen partaidetza-portzentajearekin bat datorren diferentziaren zatia bazkide edo partaideak entitatearen fondo propioetara egindako ekarpena izango da, eta bazkide edo partaidearen partaidetzaren eskuratze-balioa handituko du.

Bazkide edo partaideak entitatean duen partaidetza-portzentajearekin bat ez datorren diferentziaren zatia errenta izango da entitatearentzat, eta liberalitatea, berriz, bazkide edo partaidearentzat. Establezimendu iraunkorrik ez duten Ez-egoiliarren Errentaren gaineko Zergako zergadunen kasuan, ondare-irabazitzat joko da errenta, Ez-egoiliarren Errentaren gaineko Zergari buruzko Foru Arauko 12. artikuluko 2. idatz-zatiko k) letrako d') letran ezarritakoarekin bat.

3.– Subjektu pasiboek zerga-administrazioari eskatu diezaiokete pertsona edo entitate lotuen arteko eragiketak balora ditzala horiek burutu aurretik. Eskaerari merkatuko balio normalean oinarritutako proposamena erantsiko zaio.

Zerga-administrazioak akordioak izenpetu ahal izango ditu beste administrazio batzuekin, eragiketen merkatuko balio normala elkarrekin finkatzeko.

4.– Aurreko idatz-zatian aipatutako balorazio akordioak ondorioak sortuko ditu bera onesten den egunetik aurrera egiten diren eragiketetan, eta akordioan bertan zehazten diren zergaldietan izango du balioa.

Akordioan ezarri ahal izango da, orobat, uneko zergaldiko eragiketetan eta are aurrekoan ere egindakoetan izango dituela ondorioak, betiere kasuan kasuko zerga aitorpena aurkezteko borondatezko epea oraindik amaitu ez bada.

Zerga-administrazioaren akordioa onesterakoan aintzat hartutako inguruabar ekonomikoak nabarmen aldatzen badira, akordioa aldatu ahal izango da inguruabar ekonomiko berrietara egokitzeko.

Aurreko idatz-zatian aipatutako proposamenak ezetsitzat jo ahal izango dira horiek ebazteko sei hilabeteko epea amaitzen denean. Epe hori kontatuko da proposamena aurkezten den egunetik aurrera edo, zerga-administrazioak akatsen bat zuzentzeko eskatzen badu, hura zuzentzen denetik aurrera.

5.– Erregelamendu bidez finkatuko da zein prozedura erabiliko den eragiketa lotuen balorazio akordioak ebazteko eta horiek luzatu ahal izateko.

Aipatutako akordioak foru-arau honetako 44. artikuluan araututako zerbitzu prestazioei eta kostuak banatzeko akordioei buruzkoak ere izan daitezke.

6.– Erregelamendu bidez arautuko da nola egiaztatu eragiketa lotuetan merkatuko balio normala, honako arauei jarraikiz:

a) Balio egiaztapena bere zerga-egoera egiaztatu behar zaion zergadunari hasitako prozeduraren barruan egingo da. Hurrengo b) letran xedatutakoa eragotzi gabe, jarduketak zergadun horri zuzenduta egongo dira, ez beste inori.

b) Balioa zuzentzearen ondorioz zergadunari likidazioa egiten bazaio eta hark likidazioaren aurka errekurtso edo erreklamazioa aurkezten edo perituen tasazio kontrajarria eskatzen badu, inguruabar horren berri emango zaie ukitutako gainerako pertsona edo entitate lotuei, prozeduran agertu eta alegazioak aurkeztu ahal izan ditzaten.

Ezarritako epeak amaitu eta zergadunak ez badu errekurtso edo erreklamaziorik aurkeztu edo perituen tasaziorik eskatu, balorazioa jakinaraziko zaie ukitutako gainerako pertsona edo entitate lotuei, nahi izanez gero perituen tasazioa elkarrekin sustatu edo bidezko errekurtso edo erreklamazioa batera aurkezteko. Errekurtso edo erreklamazioa jartzen bada edo perituen tasazio kontrajarria sustatzen bada, etenda geratuko da zerga-administrazioak zergadunari likidazioa eginez zerga-zorra zehazteko duen eskubidearen preskripzio epea, eta Administrazioak egindako balorazioa irmo bihurtzen denean hasiko da berriro kontatzen.

c) Likidazioan jasotako balorazioa irmo bilakatzeak eraginkortasuna eta irmotasuna emango dizkio merkatuko balioari gainerako pertsona edo entitate lotuen aurrean, eta azken horiek bidezko erregularizazioak egin ahal izango dituzte irmotasun hori gertatzen den unean edo zergaldian, arauz ezartzen den eran.

d) Balioaren zuzenketagatik eraginda gertatzen diren pertsona edo entitate lotuei paragrafo honetan xedatutakoa aplikatuko zaie baldin eta Sozietateen gaineko Zergaren subjektu pasiboak, Pertsona Fisikoen Errentaren gaineko Zergaren zergadunak, edo Ez-egoiliarren Errentaren gaineko Zergaren zergadunen establezimendu iraunkorrak badira.

e) Lotutako beste alderdiak egindako eragiketak merkatuko balio normalaren arabera baloratzeko eskumena beste zerga-administrazio bati dagokionean, administrazio horri prozedura hasi izanaren berri emango zaio bidezkoak diren ondorioetarako.

f) Paragrafo honetan xedatutakoak ez du galaraziko barne antolamenduaren parte diren nazioarteko itun eta hitzarmenetan ezarritakoa aplikatzea.

7.– Balorazioak zuzentzen badira artikulu honetan xedatutakoaren indarrez, eta zuzenketa horrek nazioarteko zergapetze bikoitza badakar, zerga-administrazioak, zergadunaren eskariz, hura saihesteko prozedura abiaraziko du, zergapetze bikoitza saihesteko kasu bakoitzean aplikagarri den nazioarteko hitzarmenean edo gaiari buruzko beste edozein nazioarteko akordiotan ezarritakoari jarraikiz.

Horri dagokionez, aplikagarria izango da Ez-egoiliarren Errentaren gaineko Zergari buruzko Foru Arauaren laugarren xedapen gehigarrian ezarritakoa.

46. artikulua.– Lotutako pertsona edo entitateen arteko eragiketen tratamendua: zehapen araubidea.

1.– Gipuzkoako Lurralde Historikoko Zergei buruzko Foru Arauan xedatutakoa eragotzi gabe, zerga-arloko arau-haustetzat hartuko da foru-arau honetako 43. artikuluan eta hori garatzen duen araudian jasotakoari jarraituz pertsona edo entitate lotuek zerga-administrazioaren eskura jarri behar duten dokumentazioa ez aurkeztea edo dokumentazio osatugabea, zehaztugabea edo datu faltsuak dituena aurkeztea.

Zerga-arloko arau-haustetzat hartuko da, era berean, aipatutako artikuluan eta hori garatzen duen araudian aurreikusitako dokumentaziotik ondorioztatzen den merkatuko balio normala ez izatea Sozietateen gaineko Zergan, Pertsona Fisikoen Errentaren gaineko Zergan edo Ez-egoiliarren Errentaren gaineko Zergan aitortutako balio bera.

2.– Aurreko idatz-zatian azaldutako arau-hausteengatik zehapenak ezarriko dira honako arau hauei jarraituz:

a) Zerga-administrazioak balorazioa zuzentzea egokia ez denean Sozietateen gaineko Zergaren, Pertsona Fisikoen Errentaren gaineko Zergaren edo Ez-egoiliarren Errentaren gaineko Zergaren kargapeko eragiketei dagokienez, diruzko isun finkoa jarriko da: isilean gordeta, zehaztu gabe edo faltsututa dagoen datu bakoitzeko 1.500 euro eta, berriz, 15.000 euro datu multzo bakoitzeko, betiere zergaduna den aldetik foru-arau honetako 43. artikuluan taldearentzat edo entitate bakoitzarentzat ezartzen den dokumentazio betebehar bakoitzari dagokionez.

Letra honetan ezarritakoaren ondorioetarako, datu multzo banatzat hartuko dira, taldeari buruzko dokumentazioari dagokionez, foru-arau honetako 43. artikuluko 3. idatz-zatiko a), c), d), f) eta i) letretan jasotako informazioak. Ondorio horietarako, datutzat joko da idatz-zati horretako b) eta e) letretan aipatzen diren pertsona, entitate edo zenbatekoei buruzko informazioa. Datutzat hartuko da, halaber, aipatu 1. paragrafoko g) eta h) idatz-zatietan jasota dauden hauetako bakoitza: kostuak banatzeko akordioak, zerbitzuak emateko kontratuak, aurretiazko balorazio-akordioak eta adiskidetasunezko prozedurak.

Bestalde, zergadunaren dokumentazio berariazkoa dela eta, eragiketa bakoitzari edo eragiketa multzo bakoitzari dagokionez, horiek elkarrekin lotura estua badute edo zergapekoak etenik gabe egin baditu, foru-arau honetako 43. artikuluko 4. idatz-zatiko b), c), d) eta e) letretan aipatzen diren informazioak datu multzo banatzat hartuko dira. Ondorio horietarako, datutzat joko da aurreko idatz-zati horretako a) letrak aipatzen duen pertsona edo entitate bakoitzari buruzko informazioa.

Baldin eta arau bidez, foru-arau honetako 43. artikuluko 4. idatz-zatiko azken lerroaldean ezarritakoaren babesean, dokumentazio betebehar erraztuak ezartzen badira idatz-zati horretan aipatutako zergadunentzat, arau bidezko garapenean zehaztu egingo da eskatzen diren informazioetatik zeintzuek osatzen duten aparteko datu multzoak, letra honetan xedatutakoa aplikatzeari dagokionez.

b) Zerga-administrazioak balorazioa zuzentzea egokia denean Sozietateen gaineko Zergari, Pertsona Fisikoen Errentaren gaineko Zergari edo Ez-egoiliarren Errentaren gaineko Zergari lotutako eragiketei dagokienez, diruzko isun proportzionala jarriko da: eragiketa bakoitzaren balorazio zuzenketatik datozen diru kopuruen % 15, eta gutxienez aurreko a) idatz zatia aplikatuz egokituko litzatekeen zigorraren bikoitza.

Idatz-zati honetan ezartzen den zigorra hori bateraezina da Gipuzkoako Lurralde Historikoko Zergei buruzko Foru Arauak 195., 196., 197., edo 199. artikuluetan jasotakoa aplikatuta egokia izan daitekeen zigorrarekin, idatz-zati honetan jasotako zigorra jartzea ekarri duten oinarrien zatiari dagokionez.

3.– Aurreko idatz-zatiko a) eta b) letretan xedatutakoarekin bat etorriz jarritako zehapenei Gipuzkoako Lurralde Historikoko Zergei buruzko Foru Arauaren 192. artikuluan xedatutakoa aplikatuko zaie.

4.– Zerga-administrazioak balorazio-zuzenketa egitea egokia denean Sozietateen gaineko Zergari, Pertsona Fisikoen Errentaren gaineko Zergari edo Ez-egoiliarren Errentaren gaineko Zergari lotutako eragiketei dagokienez, baina artikulu honetako 1. idatz-zatian arau-haustetzat jotzen den ez-betetzerik gertatu gabe, eta zuzenketa horrek berekin dakarrenean ez ordaintzea, zerga itzulketak bidegabeki lortzea edo geroagoko aitorpenetan konpentsatzeko partidak desegoki zehaztu edo akreditatzea edo errenta garbia oker aitortzen denean, baina ez-ordaintzea edo itzulketak bidegabeki lortzea gertatu gabe, egiaztapen edo ikerketa prozedura batean konpentsatu, kendu edo aplikatzeko dauden diru kopuruak konpentsatu direlako, portaera horiek ez dira Gipuzkoako Lurralde Historikoko Zergei buruzko Foru Arauaren 195., 196., 197., edo 199. artikuluetan ezarritako arau-haustetzat hartuko, balorazio-zuzenketa ekarri duen oinarrien zatiari dagokionez.

5.– Artikulu honetan aurreikusitako zehapenak bateragarriak dira errekerimenduei erantzun ez zaiela-eta Gipuzkoako Lurralde Historikoko Zergei buruzko Foru Arau Orokorreko 208. artikuluan zerga-administrazioaren jarduketei jarkitzegatik, haiek oztopatzeagatik, aitzakiak jartzegatik edo ezetza emateagatik aurreikusten den zehapenarekin.

47. artikulua.– Azpikapitalizazioa.

1.– Baldin eta entitate batek, finantza-entitateek izan ezik, berarekin lotutako beste pertsona edo entitate batekiko edo batzuekiko duen zorpetze garbi ordaindua handiagoa bada entitate horrek zerga-ondorioetarako duen ondare garbiari 3ko koefizientea aplikatuz ateratzen den emaitza baino, gaindikinari dagozkion korrituak ez dira kengarriak izango entitate horren zerga-oinarria zehazterakoan, eta dibidendutzat joko dira ondorio fiskal guztietarako.

2.– Aurreko idatz-zatian ezarritakoa aplikatzeko, bai zorpetze garbi ordaindua bai zerga-ondorioetarako ondare garbia zergaldian zehar izan duten batez besteko egoerara murriztuko dira.

Foru-arau honetan xedatutakoari dagokionez, zerga-ondorioetarako ondare garbitzat hartuko da zergaldiaren azken eguneko balantzean zergadunaren funts propioei dagokion ondare garbiaren zenbatekoa, azaroaren 16ko 1514/2007 Errege Dekretuak onetsitako Kontabilitate Plan Orokorraren hirugarren zatian ezarritako balantze-ereduak zehazten duen moduan, ekitaldiko emaitza kanpoan utzita.

3.– Artikulu honetan xedatutakoa ez da aplikagarria izango baldin eta zergadunak pertsona edo entitate lotuekiko duen zorpetze garbi ordaindua, 1. idatz-zatian aipatutakoa, zergaldian zehar inoiz ez bada izan 10.000.000 eurotik gorakoa.

4.– Zergadunek 1. idatz-zatian ezarri den koefizientearen ordez beste bat aplikatzea proposatu ahal izango diote zerga-administrazioari, lotu gabeko pertsona edo entitateen merkatu-baldintza normaletan zergadunak lor zezakeen zorpetzea oinarri izango duena.

Aurreko idatz-zatian aipatutako proposamenak foru-arau honetako 45. artikuluko 3. idatz-zatitik 5.era bitartekoetan azaltzen diren prozedura-arauen pean egongo dira.

Halaber, zergak aplikatzeko edozein prozeduratan, zergadunek artikulu honetan xedatutakoaren aplikazioa saihestu ahal izango dute, frogatzen baldin badute pertsona edo entitate lotuekiko duten zorpetze bera lor zezaketela lotu gabeko pertsona edo entitateen merkatu-baldintza normaletan.

Paragrafo honetan jasotakoa ez zaie aplikatuko egoitza paradisu fiskaltzat hartutako herrialde edo lurraldeetan daukaten pertsona edo entitateek egindako eragiketei.

48. artikulua.– Entitate ez-egoiliarrek lortutako zenbait errenta positiboren zerga-oinarriaren barruan sartzea.

1.– Zergadunek zerga-oinarrian sartuko dute egoitza Espainiako lurraldean ez daukaten entitateek lortutako errenta positiboa, errenta hori artikulu honetako 2. idatz-zatian ezarritako motetakoa bada eta ondoko inguruabarrak gertatzen badira:

a) Beren kabuz edo foru-arau honetako 42. artikuluko 3. idatz-zatian xedatutakoaren zentzuan lotuta dauden pertsona edo entitateekin batera % 50eko edo goragoko partaidetza izatea Espainian egoitzarik ez duen entitatearen kapitalean, funts propioetan, emaitzetan edo boto eskubideetan, hain zuzen azken horren ekitaldia ixten den egunean.

Egoitza espainiar lurraldean duten entitate lotuek duten partaidetza egoitza lurralde espainiarrean duten pertsona edo entitate lotuetan zehaztutako zeharkako partaidetzaren zenbatekoaren arabera kontatuko da.

Sartu beharreko errenta positiboaren zenbatekoa emaitzen partaidetzaren proportzioan zehaztuko da, eta hori ezean, kapitalean, fondoetan eta boto-eskubidean duten partaidetzaren arabera.

b) Egoitza espainiar estatuan ez duen entitateak ordaindutako zenbatekoa, zerga honen izaera berdina edo antzekoa duen kargagatik 2. idatz-zatia. idatz-zatian ezarritako errenta-motaren bati egozgarria dena, horren arauen arabera legokiokeen 100eko 75 baino gutxiago izatea.

2.– Zerga-oinarrian ondorengo iturri bakoitzetik etorritako errenta positiboa baino ez da sartuko:

a) Landa-ondasun edo hiri-ondasun higiezinen titulartasuna edo haien gaineko eskubide errealena, ondoko kasuetan izan ezik: jarduera ekonomiko bati atxikita badaude, Pertsona Fisikoen Errentaren gaineko Zergari buruzko Foru Arauan xedatutakoarekin bat etorriz, edo titularrarekin batera sozietate talde berean dauden entitate ez-egoiliarrei (Merkataritzako Kodeko 42. artikulua) erabiltzeko lagata badaude.

b) Edozein entitate-motaren funts propioetan partaidetza izatea eta funts propioak hirugarrenei lagatzea, Pertsona Fisikoen Errentaren gaineko Zergari buruzko Foru Arauan ezarritako eran.

Letra honetan ezarritakoa ez zaie aplikatuko finantza-aktibo hauek sortzen dituzten errenta positiboei:

a') Zergadunak jarduera ekonomikoetan aritzeak berekin dakartzan legezko eta arauzko betebeharrak betetzeko dauzkan finantza-aktiboak.

b') Jarduera ekonomikoak burutzeko finkatutako kontratu harremanetatik sorturiko kreditu-eskubideak dituztenak.

c') Balore-merkatu ofizialetan bitartekaritza jardueren egikaritzaren ondorioz dituztenak.

d') Kreditu- eta aseguru-entitateek beren jardueren egikaritzaren ondorioz dituztenak, c) letran ezarritakoaren kalterik gabe.

Hirugarrenei kapital propioak lagata sortzen den errenta positiboa, izan ere, ondoko c) letran aipatutako kreditu eta finantza jarduerak eginez lortu dela ulertuko da, baldin eta lagatzailea eta lagapen hartzailea sozietate-talde berekoak badira (Merkataritzako Kodeko 42. artikulua) eta lagapen-hartzaileak enpresa jardueretan lortu baditu sarreren % 85, gutxienez.

c) Kreditu, finantza, aseguru eta zerbitzu jarduerak, salbu esportazio jarduerekin zuzenean lotuta daudenak, baldin eta zuzenean edo zeharka Espainian egoitza duten eta foru-arau honetako 42. artikuluko 3. idatz-zatiaren zentzuan lotuta dauden pertsona edo entitateekin batera burutu badira, entitate egoiliar horientzat gastu kengarriak sortzen dituztenean.

Ez da errenta positiboa sartuko baldin eta entitate ez-egoiliarraren kreditu, finantza, aseguru edo zerbitzu jardueretatik eratorritako diru-sarreren % 50 baino gehiago, esportazioarekin zuzenean lotutakoak izan ezik, foru-arau honetako 42. artikuluko 3. idatz-zatian xedatutakoaren zentzuan lotuta ez dauden pertsona edo entitateekin batera burututako eragiketetatik badator.

d) Bestalde, a) eta b) letretan aipatzen diren eta errentak sortarazten dituzten ondasunen eta eskubideen eskualdaketak.

3.– Artikulu honetako aurreko idatz-zatiko a), b) eta d) letretan ezarritako errentak, egoiliar ez den entitateak lortutakoak, ez dira zerga-oinarrian sartuko kasu honetan: entitate horrek zuzenean edo zeharka % 5 baino partaidetza handiagoa daukan entitate batetik badatoz (edo % 3 baino handiagoa, partaidetutako sozietate horren akzioek antolatutako bigarren mailako merkatu batean kotizatzen badute), ondoko bi beharkizunak betez gero:

a) Egoiliar ez den entitateak partaidetzak zuzentzea eta kudeatzea, horretarako giza baliabideak eta materialak antolatuz.

b) Errentak sortzen dituzten entitateen sarreren % 85 gutxienez jarduera ekonomikoetan lortzea.

Horretarako, enpresa jardueretan lortutzat joko dira artikulu honetako aurreko idatz-zatiko a), b) eta d) letretan aipatutako errentak, baldin eta b) letra honetan ezarritako betekizuna betetzen duten entitateetatik badatoz, hain zuzen ere egoiliar ez den entitateak zuzenean edo zeharka % 5 baino partaidetza handiagoa daukan entitateetatik (edo % 3 baino handiagoa, partaidetutako sozietate horren akzioek antolatutako bigarren mailako merkatu batean kotizatzen badute).

4.– Aurreko 2. idatz-zatiko a), b) eta d) letretan aipatzen diren errentak ez dira zerga-oinarrian sartuko kasu honetan: denen batura egoiliar ez den entitatearen errenta osoaren % 15 edo sarrera guztien % 4 baino gutxiago denean.

Aurreko lerroaldean ezarritako mugak, Merkataritzako Kodearen 42. artikulua. artikuluaren ildotik, sozietate-multzo batekoak diren eta egoitza espainiar lurraldean ez duten entitate multzoak lortutako errenta edo diru-sarrerei buruzkoak izan daitezke.

Inoiz ez da sartuko egoiliar ez den entitate baten errenta osoa baino zenbateko handiagoa.

5.– Ez dira sartuko artikulu honetako 2. idatz-zatian aipatutako errentak, Espainian egoitza duten entitateentzat kengarriak ez diren gastuekin bat datozenean.

6.– Artikulu honetako 1. idatz-zatiko a) letran aipatutako entitateak errenta positibo horiek sartzera behartuta egongo dira, baldin eta entitate ez-egoiliarrean parte hartzen badute, zuzenean nahiz, beste entitate baten edo batzuen bitartez, zeharka.

Azken kasu honetan errenta positiboaren zenbatekoa zeharkako partaidetzari dagokiona izango da.

7.– Espainiako lurraldeko egoiliar ez den entitateak bere ekitaldi soziala amaitu den egunari dagokion zergaldian sartu behar ditu errentak. Horretarako, ekitaldi sozialaren iraupena ezin da izan hamabi hilabete baino luzeagoa, ondoko kasuan izan ezik: zergadunak hautatzen duenean ekitaldi horretako kontuak onesten diren egunari dagokion zergaldian sartzea errenta positiboak, baldin eta ekitaldia amaitu denetik sei hilabete baino gehiago igaro ez badira.

Aukera horrek ondoreak sortu behar dituen Zergaren lehen aitorpenean egin behar da, eta hiru urtean eutsi behar zaio.

8.– Zerga-oinarriaren barruan sartu beharreko errenta positiboaren zenbatekoa foru-arau honetan zerga-oinarria zehazteko zerga honi buruzko beste xedapenetan ezarritako printzipio eta irizpideen arabera kalkulatuko da.

Errenta osotzat joko da irizpide eta printzipio hauek ezartzetik gertatzen den zerga-oinarriaren zenbatekoa.

Horretarako, egoitza espainiar lurraldean ez duen entitatearen ekitaldi soziala ixtean indarrean dagoen truke-tasa erabiliko da.

9.– Artikulu honetan jasotakoa aplikagarria zaien zergadunek Espainiako lurraldeko egoiliar ez den entitateari buruzko ondorengo datuak aurkeztu beharko dituzte zerga honen aitorpenarekin batera:

a) Sozietatearen izen edo izendazioa, eta sozietatearen egoitzaren lekua.

b) Administratzaileen zerrenda.

c) Galeren eta irabazien balantzea eta kontua.

d) Zerga-oinarriaren barruan sartu beharreko errenta positiboaren zenbatekoa.

e) Zerga-oinarrian sartu beharreko errenta positiboaren zioz ordaindutako zergen frogaketa.

10.– Zergadunak partaidetza daukan entitatearen egoitza zerga-paradisutzat jotzen den herrialde edo lurralde batean badago, ondokoak gertatzen direla pentsatuko da:

a) Aurreko 1. idatz-zatiko b) letran ezarritako baldintza betetzen da.

b) Zergadunak partaidetza daukan entitateak lortutako errenta aurreko 2. idatz-zatian aipatutako iturrietako batetik jaso da.

c) Partaidetutako entitate horrek lortutako errenta partaidetzaren eskuratze-balioaren % 15 da.

Aurreko letretako ustezkotasunek kontrako frogak onartuko dituzte.

Aurreko letretako ustezkotasunak ez dira ezarriko partaidetza ematen duen entitateak kontuak bateratzen dituenean, Merkataritzako Kodearen 42. artikulua. artikuluan ezarritakoaren arabera, sartzera behartuta dauden entitateetako batekin edo batzuekin.

11.– artikulu honetarako, ulertuko da Merkataritzako Kodearen 42. artikulua. artikuluan aipatzen den sozietate-multzoa, urteko kontu sendotuen azalpenerako arauetako lehenengo kapituluko 1 eta 2. sekzioetan agertzen dena dela, abenduaren 20ko 1.815/1991 Errege Dekretuaren bidez onetsitakoak.

12.– Partaidetutako entitatearen egoitza Europar Batasuneko beste estatu batean badago, artikulu honetako 10. idatz-zatian azaldutako kasuetatik kanpo, zergadunak artikulu honetan xedatutakoa aplikatzea saihestu ahal izango du frogatzen baldin badu partaidetutako entitatea benetan dagoela kokatuta egoitza daukan estatuan, eta beraren egitura ez dela artifiziala, Sozietateen gaineko Zergaren zioz gutxiago ordaintzeko bakarrik antolatua; horretarako frogatu beharko du bere gaineko zama arindu duten transakzio guztiak entitate horren egoitza dagoen estatuan egindako prestazioei dagozkiela eta badutela interes ekonomikorik zergadunaren jarduerarako.

Bereziki, entitatearen egitura ez dela guztiz artifiziala frogatzeko, zergadunak froga elementu objektiboak aurkeztu behar ditu partaidetutako entitateak egoitza daukan estatuan duen presentzia fisikoaren norainokoari buruz, partaidetutako sozietateak egiten duen jardueraren benekotasunari buruz eta partaidetutako sozietatearen jarduerak zergadunaren eta talde osoaren jardueraren aldean duen balio ekonomikoari buruz.

49. artikulua.– Egoitza zerga-paradisuetan duten pertsona eta entitateekin egindako eragiketak edo pertsona eta entitate horiek egindakoak.

1.– Arauz paradisu fiskaltzat hartutako herrialde edo lurraldeetan egoitza duten pertsona edo entitateekin batera egiten diren eragiketak merkatuko balio normalaren arabera baloratuko dira, betiere Espainiako tributazioa ez bada txikiagoa balio hitzartua aplikatuta edo aipatu tributazioa geroratuta egokituko litzatekeena baino.

2.– Aurreko idatz-zatian aipatutako eragiketak egiten dituztenek foru-arau honetako 43. artikuluan azaldutako dokumentazio betebeharrak izango dituzte, hurrengo idatz-zatietan ezarrita dauden baldintzekin.

3.– Aurreko bi idatz-zatietan aipatutako zergadunek, foru-arau honetako 42. artikuluko 3. idatz-zatian adierazitakoaren arabera pertsona edo entitate lotuak ez badira, dokumentazio betebehar hauek izango dituzte:

a) Zergadunaren eta horrekin batera eragiketa egiten duten pertsona edo entitateen izen-deiturak edo sozietatearen izena edo izendapen osoa, zerga-egoitza eta identifikazio fiskaleko zenbakia, bai eta eragiketaren izaeraren deskripzio zehatza, ezaugarriak eta zenbatekoa ere.

Era berean, identifikatu egin behar dira pertsona edo entitate horien izenean eragiketan esku hartu duten pertsonak, eta, eragiketak entitateekin egiten badira, haien administratzaileen identifikazioa aurkeztu behar da.

b) Alderagarritasun azterketa, foru-arau honetako 42. artikuluko 1. idatz-zatian azaldutako moduan egina.

c) Aukeratutako balorazio-metodoa hautatzeari buruzko azalpena; bertan adierazi behar da zergatik hautatu den metodo jakin hori, metodoa nola aplikatuko den, eta zehaztu behar da zein den hartatik eratorritako balioa edo balio-tartea.

d) Egoitza zerga-paradisuetan duten hainbat pertsona edo entitateri elkarrekin emandako zerbitzuengatiko gastuak banatzeko irizpideak, eta dagozkien akordioak, halakorik bada, eta kostuak banatzeko akordioak, foru-arau honetako 45. artikuluan aipatzen direnak.

e) Zergadunak eragiketen balorazioa zehazteko izan duen beste edozein informazio garrantzitsu.

4.– Ez dira exijituko dokumentazioa dela-eta aurreko paragrafoan ezartzen diren betebeharrak, merkantzien nazioarteko zerbitzu eta salerosketei dagokienez –barne hartuta azken horietan izandako bitartekotza-komisioak– , eta horiei guztiei lotutako gastu osagarriak, honako baldintza hauek betetzen direnean:

a) Zergadunak frogatzea eragiketa zerga-paradisutzat jotzen den herrialde edo lurralde baten bidez egiteko bidezko arrazoi ekonomikoak izan direla.

b) Zergadunak zerga-paradisutzat jotzen diren herrialde edo lurraldeetan egoitzarik ez duten pertsona edo entitate lokabeekin eragiketa parekagarriak egitea, eta eragiketaren balio hitzartua, behin zuzenketak eginda, hala behar izanez gero, aipatutako eragiketa parekagarrietan hitzartutako balioarekin bat datorrela frogatzea.

5.– Aurreko 1. idatz-zatian aipatutako eragiketetako bakoitzari dagokionez, edo, eragiketak elkarrekin estu lotuta badaude edota zergadunak etenik gabe egin baditu, eragiketa multzo bakoitzari dagokionez, foru-arau honetako 46. artikuluko 2. idatz-zatiko a) letran xedatutakoa aplikatzeko, datu multzo banatzat jo behar dira artikulu honetako 3. idatz-zatiko b), c), d) eta e) letretako bakoitzean aipatzen diren informazioak. Ondorio horietarako, datutzat joko da artikulu honetako 3. idatz zatiko a) letrak aipatzen duen pertsona edo entitate bakoitzari buruzko informazioa.

6.– Foru-arau honetako 43. artikuluko 5. idatz-zatiko d) eta g) letretan eta 6. eta 7. idatz-zatietan xedatutakoa ez zaie aplikatuko egoitza zerga-paradisutzat jotzen den herrialde edo lurralde batean duten pertsona edo entitate lotuekin egindako eragiketei; salbuespena: egoitza Europar Batasuneko estatu batean dutenekin egindakoak, baldin eta zergadunak frogatzen badu eragiketak baliozko arrazoi ekonomikoak dituela eta pertsona edo entitate horiek jarduera ekonomikoak egiten dituztela.

50. artikulua.– Kontabilitateko balioaren ordez merkatuko ohiko balioa jartzearen ondoreak.

Ondare-elementu bat edo zerbitzu bat zergaren ondoreetarako merkatuko balio normalean baloratu direnean, entitate eskuratzaileak bere zerga-oinarrian balio horren eta eskuraketa balioaren arteko diferentzia sartuko du; honela:

a) Aktibo ibilkorra osatzen duten ondare-elementuak badira, elementu horiek sarrera baten sortzapenaren zio ematen duten zergaldian.

b) Ibilgetua osatzen duten eta amortizagarriak ez diren ondare-elementuak badira, horiek eskualdatzen diren zergaldian.

c) Ibilgetua osatzen duten ondare-elementu amortizagarriak badira, berauen iraupen baliagarriari geratzen zaizkion zergaldietan, diferentzia horri elementu horiei dagokienez erabiltzen den amortizazio metodoa ezarriz, elementuok iraupen baliagarria amaitu aurretik eskualdatzen direnean izan ezik, orduan diferentzia eskualdatzen diren zergaldiko zerga-oinarrian sartuko baita.

d) Zerbitzuak badira, hartzen diren zergaldian, horien zenbatekoa ondare-elementu bati erantsi behar zaionean izan ezik, orduan aurreko letretan ezarritakoaren arabera jokatuko baita.

V. KAPITULUA

EMAITZAREN APLIKAZIOARI DAGOZKION ZUZENKETAK

51. artikulua.– Enpresen kapitalizazioa sustatzeko konpentsazioa.

1.– Zergadunek zerga-oinarritik kendu ahal izango dute zerga-ondorioetarako euren ondare garbiak aurreko bi ekitaldietako batez bestekoaren aldean izandako gehikuntzaren % 10. Zenbateko hori erreserba batean sartu beharko dute, eta ezingo dute erreserba hori baliatu harik eta kenkaria aplikatu duten zergaldia amaitzen denetik bost urte igaro arte, gutxienez.

Bost urteko epe horretan, entitatearen zerga-ondorioetarako ondare garbiaren zenbatekoak lehengoan jarraitu edo gora egin beharko du, salbu eta kontabilitateko galeren ondorioz jaitsiera gertatzen denean.

Entitate berrien kasuan, lehenengo bi ekitaldietan, aurreko bi ekitaldietako batez bestekotzat hartuko da entitatea eratu zenetik igaro den denboran zerga-ondorioetarako ondare garbiak izandako batez besteko zenbatekoa.

Lege edo estatutuetan hala aginduta, erreserbetarako zuzkidura nahitaez egiten denean, horrek zerga-ondorioetarako ondare garbian eragiten duen gehikuntzari ezingo zaio aplikatu artikulu honetan xedatutakoa.

2.– Artikulu honetan xedatutakoari dagokionez, zerga-ondorioetarako ondare garbitzat joko da foru-arau honetako 47. artikuluko 2. idatz-zatian araututa dagoen kontzeptua, ekitaldiko emaitza ere barnean hartuta, baina kanpoan utzita finantza-tresna konposatuen zenbatekoa eta foru-arau honetako 52. eta 53. artikuluetan aipatutako erreserba berezietarako zuzkidurena.

Baina aurreko lerroaldean xedatutakoa aplikatuz kalkulatutako zenbatekoari ondare-elementu hauen kontabilitateko balioa kendu behar zaio:

a) Entitateen funts propioetako partaidetza adierazten duten baloreak, entitate horien errentei aplikagarri bazaie foru-arau honetako 33. artikuluko 1. idatz-zatian ezarritako araubidea edo 34. artikuluko 1. idatz-zatian ezarritakoa.

b) Entitateak emandako partaidetza-maileguak, horietan aplikagarria bada foru-arau honetako 39. artikuluko 3. idatz-zatian xedatutakoa.

c) Atzerriko establezimendu iraunkor bati atxikitako elementuak, establezimendu horren errentei aplikagarria bazaie foru-arau honetako 35. artikuluan ezarritako araubidea.

d) Foru-arau honetako 36. artikuluan xedaturikoa aplikatuta ondare-elementuak besterenduz lortu diren aparteko mozkinak beste ondare-elementu batzuetan berrinbertitzen direnean, berrinbertsioa gauzatu duten beste ondare-elementu horiek.

e) Atzerrian dauden ondare-elementuak, sortzen dituzten errentak Espainiako lurraldean zergapean ez badaude, nazioarteko itun batean xedatutakoa aplikatzearen ondorioz.

f) Beste ondare-elementu batzuk, entitatearen jarduera ekonomikoei atxikita ez daudenak edo Espainiako lurraldean zergapetutako etekin erregularrik ematen ez dutenak.

g) Entitatean zuzeneko edo zeharkako partaidetza duten bazkideen ekarpenen zenbatekoa, artikulu honetan xedatutakoa aplikatu badute bost urteko epean, bazkideak murrizketa hau aplikatu zuen zergaldiaren amaieratik hasita.

3.– Entitatearen zerga-ondorioetarako ondare garbia murrizten bada artikulu honetako 1. idatz-zatian ezarritako epea igaro aurretik, edo bertan aipatutako erreserba erabiltzen bada epe horren barruan, inguruabar hori gertatzen den zergaldiko zerga-oinarrian sartu beharko da aplikatutako kenkariaren zati proportzional bat, zerga-ondorioetarako ondare garbiaren murrizketari edo erreserbatik erabilitako diru kopuruari dagokiona, eta ateratzen den kuotari berandutze-korrituak gehituko zaizkio.

4.– Artikulu honetan xedatutakoaren aplikazioak ezin izango du zerga-oinarri negatiborik edo zerga-oinarri negatiboaren gehikuntzarik eragin. Hala ere, zerga-oinarri nahikorik ez izateagatik kendu ez diren zenbatekoak hurrengo zergaldietan kendu ahal izango dira, muga bera errespetatuz; baina artikulu honetako 1. idatz-zatian aipatutako bost urteko epea, oraingoan, artikulu honetan araututako konpentsazioaren zenbatekoa zerga-oinarriari kendu zaion azken zergalditik hasita zenbatuko da.

5.– Foru-arau honetako 13. artikuluan aipatutako mikroenpresa eta enpresa txikiek zerga-ondorioetarako ondare garbiaren gehikuntzaren % 14 kendu ahal izango dute zerga-oinarritik. Eurek ere artikulu honetako aurreko idatz-zatietan ezarritako baldintzak eta betekizunak izango dituzte.

Ezingo dute artikulu honetan xedatutakoa aplikatu foru-arau honetako 32. artikuluko 4. idatz-zatian xedatutakoaz baliatu diren mikroenpresek.

6.– Ezingo dute artikulu honetan xedatutakoa inola ere aplikatu foru-arau honetako 56. artikuluko 1. idatz-zatian ezarritako karga-tasez bestelakoak dituzten entitateek eta Sozietateen gaineko Zergan ezarritako araubide bereziak dituztenek, foru-arau honetako VI. tituluko VII. kapituluan ezarritako araubidea izan ezik.

Foru-arau honetako VI. tituluko VI. kapituluan ezarritako erregelei jarraituz zergapetutako zerga-taldeek artikulu honetan xedatutakoa aplikatu ahal izango dute foru-arau honetako 89. artikuluan xedatutakoarekin bat etorriz.

52. artikulua.– Mozkinak nibelatzeko erreserba berezia.

1.– Zergadunek zerga-oinarritik kendu ahal izango dute mozkinak nibelatzeko erreserba berezi baten zuzkidurarako erabiltzen duten kontabilitate-emaitza positiboaren zenbatekoa, gehieneko muga hau gainditu gabe: emaitza horretatik merkataritzako legeriarekin eta haren estatutu-aurreikuspenekin bat etorriz libreki balia dezaketen zatiaren % 10.

Artikulu honetan xedatutakoa aplikatuz zerga-oinarrian egiten den murrizketak ezingo du gainditu zergaldiko zerga-oinarriaren zenbatekoaren % 15.

Halaber, mozkinak nibelatzeko erreserba bereziaren saldoak inoiz ere ezingo du gainditu zergadunaren zerga-ondorioetarako ondare garbiaren % 20, ondare garbitzat hartuta foru-arau honetako 47. artikuluko 2. idatz-zatian hala definitutakoa.

2.– Artikulu honetan xedatutakoaren babesean aplikatzen diren kenkariek zerga-oinarria handituko dute baldin eta, mozkinak nibelatzeko erreserba berezirako zuzkidura zein zergalditako kontabilitate-emaitza positiboaren kargura egin den, zergaldi hartako azken egunaren hurrengo bost urteetan amaitzen diren zergaldietakoren batean zergadunak zerga-oinarri negatiboa aurkezten badu, zerga-oinarri negatibo horren zenbatekoraino.

Idatz-zati honetan ezarritako epea igarotzen bada zergadunak zerga-oinarri negatiborik aurkeztu gabe, edo horren zenbatekoa ez bada nahikoa artikulu honetan xedatutakoaren babesean kendutako zenbateko osoak aplikatzeko, gainerako zenbatekoa zerga-oinarriari gehituko zaio aipatutako epea betetzen den zergaldian, eta aipatutako zenbatekoaren % 10eko zuzenketa positibo gehigarria egingo da.

3.– Zergadunak ezingo du erreserba bereziaren saldoa mozkinak nibelatzeko baliatu aurreko idatz-zatian aipatutako epean, salbu zerga-oinarrian sartu diren diru kopuruengatik.

Idatz-zati honetan xedatutakoa betetzen ez bada, ez-betetzea gertatu den zergaldiko zerga-oinarrian sartu beharko dira zerga-oinarritik kendu diren eta ez-betetzea dagokien diru kopuruak, euren zenbatekoaren % 5 gehituta, mozkinak nibelatzeko erreserba berezirako zuzkidura zein zergalditako kontabilitate-emaitza positiboaren kargura egin den, zergaldi hartako azken egunetik igarotako urte bakoitzeko.

4.– Foru-arau honetako 13. artikuluan aipatutako mikroenpresa eta enpresa txikiek ehuneko 5 puntu igo ahal izango dituzte artikulu honetako 1. idatz-zatian ezarritako ehunekoak. Haiek ere artikulu honetako aurreko idatz-zatietan ezarritako betekizun eta baldintzen pean egongo dira.

Ezingo dute artikulu honetan xedatutakoa aplikatu foru-arau honetako 32. artikuluko 4. idatz-zatian xedatutakoaz baliatu diren mikroenpresek.

5.– Ezingo dute artikulu honetan xedatutakoa inola ere aplikatu foru-arau honetako 56. artikuluko 1. idatz-zatian ezarritako karga-tasez bestelakoak dituzten entitateek eta Sozietateen gaineko Zergan ezarritako araubide bereziak dituztenek, foru-arau honetako VI. tituluko VII. kapituluan ezarritako araubidea izan ezik.

Foru-arau honetako VI. tituluko VI. kapituluan ezarritako erregelei jarraituz zergapetutako zerga-taldeek artikulu honetan xedatutakoa aplikatu ahal izango dute foru-arau honetako 89. artikuluan xedatutakoarekin bat etorriz.

53. artikulua.– Ekintzailetza sustatzeko eta ekoizpen jarduera sendotzeko erreserba berezia.

1.– Zergadunek zerga-oinarritik kendu ahal izango dute ekintzailetza sustatzeko eta ekoizpen jarduera sendotzeko erreserba bereziaren hornidurarako euren kontabilitate-emaitza positibotik hartzen duten zenbatekoaren % 60.

Artikulu honetan xedatutakoa aplikatuz zerga-oinarrian egiten den murrizketak ezingo du gainditu zergaldiko zerga-oinarriaren zenbatekoaren % 45.

Halaber, ekintzailetza sustatzeko eta ekoizpen jarduera sendotzeko erreserba bereziaren saldoak inoiz ere ezingo du gainditu zergadunaren zerga-ondorioetarako ondare garbiaren % 50 (ondare garbitzat hartuta foru-arau honetako 47. artikuluko 2. idatz-zatian hala definitutakoa), salbu eta kontabilitateko galeren ondorioz gehikuntza gertatzen denean.

2.– Artikulu honetan xedatutakoaren babesean ekintzailetza sustatzeko eta ekoizpen jarduera sendotzeko erreserba berezian sartzen diren diru kopuruak honako xede hauetakoren baterako erabili beharko dira, erreserba berezirako zuzkidura zein zergalditako kontabilitate-emaitza positiboaren kargura egin den, zergaldi hartako azken egunetik hiru urte igaro baino lehen:

a) Foru-arau honetako 61. artikuluan ezarritako kenkarirako eskubidea ematen duten aktibo ez-korronte berriak erosteko.

Zergadunak, horrelakoetan, ekintzailetza sustatzeko eta ekoizpen jarduera sendotzeko erreserba berezian sartutako diru kopuruen bikoitza inbertitu beharko du aktibo ez-korronte berriaren erosketan, zuzkidura osoa aplikatutzat jo ahal izateko, eta ezingo du aplikatu foru-arau honetako 61. artikuluan ezarritako kenkaria, letra honetan ezarritako zenbatekoraino.

b) Foru-arau honetako 65. artikuluko 2. idatz-zatian ezarritako kenkarirako eskubidea ematen duten ondare-elementuak erosteko.

Zergadunak, horrelakoetan, ezingo du aplikatu foru-arau honetako 65. artikuluko 2. idatz-zatian ezarritako kenkaria, ekintzailetza sustatzeko eta ekoizpen jarduera sendotzeko erreserba bereziaren kargura aplikatu den zenbatekoraino.

c) Lehen mailako merkatuan entitateetako partaidetzak eskuratzea, partaidetzok baldintza hauek betetzen badituzte: foru-arau honetako 33. artikuluko 1. idatz-zatian ezarritako betekizunak betetzea; ez kotizatzea bigarren mailako merkatu antolatuetan; enpresa proiektu garrantzitsuak ahalbidetzea, jarduera, produktu edo merkatu berrien garapena, lehendik daudenen handitze edo finkapena edota lanpostu egonkorren sorrera eragiten dutenak; partaidetutako entitatearen zerga-ondorioetarako ondare garbiaren gehikuntza nabarmena ekartzea; kapitalen merkatuetan sartzeko zailtasunak izatea, egin beharreko inbertsioen tamaina, berritasuna edo arriskua dela-eta; eta foru-arau honetako 13. artikuluko 3. idatz-zatiko a), b) eta c) letretan ezarritako betekizunak betetzea.

Foru-arau honetako 42. artikuluko 3. idatz-zatian adierazten den moduan lotutako pertsona edo entitate bati erosten bazaizkio partaidetzak, ez da aplikatuko letra honetan xedatutakoa.

d) Inbertsioa egitea, kapitaleko partaidetzaren bitartez, hazteko ahalmen handia duten mikroenpresa edo enpresa txiki eta ertainen enpresa-proiektu berriren bat garatzeko hasierako etapan edo garapen etapan. Inbertsio hori egiteaz gainera, enpresaren kudeaketan parte har daiteke norberaren lanbide esperientzia baliatuta, epe ertaineko errentagarritasuna lortze aldera, bussiness angel edo inbertsiogile pribatu informalaren figura dela medio.

Letra honetan azaldutako kasuan, erreserba berezia gauzatzeko egiten den inbertsioa ez da 100.000 eurotik gorakoa izango enpresa-proiektu bakoitzeko, eta zenbateko hori gainditzen bada, proiektu horretan 100.000 euroko zenbatekoa baino ez da gauzatutzat joko.

Gutxienez 5 urtez eutsi beharko zaie c) eta d) letretan aipatutako inbertsioei, salbu eta, e) letrako kasuan, enpresa-proiektuak porrot egiten duenean, eta hori gertatu dela ulertuko da partaidetutako entitatea likidatzen bada edo konkurtso egoera deklaratzen bazaio.

3.– Aurreko idatz-zatian ezarritako epea igarotakoan, zergadunak ez baditu erabat gauzatu ekintzailetza sustatzeko eta ekoizpen jarduera sendotzeko erreserba berezian sartutako diru kopuruak, geratzen den zenbatekoaren % 60 zerga-oinarriari gehituko zaio aipatutako epea betetzen den zergaldian, eta zenbateko horren % 15eko zuzenketa positibo gehigarria egingo da.

4.– Aurreko 2. idatz-zatian adierazitako epean zergadunak ezin izango du baliatu ekintzailetza sustatzeko eta ekoizpen jarduera sendotzeko erreserba bereziaren saldoa.

Idatz-zati honetan xedatutakoa betetzen ez bada, ez-betetzea gertatu den zergaldiko zerga-oinarrian sartu beharko dira zerga-oinarritik kendu diren eta ez-betetzea dagokien diru kopuruak, euren zenbatekoaren % 5 gehituta, ekintzailetza sustatzeko eta ekoizpen jarduera sendotzeko erreserba berezirako zuzkidura zein zergalditako kontabilitate-emaitza positiboaren kargura egin den, zergaldi hartako azken egunetik igarotako urte bakoitzeko.

5.– Zergadunak artikulu honetako 2. idatz-zatiko c) letran azaldutako xedeetarako erabili nahi badu ekintzailetza sustatzeko eta ekoizpen jarduera sendotzeko erreserba bereziaren saldo osoa edo horren zati bat, Administrazioa aurretiaz lotesteko prozedura hasi beharko du, Gipuzkoako Lurralde Historikoko Zergei buruzko Foru Arau Orokorraren 82. artikuluan eta hurrengoetan ezarrita dagoen bezala, artikulu honetan aipatutako erreserba berezirako zuzkidura zein zergalditako kontabilitate-emaitza positiboaren kargura egin den, zergaldi hartako urteko kontuak onesteko ezarritako epea amaitu baino lehen. Prozedura horretan zehatz-mehatz jaso behar dira erreserba gauzatzeko proiektuak, eta justifikatu egin behar da inbertsioen emaitza den ekoizpen jarduera sendotzeko eta enpresa-sustapenerako xedea bete egin dela, baita haren eragin ekonomikoa ere.

Administrazioa aurretiaz lotesteko prozeduraren ebazpen aldekoa ezinbestekoa izango da zerga-oinarria murriztu ahal izateko artikulu honetako 1. idatz-zatian adierazitako moduan, eta geroago ez badira betetzen prozedura horren baldintzak, artikulu honetako 4. idatz-zatian xedatutakoa aplikatuko zaio Administrazioa aurretiaz lotesteko prozeduraren xede izan den kenkariaren zenbateko osoari.

Arau bidez zehaztuko da Administrazioa aurretiaz lotesteko prozedura hori hasteko zer baldintza bete beharko diren eta gutxienez zeintzuk elementu frogatu beharko diren prozeduraren ebazpen aldekoa lortzeko.

6.– Ezingo dute artikulu honetan xedatutakoa aplikatu foru-arau honetako 32. artikuluko 4. idatz-zatian xedatutakoaz baliatu diren mikroenpresek.

7.– Ezingo dute artikulu honetan xedatutakoa inola ere aplikatu foru-arau honetako 56. artikuluko 1. idatz-zatian ezarritako karga-tasez bestelakoak dituzten entitateek eta Sozietateen gaineko Zergan ezarritako araubide bereziak dituztenek, foru-arau honetako VI. tituluko VII. kapituluan ezarritako araubidea izan ezik.

Foru-arau honetako VI. tituluko VI. kapituluan ezarritako erregelei jarraituz zergapetutako zerga-taldeek artikulu honetan xedatutakoa aplikatu ahal izango dute foru-arau honetako 89. artikuluan xedatutakoarekin bat etorriz.

VI. KAPITULUA

ALDI-EGOZKETA ETA KONTABILITATEKO INSKRIPZIOAK: BATERAKO ARAUAK

54. artikulua.– Aldi-egozketa. Sarrera eta gastuak kontabilitatean inskribatzea.

1.– Sarrerak eta gastuak sortzen diren zergaldian egotziko dira, horiek ordezkatzen dituzten ondasun eta zerbitzuen benetako korrontearen arabera, moneta edo finantzen korrontetik at, batzuen eta besteen arteko koerlazioa errespetatuz.

2.– Zerga-administrazioak onartu beharko du, arauz ezartzen den moduan, nola erabiliko den sarrerak eta gastuak denboran zehar egozteko irizpideen zerga-eraginkortasuna, Merkataritza Kodeko 34. artikuluko 4. idatz-zatian eta 38. artikuluko a) letran ezarritakoaren arabera, irizpide horiek aurreko idatz-zatian jasotakoak ez direnean eta zergadunak finantza-egoeraren eta emaitzen ondarearen irudi leiala lortzeko salbuespen moduan erabiltzen dituenean.

Zerga-administrazioak, arau bidez zehazten den moduan, sarrera-gastuak denboraren arabera egozteko aurreko paragrafokoak baino beste irizpide batzuk baimen ditzake, baina horrek ez du inolako aldaketarik eragingo sarrera eta gastuen zerga kalifikazioan.

3.– Zerga-ordainketan ez dira kengarriak galera eta irabazien kontuan kontabilizatu ez diren gastuak, edo erreserba-kontu batean lege edo araudi batean hala xedatzen bada; salbuespenak: foru-arau honen arabera betekizun hori bete behar ez den kasuak, foru-arau honetako 24., 25., 28., 29., 30. eta 51. artikuluetan eta 32. artikuluko 2. eta 4. idatz-zatietan aipatzen diren zerga-oinarriko kenkariak, eta Zergaren arautegian berariaz ezartzen diren gainerako kasuak.

Sarrerak eta gastuak denboraren arabera egotzi behar diren zergaldian baino beste zergaldian batean egotzi badira kontabilitateko galera-irabazien kontuan edo erreserba kontu batean, sarrera eta gastu horiek, aurreko paragrafoetan ezarritakoaren arabera, dagokien zergaldian egotzi behar dira paragrafo horietan ezartzen denarekin bat.

Hala ere, aldi-egozketaren araberakoaren ondoko zergaldian kontu horietan kontabilizatutako gastuak edo aurreko zergaldi bateko kontuan egotzitako sarrerak badira, batzuk eta besteak kontabilitateko egozketa egin den zergaldira egotziko dira, baldin eta horren ondoriozko kopurua aurreko idatz-zatietan ezarritako aldi-egozketarako arauak aplikatutako izango zena baino zerga-karga txikiagoa sortzen ez bada.

4.– Epekako edo prezio geroratuko eragiketetan, errentak, dagozkien kobrantzak egin ahala, proportzioz lortu direla ulertuko da, entitateak sortzapenaren irizpidea ezartzea erabakitzen duenean izan ezik.

Epekako edo prezio geroratuko eragiketatzat hartuko dira salmentak eta obren burutzapenak, berauen prezioa, osotasunean edo partzialki hurrenez hurrengo ordainketen edo ordainketa bakarraren bidez hartzen denean, ematearen eta azken epearen edo epe bakarraren mugaegunaren arteko denbora urtebetetik gorakoa izan denean.

Geroratutako zenbatekoen endosua, deskontua edo kobrantza aurreratua eginez gero, egotzi gabeko errenta momentu horretan lortutakotzat emango da.

Idatz-zati honetan ezartzen dena, ukituriko errentei dagozkien sarrerak eta gastuak kontabilizatzeko era edozein izanik ezarriko da.

5.– Pentsio Plan eta Fondoei buruzko Legearen Testu Bateginaren zein borondatezko gizarte-aurreikuspeneko entitateen zerga-araubidea arautzen duten foru-arauen xede diren egoeren egoera berdinak edo antzekoak estaltzeko horniduretarako eta barruko funtsetarako gastuak prestazioak abonatzen diren zergaldian egotziko dira.

Erregela bera aplikatuko da kendu ezin izan diren pentsio planen egoeren antzekoak estaltzeko ekarpenei dagokienez.

Era berean, foru-arau honetako 26. artikuluko 1. idatz-zatiko f) letran aipatutako ondare-tresnak emanez likidatutako langileria gastuak, tresna horiek ematen diren zergaldian izango dira kenkaridunak.

6.– Narriatzea dela-eta balio-zuzenketaren xede izan diren ondare-elementuen balioak izan duen narriatzearen itzulketa berau gertatu den zergaldian egotziko da, zuzenketa egin zuen entitatean edo harekin lotutako beste batean.

Arau bera aplikatuko da eskualdatu ondoko sei hiletan berriz erosten diren aktibo ez korronteko ondare-elementuak eskualdatuta galerak gertatzen direnean.

7.– Arau bidez, eta zerga-oinarria zehaztekotan bakarrik, emango dira arauak, aurreko 1. idatz-zatian ezarritakoa jarduera, eragiketa edo sektore zehatzei ezartzeko.

8.– Hornikuntzak desagerrarazi direnean, ezarria zuten xederako erabili izan ez direlako, ekitaldiko sarreren kontu batera sartu gabe, haien zenbatekoa zuzkitu dituen entitatearen zerga-oinarrian sartuko da, zuzkidura hori gastu kenkortzat jo izan den neurrian.

9.– Entitatea inbertsioaren arriskua bereganaturik duen aseguru-kontratuaren onuraduna bada, edo hura luditzeko eskubidea aintzatetsita badu, zerga-oinarrian polizari loturiko aktiboek zergaldiaren hasieran izan duen likidazio-balioaren eta zergaldiaren amaieran izan duenaren arteko kendura sartuko du.

Idatz-zati honetan xedatutakoa ez zaie aplikatuko Pentsio Plan eta Funtsei buruzko Legearen Testu Bategina onetsi duen azaroaren 29ko 1/2002 Legegintzako Errege Dekretuko lehenengo xedapen gehigarrian ezarritakoaren arabera enpresek euren gain hartutako pentsio-konpromisoak bideratzen dituzten talde aseguruko kontratuei.

Egotzitako errenten zenbatekoak kontratuetako zenbatekoak jasotzearen ondoriozko etekina murriztuko du.

VII. KAPITULUA

ZERGA-OINARRI NEGATIBOEN KONPENTSAZIOA

55. artikulua.– Zerga-oinarri negatiboen konpentsazioa.

1.– Likidatu edo autolikidatu diren zerga-oinarri negatiboak hurrengo hamabost urteetan amaitzen diren zergaldietako errenta positiboekin konpentsa daitezke.

Sortzen diren entitate berriek zerga-oinarri positiboa duten lehen zergalditik aurrera zenbatu ahal izango dute idatz-zati honetan aipatzen den konpentsazio-aldia. Arau hori bera aplikatuko zaie ordaindu beharreko autopista, tunel eta bide berrien emakida lortzen duten sozietateek horien ustiapenaren ondorioz dituzten zerga-oinarri negatiboei ere.

2.– Konpentsatu ahal den zerga-oinarri negatibotik ondoko kopurua kenduko da: bazkideek edozein titulurengatik egindako ekarpenen balioaren (eskuratutako partaidetzari dagokiona) eta partaidetza horren eskuraketa-balioaren arteko diferentzia positiboa, ondokoak gertatuz gero:

a) Sozietatearen kapitalaren zatirik handiena edo entitatearen emaitzetan parte izateko eskubideen zatirik handiena pertsona edo entitate batek eskuratu du, edo elkarri lotutako pertsona edo entitate batzuek, zerga-oinarri negatiboa sortu den zergaldia amaitu ondoren.

b) Aurreko letran aipatutako pertsonek edo entitateek % 25etik beherako partaidetza eduki dute zerga-oinarri negatiboa sortu den zergaldia amaitu denean.

c) Entitateak ez du jardun ustiapen ekonomiko batean sozietatearen kapitalaren gehiengoa eman dion partaidetza eskuratu aurreko sei hiletan.

3.– Konpentsatu beharreko zerga-oinarri negatiborik egonez gero, zergadunak haien sorburua eta zenbatekoa frogatu behar ditu kontabilitatea eta bidezko agiriak erakutsiz, dena dela sortu diren ekitaldia.

4.– Sozietate xedetzat hidrokarburo naturalen (likidoak edo gaseosoak) meategien eta lurrazpiko pilaketen esplorazioa, ikerketa eta ustiatzea duten sozietateek, hidrokarburoa Estatuko lurraldean eta bere mendeko itsasoko lurpean eta Espainiako Erresumaren subiranotasunaren mende dagoelarik, Hidrokarburoen Sektoreko Legeak (34/1998 Legea, urriaren 7koa) xedatutako moduan, eta sozietate horien osagarri gisa, erauzitako produktuen garraioan, biltegiratzean, araztean eta salmentan diharduten sozietateek ere honela konpentsatuko dituzte zerga-oinarri negatiboak: hurrengo ekitaldietako zerga-oinarriak murriztuko dituzte, gehienez ere % 50 urtean.

V. TITULUA

ZERGA-ZORRA

I. KAPITULUA

KARGA-TASA, KUOTA OSOA, KUOTA EFEKTIBOA ETA GUTXIENEZ ORDAINDU BEHARREKOA

56. artikulua.– Karga-tasa.

1.– Karga-tasa hauxe izango da:

a) Oro har, % 28.

b) Foru-arau honetako 13. artikuluko mikroenpresentzat eta enpresa txikientzat, % 24.

2.– Foru-arau honetako 14. artikuluko ondare-sozietateei eskala hau aplikatuko zaie:

(Ikus .PDF)

3.– Ondokoek % 21eko karga-tasa jasango dute:

a) Foru-arau honetako 12. artikuluko 2. idatz-zatian aipatzen diren entitateek, salbuespen partziala dutenek.

b) Aseguru orokorretako mutuek eta borondatezko gizarte aurreikuspeneko entitateek, hurrengo 5. idatz-zatiko tasa aplikatzen ez bazaie.

c) Elkarrekiko berme sozietateek eta birfinkapeneko sozietateek, Espainiako Bankuaren erregistro berezian inskribatuta badaude.

d) Balore burtsetako sozietate artezkariek eta agentziek eta Balore-Merkatuari buruzko uztailaren 28ko 24/1988 Legeak ezarritakoaren arabera Bilboko Balore Burtsako legezko kide diren balore eta burtsa sozietateek eta agentziek.

4.– Foru-arau honetako VI. tituluko V. kapituluan ezarritako araubide berezia aplikatzen zaien talde inbertsioko entitateek % 1eko karga jasango dute.

5.– Borondatezko Gizarte Aurreikuspeneko Erakundeei buruzko otsailaren 23ko 5/2012 Legeko 24. artikuluko 1. idatz-zatian ezarritako prestazioetako bat ematen duten pentsio funtsen eta borondatezko gizarte aurreikuspeneko entitateen gaineko karga % 0 izango da.

Aurreko paragrafoan ezartzen diren prestazioak eta bestelakoak ematen dituzten borondatezko gizarte aurreikuspeneko entitateek paragrafo horretako prestazio mota bakoitzaren dokumentazioa bereizita aurkeztu behar dute.

Idatz-zati honetako karga-tasa lehen paragrafoan aipatzen diren prestazioei soilik aplikatuko zaie; gainerakoei artikulu honetako 3. idatz-zatian ezarritakoa aplikatuko zaie.

6.– % 35eko tasarekin tributatuko dute hidrokarburoen sorguneak eta lurrazpiko biltokiak miatu, ikertu eta ustiatzen dituzten entitateek, Hidrokarburoen Sektoreari buruzko urriaren 7ko 34/1998 Legeak jasotakoaren arabera.

Birfintzeari loturik dauden jarduerak eta ikerkuntza, ustiapen, garraio, biltegiratze, arazketa eta ateratako hidrokarburoen salmentaz ateko bestelako jarduera guztiak, bai eta gainerakoen jabetzapeko hidrokarburoen lurrazpiko biltegiratze-jarduera ere, karga tasa orokorraren pean jarriko dira.

Hirugarrenen jabetzako hidrokarburoak biltegiratzen soilik aritzen diren entitateei ezin zaie aplikatu foru-arau honetako 20. artikuluko 3. idatz-zatian 29. artikuluan eta 55. artikuluko 4. idatz-zatian xedatutakoa, eta artikulu honetako 1. idatz-zatian ezarritako tasa orokorraren arabera ordaindu behar dute Zerga.

57. artikulua.– Kuota osoa.

Kuota osoa likidazio-oinarriari karga-tasa aplikatzearen emaitzako kopurua da.

58. artikulua.– Kuota likidoa.

1.– Kuota likidoa kuota osoari zergapetze bikoitza saihesteko kenkariak (foru-arau honetako 60. artikulua) aplikatu ondoren geratzen den kopurua da.

2.– Kuota likidoa ezin da izan negatiboa.

59. artikulua.– Kuota efektiboa eta gutxienez ordaindu beharrekoa.

1.– Kuota efektiboa kuota likidotik titulu honetako III. kapituluan ezarritako kenkarien zenbatekoa kenduta geratzen den kopurua da.

2.– Kuota efektiboa ezin da izan negatiboa.

3.– Zerga-oinarri positiboak eduki dituzten zergadunen kuota efektiboa, hau da, kuota likidoari kenkariak (foru-arau honetako 62 - 64 bitarteko artikuluetakoak ez beste guztiak) aplikatzearen ondorioko kopurua ezin da izan zerga-oinarriaren % 13 baino gutxiago, oro har.

Hala ere, kuota likidoa kenkariak aplikatuta murriztearen ondoriozko kuota efektiboa ezin da izan ondoko kasu hauetako ehunekoa baino gutxiago:

a) Enpresa txikiak edo mikroenpresak: zerga-oinarriaren % 11.

b) Foru-arau honetako 56. artikuluko 3. idatz-zatian ezarritako karga-tasa jasaten duten entitateak: zerga-oinarriaren % 9,75.

c) Foru-arau honetako 56. artikuluko 6. idatz-zatian ezarritako karga-tasa jasaten duten entitateak: zerga-oinarriaren % 16,25.

4.– Entitateak aurreko ekitaldiko plantillako lan-kontratudunen batez besteko kopurua mantentzen badu edo gehitzen badu, aurreko idatz-zatiko ehunekoak barik ondoko hauek aplikatuko dira, hurrenez hurren: % 11, % 9, % 7,75 eta % 14,25.

5.– Aurreko bi idatz-zatietan xedatutakoa ez zaie aplikatuko foru-arau honetako 56. artikuluko 2., 4. eta 5. idatz-zatietan ezarritako karga-tasetako bat jasaten duten entitateei.

II. KAPITULUA

ZERGAPETZE BIKOITZA SAIHESTEKO KENKARIA

60. artikulua. Zergapetze bikoitza saihesteko kenkaria.

1.– Zergadunaren zerga-oinarrian atzerrian lortu eta kargatutako errentak sartzen badira, kuota osotik kendu behar da zerga hau bezalako karga edo antzeko karga baten zioz atzerrian ordaindutako zenbatekoa.

Foru-arau honetako 34. artikuluko 2. idatz-zatian aipatzen diren kasuetan, aurreko paragrafoaren xedatutakoaren ondoreetarako zenbateko hau soilik hartuko da kontuan: atzerrian zerga hau bezalako edo antzeko karga baten zioz benetan ordaindutako kopurutik foru-arau honetako 33. artikuluko 1. idatz-zatiko b) edo c) letran ezarritakoaren arabera zerga-oinarrian integratu behar ez diren errentei dagokion zatia, hain zuzen ere partaidetzaren eskualdaketari esker lortutako guztirako errenten proportziozkoa.

Salbuespena, hobaria edo beste edozein zerga-onura dela-bide ordaindu ez diren zergak ez dira kenduko. Halaber, foru-arau honetako 39. artikuluko 3. idatz-zatian xedatutakoarekin bat etorriz zerga-oinarrian sartu ez diren errenten gaineko zergak ere ez dira kengarriak.

Ezarpen bikoitza eragozteko hitzarmena ezarri beharrean, kenkaria ezin da izan hitzarmen horren arabera ordaindu beharreko zergak ezarritakotik gorakoa.

2.– Atzerrian ordaindutako zenbatekoa, errentan sartuko da aurreko idatz-zatian ezarritako ondoreetarako eta, halaber, zerga-oinarriaren parte izango da, guztiz kengarria izan ez arren.

3.– Zergadunak zergaldian zehar atzerrian errenta bat baino gehiago lortu badu, kenkaria herri berean eskuratutakoak batuz egingo da, salbu establezimendu iraunkorrekoak, azken hauetako bakoitzerako aparte konputatuko baitira.

4.– Gainera, zerga-oinarrian entitate batek ordaindutako dibidenduak edo mozkin-partaidetzak sartuz gero, entitate horrek dibidenduen iturri diren mozkinengatik benetan ordaindutako zerga-karga kenduko da, hain zuzen ere dibidenduei dagokien zenbatekoa, baldin eta zenbateko hori zergadunaren zerga-oinarrian sartuta badago.

Idatz-zati honetan xedatutakoa aplikatzeko ezinbestekoa da foru-arau honetako 33. artikuluko 1. idatz-zatiko a) letran ezarritakoa betetzea; kasu horretan artikuluko bereko 3. eta 5. idatz-zatietan xedatutakoa aplikatuko da.

Hori dela eta, benetan ordaindutako zergatzat hartuko da dibidendua banatzen duen sozietatean partaidetza duten entitateek eta aldi berean azken hauek zuzeneko partaidetza duten entitateek, eta horrela hurrenez hurren, ordaindutako zerga, dibidenduak ordaintzeko erabili diren mozkinei egotzitako zatian, baldin eta partaidetza horiek % 5 baino txikiagoak ez badira (edo % 3 baino txikiagoak, sozietateak antolatutako bigarren mailako merkatu batean kotizatzen badu) eta foru-arau honetako 33. artikuluko 1. idatz-zatiko a) letran ezarritako beharkizuna betetzen badute partaidetzaren edukitza-aldiari dagokionez.

Idatz-zati honetan xedatutakoa ez zaie aplikatuko foru-arau honetako 14. artikuluko ondare-sozietateei.

5.– Zergadunaren errenten artean egoitza Espainiako lurraldetik kanpo duen entitate baten dibidenduak edo mozkin-partaidetzak badaude, hain zuzen ere egoitza Espainiako Erresumak nazioarteko zergapetze bikoitza saihesteko hitzarmena (informazioa trukatzeko klausularekin) sinatuta ez daukan herrialde bateko entitate batenak, zergadunak nazioarteko zergapetze bikoitza saihesteko kenkaria aplikatzea hauta dezake (kenkari hau ezin da bateratu artikulu honetako aurreko idatz-zatietako kenkariarekin): dibidenduei edo mozkin-partaidetzei dagokien zerga-oinarriaren % 18.

Aurreko paragrafoan xedatutakoa aplikatzeko, dibidenduei edo mozkin-partaidetzei dagokien zerga-oinarria honela kalkulatu behar da: haien zenbateko osotik partaidetzaren inguruko gastuak kendu behar dira.

Idatz-zati honetan xedatutakoa ez da aplikatuko kasu hauetan: dibidenduei edo mozkin-partaidetzei foru-arau honetako 33. artikuluan ezarritakoa aplikatu ahal bazaie; dibidenduak edo mozkin-partaidetzak foru-arau honetako 33. artikuluko 1. idatz-zatiko c) letrako azken paragrafoan xedatutakoari dagokionez konputatzen ez den jarduera batean sortu badira; dibidenduak edo mozkin-partaidetzak foru-arau honetako 48. artikuluko 2. idatz-zatiko c) letran aipatzen diren jardueretako batek sortu baditu.

6.– Zerga-oinarrian foru-arau honetako 48. artikuluan ezarritakoaren arabera egoiliar ez diren entitateek lortutako errenta positibo batzuk sartu behar dituzten zergadunek ondokoak kendu ahal izango dituzte kuota osotik:

a) Zerga hau bezalako edo antzeko zergak edo kargak, benetan ordainduak, hain zuzen ere zerga-oinarrian sartutako errenta positiboari dagokion zatia.

Benetan ordaindutzat joko dira egoiliar ez den entitateak eta hark partaidetza daukan entitateek ordaindutakoak, baldin partaidetza-ehunekoa foru-arau honetako 33. artikuluko 1. idatz-zatian aipatutakora heltzen bada.

b) Dibidenduen banaketaren edo mozkinetako partaidetzen zioz, atzerrian benetan ordaindutako zerga edo karga bat datorrenean ezarpen bikoitza eragozteko hitzarmen batekin, edo bestela kasuko lurralde edo lurraldeko barne-legeriari lotzen zaionean, aldez aurretik zerga-oinarriaren barruan sartutako errenta positiboari dagokion zatian.

Entitate ez-egoiliarraren kapitaleko partaidetza zeharkakoa bada, beste entitate ez-egoiliar baten edo batzuen bitartez, azken horrek edo horiek benetan ordaindutako zerga hau bezalako edo antzeko zerga edo karga kenduko da, hain zuzen ere lehendik zerga-oinarrian sartutako errenta positiboari dagokion zatia.

Kenkari hauek egin egingo dira, nahiz eta zergak sarrera burutu zen zergaldia ez den beste batzuei dagozkien.

Zerga-paradisutzat jotzen diren herrialde eta lurraldeetan ordaindutako zergek ez dute kenkaririk sortuko.

7.– Artikulu honetan ezarritakoaren araberako kenkaria ezin da izan zerga hau dela eta zerga-oinarrian sartutako errentagatik ordaindu beharreko kuota osoa baino gehiago.

Atzerrian ordaindutako zergak kenduz gero, kenkariaren zenbatekoa ezin da izan errenta Gipuzkoako Lurralde Historikoko Sozietateen gaineko Zergaren arautegiaren menpean dagoen entitate batek ordainduz gero, hura dela eta ordaindu beharreko kuota osoa baino gehiago.

Muga horretatik gorakoa ezin izango da zergatik ken daitekeen gastutzat jo.

8.– Kuota osoa nahikoa izan ez eta kendu ez diren zenbatekoak hurrengo hamabost urteetan amaitzen diren zergaldietako kuota osoetatik kendu ahal izango dira.

Idatz-zati honetan xedatutakoa ez zaie aplikatuko artikulu honetako 5. idatz-zatian ezarritakoaren arabera kentzen diren kopuruei.

III. KAPITULUA

BESTE KENKARI BATZUK

61. artikulua.– Aktibo finko berrietako inbertsioen ziozko kenkaria.

1.– Ondoren azalduko diren aktibo finkoetan inbertitzen diren kopuruek kuota likidoan kenkaria aplikatzeko eskubidea emango dute, hain zuzen ere inbertsioaren % 10 (ustiapen ekonomiko bati atxikitako lurrak ez dira hartu behar halako aktibotzat):

a) Ibilgetu materialeko edo higiezinetako inbertsioetako aktibo finko berriak eskuratzeko ordaintzen diren kopuruak.

Aktibo finkoa ez da berritzat joko beste pertsona edo entitateren batek erabilitakoa bada, hau da, aurretik beste pertsona edo entitateren batek bere ibilgetuan sartu badu, edo, abian jarri ez arren, Kontabilitate Plan Orokorraren arabera ibilgetuan sartu beharra izan badu.

b) Pabilioi industrial birgaituak eskualdatzeko asmoarekin eskuratzeko, pabilioi industrialak birgaitzeko asmoarekin eskuratzeko edota enpresaren aktiboetan dauden pabilioi industrialak birgaitzeko inbertitutako kopuruak.

Ondore hauetarako, pabilioi industrialtzat joko dira industrial modura sailkatutako zonalderen batean daudenak, pabilioian burutzen den jarduera dena delarik, eta birgaitze lantzat, egiturak, fatxadak edota gainaldeak finkatuz eta tratatuz pabilioiak berreraikitzeko burutuko direnak, betiere birgaikuntzarako lanen kostua eskuraketaren % 25 baino gehiago denean, birgaitzeko eskuratzen badira, edota ondasunari emandako kopuruaren balio garbiaren % 25 baino gehiago, birgaituko den pabilioia enpresaren aktiboetako bat bada.

c) Aplikazio informatikoetako aktibo ukiezin berrietan egiten diren inbertsioak.

d) Enpresa emakidadunak emakida-erabakiari lotutako zerbitzu publiko bat emateko azpiegiturak eraikitzeko edo eskuratzeko egiten dituen inbertsioak, baina azpiegitura horiek ibilgetu ukiezin edo finantza-aktibo gisa kontabilizatuta egon behar dute abenduaren 23ko EHA/3362/2010 Agindua indarrean jarri zenetik. Agindu horrek, hain zuzen ere, Kontabilitate Plan Orokorra azpiegitura publikoen enpresa emakidadunetara egokitzeko arauak onartu zituen.

Artikulu honetako 3. idatz zatian xedatutakoaren ondoreetarako, azpiegitura horiek beren izaeraren arabera dagokien aktibo finkotzat hartuko dira.

2.– Orobat, aurreko idatz-zatian ezarritako betekizunak beteta aktibo finkoetan inbertitzen diren kopuruek kuota likidoan % 5eko kenkaria aplikatzeko eskubidea emango dute ondoko kasuetan:

a) Zergadunak bere aktibo finkoko elementuetan egiten duen inbertsioa hobekuntza moduan agertzen da kontabilitatean.

b) Eragiketa-errentamenduetan, errentariak errentatutako eta lagatako elementuan egiten dituen inbertsioak.

Kasu jakin batzuetan zergadunak Administrazioa lotesteko prozedura abiarazi ahal izango du Gipuzkoako Lurralde Historikoko Zergei buruzko Foru Arau Orokorreko 82. artikuluan eta hurrengoetan ezarritakoarekin bat etorriz, zerga-administrazioak kasuko inguruabarrak haztatu eta artikulu honetako 1. idatz-zatiko kenkari-tasa aplikatzeko baimena eman dezan: idatz-zati honetako a) letran aipatzen diren inbertsioak direla eta, kopuruagatik edo izaeragatik, hobekuntza aplikatu den aktiboan gertatzen den aldaketa egiturazko eta funtzionalari esker hura beste xede batzuetarako erabili ahal bada.

3.– Aurreko idatz-zatietan aipatutako inbertsioek honako ezaugarri hauek eta ondorengo beharkizunak bete beharko dituzte:

a) Inbertitutako kopuruak aktibo ez korrontearen barruan kontabilizatu behar dira.

b) Inbertsioak aplikatzen diren aktiboek (informatikoek ez beste guztiek) gutxienez bost urteko amortizazio-aldia eduki behar dute ezarrita; aldi hori foru-arau honetako 17. artikuluko 1. idatz-zatian ezarritako taulako gehieneko amortizazio-koefizientea aplikatuta kalkulatuko da.

c) Ez dute ordaindu behar Zenbait Garraiobideren gaineko Zerga Berezia, bai haren menpeko ez direlako, bai, izan arren, salbuetsita daudelako; salbuespena: inbertsioa turismo ibilgailuetan egitea Zerga ordaindu arren halako ibilgailuen errentamenduan diharduten entitateek, baldin eta erosteko eskubiderik gabe («renting») eta hiru hilabeterako gehienez (pertsona edo entitate berari) edo jarraiko hamabi hilabeterako errentatzen badituzte, abenduaren 29ko 7/1994 Foru Dekretuko –Gipuzkoako Lurralde Historikoaren araudi fiskala Balio Erantsiaren gaineko Zergari buruzko abenduaren 28ko 37/1992 Legera egokitzen duena– 79. artikuluko 5. idatz-zatian ezarritakoaren arabera loturik dauden pertsona edo entitateei laga ezean, eta beti ere ibilgailuak alokatzeko beste ezertarako erabiltzen ez badira.

d) Inbertsioa aplikatzen den aktiboen guztirako zenbatekoa, ekitaldi bakoitzean, ondokoen baturaren % 10 baino gehiago izan behar da: ibilgetu materialeko aktibo finkoko aurreko kontabilitateko balio garbiak, higiezinetako inbertsioak, aplikazio informatikoetako ibilgetu ukiezina, eta artikulu honetako 1. idatz-zatiko d) letran aipatzen diren inbertsioak; baturatik kontabilizatutako amortizazioak eta narriaduraren ondoriozko galerak kendu behar dira.

Kontabilitateko balioa zehazteko, inbertsioa egingo den ekitaldiaren aurreko zergaldiaren azkenengo egunari dagokion balantzeari begiratuko zaio, egun horretan jardunean dagoen inbertsiopeko aktibo finkoari dagokiona zenbatuko ez delarik.

Betekizun hau betetzen denez argitzeko artikulu honetako 1. eta 2. idatz-zatietan aipatzen diren aktiboetan egindako inbertsioak baizik ez dira zenbatuko, idatz-zati honetako aurreko letretako betekizunak betez gero; beraz, artikulu honetan xedatutakoaren arabera pizgarria izan dezaketen inbertsioak soilik konputatu behar dira.

4.– Foru-arau honetako 67. artikuluko 3. idatz-zatian xedatutakoaren ondoreetarako, inbertsioak pabilioi industrialak birgaitzeko egiten direnean, birgaitzeko eskuratzen badira, berauen birgaiketarako erabiliko diren kopuruek eta haiek eskuratzeko salneurriaren zenbatekoak zehaztuko dute oinarria, aurrean aipatutako idatz-zatian azaldutako kontzeptuak kenduta.

5.– Baldin eta foru-arau honetako 67. artikuluko 5. idatz-zatian aipatutako jaregitearen ondorioz inbertsioaren kopurua murrizten bada eta artikulu honetako 3. idatz-zatiko d) letran kenkaria aplikatzeko ezarritako gutxienekora iristen ez bada, kenkari osoa galduko da eta kenkariak direla eta ordaindu gabeko kuotak ordaindu beharko dira, bai eta berandutze-korrituak ere (hori gertatzen den ekitaldiko autolikidazioaren ondoriozko kuotari gehitu beharko zaizkio).

62. artikulua.– Ikerketa eta garapen jardueren ziozko kenkaria.

1.– Ikerketa eta garapen jarduerak egiteak kuota likidoan kenkaria aplikatzeko eskubidea emango du, artikuluan honetan eta foru-arau honetako 64. artikuluan ezarritakoarekin bat etorriz.

2.– Ikerketa eta garapentzat hartuko dira:

a) Ezagutza berriak aurkitzeko eta zientzian edo teknologian goi ulerkuntza bilatzeko egiten den «oinarrizko ikerketa» edo azterlan original eta planifikatua, betiere merkataritza edo industria helburuetatik kanpokoa.

b) Ezagutza berriak aurkitzeko egiten den «ikerketa aplikatua» edo azterlan original eta planifikatua, betiere ezagutza horiek produktu, prozesu edo zerbitzu berriak garatzen edo lehendik daudenak nabarmen hobetzen erabiltzekoa bada.

c) Ikerketa aplikatuaren emaitzen «garapen esperimentala» edo produktu, prozesu edo zerbitzu berrien plan,eskema edo diseinu batean aplikatutako ikerketaren gauzatzea, edo emaitza horien hobekuntza nabarmena, bai eta merkaturatu ezin diren prototipoen sorrera eta hasierako erakusketarako proiektuak edo proiektu aitzindariak ere, baldin eta aplikazio industrialetarako edo merkataritzako ustiapenerako bihurtu edo erabili ezin badira.

d) Software aurreratuaren sorkuntza, baldin eta horrek aurrerapen zientifikoa edo teknologiko nabarmena badakar, dela teorema eta algoritmo berriak garatuz dela sistema eragile eta lengoaia berriak sortuz, edota pertsona ezgaituak informazioaren gizarteko zerbitzuetara sartzeko egiten bada. Softwarearekin erlazionatuta dauden ohiko edo betiko jarduerak hortik kanpo geratzen dira.

3.– Kenkariaren oinarrian ondokoak sartuko dira: ikerketa eta garapen gastuen zenbatekoak eta, bidezkoa izanez gero, ibilgetu material eta ukiezineko elementuetan (higiezinak eta lurrak ez besteetan) egindako inbertsioak.

Ikerketa eta garapeneko edo berrikuntza teknologikoko gastutzat hartuko dira subjektu pasiboak egindako gastuak, baldin eta jarduera horiei zuzenean lotuta badaude eta benetan jarduera horietan erabili badira. Proiektuen arabera banaka sailkatuta agertuko dira gastuak.

Halaber, kenkariaren oinarrian sartuko dira Europar Batasuneko edo Europako Esparru Ekonomikoko beste estatu batzuetan egindako jarduerei dagozkien ikerketa eta garapen gastuak ere.

Europar Batasunekoak edo Europako Esparru Ekonomikokoak ez diren estatuetan egindako jardueren gastuei dagokienez, hauek ere kenkarirako eskubidea izango dute, baldin eta ikerketa eta garapeneko jarduera nagusia Europar Batasuneko edo Europako Esparru Ekonomikoko estatu batean egiten bada eta gastuen zenbatekoa guztirako inbertsioaren % 25 baino gehiago ez bada.

Ikerketa eta garapeneko gastutzat hartuko dira, era berean, jarduera horiek Europar Batasuneko edo Europako Esparru Ekonomikoko estatu batean egiteko asmoarekin zergadunak, berak bakarrik edo beste entitate batzuekin batera, ordaintzen dituen diru kopuruak.

4.– Kenkari ehunekoak hauek izango dira:

a) Kontzeptu hau dela-eta zergaldiaren barruan egindako gastuen % 30.

Ikerketa eta garapen jarduerak egiteagatik zergaldian izandako gastuak aurreko bi urteetan izandako batez bestekoa baino handiagoak badira, batez besteko horretara iritsi arte aurreko paragrafoan jasotako ehunekoa aplikatuko da, eta batez besteko horretatik gorako soberakinari, berriz, % 50.

Aurreko paragrafoetan xedatutakoaren arabera egokia den kenkariaz gain, % 20ko kenkari gehigarria egingo da zergaldiko gastu hauengatik:

a') Entitateko langileria gastuengatik, ikerketa eta garapen jarduerei oso-osorik lotutako ikertzaile kualifikatuei dagozkienean.

b’) Ikerketa eta garapen proiektuetan egindako gastuak, proiektua hauetako batekin kontratatuta egonez gero: unibertsitateak, ikerketako erakunde publikoak edo zentro teknologikoak eta teknologiaren berrikuntzarako zentroak (hala onartuta eta erregistratuta daudenak Estatuko zentro teknologikoak eta teknologiaren berrikuntzarako zentroak arautu eta zentro horien erregistroa sortu duen abenduaren 19ko 2093/2008 Errege Dekretuaren arabera), eta Zientzia, Teknologia eta Berrikuntzaren Euskal Sarearen oinarriak eguneratzen dituen urriaren 1eko 221/2002 Dekretuaren bidez araututako Teknologiaren Euskal Sarean dauden entitateak.

b) Ibilgetu material eta immaterialeko elementuetan egindako inbertsioen % 10, higiezinak eta terrenoak kanpoan utzita, baldin eta bakar-bakarrik ikerketa eta garapen jarduerei atxikita badaude.

63. artikulua.– Berrikuntza teknologikorako jarduerengatiko kenkaria.

1.– Berrikuntza teknologikoko jarduerak egiteak eskubidea emango du kuota likidoan % 15eko kenkaria aplikatzeko artikulu honetako 3. idatz-zatiko b) eta c) letretan azaldutako kasuetan, eta % 20ko kenkaria, aldiz, idatz-zati bereko a) eta d) letretako kasuetan, artikulu honetan eta hurrengoan ezarritakoarekin bat etorriz.

2.– Berrikuntza teknologikotzat hartuko da produktu edo produkzio prozesu berrien lorpena edo jadanik daudenen hobekuntza nabarmena dakarren jarduera, baldin eta horren emaitza aurrerapen teknologikoa bada. Era berean, berritzat hartuko dira ikuspegi teknologikotik begiratuta lehendik daudenetatik nabarmen bereizten diren ezaugarri edo aplikazioak dituzten produktu edo prozesuak.

Jarduera horren barruan sartuko da produktu edo prozesu berriak plan, eskema edo diseinu batean gauzatzea, bideragarritasun azterketak egitea, prototipoak sortzea eta hasierako erakusketarako proiektuak edo proiektu aitzindariak eta ehunen lagindegiak egitea, bai eta aplikazio industrialetarako edo merkataritzako ustiapenerako bihurtu edo erabili daitezkeenak ere.

Halaber, diagnostikoari lotutako jarduerak ere sartzen dira, helburua soluzio teknologiko aurreratuen identifikazioa, zehaztapena eta orientazioa denean (artikulu honetako 3. idatz-zatiko a) letran aipatzen diren entitateek egiten dituztenak), emaitzak gorabehera.

3.– Kontzeptu hauei lotutako berrikuntza teknologikoko jardueretan zergaldiaren barruan izandako gastuez osatuta egongo da kenkariaren oinarria:

a) Ondokoei agintzen zaizkien proiektuak: unibertsitateak, ikerketako erakunde publikoak edo zentro teknologikoak eta teknologiaren berrikuntzarako zentroak (hala onartuta eta erregistratuta daudenak Estatuko zentro teknologikoak eta teknologiaren berrikuntzarako zentroak arautu eta zentro horien erregistroa sortu duen abenduaren 19ko 2093/2008 Errege Dekretuaren arabera), eta Zientzia, Teknologia eta Berrikuntzaren Euskal Sarearen oinarriak eguneratzen dituen urriaren 1eko 221/2002 Dekretuaren bidez araututako Teknologiaren Euskal Sarean dauden entitateak.

b) Produkzio prozesuen diseinu industriala eta ingeniaritza. Horien barruan hauek sartuta daude: planen kontzepzioa eta prestaketa, deskripzio elementuak definitzeko marrazkiak eta euskarriak nahiz produktu baten fabrikazio, proba, instalazio eta erabilpenerako nahiz ehunen lagindegien prestaketarako behar diren zehaztapen teknikoak eta funtzionamendu ezaugarriak.

c) Teknologia aurreratuaren eskurapena, patente, baimen, «know-how» eta diseinu moduan. Zergadunarekin zerikusia duten pertsona edo entitateei ordaindutako kopuruek ez dute kenkarirako eskubiderik emango. Kontzeptu honi lotutako oinarria ezin da milioi bat euro baino handiagoa izan.

d) Kalitatea ziurtatzeko ISO 9000 serieko, ISO 14000, GMP araua edo antzeko arauak betetzearen ziurtagiria lortzea, arau horiek ezartzeko behar diren gastuak sartu gabe.

4.– Berrikuntza teknologikoko gastutzat hartzen dira zergadunak proiektuka banatuta berariaz egiten dituenak, baldin eta artikulu honetan aipatutako jarduerei zuzenean lotuta badaude eta benetan jarduera horiek garatzeko erabiltzen badira.

5.– Halaber, kenkariaren oinarrian sartuko dira Europar Batasuneko edo Europako Esparru Ekonomikoko beste estatu batzuetan egindako jarduerei dagozkien berrikuntza teknologikoko gastuak ere.

Europar Batasunekoak edo Europako Esparru Ekonomikokoak ez diren estatuetan egindako jardueren gastuei dagokienez, hauek ere kenkarirako eskubidea izango dute, baldin eta berrikuntza teknologikoko jarduera nagusia Europar Batasuneko edo Europako Esparru Ekonomikoko estatu batean egiten bada eta gastuen zenbatekoa guztirako inbertsioaren % 25 baino gehiago ez bada.

Berrikuntza teknologikorako gastutzat hartuko dira, era berean, jarduera horiek Europar Batasuneko edo Europako Esparru Ekonomikoko estatu batean egiteko asmoarekin zergadunak, berak bakarrik edo beste entitate batzuekin batera, ordaintzen dituen diru kopuruak.

64. artikulua.– Ikerketa eta garapenaren eta berrikuntza teknologikoaren kontzeptutik kanpo gelditzen direnak, eta kenkariak interpretatzeko eta aplikatzeko arauak.

1.– Honako hauek ez dira ikerketa eta garapen jardueratzat ez berrikuntza teknologiko jardueratzat joko:

a) Berekin berritasun zientifiko edo teknologiko esanguratsurik ez dakarten jarduerak. Bereziki, produktuen edo prozesuen kalitatea hobetzeko ohiko ahaleginak, lehendik dagoen produktu edo produkzio prozesu bat bezero batek ezarritako betebehar zehatzetara egokitzea, aldizkako edo sasoiko aldaketak, eta lehendik dauden produktuetan antzekoetatik bereizteko egindako aldaketa estetikoak edo garrantzi txikikoak.

b) Industria produkzioko eta zerbitzu hornikuntzako edo ondasun eta zerbitzu banaketako jarduerak. Bereziki, produkzio jardueraren plangintza; produkzioaren prestaera eta hasiera, tresnen doikuntza eta foru-arau honetako 63. artikuluko 3. idatz-zatian azaldutakoez bestelako jarduerak barne direlarik; ikerkuntza eta garapen jarduera edo berrikuntza jarduera bezala sailkatutako jarduerei atxikita ez dauden produkziorako instalazio, makina, ekipo eta sistemak eranstea edo aldatzea; etendako produkzio prozesuetako arazo teknikoen konponketa; kalitatearen kontrola eta produktu eta prozesuen normalizazioa; gizarte zientzien alorreko prospekzioa eta merkatu azterketak; merkaturatzeko sareak edo instalazioak ezartzea; jarduera horiekin loturiko langileen trebakuntza eta prestakuntza.

c) Mineral eta hidrokarburoen azterketa, zundaketa edo prospekzioa.

2.– Foru-arau honetako 62. eta 63. artikuluetan arautzen diren kenkariak aplikatzeko, zergadunek arau bidez ezarritako organoak egindako txosten arrazoitua aurkeztu ahal izango dute artikulu horietako 2. idatz-zatietan zergadunaren jarduerak ikerketa eta garapentzat edo berrikuntza teknologikotzat (hurrenez hurren) kalifikatzeko eskatzen diren betebehar zientifiko eta teknologikoak betetzeari buruz. Kasu batean zein bestean, artikulu honetako 1. idatz-zatian xedatutakoa hartu beharko da kontuan. Esandako txostenean, jarduera horiei egotzitako gastuen eta inbertsioen zenbatekoa zehaztu beharko da.

65. artikulua.– Garapen iraunkorra, ingurumenaren zaintza eta hobekuntza zein energia iturrien aprobetxamendu eraginkorragoa lortzera zuzentzen diren proiektuekin loturiko inbertsio eta gastuengatiko kenkaria.

1.– Zergadunek Teknologia Garbien Euskal Zerrenda onartzen duen Eusko Jaurlaritzako sail egokiaren aginduan zehazten diren ekipo osoetan egindako inbertsioen zenbatekoaren % 30 kendu ahal izango dute kuota likidotik.

2.– Zergadunek honako hauen zenbatekoaren % 15 kendu ahal izango dute kuota likidotik:

a) EAEko erakunde ofizialek onarturiko proiektuak gauzatzeko ekitaldian zehar lur kutsatuak garbitzeko aktibo finkoetan egindako inbertsioak eta izandako gastuak.

b) Ibilgetu materialeko aktibo berrietan egindako inbertsioak, aktibo horiek ondoren adierazten diren helburuetako bat edo batzuk –garapen iraunkorraren eta ingurumenaren babes eta hobekuntzaren eremuaren barruan– dituzten proiektuak gauzatzean beharrezkoak badira:

a') Hondakinak minimizatzea, berrerabiltzea eta balioztatzea.

b') Mugikortasuna eta garraio iraunkorra.

c') Natura-guneetako ingurumena leheneratzea, konpentsazio neurriak edo bestelako borondatezko ekintzak gauzatzearen ondorioz.

d') Ur kontsumoa minimizatzea eta ura araztea.

e') Energia berriztagarrien erabilera eta energia eraginkortasuna.

3.– Artikulu honetako 1. idatz-zatian aipatzen den kenkaria zergadunak aplikatu behar du zerga-administrazioak eskatuta. Hain zuzen ere, ekipo osoetan egindako inbertsioez Eusko Jaurlaritzako sail egokiak ziurtagiria aurkeztu beharko du (Teknologia Garbien Euskal Zerrenda onartu duen Eusko Jaurlaritzako sail egokiaren Aginduan aipatzen diren ekipoak).

Artikulu honetako 2. idatz-zatiko a) letran aipatzen den kenkaria zergadunak aplikatu behar du zerga-administrazioak eskatuta. Eusko Jaurlaritzako sail egokiak emandako ziurtagiria, letra horretan azaltzen diren betekizunak betetzen dituela frogatzen duena, aurkeztu behar du.

Artikulu honetako 2. idatz-zatiko b) letran aipatzen den kenkaria zergadunak aplikatu behar du zerga-administrazioak eskatuta. Hain zuzen ere, Gipuzkoako Foru Aldundian edo Eusko Jaurlaritzan ingurumenaren arloko eskumena daukan sailak egindako ziurtagiria, inbertsioek letra horretan ezarritako betekizunak betetzen dituela frogatzen duena, aurkeztu beharko du.

4.– Foru-arau honetako 67. artikuluko 5. paragrafoan xedatutakoaren ondorioetarako, iritziko da ez dagoela desatxikitzerik artikulu honetan araututako kenkariaz baliatzen diren aktiboak, legeak hala aginduta, hirugarrenei lagatzen zaizkienean.

Era berean, finantza-errentamenduko araubidean egindako inbertsioak ere kenkari honetaz baliatu ahal izango dira.

5.– 67. artikuluan xedatutakoa eragotzi gabe, artikulu honetako 1. idatz-zatian eta 2. idatz-zatiko a) eta b) letretan aipatzen diren kenkariak bateraezinak dira euren artean.

6.– Erregelamendu bidez arautuko da kenkari hau aplikatzeko prozedura. Halaber, haren aplikazioa dakarten egitatezko suposamenduak zehaztu ahal izango dira.

66. artikulua.– Enplegua sortzeagatiko kenkaria.

1.– Zergaldian zehar lan-kontratu mugagabea egiten zaion pertsona bakoitzeko 4.900 euro kendu ahal izango da kuota likidotik.

Kopuru horri 4.900 euro gehituko zaizkio kontratatzen den pertsona lan-merkatuan sartzeko zailtasun bereziak dituzten taldeetako batean sartuta badago, Euskal Autonomia Erkidegoan indarrean dagoen araudian xedatutakoari jarraiki.

Lanaldi partzialeko kontratua duten langileen kasuan, kenkariaren zenbatekoa langileak egindako lanaldiaren araberakoa izango da, lanaldi osoari dagokionez.

2.– Aurreko idatz-zatian xedatutako kenkaria aplikatzeko ezinbestekoa da kontratazioa egiten den zergaldiaren amaieran lan-kontratu mugagabea duten langileen kopurua ez murriztea hurrengo bi urteetan amaitzen diren zergaldietan eta kopuru hori kenkaria sortu den zergaldiaren hasierakoa baino handiagoa izatea, eta diferentzia, gutxienez, kenkaria aplikatzeko eskubidea eman duten kontratuen kopurua izatea.

Gainera, aurreko idatz-zatian aipatzen den langileen kopurua (azken ekitaldiko lan-kontratu mugagabea duten langileak) kontratazioak egin aurreko zergaldikoa baino handiagoa izan behar da, eta diferentzia, gutxienez, kenkaria aplikatzeko eskubidea eman duten kontratuen kopurua izan behar da.

Idatz-zati honetan xedatutakoa lan-kontratu mugagabea duten langile guztiekiko zein aurreko 1. idatz-zatiko bi langile taldeekiko bete behar da, araudian ezarritakoarekin bat etorriz.

Lan-harremanak eteten direnean edo lanaldia murrizten denean (Langileen Estatutuko 47. artikulua), idatz-zati honetan ezarritako betekizunak ez dira bete beharko lan-harremanen etendurak edo lanaldiaren murrizketak ondoreak sortzeari utzi arte.

Halaber, lan-kontratu mugagabea duten langileen murrizketa ez da konputatuko enpresak langile kopuru bera kontratatzen badu kontratu bakoitza azkendu denetik hiru hilabete pasatu baino lehen. Kontratu berriei hurrengo idatz-zatiko azken paragrafoan ezarritakoa aplikatuko zaie.

3.– Artikulu honetako 2. idatz-zatian ezarritako betekizunak betetzen ez badira, zergadunak ez-betetzea gertatzen den zergaldiko autolikidazioan kenkariaren ondoriozko kuota sartu behar du, eta horrekin batera beraren berandutze-korrituak ere bai.

Lan-kontratu mugagabea duten langileen kopurua mantentzeaz ezarritako guztia betetzen ez bada, zergadunak inguruabar hori gertatzen den zergaldiko kuotari hauxe gehitu behar dio: mantendu ez diren langileen kopuruari dagokion kenkariaren zati proportzionala, berandutze-korrituak erantsita.

Langileen kopurua kalkulatzeko, lanaldi partzialean ari diren lan-kontratu mugagabedun langileak lanaldiaren araberako proportzioa aplikatuz konputatu behar dira.

Kenkarirako eskubidea sortzen duen kontratua formalizatu den zergaldia bukatu ondoko bi urteetan hasten diren zergaldietan zergadunak lan-kontratu berria egiten baldin badu, eta kontratu horrek kenkari eskubidea sortzeko betekizunak betetzen baditu eta aurreko ekitaldi batean sortutako kenkaria aplikatzeko eskubidea finkatzeko beharrezkoa baldin bada, lan-kontratuak ez du kenkarirako eskubiderik sortuko, aipatu finkatze horretarako beharrezkoa den zatian.

4.– Sozietateak eta banakako enpresak bat egin, banandu eta eraldatuz sozietate berriak sortzeko eragiketak gauzatzeak ez du ekarriko, berez, artikulu honetan jasotzen den kenkaria aplikatzerik.

5.– Foru-arau honetako 42. artikuluko 3. idatz-zatian ezarritako kasuetan, kenkari honen aplikaziorako kontuan hartu beharko dira lotutako entitateen egoera bateratua.

67. artikulua.– Kapitulu honetan ezarritako kenkariei buruzko arau orokorrak.

1.– Kapitulu honetan aurreikusitako kenkarien batura, aurreko 62-64 bitarteko artikuluetan ezarritako kenkariak salbu utzita, ezin da izan kuota likidoaren % 45 baino gehiago.

2.– Kuota nahikoa izan ez eta kentzen ez diren kopuruak hurrengo hamabost urteetan amaitzen diren zergaldietako likidazioetan aplikatu ahal izango dira, muga bera errespetatuta.

Kapitulu honetako kenkariak aplikatzeko epealdien konputua emaitza positiboak gertatzen diren lehen ekitaldira arte atzeratu ahal izango da preskripzio-aldiaren barruan.

3.– Hitzartutako kontraprestazio osoa sartuko da kenkariaren oinarrian, baina ez dira kontuan hartuko hauek: interesak, zeharkako tributuak eta horien errekarguak, eraikuntza-marjina eta lizitazioen gastu teknikoak. Horiek ez dira horren barruan konputatuko, aktiboak edo, halakorik bada, gastuak baloratzeko aintzat har badaitezke ere.

Aurreko paragrafoan xedaturikoa gorabehera, ez dira kapitulu honetan ezarritako kenkarien oinarrian sartuko aktiboekin lotutako desegiteen edo ezabaketen ondorioz harturiko betebeharrei dagozkien kostuak, betiere kenkari horiek aplikatzeko eskubidea ematen badute, aktiboak baloratzeko aintzat hartu zein ez.

Errentamendu operatiboen kasuan, errentatu edo laga den elementuan errentariak egindako inbertsioaren zioz agerian jartzen diren aktiboei ez zaizkie aplikatuko kapitulu honetan aurreikusitako kenkariak, salbu eta hala ezartzen denean beren-beregi.

Foru-arau honetako 31. artikuluko 3. idatz-zatian aipatutako ibilgailuen kasuan, kenkariak aplikatuko zaizkie haren e) letran aipatutako ibilgailuei bakarrik. Era berean, 31. artikulu horretako 3 bis idatz-zatian aipatutako garraio-elementuen kasuan, kenkariak aplikatuko zaizkie haren hirugarren paragrafoan aipatutako elementuei bakarrik.

Kenkariaren oinarria, horrela kalkulatuta, ezin izango da merkatuan egoera normalean eta pertsona independenteen artean adostuko litzatekeen prezioa baino handiagoa izan.

Inbertsioak ondasun higiezinei badagozkie, lurzoruaren balioa kenkariaren oinarritik kanpo utziko da beti.

Halaber, aipatutako kenkariaren oinarritik hauxe kenduko da, hala badagokio: aurreko hiru kapituluetako kenkariak dagozkien inbertsioetarako edo jarduerak sustatzeko diru-laguntzei (kapitalekoak zein ustiapenekoak) 100 eta entitateari aplikatu beharreko karga-tasaren arteko kendura aplikatzearen emaitza.

Kapitulu honetan araututako kenkarien oinarrian sartzen diren zenbateko guztiak ibilgetu moduan edo, hala badagokie, gastu moduan kontabilizaturik egon beharko dira, Kontabilitate Plan Orokorreko arauei jarraituz.

4.– Oro har, kapitulu honetan aurreikusitako inbertsioak funtzionamenduan jartzen diren garaian egindakotzat hartuko dira.

Hala ere, epe luzerako inbertsioetan (hamabi hilabete baino gehiago igaro direnean ondasunak enkargatu zirenetik eskuan izan arte) zergadunak erabaki dezake inbertsioa ordainketak egin ahala eta horien zenbatekoaz egindakotzat ematea, inbertsio ondasunen hornitzailearekin kontratua sinatu zen egunean indarrean zegoen kenkarien araubidea aplikatuz.

Hori hautatuz gero, irizpide hori inbertsio osoan izango da aginduzko.

Aukera horretaz baliatu nahi duen zergadunak Ogasun eta Finantza Sailari emango dio horren berri, hilabeteko epearen barruan, kontratuaren datatik aurrera. Jakinarazpenean, kontratatutako inbertsioaren zenbatekoa zehaztu beharko du, baita ondasunak entregatu eta ordaintzeko egutegia ere. Halaber, horrekin batera kontratuaren kopia ere bidali behar dio.

5.– Kapitulu honetan aurreikusitako kenkarien gai diren aktibo finkoak edo ondare-elementuak gutxienez bost urtez (edo, ondasun higigarriak badira, hiru urtez) egon beharko dira funtzionatzen zergadun beraren enpresan, aurreko artikuluetan aurreikusitako helburuei atxikita, hala badagokie, ondasun horien bizitza baliagarria laburragoa denean salbu, eskualdatu, alokatu edo hirugarrenei erabiltzeko laga gabe, justifikatutako galerak izan ezik. Elementu horiek desatxiki, eskualdatu, alokatu edo lagatzeak, edo adierazitako epea amaitu baino lehenago ezarritako helburuetatik desatxikitzeak, bere garaian egindako kenkariengatik ordaindu ez ziren kuotak –dagozkion berandutze interesekin– ordaintzeko beharra ekarriko du. Berandutze interesak, egoera hori gertatzen den ekitaldiko autolikidaziotik ateratzen den kuotari gehitu beharko zaizkio.

Aurreko paragrafoan xedatutakoa gorabehera, kenkarigai den inbertsioa gauzatzen den aktibo ez-korronteak hartan ezarritako epea baino denbora gutxiagoz egon daitezke, baldin eta haien ordez, hiru hilabeteko epean, kenkarirako eskubidea ematen duten betebeharrak eta baldintzak betetzen dituzten beste batzuk ipintzen badira.

Nolanahi ere, iritziko da ez dagoela jaregiterik inbertsioa gauzatzen den ondasunak alokatu edo hirugarrenei erabiltzeko lagatzen zaizkienean, ondoko hiru baldintzak betetzen badira: zergadunak, ustiapen ekonomiko bat dela medio, aktibo finkoak alokatzen edo hirugarrenei erabiltzeko lagatzen jardutea, ondasun horien errentari edo lagapen-hartzaileekin loturarik ez izatea, foru-arau honetako 42. artikuluan azaldutako zentzuan, eta finantza-errentamenduko eragiketak ez izatea.

6.– Gastu edo inbertsio berak ezin izango du kenkaria entitate bat baino gehiagotan aplikatzerik ekarri, ez eta entitate batean kapitulu honetan araututako kenkarietako bat baino gehiago aplikatzerik ere. Ezin izango du kapitulu honetan araututako kenkariak aplikatzerik ekarri, halaber, foru-arau honetako 53. artikuluan azaltzen den moduan ekintzailetza sustatzeko eta ekoizpen jarduera indartzeko erreserba berezia gauzatzeko balio izan badu.

Kapitulu honetan ezarritako kenkariak bateraezinak izango dira inbertsio eta gastu berekin loturiko beste edozein zerga-onurarekin, amortizatzeko askatasunari, amortizazio bizkortuari eta baterako amortizazioari dagokienez izan ezik.

7.– Kuota likidoko kenkariak aplikatzerakoan, honako hurrenkera hau jarraitu behar da:

a) Lehenengo, aurreko ekitaldietan sortutako kenkariak aplikatu behar dira, bakoitzaren arautegian ezarritako muga errespetatuta.

b) Ondoren, artikulu honetako aurreko 1. idatz-zatian ezarritako muga aplikatu behar zaien ekitaldi bereko kenkariak.

c) Jarraian, kuota likidoaren gaineko mugarik gabe aplikatzen diren aurreko ekitaldietako kenkariak.

d) Azkenik, kuota likidoaren gaineko mugarik gabe aplikatzen diren ekitaldiko kenkariak aplikatuko dira.

8.– Kapitulu honetan araututako kenkariak soilik izango dira aplikagarriak bertan eskatutako baldintza eta beharkizunen pean, zergadunak bere kabuz aurkezturiko autolikidazioetan aplikatutako diru kopuruengatik, baita zerga-arloko arau-haustearen ziozko erantzukizunik sortu ez duten likidazioen ondoriozko autolikidazioetan ere, ezertan eragotzi gabe foru-arau honetako 128. artikuluan xedaturikoa.

9.– Kapitulu honetan araututako kenkariak ez zaizkie aplikatuko foru-arau honetako 14. artikuluan aipatzen diren ondare-sozietateei.

IV. KAPITULUA

KONTURAKO ORDAINKETENGATIKO KENKARIA

68. artikulua.– Atxikipen eta konturako sarrerengatiko kenkaria.

1.– Kuota efektibotik kendu ahal izango dira:

a) Atxikipenak, salbu eta foru-arau honetako 39. artikuluko 3. idatz-zatian xedaturikoa aplikatuta zerga-oinarrian sartzen ez diren errentei dagozkienak.

b) Konturako sarrerak.

2.– Kontzeptu hauen guztien zenbatekoa benetako kuotatik gorakoa denean, zerga-administrazioak gaindikina, bere arioz, itzuliko du.

VI. TITULUA

ZERGA ARAUBIDE BEREZIAK

I. KAPITULUA

DEFINIZIOA

69. artikulua.– Definizioa.

1.– Zerga-araubide bereziak dira titulu honetan araututakoak, dela ukitutako zergadunen izaeragatik, dela egitate, egintza edo eragiketen izaeragatik.

2.– Gainerako tituluetan dauden arauak titulu honetakoen ordezko gisa erabiliko dira.

II. KAPITULUA

ITSAS GARRAIOKO ENPRESEN ARAUBIDEA

70. artikulua.– Aplikazio eremu subjektiboa eta objektiboa eta zerga-oinarriaren kalkulua.

1.– Subjektu pasiboek hauen artean hauta dezakete: ontzi guztien (eurenak zein errentatuta dituztenak) ustiapenari dagokion zerga-oinarriaren zatia zehaztea edo araubide hau aplikatu ahal zaien ontzien kudeaketa teknikoari eta haietako langileen kudeaketari dagokiena, ontzi bakoitzaren erregistro garbiko tonajeari beheko eskala aplikatuta:

(Ikus .PDF)

Eskala aplikatzeko egunak zenbatzeko, ez dira kontutan hartuko itsasontzia konponketa arruntengatik zein apartekoengatik operatibo ez dagoen egunak. Era berean, itsasontziaren jardunaren hasiera urtekitaldiaren hasierako eguna ez bada edo jardueraren amaierakoa urtekitaldiaren amaierako eguna ez bada, ez dira zenbatuko egunok.

Ontzi guztien kudeaketa teknikoa eta haietako langileen kudeaketa egitea jarduera horien erantzukizun osoa hartzea da, baita, horiez gain, Segurtasunerako Kudeaketaren Nazioarteko Kodeak ontziak ustiatzeko eta kutsaduraren prebentziorako ezarritako betebeharrak eta erantzukizunak ere.

Araubide honetako eskakizunak betetzen dituzten eskatzailearen itsasontzi guztientzako da araubide hau, baita baimena eta gero erosten edo alokatzen dituen itsasontzientzako ere, beti ere eskakizunok betetzen badituzte, eta araubide horretakoaz baliatu daitezke fletamenduan hartutako itsasontziak ere, baldin eta entitatearen, edo hala balitz araubidepeko talde fiskalaren, ontzidi guztiaren tona garbien 100eko 75a gainditzen ez badute.

Zerga baterakuntzaren araubide berezipean zergak ordaintzen dituzten entitateak badira, zerga taldea osatzen duten entitate guztien itsasontzi guztiei aplikatuko zaie araubide hau, aurreko lerroaldean aipatutako betekizunekin.

2.– Araubide horrekin lortutako zerga-oinarriaren zatian hurrengo jardueretatik, eta ez beste edozeinetatik, eratorritako errentak baino ez dira sartuko:

a) Salgaiak itsasoz garraiatzeko itsasontzia ustiatzetik.

Ontzi batek merkatugaiak garraiatzeaz batera dragatze-lanak ere egiten baditu, araubide honetan sartzeko zergaldiko jardun-denboraren % 50 baino gehiago itsaso zabaleko garraioan eman behar du; hala bada, jarduera hori bakarrik sartuko da araubidean.

b) Bidaiariak itsasoz garraiatzeko itsasontzia ustiatzetik.

c) Itsas salbamendurako, soroslaritzarako edo atoi-lanerako itsasontzia ustiatzetik.

Atoiontziak sartzeko, zergaldiko jardun-denboraren % 50 gutxienez portuetan egiten diren jardueretan eta ontzi autopropultsatuei portuan sartzen laguntzen eman behar dute.

d) Araubide hau aplikatu ahal zaien ontzien kudeaketa teknikoa eta haietako langileen kudeaketa.

e) Entitate batek pilotaje, atoi, amarratze eta desamarratze zerbitzuak egitea berak araubide honetan dituen ontziei, eta ontzietako gaien zama-lanak eta estibatzeko eta desestibatzeko lanak egitea, baldin eta garraioaren erabiltzaileari fakturatzen bazaizkio eta entitateak berak edo berarekin lotuta ez dagoen beste batek egiten baditu.

Honelako ontzien erabilera lagatzen duten entitateei dagokienez, aurreko a) eta c) letretan ezarritako betekizuna betetzat joko da atoi edo dragatze lanak egiten dituen entitateak araubide hau aplikatu ahal den zergaldi bakoitzerako beharrezko den portzentajea bete duela frogatuz gero.

Arrantzako jardueretan erabiltzen diren ontziak ezin dira sartu araubide honetan, ez kirol ontziak ez aisialdikoak.

3.– Aurreko idatz-zatietan aipaturiko itsasontzien kudeaketa estrategikoa eta merkataritzakoa Europako Batasuneko edozein Estatutatik egin behar da.

Horren ondoreetarako, estrategien eta merkaturatzearen kudeaketa itsas garraioaren edo itsasoko lanen kontrola eta arriskua nork bere gain hartzea da.

Araubide hau Europar Batasunetik kanpo erregistratutako ontziak dituzten zergadunei aplikatu ahal bazaie, ontzi horien tonaje garbiak araubide berezian dagoen entitatearen ontziteriaren tonajean eragindako gehikuntzak, arrazoia gorabehera, ez du eragotziko araubide hau aplikatzea gehikuntza sortu duten ontziei, baldin eta Europar Batasuneko estatuetan erregistratutako ontzien aurreko urteko batez besteko tonaje garbiaren ehunekoak kopuru berean irauten badu hurrengo hiru urteetan.

Baldintza hori ez da aplikatuko Europar Batasuneko estatuetan erregistratutako ontzien tonelaje garbiaren portzentajea % 60 gorakoa izanez gero.

Aurreko paragrafoetan ezarritakoa eragotzi gabe, atoi eta dragatze lanetarako erabiltzen diren ontziak Europar Batasuneko estatuetan erregistratuta egon behar dira.

Araubide hau aplikatzeko ezinbestekoa da ontzi guztiak egotea erregistratuta Europar Batasunean.

4.– Araubide hau aukeratuz gero, hurrengo arau bereziak izango dira kontuan:

a) Entitatea enpresa ertaina edo handia izatea, Europako Batzordearen 2003/361/CE Gomendioan xedatutakoaren arabera.

b) Berregituratzeko laguntza jasotzea, estatuak Europako Batzordearen 2004/C244/02 Berriematean ezarritakoaren itzalpean emanik.

c) Europako Batzordeak araubide honen ondoriozko zerga-onurak kontuan hartu ez izana berregituratzeko laguntzari buruzko erabakia hartzean.

5.– Edonola ere, foru-arau honetako 29. artikuluaren 1. idatz-zatiko a) letran xedatutako karga-tasa orokorra aplikatuko da.

a) Aurreko 1. idatz-zatian ezarritakoaren arabera zehaztutako zerga-oinarriaren zatiari ezin aplikatu izango zaio txikipenik.

b) Ez dira aplikatuko foru-arau honetako IV. tituluko V. kapituluan ezarritako zuzenketak aurreko 1. idatz-zatian ezarritakoaren arabera kalkulatutako zerga-oinarriaren zatian.

c) Aurreko 1. idatz-zatian xedatutakoa aplikatuta zehaztutako zerga-oinarriaren zatia ezin da konpentsatu aurreko ekitaldietatik konpentsatzeko utzitako zerga-oinarri negatiboekin, ez itsas entitatearen beste jarduerek (araubide honetan sartu ezin direnek) sortutakoekin, ez araubide hau aplikatzen hastean konpentsatu gabe dauden zerga-oinarri negatiboekin.

d) Aurreko 1. idatz-zatian ezarritakoaren arabera zehaztutako zerga-oinarriaren zatiari ezin aplikatu izango zaio kenkaririk.

6.– Betiere, foru-arau honetako 56. artikuluko 1. idatz-zatiko a) letran ezarritako karga-tasa orokorra aplikatuko da.

7.– Zergadunaren beste jarduerei dagokien zerga-oinarriaren zatia zehazteko Zergaren araubide orokorra aplikatu behar da, haiek sortutako errentak soilik kontuan hartuta. Dragatze-lanetan, jarduera horren errenta zerga-oinarriaren zati horretan sartuko da, ez baitago araubide berezi honetan.

Zerga-oinarriaren zati horretan araubide honetan dauden jarduerek sortzen ez dituzten diru-sarrera guztiak eta horiek lortzeko zuzenean egin beharreko gastuak zenbatuko dira, bai eta jarduera horiek sortu duten negozio kopuruari gastu orokorretan dagokion zatia ere.

Araubide hau betetzeko, entitateak araubidean dagoen ontzi bakoitzaren diru-sarrerak eta gastuak, zuzenekoak zein zeharkakoak, eta ustiapenerako erabiltzen diren aktiboak zehazteko behar diren kontabilitate-erregistro guztiak eduki behar ditu.

8.– Subjektu pasibo batek araubide honetan ezarritako betekizunen bat betetzen ez badu, ekitaldi horretan zergaldiko kuotarekin batera araubide hau aplikatu duen ekitaldi guztietan araubide orokorra aplikatuz gero sartu beharko zituen kuota guztiak sartu beharko ditu; horrez gain, bidezko berandutza-korrituak, errekarguak eta zehapenak ere aplikatu ahal izango zaizkio.

Artikulu honetako 3. idatz-zatian ezarritako baldintza ez betetzeak bertan aipatutako gehikuntza sortu duten ontziak araubidean egotea eragotziko du eta, ondorioz, aurreko paragrafoan ezarritako erregularizazioa aplikatu beharko zaie ontzi horiei. Gehikuntza Europar Batasuneko estatuetan erregistratutako ontzien baxaren ondorioz gertatzen bada, ontzi horien erregularizazioa foruarau hau indarrean sartzen denetik aurrera hasi eta ontziok araubide honetan egondako zergaldi guztietakoa izango da.

Aurreko paragrafoetan ezarritakoa ez da aplikatuko betekizunak zergadunari ezin egotz dakiokeen aparteko inguruabar bategatik edo ezinbesteko batek eraginda betetzen ez direnean.

9.– Araubide hau jardueren etekin garbia zuzeneko zenbatespenaren bidez zehazten duten pertsona fisikoei aplikatu ahal izango zaie, ezarritako baldintzak eta betekizunak betez gero.

71. artikulua.– Araubide bereziari atxikitako ontziak.

1.– Kapitulu honetan araututako araubideari atxikitako ontzi bat eskualdatuta sortzen den errenta positiboa edo negatiboa foru-arau honetako 70. artikuluko 1. idatz-zatian xedatutakoa aplikatuta kalkulatutako zerga-oinarrian sartutzat joko da.

2.– Aurreko idatz-zatian xedatutakoa gorabehera, entitate batek araubide hau hautatzen badu Zergaren araubide orokorrean ordaindu ondoren, araubidea aplikatzen zaion lehenengo ekitaldian erreserba baliaezin bat eratu behar du araubide bereziari heldu dionean titular izan den ontzi bakoitzeko, hain zuzen ere haren merkatuko balio arruntaren eta kontabilitateko balio garbiaren arteko diferentzia positiboaren bestekoa, edo bestela titulartasunari eusten dion ekitaldi guztietan ontzi bakoitzaren balio bi horien arteko diferentzia zehaztu beharko du urteko kontuen memorian.

Gauza bera egin behar da araubidea aplikatzen hasi ondoren eskuratzen diren ontzi erabiliekin, baina hauen kasuan erreserbaren kopurua ontziaren eskuraketa-balioaren eta merkatuko balioaren arteko diferentzia positiboa izan behar da.

Halaber, foru-arau honetako VI. tituluko VII. kapituluko araubide berezia aplikatu den eragiketa baten bidez eskuratutako ontzien kasuan, kontabilitateko balio garbia entitate eskualdatzailearen kontabilitatean ageri den eskuraketa-balioa oinarritzat hartuta kalkulatuko da.

3.– Erreserba ez baliatzeko betebeharra edota memorian aipamena egiteko betebeharra, biak ere artikulu honetako aurreko idatz-zatian ezarritakoak, betetzen ez badira, zerga-arloko arau-haustea egingo da, eta zehapen gisa aipatutako diferentziaren % 5eko isun proportzionala ezarriko da.

4.– Artikulu honetako 2. idatz-zatian araututako erreserba ez da zergapetuko, salbu eta horren iturri den ontzia foru-arau honetako 70. artikuluko 2. idatz-zatian jasorik ez dagoen jardueraren bati atxikitzen zaionean edo besterentzen denean.

5.– Araubide honetako ontzi bat besterenduz gero, hura eskualdatuta sortzen den errenta positiboa ez da zergapetuko.

Hala ere, besterentzean, kargapean izango da artikulu honetako 2. idatz-zatian aipatutako erreserbaren zatia, besterendutako ontziari dagokiona, besterentzearen emaitzako zenbateko guztia foru-arau honetako 36. artikuluan ezarri bezala berrinbertitu ezean.

Idatz-zati honetan ezarritakoaren ondoreetarako, ontzi bat eskualdatzen bada, zuzenean zein zeharka, foru-arau honetako VI. tituluko VII. kapitulua aplikatu ahal zaion eragiketa baten bidez, ez da eskualdaketatzat joko, baldin eta entitate eskuratzaileak, artikulu honetako 2. idatz-zatian ezarritako betekizunak betez, erreserba zuzkitzen badu edo memorian agertzen badu, eskualdatzailearen kontabilitatean egon den bezala.

72. artikulua.– Komunikazioa.

1.– Zergadunak araubide honen aplikazioaren berri eman behar dio zerga-administrazioari.

Zergak zerga-baterakuntzaren araubidean ordaintzen dituzten entitateek araubidea aplikatzeko betekizunak betetzen dituzten zerga-taldeko entitate guztiak aipatu behar ditu berriematean, foru-arau honetako 70. artikuluko 1. idatz-zatian ezarritakoari lotuta.

2.– Jakinarazpen horretakoak 10 urteko indarraldia izango du eta luzatu egin daiteke zerga-administrazioari beste jakinarazpen bat eginez, 10 urteko eperako bakoitzean.

Araubidea hautatu ondoren zergadun batek 10 urtean aplikatzen ez badu, aplikatzen duen azken urtetik 5 urte pasatu beharko dira berriro aplikatu ahal izateko.

Bidezko arrazoiren bat egonez gero, zergadunak zerga-administrazioari eskatu ahal izango dio araubidea 10 urtean ez beste aldi batean aplikatzen uzteko. Epealdia 5 urtekoa izan behar da gutxienez.

3.– Araubideak eragina izango duen zergaldia amaitu eta hurrengo bi hilabeteen barruan egingo da jakinarazpena.

4.– Zerga-administrazioak egiaztatu egin dezake araubide hau ondo betetzen denentz eta urtekitaldiz urtekitaldi betetzen ote diren hori aplikatzeko dauden eskakizunak.

Halaber, informazioa bil dezake, araubide hau aplikatzeak itsas garraiorako Europako Batasuneko politikaren helburuei benetan laguntzen dien jakiteko.

III. KAPITULUA

INTERES EKONOMIKOKO TALDEAK, ESPAINIAKOAK ZEIN EUROPAKOAK, ETA ALDI BATERAKO ENPRESA ELKARTEAK

73. artikulua.– Interes ekonomikoko espainiar elkarteak.

1.– Interes Ekonomikoko Elkarteen apirilaren 29ko 12/1991 Legeak araupetzen dituen interes ekonomikoko elkarteei Zerga honen arau orokorrak aplikatuko zaizkie, ondoko espezialitateekin:

a) Ez dute Sozietateen gaineko Zergarik ordainduko lurralde espainiarrean bizi diren bazkideei egotz dakiekeen zerga-oinarriarengatik.

Ez da inola ere foru-arau honetako 68. artikuluak zati horrexen beraren gainean aipatzen duena itzuliko.

b) Espainiar lurraldean bizi diren bere bazkideei egotziko zaizkie:

a') Entitate horiek lortutako zerga-oinarri positibo zein negatiboak. Bazkideei egozten zaizkien zerga-oinarri negatiboak ezin izango ditu lortu zituen entitateak konpentsatu.

b’) Entitateak eskubidez kuotan jaso ditzakeen kenkariak. Kenkarien oinarriak bazkideen likidazioan sartuko dira, eta kuota murriztuko da, zerga honen edo Pertsona Fisikoen Errentaren gaineko Zergaren arauei jarraituz.

c’) Entitateari dagozkion atxikipen eta konturako ordainketak.

2.– Espainiar lurraldean bizi ez diren bazkideei dagozkien hobarietako dibidendu eta partaidetzek kontzeptu horretan ordainduko dute zerga, Ez-egoileen Errentaren gaineko Zergaren Foru Arauan eta Espainiak ezarpen bikoitza ekiditeko sinatutako itunetan ezarritako arauen arabera.

3.– Zerga-oinarriaren egozketa jasan behar duten eta entitatea indarrean dagoen araubidean berean zegoeneko zergalditik datozen bazkideei dagozkien mozkinen dibidendu eta partaidetzek ez dute zerga hau ez Pertsona Fisikoen Errentaren gaineko Zerga ordainduko. Mozkineko dibidendu edo partaidetza hauen zenbatekoa ez da egotzi zaizkien bazkideen partaidetzen erosketaren balioan sartuko. Partaidetzak egozpenaren ondoren erosi dituzten bazkideak direnean, horien erosketa balioari zenbateko hori gutxituko zaio.

Kapitaleko, fondo propioetako, araubide honetan sartutako entitateen emaitzetako partaidetzak eskualdatzean, erosketa balioari bazkideei, izatezko banaketarik gabe, erostetik saltzerainoko tartean beren partaidetzen errenta gisa egotzi zaizkien mozkin sozialen zenbatekoa gehituko zaio.

4.– Zerga araubide hau ez da bere xedeari egokitutakoez bestelako jarduerarik egiten diren edo bere bazkide diren, beren bazkideen edo hirugarrenen jarduerak zuenean zein zeharka zuzendu edo kontrolatzen dituzten sozietateetan partaidetzarik edukitzen diren zergaldietan aplikatuko.

74. artikulua.– Interes ekonomikoko europar elkarteak.

1.– Europar Erkidegoen Kontseiluaren uztailaren 25eko 2.137/1985 Arautegiak araupetzen dituen interes ekonomikoko europar elkarteei eta beren bazkideei arestiko artikuluan esandakoa aplikatuko zaie, ondoko espezialitateekin:

a) Ez dute Sozietateen gaineko Zergarengatik ordainduko.

Entitate horiei ere ez zaie foru-arau honetako 68. artikuluak jasotzen duen itzulketa aplikatuko.

b) Entitatea Espainiako lurraldeko egoiliarra ez bada, Espainiako egoile diren bere bazkideek Sozietateen gaineko Zergaren edo. Pertsona Fisikoen Errentaren gaineko Zergan, dagokienean, elkartean zehaztutako mozkin edo galeretan dagokien zatia sartuko dute, zerga-oinarria zehazteko arauak aplikatuz zuzenduta.

Bazkideek elkartearen bidez egindako jarduerak atzerrian ezarpen iraunkorra ekarri duenean, Sozietateen gaineko Zergan edo Espainiak nazioarteko ezarpen bikoitza ekiditeko sinatutako itunean ezarritako arauak aplikatuko dira.

c) Espainiako lurraldeko egoiliar ez diren bazkideak, entitatearen egoitza Espainian egon zein ez, Ez-egoiliarren Errentaren gaineko Zergaren kargapean egongo dira, baldin eta, Ez-egoiliarren Errentaren gaineko Zergari buruzko Foru Arauaren 13. artikuluan edo nazioarteko ezarpen bikoitza ekiditeko hitzarmenean ezarritakoaren arabera, haiek taldearen bitartez egindako jarduerak establezimendu iraunkorra egotea eragiten badu.

d) Ez-egoileen Errentaren gaineko Zergaren arauen arabera zergak ordainarazi zaizkien eta lurralde espainiarreko egoile ez diren bazkideei egotzitako mozkinak ez dira beren banaketarengatik zergak ordaintzearen mende egongo.

2.– Arestiko idatz-zatietan aurreikusitako araubidea ez da aplikatuko interes ekonomikoko europar elkarteak bere xedeaz bestelako jarduerak edo uztailaren 25eko CEE 2137/1985 Arautegiaren 3. artikuluko 2. zenbakiak debekatzen dituen jarduerak egiten dituen zergaldian.

75. artikulua.– Enpresen aldi baterako batasunak.

1.– Enpresen Elkarte eta Aldi Baterako Batasunen eta Eskualdeko Industria Garapeneko Sozietateen Zerga Araubidearen gaineko maiatzaren 26ko 18/1982 Legean araututako enpresen aldi baterako batasunek, dagokien erregistro berezian izena emandakoek, baita beren enpresa kideek ere, Foru Arau honetako 73. artikuluan ezarritakoaren araberako zergak ordainduko dituzte.

2.– Atzerrian diharduten aldi baterako enpresa elkarteetako enpresa kideek, atzerritik datozen errentak direla-eta, foru-arau honetako 33., 34. eta 35. artikuluetan ezarritakoa aplikatu ahal izango dute.

3.– Atzerrian egin edo emandako obretan, zerbitzuetan eta horniduretan aldi baterakoen antzeko lankidetza-formulen bidez parte hartzen duten entitateek, atzerritik datozen errentei dagokienez, foru-arau honetako 33., 34. eta 35. artikuluetan ezarritakoari atxiki ahal izango zaizkio.

Entitateek zerga-administrazioari eskatu beharko diote aipatutako artikuluetan ezarritakoaren aplikazioa. Horretarako, Espainiako lurraldean eratutako aldi baterako enpresa elkarteei eskatzen zaien informazioaren antzekoa aurkeztu beharko dute.

4.– Foru-arau honetako 33., 34. eta 35. artikuluetan ezarritakoa aplikatzea aukeratzen bada, aldi baterako elkartea amaitu arte aplikatu beharko da. Aldi baterako batasunetik lortutako errenta negatiboa entitate kideen zerga-oinarriari egotziko zaio. Halakoetan, hurrengo ekitaldietan aldi baterako batasunak errenta positiborik daukanean, enpresa kideek beren zerga-oinarrietan, positibo modura, aurretiaz egotzitako errenta negatiboa sartuko dute, errenta positibo horietarako zenbatekoaren mugarekin.

5.– Artikulu honetan xedatutakoa ezin izango da zergadunak bere xede soziala ez diren jarduerak egiten dituen zergaldietan aplikatu.

76. artikulua.– Bazkideen edo enpresa kideen egozketarako eta identifikaziorako irizpideak.

1.– Kapitulu honek hizpide dituen egozketak araubide honen mende jarritako entitatearen zergaldiaren azkeneko egunean bazkide edo enpresa kide izatearekin batera doazen eskubide ekonomikoak dituzten pertsona edo entitateei egotziko zaizkie, entitatearen eraketa eskrituratik ondorioztatzen den proportzioan eta, bestela, zati berdinetan.

2.– Egozpena honelaxe egingo da:

a) Bazkideak edo enpresa kideak araubide honen mende jartzen direnean, araubide honen mende jarritako entitatearen ekitaldiaren amaierako egunean.

b) Gainerako suposamenduetan, hurrengo zergaldian, araubide honen mende jarritako entitatearen ekitaldiaren amaierako egunean bertan hori egiten jarraitzea erabaki ezean.

Zer aukeratzen den ondoreak izan behar ditueneko Zergaren lehenengo aitorpenean adieraziko da, eta hiru urtez mantenduko da.

3.– Kapitulu honetan xedatutakoa aplikatzekoa zaien entitateek, Sozietateen gaineko Zergaren beren aitorpenarekin batera, zergaldiaren amaierako egunean bazkide edo enpresa kide diren edo horrekin batera doazen eskubideak dituzten pertsonen zerrenda ere aurkeztuko dute, baita bakoitzak entitate horien emaitzetan zenbateko partaidetza duen ere.

IV. KAPITULUA

ARRISKU KAPITALEKO SOZIETATEAK ETA FUNTSAK

77. artikulua.– Kapital-arriskuko sozietate eta funtsak.

1.– Arrisku-kapitaleko entitateek, Arrisku Kapitaleko Entitateak eta haien Sozietate Kudeatzaileak arautzen dituen azaroaren 24ko 25/2005 Legean araututakoek, foru-arau honetako 34. artikuluko 1. idatz-zatian ezarritako araubidea aplikatu ahal izango diete lege horren 2. artikuluak aipatzen dituen enpresen kapitaleko edo funts propioetako partaidetzaren adierazgarri diren baloreak eskualdatuz lortzen dituzten errentei, edozein izanda ere partaidetzaren ehunekoa edo antzinatasuna, betiere hamabost urte baino gutxiago igaro badira partaidetza eskuratu zenetik.

Salbuespen gisa, epealdi hori hogeigarren urtera arte (berau barne) zabaltzea onartu ahal izango da. Epealdi hori luzatzeko bide ematen duten kasuak, baldintzak eta beharkizunak arauz zehaztuko dira.

Gainerako kasuetan, arrisku-kapitaleko entitateek foru-arau honetako 34. artikuluko 1. idatz-zatian ezarritako baldintza guztiak bete beharko dituzte.

Hala ere, 2. artikuluaren 1. idatz-zatiko bigarren paragrafoan aipatzen diren enpresen kapitalen edo funtsen partaidetzaren adierazgarri diren baloreak eskualdatuz lortzen diren errenten kasuan, idatz-zati honetan xedatutakoa aplikatu ahal izango da baldin eta, gutxienez, partaidetzako entitatearen higiezinek duten kontabilitateko balio osoaren % 85 diren higiezinak jarduera ekonomiko ez-finantzario baten garapenari lotuta badaude, baloreen ukantza-denboran zehar etenik gabe, Pertsona Fisikoen Errentaren gaineko Zergan ezarritakoa betez eta arrisku-kapitaleko entitateak eta haien sozietate kudeatzaileak arautzen dituen legean edo higiezinei buruzko legean ezarritakoaren arabera.

2.– Arrisku-kapitaleko sozietate eta funtsek sustatu eta bultzatzen dituzten sozietateetatik jasotako dibidenduei eta, oro har, mozkinetako partaidetzei, betiere, foru-arau honetako 33. artikuluko 1. idatz-zatian aurreikusita dagoen bezala, zerga-oinarrian ez sartzeko araubidea aplikatuko zaie, partaidetza-ehunekoa eta akzio edo partaidetzak eduki diren denbora edozein dela ere.

3.– Dibidenduak eta, oro har, kapital-arriskuko sozietateek eta fondoek emandako mozkin partaidetzak honela tratatuko dira:

a) Foru-arau honetako 33. artikuluko 1. idatz-zatian ezarritako kenkaria aplikatzeko eskubidea emango dute, dena delakoa partaidetza-ehunekoa eta akzioak eta partaidetzak eduki diren aldia gorabehera, baldin eta hartzailea zerga honen kargapeko zergaduna bada edo establezimendu iraunkorra duen Ez-egoiliarren Errentaren gaineko Zergaren kargapeko zergaduna.

b) Hartzailea establezimendu iraunkorrik ez duen Ez-egoiliarren Errentaren gaineko Zergaren kargapeko zergaduna den pertsona fisikoa edo entitatea bada, dibidenduak eta mozkin partaidetzak ez dira joko Espainiako lurraldean lortutzat.

4.– Kapital-arriskuko sozietateen eta fondoen berezko fondoak adierazten dituzten akzioak edo partaidetzak eskualdatuta edo itzulita sortzen diren errenta positiboak honela tratatuko dira:

a) Foru-arau honetako 34. artikuluko 1. idatz-zatian ezarritako kenkaria aplikatzeko eskubidea emango dute, dena delakoa partaidetza-ehunekoa eta akzioak eta partaidetzak eduki diren aldia gorabehera, baldin eta hartzailea zerga honen kargapeko zergaduna bada edo establezimendu iraunkorra duen Ez-egoiliarren Errentaren gaineko Zergaren kargapeko zergaduna.

b) Hartzailea establezimendu iraunkorrik ez duen Ez-egoiliarren Errentaren gaineko Zergaren kargapeko zergaduna den pertsona fisikoa edo entitatea bada, errentak ez dira joko Espainiako lurraldean lortutzat.

5.– Aurreko 3. eta 4. idatz-zatietako b) letran xedatutakoa ez da aplikagarria izango errenta zerga-paradisu gisa kalifikatutako herrialde edo lurralde baten bitartez lortzen denean.

6.– Aurreko 1. idatz-zatian ezarritako araubidea ez da aplikatuko baloreak eskuratzen dituen pertsona edo entitatea arrisku-kapitaleko entitateari edo horren bazkide nahiz partaideei lotuta badago, ezta arau bidez zerga-paradisutzat kalifikatuta dagoen herrialde edo lurralde bateko egoiliarra bada. Aitzitik, aplikatu egingo da eskuratzailea hurrengo pertsona edo entitateetako bat denean:

a) Partaidetzako entitatea bera.

b) Partaidetzako entitatearen bazkide edo administratzaileetako bat, baldin eta ez badago, edo egon ez bada, kapital-arriskuko entitateari lotuta Foru Arau horretako 42. artikuluan ezarritako moduan eta partaidetzako entitatearekin duen loturaren ondoriozkoa ez den arrazoiren bategatik.

c) Kapital-arriskuko beste entitate bat.

7.– Aurreko 1. idatz-zatian ezarritako araubidea ez zaio aplikatuko arrisku-kapitaleko entitateak berari edo bere bazkide nahiz partaideei lotuta dagoen pertsona edo entitate bati, zuzenean zein zeharka, eskuratu dizkion baloreak eskualdatzean sortutako errentari, baldin eta eskuraketa egin baino lehen entitateko bazkideen nahiz partaideen eta partaidetzako enpresaren artean loturarik badago.

8.– Baloreak lotura duen kapital-arriskuko entitate bati eskualdatzen bazaizkio, eskualdatzailearen eskuraketaren balioan eta datan subrogatuko da zerga 1. idatz-zatian aurreikusitako epeak zenbatze aldera.

9.– Aurreko 6, 7 eta 8. idatz-zatietan xedatutakoaren ondoreetarako, loturatzat hartuko da sozietatearen kapitalean edo bere fondoetan gutxienez % 25eko partaidetza (zuzena edo zeharkakoa) izatea.

10.– Partaidetzako entitateak Europako Parlamentuaren eta Kontseilu Europarraren 2004ko apirilaren 21eko 2004/39/EEE Zuzentarauaren bidez araututako balore-merkatu batean kotizatzen badu, aurreko 1. idatz-zatian ezarritako araubidea aplikatu ahal izateko ezinbestekoa izango da arrisku-kapitaleko entitateak partaidetza eskualdatzea hiru urte igaro baino lehen, entitatearen kotizazioa onartu den egunetik aurrera zenbatuta.

V. KAPITULUA

TALDE INBERTSIOKO ENTITATEAK

78. artikulua.– Talde inbertsioko entitateen zerga-ordainketa.

1.– Talde Inbertsioko Entitateei buruzko azaroaren 4ko 35/2003 Legeak arautzen dituen talde inbertsioko entitateek, karga-tasa orokorraren pean daudenak ez besteek, ez dute eskubiderik izango ez kuotan kenkaririk aplikatzeko, ez foru-arau honetako 33. artikulutik 35.era bitartekoetan ezarritako araubidea aplikatuta errentak zerga-oinarrian ez sartzeko, ez foru-arau honetako IV. tituluko V. kapituluan xedaturikoa aplikatzeko. Ez dira inoiz ondare-sozietatetzat joko foru-arau honetako 14. artikuluan ezarritakoari jarraituz.

2.– Aurreko idatz-zatian aipatutako entitateek foru-arau honetako 56. artikuluko 4. idatz-zatian ezarritako karga-tasa aplikatuko dute, honako betekizun eta baldintza hauek betetzen badituzte:

a) Talde Inbertsioko Entitateei buruzko azaroaren 4ko 35/2003 Legearen bidez araupetutako inbertsio fondo finantzarioek, baldin eta beharrezko partaideen kopurua lege horretako 5. artikuluko laugarren idatz-zatian ezarritakoa bada, gutxienez.

b) Talde Inbertsioko Entitateei buruzko azaroaren 4ko 35/2003 Legearen bidez araututako higiezinetako inbertsio sozietateek eta higiezinetako inbertsio funtsek, hurrengo c) letran ageri ez direnek, baldin eta beharrezko akziodunen edo partaideen kopurua lege horren 5. eta 9. artikuluetako laugarren idatz-zatietan ezarritakoa bada, gutxienez, eta, talde inbertsioko entitate ez-finantzarioak izanik, sozietatearen xede bakarra hirilurreko era guztietako higiezinetan inbertitzea bada, gero errentan emateko, eta gainera etxebizitzak, ikasle egoitzak eta adinekoen egoitzak, arau bidez xedatzen den eran, gutxienez aktiboaren % 50 badira, zuzenean zein zeharka.

Foru-arau honetako 56. artikuluko 4. idatz-zatian ezarritako karga-tasa aplikatzeko, aurreko paragrafoan aipatutako talde inbertsioko entitateen aktiboko ondasun higiezinak ezin dira besterendu eskuratu direnetik hiru urte igaro arte, salbu eta, aparteko kasuetan, Balore Merkatuaren Batzorde Nazionalak beren beregi horretarako baimena ematen badu.

Horrelako ondasun higiezin bat b) letra honetan aipatutako gutxieneko epealdia igaro aurretik eskualdatzen bada, eskualdaketaren ondoriozko errenta Zergaren tasa orokorra aplikatuta kargatuko da. Gainera, entitateak, ondasuna eskualdatu den zergaldiko kuotaz gainera, zenbateko hauek ere sartu behar ditu: b) letra honetan ezarritako araubidea aplikatu beharko zen aurreko zergaldi bakoitzeko, higiezinak zergaldian sortutako errentari aldi bakoitzean indarrean zegoen karga-tasa orokorraren eta foru-arau honetako 56. artikuluko 4. idatz-zatian ezarritako karga-tasaren arteko diferentzia aplikatzearen emaitza den zenbatekoa, eta, hala badagokio, berandutze-korrituak, errekarguak eta zehapenak ere ordaindu behar izango ditu.

c) Azaroaren 4ko 35/2003 Legearen bidez araupetutako higiezinetako talde inbertsioko sozietateek eta higiezinetako inbertsio fondoek, baldin eta, c) letran ezarritako betekizunak betetzeaz gainera, errentatzeko soilik diren etxebizitzak sustatzen badituzte eta ondoko baldintza hauek betetzen badituzte:

1.a Higiezinak sustatzearekin lotutako ondasun higiezinetako inbertsioek ezin dute gainditu higiezinetako inbertsio sozietatearen edo funtsaren guztizko aktiboaren % 20.

2.a Higiezinen sustapena eta haien errentamendua bereiz kontabilizatu behar dira eskuratzen edo sustatzen den higiezin bakoitzeko, eta higiezineko etxebizitza, lokal edo erregistro finka lokabe bakoitzaren errenta behar bezala banakatu behar da; hala ere, inbertsioak guztizko aktiboan konputatu ahal izango dira b) letran ezarritako ehunekoaren ondoreetarako.

3.a Higiezinetako inbertsio sozietateen edo funtsen sustapen jardueraren ondoriozko higiezinek gutxienez hamar urtez egon behar dute errentan emanda edo errentatzeko eskainita. Epealdi hau eraikuntza-lanak amaitzen direnetik konputatuko da. Honen ondoreetarako, higiezinaren eraikuntza amaitu dela frogatzeko obraren azken ziurtagiria behar da, Etxegintzaren Antolamenduari buruzko 38/1999 Legeko 6. artikuluan aipatutakoa.

Higiezin horiek c) letra honetan edo aurreko b) letran adierazitako gutxieneko epea igaro aurretik eskualdatuz gero, hala badagokio, eskualdatze horren ondoriozko errenta dagokion zergaren karga-tasa orokorrarekin ordaindu behar izango da. Gainera, entitateak, ondasuna eskualdatu den zergaldiko kuotaz gainera, zenbateko hauek ere sartu behar ditu: c) letra honetan ezarritako araubidea aplikatu beharko zen aurreko zergaldi bakoitzeko, higiezinak zergaldian sortutako errentari aldi bakoitzean indarrean zegoen karga-tasa orokorraren eta foru-arau honetako 56. artikuluko 4. idatz-zatian ezarritako karga-tasaren arteko diferentzia aplikatzearen emaitza den zenbatekoa, eta, hala badagokio, berandutze-korrituak, errekarguak eta zehapenak ere ordaindu behar izango ditu.

Higiezinetako inbertsio sozietate edo fondo batek errentatzeko etxebizitzak sustatzen baditu, horren berri eman behar dio zerga-administrazioari jarduerari ekiten dion zergaldian.

3.– Atxikipenen, konturako sarreren eta, hala denean, zatikako ordainketen zenbatekoa kuota osoaren munta baino handiagoa denean, zerga-administrazioak gaindikina ofizioz itzuliko du.

79. artikulua.– Talde-inbertsioetarako entitateetako kideen edo partaideen zerga-ordainketa.

1.– Artikulu honetan xedatutakoa aplikatuko zaie zerga honen kargapeko bazkide edo partaideei edo Ez-egoiliarren Errentaren gaineko Zergaren kargapekoei, establezimendu iraunkorra dela medio errentak lortzen badituzte aurreko artikuluan aipatutako talde inbertsioko entitateetatik.

2.– Aurreko idatz-zatian aipatutako zergadunek zerga-oinarrian sartuko dituzte kontzeptu hauek:

a) Akzioak edota partaidetzak eskualdatzeagatik edo berauek berreskuratzeagatik lortutako errenta positiboa edo negatiboa.

b) Talde-inbertsioetarako entitateak banatutako mozkinak. Mozkin horiek ez dute eskubiderik emango foru-arau honetako 33. artikuluan xedatutakoa eta, hala dagokionean, 60. artikuluan xedatutakoa aplikatzeko.

3.– Artikulu honetako 2. idatz zatian aurreikusitako araubidea aplikatu ahal izango zaie Kontseiluak 1985eko abenduaren 20an emandako 85/611/EEE Zuzentarauan araututako talde inbertsioko entitateetako bazkide edo partaideei, entitateok foru-arau honetako 81. artikuluan aipatzen diren horietakoak ez badira, Europar Batasuneko estatu kideren batean eratuak badira, egoitza Europar Batasuneko estatu kideren batean badute eta Balore Merkatuaren Batzorde Nazionalaren erregistro berezian inskribaturik badaude, Espainiako egoiliar diren entitateek merkaturatze aldera.

80. artikulua.– Talde inbertsioko entitateen akzio edo partaidetzetatik eratorritako errenta kontabilizatuak.

Talde inbertsioko entitateetako akzio edo partaidetzetatik eratorri diren eta zergadunak kontabilitatean jaso dituen edo jaso behar dituen errenten zenbatekoa zerga-oinarrian sartuko da.

81. artikulua.– Zerga-paradisutzat jotzen diren herrialde edo lurraldeetan eratutako talde inbertsioko entitateetako bazkide eta partaideen zergapetzea.

1.– Zerga honen kargapeko zergadunek edo Ez-egoiliarren Errentaren gaineko Zergaren kargapekoek, euren errentak establezimendu iraunkorraren bidez lortzen dutenek, zerga-paradisutzat jotzen diren herrialde edo lurraldeetan eratutako talde inbertsioko entitateetan partaidetza badute, partaidetzak zergaldiaren itxiera egunean duen likidazio-balioaren eta partaidetzaren eskuraketa-balioaren arteko diferentzia positiboa sartuko dute zerga-oinarrian.

Zerga-oinarrian sartutako kopurua eskuraketa-balio handiagotzat joko da.

2.– Talde inbertsioetarako entitateak banatutako mozkinak ez dira zerga-oinarrian sartuko eta partaidetzaren eskuraketa-balioa gutxituko dute.

3.– Kontrakoa frogatzen ez den bitartean, aurreko 1. idatz-zatia. idatz-zatian aipatutako aldea akzioa edota partaidetza eskuratzeko balioaren 100eko 15ekoa dela ulertuko da.

VI. KAPITULUA

ZERGA-BATERAKUNTZAREN ARAUBIDEA

82. artikulua.– Definizioa.

1.– Zerga-taldeek kapitulu honetan ezarritako zerga-araubidea hautatu ahal izango dute. Horrela eginez gero, beraiek osatzen dituzten entitateek ez dute zerga banako araubidean ordainduko.

2.– Banako zerga-araubidetzat joko da, entitate bakoitzari legokiokeena zerga-baterakuntzaren araubidea ezin bazaie ezarri.

83. artikulua.– Zergaduna.

1.– Zerga-taldea da zergaduna.

2.– Zerga-taldearen ordezkaria sozietate nagusia da; berak bete behar ditu zerga-baterakuntzaren araubideko zerga-betebehar materialak eta formalak.

3.– Sozietate nagusia eta menpeko sozietateak era berean egongo dira lotuta zerga ordaintzeko araubide bakunak eratorritako zerga-betebeharrei, zerga-zorraren ordainketarenari izan ezik.

4.– Sozietate nagusia horren jakitun delarik, sozietate nagusiaren aurrean zein zerga-taldeko edozein entitateren aurrean egindako frogatze zein ikerketa administrazio-ekintzek, zerga-taldeari loturik dagoen Sozietateen gaineko Zergaren preskripzio epea geldiaraziko dute.

84. artikulua.– Zerga-baterakuntzako araubidearen ezarpenagatik eratorritako zerga-ordainketarako erantzukizunak.

Zerga-taldeko sozietateek solidarioki burutuko dute zerga-zorra, zehapenak alde batera utzita.

85. artikulua.– Zerga-taldearen definizioa. Sozietate nagusia. Menpeko sozietateak.

1.– Zerga-taldea hauxe da: sozietate nagusi batek eta beraren menpeko sozietateek eratutako sozietate multzoa; egoitza Espainian duten akziodun sozietate anonimoak, sozietate mugatuak edo sozietate komanditarioak izan behar dira, edo artikulu honetako 3. idatz-zatian aipatzen diren kreditu-entitateak. Kontuan eduki behar da foru-arau honetako 2. artikuluko 5. idatz zatian xedatutakoa.

2.– Sozietate nagusitzat joko da hurrengo beharkizun hauek betetzen dituena:

a) Aurreko idatz-zatian ezarritako forma juridikoetako bat izan edo, bestela, berezko nortasun juridikoa, eta Sozietateen gaineko Zergari loturik egotea eta hartatik salbuetsi gabe. Ez-egoiliarrek Gipuzkoako Lurralde Historikoan dituzten establezimendu iraunkorrak sozietate nagusitzat joko dira partaidetzak dituzten sozietateekiko.

b) Tributazio-araubide hau aplika daitekeen zergaldiko lehen egunean beste sozietate baten kapitalean % 75eko partaidetza edo handiagoa edukitzea, zuzenean zein zeharka, edo % 70ekoa edo handiagoa, sozietatearen akzioak negoziaziorako onartuta badaude araututako merkatu batean. Azken ehuneko hori aplikatuko da beste sozietate baten kapitalean partaidetza zeharka edukiz gero ere, baldin eta partaidetza ehuneko horretara akzioak araututako merkatu batean negoziaziorako onartuta dituzten menpeko sozietateen bitartez iritsi bada.

c) Partaidetza zergaldi osoan mantendu behar da.

Partaidetza zergaldi osoan zehar mantentzeko derrigortasuna ez da eskatuko partaidetza eman duen entitatea desegiten bada.

d) Ez du egoitza lurralde espainiarrean izan eta nagusitzat jotzeko beharkizunak dituen beste baten menpekoa izan behar.

e) Ezin da egon Espainiako eta Europako interes ekonomikoko elkartzeen araubide berezian, ez eta aldi baterako enpresa-elkarteen araubide berezian ere (foru-arau honetako VI. tituluko III. kapituluan ezarri da), eta ezin da izan ondare-sozietatea, foru-arau honetako 14. artikuluan ezarritakoaren arabera.

f) Espainiar lurraldeko egoile ez diren ezarpen iraunkorrak izanik, entitate horiek nagusitzat jotzeko moduko baldintzarik betetzen dituen espainiar lurraldeko egoile den beste entitate baten mende ez egotea, eta Espainiak informazio trukearen klausula daukan nazioarteko ezarpen bikoitza ekiditeko ituna sinatuta daukaneko lurralde edo herrialde bateko egoile izatea.

3.– Sozietate bat menpeko sozietatetzat joko da, baldin eta sozietate nagusiak haren gainean duen partaidetzak aurreko zenbakiko b) eta c) letretako beharkizunak betetzen baditu.

Finantza-bitartekarien inbertsio-koefizienteei, baliabide propioei eta informazio-obligazioei buruzko maiatzaren 25eko 13/1985 Legeko 8.3 artikuluan aipatzen den moduko babes sistema instituzional batean integratutako finantza-entitateek ere menpekotzat joko dira, baldin eta baldintza hauek betetzen badira: batetik, sistemako entitate zentrala zerga-taldeko kidea bada; bestetik, sistema eratzen duten entitateek emaitzen % 10 erkidegoan jartzen badute, eta, azkenik, entitateen arteko kaudimen eta likidezia konpromisoa entitateotako bakoitzari egozgarriak zaizkion baliabide propioen % 10era artekoa bada. Baldintza horiek betetzat joko dira, baldin eta babes sistema instituzional batean hainbat aurrezki-kutxek, modu itunduan, soilik sistemako entitate zentralaren bidez betetzen badute, zuzenean edo zeharka, kreditu-entitate gisa duten xedea, 2010eko uztailaren 9ko 11/2010 Errege Lege Dekretuko 5.4 artikuluan ezartzen denaren arabera.

4.– Honako inguruabarretakoren bat duten entitateek ezin izango dute zerga-taldeetako kideak izan:

a) Zergatik salbuetsita daudenak.

b) Zergaldia ixtean konkurtso egoeran daudenak eta kapital sozietateen forma ez eduki arren Kapital Sozietateei buruzko Legearen Testu Bategineko 363. artikuluko 1. idatz-zatiko d) letran (Legea uztailaren 2ko 1/2010 Legegintzako Errege Dekretuak onetsi du) ezarritako ondare-egoeretako batean daudenak; salbuespena: urteko kontuak onetsi diren ekitaldia amaitu aurretik egoera hau gainditu bada.

c) Sozietate nagusiak ez duen karga tasa duten Sozietateen gaineko Zergaren menpeko sozietateak.

d) Menpeko sozietateak, baldin eta beraien partaidetza eskuratzeko erabili den sozietateak ez baditu betetzen zerga-taldeko kidea izateko ezarritako baldintzak.

e) Urtaldia, legeak aginduta, sozietate nagusiarenera egokitu ezin duten menpeko sozietateak.

5.– Zerga-taldea bukatutzat emango da sozietate nagusiak izaera hori galtzen duenean.

86. artikulua.– Zerga-taldean sozietateak sartzea edo kentzea.

1.– Aurreko artikuluko 2. idatz-zatiko b) letran aipatutako partaidetza eskuratzen bada sozietate baten kapitalean, hurrengo zergaldian hura zerga-taldean sartu behar da nahitaez. Sozietateak sortu berri direnean, eratzen diren momentuan sartuko dira taldean, baldin eta, eratzean, zerga-taldekideak izateko gainerako beharkizun guztiak betetzen badira.

2.– Menpeko sozietateak izateari utziko dioten haiek zerga-taldetik kanpo geratuko dira egoera hau gertatzen den zergaldiaren beraren ondoreetarako.

87. artikulua.– Zeharkako nagusitasunaren zehaztapena.

1.– Sozietate batek beste sozietate baten kapitalaren % 75 edo gehiago badauka (edo % 70 edo gehiago, sozietatearen akzioak negoziaziorako onartuta badaude araututako merkatu batean) eta, gainera, bigarrena egoera berean badago hirugarren batekiko, eta horrela elkarren segidan, lehenengo sozietateak besteetan zeharka daukan partaidetza zenbatekoa den kalkulatzeko kapital ehunekoak hurrenez hurren biderkatu behar dira eta biderketaren emaitza % 75 izan behar da, gutxienez (edo % 70, sozietatearen akzioak negoziaziorako onartuta badaude araututako merkatu batean edo zuzenean zein zeharka partaidetuta badago) partaidetza eman duen sozietateak zerga taldean sartu ahal eta behar izateko eta, gainera, bitarteko sozietate guztiak zerga taldeko kideak izan behar dira.

2.– Zerga talde baten barruko kideen artean hainbat partaidetza harreman badaude, zuzenekoak eta zeharkakoak, sozietate batek zuzenean zein zeharka kontrolatutako baten kapitalean daukan partaidetza kalkulatzeko zuzeneko eta zeharkako partaidetzaren ehunekoak batu behar dira. Partaidetutako sozietate bat sozietateen zerga taldea sartu ahal eta behar izateko ezinbestekoa da aurreko batura gutxienez kapitalaren % 75 izatea, edo % 70, sozietatearen akzioak negoziaziorako onartuta badaude araututako merkatu batean edo honelako sozietateek badute partaidetza, zuzenean zein zeharka, eta kopuru horretara heltzen bada.

3.– Taldeko kideen artean elkarrekiko partaidetzak, partaidetza zirkularrak edo partaidetza konplexuak badaude, taldean izateko frogatu behar da kapitalaren partaidetza % 75 dela gutxienez, edo % 70, sozietatearen akzioak negoziaziorako onartuta badaude araututako merkatu batean edo honelako sozietateek badute partaidetza, zuzenean zein zeharka, eta kopuru horretara heltzen bada.

88. artikulua.– Zerga-baterakuntzako araubidearen ezarpena.

1.– Zerga-baterakuntzako araubidea zerga-taldeko sozietate guzti-guztiek hala egitea erabakitzen dutelako ezarriko da.

2.– Aurreko idatz-zatian aipatutako erabakiak akziodunen batzak, edo antzeko organoak merkataritzako orma eduki ezean, hartu behar ditu zerga-baterakuntzako araubidea ezarri behar den zergaldiko aurre-aurreko zergaldiko edozein egunetan, eta ondorioak izango dituzte aurkaratzen ez badira edota aurkarapenerako biderik ematen ez dutenean.

3.– Beharkizunak bete beharko dituzte zerga-baterakuntzako araubidepeko zerga-ordainketarako lehenengo zergaldia bukatuko den egunean amaituko den epearen barruan.

4.– Artikulu honetako 1. eta 2. idatz-zatietan aipatutako erabakiak hartu ezean, ez da egongo zerga-baterakuntzako araubidea aplikatzerik.

Etorkizunean zerga-taldean sartu behar diren sozietateei dagozkien akordioak ez egotea entitate nagusiaren zergen arloko arau-haustea izango da. Erregimena betekizun hau bete gabe aplikatzen den lehenengo zergaldian zehapena 2.000 euroko isun finkoa izango da eta 4.000 eurokoa bigarrenean. Zehapenak ez du eragotziko ukituriko entitateak aipatutako taldean sartzea. Baldin eta Zerga zerga-baterakuntzaren erregimenean ordaindu behar duten lehen zergaldia amaitu eta hurrengo egunetik zenbatu beharreko bi urteko aldian artikulu honetan aipatutako akordioa lortzen ez bada, ezin aplikatu izango da erregimen hori.

5.– Aukera egindakoan, zerga-taldea araubide hori loturik egongo da jarraiko hiru zergaldietan, foru-arau honetako 85. artikuluan ezarriko betekizunak betetzen badira eta zentsu-aitorpenaren bidez uko egiten ez zaion bitartean. Uko egin nahi izanez gero, azken zergaldia amaitu eta hurrengo bi hiletan zehar baliarazi behar da.

6.– Sozietate nagusiak zerga-baterakuntzako araubidea aplikatzekoa den zergaldia hasi baino lehen jakinarazi behar dizkio artikulu honetako 1. zenbakian aipatutako erabakiak zerga-administrazioari.

Halaber, zerga-taldearen osaera aldatzen bada, sozietate nagusiak zerga-administrazioari jakinarazi behar dizkio aldaketa horiek, eta identifikatu behar du zer sozietate sartu den taldean eta zer sozietate utzi den taldetik kanpo. Jakinarazpen hori, egin ere, zergaldia amaitzen denetik hilabeteko epean egin behar da.

89. artikulua.– Zerga-taldeen zerga-oinarriaren zehaztapena.

1.– Zerga-taldearen zerga-oinarria hurrengoak zenbatuz zehaztuko da:

a) Zerga-taldeko sozietate guztien zerga-oinarriak; kopuru hauetan ez dira sartu behar zerga-oinarri negatiboen konpentsazioak, ez eta foru-arau honetako IV. tituluko V. kapituluan ezarritakoaren araberako emaitzen aplikazioan egin beharreko zuzenketak ere.

b) Ezabaketak.

c) Aurreko ekitaldietan burututako ezabaketen eranskinak.

d) Foru-arau honetako IV. tituluko V. kapituluan ezarritakoaren arabera zerga-taldearen emaitzen aplikazioan egin beharreko zuzenketak (kopuruak kalkulatzeko artikuluko honetako 4. idatz-zatian xedatutakoa aplikatuko da).

e) Zerga-taldeko zerga-oinarri negatiboen konpentsazioa, aurreko letretan adierazitakoen batura positiboa denean, bai eta foru-arau honetako 92. artikuluko 2. idatz-zatian adierazitako zerga-oinarri negatiboen konpentsazioa ere.

2.– Foru-arau honetako 33-35 bitarteko artikuluetan xedatutakoa aplikatzeko betekizunak zerga-taldeari dagozkio.

3.– Ezabaketak eta atxikimenduak urteko kontu bateratuak formulatzeko arauak onetsi dituen abenduaren 20ko 1.815/1991 Errege Dekretuan ezarritako irizpideen arabera egingo dira.

Hala ere, jabetza intelektualaren edo jabetza industrialaren gaineko eskubideen lagapenak sortzen dituen sarrerak eta eragiten dituen gastuak, foru-arau honetako 37. artikuluko lehen hiru idatz-zatietan aipatzen direnak, ezin dira ezabatu zerga-taldearen zerga-oinarria kalkulatzeko, nahiz eta lagapena taldeko entitateen artean egin.

4.– Foru-arau honetako IV. tituluko V. kapituluan ezarritakoaren arabera zerga-taldearen emaitzen aplikazioan egin beharreko zuzenketen zenbatekoa kalkulatzeko, zerga-taldearen magnitudeak kalkulatzeko zergaldiko azken eguneko urteko kontu bateratuak hartu behar dira aintzat.

Zerga-taldeei inolaz ere ezin zaie aplikatu foru-arau honetako 51. artikuluko 5. idatz-zatian xedatutakoa, ez eta 52. artikuluko 4. idatz-zatian xedatutakoa ere.

90. artikulua.– Ezabaketak.

1.– Zerga-oinarri bateratua zehazteko, zergaldian zehar egindako barruko eragiketen emaitzen ezabaketa guztiak burutuko dira.

Barruko eragiketatzat joko dira taldeko sozietateek taldekide direneko zergaldietan euren artean egindakoak eta zerga-baterakuntzako araubidea erabiliko dutenak.

2.– Barruko eragiketengatiko emaitzen ezabaketak, positiboak zein negatiboak, emaitza horiek zerga-taldeko entitateen banako zerga-oinarrian daudenean burutuko dira.

3.– Sozietateen banakako zerga-oinarrietan sartutako dibidenduetatik ez dira ezabatuko foru-arau honetako 33. artikuluko 3. idatz-zatian xedatutakoa aplikatu zaienak.

91. artikulua.– Eransketak.

1.– Ezabatutako emaitzak zerga-taldearen zerga-oinarriari erantsiko zaizkio gainerakoen aurrean egiten direnean.

2.– Sozietateren batek barruko eragiketaren batean esku hartu eta horren ostean, zerga-taldeko partaide izateari uzten dionean, eragiketa horri ezabatuko zaion emaitza banaketa hori gertatu zeneko zergaldiaren aurreko zerga-taldearen zerga-oinarriari erantsiko zaio.

3.– Zerga-taldeko sozietate baten partaidetzaren balioaren zuzenketaren ezabaketaren eransketa burutuko da taldetik irteten denean eta balioaren zuzenketa sortu duen galerari dagokion zerga-oinarri negatiboaren konpentsazio eskubide bereganatzen duenean. Balio zuzenketen itzulketa ez da erantsiko partaidetzako sozietatea zerga-taldean izan ez den zergaldietan.

92. artikulua.– Zerga-oinarri negatiboen konpentsazioa.

1.– Zerga-taldearen zerga-oinarria zehazteko arauen arabera berau negatiboa ateratzen bada, foru-arau honetako 55. artikuluan ezarritako moduan konpentsatu ahal izango da zenbatekoa zerga-taldearen zerga-oinarri positiboekin.

2.– Zerga-taldean sartzean sozietate batek konpentsatu gabe dauzkan zerga-oinarri negatiboak taldearen zerga-oinarrian konpentsatu ahal izango dira, muga honekin: sozietatearen zerga-oinarria.

93. artikulua.– Aparteko mozkinen berrinbertsioa.

1.– Foru-arau honetako 36. artikuluan aipatutako aparteko mozkinen berrinbertsioari eutsi ahal izango diote zerga-taldeko sozietateek eta berrinbertsioa aparteko mozkina lortu zuen sozietateak berak zein taldeko besteren batek egin ahal izango du. Berrinbertsioa zerga-taldeko beste sozietate bati eskuratutako elementu batean gauzatu ahal izango da, baldin eta elementu hori berria bada.

2.– Ezin izango zaio aparteko mozkinen berrinbertsioari eutsi zerga-taldeko entitateen artean egindako eskualdaketetan.

Hala ere, eragiketa hauen emaitza zerga-taldearen zerga-oinarrian sartu behar izanez gero, taldeak foru-arau honetako 36. artikuluan xedatutakoa aplika dezake, bertan ezarritako guztia betetzen badu.

94. artikulua.– Zergaldia.

1.– Zerga-taldearen zergaldia sozietate nagusiaren bera izango da.

2.– Menpeko sozietateren batek zergaldi bat banako zerga-ordainketa arautzen duten arauen arabera bukatzen duenean, bukaera honek ez du zerga-taldearena ekarriko.

95. artikulua.– Zerga-taldearen kuota osoa.

Zerga-taldearen likidazio-oinarriari sozietate nagusiaren karga-tasa ezartzeak erakarriko duen munta joko da zerga-taldearen kuota osotzat.

96. artikulua.– Zerga-taldearen kuota osoan aplika daitezkeen kenkariak.

1.– Zerga-taldearen kuota osotik foru-arau honetan ezarritako kenkarien zenbatekoa ken daiteke.

Kenkariok aplikatzeko betekizunak zerga-talde osoak bete behar ditu.

2.– Zerga-taldean sartzean edozein sozietatek aplikatu gabe dituen kenkariak zerga-taldearen kuota osoari kendu ahal izango zaizkio, hark banako zerga-ordainketaren araubidearen arabera izan zezakeen muga berberarekin.

97. artikulua.– Informazioa eman beharra.

1.– Zergari dagokionez, sozietate nagusiak galera eta irabazi bateratuen balantzea eta kontua egin behar izango ditu, zerga-taldea osatzen duten sozietate guztiei sartze orokorreko metodoa ezarriz.

2.– Urteko kontu bateratuek sozietate nagusiaren urteko kontuen itxiera-egun eta zergaldi eurak izango dituzte, eta menpeko sozietateek sozietate nagusiak egingo duen egunean bertan itxi beharko dute beren sozietate ekitaldia.

3.– Lehenengo idatz-zatian aipatutako agiriei honako informazio hau erantsi beharko zaie:

a) Sartzeko dauden aurreko zergaldietan egindako ezabaketak.

b) Zergaldian zehar egindako ezabaketak; berauen jatorria eta zenbatekoa behar bezala frogatu behar dira.

c) Zergaldian zehar izandako eransketak; berauen jatorria eta zenbatekoa ere behar bezala frogatu behar dira.

d) Zerga-taldearen zerga-oinarria zehazteko eta artikulu honetako 1. idatz-zatiko agiriak prestatzeko egindako ezabaketen eta eransketen artean egon daitezkeen diferentziak, behar bezala azalduta.

98. artikulua.– Zerga-baterakuntzaren araubidea galtzea.

1.– Zerga-baterakuntzaren araubidea galdu egingo da kari hauek gertatzen direnean:

a) Zerga-taldeko sozietateren batek Zergei buruzko Foru Arau Orokorrean xedatutakoaren arabera zeharkako zenbatespenaren araubidea ezartzea dakarten inguruabarretariko baten bat izatea.

b) Informazio betebeharrak, aurreko artikuluko 1. idatz-zatian azaldutakoak, ez betetzea.

2.– Zerga-baterakuntzaren araubidearen galerak aurreko idatz-zatian azaldutako kariak gertatzen diren zergaldian bertan izango ditu ondoreak eta zerga-taldeko sozietateek zergaldi horretan banako araubidean ordaindu beharko dute zerga.

99. artikulua.– Zerga-baterakuntzako araubidearen galeraren eta zerga-taldearen iraungipenaren ondoreak.

1.– Baldin eta, zerga baterakuntzaren araubidearen galera edo zerga taldearen iraungipena gertatzen den zergaldian inkorporatzeke dauden ezabaketak, zerga taldeko zerga-oinarri negatiboak edo konpentsatu gabekoen kuotako kenkariak badaude, era honetan jardungo da:

a) Sartu gabeko ezabaketak zerga-baterakuntzaren araubidea aplikatzen den azken zergaldiko zerga-taldearen zerga-oinarrian sartu.

Aurrekoa ez da aplikatuko entitate nagusia berehala beste zerga-talde baten menpeko sozietate bihurtzen bada, ez eta foru-arau honetako VI. tituluko X. kapituluan ezarritako araubide bereziari heldutako bat-egite prozesu batean beste talde bateko sozietate batek irensten badu ere. Batera zein bestera, menpeko sozietate guztiak beste taldean sartuko dira. Ezabatutako emaitzak beste zerga taldearen zerga-oinarriari batuko zaizkio, foru-arau honetako 91. artikuluan ezarritakoarekin bar etorriz.

Honen aurreko paragrafoan ezarri dena betetzearen ondoreetarako nahitaezkoa izango da zerga taldeak, deskribatu diren inguruabarrak gertatzen direnean eratuko denak, zerga baterakuntzaren araubidean ordaintzea aurreko taldeak azkeneko aldiz zerga baterakuntzaren araubidea aplikatu zuenaren osteko zergaldiko lehen egunetik.

b) Araubidearen galera edo iraungipena gertatuko den zergaldian zerga tasa eratzen duten sozietateek konpentsatzeke dauden zerga taldeko zerga-oinarri negatiboak konpentsatzeko eskubidea onartuko dute.

Konpentsazioa foru-arau honetako 55. artikuluko 1. idatz-zatian ezarritako epealdia amaitzeko falta diren zergaldietan zerga banaka ordaintzeko araubidean sortzen diren zerga-oinarri positiboei aplikatuko zaie. Epealdia zerga-taldeak zerga-oinarri negatiboa dauzkan zergaldiaren hurrengotik aurrera zenbatuko da.

Hori talde horien eraketan izan duten parte hartzearen atal proportzionalean egingo dute. Honen aurreko a) letraren bigarren paragrafoan ezarri dena aplikagarria den kasuetan foru-arau honen 92. artikuluaren 2. atalak ezarri duen araua izaera hori galdu duen izaki nagusiak burutzen duen zerga taldea eratzen duten sozietateen multzoa kontuan hartuta aplikatuko da.

c) Araubidea galtzen edo azkentzen den zergaldian zerga-taldean dauden sozietateek aplikatu gabe dauden zerga-taldearen kuota-kenkariak konpentsatzeko eskubidea hartuko dute, hain zuzen ere haien sorkuntzan parte hartu duten proportzioan.

Konpentsazioa foru-arau honetan aplikatu gabeko kenkariak aplikatzek ezarritako epealdia amaitzeko falta diren zergaldietan zerga banaka ordaintzeko araubidean sortzen diren kuota oso edo likidoetan egingo da. Epealdia kendu beharreko zenbatekoak zehazten diren zergaldiaren edo zergaldien hurrengotik aurrera zenbatuko da.

Hori talde horien eraketan izan duten parte hartzearen atal proportzionalean egingo dute. Honen aurreko a) letraren bigarren paragrafoan ezarri dena aplikagarria den kasuetan foru-arau honen 96. artikuluaren 2. atalak ezarri duen araua izaera hori galdu duen izaki nagusiak burutzen duen zerga taldea eratzen duten sozietateen multzoa kontuan hartuta aplikatuko da.

2.– Aurreko idatz-zatian xedatutakoa zerga-taldeko sozietateren bat taldetik irteten denean aplikatuko da.

Zerga-taldeko entitate nagusiak nagusi izateari uzten badio eta haren menpeko sozietateetako bat berehala beste zerga-talde bateko entitate nagusi bihurtzen bada, aurreko taldeko kide guztiak bertan daudela, artikulu honetako aurreko idatz-zatiko a) letrako bigarren eta hirugarren paragrafoetan eta b) eta c) letretako hirugarren paragrafoetan ezarritako arauak aplikatu behar dira.

Aurreko paragrafo horretan ezarri dena aplikatzearen ondoreetarako beharrezkoa izango da deskribatu diren inguruabar horien ondorioz sortu den zerga taldeak bere zergak zerga baterakuntzaren araubidean ordaintzea aurreko taldeak azkeneko aldiz zerga baterakuntzaren araubide aplikatu zuen zergaldiaren hurrengo zergaldiko lehen egunetik.

100. artikulua.– Zerga-taldearen aitorpena eta autolikidazioa.

1.– Sozietate nagusiak, zerga-taldearen aitorpena aurkezten duen aldi berean, taldeari dagokion zerga-zorra kitatu beharko du eta berau Gipuzkoako Foru Aldundiko Ogasun eta Finantza Sailak adieraziko duen lekuan, moduan eta epeetan sartu.

2.– Sozietate nagusiaren banako zerga-ordainketarako aitorpenari dagokion epearen barruan aurkeztu beharko da aitorpena.

3.– Zerga-taldea iraungitzen bada, zerga-baterakuntzaren araubidea galtzen badu edo sozietateren bat zerga-taldetik irteten bada egin beharko diren aitorpen osagarriak egutegiko hogeita bost eguneko epean aurkeztu behar dira; iraungipen, galera edo banantzearen karia gertatzen den egunetik sei hilabete igarotakoan hasiko da zenbatzen epe hori.

VII. KAPITULUA

ONDOKOEN ARAUBIDE BEREZIA: BAT-EGITEAK, ZATIKETAK, AKTIBO EKARPENAK, BALORE TRUKEAK, AKTIBOAREN ETA PASIBOAREN LAGAPEN OSOAK, ETA EUROPAKO SOZIETATE EDO SOZIETATE KOOPERATIBO BATEN EGOITZA EUROPAR BATASUNEKO ESTATU KIDE BATETIK BESTE BATERA ALDATZEA

101. artikulua.– Definizioak.

1.– Bategite eragiketatzat joko da hurrengoak burutzen dituen eragiketa:

a) Likidaziorik gabe desegiteagatik eta desegiten den momentuan bertan entitate batek edo batzuek aurretik dagoen beste entitate bati beren sozietatearen ondasunak blokean eskualdatzen dizkiote, beste entitatearen sozietatearen kapitaleko ordezkaritasuna duten baloreak eta, hala bada, izendun balorearen 100eko 10etik gorakoa ez den diru-konpentsazio bat, edo, izendun balorerik ez balego, kontabilitateari kendutako balore horien bereko beste balore bat kideei eratxikiz.

b) Likidaziorik gabe desegiteagatik eta desegiten den momentuan bertan entitate bik edo gehiagok entitate berri bati beren sozietatearen ondasun guztiak blokean eskualdatzen dizkiote, entitate berriaren sozietatearen kapitaleko ordezkaritasuna duten baloreak eta, hala bada, izendun balorearen 100eko 10etik gorakoa ez den diru-konpentsazio bat, edo, izendun balorerik ez balego, kontabilitateari kendutako balore horien bereko beste balore bat kideei eratxikiz.

c) Likidaziorik gabe desegiteagatik eta desegiten den momentuan bertan entitate batek bere sozietatearen kapitalaren ordezkaritasuna duten balore guztien titularra den entitateari sozietatearen ondasun guztiak eratxikitzen dizkio.

2.– 1.a. Zatiketatzat joko da hurrengoak burutuko dituen eragiketa:

a) Likidaziorik gabe desegin delako entitate batek bere sozietatearen ondare guztia zati batean edo gehiagotan banatzen du eta blokean eskualdatzen die aurretik dauden edo berriak diren entitate biri edo gehiagori, ekarpena hartuko duten entitateen sozietatearen kapitalaren ordezkaritasuna duten baloreak, proportziozko arau baten arabera, eta, hala bada, izendun balorearen 100eko 10etik gorakoa ez den diru-konpentsazio bat, edo, izendun balorerik ez balego, kontabilitateari kendutako balore horien bereko beste balore bat beren kideei eratxikiz.

b) Entitate batek jarduera-adarrak osatzen dituen bere sozietatearen ondarearen zati bat edo batzuk zatitzen ditu eta blokean eskualdatzen dizkie aurretik dauden edo berriak diren entitate bati edo gehiagori, eta entitate eskualdatzaileak, gutxienez, jarduera-adar bat gordeko du beretzat. Eskualdatzaileak, horren truke, azken sozietate horien sozietate-kapitala ordezkatzen duten baloreak jasoko ditu; baloreok entitatearen bazkideei esleitu behar dizkie –bakoitzaren partaidetzaren arabera–, sozietate-kapitala eta erreserbak derrigorrezkoa den zenbatekoan gutxitu behar ditu, eta, hala bada, aurreko idatz-zatian ezartzen den bezalako diru-konpentsazioa eman beharko die.

c) Entitate batek bere sozietatearen ondarearen zati bat bereizten du, beste entitate batzuen sozietate-kapitalean gehiengoa ematen dioten kapital-partaidetzek osatua, eta bere ondarean, gutxienez, beste entitate bat edo batzuen edo jarduera-adar batean antzeko ezaugarriak dituzten partaidetzak mantentzen ditu. Bereizitakoa beste entitate bati –sortu berria edo lehendik dagoena– eskualdatzen dio, eta trukean entitate eskuratzailearen kapitala ordezkatzen duten baloreak jasotzen ditu; jasotakoa entitatearen bazkideei esleitu behar die –bakoitzaren partaidetzaren arabera–, sozietate-kapitala eta erreserbak derrigorrezkoa den zenbatekoan gutxitu behar ditu, eta, hala bada, aurreko idatz-zatian ezartzen den bezalako diru-konpentsazioa eman beharko die.

2.a. Entitate eskuratzaile bi edo gehiago badaude, zatitzen den entitateko bazkideei entitate eskuratzaileetako baten kapitalaren balore adierazgarriak eratxikitzeko, zeukaten proportzioan ez, ezpada bestelakoan, beharrezkoa izango da entitate horiek eskuratutako ondareak jarduera-adarrak izatea.

3.– Diruzkoa ez den jarduera-adarren ekarkintzat joko da hurrengoa burutuko duen eragiketa, hots: desegin gabeko entitate batek aurretik dagoen edo berria den beste entitate bati jarduera-adar bat edota guztiak eratxikitzen dizkio eta horren trukean, horiek hartzen dituen sozietatearen kapitalaren ordezkaritasuna duten baloreak hartzen ditu.

4.– Jarduera adartzat joko da ekonomi ustiapen bat zehazten duen ekonomi unitate autonomiaduna osatzeko gai diren ondare osagaien multzoa, hau da, berez baliatzeko gai den multzoa. Entitate eskuratzaileari entitatearentzat edo eskualdatzen diren osagaien funtzionamendurako hartutako zorrak eratxiki ahal izango zaizkio.

5.– Entitate batek egiten duen eragiketa bat sozietatearen kapitala ordezkatzen duten baloreen truketzat joko da entitateak hurrengo eragiketetako bat egiten badu: beste entitate bateko boto-eskubideen gehiengoa lortzeko bidea emango dion beste entitate horren sozietate-kapitalaren partaidetza eskuratzen badu; edo, dagoeneko gehiengoa badu, partaidetza handiagoa eskuratzen badu, bazkideei, beren baloreen truke, lehenengo entitatearen sozietate-kapitala ordezkatzen duten beste balore batzuk esleituz, eta, hala badagokio, diru-konpentsazioa emanez; konpentsazio horrek ez du gainditu behar balio nominalaren ehuneko 10, edo, balio nominalik ezean, balore horien nominalari baliokidea den balioa, kontabilitatetik ondorioztatuko dena.

102. artikulua.– Eskualdaketak eratorritako errenten araubidea.

1.– Aurreko artikuluan aipatutako eragiketetatik datozen ondoko errenta hauek ez zaizkio zerga-oinarriari erantsiko:

a) Espainian kokatutako ondasunak eta eskubideak eskualdatzearen zioz sortzen direnak.

Entitate eskuratzaileak egoitza atzerrian duenean, zerga-oinarritik salbu Espainiako lurraldean kokaturiko establezimendu iraunkor bati loturiko elementuen eskualdaketatatik datozen errentak soilik geratuko dira.

Elementuok Espainiako lurraldetik kanpo transferitzeak berekin ekarriko du establezimendu iraunkorraren zerga-oinarrian sartzea, hura gertatzen den zergaldian, merkatuko balio izendunaren eta hurrengo artikuluan aipatutako balioaren arteko diferentzia; kopuru horri kontabilitatean agertarazitako amortizazioen eta bestelako balio-zuzenketen zenbatekoa kendu beharko zaio, hala denean, baldin eta zerga-kenkariak ekartzen badituzte.

Hala ere, Espainiako lurraldean dagoen establezimendu iraunkor bati atxikitako elementuak Europar Batasuneko beste estatu batera transferitzen badira, zergadunak aurreko idatz-zatian xedatutakoaren arabera dagokion kuotaren ordainketa geroratzea hauta dezake, osorik edo zati bat, harik eta aipatutako ondare-elementuak hirugarren bati eskualdatu arte, Europar Batasunetik kanpo dagoen establezimendu iraunkor bati atxiki arte edo entitatearen balantzean baja eman arte. Horretarako ezinbestekoa da foru-arau honetako 41. artikuluan ezarritako baldintzak betetzea bertan ezarritakoarekin bat etorriz.

b) Egoitza Espainiako lurraldean duten entitateei Europar batasunekoak ez diren estatuen lurraldeetako establezimendu iraunkorrek eskualdaketak egitearen zioz sortzen direnak.

c) Egoitza Espainiako lurraldean ez duten entitateek bertan modu iraunkorrean finkaturik ez dauden establezimenduei eskualdaketak egitearen zioz sortzen direnak.

Entitate eskuratzaileak egoitza atzerrian duenean, zerga-oinarritik salbu Espainiako lurraldean kokaturiko establezimendu iraunkor bati loturiko elementuen eskualdaketatatik datozen errentak soilik geratuko dira.

Elementuok Espainiako lurraldetik kanpo transferitzeak berekin ekarriko du establezimendu iraunkorraren zerga-oinarrian sartzea, hura gertatzen den ekitaldian, merkatuko balio izendunaren eta hurrengo artikuluan aipatutako balioaren arteko diferentzia; kopuru horri kontabilitatean agertarazitako amortizazioen eta bestelako balio-zuzenketen zenbatekoa kendu beharko zaio, hala denean, baldin eta zerga-kenkariak ekartzen badituzte.

Hala ere, Espainiako lurraldean dagoen establezimendu iraunkor bati atxikitako elementuak Europar Batasuneko beste estatu batera transferitzen badira, zergadunak aurreko idatz-zatian xedatutakoaren arabera dagokion kuotaren ordainketa geroratzea hauta dezake, osorik edo zati bat, harik eta aipatutako ondare-elementuak hirugarren bati eskualdatu arte, Europar Batasunetik kanpo dagoen establezimendu iraunkor bati atxiki arte edo entitatearen balantzean baja eman arte. Horretarako ezinbestekoa da foru-arau honetako 41. artikuluan ezarritako baldintzak betetzea bertan ezarritakoarekin bat etorriz.

d) Espainia ez Europar Batasuneko beste estatuetan kokatuta dauden establezimendu iraunkorrek egoitza estatu horietan duten entitateei egiten dizkieten eskualdaketen ondorioz sortzen diren errentak, baldin eta beraien forma Kontseiluaren 2009ko urriaren 19ko 2009/133/CE Zuzentarauaren eranskinean zehaztutakoetako bat bada (zuzentarau horretan zerga-araubide bateratua ezarri zen Batasuneko estatu ezberdinetako sozietateen arteko bat-egite, zatiketa, zatiketa partzial, aktibo-ekarpen eta akzio-trukeetarako eta Europako sozietate batek edo Europako sozietate kooperatibo batek sozietatearen egoitza Europar Batasuneko estatu batetik beste batera aldatzen duenerako) eta Zuzentarauko 3. artikuluan aipatzen diren zergetako baten kargapean badaude eta ez badaude salbuetsita.

Aurreko a), b) eta c) letretan aipatutako eragiketatik datozen errentak ez dira zerga-oinarritik bazter utziko, baldin eta entitate eskuratzailea zerga honetatik salbuetsita badago edo errenta-eratxikipeneko araubidean badago.

Zerga-oinarritik bazter utzi behar dira idatz-zati honetan aipatzen diren eragiketetan sortzen diren errentak, nahiz eta entitate eskuratzaileak foru-arau honetako 56. artikuluko 1. idatz-zatian ezarritakoak ez beste karga-tasa bat jasan edo zerga-araubide berezian egon. Entitate eskuratzaileari karga-tasa edo zerga-araubide berezi bat aplikatzen bazaio, eskualdatzailearena baino beste bat, eragiketa egin den unean egondako ondare-elementuak eskualdatuz lortzen den errenta –eragiketaren ondoren gauzatutakoa– eskualdatutako elementuaren ukantza-denbora osoan zehar modu linealean lortu dela ulertuko da, besterik frogatu ezean. Errenta horretatik eragiketa egin den unera arte sortu den kopuruari entitate eskualdatzaileak izango lituzkeen karga-tasa eta zerga-araubidea aplikatuko zaizkio.

2.– Aurreko idatz-zatian ezarritako araubideari uko egin ahal izango zaio ondare-elementuen osotasuna edo zatiren bat eskualdatzeak eratorritako errenten zerga-oinarriari erantsiz.

3.– Edozein modutan ere, nazioarteko itsas eta aire-nabigazioan diharduten entitateetan agerian agertuko diren itsasontziak edota aireontziak edo ustiapenerako ondasun higikorrak eskualdatzeak eratorritako errentak zerga-oinarriari erantsiko zaizkio, entitate eskuratzailearen egoitza lurralde espainiarrean ez dagoenean.

103. artikulua.– Eskuratutako ondasunen zerga-balorazioa.

1.– Aurreko artikuluan ezarritako araubidea ezartzeko gertatu zaien eragiketek eratorritako eskualdaketen bidez eskuratutako ondasunak eta eskubideak, zergari dagokionez, eragiketa burutu aurretik entitate eskualdatzailean zituzten balio berberen arabera baloratuko dira eta berdin mantenduko da, entitate eskualdatzailearen eskuraketa eguna foru-arau honetako 40. artikulu. artikuluko 11. idatz-zatia. idatz-zatian xedatutakoa ezartzeko. Balio horiek eragiketari esker benetan ordaindu dituzten zergan errenten zenbatekoan zuzenduko dira.

2.– Aurreko artikuluan ezarritakoa aplikatzeko gertatuko ez den kasuetan alde bien artean erabakitako balioa hartuko da merkatuko balio arruntaren mugarekin.

104. artikulua.– Ekarpenaren kontraprestazio gisa jasotako akzio edo partaidetzen zerga-balorazioa.

Jarduera-adar baten ekarpenaren ondorioz jasotako akzioen edo partaidetzen zerga-baloraziorako unitate ekonomiko autonomoaren kontabilitate-balioa hartuko da aintzat; balio horri zuzenketa bat aplikatuko zaio behar den kasuetan: eragiketa dela eta sozietate eskualdatzailearen zerga-oinarrian sartutako errenten zenbatekoa.

105. artikulua.– Balore-trukearen zerga araubidea.

1.– Pertsona Fisikoen Errentaren gaineko Zergaren edota Zerga honen zerga-oinarrian ez dira sartuko balore-trukean agertzen diren errentak, baldin eta ondorengo betekizunak betetzen badira:

a) Balore-trukea egiten duten bazkideak Espainian bizi badira edota Europako Batasuneko kide den beste herri batean edota bestelako estatu batean, baldin eta, azken kasu horretan, jasotako baloreak Espainian egoitza duen entitate baten sozietate-kapitalaren adierazgarri badira.

Bazkidea errenta-eratxikipenaren araubidean dagoen entitatea bada, balore-trukearen ondorioz sortzen den errenta ez da sartu behar entitatearen bazkideen, jaraunsleen, erkideen edo partaideen zerga-oinarrian, baldintza hauek betez gero: eragiketari kapitulu honetan ezarritako zerga-araubidea aplikatzea edo Kontseiluaren 2009ko urriaren 19ko 2009/133/CE Zuzentarauaren itzalpean egitea (zuzentarau horretan zerga-araubide bateratua ezarri zen Batasuneko estatu ezberdinetako sozietateen arteko bat-egite, zatiketa, zatiketa partzial, aktibo-ekarpen eta akzio-trukeetarako eta Europako sozietate batek edo Europako sozietate kooperatibo batek sozietatearen egoitza Europar Batasuneko estatu batetik beste batera aldatzen duenerako); bazkideak jasotako baloreen zerga-balorazioa trukatutakoena bera izatea.

b) Baloreak eskuratzen dituen entitatearen egoitza Espainiako lurraldean egon behar da, edo Kontseiluaren 2009ko urriaren 19ko 2009/133/CE Zuzentarauaren aplikazio-eremuan (zuzentarau horretan zerga-araubide bateratua ezarri zen Batasuneko estatu ezberdinetako sozietateen arteko bat-egite, zatiketa, zatiketa partzial, aktibo-ekarpen eta akzio-trukeetarako eta Europako sozietate batek edo Europako sozietate kooperatibo batek sozietatearen egoitza Europar Batasuneko estatu batetik beste batera aldatzen duenerako).

2.– Balore-trukea egin duen entitateak jaso dituen baloreak balioetsiko dira ekarpena egin duten bazkideen ondarean zuten balioagatik, Zerga honen edo Pertsona Fisikoen Errentaren gaineko Zergaren arauaren arabera. Ez da horrela egingo merkatu-balore arrunta txikiagoa bada; horrelakoetan, azken horren arabera balioetsiko dira.

Bazkideek sortutako errentak Espainian zergari atxikita ez badaude, alderdien artean erabakitako balorea hartuko da aintzat, eta merkatuko balore arrunta izango da muga.

Bazkidea errenta-eratxikipenaren araubidean dagoen entitatea bada, balore-trukearen ondorioz sortzen den errenta ez da sartu behar beraren bazkideen, jaraunsleen, erkideen edo partaideen zerga-oinarrian, baldintza hauek betez gero: eragiketari kapitulu honetan ezarritako zerga-araubidea aplikatzea edo 2009ko urriaren 19ko 2009/133/CE Zuzentarauaren itzalpean egitea (zuzentarau horretan zerga-araubide bateratua ezarri zen Batasuneko estatu ezberdinetako sozietateen arteko bat-egite, zatiketa, zatiketa partzial, aktibo-ekarpen eta akzio-trukeetarako eta Europako sozietate batek edo Europako sozietate kooperatibo batek sozietatearen egoitza Europar Batasuneko estatu batetik beste batera aldatzen duenerako); bazkideak jasotako baloreen zerga-balorazioa trukatutakoena bera izatea.

3.– Bazkideek jasotako baloreak, zerga ondorioetarako, emandako baloreen balioaren arabera baloratuko dira, eta hori zerga honekin edo Pertsona Fisikoen Errentaren gaineko Zergarekin bat zehaztuko da, hots, bietatik egoki denarekin. Balorazio hori gehitu edo murriztu egingo da, dirua emanez edo jasoz egiten den konpentsazio osagarriaren zenbatekoan.

Jasotako baloreek emandakoen eskuratze data gordeko dute.

4.– Bazkideak Espainiako egoiliar-izaera galtzen badu, Pertsona Fisikoen Errentaren gaineko Zergaren edota Zerga honen inguruabar hori gertatu den zergaldiaren zerga-oinarrian sartuko da akzioek edo partaidetzek merkatuan duten balore arruntaren eta aurreko idatz-zatiak (dagokionean, zuzenduta, zerga aldetik kengarriak izan diren balore-galeren zenbatekoan) aipatzen duen balorearen arteko aldea.

Errenta horri dagokion zerga-zorraren zatiaren ordainketa baloreak eskualdatzen diren zergaldira arte geroratu daiteke, foru-arau honetako 41. artikuluko 2. idatz-zatian ezarritakoarekin bat etorriz eta bertan ezarritako baldintzak betez gero.

5.– Arau bidez paradisu fiskaltzat jotako lurralde edo lurraldeetan helbideratutako edo finkatutako entitateek esku hartzen duten eragiketetatik lortutako errentak, edota horien bidez lortutakoak, Pertsona Fisikoen Errentaren gaineko Zergako edota zerga honetako zerga-oinarrian sartuko dira.

6.– Artikulu honetako 1. idatz-zatian ezarritako guztia betetzen ez duten balore-trukeek ezin diote heldu kapitulu honetan ezarritako araubideari.

106. artikulua.– Bazkideen zerga-ordainketa bategite-, irespen- eta erabateko zein zatikako banaketa-eragiketetan.

1.– Entitate eskuratzaileak entitate eskualdatzailearen bazkideei baloreak eratxikitzean sortzen diren errentak ez dira sartu behar zerga-oinarrian, baldin eta beraien egoitza Espainiako lurraldean edo Europar Batasuneko estatu batean badago. Baloreak egoitza Espainian daukan sozietate baten kapitalari badagozkio, bazkideen egoitza beste estatu batean egon daiteke.

Bazkidea errenta-eratxikipenaren araubidean dagoen entitatea bada, balore-eratxikipenaren ondorioz sortzen den errenta ez da sartu behar entitatearen bazkideen, jaraunsleen, erkideen edo partaideen zerga-oinarrian, baldintza hauek betez gero: eragiketari kapitulu honetan ezarritako zerga-araubidea aplikatzea edo 2009ko urriaren 19ko 2009/133/CE Zuzentarauaren itzalpean egitea (zuzentarau horretan zerga-araubide bateratua ezarri zen Batasuneko estatu ezberdinetako sozietateen arteko bat-egite, zatiketa, zatiketa partzial, aktibo-ekarpen eta akzio-trukeetarako eta Europako sozietate batek edo Europako sozietate kooperatibo batek sozietatearen egoitza Europar Batasuneko estatu batetik beste batera aldatzen duenerako); bazkideak jasotako baloreen zerga-balorazioa trukatutakoena bera izatea.

2.– Bategite, xurgatze eta bereizte oso edo partzialeko eragiketen bidez jasotako baloreak, zerga ondorioetarako, emandako baloreen balioaren arabera baloratuko dira, eta hori zerga honekin edo Pertsona Fisikoen Errentaren gaineko Zergarekin bat zehaztuko da, hots, bietatik egoki denarekin. Balorazio hori gehitu edo murriztu egingo da, dirua emanez edo jasoz egiten den konpentsazio osagarriaren zenbatekoan. Jasotako baloreek emandakoen eskuratze data gordeko dute.

3.– Bazkideak espainiar lurraldeko egoiliar izateari uzten badio, inguruabar hori gertatzen den zergaldiari dagokion Pertsona Fisikoen Errentaren gaineko Zergako edota zerga honetako zerga-oinarrian sartuko da akzio edo partaidetzek merkatuan duten balio normalaren eta aurreko idatz-zatian aipatu den balioaren arteko diferentzia, zuzendua berau, hala denean, zergatik kendu ahal izan diren balio-galeren zenbatekoan.

Errenta horri dagokion zerga-zorraren zatiaren ordainketa baloreak eskualdatzen diren zergaldira arte geroratu daiteke, foru-arau honetako 41. artikuluko 2. idatz-zatian ezarritakoarekin bat etorriz eta bertan ezarritako baldintzak betez gero.

4.– Arau bidez paradisu fiskaltzat jotako lurralde edo lurraldeetan helbideratutako edo finkatutako entitateek esku hartzen duten eragiketetatik lortutako errentak, edota horien bidez lortutakoak, Pertsona Fisikoen Errentaren gaineko Zergako edota zerga honetako zerga-oinarrian sartuko dira.

107. artikulua.– Entitate eskualdatzailearen eta entitate eskuratzailearen kapitaleko partaidetzak.

1.– Entitate eskuratzaileak entitate eskualdatzailearen kapitalean gutxienez % 5eko partaidetza badauka (edo % 3koa, sozietate horrek antolatutako bigarren mailako merkatu batean kotizatzen badu), partaidetza kitatzeak sortzen duen errenta positiboa ez da sartu behar entitate eskuratzailearen zerga-oinarrian, baldin eta entitate eskualdatzailearen erreserbekin bat badator, ez eta modu berean sortzen den errenta negatiboa ere.

Honelako kasuetan, foru-arau honetako 60. artikuluko 4. idatz-zatian xedatutakoa inolaz ere ez zaie aplikatuko aurreko paragrafoan aipatutako erreserbei.

2.– Partaidetzaren zenbatekoa aurreko idatz-zatian aipatutakoa baino txikiagoa denean, horren deuseztapenak errenta bat ekarriko du, eta jasotako ondare-elementuek merkatuan duten balio arruntaren eta berorren kontabilitateko balioaren diferentziaren zenbatekoa izango da errenta hori.

3.– Eskuratutako ondasunak, zergari dagokionez, foru-arau honen 103. artikuluan ezarritakoaren arabera baloratuko dira.

Hala ere, entitate eskuratzaileak entitate eskualdatzailearen kapitalean gutxienez % 5eko partaidetza badauka (edo % 3koa, sozietate horrek antolatutako bigarren mailako merkatu batean kotizatzen badu), partaidetzak zerga-ordainketarako daukan eskuraketa-balioaren ondare garbiaren arteko diferentziaren zenbatekoa eskuratutako ondasunei eta eskubideei egotziko zaie; horretarako Merkataritza Kodeko 46. artikuluan eta hura garatu duten gainerako arauetan ezarritako integrazio-metodo orokorra aplikatuko da. Gainera, aurrean aipatutako balorazioaren arabera egoten ez den diferentziaren zatia kengarria izango da zerga-ordainketan, foru arau honetako 25. artikuluko 1. idatz-zatian ezarri den bezala. Salbuespena: batera zein bestera, foru-arau honetako 34. artikuluan xedatutakoa aplikatuta, aurreko beste entitate eskualdatzaile baten zerga-oinarrian sartu ez den diferentziaren zatia.

Orobat, jasotako ondasun-eskubideei egotziko zaie entitate eskualdatzailearen egoitzan sortutako ondasun-eskubideen balioak izandako aldaketen ondoriozko doikuntzekin bat datorren partaidetzak zerga ondorioetarako duen eskuraketa balioaren zatia, zati hori galera-irabazien kontuan egotzi ez zenez gero, ez zuen zerga ondoriorik izan eta.

Aurreko bi paragrafoetan xedatutakoa aplikatzeko ezinbestekoa entitate eskuratzailea eta eskualdatzailea ez izatea sozietate talde berekoak, Merkataritza Kodeko 42. artikuluan ezarritako irizpideekin bat etorriz, egoitza non duten eta urteko kontuak batera egin behar dituzten alde batera utzita. Beharkizun hori ez zaio ezarriko pertsona edo entitate eskualdatzaileak ordaindutako partaidetzaren eskuraketa prezioari, eskualdatzaileak, aldi berean, Merkataritza Kodeko 42. artikuluan xedatutako balizkoen artean ez dauden pertsona edo entitate bati eskuratu badio.

Aurreko lerrokadako beharkizuna betetzen ez denean, partaidetzak zerga ondorioetarako duen eskuraketa balioaren eta ondare partaidetuaren ondare garbiaren arteko diferentziaren kenkaria bakarrik egin daiteke baldin eta kreditatzen bada erositako sozietatearen merkataritza-fondoaren balio-galera itzulezin bati dagokiola.

4.– Entitate eskualdatzaileak entitate eskuratzailearen kapitalean parte hartzen duenean, ez dira haren zerga-oinarrian sartuko partaidetzaren eskualdaketa dela-eta agerian geratzen diren errentak, nahiz eta entitateak foru-arau honen 102. artikulu. artikuluko 2. idatz-zatia. idatz-zatian ezarritako uko egite ahalmena erabili.

108. artikulua.– Zergen arloko eskubideetan eta betebeharretan subrogatzea eta errentak egoztea.

1.– Entitate eskuratzaileari eskualdatuko zaizkio entitate eskualdatzailearen zerga-eskubide eta betebeharrak, foru-arau honetako 101. artikulua. artikuluan aipatutako eragiketek titulu unibertsaleko ondorengotza ekartzen dutenean.

Entitate eskuratzaileak bere gain hartuko du zerga-onurak edukitzen jarraitzeko, edota entitate eskualdatzaileak edukitakoak sendotzeko beharrezkoak diren beharkizunak betetzea.

2.– Ondorengotza titulu unibertsalekoa ez denean, eskualdatutako ondasun eta eskubideei dagozkien zerga-eskubide eta betebeharrei buruzkoa baino ez da izango eskualdaketa.

Entitate eskuratzaileak bere gain hartuko du entitate eskualdatzailearen zerga pizgarriek eratorriko beharkizunak betetzea, eskualdatutako ondasun eta eskubideei lotuta dauden heinean.

3.– Entitate eskualdatzailean konpentsatzeko dauden zerga-oinarri negatiboak entitate eskuratzaileak konpentsatuak izan ahalko dira.

Entitate eskualdatzailearen kapitaleko partaide den entitate eskuratzailea edo hari begirako hori foru-arau honen 42. artikuluan ezarritako kasu batean dagoenean, konpentsatu ahal den zerga-oinarri negatiboa bazkideenak eta edozein titulurengatik egindakoak diren eta loturazko entitateek entitate eskualdatzailearen gainean duten edo dituzten partaidetza hori edo partaidetzei dagozkien ekarpenen balioaren eta kontabilitate-balioaren arteko diferentzia positiboaren zenbatekoan txikituko da.

Inoiz ezin konpentsatuko dira zerga-oinarri negatiboak, baldin eta entitate eskualdatzaileak jasandako galerei badagozkie eta galerok entitate eskuratzaileak entitate eskualdatzailearen kapitalean edo beste entitate batek entitate hartan duten partaidetzak balioa galtzea ekarria badute, foru-arau honetako 42. artikulua. artikuluan aipatuta dagoen lotura dutenean.

4.– Subrogazioek foru-arauen edota espainiar legeen babespean sortutako eskubide eta betebeharrak baino ez dituzte kontutan hartuko.

5.– Foru-arau honetako 101. artikulua. artikuluan aipatutako eragiketak direla-eta iraungitako entitateek burututako jardueren errentak merkataritzako arauetan ezarritakoaren arabera egotziko dira.

109. artikulua.– Establezimendu iraunkorren galerak.

Establezimendu iraunkor baten eskualdaketari foru-arau honetako 102. artikuluko 1. idatz zatiko d) letran ezarritako araubidea aplikatu behar bazaio, foru-arau hau aplikatu behar zaion entitate eskualdatzailearen zerga-oinarriari kopuru hau gehitu behar zaio: establezimendu iraunkorrak egotzitako errenta negatiboen eta positiboen arteko diferentzia (gehieneko kopurua: establezimenduaren eskualdaketak sortutako errenta positiboa).

Aurreko paragrafoan ezarritakoaz gainera, errenta positiboak ez baditu betetzen foru-arau honetako 35. artikuluan ezarritako betekizunak, mugaz gaindiko errenta zatia entitate eskualdatzailearen zerga-oinarrian sartu behar da; nolanahi ere, kuota osotik kopuru hau kendu ahal izango da: Kontseiluaren 2009ko urriaren 19ko 2009/133/CE Zuzentarauan (honen bidez zerga-araubide bateratua ezarri zen Batasuneko estatu ezberdinetako sozietateen arteko bat-egite, zatiketa, zatiketa partzial, aktibo-ekarpen eta akzio-trukeetarako eta Europako sozietate batek edo Europako sozietate kooperatibo batek sozietatearen egoitza Europar Batasuneko estatu batetik beste batera aldatzen duenerako) xedatutakoa aplikatu ezean establezimendu iraunkorra dagoen Batasuneko estatuan errenta horri zerga-oinarrian integratuta ezarriko litzaiokeen karga (gehieneko kopurua: errentari zerga-oinarrian integratuta dagokion kuota osoa).

110. artikulua.– Kontabilitateko betebeharrak.

1.– Entitate eskuratzaileak ondoren aipatuko den informazioa sartu beharko du urteko txostenean, entitate eskualdatzaileak foru-arau honen 102. artikulu. artikuluko 2. idatz-zatia. idatz-zatian aipatu den ahalmena erabili ez badu; orduan, d) letran zehaztutakoa baino ez du bete behar izango:

a) Entitate eskualdatzaileak amortizagarriak diren eskualdatutako ondasunak eskuratu zituen ekitaldia.

b) Entitate eskualdatzaileak itxitako azken balantzea.

c) Kontabilitatearen liburuetan eragiketa burutu baino lehen entitate eskualdatzailearen liburuetako ez bezalako balioarekin sartu diren ondasun eskuratuen zerrenda, balore biak adieraziz, eta baita amortizazio fondoak ere eta entitate bietako kontabilitate-liburuetan eratutako hornidurak.

d) Entitate eskualdatzaileak eduki dituen zerga-onurak, foru-arau honetako 108. artikuluko 1. eta 2. idatz-zatietan ezarritakoaren arabera aplikatu ahal izateko beharkizun jakin batzuk betetzera behartzen dutenak.

Idatz-zati honetan ezarritakoetarako, entitate eskualdatzaileak entitate eskuratzaileari jakinarazi beharko dizkio aipatu datu horiek.

2.– Pertsona juridikoak diren bazkideek ondorengo datu hauek aipatu beharko dituzte urteko txostenean:

a) Emandako baloreen kontabilitateko balioa.

b) Jasotako baloreak zein baliorekin kontabilizatu diren.

3.– Aurreko idatz-zatietan ezarritako aipamenak eskuraturiko baloreak edo ondare-elementuak inbentarioan dauden bitartean burutu beharko dira edo, bestela, entitate eskualdatzaileak edukitako zerga pizgarriek eratorritako beharkizunak bete behar diren bitartean.

Entitate eskuratzaileak aukeratu ahal izango du, eta bigarren eta ondorengo urteko txostenei dagokienean, aipamenok eragiketaren ondorengo lehenengo urteko txostenean agertzen direlako adierazpen hutsa sartu, zein gorde egin beharko baita aurreko lerroaldean aipatzen den inguruabarra dagoen bitartean.

4.– Aurreko idatz-zatietan ezarritako betebeharrak ez betetzea zergen arloko arau-haustea izango da. Zehapena 200 euroko isun finkoa izango da ematen ez den datu bakoitzeko eta urtero informazio hori ematen ez den lehenengo hiru urteetan, eta 1.000 eurokoa hortik aurrerako urte bakoitzeko; nolanahi ere, isunak muga izango du: entitate eskuratzaileak eskualdatutako ondasun eta eskubideei kontabilitatean ezarritako balioaren % 5.

111. artikulua.– Diruzkoak ez diren ekarpenak.

1.– Kapitulu honetan ezarritako araubidea hurrengo zerrendako baldintzak betetzen dituzten diruzkoak ez bestelako ekarpenei aplikatuko zaie, zerga honen edo Pertsona Fisikoen Errentaren gaineko Zergaren zergadunak hautatuz gero; hona hemen baldintzak:

a) Ekarpena jasotzen duen entitatea espainiar lurraldeko egoilea izatea edo jardueran bertan egitea ipinitako ondasunak lotzen zaizkioneko ezarpen iraunkorraren bidez.

b) Behin ekarpena egin ondoren, zerga honen edo Pertsona Fisikoen Errentaren gaineko Zergaren zergadun den ekarleak ekarpena jasotzen duten entitatearen funts propioetan gutxienez % 5eko partaidetza edukitzea (edo % 3koa, sozietate horrek antolatutako bigarren mailako merkatu batean kotizatzen badu).

c) Sozietatearen akzioak edo partaidetzak Pertsona Fisikoen Errentaren gaineko Zergadunek ipintzen badituzte, a) eta b) letretan esandakoez gain ondoko betekizun hauek ere beteko dira:

a') Partaidetza hartutako entitatearen egoitza Espainiako lurraldean egon behar da eta entitatea ezin da egon Espainiako eta Europako interes ekonomikoko elkartzeen araubide berezian, ez eta aldi baterako enpresa-elkarteen araubide berezian ere (foru-arau honetako VI. tituluko III. kapituluan ezarri da), eta ezin da izan ondare-sozietatea, foru-arau honetako 14. artikuluan ezarritakoaren arabera.

b') Partaidetza entitatearen funts propioen % 5 izan behar da gutxienez, edo % 3, sozietateak antolatutako bigarren mailako merkatu batean kotizatzen badu.

c') Ekarpena egin duenak etengabe edukitzea ekarpena gauzatzen deneko dokumentu publikoaren dataren aurreko urtean.

d) Pertsona Fisikoen Errentaren gaineko Zergadunek c) letran aipatutakoez bestelako ondarezko elementuren ekarpenik egitekotan, elementu horiek kontularitza Merkataritzako Kodean xedatutakoaren arabera eramaten deneko ekonomia jarduerei lotuta egotea.

2.– Kapitulu honetan ezarritako araubidea Pertsona Fisikoen Errentaren gaineko Zergaren zergadunek egiten dituzten jarduera-adarren ekarpenei ere aplikatuko zaie, kontabilitatea Merkataritza Kodearen arabera eginez gero.

3.– Ekarritako ondare-elementuak ezin izango dira baloratu, zergari dagokionez, merkatuan duten balio arruntaren gainetik.

112. artikulua.– Aktiboaren eta pasiboaren lagapen orokorra.

1.– Zergadunak kapitulu honetan ezarritako araubidea hautatzen badu, merkataritzako sozietateen egitura aldatzeari buruzko apirilaren 3ko 3/2009 Legeko 81-84 bitarteko artikuluetan aipatzen diren aktiboaren eta pasiboaren lagapen orokorrei aplikatuko zaie, ondokoak betez gero:

a) Lagapena desegindako entitatearen bazkide baten edo batzuen alde egitea, horretan boto-eskubidea gutxienez 100eko 25ekoa dutenean, desegite-erabakia baino urtebete lehenagoko aldian.

b) Bazkideei esleitutako aktiboek eta pasiboek desegindako entitatearen jarduera osoa edo horren adar bat edo gehiago osatzea.

c) Entitate lagapen-hartzaileak egoitza espainiar lurraldean izatea, edota jarduerak hortxe burutzea, ekarritako ondasunei lotutako ezarpen iraunkor baten bidez.

2.– Lagatako ondare-elementuak ezin izango dira baloratu, zergari dagokionez, merkatuan duten balio arruntaren gainetik.

113. artikulua.– Zergapetze bikoitza saihesteko arauak.

1.– Foru-arau honetako 105. artikuluko 2. idatz-zatian eta 111. artikuluan ezarritako balorazio-arauak aplikatuta zergapetze bikoitza gerta ez dadin, ekarpeneko ondasunei egotzitako zaizkien errenten kargura banatutako mozkinek foru-arau honetako 33. artikuluan xedatutakoa aplikatzeko eskubidea emango dute, partaidetza-ehunekoa eta antzinatasuna gorabehera. Irizpide hori bera hartuko da aintzat foru-arau honetako 34. artikuluan partaidetzak eskualdatuta lortzen diren errentei buruz xedatutakoa aplikatzeko.

Aurreko idatzi-zatiak aipatzen duen mozkinen banaketak eragindako partaidetzaren balio-galera ez da zergan kengarria izango,mozkin horien zenbatekoari dagozkion zergak, partaidetzaren eskualdaketaren bidez, Espainian ordaindu direnean izan ezik. Azken kasu horretan, entitateak aukera izango du partaidetza eskualdatu duenean Espainian zerga-ordainketa eragin duten mozkinen zenbatekoa besteko gastua zenbatzeko, baldin eta, eragiketa hori kontabilizatu behar den modua dela eta, ez badu inolako errentarik sartu zerga-oinarrian eta partaidetza horren balioa txikitu behar badu.

2.– Mozkinak kontabilizatzeko modua dela eta aurreko idatz-zatiko arauak aplikatuta zergapetze bikoitza saihesterik izan ez bada, entitate eskuratzaileak partaidetza azkentzen denean foru-arau honetako 104. artikuluan 105, artikuluko 2. idatz-zatian eta 111. artikuluan ezarritako balorazio-arauak aplikatuta egingo zirenen kontrako zeinua duten doikuntzak egin behar ditu; salbuespena: foru-arau honetako 34. artikuluko 3. idatz-zatian xedatutakoa aplikatu behar zaien bazkideei dagokien zatia. Entitate eskuratzaileak kontrako zeinua duten doitze horiek egin ahal izango ditu iraungi aurretik, baldin eta frogatzen bada bazkideek euren partaidetza eskualdatu dutela, eskualdaketa hori egiteko euren zerga-oinarrian sartu den zenbatekoaren mugaz.

114. artikulua.– Zerga-araubidea ezartzea.

1.– Kapitulu honetan ezarritako zerga-araubidea merkataritza sozietateen forma juridikoa ez duten zerga honen zergadunek parte hartzen duten eragiketei aplikatuko zaie, baldin eta beraien emaitzak kapitulu honetan aipatzen diren eragiketen ondoriozkoen antzekoak badira.

2.– Halaber, kapitulu honetako zerga-araubidea Europako sozietate batek edo Europako sozietate kooperatibo batek egoitza Europar Batasuneko estatu kide batetik beste estatu kide batera aldatzen duenean ere aplikatuko da Espainiako lurraldean dauden ondasun eta eskubideei dagokienez, aldaketaren ondoren lurralde horretan dagoen establezimendu iraunkor bati eratxikita geratzen badira. Ondorio horietarako, araubide berezi honetan ondasun-eskubideen eskualdaketarako ezartzen diren arauak sozietatearen helbidea aldatzeko eragiketei ere aplikatuko zaizkie, eragiketok horrelako eskualdaketarik sortzen ez badute ere.

3.– Kapitulu honetan ezarritako araubidea aplikatu ahal izateko ezinbestekoa da erregela hauen arabera hautatzea:

a) Bat-egite edo zatitze eragiketetan, hautapena proiektuan adierazi behar da, eta zerga-egoitza Espainian duten entitate eskualdatzaileek eta eskuratzaileek bat egiteko edo zatitzeko erabakietan ere bai.

Eragiketa horiei aplikatu ahal bazaie Foru Arau honek 102. artikuluan ezarritako araubidea, eta horietan ez entitate eskualdatzaileak ez eskuratzaileak zerga-egoitza Espainian ez badute, entitate eskuratzaileak egingo du aukera, eta eskualdaketaren agiria den eskritura publikoan jaso beharko da.

b) Diruzkoak ez diren ekarpenetan, eta aktiboen eta pasiboen lagatze orokorretan, entitate eskuratzaileak egingo du aukera, eta sozietatearen erabakian jaso beharko da, edo, bestela, egintzaren edo kontratuaren agiria den eskritura publikoan.

Eragiketa horietan entitate eskuratzaileak zerga-egoitza edo establezimendu iraunkorra Espainian ez badu, entitate eskualdatzaileak egingo du aukera.

c) Baloreak trukatzeko eragiketetan, hautapena entitate eskuratzaileak egin behar du eta sozietatearen erabakian ezarri beharko da edo, bestela, egintza edo kontratu dokumentatzen duen eskritura publikoan. Akzioak eskuratzeko eskaintza publikoetan, eragiketa bultzatzeko eskumena duen sozietate-organoak egingo du aukera, eta azalpenezko liburuxkan jaso beharko da.

Ez baloreak eskuratu dituen entitateak ez trukatzen diren baloreen bidez partaidetza hartutako entitateak ez badauka egoitza Espainian, baloreak eskualdatu dituen bazkideak frogatu behar du entitate eskuratzaileari Kontseiluaren 2009ko urriaren 19ko 2009/133/CE Zuzentarauan ezarritako araubidea aplikatu zaiola (zuzentarau horretan zerga-araubide bateratua ezarri zen Batasuneko estatu ezberdinetako sozietateen arteko bat-egite, zatiketa, zatiketa partzial, aktibo-ekarpen eta akzio-trukeetarako eta Europako sozietate batek edo Europako sozietate kooperatibo batek sozietatearen egoitza Europar Batasuneko estatu batetik beste batera aldatzen duenerako).

d) Europako sozietate batek edo Europako sozietate kooperatibo batek sozietatearen egoitza Europar Batasuneko estatu kide batetik beste estatu kide batera aldatzen badu, hautapena sozietatearen egoitza Espainiatik Batasuneko beste estatu batera aldatzen duen sozietatearen lekualdaketarako proiektuan eta sozietate erabakian ezarri behar da, edo sozietatearen egoitza Espainiara aldatzen duen sozietatearen proiektuan eta sozietate erabakian, edo egoitza Espainian eduki ez arren Espainiako lurraldean establezimendu iraunkorra daukan sozietateak egoitza beste estatu batera aldatzeko proiektuan eta sozietate erabakian.

Hautapena eragiketa dokumentatzen duen eskritura publikoan edo agiri publiko baliokidean islatu behar da. Eskritura edo agiri hori Kontseiluaren 1968ko martxoaren 9ko 68/151/EEE Zuzentarauan ezarritako xede estatuko erregistro publikoan inskribatzeko modukoa izan behar da.

Kasu guztietan, idatz-zati honetan araututako hautapena zerga-administrazioari jakinarazi behar zaio arautegian ezarritako moduan eta epealdian.

4.– Kapitulu honetan ezarritako araubidea ez zaie aplikatuko helburu nagusitzat zerga-iruzurra edo zerga-itzurpena duten eragiketei.

Ondorio horietarako, eragiketak horrelakotzat joko dira Gipuzkoako Lurralde Historikoko Zergei buruzko Foru Arauko 14. eta 15. artikuluetan ezartzen dena aplikagarri bazaie.

Bereziki, araubidea ez da aplikatuko eragiketa baliozko arrazoi ekonomikoengatik egin beharrean –hala nola, eragiketan parte hartu duten entitateen jarduerak berregituratzea edo arrazionalizatzea–, zerga-abantailak lortzeko helburu soil-soilarekin egiten bada, betiere eragiketa hori paragrafo honen aurreko idatz-zatian ezartzen diren kasuetan badago.

5.– Kapitulu honetan errentak geroratzeko ezarritako araubidea ezin da bateratu, foru-arau honetako 34. artikuluan ezarritakoarekin bat etorriz, entitateen partaidetzak eskualdatuta lortzen diren errentak zerga-oinarrian ez sartzeko bertan ezarritako kasuak aplikatzearekin.

VIII. KAPITULUA

HIGIEZINEN ERRENTAMENDUAREN KUALIFIKAZIOA DAUKAN JARDUERA EGITEN DUTEN ENTITATEAK

115. artikulua.– Aplikazio-eremua.

1.– Kapitulu honetan ezarritako araubideari jarduera ekonomiko nagusitzat ondasun higiezinen gaineko eskubide errealak lagatzea edo eratzea duten zergadunek heldu ahal diote (jarduera horren barruan sartzen dira ondasun horiek errentan edo azpierrentan ematea eta ondasunok erabiltzeko edo gozatzeko eskubideak edo ahalmenak eratzea, izena eta izaera gorabehera), baldintza hau betez gero: entitatearen urteko batez besteko plantilla bost langilekoa izan behar da, hain zuzen ere besteren konturako langileak, lansaio osokoak eta dedikazio esklusiboa dutenak. Horretarako, ez dira zenbatuko foru-arau honetako 42. artikuluan ezarritakoaren arabera zergadunarekin lotutzat jotzen diren langileak.

Batez besteko plantilla zenbatzean, aurreko paragrafoan ezarritako baldintzak betetzen dituzten langileak hartu behar dira kontuan, hain zuzen ere foru-arau honetako 42. artikuluan ezarritakoaren arabera zergadunari lotutako ondare-sozietate ez bestelako entitateetan enplegatuta daudenak.

2.– Kapitulu honetan xedatutakoa aurreko idatz-zatian ezarritakoa betetzen ez duten entitate batzuek ere aplikatu ahal dute, hain zuzen ere jarduera ekonomiko nagusitzat Espainiako lurraldean dauden etxebizitzak errentatzea dutenek.

Jarduera hori bateragarria izango da negozio-lokaletan eta garaje-plazetan inbertitzearekin, errentatzeko asmoarekin, baldin eta horien baterako kontabilitate-balioa entitatearen etxebizitza-inbertsioen kontabilitate-balioaren % 20 baino gehiago ez bada.

Honen ondoreetarako, etxebizitzaren errentamendutzat Hiri Errentamenduei buruzko azaroaren 24ko 29/1994 Legeko 2. artikuluan ezarritakoa soilik hartuko da, eta gainera lege horretan etxebizitzen errentamenduen kontratuetarako ezarritako betekizunak eta baldintzak bete behar dira.

3.– Artikulu honetako 2. idatz-zatian aipatutako entitateek kapitulu honetako zerga-araubidea aplikatu ahal izateko ezinbestekoa da ondokoak betetzea:

a) Errentatzeko diren etxebizitzen % 90ek ezin dituzte eduki 110 metro koadro baino gehiago eraikita.

b) Entitateak bere jabetzako 10 etxebizitza eduki behar ditu gutxienez errentatuta edo errentatzeko.

Etxebizitzaren errentamenduan gehienez ere eraikin bereko bi garaje-plaza eta eranskinak, negozio-lokalak salbu, sartu daitezke, etxebizitzarekin batera errentatuz gero.

Etxebizitzen kopurua konputatzean ez dira kontuan izango loturiko pertsona edo entitateei errentatutakoak, foru-arau honetako 42. artikuluan ezarritakoaren arabera.

4.– Araubide hau aplikatzea hautatuz gero, zerga-administrazioari jakinarazi behar zaio. Araubide berezi hau hautapenaren berri eman ondoren amaitzen den zergaldian, eta hurrengoetan ere bai zerga-administrazioari uko egin nahi zaiola adierazi arte.

Arau bidez berriematearen betekizunak eta bertan eman beharreko informazioa zehaztu ahal izango dira.

5.– Entitate bati VI. titulu honetako gainerako araubide berezietako bat aplikatu ahal bazaio (salbuespenak: zerga-baterakuntzaren araubide berezia; bat-egiteen, zatiketen, aktibo ekarpenen, balore trukeen, aktiboaren eta pasiboaren lagapen osoaren, eta Europako sozietate edo sozietate kooperatibo baten egoitza Europar Batasuneko estatu kide batetik beste batera aldatzearen araubide berezia), ezin hautatu izango du kapitulu honetako araubidea, hurrengo paragrafoan ezarritakoa eragotzi gabe.

Foru-arau honetako 13. artikuluan ezarritakoaren arabera mikroenpresa edo enpresa txiki edo ertain diren entitateek hauen artean hauta dezakete: foru-arau honetan halako entitateentzat ezarritako espezialitateak aplikatu edo kapitulu honetako araubide berezia aplikatu.

116. artikulua.– Zerga-araubidea.

1.– Aurreko artikuluan ezarritako betekizunak betetze dituzten entitateek eskubidea edukiko dute zerga-oinarrian ez sartzeko ondasun higiezinen gaineko eskubide errealak eratuta edo lagata lortutako errenten % 25 (jarduera horren barruan sartzen dira ondasun horiek errentan edo azpierrentan ematea eta ondasunok erabiltzeko edo gozatzeko eskubideak edo ahalmenak eratzea, izena eta izaera gorabehera).

Foru-arau honetako 115. artikuluko 2. idatz-zatian aipatzen diren entitateek etxebizitzen errentamenduek eta errentamenduen bitartekaritza-lanek sortutako errenten % 90 utz dezakete zerga-oinarritik kanpo.

Zerga-oinarrian sartu behar ez den errenta kalkulatzeko eragiketa hau egin behar da etxebizitza bakoitzeko: lortutako sarrera osotik sarrera horrekin zuzenean lotuta dauden gastuak eta sarrerari gastu orokorretan dagokion zatia kendu.

2.– Artikulu honetako aurreko idatz-zatian errentak zerga-oinarrian ez sartzeaz ezarritakoa entitatearen higiezinak eskualdatuta lortutako errentei ere aplikatuko zaie, baldintza hau betez gero: eskualdatu aurretik entitateak gutxienez 10 urtean eduki izana errentatuta edo lagata, foru-arau honetako 115. artikuluko 1. idatz-zatian ezarritako kasuetan.

Higiezina eskualdatu bada, errentak zerga-oinarrian ez integratzeko ezinbestekoa izango da, gainera, hura ez eskuratzea errentariak ez lagapen-hartzaileak.

3.– Foru-arau honetako 42. artikuluan ezarritakoaren arabera lotuta dagoen pertsona edo entitate bat higiezina lagata, errentatuta edo eskualdatuta lortutako errentei ezin zaie aplikatu artikulu honetan errentak zerga-oinarrian ez integratzeaz ezarritakoa.

4.– Kapitulu honetan araututako araubidea aplikatzea hautatzen duten entitateetako bazkideei foru-arau honetako 33., 34 eta, kasu batzuetan, 60. artikuluan mozkinen mozkin-banaketaz eta partaidetzen eskualdaketaz xedatutakoa aplikatuko zaie, kasuan kasukoa.

5.– Foru-arau honetako 36. artikuluko 1. idatz-zatian ezarritako berrinbertsio-aldia, hiru urte, bost urtera luzatuko da eskualdaketaren ondoriozko errentari aurreko 2. idatz-zatian errentak zerga-oinarrian ez sartzeaz ezarritakoa aplikatu bazaio.

6.– Araubide berezi honi heltzen dioten entitateek ezin izango dituzte aplikatu foru-arau honetako IV. tituluko V. kapituluan araututako emaitzaren aplikazioaren zuzenketak.

VII. TITULUA

ZERGALDIA ETA ZERGAREN SORTZAPENA

117. artikulua.– Zergaldia.

1.– Zergaldia bat etorriko da entitatearen ekitaldi ekonomikoarekin.

2.– Zergaldia beti amaituko da:

a) Entitatea azkentzen denean.

b) Espainiar lurraldean egoitza duen entitateak egoitza hori atzerrira lekualdatzean.

c) Entitatearen forma juridikoa aldatzen bada eta horrek berekin badakar emaitzako entitatea Zerga honi ez lotzea.

Zergaldi honi dagokion zerga-oinarria zehazteko entitatea desegintzat joko da eta horrek foru-arau honetako 40. artikuluko 3. idatz-zatian ezarritako ondoreak sortuko ditu.

d) Entitatearen forma juridikoa aldatzen bada eta horrek berekin badakar beraren karga-tasa aldatzea edo zerga-araubide berezia aplikatu beharra.

3.– Aurreko idatz-zatiko d) letrako kasuetan eta entitatearen forma juridikoa eraldatu gabe jasaten duen karga-tasa edo Zergaren araubidea aldatzen bada, entitatearen forma juridikoa eraldatu edo beraren gaineko karga-tasa edo aplikatzen zaion zerga-araubidea aldatu baino lehen egon diren ondare-elementuak eskualdatuta lortu den errenta elementua eduki den aldi osoan jarraian sortutzat hartuko da, besterik frogatu ezean.

Errenta horretatik entitatearen forma eraldatu edo karga-tasa edo zerga-araubidea aldatu arte sortutako kopurua honela kargatuko da: entitateak lehengo forma juridikoaren arabera edo karga-tasa edo zerga-araubidea aldatu ezean edukiko zituen karga-tasa eta zerga-araubidea aplikatuko zaizkio.

Idatz-zati honetan xedatutakoa ez da aplikatuko entitateak jasaten duen karga-tasa aldatzen denean karga-tasen arautegiaren aldaketa orokor baten ondorioz.

4.– Zergaldia ezin da izan hamabi hilabete baino luzeagoa.

118. artikulua.– Zergaren sortzapena.

Zerga zergaldiko azken egunean sortuko da.

VIII. TITULUA

ZERGAREN KUDEAKETA

I. KAPITULUA

ENTITATEEN INDIZEA

119. artikulua.– Entitateen indizea.

1.– Zerga-administrazioak Zerga Gipuzkoako Lurralde Historikoan ordaintzen duten entitateen indizea arteztuko du.

2.– Arau bidez finkatuko da nola emango zaien alta eta baja entitateei eta nola inskribatuko diren.

120. artikulua.– Entitateei behin-behineko baja ematea indizean.

1.– Zerga-administrazioak, aurretiaz interesatuari entzunda, behin-behineko baxa-erabakia eman ahal izango du ondorengo kasuetan:

a) Entitatearen zerga-administrazioarekiko zerga-zordunketek huts egin dutela adierazten dutenean, Gipuzkoako Lurralde Historikoko Zergabilketari buruzko Araudian ezarritakoaren arabera.

b) Entitateak zerga honi dagokion aitorpena aurkezten ez duenean.

2.– Behin-behineko baxa-erabakia erregistro publikoari jakinaraziko zaio, zeinek baxa horri lotutako entitateari irekitako orrian betetzeari ekingo baitio bazterreko ohar bat, zeinetan jasoko baita, aurrerantzean, ezingo dela burutu hari dagokion inolako izenematerik entitateen aurkibidearen alta-ziurtagirik aurkeztu gabe.

3.– Behin-behineko baxa-erabakiak ez du salbutzen horri lotutako entitatea berari doazkion zerga-betebehar batetik ere.

121. artikulua.– Lagundu beharra.

Gipuzkoako Lurralde Historikoko erregistro publikoetako titularrek hilero zerga-administrazioari bidaliko diote aurreko hilean entitateen indizean inskribatutako entitateen zerrenda (eraketak, ezarpenak, aldaketa eta azkentzeak).

II. KAPITULUA

KONTABILITATEKO BETEBEHARRAK. KONTABILIZATU GABEKO ONDASUNAK ETA ESKUBIDEAK. BORONDATEZKO BIRBALORAZIOAK

122. artikulua.– Kontabilitateko betebeharrak. Administrazioaren ahalmenak.

1.– Zerga honen kargapeko zergadunek Merkataritzako Kodean ezarritakoaren arabera arteztu behar dute euren kontabilitatea, edo bestela aplikatzen zaizkien arauetan ezarritakoarekin bat etorriz.

Kasu guztietan, foru-arau honetako 12. artikuluko 2. idatz-zatian aipatzen diren zergadunek euren kontabilitatean ondo zehaztuta eduki behar dituzte salbuetsi gabeko errentei eta ustiapen ekonomikoei dagozkien sarrerak eta gastuak.

2.– Gipuzkoako Lurralde Historikoko Zergei buruzko Foru Arau Orokorrean era hura garatu duten arau-xedapenetan zerga-administrazioari emandako gainera egiaztapen-ahalmenak gorabehera, Merkataritzako Kodeko 42. artikuluko sozietate-taldeetako entitate nagusiek taldeko entitateetatik egoitza Espainian ez dutenen ekitaldiko galeren eta irabazien kontua, balantzea, ondare garbiaren aldaketen orria eta eskudiru-fluxuen orria aurkeztu behar dituzte Administrazioak egiaztapen-prozesu batean eskatuz gero. Gainera, zerga honen ordainketan eragina eduki lezaketen kontabilitateko ziurtagiriak eta aurrekariak ere aurkeztu behar dituzte.

123. artikulua.– Kontabilizatu gabeko edo aitortu gabeko ondasunak eta eskubideak: errentak lortzen direlako ustezkotasuna.

1.– Zergaduna titularra izanik ere, kontabilitateko liburuetan erregistratuta ez dauden ondare-elementuak aitortu gabeko errentaren kargura eskuratu direla pentsatuko da.

Ustezkotasunak berdin jokatuko du eskuraketaren balio partziala ezkutatuz gero.

2.– Kontabilitatean erregistratuta ez dauden ondare-elementuak zergadunaren jabetzakotzat joko dira berak badauzka.

3.– Aitortu gabeko errentaren zenbatekoa kontabilitateko liburuetan erregistratu gabe dauden ondasun edo eskubideen eskuraketaren balioa dela uste izango da, eskuraketa finantzatzeko hartutako benetako zorren zenbatekoan gutxitua, kontabilizatu gabekoak hauek ere. Zenbateko garbia ezin da izan negatiboa.

Eskuraketa-balioaren zenbatekoa egiaztagirien bitartez frogatuko da edo, hori ezinezko bada, Gipuzkoako Lurralde Historikoko Zergei buruzko Foru Arau Orokorrean ezarritako arauak aplikatuz.

4.– Zergadunaren kontabilitateko liburuetan izan ez diren zorrak erregistratuz gero, errenta batzuk aitortu gabe daudela pentsatuko da.

5.– Aurreko idatz-zatietan ezarritakoaren arabera egiten diren presuntzioen ondorioz agertzen diren errenten zenbatekoa preskribatu gabe dauden zergaldietatik zaharrenari egotziko zaizkio, zergadunak beste bati dagokiola frogatu ezean.

6.– Ondoren azalduko diren ondasunak eta eskubideak aitortu gabeko errenten kargura eskuratutzat joko dira, eta zenbatekoa preskribatu gabe dauden zergaldietatik erregularizatu daitekeen zaharrenari egotziko zaio: berariaz ezarritako epealdian, edo zerga-administrazioak egiaztapen-prozeduraren hasiera jakinarazi baino lehen, Gipuzkoako Lurralde Historikoko Zergei buruzko Foru Arau Orokorreko hamaikagarren xedapen gehigarrian araututako informazio-betebeharra bete ez den ondasunak eta eskubideak.

Idatz-zati honetan ezarritakoa ez da aplikatuko zergadunak frogatzen badu bere titulartasuneko ondasunak eta eskubideak aitortutako errenten kargura eskuratu dituela, edo zerga honen zergadun izan ez den zergaldietan lortutako errenten kargura.

7.– Aurreko idatz-zatian xedatutakoa aplikatu ahal izanez gero, zergadunak zergen arloko arau-haustea egin du eta isuna ezarriko zaio: zehapenaren oinarriaren % 150.

Zehapenaren oinarria aurreko idatz-zatian xedatutakoaren aplikazioaren emaitzako kuota osoa izango da. Zehapenaren oinarria finkatzeko ez beste ezertarako, oinarriaren kalkuluan ez dira kontuan hartuko aurreko ekitaldietatik konpentsatzeko, kentzeko edo aplikatzeko dauden diru kopuruak, egiaztapena egiten den ekitaldikoak, zerga-oinarritik, likidazio-oinarritik edo kuota osotik ken litezkeenak.

Idatz-zati honetako zehapena ezin da bateratu aurreko idatz-zatian presuntzioaz araututakoaren arabera Gipuzkoako Lurralde Historikoko Zergei buruzko Foru Arau Orokorreko 195-199 bitarteko artikuluetan ezarritako arau-hausteengatik ezartzen direnekin.

Paragrafo honetan ezartzen dena betez jartzen diren zigorrei Gipuzkoako Lurralde Historikoko Zergei buruzko Foru Arauko 192. artikuluan ezartzen dena aplikatuko zaie.

8.– Aurreko 1-6 bitarteko idatz-zatietan aipatutako ondare-elementuen balioa zerga-ondorio guztietarako baliozkoa izango da zerga-oinarrian sartu bezain laster.

124. artikulua.– Zergaren kudeaketa administrazio bati baino gehiagori ordainduz gero.

Zerga hainbat administraziori ordaindu behar izanez gero, arau hauek aplikatuko dira:

Lehenengoa.– Zergaren likidazioaren emaitza zergaldian lurraldean egindako eragiketen bolumenaren arabera egotziko zaie administrazioei.

Bigarrena.– Zerga-administrazio bati baino gehiagori ordaindu behar dieten zergadunek autolikidazioak aurkeztu behar dizkiete arauetan ezarritako epealdien barruan eta haietan ezarrita dagoen bezala. Autolikidazioetan administrazio bakoitzaren proportzioa eta bakoitzari ordaindu beharreko kuota edo hark itzuli beharreko kopurua zehaztu behar dira.

Hirugarrena.– Itzulketak administrazioak egingo ditu dagokion proportzioan.

125. artikulua.– Kontabilitateko borondatezko birbalorazioak.

1.– Zerga-oinarrian sartu gabeko kontabilitateko birbalorazioren bat egin duten zergadunek ondoko datuak ezarri behar dituzte memorian: zenbatekoa, zer elementuri dagokion eta zer zergalditan egin den.

Datu horiek birbalorizatutako elementuak zergadunaren ondarean dauden ekitaldi guztietako memorietan azaldu behar dira.

2.– Aurreko idatz-zatian ezarritako betebeharra ez betetzea zergen arloko arau-haustea izango da.

Arau-hauste hori behin bakarrik zehatuko da: birbalorazio-zenbatekoaren % 5eko isuna. Ordainketak ez du ekarriko diru kopuru hori zergari dagokionez birbalorizatutako ondare-elementuaren balioari gehitzea.

III. KAPITULUA

AITORPENA, AUTOLIKIDAZIOA ETA BEHIN-BEHINEKO LIKIDAZIOA

126. artikulua.– Aitorpenak.

1.– Zergadunek zerga honen aitorpena aurkeztu eta sinatu behar dute; Ogasun eta Finantza Saileko foru-diputatuak ezarriko du non eta nola egin behar den.

Aitorpena aurkeztu beharko da zergaldia amaitu osteko sei hilabeteen ondorengo 25 egutegiko egunen barruan. Alabaina, salbuespenezko kasuetan eta egoerak horrela eskatzen badu, zerga-administrazioak baimena eman ahal izango du epe hori baino lehenago aurkezteko.

Epe horren hasieran Ogasun eta Finantza Saileko foru-diputatuak zehaztu ez badu zergaldi horren aitorpena aurkezteko era, aitorpena aurkezteko era zehazten duen xedapena indarrean jarri osteko 25 egutegiko eguneko epe barruan aurkeztu beharko da aitorpena. Hala ere, horrelakoetan zergadunak beste aukera bat ere badauka: aitorpena aurreko paragrafoan aipatzen den epealdian aurkeztea aurreko zergaldiko aitorpenerako onartutako baldintza formalak beteta.

2.– Foru-arau honetako 12. artikuluko 1. idatz-zatian aipatzen diren zergadun salbuetsiak ez dute aitorpena aurkeztu beharrik.

3.– Foru-arau honetako 12. artikuluko 2. idatz-zatian aipatzen diren zergadunek euren errenta guztiak aitortu behar dituzte, salbuetsiak zein salbuetsi gabeak.

Hala ere, zergadun horiek ez dute edukiko aitorpena aurkeztu beharrik ondokoak betez gero:

– Urteko sarrerak guztira 100.000 euro baino gehiago ez izatea.

– Atxikipena aplikatu behar zaien salbuetsi gabeko urteko errenten ziozko sarrerak 2.000 euro baino gehiago ez izatea.

– Lortzen dituzten errenta salbuetsi gabe guztiei atxikipena aplikatzea.

4.– Gipuzkoan ez ezik Espainiako estatuko beste zerga-administrazio baten lurraldean ere aritzen diren entitateek Gipuzkoako Foru Aldundiak eskatzen duen dokumentazioa aurkeztu behar dute, beste zerga-administrazio eskudunekiko dituzten betebeharrak gorabehera.

5.– Zergadunek artikulu honetan xedatutakoaren arabera aurkeztu beharreko aitorpenean ondokoak agertu behar dira nahitaez:

a) Entitatearen kapitalaren % 5 edo handiagoa den partaidetza daukaten bazkideen izenak biltzen dituen zerrenda.

b) Zergadunak kapitalaren % 5ekoa edo handiagoa den partaidetza daukan entitateen izenak biltzen dituen zerrenda.

c) Entitatearen Administrazio Kontseiluko administratzaileen edo kideen izenak biltzen dituen zerrenda.

6.– Artikulu honetako 5. idatz-zatian ezarritako betebeharretako bat ez betetzea zergen arloko arau-haustea da. Betebehar hori betetzerakoan datu faltsuak, zehaztugabeak edo osatugabeak erabiltzea ere zerga arloko arau-haustea da.

Ematen ez den datu bakoitzagatik eta oker edo faltsututa ematen den datu bakoitzagatik 1.000 euroko isuna ezarriko da. Datutzat hauxe hartuko da: aurrean aipatutako idatz-zatian xedatutakoaren arabera aitorpenean agertu beharreko bazkide, entitate edo administratzaile bakoitza.

127. artikulua.– Autolikidazioa eta zerga-zorraren sarrera.

1.– Aitorpena aurkeztearekin batera zergadunek euren zorra zehaztu behar dute eta Ogasun eta Finantza Saileko foru-diputatuak ezartzen duen bezala (tokia eta modua) ordaindu behar dute.

2.– Salbuespenen, kenkarien edo edozein zerga-pizgarriren onura izateko zerga-oinarrian edo kuotan, ezar daitekeen araudiak eskatzen dituen betekizunak bete beharko dira.

Berariaz besterik ezarri ezean, salbuespena, kenkaria edo zerga-pizgarria aplikatu ostean onura horretarako eskubidea galtzen bada, zergadunak hau ere sartu behar du betekizunak edo baldintzak betetzen ez diren zergaldiaren kuotarekin batera: aurreko aldian aplikatutako salbuespenari, kenkariari edo zerga-pizgarriari dagokion kuota edo kopurua, berandutze-korrituak gehituta.

128. artikulua.– Behin-behineko likidazioa.

Zergak kudeatzeko organoek egin ahal izango dute Zergen Foru Arau Orokorrak III. tituluaren III. kapituluko 2. sekzioan xedatutakoaren arabera bidezkoa den behin-behineko likidazioa, zerga-ikuskatzaileek ondoren egiaztatzea eta ikertzea eragotzi gabe.

IV. KAPITULUA

OFIZIOZKO ITZULKETA

129. artikulua.– Ofiziozko itzulketa.

1.– Foru-arau honetako 68. artikuluan aipatutako kopuruen batura autolikidazioaren kuota baino gehiago bada, zerga-administrazioak behin-behineko likidazioa egin beharko du aitorpena aurkezteko epealdia amaitu ondoko sei hiletan.

Aitorpena epez kanpo aurkeztuz gero, aurreko paragrafoan aipatutako sei hileko aldia aurkezpen-egunetik aurrera zenbatuko da.

2.– Autolikidazioaren ondoriozko kuota edo, halakorik balitz, behin behineko likidazioarena, Zerga honetan benetan atxikitako kopuru, konturako ordainketa eta zatikako ordainketen batuketa baino txikiagoa bada, zerga-administrazioak kuotaren gaineko soberakina ofizioz itzuliko du aurreko idatz-zatian finkatutako epean, egoki diren ondorengo behin behineko zein behin betiko likidazioei utzi gabe.

3.– Artikulu honetako 1. idatz-zatian ezarritako epealdian itzulketa egiteko erabakia hartzen ez bada eta horren arrazoia zerga-administrazioari egotzi ahal bazaio, itzuli beharreko zenbatekoari Gipuzkoako Lurralde Historikoko Zergei buruzko Foru Arau Orokorreko 26. artikuluko 6. idatz-zatian ezarritako berandutze-korritua aplikatuko zaio, epealdia amaitu eta hurrengo egunetik itzulketa jasotzeko eskubidea aitortzen duen erabakia hartzen den egunera arte. Zergadunak ez du eskatu beharrik edukiko.

4.– Arauz zehaztuko dira artikulu honetan aipatuta dagoen ofiziozko itzulketako ordainketaren prozedura eta era.

V. KAPITULUA

KONTURAKO ORDAINKETAK

130. artikulua.– Konturako ordainketak.

1.– Zerga honen kargapeko errentak ordaintzen dituzten entitateek, are ondasun-erkidegoek eta jabeen erkidegoek, arau bidez zehaztutako atxikipenak edo konturako sarrerak egin behar dituzte konturako ordainketen zioz, eta zenbateko horiek Gipuzkoako Foru Ogasunean sartu behar dituzten Ekonomia Itunean ezarritakoarekin bat etorriz. Banako enpresaburuek eta profesionalek euren jarduera ekonomikoetan ordaintzen dituzten errentei atxikipenak eta konturako sarrerak aplikatu behar dizkiete, bai eta Espainiako lurraldean establezimendu iraunkor baten bidez ari diren pertsona fisikoek, pertsona juridikoek eta bertan egoitza ez duten gainerako entitateek ere.

2.– Atxikipenak aplikatu behar dituenak Ogasun eta Finantza Saileko foru-diputatuak zehaztutako ereduan, epealdian, moduan eta tokian aurkeztu behar du atxikitako kopuruen aitorpena (atxikipenik egin ez badu, aitorpen negatiboa). Aldi berean, atxikipenen urteko laburpen bat aurkeztuko du arau bidez zehaztutako edukiarekin.

3.– Atxikipenak egin behar dituenak berari egindako atxikipenen edo konturako ordainketen ziurtagiria egin behar du; araudian ezarriko da nola.

4.– Araudian finkatuko da zer kasutan ez den atxikipenik egin behar. Ez da atxikipenik egingo honako kasuotan bereziki:

a) Foru-arau honetako 12. artikuluko 1. idatz-zatian aipatzen diren entitateek lortutako errentei.

b) Espainiako eta Europako interes ekonomikoko taldeek eta enpresen aldi baterako batasunek ematen dituzten mozkin dibidenduei eta partaidetzei, entitatea foru-arau honetako VI. tituluko III. kapituluko araubide berezian egon den zergaldietan sortu eta zerga-oinarriaren egozketa jasan behar duten bazkideei dagozkienei.

c) Foru-arau honetako VI. tituluko VI. kapituluan araututako zerga-baterakuntzaren araubidean dagoen talde bateko sozietateek elkarri ordaintzen dizkioten mozkin dibidenduei eta partaidetzei, eta korrituei.

d) Foru-arau honetako 33. artikuluko 1. idatz-zatian aipatzen diren mozkin dibidenduei eta partaidetzei.

e) Loteria eta apustuetako sariei, baldin eta zenbatekoa dela eta Pertsona Fisikoen Errentaren gaineko Zergari buruzko Foru Arauko hamazazpigarren xedapen gehigarrian ezarritako karga berezitik salbuetsita badaude.

5.– Epai edo administrazio erabakiren baten aginduz Zerga honen atxikipena edo konturako sarreraren menpeko errentaren bat ordaindu behar denean, kopuru guztiaren araberako ordainketa egin beharko du ordaintzaileak eta Gipuzkoako Foru Ogasunean egin diru sarrera, artikulu honetan ezarritakoren arabera.

6.– Araudia dela bide zatikako ordainketa lurralde bakoitzean egindako eragiketen bolumenaren proportzioan egin behar duten zergadunek Zergaren azken likidazio-aitorpenean finkatutako proportzioa aplikatu behar dute.

Aurreko paragrafoan xedatutakoa gorabehera, zergadunak beste proportzio bat aplikatu ahal izango du eragiketa hauek egiten direnean, Ekonomia Ituneko III. kapituluko 2. atalean ezarritako Araugintza Koordinatu eta Ebaluatzeko Batzordea jakitun jarri ondoren:

a) Aktiboak eman, bategin eta zatitze eragiketak eta balore trukeak.

b) Lurralde erkidean edo foru-lurraldean jarduera, hasi, utzi, handitu eta murriztea, aldarazpen nabarmena eragiten duena atal honetako lehen paragrafoan zehaztu den irizpidearen arabera kalkulatutako proportzioan.

Dena den, aldarazpena garrantzitsutzat hartuko da ehunekotan 15 puntu edo gehiagoren aldaketa eragiten duenean, lurraldeetako edozeinetan aplikatzekoa den proportzioan.

7.– Gipuzkoako Foru Ogasunari ordaindutako zatikako zenbatekoa Gipuzkoako Foru Aldundiari ingresatu beharreko kuotatik kenduko da.

VI. KAPITULUA

EGIAZTATZEKO AHALMENAK

131. artikulua.– Administrazioaren ahalmena zerga-oinarria zehazteko.

Zerga-oinarria zehazteko, zerga-administrazioak foru-arau honen 15. artikuluko 3. idatz-zatian aipatutako arauak erabiliko ditu.

132. artikulua.– Zergaren ikuskapena.

1.– Zergaren ikuskapena Gipuzkoako Foru Aldundiak egingo du honako kasu hauetan:

a) Zergadunaren zerga-egoitza Gipuzkoan dagoenean; salbuespena: zergadunaren eragiketen bolumena aurreko ekitaldian 7 milioi euro baino gehiago izan bada eta ekitaldi horretako eragiketa bolumenaren % 75 gutxienez lurralde erkidean egin badu edo, bestela, Euskal Autonomia Erkidegoan egindako eragiketa guztiak beste bi lurralde historikoetan egin baditu.

b) Zergadunaren zerga-egoitza Araban edo Gipuzkoan egonez gero, ikuskapena kasu hauetan abiaraziko da: zergadunaren eragiketen bolumena aurreko ekitaldian 7 milioi euro baino gehiago izan bada eta ekitaldi horretako eragiketa bolumenaren % 75 gutxienez lurralde erkidean egin ez badu eta, gainera, Euskal Autonomia Erkidegoan egindako eragiketa guztiak Gipuzkoan egin baditu (edo Gipuzkoan eta zerga-egoitzarik ez duen beste lurralde historiko batean egin baditu, haien eragiketa bolumenaren proportziorik handiena Gipuzkoan egin badu).

c) Subjektu pasiboak lurralde erkidean badauka zerga-egoitza, aurreko ekitaldiko eragiketen bolumena 7 milioi eurotik gorakoa izan bada, ekitaldi horretan eragiketa guztiak Euskal Autonomia Erkidegoan egin baditu eta, gainera, Gipuzkoan gainerako lurralde historikoetan egindako eragiketa bolumena baino proportzio handiagoa egin badu.

2.– Ikuskapenak Gipuzkoako Lurralde Historikoaren araudiari egokituko zaizkio gainerako administrazioen elkarlanaren kalterik gabe.

Ikuskapenek administrazio bati baino gehiagori dagokion zorra edo itzulketa eragingo balute, kobraketa edo ordainketa Gipuzkoako administrazioak berak egingo luke, beste administrazio horietan bidezko diren konpentsazioen kalterik gabe. Ikuskapen organoek euren jardunaren emaitzen berri emango diete ukitutako gainerako administrazioei.

3.– Ikuskapen-jarduketak beste administrazio batek eginez gero, egintzat joko dira Gipuzkoako Foru Aldundiak egiaztapenaren eta ikerketaren arloan dauzkan ahalmenak gorabehera, eta Aldundiaren jarduketek ez dute edukiko ondore ekonomikorik zergadunentzat administrazio eskudunetako organoen jarduketen ondoriozko behin betiko likidazioei dagokienez.

4.– Administrazio eskudunak egiaztapenetan finkatutako proportzioak likidatutako betebeharrei dagokienean ere bete beharko ditu zergadunak. Nolanahi ere, gero administrazioek behin betikoak adostu ditzakete.

IX. TITULUA

ZEHAPEN-ARAUBIDEA

133. artikulua.– Arau-hausteak eta zigorrak.

Foru-arau honetako gainerako manuetan xedatutakoa gorabehera, zerga honen arloko arau-hausteei zehapena ezarriko zaie Gipuzkoako Lurralde Historikoko Zergei buruzko Foru Arau Orokorrean xedatutakoarekin bat etorriz.

X. TITULUA

JURISDIKZIO ORDENA

134. artikulua.– Jurisdikzio eskuduna.

Bide ekonomiko-administratiboa agortu ondoren, zerga-administrazioaren eta zergadunen artean foru-arau honetan aipatzen diren gaien inguruan sortzen diren egitezko eta Zuzenbideko auziak ebazteko eskumena Administrazioarekiko auzietako jurisdikzioak edukiko du.

XEDAPEN GEHIGARRIAK

Lehenengoa.– Arau aipamenak.

Gipuzkoako Lurralde Historikoko zergen arautegian foru-arau honen bidez indargabetutako Sozietateen gaineko Zergari buruzko uztailaren 4ko 7/1996 Foru Arauko xedapenen bat edo zerga horri buruzko beste xedapenen bat aipatzen denean, aipamena foru-arau honetan ezarritakoari dagokiola pentsatu behar da.

Bigarrena.– Zergapetze bikoitza ezabatzea: mugak.

Foru-arau honetako 33. artikuluko 1. idatz-zatiko b) letran xedatutakoa aplikatzeko, bertan ezarritako betekizuna ez da betetzat joko dibidenduak banatzeko erabili diren mozkinei edo erreserbei xedapen hauek aplikatu bazaizkie:

a) 12/1993 Foru Legea, azaroaren 15ekoa, inbertsioa eta jarduera ekonomikoa sustatzeko neurriei eta zergen arloko beste neurri batzuei buruzkoa.

b) Petrolioaren sektorea Europako lege-esparrura moldatzeko presazko neurriei buruzko ekainaren 5eko 15/1992 Legeko 3. artikuluko 1. idatz-zatia.

c) Funtzio Publikoaren Araubide Juridikoa Eraberritzeko eta Langabeen Babeserako Zerga Neurriei buruzko abenduaren 29ko 22/1993 Legeko 2. artikulua.

d) Kanarietako araubide ekonomikoa eta fiskala aldatu duen uztailaren 6ko 19/1994 Legeko bosgarren xedapen gehigarria.

Hirugarrena.– Finantza-aktiboei eta beste balore higikor batzuei dagozkien atxikipen, eskualdaketa eta betebehar formalei buruzko arauak.

Kapital higigarriaren etekinei Sozietateen gaineko Zergaren ziozko atxikipenak egin beharra dela eta Pertsona Fisikoen Errentaren gaineko Zergari buruzko Foru Arauan eta haren araudian finantza-aktiboen eta beste balore higigarri batzuen atxikipenei, eskualdaketari eta betebehar formalei buruz ezarritako arauak aplikatuko dira, foru-arau honetan edo berau garatzen duen arautegian xedatutakoarekin kontra ez badaude.

Laugarrena.– Kanarietako ekonomia eta zerga araubidea.

Zerga honen eta Pertsona Fisikoen Errentaren gaineko Zergaren zergadunek, Gipuzkoako zerga-arautegiaren mende egonez gero, Kanarietako araubide ekonomikoa eta fiskala ezarri duten xedapenetako neurriak aplikatu ahal dituzte (indarrean jarri direnetik sortuko dituzte ondoreak), aplikagarriak izanez gero, nahiz eta erkidego autonomoaren arautegiaren mendeko zerga itunduei buruzkoak izan.

Bosgarrena.– Ondare-sozietateetako bazkideen tratamendua.

1.– Foru-arau honetako 14. artikuluan aipatzen diren ondare-sozietateek Zerga izate horren arabera ordaindu duten zergaldietan sortutako mozkinak banatzen badituzte, mozkinen hartzailea Pertsona Fisikoen Errentaren gaineko Zergaren zergaduna bada, mozkinok ez dira sartu behar horren zerga-oinarrian.

Idatz-zati honetan xedatutakoa aplikatzeko ez da kontuan hartuko zer entitatek banatu dituen ondare-sozietateak jasotako mozkinak, ez noiz egin den banaketa, ez entitateari orduan aplikatzen izan zaion zerga-araubide berezia.

2.– Pertsona Fisikoen Errentaren gaineko Zergaren zergadunek foru-arau honetako 14. artikuluan ezarritakoaren arabera ondare-sozietate izan diren zergaldietan sortutako mozkinen ondoriozko erreserbak dauzkaten sozietateetako partaidetzak eskualdatuta lortutako errentak direla eta ondarean gertatutako galera edo irabazia kalkulatzeko eragiketa hau egin behar dute: partaidetzen eskuraketa-baliotik (titulartasun-balioa) eskualdaketa-balioa kendu.

Hori dela eta, eskuraketa-balioa (titulartasun-balioa) kalkulatzeko hauexek batu behar dira:

Lehenengoa.– Partaidetza eskuratzeko ordaindutako prezioa edo kopurua edo Pertsona Fisikoen Errentaren gaineko Zergari buruzko Foru Arauko 47. artikuluan ezarritako balioa, kasuan kasukoa.

Bigarrena.– Eskuraketatik besterentzera bitarteko aldian sozietateak foru-arau honetako 14. artikuluan ezarritakoarekin bat etorriz ondare-sozietatea izan den zergaldietan lortu eta banatu ez dituen mozkinen zenbatekoa.

Hirugarrena.– Bazkideek baloreak sozietateak mozkinak lortu ondoren eskuratu badituzte, eskuraketa-balioari entitatea foru-arau honetako 14. artikuluan ezarritakoaren arabera ondare-sozietatea izan den zergaldietan lortutako dibidenduen edo mozkin partaidetzen zenbatekoa kenduko zaio.

Konputatu beharreko eskualdaketa-balioa itxitako azken balantzeko balio teorikoa izango da gutxienez, aktiboen kontabilitate-balioaren ordez Aberastasunaren eta Fortuna Handien gaineko Zergaren ondoreetarako izango luketena jarrita, edo haien merkatu-balioa, gutxiago izanez gero.

Idatz-zati honetan xedatutakoa gorabehera, bidezkoa denean Pertsona Fisikoen Errentaren gaineko Zergari buruzko Foru Arauan harpidetza-eskubideez ezarritakoa aplikatuko da, kontuan hartu gabe eskualdatutako partaidetza zer entitaterena den, noiz gertatu den eskualdaketa ez zer zerga-araubide aplikatzen izan zaien entitateei.

3.– Xedapen gehigarri honetako aurreko bi idatz-zatietan aipatutako mozkin dibidenduen eta partaidetzen eta partaidetzen eskualdaketaren ondoriozko errenten tratamendua Ez-egoiliarren Errentaren gaineko Zergari buruzko Foru Arauan ezarritakoarekin bat etorriz finkatuko da kasu honetan: hartzailea zerga horren zergaduna bada eta establezimendu iraunkorrik gabe aritzen bada.

Seigarrena.– Lege mailako xedapenak eta lehia babesteari buruzko arauak betetzeko egiten diren aktibo-eskualdaketen zerga-araubidea.

1.– 2002ko urtarrilaren 1etik aurrera argitaratzen diren lege mailako xedapenetan ezarritako betebeharrak edota egun horrez geroztik Europar Batzordearen nahiz Ministroen Kontseiluaren erabakiak betetzeko foru-arau honetako 33. artikuluko 1. idatz-zatiko a) letran ezarritakoarekin bat etorriz egiten diren balore-eskualdaketek, enpresa kontzentrazioko prozesuetan lehia babesteko arauak aplikatuta, tratamendu hau izango dute Sozietateen gaineko Zergan:

a) Lortutako errenta positiboa ez da integratuko zerga-oinarrian, baldin eta eskualdaketaren bidez lortutako diru kopuru guztia 36. artikuluan ezarri den bezala berrinbertitzen bada.

Kasu hauetako edozein gertatzen den zergaldian, ordea, errenta positibo hori bai sartu behar da zerga-oinarrian: berrinbertsioaren xede diren ondasun eta eskubideak eskualdatzen direnean, edo beste edozein arrazoirengatik ondasun-eskubideoi balantzean baja ematen zaienean. Horrelako errentei foru-arau honetako 36. artikuluan xedatutakoa aplikatuko zaie.

b) Berrinbertsioa gauzatzeko eskuratzen diren ondare-elementuei, errenta positiboa kalkulatzeko soil-soilik, eskualdatutako baloreek izandako balio bera egotziko zaie. Berrinbertsioa partziala bada, balio horri zerga-oinarrian sartutako errentaren zenbatekoa gehituko zaio.

2.– Espainiako Estatuak eta Portugalgo Errepublikak energia elektrikoaren merkatu iberiarra sortzeko 2004ko urriaren 1ean Konpostelako Santiagon izenpetu zuten nazioarteko hitzarmeneko 4. artikuluan aipatzen diren merkatuaren sozietate gidariei dagokienez, ez dira zerga-oinarrian sartuko egoitza Espainian duen sozietate baten akzioen eta sozietate-partaidetzen eskualdaketaren ondorioz agerian geratzen diren errenta positiboak, baldin eta eskualdaketa horiek merkatu hori sortzeko egin badira, eta eskualdaketa horietan jasotako kontraprestazioa –osorik edo zati batean– egoitza Portugalen duen horrelako beste sozietate baten akzioak eta sozietate-partaidetzak badira.

Kasu hauetako edozein gertatzen den zergaldian, ordea, errenta positibo horiek bai sartu behar dira zerga-oinarrian: jasotako akzioak edo partaidetzak eskualdatzen direnean; beste edozein arrazoirengatik akzio-eskubideoi balantzean baja ematen zaienean, edo azken horietan balio-zuzenketa bat egiten denean, zergan kengarria bada. Azken kasu bi horietan, bajaren edo balio-zuzenketaren zenbatekoaren proportzioan sartuko dira zerga-oinarrian.

Zazpigarrena.– Kreditu-entitateak berregituratzeko eragiketa batzuk.

1.– Foru-arau honetako VI. tituluko VII. kapituluan ezarritako zerga-araubide berezia aktibo eta pasiboen ondoko eskualdaketei ere aplikatuko zaie, nahiz eta 101. eta 111. artikuluetan aipatzen diren eragiketak izan ez, baldin eta emaitza ekonomikoak baliokideak badira:

a) Inbertsio Koefizienteei, Norberaren Baliabideei eta Finantza Bitartekarien Informazio Betebeharrei buruzko maiatzaren 25eko 13/1985 Legeko 8. artikuluko 3. idatz-zatiko d) letran aipatzen dena bezalako babes-sistema instituzionala eratzeko eta zabaltzeko egiten direnak.

b) Bankuak berregituratzeari eta kreditu-entitateen baliabide propioak indartzeari buruzko ekainaren 26ko 9/2009 Errege Dekretu-Legeko 7. artikuluan aipatutako Bankuen Berregituraketa Ordenatua egiteko Funtsak parte hartuta, kreditu-entitateak berregituratzeko prozesuetan egiten direnak.

2.– Sozietateen gaineko Zergaren oinarrian sartu gabe utz daitezke aurreko idatz-zatiko a) letran aipatzen den babeseko entitate sistema bateko akordioak betetzeko kreditu-entitateen artean egiten diren aktibo eta pasiboen trukeen ondorioz gertatzen diren ondare-elementuen eskualdaketek sortzen dituzten errentak, baldin eta entitate eskuratzaileak eskuratutako elementuei eskualdaketa baino lehen entitate eskualdatzailean eduki duten balio bera ezartzen badie eta elementuok gero sortzen dituzten errentak baloratzeko erabiltzen bada.

3.– Aurrezki kutxek finantza jarduerak zeharka egiten dituzten kasuetan, aurrezki kutxen gobernu organoei eta haien araubide juridikoaren beste gai batzuei buruzko uztailaren 9ko 11/2010 Errege Lege-Dekretuko 5. artikuluan ezarri den bezala, aurrezki kutxak eta hark finantza negozio osoa egiten dion kreditu-entitateak foru-arau honetako VI. tituluko VI. kapituluan ezarritako zerga-baterakuntzaren araubidea aplikatu ahal izango dute, baldin eta 85. artikuluan horretarako ezarritako baldintzak betetzen badituzte.

4.– Foruarau honetako hamaika zazpigarren xedapen gehigarrian xedatutakoa xedapen gehigarri honetako 1. idatz-zatian aipatutako eragiketen ondorioz egiten diren hiri lurren eskualdaketei aplikatuko zaie.

Zortzigarrena.– Babes sistema instituzional bateko kreditu-entitateek eratutako taldeen eta aurrezki-kutxen finantza-jarduna zeharka egitearen ondoriozko taldeen zerga-baterakuntzako araubidea.

1.– Foru-arau honetako VI. tituluko VI. kapituluan ezarritako zerga-baterakuntzaren araubidea aplikatzeko, talde bat eratzen bada eta sozietate nagusia finantza-bitartekarien inbertsio-koefizienteei, baliabide propioei eta informazio-betebeharrei buruzko maiatzaren 25eko 13/1985 Legeko 8. artikuluko 3. idatz-zatiko d) letran aipatzen dena moduko babes-sistema instituzional bateko entitate zentrala bada, ondoko hauek hartu behar dira aintzat:

a) Araubide hori babes-sistema instituzionala eratzen den zergaldia hasten denetik aplika daiteke. Araubide hori aplikatzea hautatzeko eta hautapenaren berri emateko epealdia zergaldi hori amaitu artekoa izango da.

Foru-arau honetako 85. artikuluko 2. idatz-zatiko a) letrako baldintzak betetzen dituzten sozietateak zergaldi horretan bertan sartuko dira taldean, baldin eta beraien kapitalaren partaidetzak entitate zentralari eman bazaizkio integrazio-plana betetzeko eta entitate horrek zergaldia amaitu arte mantentzen baditu partaidetzak foru-arau honetako VI. tituluko VII. kapituluan eta zazpigarren xedapen gehigarriko 1. idatz-zatian ezarritako zerga-araubideetan egindako eragiketen bidez, eta ekarpena egiten duen kreditu-entitatearen mendeko sozietatetzat jotzen badira entitate horrek araubide berezi horretan sozietate nagusi gisa tributatzearen ondorioz.

b) Entitate nagusia entitate zentrala den zerga-talde batean menpeko sozietate diren kreditu-entitateek entitate nagusi gisa ordaintzen badute Zerga zerga-baterakuntzaren araubidean, foru-arau honetako 99. artikuluan ezarritakoa aplikatu behar da.

c) Foru-arau honetako 85. artikuluko 3. idatz-zatiko bigarren paragrafoan ezarritako baldintzak betetzen dituztela entitate nagusitzat entitate zentrala duen zerga-talde batean menpeko sozietate diren kreditu-entitateek konpentsatzeko dituzten zerga-oinarri negatiboak taldearen zerga-oinarrian konpentsatu daitezke foru-arau honetako 92. artikuluko 2. idatz-zatian ezarritakoarekin bat etorriz; konpentsazioak muga hau dauka: entitate zentralaren edo entitate zentralak finantza-negozio osoa eman dion banku-entitatearen zerga-oinarri indibiduala, baldin eta aurrezki-kutxek eta entitate zentralak, bidezkoa bada, ekarpena egin ondoren ez badute jarduera ekonomikorik egiten eta haien errenta bakarrak beste entitate batzuen kapitalean dauzkaten partaidetzen ondoriozko etekinak badira. Negozio finantzarioa emateko eragiketan zenbait aktibo eta pasibo ematea eragozten duen baldintzaren bat dagoela-eta aktibo-pasibo horiek ez emateak ez dio tratamendu honi eragingo.

Aurreko guztia berdin aplikatuko da, nahiz eta banku-entitate hori entitate nagusitzat entitate zentrala duen taldetik kanpo geratu, bai eta taldea iraungitzen denean ere.

Foru-arau honetako 99. artikuluko 1. idatz-zatiko b) letrako hirugarren paragrafoan ezarritakoa aplikatu behar izanez gero, behin manu horretan finkatutako muga aplikatu ondoren konpentsatzeko moduko zerga-oinarri negatiborik geratzen bada, gaindikin hori letra honetako lehenengo paragrafoan ezarri den bezala konpentsatu ahal izango da.

d) Foru-arau honetako 85. artikuluko 3. idatz-zatiko bigarren paragrafoan ezarritako baldintzak betetzen dituztela entitate nagusia entitate zentrala den zerga-talde batean menpeko sozietate diren kreditu-entitateek oraindik aplikatu gabe dituzten kuotako kenkariak taldearen kuota osoan ken daitezke. Kenkariak muga hau dauka: entitate zentralari edo honek finantza-negozio osoa eman dion banku-entitateari banako zerga-araubidean dagokion muga, baldin eta aurrezki kutxek eta entitate zentralak, bidezkoa bada, ekarpena egin ondoren ez badute jarduera ekonomikorik egiten eta beraien errenta bakarrak beste entitate batzuen kapitalean dauzkaten partaidetzen ondoriozko etekinak badira. Negozio finantzarioa emateko eragiketan zenbait aktibo eta pasibo ematea eragozten duen baldintzaren bat dagoela-eta aktibo-pasibo horiek ez emateak ez dio tratamendu honi eragingo.

Aurreko guztia berdin aplikatuko da, nahiz eta banku-entitate hori entitate nagusitzat entitate zentrala duen taldetik kanpo geratu, bai eta taldea iraungitzen denean ere.

Foru-arau honetako 99. artikuluko 1. idatz-zatiko c) letrako hirugarren paragrafoan ezarritakoa aplikatu behar izanez gero, behin manu horretan finkatutako muga aplikatu ondoren aplikatu beharreko kenkaririk geratzen bada, gaindikin hori letra honetako lehenengo paragrafoan ezarri den bezala konpentsatu ahal izango da.

e) Babes-sistema instituzionala eratu eta handitu dela eta, kreditu-entitateek, menpeko sozietate gisa, aktiboak eta pasiboak eskualdatzen badizkiote taldeko sozietate nagusia den entitate zentralari, eta eskualdaketa hori foru-arau honetako VI. tituluko VII. kapituluan edo zazpigarren xedapen gehigarriko 1. idatz-zatian zehazten diren zerga-araubideetan dauden eragiketen bidez egiten badira, aktibo eta pasibo horiei egotzi ahal zaizkien errentak, eskualdaketa baino lehen sortuak badira, entitate zentralari egotziko zaizkio merkataritzako arauetan ezarritakoarekin bat etorriz.

Aurreko b), c) eta d) letretan zehazten dena berdin aplikatuko d, baldin eta, babes sistema instituzionala eratu ondoren, entitate zentrala zerga-baterakuntzako araubidean tributatzen duen beste talde bateko menpeko sozietate izatera igarotzen bada.

2.– Kreditu-entitateek babes-sistema instituzional bateko akordioak betetzeko beraien artean egin dituzten aktibo eta pasiboen eskualdaketei foru-arau honetako VI. tituluko VII. kapituluan edo zazpigarren xedapen gehigarriko 2. idatz-zatian ezarritako zerga-araubideak aplikatzeko, araubide horietan bietan zenbait errenta zerga-oinarrian ez integratzeko ezarritako berdin aplikatuko zaie eskualdaketa horien ondorioz zerga-taldearen zerga-oinarrian sartu beharreko errenta ezabatuei, baldin eta aktibo-pasibo horiek zerga-baterakuntzaren araubidean dagoen talde bateko entitateen ondarearen osagai badira.

3.– Aurrezki kutxek finantza-jarduerak zeharka egiten dituzten kasuetan, aurrezki kutxen gobernu organoei eta haien araubide juridikoaren beste gai batzuei buruzko uztailaren 9ko 11/2010 Errege Lege-Dekretuko 5. artikuluan ezarritakoaren arabera, aurrezki kutxak eta berak finantza-negozio osoa eman dion kreditu-entitateak foru-arau honetako VI. tituluko VI. kapituluan ezarritako zerga-baterakuntzaren araubidea aplikatu ahal izango dute ekarpena egiten den zergaldia hasten den egunetik, baldin eta foru-arau honetako 85. artikuluan horretarako ezarritako baldintzak betetzen badituzte. Araubide hori aplikatzea hautatzeko eta hautapenaren berri emateko epealdia zergaldi hori amaitu artekoa izango da.

Araubide hori aplikatzerakoan berezitasun hauek hartu behar dira kontuan:

a) Foru-arau honetako 85. artikuluko 2. idatz-zatiko a) letrako baldintzak betetzen dituzten sozietateak zergaldi horretan bertan sartuko dira taldean, baldin eta beraien kapitalaren partaidetzak banku-entitateari eman bazaizkio eta entitate horrek zergaldia amaitu arte mantentzen baditu partaidetzak foru-arau honetako VI. tituluko VII. kapituluan ezarritako zerga-araubideetan egindako eragiketen bidez, eta ekarpena egiten duen kreditu-entitatearen mendeko sozietatetzat jotzen badira entitate horrek araubide berezi horretan sozietate nagusi gisa tributatzearen ondorioz.

b) Ekarpena egiten duen aurrezki kutxak konpentsatzeko dituen zerga-oinarri negatiboak taldearen zerga-oinarrian konpentsatu daitezke (muga: aurrezki-kutxaren zerga-oinarria) foru-arau honetako 92. artikuluko 2. idatz-zatian ezarritakoarekin bat etorriz, baldin eta aurrezki kutxa horrek ekarpena egin ondoren ez badu jarduera ekonomikorik egiten eta beraren errenta bakarrak beste entitate batzuen kapitalean dauzkan partaidetzen ondoriozko etekinak badira. Negozio finantzarioa emateko eragiketan zenbait aktibo eta pasibo ematea eragozten duen baldintzaren bat dagoela-eta aktibo-pasibo horiek ez emateak ez dio tratamendu honi eragingo.

Aurreko guztia berdin aplikatuko da nahiz eta banku-entitatea entitate nagusia aurrezki kutxa den taldetik kanpo geratu, are taldea azkenduz gero ere.

Foru-arau honetako 99. artikuluko 1. idatz-zatiko b) letrako hirugarren paragrafoan ezarritakoa aplikatu behar izanez gero, behin manu horretan finkatutako muga aplikatu ondoren konpentsatzeko moduko zerga-oinarri negatiborik geratzen bada, gaindikin hori letra honetako lehenengo paragrafoan ezarri den bezala konpentsatu ahal izango da.

c) Ekarpena egiten duen aurrezki-kutxak oraindik aplikatu gabe dituen kuotako kenkariak talde fiskalaren kuota osoan kendu ahalko dira, aurrezki-kutxari banako zerga-araubidean legokiokeen mugarekin, baldin eta aurrezki-kutxa horrek, ekarpena egin ondoren, ez badu ekonomia-jarduerarik egiten eta dituen errenta bakarrak aurrezki-kutxa hori partaide den beste entitate batzuen kapitalean dituen partaidetzen ondoriozko etekinak badira. Negozio finantzarioa emateko eragiketan zenbait aktibo eta pasibo ematea eragozten duen baldintzaren bat dagoela-eta aktibo-pasibo horiek ez emateak ez dio tratamendu honi eragingo.

Aurreko guztia berdin aplikatuko da, nahiz eta banku-entitate hori entitate nagusitzat aurrezki-kutxa duen taldetik kanpo geratu, bai eta taldea iraungitzen denean ere.

Foru-arau honetako 99. artikuluko 1. idatz-zatiko c) letrako hirugarren paragrafoan ezarritakoa aplikatu behar izanez gero, behin manu horretan finkatutako muga aplikatu ondoren aplikatu beharreko kenkaririk geratzen bada, gaindikin hori letra honetako lehenengo paragrafoan ezarri den bezala konpentsatu ahal izango da.

d) Finantza-negozio osoa ekarpen gisa emateko foru-arau honetako VI. tituluko VII. kapituluan ezarritako zerga-araubidean dauden eragiketak erabiltzen badira, ekarpena egin aurretik sortzen diren errentak, aktibo eta pasibo horiei egotzi ahal zaizkienak, banku-entitateari egotziko zaizkio merkataritzako arauetan ezarritakoarekin bat etorriz.

4.– Aurreko 1. eta 3. idatz-zatietan aipatzen diren taldeek Zerga zerga-baterakuntzako araudian ordaintzen badute eta aurrezki kutxek euren finantza-jarduna zeharka egiteko erabiltzen duten banku entitatea edo finantza-negozio osoa eman dioten banku-entitatea taldetik kanpo geratzen bada, foru-arau honetako 99. artikuluan ezarritakoa aplikatuko da, are zerga-taldea azkentzen denean ere.

Nolanahi ere, aurrezki kutxek beren finantza-jarduna zeharka egiteko erabiltzen duten banku-entitateak edo finantza-negozio osoa jaso duen banku-entitateak partaidetzak baditu foru-arau honetako 85. artikuluko 3. idatz-zatian ezarritako baldintzak betetzen dituen entitate batean, eta banku-entitate horrek zein horretarako baldintzak betetzen dituzten haren partaidetzapeko entitateek zerga-baterakuntzaren araubidea aplikatzen badute entitate hori taldetik kanpo geratu den zergaldiaren hasieratik, baina ezabatutako emaitzak sortu dituzten eragiketetan parte hartu duten entitateetako batzuk ez badira talde horretan integratzen, emaitza horiek ezabatutako errenta sortu zuen talde iraunkorraren zerga-oinarrian sartuko dira foru-arau honetako 91. artikuluan ezarritakoarekin bat etorriz. Emaitzok talde iraunkorraren zerga-oinarrian sartu ahal izateko ezinbestekoa da banku-entitatea kide den zerga-taldekoa ez den beste entitatea eta banku-entitatea bera talde berekoak izatea eta talde hori Merkataritzako Kodeko 42. artikuluan ezarritakoarekin bat etortzea: entitate nagusia babes-sistema instituzional bateko entitate zentrala edo aurrezki kutxa izan behar da eta, batera zein bestera, entitate zentralak finantza-entitate bati eman behar dio finantza-negozio osoa.

Bederatzigarrena.– Sozietateen gaineko Zergaren karga-tasa orokorra aplikatzen ez zaien kapital aldakorreko inbertsio-sozietateek egindako kapital-txikipenak (ekarpenak itzulita) eta jaulkipen-primen banaketak.

1.– Foru-arau honen 40. artikuluko 4. paragrafoan xedatutakoa gorabehera, kapitalaren murriztapenetan, Sozietateen gaineko Zergaren karga-tasa orokorra aplikatzen ez zaien eta kapital aldakorreko inbertsioko sozietateek egindako ekarpena itzulita eta jaulkipen-prima banatuta, talde inbertsioko entitateen azaroaren 4ko 35/2003 Legean araututakoetan, Sozietateen gaineko Zergan karga-tasa orokorra aplikatzen ez zaienean, sartu beharreko errentak honako arauen arabera kalkulatuko dira:

a) Kapitalaren murriztapenaren kasuan, ekarpenak itzulita, kapitalaren murriztapenean jasotako zenbateko osoa, ekintzen likidazio-balioaren hazkuntzaren mugarekin, eskuratu edo sinatzen direnetik harik eta kapital soziala gutxitu arte, kidearen zerga-oinarrian sartuko da, kuota osoan kenkarirako eskubiderik gabe.

b) Jaulkipen-prima banatuz gero, kontzeptu horregatik jasotzen den zenbatekoa edozein dela ere, hori bazkidearen zerga-oinarrian sartuko da, kuota osoan kenkarirako eskubiderik gabe.

2.– Aurreko 1. paragrafoan xedatutakoa Batasuneko beste estatu batzuetan erregistratutako talde inbertsioko entitateei (kapital aldakorreko inbertsio-sozietateen baliokide direnei) aplikatuko zaie, inbertsiogile talde murritzak direla eta dituzten mugak gorabehera, beraien akzioak eskuratzen, lagatzen edo erreskatatzen direnean. Europako Parlamentuaren eta Kontseiluaren 2009ko uztailaren 13ko 2009/65/CE Zuzentarauak (higigarrien baloreetako talde inbertsioko entitate batzuei buruzko lege, arau eta administrazio-xedapenak koordinatu dituenak) araututako sozietateei kasu guztietan aplikatuko zaie.

Hamargarrena.– Higiezinen errentamendua ustiapen ekonomikotzat hartzea.

Foru-arau honetan xedatutakoa dela eta, ondasun higiezinak alokatzea ustiapen ekonomikotzat hartuko da Pertsona Fisikoen Errentaren gaineko Zergari buruzko Foru Arauko 24. artikuluko 3. idatz-zatian ezarritako inguruabarrak gertatzen direnean, foru-arau honetan horretarako beste baldintza batzuk ezartzen diren kasuetan izan ezik.

Hamaikagarrena.– Enpresa emakidadunek azpiegiturak eraikitzeko edo eskuratzeko egindako inbertsioak.

Foru-arau honetan xedatzen denari dagokionez, enpresa emakidadunak emakida-erabakiari lotutako zerbitzu publiko bat emateko azpiegiturak eraikitzeko edo eskuratzeko egiten dituen inbertsioak haien izaeraren arabera dagokien aktibo ez korrontetzat hartuko dira, baina azpiegitura horiek ibilgetu ukiezin edo finantza-aktibo gisa kontabilizatuta egon behar dute abenduaren 23ko EHA/3362/2010 Agindua indarrean jarri zenetik. Agindu horrek, hain zuzen ere, Kontabilitate Plan Orokorra azpiegitura publikoen enpresa emakidadunetara egokitzeko arauak onartu ziren.

Hamabigarrena.– Zergadunei aplikatu beharreko kontabilitate-planaren aldaketa.

1.– Xedapen gehigarri honetan xedatutakoa doikuntza hauetan aplikatuko da: kontrapartidatzat azaroaren 16ko 1514/2007 Errege Dekretuaren xedapen gehigarri bakarrean eta azaroaren 16ko 1515/2007 Errege Dekretuaren lehenengo eta bigarren xedapen gehigarrietan ezarritakoaren arabera Kontabilitateko Plan Orokorraren eta Enpresa Txiki eta Ertainen Kontabilitateko Plan Orokorra aplikazioaren eta mikroenpresentzako kontabilitateko irizpide zehatzak bertan behera uztearen ondoriozko erreserba-partida bat duten doikuntzetan.

2.– Azaroaren 16ko 1514/2007 Errege Dekretuaren bidez onetsitako Kontabilitate Plan Orokorraren edo azaroaren 16ko 1515/2007 Errege Dekretuak onetsitako Enpresa Txiki eta Ertainen Kontabilitateko Plan Orokorraren eta mikroenpresentzako kontabilitateko irizpide zehatzen lehenengo aplikazioaren ondorioz gastu edo sarreratzat, hurrenez hurren, hartzen diren erreserba partidetarako karguak eta ordainketak kontabilitateko plan berria aplikatzen den lehenengo zergaldiko zerga-oinarrian sartuko dira, xedapen gehigarri honetako aurreko idatz-zatian aipatutako kasuetan, foru-arau honetan ezarritakoarekin bat etorriz.

Ondorio horietarako, gastuak eta diru-sarrerak izango dira, hurrenez hurren, ondare garbian gertatzen diren gutxipen eta gehikuntzak, Komertzio Kodearen 36. artikuluko 2. idatz-zatian deskribatuak. Beraz, ondare propioko tresnei dagokien partidaren baja ez da gastutzat joko.

3.– Aurreko idatz-zatian aipatutako erreserba-ordainketek eta karguek ez dute zerga ondoriorik izango, baldin eta gastu edo sarrerekin zerikusia badute, data hori baino lehen hasitako zergaldietan indarrean dauden kontabilitateko arau eta printzipioekin bat etorriz. Horretarako ezinbestekoa izango da zergaldi horietako zerga-oinarrian integratu izana.

Erreserba kontuetako ordainketa eta kargu horiek gastuak edo sarrerak sortzapenaren ondorioz berriro kontabilizatzen diren zergaldiko zerga-oinarrian sartu behar dira, azaroaren 16ko 1514/2007 Errege Dekretuak onetsitako Kontabilitate Plan Orokorrean edo azaroaren 16ko 1515/2007 Errege Dekretuak onetsitako Enpresa Txiki eta Ertainen Kontabilitateko Plan Orokorrean eta mikroenpresentzako kontabilitateko irizpide zehatzetan ezarritako kontabilitate irizpideekin bat etorriz (kasuan kasukoa planaren aldaketaren ondoren).

Aitzitik, aktiboaren ondare-elementuen balio galeraren ondorioz zuzentzen diren gastuekin zerikusia duten erreserba-kontuak ordaintzen direnean, erreserba-kontuetarako ordainketak ondare-elementu horien eskualdaketa egiten den edo narriatzen direlako galtzen diren zergaldiko zerga-oinarrian integratuko dira.

Aurreko paragrafoan aipatutako erreserba konturako ordainketaren zenbatekoa foru-arau honetako 24. artikuluan ezarritakoarekin bat badator, bi kasu hauetan soilik sartu behar da zerga-oinarrian: aktiboa eskualdatuz gero; narriaduraren ondoriozko galeraren eragilea artikulu horretako 1. idatz-zatian aipatutako diferentzia izanez gero.

4.– Aurreko idatz-zatian aipatzen diren kasuetan zergapekoak Ogasun eta Finantza Saileko diputatuak foru-aginduz ezartzen dituen betebehar formalak bete behar ditu. Hain zuzen ere, zergaldi bakoitzean aurreko idatz-zatian ezarritakoa aplikatu zaien karguen eta erreserba-konturako ordainketen berri eman behar du eta zergaldi horretako zerga-oinarrietan integratutako diru kopuruak eta hurrengo zergaldietan sartzeko utzitakoak azaldu behar ditu.

5.– Aurreko bi idatz-zatietan xedatutakoaren aplikazioak salbuespen bat dauka: zergapekoak xedapen gehigarri honetako 2. idatz-zatian aipatzen den erreserba kontuetarako ordainketen eta karguen saldo garbia, positiboa zein negatiboa, zerga-oinarrian sartzea hautatzen badu, ez da aplikatuko.

6.– Xedapen gehigarri honetan ezarritakoa entitatea Kontabilitateko Plan Orokorraren moldaketa sektorial baten menpera pasatzen denean ere aplikatu behar da.

Hamahirugarrena.– Higiezinen merkatuko inbertsioetako sozietate anonimo kotizatuetako bazkideen zerga-tratamendua.

1.– Higiezinen Merkatuko Inbertsioetako Sozietate Anonimo Kotizatuei buruzko urriaren 26ko 11/2009 Legean ezarritako zerga-araubide berezia aplikatu zaien mozkinen edo erreserben kargura banatutako dibidenduei zerga-tratamendu hau aplikatuko zaie:

a) Hartzailea zerga honen zergaduna bada edo Ez-egoiliarren Errentaren gaineko Zergarena (establezimendu iraunkorrarekin), ezin da aplikatu foru-arau honetako 33. artikuluan errentak zerga-oinarrian ez integratzeaz ezarritakoa.

b) Hartzailea Pertsona Fisikoen Errentaren gaineko Zergaren zergaduna bada, ezin da aplikatu Pertsona Fisikoen Errentaren gaineko Zergari buruzko Foru Arauko 9. artikuluko 24. zenbakian araututako salbuespena.

c) Hartzailea Ez-egoiliarren Errentaren gaineko Zergaren zergaduna bada (establezimendu iraunkorrik gabe), ezin da aplikatu Ez-egoiliarren Errentaren gaineko Zergari buruzko Foru Arauko 13. artikuluko 1. idatz-zatiko l) letran araututako salbuespena.

2.– Higiezinen Merkatuko Inbertsioetako Sozietate Anonimo Kotizatuei buruzko urriaren 26ko 11/2009 Legean ezarritako zerga-araubide berezia aplikatzea hautatu duten sozietateen kapitalaren partaidetzak eskualdatuta edo ordainduta lortzen diren errentak honela kargatuko dira:

a) Eskualdatzailea edo hartzailea zerga honen zergaduna bada edo Ez-egoiliarren Errentaren gaineko Zergarena (establezimendu iraunkorrarekin), foru-arau honetako 34. artikuluan errentak zerga-oinarrian ez integratzeaz ezarritakoa ezin zaio aplikatu lege horretako zerga-araubide berezia aplikatu zaien mozkinen erreserbei dagokien errenta zatiari.

b) Eskualdatzailea edo hartzailea Pertsona Fisikoen Errentaren gaineko Zergaren zergaduna bada, ondarean gertatutako irabazia edo galera kalkulatzeko Pertsona Fisikoen Errentaren gaineko Zergari buruzko Foru Arauko 47. artikuluko 1. idatz-zatiko a) letran ezarritakoa aplikatu behar da.

c) Eskualdatzailea edo hartzailea Ez-egoiliarren Errentaren gaineko Zergaren zergaduna bada (establezimendu iraunkorrik gabe), ezin da aplikatu Ez-egoiliarren Errentaren gaineko Zergari buruzko Foru Arauko 13. artikuluko 1. idatz-zatiko l) letran araututako salbuespena.

3.– Entitatearen kapitalean gutxienez % 5eko partaidetza duten bazkideek gutxienez % 10eko karga jasaten duten dibidenduak edo partaidetzak jasotzen badituzte, horren berri eman behar diote entitateari jaso eta hurrengo egunetik hamar egun pasatu baino lehen. Horren berri eman ezean pentsatuko da dibidenduak edo mozkin-partaidetzak salbuetsita daudela edo % 10etik beherako karga-tasa jasan dutela.

Entitate ez-egoiliarrak diren bazkideek (entitate horiek zeintzuk diren Higiezinen Merkatuko Inbertsioetako Sozietate Anonimo Kotizatuak arautu dituen urriaren 26ko 11/2009 Legeko 2. artikuluko 1. idatz-zatiko b letran finkatu da) aurreko paragrafoan ezarritako epealdian frogatu behar dute akziodunen eta dibidendu-banaketarako akordioa egiten denean indarrean dagoen arautegiaren arabera haiek gutxienez % 10eko karga jasango dutela, bai entitatean, bai bazkideetan.

Hamalaugarrena.– Balore jakin batzuk dauzkaten entitateak.

1.– Xedapen gehigarri honetan ezarritakoa zergadun hauek aplika dezakete: sozietatearen xedetzat baliabide materialak eta giza baliabideak antolatuz Espainiako lurraldean egoitza ez duten entitateen funts propioen baloreak kudeatzea eta administratzea dutenek. Salbuespena: Zerga foru-arau honetako VI. tituluko III. kapituluan ezarritako araubide berezietako batean ordaintzen dutenek ezin dute aplikatu, eta foru-arau honetako 14. artikuluan ezarritakoaren arabera ondare-sozietate direnek ere ez.

Araubide hau aplikatu nahi duten zergadunek zerga-administrazioari eskatu behar diote; horretarako enpresa nazioartera zabaltzeko proiektua aurkeztu behar dute, hain zuzen ere enpresa atzerrian sustatzen duena edo jarduera edo merkatu berriei ekitea bultzatzen duena. Zerga-administrazioak baimena emanez gero, hura jaso ondoren amaitzen den lehen zergaldian eta hurrengo guztietan aplika dezakete, harik eta uko egitea erabaki eta zerga-administrazioa araudian ezarritakoarekin bat etorriz jakinarazi arte.

2.– Xedapen gehigarri honetan xedatutakoa aplikatzen duten entitateen kapitalaren partaidetzak eta baloreak izendunak izan behar dira.

3.– Diruzkoak ez diren ekarpenak, Espainiako lurraldean egoitza ez duten entitateen funts propioen baloreei dagozkienak, foru-arau honetako 111. artikuluan ezarritako araubidean egongo dira, ekarpenak baloreak dauzkan entitatearen kapitalean ematen duten partaidetzaren ehunekoa gorabehera, baldin eta balore horiek sortutako errentak foru-arau honetako 33. eta 34. artikuluetan ezarritako araubidean egon ahal badira.

4.– Egoitza Espainiako lurraldean ez duten entitateen mozkinen dibidenduak eta partaidetzak ez dira sartuko zerga-oinarrian, ez eta partaidetzak foru-arau honetako 33. eta 34. artikuluetan ezarritakoarekin bat etorriz eskualdatuta lortzen diren errenta positiboak ere.

Hala ere, entitateak idatz-zati honetan aipatzen diren errentak zerga-oinarrian sartzea hauta dezake kasu honetan: mozkin-partaidetza daukan edo partaidetza eskualdatu duen entitatearen egoitza Espainiako Erresumak nazioarteko zergapetze bikoitza saihesteko hitzarmena, hain zuzen ere informazioa trukatzeko klausula daukana eta entitate horri aplikatu behar zaiona, sinatuta daukan herrialde batean egotea; halakoetan foruarau honetako 60. artikuluan xedatutakoa aplika daiteke.

Aurreko paragrafoan xedatutakoren ondoreetarako, 60. artikuluko 3. idatz-zatian ezarritakoa aplikatzean Espainiako Erresumak nazioarteko zergapetze bikoitza saihesteko hitzarmena, hain zuzen ere informazioa trukatzeko klausula daukana eta errentei aplikatu behar zaiena, sinatuta daukan herrialdeetan lortutako errentak taldekatuko dira.

Idatz-zati honetan aipatzen diren errenten kontura banatzen diren mozkinak honela tratatuko dira:

a) Hartzailea zerga honen kargapeko entitatea bada, jasotako mozkinek foru-arau honetako 33. artikuluan xedatutakoa aplikatzeko eskubidea emango dute.

b) Hartzailea Pertsona Fisikoen Errentaren gaineko Zergaren zergaduna bada, banatutako mozkina errenta orokortzat hartuko da eta, Pertsona Fisikoen Errentaren gaineko Zergari buruzko Foru Arauko 91. artikuluan ezarritakoarekin bat etorriz, nazioarteko zergapetze bikoitzaren ziozko kenkaria aplikatu ahal izango zaie baloreak dauzkan entitateak atzerrian ordaindutako zergei, hain zuzen ere jasotako mozkinak ekarri dituzten errenta salbuetsiei dagozkienei.

c) Hartzailea Espainiako lurraldean egoitza ez duen entitatea edo pertsona fisikoa bada, banatutako mozkina ez da Espainiako lurraldean lortutako mozkintzat joko. Espainian kokatutako establezimendu iraunkorra bada, a) letran xedatutakoa ezarriko da. Jaulkipen-prima banatzeko, letra horretan mozkinak banatzeko ezarrita dagoen trataera aintzat hartuko da.

Hori dela eta, banatutako lehen mozkina idatz-zati honetan aipatzen diren errentei dagokiela pentsatuko da.

5.– Xedapen gehigarri honetan ezarritako aplikatzen duten entitateen partaidetzak eskualdatuta lortzen diren errentak eta bazkidea banatu edo entitatea likidatzeagatik lortutako errentak honela kargatuko dira:

a) Hartzailea zerga honen kargapeko entitatea bada, edo Espainian dagoen establezimendu iraunkorra, eta foru-arau honetako 33. artikuluko 1. idatz-zatiko a) letran ezarritakoa betetzen badu, hau da, atzerriko baloreak dauzkan entitate batean partaidetza badauka, foru-arau honetako 34. artikuluan xedatutakoa aplika dezake.

b) Hartzailea Espainiako lurraldean egoitza ez duen entitatea edo pertsona fisikoa bada, ez da hartuko Espainiako lurraldean lortutzat integratu gabeko errenten kontura zuzkitutako erreserbei dagozkien errentak (foru-arau honetako 33. eta 34. artikuluetan aipatzen dira), ez eta foru-arau honetako 33. artikuluko 1. idatz-zatian ezarritako baldintzak betetzen dituzten entitate ez-egoiliarren partaidetzei egotzi ahal zaizkien balio-diferentziei dagozkienak ere.

6.– Xedapen gehigarri honetan ezarritakoa aplikatzen duten entitateek zerga-oinarrian integratu gabeko errenten zenbatekoa aipatu behar dute memorian, eta errenta horiengatik atzerrian ordaindutako zergen zenbatekoa ere bai. Gainera aurreko idatz-zatietan ezarritakoa betetzeko behar den informazio guztia eman behar diete bazkideei.

7.– Xedapen gehigarri honetako 4. idatz zatiko c) letran eta 5. idatz zatiko b) letran ezarritakoa ez da aplikatuko errentaren hartzailea zerga-paradisutzat jotako herrialde edo lurralde bateko egoiliarra izanez gero.

8.– Xedapen gehigarri honetan ezarritakoa aplikatzen duten entitateek Sozietateen gaineko Zergaren karga berezia jasango dute zergaldi bakoitzean: xedapen honetako 1. idatz-zatian aipatzen diren entitate ez-egoiliarren kapitaletan zergaldiko azken egunean dauzkaten partaidetzan kontabilitateko balioaren % 0,5. Karga honi ezin zaio aplikatu kenkaririk, eta Ogasun eta Finantza Saileko foru-diputatuak ezartzen duen bezala ordaindu behar da Sozietateen gaineko Zergaren zergaldiko autolikidazioaren epealdi berean.

Idatz-zati honetako karga berezia ez da eskatuko kasu honetan: kuota efektiboari foru-arau honetako 68. artikuluko 1. idatz-zatian xedatutakoren ondorioz zerga-administrazioari ordaindu beharreko kopurua aurreko idatz-zatian xedatutakoaren araberako kopuru bera edo gehiago denean. Ordaindu beharreko kopurua hori baino gutxiago izanez gero, karga berezia diferentziari aplikatuko zaio.

9.– Xedapen gehigarri honetan ezarritakoa aplikatzen duten entitateek ezin dituzte aplikatu foru-arau honetako IV. tituluko V. kapituluan araututako emaitzaren aplikazioaren zuzenketak, ez eta V. tituluko III. kapituluan araututako kenkariak ere.

Hamabosgarrena.– Kultura sustatzeko pizgarriak.

1.– Espainiako film luzeetan edo fikziozko, animaziozko edo dokumental itxurako ikus-entzunezko serietan egiten diren inbertsioek, saldokako ekoizpen industrialaren aurretik euskarri fisikoa egitea ahalbidetzen badute, % 30eko kenkaria aplikatzeko eskubidea emango diote ekoizleari. Kenkariaren oinarrian ondoko kopuruak sartu behar dira: ekoizpenaren kostua, kopiak egiteko gastuak eta publizitateak eta promozioak eragiten dituzten gastuak, muga honekin, ekoizpen-kostuaren % 40.

Idatz-zati honetan aipatzen den kenkaria ekoizpena amaitzen den zergaldiaz gero aplikatuko da. Hala ere, ekoizpenak hamabi hilabete baino gehiago irauten badu eta entitatearen zergaldi bat baino gehiago ukitzen badu, entitateak kenkaria ordainketak egin ahala aplikatzea hautatu ahal izango du, ordainketen zenbatekoaren arabera, aplikazioa hasten denean indarrean dagoen kenkari-araubideari lotuta.

Hori hautatuz gero, irizpidea ekoizpenaldi osoan izango da aginduzko. Aukera honetaz baliatu nahi duen zergadunak Ogasun eta Finantza Sailari jakinarazi behar dio idatziz ekoizpena hasten denetik hilabete pasatu baino lehen. Jakinarazpenean ekoizpenaren zenbatekoa eta burutzapenaren egutegia azaldu behar dira.

Kenkaria ordainketak egin ahala aplikatzea hautatzen bada, aurreko bi paragrafoetan ezarri den bezala, eta azkenean ekoizpena burutzen ez bada, entitateak aplikatutako kenkariak direla eta ordaindu ez dituen kuotak ordaindu beharko ditu, berandutze-korrituak gehituta; kuoten eta korrituen zenbatekoa ekoizpena amaitu gabe uzten den zergaldiko autolikidazioko kuotari gehitu beharko zaio.

2.– Liburuen argitalpenean egiten diren inbertsioek saldokako ekoizpen industrialaren aurretik euskarri fisikoa egitea ahalbideratzen badute, kuota likidoaren % 5eko kenkaria aplikatu ahal izango da.

3.– Xedapen gehigarri honetan ezarritako kenkariei foruarau honetako 67. artikuluan ezarritako arauak aplikatuko zaizkie.

Hamaseigarrena.– Kooperatiben Zerga Araubideari buruzko maiatzaren 22ko 2/1997 Foru Arauaren aldarazpena.

1.– Kooperatiben Zerga Araubideari buruzko maiatzaren 22ko 2/1997 Foru Arauko 18. artikulua aldatu da eta honela geratu da:

«18. artikulua.– Gastu kenezinak.

Kooperatibako bazkideen artean beren soberakinen kontura banatutako kopuruak eta bazkideek kooperatibari lagatako gozameneko ondasun, zerbitzu, hornidura, bazkideen lan-prestazio eta ondasunen errenten emateei kontuetan esleitutako gehiegizko balioa (foru-arau honetako 15. artikuluan xedatutakoari jarraiki ezarritako merkatuko balioarekikoa) ez dira partida kengarritzat hartuko zerga-oinarria finkatzeko.

Gainera, ezin zaie aplikatu Sozietateen gaineko Zergari buruzko Foru Arauko IV. tituluko V. kapituluan xedatutakoa».

2.– Kooperatiben Zerga Araubideari buruzko maiatzaren 22ko 2/1997 Foru Arauko 19. artikulua aldatu da eta honela geratu da:

«19. artikulua.– Zergapetze bikoitza ezabatzea.

Kooperatiba babestuen eta babes berezia duten kooperatiben itzulkinen gaineko ezarpen bikoitza ezabatzeko foru arau honetako 25. artikuluan xedatutakoa aplikatuko da».

3.– Kooperatiben Zerga Araubideari buruzko maiatzaren 22ko 2/1997 Foru Arauko 25. artikulua aldatu da eta honela geratu da:

«25. artikulua.– Kooperatiben itzulkinen gaineko zergapetze bikoitza ezabatzea.

Sozietateen gaineko Zergaren zergadun diren babestutako kooperatibetako bazkideek Sozietateen gaineko Zergari buruzko Foru Arauko 33. artikuluko 1. idatz-zatian xedatutakoa aplikatu behar diete kooperatibaren itzulkinei, zergapetze bikoitza saihesteko. Kooperatiba babes berezikoa dela eta etekin horiei foru-arau honetako 27. artikuluko 2. idatz-zatian ezarritako kenkaria aplikatu bazaie, itzulkinei Sozietateen gaineko Zergari buruzko Foru Arauko 33. artikuluko 2. idatz-zatian xedatutakoa aplikatuko zaie.

Aurreko idatz-zatian xedatutakoa hala izanik ere, ez da aplikatuko artikulu honetan kooperatiba sozietateen zerga-oinarri berezian sartzen diren kooperatibaren itzulkinei buruz xedatzen dena».

4.– Kooperatiben Zerga Araubideari buruzko maiatzaren 22ko 2/1997 Foru Arauko 26. artikuluko 2. eta 3. zenbakiak aldatu dira eta honela geratu dira:

«2.– Sozietateen gaineko Zergan, zerga-oinarriari % 20ko karga-tasa aplikatuko zaio.

Hala ere, Sozietateen gaineko Zergari buruzko Foru Arauan mikroenpresatzat edo enpresa txikitzat hartzeko ezarritakoa betetzen duten kooperatibei zerga horren ordainketan % 18 karga-tasa aplikatuko zaie.

Babestutako kooperatibei Sozietateen gaineko Zergari buruzko Foru Arauko 59. artikuluko 3. idatz-zatian xedatutakoa aplikatuko zaie; beraien kuota efektiboa ezin da izan zerga-oinarriaren % 9 baino gutxiago, oro har, edo zerga-oinarriaren % 8 baino gutxiago, kooperatibak aurreko paragrafoan aipatutako karga-tasa jasaten badu.

Kooperatibak aurreko ekitaldiko plantillako lan-kontratudunen batez besteko kopurua mantentzen badu edo gehitzen badu, aurreko paragrafoko ehunekoak barik ondoko hauek aplikatuko dira, hurrenez hurren: % 7 eta % 6.

3.– Halaber, Sozietateen gaineko Zergan amortizazio-askatasuna izango dute aktibo finko amortizagarri berriko elementuek, hain zuzen ere kooperatiben erregistro egokian inskribatu direnetik hiru urteko epealdian eskuratu badira.

Ekitaldi bakoitzean, gutxienez gutxieneko amortizazio normala aplikatu ondoren, amortizatzeko askatasuna dela eta zerga-ordainketan ezin da kendu kopuru hau baino gehiago: emaitzen kontuko saldoaren eta Nahitaezko Erreserba Funtsera nahitaez egin beharreko aplikazioen eta soldatapeko langileen partaidetzen arteko diferentzia.

Elementu berberetarako, onura hau bateragarria da Sozietateen gaineko Zergari buruzko Foru Arauko V. tituluko III. kapituluan ezarritako inbertsioen ziozko kenkariekin».

5.– Kooperatiben Zerga Araubideari buruzko maiatzaren 22ko 2/1997 Foru Arauko 27. artikuluko 2. zenbakia aldatu da eta honela geratu da:

«2.– Sozietateen gaineko Zergaren ordainketan kuota likidoaren % 50eko kenkaria aplika dezakete.

Nekazaritzako Ustiategiak Berriztatzeari buruzko uztailaren 4ko 19/1995 Legeko 5. artikuluak lehentasunezko elkarte-ustiategiak aipatzen ditu; bada, ustiategi horiek babes bereziko nekazaritzako kooperatibak badira foru-arau honetan ezarritakoaren arabera, kuota likidoaren kenkaria % 75 izango da.

Era berean, foru-arau honetako 26. artikuluko 2. idatz-zatiko hirugarren eta laugarren paragrafoetan ezarritako ehunekoak honela zuzenduko dira: zenbaki honetan ezarritako kenkari-ehunekoetatik eratorritako proportzioak aplikatuta».

6.– Kooperatiben Zerga Araubideari buruzko maiatzaren 22ko 2/1997 Foru Arauko 28. artikuluko 3. idatz-zatia aldatu da eta honela geratu da:

«Hiru. Elkartutako kooperatibak babestuak edo babes berezikoak badira, aurreko 26. artikuluan ezarritako zerga-onurez gainera foru arau honetako 27. artikuluko 2. zenbakian ezarritako kenkaria ere aplikatu ahal izango dute; kenkari hori babes bereziko kooperatibekin egindako eragiketen ondoriozko emaitzei dagokien kuota likidoari soilik aplikatuko zaio».

7.– Kooperatiben Zerga Araubideari buruzko maiatzaren 22ko 2/1997 Foru Arauko 34. artikuluko 1. eta 2. idatz-zatiak aldatu dira eta honela geratu dira:

«1.– Estatutuetako arauak direla eta enpresa-jardueretan lotura-harremanak dituzten sozietate kooperatiboen taldeek Sozietateen gaineko Zergari buruzko Foru Arauko VI. tituluko VI. kapituluko zerga-baterakuntzaren araubidea aplikatzea hauta dezakete. Hautatuz gero, foru arau honetan xedatutakoaren kontra ez datorren guztia aplikatuko da.

2.– Zerga-baterakuntzaren araubidea dela eta, hauxe da sozietate kooperatiben taldea: taldearen buru den entitateak eta haren bazkide diren kooperatibek osatutako multzoa; taldeburuak estatutuetan araututako erabaki-ahalmenak erabiltzen ditu.

Sozietate kooperatiboen taldeko burua sozietate kooperatiboa zein beste era bateko entitatea izan daiteke; beste era batekoa bada, ezinbestekoa da beraren helburu bakarrak taldeko kooperatiben enpresa-garapena eta epe luzerako estrategiak planifikatzea eta koordinatzea izatea. Kooperatibek soilik eduki dezakete partaidetza».

8.– Kooperatiben Zerga Araubideari buruzko maiatzaren 22ko 2/1997 Foru Arauko 37. artikulua aldatu da eta honela geratu da:

«37. artikulua.– Sozietate kooperatiben taldea: kuotan aplika daitezkeen kenkariak eta zergapetze bikoitza ezabatzea.

1.– Sozietate kooperatiboen taldeen kuota osoari eta kuota likidoari foru-arau honetan eta haien araubide orokorrean ezarritako kenkariak aplikatu ahal zaizkie.

Kenkari horiek aplikatzeko ezarritako baldintzak sozietate kooperatiboen taldeari dagozkio.

2.– Sozietate kooperatiba batek talde batean sartzean aplikatzeko dauzkan kenkariak taldearen kuota osoan edo kuota likidoan aplika daitezke, kasuan kasukoa, banakako araubidean sozietateak edukiko zuen muga berarekin.

3.– Zergapetze bikoitza ezabatzeko foru-arau honetan ezarritako espezialitateak hartuko dira kontuan».

9.– Kooperatiben Zerga Araubideari buruzko maiatzaren 22ko 2/1997 Foru Arauko bigarren xedapen gehigarria aldatu da eta honela geratu da:

«Bigarren xedapen gehigarria.– Lan elkartuko kooperatibak.

Zerga-babesa duen lan elkartuko kooperatiba bateko bazkideen % 50 gutxienez elbarriak badira eta frogatzen badu eratu zenean bazkide horiek langabezian zeudela, kooperatibak jasaten duen Sozietateen gaineko Zergaren kargari % 90eko murrizketa aplikatuko zaio sozietate-jardueraren lehenengo bost urteetan, bazkide horien ehunekoa aldatu ezean».

Hamazazpigarrena.– Hiri Lurren Balioaren Gehikuntzaren gaineko Zergaren araubidea eragiketa jakin batzuetan.

Hiri Lurren Balioaren Gehikuntzaren gaineko Zergak ez ditu kargatuko foru-arau honetako VI. tituluko VII. kapituluan araututako araubide berezia aplikatu ahal zaien eragiketen ondoriozko hiri lurren eskualdaketak. Salbuespena: foru-arau horretako 111. artikuluan ezarritakoaren babesean ekartzen diren lurren eskualdaketak, jarduera-adar batean sartuta ez badaude.

Gero lur horiek eskualdatzen direnean, pentsatuko da balioaren gehikuntza gertatu den urteetan ez dela etenik izan foru-arau horretako VII. tituluko VII. kapituluan ezarritako eragiketen ondoriozko eskualdaketaren eraginez.

Hemezortzigarrena.– Esne-kuota saltzearen ondorioz lortutako errentak.

Euskal Autonomia Erkidegoko administrazioaren organo eskudunak baimendutako behi esnearen erreferentziazko kopuruen transferentziak direla-eta agerian jartzen diren errenta positiboak ez dira Sozietateen gaineko Zergaren zerga-oinarrian sartuko.

XEDAPEN IRAGANKORRAK

Lehenengoa.– Kontabilitatez kanpoko doikuntzak.

Foru-arau hau indarrean sartu orduko zergaldiei dagozkien Sozietateen gaineko Zergako zerga-oinarriak zehazteko egindako kontabilitatezko doikuntzak, positiboak eta negatiboak, kontutan hartuko dira arau hori ezarri behar duten zergaldiei dagozkien zerga-oinarriak zehazteko asmoz, horiek araupetu zituzten arauetan ezarritakoaren arabera.

Inoiz ez da onargarria izango errenta bera kontutan hartua ez izatea edota birritan kontutan hartua izatea, Sozietateen gaineko Zergako zerga-oinarria zehazteko.

Bigarrena.– Aparteko mozkinen berrinbertsioa.

Sozietateen gaineko Zergari buruzko uztailaren 4ko 7/1996 Foru Arauko 22. artikuluan ezarritako aparteko mozkinen berrinbertsioaren araubideari heldutako errentetan arau horretan eta bera garatzen duten arauetan ezarritakoa izango da aginduzko. Errenta horiei ezin aplikatu izango zaizkie erregulazio horretan ezarritako beste zerga-onurak, nahiz eta berrinbertsioa eta gainerako betekizun guztiak foru-arau hau indarrean jarri ondoren hasitako zergaldi batean gertatu.

Gainera, Foru Arauko 22. artikuluan zerga-onura finkatzeko ezarritako betekizun guztiak betetzen ez badira, errentei foru-arau honetako 36. artikuluko 4. eta 5. artikuluetan xedatutakoa aplikatuko zaie.

Hirugarrena.– Foru-arau hau indarrean jarri aurretik eskuratutako baloreen finantza-merkataritzako funtsa.

Foru-arau honetako 24. artikuluan aipatzen diren kasuetan, baldin eta baloreak araua indarrean jarri baino lehen hasitako zergaldi batean eskuratu badira, zergadunak bertan ezarritakoa aplikatu ahal izango du, eta aplikatu ere baloreen jatorrizko eskuraketa-balioari (artikulu horretan aipatzen den diferentzia).

Manu horretan xedatutakoarekin bat etorriz aplikatutako kenkarien, Sozietateen gaineko Zergari buruzko uztailaren 4ko 7/1996 Foru Arauko 12. artikuluko 8. idatz-zatian 2008ko urtarrilaren 1az gero hasitako zergaldietarako ezarritakoaren arabera aplikatutako kenkarien eta bertan araututako diferentziaren balio-galeraren ondoriozko balio-zuzenketen batura ezin da izan diferentzia eragin duen jatorrizko zenbatekoa baino gehiago.

Espainiako lurraldean egoitza ez duten entitateen baloreen kasuan, aurreko paragrafoan ezarritakoa aplikatzeko ondoko hauek ere kontuan eduki behar dira: Sozietateen gaineko Zergari buruzko uztailaren 4ko 7/1996 Foru Arauko 12. artikuluko 8. idatz-zatian (2008ko urtarrilaren 1a baino lehen hasitako ekitaldietarako indarrean egon den testua) ezarritakoarekin bat etorriz kendutako kopuruak.

Xedapen iragankor honetan araututako kasuetan foru-arau honetako 24. artikuluko 5. eta 6. idatz-zatietan xedatutakoa aplikatuko da.

Laugarrena.– Foru-arau hau indarrean jarri aurretik eskuratutako edo agerian jarritako ukiezinak.

1.– Foru-arau honetako 25. artikuluan aipatzen diren aktibo ukiezinak foru-araua indarrean jarri baino lehen hasitako zergaldi batean eskuratu badira, zergadunak bertan ezarritakoa aplikatu ahal izango dio aktiboen jatorrizko eskuraketa-balioari.

Manu horretan xedatutakoarekin bat etorriz aplikatutako kenkarien, Sozietateen gaineko Zergari buruzko uztailaren 4ko 7/1996 Foru Arauko 12. artikuluko 9. edo 10. idatz-zatian 2008ko urtarrilaren 1az gero hasitako zergaldietarako ezarritakoaren arabera aplikatutako kenkarien eta foru-arau honetako 25. artikuluan aipatzen diren ukiezinen balio-zuzenketen batura ezin da izan ukiezinen jatorrizko eskuraketa-balioa baino gehiago.

2.– Foru-arau honetako VI. tituluko VII. kapituluan ezarritako araubide berezian dauden eragiketei foru-arau honetako 107. artikuluko 3. idatz-zatian xedatutakoa aplikatuko zaie, bertan ezarritako baldintzak betez gero, xedapen iragankor honetako aurreko idatz-zatian xedatutakoarekin bat etorriz.

3.– Xedapen iragankor honetan araututako kasuetan foru-arau honetako 25. artikuluko 4. eta 5. idatz-zatietan xedatutakoa aplikatuko da.

Bosgarrena.– Foru-arau hau indarrean jarri aurreko zerga-oinarri negatiboak.

Foru-arau hau aplikatzen den lehenengo zergaldiaren hasieran konpentsatu gabe dauden aurreko zerga-oinarri negatiboak hurrengo zergaldietako zerga-oinarri positiboekin konpentsatu ahal izango dira 55. artikuluan xedatutakoarekin bat etorriz.

Seigarrena.– Aplikatzeko dauden kenkariak.

1.– Foru-arau hau indarrean jarri aurreko ekitaldietan sortutako kenkarietatik eta bestelako zerga-onuretatik aplikatzeko dauden kopuruak kasuan kasuko arautegian ezarritakoaren arabera aplikatuko dira, eta den-denetan foru-arau honetako 67. artikuluan xedatutakoa hartu behar da kontuan.

2.– Aurreko idatz-zatian xedatutakoa gorabehera, 2007ko urtarrilaren 1a baino lehen hasitako zergaldietan sortutako kenkarietatik eta bestelako zerga-onuretatik aplikatu gabe dauden zenbatekoak (zergapetze bikoitzaren ziozko kenkariak ez beste guztiak) kasuan kasuko arautegian ezarritakoarekin bat etorriz aplikatuko dira; horretarako Sozietateen gaineko Zergari buruzko uztailaren 4ko 7/1996 Foru Arauko 46. artikuluan zergaldi horietarako ezarritako baldintzak bete behar dira, kuota urritasunagatik kendu ez diren kopuruak aplikatzeko epealdia izan ezik, kasu guztietan hamabost urtekoa izango da eta.

Zazpigarrena.– Finantza-eragiketen gaineko mozkinen araubide iragankorra.

Berariazko legeriaren eta abenduaren 27ko 61/1978 Legeko hirugarren xedapen iragankorreko 2. idatz-zatian eta hura garatu duten arauetan ezarritakoaren arabera finantzaketako eta birfinantzaketako eragiketetarako 1979ko urtarrilaren 1ean zerga honetako onurak onartutako eduki dituzten bidesaridun autopisten emakida duten sozietateek eskubide horri eutsiko diote oraingo baldintza eurekin. Gainera, 1996ko urtarrilaren 1ean Sozietateen gaineko Zergari buruzko abenduaren 27ko 61/1978 Legeko 25.c) artikuluan eta Sozietateen gaineko Zergaren kuoten hobariei buruzko maiatzaren 29ko 5/1980 Errege Lege-Dekretuko 1. artikuluan araututako hobaria (Ekonomia eta Ogasun Ministerioak hartutako erabaki baten ondorioz toki korporazioek, autonomia erkidegoek eta Estatuak zenbait mailegu edo jesapenengatik ordaindu beharreko korrituei aplikatzen zaien hobaria) eduki duten zergadunek kasuan kasuko arauetan ezarritakoarekin bat etorriz aplikatzen jarraituko dute.

Zortzigarrena.– Zerga-paradisutzat jotzen diren herrialdeetan eta lurraldeetan eratutako talde inbertsioko entitateen mozkinak.

Foru-arau honetako 81. artikuluan apatzen diren talde inbertsioko entitateek banatzen dituzten dibidendu eta mozkin-partaidetzetatik 1999ko urtarrilaren 1a baino lehen lortutako mozkinei dagozkienak taldeko bazkideen edo partaideen zerga-oinarrian sartuko dira.

Horretarako, banatutako lehenengo salbuespenak irabazitako lehenengo mozkinekin zuzkituak izan direla ulertuko da.

Bederatzigarrena.– Partaidetza-kontuetako dibidenduen zergapetze bikoitza ezabatzea.

Sozietateen gaineko Zergari buruzko abenduaren 27ko 27ko 61/1978 Legeko 14.b) artikuluan edo Pertsona Fisikoen Errentaren gaineko Zergari buruzko abenduaren 27ko 13/1991 Foru Arauko 37.1 artikuluan ezarritakoarekin bat etorriz partaide kudeatzailearen zerga-oinarrian sartu diren kudeatzailea ez den partaideari dagozkion partaidetza-kontuen emaitzek foru-arau honetako 33. artikuluan ezarritakoa aplikatzeko eskubidea ematen dute.

Hamargarrena.– Enpresen kapitalizazioa sustatzeko konpentsazioa.

Foru-arau hau aplikatzen den lehen bi zergaldietan, 51. artikuluko 1. idatz-zatian xedatutakoa aplikatzeko aurreko bi ekitaldietako batez bestekotzat hauxe hartuko da: entitateak foru-arau hau indarrean jarri aurretik itxitako azken balantzearen ondoriozko ondare garbiaren zenbatekoa, aurreko ekitaldikoa baino gutxiago izan ezean (hala bada, horixe hartuko da aintzat).

Hamaikagarrena.– Aparteko mozkinen berrinbertsioa zerga-taldeetan.

Foru-arau honetako 93. artikuluko 2. idatz-zatiko bigarren paragrafoan xedatutakoa foru-arau hau indarrean jarriz gero eskualdatutako ondare-elementuei baino ez zaie aplikatuko.

Hamabigarrena.– Enpresak sustatzeko sozietateak.

Enpresak sustatzeko sozietateei dagokienez, Zerga-alorreko zenbait aldaketa onartzen dituen abenduaren 27ko 13/2012 Foru Arauak ezartzen duena mantentzen da, hau da, araudi hori desagertzen dela, jasotzen dituen xedapen iragankorrak ezarriz.

Hamahirugarrena.– Atzerriko baloreak dauzkaten entitateak.

1.– Sozietateen gaineko Zergari buruzko uztailaren 4ko 7/1996 Foru Arauko VIII. tituluko XV. kapituluan ezarritako araubide berezia aplikatzea hautatzen duten zergadunek foru-arau hau indarrean jarritakoan hamalaugarren xedapen gehigarrian ezarritakoarekin bat etorriz ordainduko dute Zerga, foru-arau hau aplikatzen den lehenengo zergaldiko lehenengo hiru hiletan berariaz uko egin eta hurrengo hilabeteko epealdian zerga-administrazioari jakinarazi ezean.

2.– Aurreko idatz-zatian aipatzen diren zergadunek foru-arau honetako hamalaugarren xedapen gehigarrian xedatutakoa aplikatu ahal izango dute foru-arau hau indarrean egin jarri eta ondoko jarraiko bost urteetan amaitzen diren zergaldietan.

Aldi hori amaitutakoan aurrean aipatutako xedapen gehigarrian ezarritako araubidea aplikatzen jarraitu nahi duenak baimen-eskaera aurkeztu beharko du; horretarako arauak xedapen gehigarri horretako 1. idatz-zatian ezarri dira.

3.– Xedapen iragankor honetan ezarritakoa aplikatu behar zaien zergadunei ez zaie aplikatuko foru-arau honetako hamalaugarren xedapen gehigarriko 8. idatz-zatian xedatutakoa.

Hamalaugarrena.– Ustezko errenten egozketa.

Foru-arau honetako 123. artikuluko 6. idatz-zatian araututako errenta-egozketari dagokionez, errentak bertan ezarritakoaren arabera bidezkoa den zergaldiari egotziko zaizkio beti, kasu honetan izan ezik: 2013ko urtarrilaren 1a baino lehen hasitako zergaldi bati egotzi behar izanez gero, harrezkero hasitako lehenengo zergaldiari egotzi behar zaizkio.

Hamabosgarrena.– Eguneratzen diren ondasunen gaineko zerga-ondoreak.

1.– Balantzeak eguneratzeari buruzko abenduaren 5eko 1/2013 Foru Dekretu Arauan xedatutakoaren itzalpean egiten diren eguneratze-eragiketen ondoriozko balio-gehikuntza garbiak 2015eko urtarrilaren 1etik aurrera hasten den lehenengo zergalditik aurrera amortizatuko dira ondare-elementuaren bizitza erabilgarrian; amortizazio horiek foru-arau honetako 17. artikuluko 5. idatz-zatian berriztapen, zabalkuntza eta hobekuntzetarako ezarri den bezala egin behar dira.

2.– Ondare-elementuak eskualdatzen direnean edo narriaduraren ondorioz gertatzen diren galeren zenbatekoa Balantzeak Eguneratzeari buruzko abenduaren 5eko 1/2013 Foru Dekretu Arauan xedatutakoaren itzalpean eguneratu behar da eta kopuru horretatik hauxe kendu behar da zerga-oinarria sartu beharrekoa kalkulatzeko: elementu horiei dagokien errebalorizazio-erreserbarako kontuko saldoa (abenduaren 5eko 1/2013 Foru Dekretu Araua).

3.– Foru-arau honetako 40. artikuluko 9. idatz-zatian xedatutakoa dela eta, ondoko kasuetan pentsatuko da zergadunak ezin izan diola heldu balio-eguneratzeari Balantzeak Eguneratzeari buruzko otsailaren 5eko 1/2013 Foru Dekretu Arauan xedatutakoaren itzalpean:

a) Ondare-elementuak aurrezki kutxen ongintzari eta gizarte-ekintzari atxikita daudenean.

b) Entitatea 2012ko abenduaren 31tik aurrera amaitzen den lehen zergaldian Sozietateen gaineko Zergari buruzko uztailaren 4ko 7/1996 Foru Arauko VIII. tituluko VIII. kapituluan ezarritako ondare-sozietateen araubide berezian dagoenean.

c) Ondare-elementuak kooperatiba-sozietate baten hezkuntza eta sustapen funtsari atxikita daudenean.

d) Ondare-elementuak irabazteko asmorik gabeko entitate baten xedea edo helburu zehatza den jarduerari atxikita daudenean (entitate horiek Sozietateen gaineko Zergari buruzko uztailaren 4ko 7/1996 Foru Arauko 117. artikuluan aipatzen dira).

e) Ondare-elementuak irabazteko asmorik gabeko entitateen zerga araubideari eta mezenasgorako zerga pizgarriei buruzko apirilaren 7ko 3/2004 Foru Arauan ezarritako araubide berezia aplikatzen zaion entitate baten xedea edo helburu zehatza den jarduerari atxikita daudenean.

Ondore horietarako beraietarako, jardueraren erregistro-liburuak arteztu behar dituen Pertsona Fisikoen Errentaren gaineko Zergaren zergadun den pertsona fisiko bati balioak eguneratzeko baimena emanez gero, pentsatu behar da eragiketan ez direla sartzen 2012ko ekitaldian jardueraren etekin garbia zuzeneko zenbatespenaren modalitate erraztuaren bidez kalkulatzeko kontuan hartutakoak.

Hamaseigarrena.– Mikroenpresen baterako amortizazioa.

Foru-arau honetako 21. artikuluko 3. idatz-zatian xedatutakoari heldutako mikroenpresa batzuek aurretik amortizatzeko askatasuna aplikatu badute (foru-arau honetako 21. artikuluko 1. idatz-zatian eta Sozietateen gaineko Zergari buruzko uztailaren 4ko 7/1996 Foru Arauaren 11. artikuluko 4. idatz-zatian eta 50. artikuluan araututa dago), ondare-elementu jakin batzuei soilik aplikatu ahal izango diete baterako amortizazioa: amortizazio askeari heldu ez dioten ondare-elementuei. Gainerakoei amortizatzeko askatasunari buruzko arauak aplikatuko zaizkie.

Hamazazpigarrena.– Aitorpen bateratuaren araubidea.

Sozietateen gaineko Zergari buruzko uztailaren 4ko 7/1996 Foru Arauak ondorioak sortzerakoan araubide bateratua erabiltzen duten sozietate-taldeek araubide horrekin jarraituko dute, eta foru-arau honek VI. tituluko VI. kapituluan ezarritako arauak aplikatuko zaizkie.

Hemezortzigarrena.– 2009 eta 2010ean eskuratutako ibilgetuko elementu berrientzako amortizazio-askatasuna.

2009 eta 2010ean eskuratutako ibilgetuko elementu berrientzako amortizazioaskatasuna, zeina foru-arau honetako 11. artikuluko 4. idatz-zatiko i) letrak jasotzen duen 2013ko abenduaren 31n indarrean dagoen testuan, aplikatu egingo da.

Hemeretzigarrena.– Ibilgailu jakin batzuen eskualdaketa.

Foru-arau honetako 31. artikuluak 3. idatz-zatian aipatzen dituen ibilgailuak eskualdatzetik eratorritako errentak kalkulatzeko, 2013ko urtarrilaren 1a baino lehen eskuratutakoen kasuan, artikulu horrek dioena ezarriko da, baina berezitasun hauekin:

– Esandako 3. idatz-zati horren bigarren paragrafoko a.a’) letrak aipatzen dituen kopuru kengarriak kalkulatzeko, eginiko amortizazioek kenkaria izan dutela joko da, baita aurreko paragrafoan aipatutako ondorio-dataren aurreko amortizazioen kasuan ere.

– Aurreko paragrafoan aurreikusitakoa aplikagarri izango da halaber 3. idatz-zati horren bigarren paragrafoko b.a’) letran aipatzen diren kopuru kengarriak kalkulatzeko.

– Foru-arau honetako 40.9 artikuluak aipatzen duen moneta-zuzenketa kalkulatzeko, ibilgailu horien eskualdaketen kasuan, ibilgailuaren erosketa-prezioa edo produkzio-kostua hartuko da aintzat, eta eginiko amortizazioek kenkaria izan dutela joko da. Horrela kalkulatutako moneta-zuzenketaren zenbatekoa ezin izango da handiagoa izan eskualdaketa harengatik lortutako irabazia baino.

XEDAPEN INDARGABETZAILEA.- Araudia indargabetzea.

1.– Foru-arau hau indarrean jarritakoan indargabetuta geratuko dira bertan xedatutakoarekin bat ez datozen maila bereko edo beheragoko mailako xedapen guztiak.

2.– Hain zuzen ere, ondoko hauek indargabetuko dira:

a) Sozietateen gaineko Zergari buruzko uztailaren 4ko 7/1996 Foru Araua, hamalaugarren xedapen gehigarria izan ezik eta xedapen iragankor hauek izan ezik: bigarrena, hogeita zazpigarrena, hogeita zortzigarrena, hogeita bederatzigarrena eta hogeita hamahirugarrena (xedapen horiek ondoreak sortzen segituko dute aplikatu behar diren kasuetan).

b) 7/1988 Foru Araua, uztailaren 15ekoa, Gizarte Aurreikuspeneko Entitateen Zerga Araubideari buruzkoa, lehenengo eta bigarren xedapen iragankorrak izan ezik.

c) Kooperatiben Zerga Araubideari buruzko maiatzaren 22ko 2/1997 Foru Arauko 33. artikuluko 1. zenbakia.

d) Gipuzkoako Lurralde Historikoko Zergei buruzko martxoaren 8ko 2/2005 Foru Arau Orokorreko hamabigarren xedapen gehigarria.

3.– Xedapen honetako aurreko idatz-zatietan ezarritakoa eragotzi gabe, ondokoak indarrean egongo dira orain arte bezala:

a) Kooperatiben Zerga Araubideari buruzko maiatzaren 22ko 2/1997 Foru Araua, foru-arau honek egindako aldaketekin.

b) 3/2004 Foru Araua, apirilaren 7koa, irabazteko asmorik gabeko entitateen eta mezenasgorako zerga-pizgarrien zerga-araubideari buruzkoa.

c) Otsailaren 18ko 19/1992 Foru Dekretuko bigarren xedapen gehigarriko 1. idatz-zatia. Foru Dekretu horren xedea da Gipuzkoako zerga-araudia egokitzea, alde batetik, Estatuko 1992rako Aurrekontu Orokorrei buruzko abenduaren 30eko 31/1992 Legean xedatutakora, eta, bestetik, Balio Erantsiaren gaineko Zergarekin loturan, zerga-kontzeptu jakin batzuk Europako Erkidegoetako zuzentarau eta erregelamenduetara egokitzen dituen abenduaren 16ko 29/1991 Legean ezarritakora.

d) 2002ko zerga-neurriei buruzko maiatzaren 13ko 5/2002 Foru Arauko lehenengo xedapen iragankorra.

e) Urriaren 3ko 7/2002 Foru Arauko 11. artikulua; arau horren bidez bide-azpiegiturak erabiltzeagatik ordaindu beharreko kanona araupetu da eta «Bidegi Gipuzkoako Azpiegituren Agentzia, S.A.» foru-sozietate publikoaren zerga-ordainketako araubidearen alderdi batzuk araupetu dira.

f) Martxoaren 18ko 3/2003 Foru Arauko lehenengo eta bigarren xedapen iragankorrak; arau horren bidez Pertsona Fisikoen Errentaren gaineko Zergari, Sozietateen gaineko Zergari, Ez-egoiliarren Errentaren gaineko Zergari, Ondarearen gaineko Zergari, Oinordetza eta Dohaintzen gaineko Zergari eta Ondare Eskualdaketen eta Egintza Juridiko Dokumentatuen gaineko Zergari buruzko arauak aldatu ziren.

g) Maiatzaren 11ko 18/2012 Errege Dekretu-Legea, finantza-sektoreko aktibo higiezinak saneatzeari eta saltzeari buruzkoa.

4.– Foru-arau hau garatuko duen araudia onetsi arte indarrean segituko du Sozietateen gaineko Zergari buruzko uztailaren 4ko 7/1996 Foru Araua garatu duen araudiak, foru-arau honetan xedatutakoarekin bat datorren ginoan.

5.– Aurreko l. eta 2. idatz-zatietan aipatutako xedapenak indargabetzeak ez du eraginik edukiko indarraldian zehar sortutako zerga-betebeharrei dagokienez Foru Ogasunak dauzkan eskubideetan.

AZKEN XEDAPENAK

Lehenengoa.– Indarrean jartzea.

Foru-arau hau Gipuzkoako Aldizkari Ofizialean argitaratzen den egunean jarriko da indarrean, eta 2014ko urtarrilaren 1etik aurrera hasten diren zergaldietan sortuko ditu ondorioak.

Bigarrena.– Gaikuntzak.

Gipuzkoako Foru Aldundiari eta Ogasun eta Finantzen foru diputatuari baimena eman zaie foru arau hau garatzeko eta betearazteko behar diren xedapen guztiak emateko.

Azterketa dokumentala