Egoitza elektronikoa

Kontsulta

Kontsulta erraza

Zerbitzuak


Azken aldizkaria RSS

Euskal Herriko Agintaritzaren Aldizkaria

166. zk., 2014ko irailaren 3a, asteazkena


Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

JUSTIZIA ADMINISTRAZIOA

DONOSTIA-SAN SEBASTIÁNGO LEHEN AUZIALDIKO 3 ZENBAKIKO EPAITEGIA
3729

EDIKTUA, adostasunik gabeko dibortzioari buruz bideratutako 1076/11 prozeduraren ondoriozkoa.

Donostiako Lehen Auzialdiko 3 zenbakiko Epaitegia.

Judizioa: DVC-1076/11.

Demandatzailea: Gabriela Lima Bemerguy Carvalho.

Abokatua: Juan Maria Landa Alvarez.

Prokuradorea: Juan Ramón Alvarez Uria.

Demandatua: Diego Luiz Carvalho De Souza.

Gaia: adostasunik gabeko dibortzioa.

Judizio horretan, epaia eman da 2014ko uztailaren 28an. Hona hemen epaitza:

ERABAKITZEN DUT:

Osorik baiesten dut, Juan Ramón Álvarez Uría epaitegietako prokuradoreak Gabriela Lima Bemerguy Carvalho andrearen izenean eta ordez aurkeztutako demanda, Diego Luiz Carvalho De Souza jaunaren aurkakoa.

Beraz, Gabriela Lima Bemerguy Carvalhoren eta Diego Luiz Carvalho de Souzaren arteko ezkontza –2002ko urtarrilaren 11n Macapa-Amapan (Brasil) egina– dibortzio bidez desegindakotzat deklaratzen dut. Legezko ondorio guztiak izango ditu horrek, epai hau irmo bihurtzen denetik aurrera, baina ez du fede oneko hirugarrenik kaltetuko, harik eta Erregistro Zibilean inskribatzen den arte. Eta, bereziki, neurri hauek hartzea erabaki dut:

1.– Zaintza- eta jagoletza-araubidea. Ezkontideen XXXXX seme adingabea Gabriela Lima Bemerguy Carvalho andrearekin eta haren jagoletzan geratuko da.

2.– Guraso-ahalaz baliatzea. Guraso-ahala erdibana izaten jarraituko dute aitak eta amak. Gurasoek guraso-ahala elkarrekin baliatzeak zera dakar: adingabeari dagozkion erabaki garrantzitsu guztiak guraso biek elkarrekin adostuta hartu beharra. Erabakiak hartzeko, egokien zaien komunikazio-bidea hautatu beharko dute; komunikazio-bide hori errespetatzera eta betetzera behartuta daude. Besterik adierazi ezean, komunikazioa posta elektronikoz edo burofaxez gauzatuko da, eta hortaz, beste gurasoak ere bide horiek baliatuta erantzun beharko du; hala egiten ez badu, ados dagoela ulertuko da. Adostasunik ez badago, Epaitegiak erabakiko du Kode Zibilaren 156. artikuluan ezarritako izapidearen arabera. Guraso-ahalaren arloan hartu beharreko erabakien artean, honako hauek daude, besteak beste:

a) Adingabearen egoitza hark ohiko bizileku duen udalerritik kanpora aldatzea, eta adingabea atzerrira eramatea; ez dira kontuan hartzen oporraldiko bidaiak.

b) Ikastetxea aukeratzea, eta ikastetxea aldatzea.

c) Eskolaz kanpoko jarduerak edo jarduera osagarriak zehaztea.

d) Gizarte- eta erlijio-ospakizun garrantzitsuak; hala nola bataioa, lehen jaunartzea eta beste erlijio batzuetako antzeko ekitaldiak.

e) Premiazkoak ez diren ekintza medikoak, ebakuntza egitea edo tratamendu mediko luzea dakartenak, edo tratamendu psikologikoak.

Alabarekin dagoen gurasoak hari buruzko erabakiak hartzerik izango du beste gurasoari aldez aurretik galdetu gabe, baldin larrialdiko egoerarik gertatu bada, edo erabakiak adingabearen eguneroko bizimoduko gorabehera arrunt eta ohikoei buruzkoak eta garrantzirik gabekoak badira.

3.– Egonaldi-, komunikazio-eta bisita-araubidea. Jagoletza ez duen gurasoa adingabearekin egoteko egonaldi-, komunikazio- eta bisita-araubidea etenda geratzen da aldi baterako. Dena den, berriro indarrean jarri ahalko da, bi gurasoek hori adosten badute.

Aita –Carvalho jauna– XXXXXrekin harremanetan jarri ahalko da telefonoz, idatziz, SMS, posta elektroniko, internet, sare sozial, bideokonferentzia edo komunikatzeko beste edozein bitarteko erabiliz, betiere fede onez eta adingabearen atseden-, jarduera- eta ikasketa-ordutegiak errespetatuz.

4.–Mantenu-pentsioa. Jagoletza ez duen gurasoak adingabeko semearen elikadura-pentsioa ordaindu beharko du. Pentsio hori hilean 300 eurokoa izango da, eta urteko hamabi hilabeteetako lehenengo hamar egunetan ordaindu beharko dio jagoletza duen gurasoari. Pentsioa urtero eguneratuko da, horretarako errekerimendua egin beharrik izan gabe, Estatistikako Institutu Nazionalak edo horren ordezko erakundeak ezarritako Kontsumoko Prezioen Indizearen aldaketen arabera; lehen eguneratzea urtarrilaren batean gauzatuko da, 2015etik aurrera.

Harik eta semea adin nagusikoa izanik ekonomikoki burujabea den arte ordaindu beharko da pentsioa.

Jagoletza ez duen gurasoak zuzenean ordaindu behar dituen era horretako gastuak ez dira kenduko ebazpen honen arabera ordaindu behar duen pentsiotik.

Adingabeak dituen aparteko gastuak erdibana ordainduko dituzte aitak eta amak, betiere ados badaude eta agiri bidez hala egiaztatzen badute; adostasunik ez bada, epailearen baimena beharko da. Aurretiaz agiri hori edo baimen hori eskuratu beharko dira, premiazko egoeretan izan ezik. Aparteko gastuen kontzeptu horretan sartzen dira –katalogo posible osoa adierazteko asmorik gabe– honako hauek: gastu medikoak, kirurgikoak, ospitalekoak, ortopedikoak, dentistarenak, psikologikoak, farmazeutikoak, ortodontziakoak, logopediakoak, eta, oro har, osasun-sistema publikoan edo dagokion aseguru pribatuan sartzen ez diren gaixotasun fisiko edo mentalei lotutakoak, bai eta, prestakuntza-arloan, eskolan atzeratuta egonez gero, derrigorrezko ikasgaiei buruzko klase partikularretakoak ere, eta, zehazki, gaztelaniazko klaseak. Egin beharreko gastua medikoa bada eta Gizarte Segurantzak edo dagokion erakunde medikoak ordaintzen ez badu eta beharrezkoa bada, erdibana ordainduko dute aitak eta amak.

Epaiaren aurka aurkeztutako errekurtsoek ez dute etengo aurreko neurrien eraginkortasuna.

Prozesuko kostuak ez zaizkio berariaz inori ezartzen.

Epai hau irmo bihurtzen denean edo aurkaratzeak soilik neurrien gainean badu eraginik, dibortzioaren gaineko erabakiaren irmotasuna lortuta, Idazkaritza Judizialak erabakiko du Erregistro Zibilari ofizioz jakinaraz dakiola, dagozkion idazpenak egin daitezen (Prozedura Zibileko Legearen 755. artikulua).

Diego Luiz Carvalho De Souza demandatuaren egungo bizilekua ezezaguna denez, aipatutako ebazpena Euskal Herriko Agintaritzaren Aldizkarian ediktu bidez jakinaraztea erabaki da, Prozedura Zibilaren 1/2000 Legearen 497.2 artikuluan xedatutakoaren arabera (PZLb).

Ebazpen horren aurka, apelazio-errekurtsoa aurkez dezake auzi-ihesean den demandatuak.

Jakinarazten den ebazpenaren testu osoa eskura du interesdunak, epaitegi honetako bulego judizialean.

Donostia, 2014ko uztailaren 28a.

IDAZKARI JUDIZIALA.


Azterketa dokumentala