Euskal Herriko Agintaritzaren Aldizkaria

227. zk., 2014ko azaroaren 27a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

5064

11/2014 FORU ARAUA, urriaren 29koa, erosketa publiko sozialki arduratsuari buruzko kontratu klausulak foru sektore publikoko kontratazioan txertatzekoa.

GIPUZKOAKO DIPUTATU NAGUSIA

Jakinarazten dut Gipuzkoako Batzar Nagusiek onartu dutela «11/2014 Foru Araua, urriaren 29koa, erosketa publiko sozialki arduratsuari buruzko kontratu klausulak foru sektore publikoko kontratazioan txertatzekoa»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2014ko urriaren 29a.

Diputatu nagusia,

MARTIN GARITANO LARRAÑAGA.

HITZAURREA

Kontratazio publikoa garrantzi handiko jarduera ekonomikoa da, are garrantzitsuagoa kontuan hartzen bada botere publikoei aukera ematen diela zeharkako politikak aurrera eramateko eta, kontratu bakoitzak berez duen helburu partikularra gorabehera, interes orokorreko helburuak lortzeko, betiere aintzat hartuta kontratazio publikoa arautzen duten printzipio orokorrak.

Izan ere, kontratu publikoak ez dira administrazioa lehengaiez eta zerbitzuez baldintzarik onenetan hornitzeko bitarteko soilak; hori ez ezik, botere publikoek ekonomian, politikan eta gizartean esku-hartzea ahalbidetzen dute, beti ere bermatuz baliabide publikoak modu eraginkorragoan erabiliko direla.

Horrela, Gipuzkoako Batzar Nagusiek, helburu horrekin eta Gipuzkoako Lurralde Historikoaren Erakunde Antolaketari, Gobernuari eta Administrazioari buruzko 2005eko uztailaren 12ko 6/2005 Foru Arauak bere 8.2 artikuluan foru gobernuaren jarduera kontrolatzeko eta bultzatzeko ematen dion ahalmenari jarraikiz, Gipuzkoako Foru Aldundiari eskatu izan diote izaera sozialeko klausulak sar ditzala kontratazio prozesuak arautzen dituzten baldintza agirietan, betiere kontratazio publikoaren araudiaren barne.

Sektore Publikoko Kontratuen Legearen Testu Bateginak, 2011ko azaroaren 14ko 3/2011 Legegintzako Errege Dekretuaren bidez onartuak, hainbat aukera zabaltzen ditu kontratuak esleitu eta gauzatzeko prozeduretan irizpide sozialak sartzeko. Zehazki, berariaz aipatzen ditu langabeziaren aurkako borroka, enplegua sustatzea lan merkatura sartzeko zailtasun bereziak dituzten pertsonen artean, lan-merkatuan gizonen eta emakumeen arteko desberdintasuna ezabatzea, oinarrizko lan eskubideak bermatzea eta kontratazio prestazioen ingurumen ezaugarriak, besteak beste.

Horiek horrela, azken urteetan, foru erakundeek hainbat ekimen jarri dituzte abian eta hainbat jarraibide eman dituzte foru sektore publikoko kontratu publikoetan irizpide sozialak sartzeko. Irizpide horiek enpleguaren kalitatearekin dute zerikusia, baita gizonen eta emakumeen arteko berdintasun egiazkoarekin eta hizkuntza eskubideekin ere. Egun, honako jarraibide hauetan zehazten dira: 2013ko uztailaren 17ko 4/2013 Foru Araua, Foru Sektore Publikoko obra kontratuetan klausula sozialak txertatzekoa dena; eta Gipuzkoako Foru Aldundiaren jarduera eremuan, Diputatuen Kontseiluaren Erabakia, 2011ko ekainaren 21ekoa, gizonen eta emakumeen arteko berdintasunari buruzko klausulak Gipuzkoako Foru Aldundiaren esparruko kontratuetan eta diru laguntzetan sartzea onartzen duena; eta Diputatuen Kontseiluaren Erabakia, 2009ko urtarrilaren 27koa, administrazio kontratuak gauzatzeko orduan bete behar diren hizkuntza baldintzei buruzkoa.

Une honetan, azken urteetako esperientziak lagunduta, foru erakundeak oinarriak ezarri nahi ditu hartara foru sektore publikoaren kontratazio organoek eraginkorki sar ditzaten alderdi sozialak, ingurumenekoak eta beste politika publiko batzuei buruzkoak balioesten dituzten klausulak, aurrez ezarri diren helburuak betetzearren eta indarrak batzearren horiek lortzeko bidean, betiere kontratazio organoen eskuetan utzita zein klausula zehatz sartu kontratazio prozedura bakoitzean, aukeren eta zirkunstantzien arabera.

Ekimen honekin, foru erakundeek konpromisoa erakusten dute erosketa publiko arduratsuaren printzipioekin, eta beste politika publikoak biderkatzeko tresna bilakarazten dute beren kontratazio praktika, betiere aintzat hartuta irizpide sozialak, etikoak eta ingurumenari buruzkoak. Horrekin, helburua da gizarte eragileentzat eta herritarrentzat eredugarri izatea, eta erakustea susta daitezkeela kontsumo kritikoa, arduratsua eta solidarioa, hartara tokiko giza garapenaren modelo justuago eta iraunkorrago bat zabaltzen laguntzeko.

Foru arauak bost kapitulu ditu, hogeita hamabi artikulurekin, lau xedapen gehigarri, xedapen iragankor bat eta azken xedapen bakarra.

I. KAPITULUA

XEDAPEN OROKORRAK

1. artikulua.– Xedea.

1.– Foru Arau honek xede du hainbat jarraibide ezartzea izaera sozialeko eta ingurumeneko klausulak, nahiz beste politika publiko batzuei buruzkoak sartzeko Gipuzkoako Lurralde Historikoko foru sektore publikoa osatzen duten erakundeetako kontratazio organoek bideratzen dituzten kontratazio prozeduren fase ezberdinetan.

2.– Kontratazio prozeduratan txertatuko diren klausulak helburu hauek izango dituzte: lan-merkatuan sartzeko zailtasunak dituzten pertsonen enplegua sustatzea, langabeziari aurre egitea, arrisku edo bazterkeria sozialean dauden pertsonak gizartean eta lan-merkatuan sar daitezen erraztea, langileen oinarrizko eskubideak errespetatzen direla bermatzea, enpleguaren kalitatea sustatzea, segurtasuna eta lan osasuna sustatzea, ingurumena babestea, inguruari kalte eragiten ez dioten ekoizpen sistemak sustatzea, herritarren hizkuntza eskubideak bermatzea, eta emakume eta gizonen arteko berdintasun egiazkoa bultzatzea.

2. artikulua.– Aplikazio eremu objektiboa.

1.– Kontratuaren xedeak edo ezaugarriek horretarako aukera ematen badute, foru arau hau honako kontratu hauek esleitzeko prozeduretan ezarriko da: Sektore Publikoko Kontratuen Legearen testu bateratuak 8, 9 10, 11 eta 19.b) artikuluetan aurreikusten dituen zerbitzu kontratuetan, zerbitzu publikoen kudeaketa kontratuetan, hornikuntza kontratuetan, sektore publikoaren eta pribatuaren arteko lankidetza kontratuetan eta orobat, administrazio kontratu berezietan.

Obretako kontratuak esleitzeko prozeduretan, 16, 17, 19, 24 eta 25. artikuluetan aurreikusitakoa izango da aplikagarri, baita 4, 11, 12, 13, 14, 22, 23, 30 y 31 artikuluak aurreko artikuluetako edukiari dagokionez, baldin eta kontratuaren ezaugarriek aukera ematen badute.

2.– Kontratu organoak honako foru arau honetan aipatzen diren klausulak modu bereizian sartuko ditu kontratuaren lote bakoitzean, lotearen xede den prestazioaren ezaugarrien arabera, eta foru arau honetan ezarritakoarekin bat, baldin eta, kontratazio publikoaren araudiari jarraikiz, kontratuaren xedea zatitu badaiteke eta administrazio klausula berezien orriek aurreikusten badute kontratuaren zati bakoitza loteen bidez modu independentean egingo dela.

3. artikulua.– Aplikazio eremu subjektiboa.

1.– Foru arau hau aplikagarri izango da Gipuzkoako Lurralde Historikoko foru sektore publikoa osatzen duten entitateen kontratazio organoek egiten dituzten kontratuetan.

2.– Foru arau honen ondorioetarako, honako erakunde hauek osatzen dute Gipuzkoako Lurralde Historikoko foru sektore publikoa: Foru Aldundiak, foru organismo autonomoek, foru enpresa entitate publikoek eta kapitala osoki foru publikoa duten merkataritzako foru sozietateek.

4. artikulua.– Izaera sozialeko, ingurumeneko eta beste politika publiko batzuei buruzko klausulak sartzea.

1.– Foru sektore publikoko kontratazio prozedura bakoitzaren administrazio klausula berezien orriek hainbat klausula sartuko dituzte honako foru arau honetan ezarritako irizpideekin bat; alegia, izaera sozialekoak, ingurumenekoak eta beste politika publiko batzuei buruzkoak. Klausula horiek aplikaziozkoak izango dira esleipen prozeduran eta kontratuaren xedea gauzatzeko orduan.

Kontratu jakin batzuetan halabeharrezkoa ez bada administrazio klausula berezien orriak egitea eta onartzea, aurreko paragrafoak aipatu klausulak espedientea prestatzeko dokumentazio baliokidean sartuko dira. Kontratu txikietan, berriz, eskaintzen eskaeretan sartu ahal izango dira.

2.– Orobat, lizitazio iragarkian eta administrazio klausula berezien orrien karatulan edo horien dokumentazio baliokidean, azpi-apartatu bat edo hainbat sartu beharko dira, zeinetan azalduko baita kontratazio horretan betebeharrekoak direla bertan zehaztu diren foru arau honetako izaera sozialeko baldintzak, ingurumeneko baldintzak edo beste politika publiko batzuei buruzko baldintzak.

3.– Kontratazio prozeduretako administrazio klausula berezien orriek, edo, hala badagokio, kontratazioaren prestatze dokumentazio baliokideak espres jaso beharko dute, enpresa edo entitate esleipendunak kontratuaren zati bat azpikontratatzeko asmoa azaltzen duen kasuetarako, enpresa edo entitate esleipendun horrek kontratazio organoaren aurrean aurkeztu beharko duela azpikontratua formalizatuko duen agiria, bertan honako hauek ezarriz: kontratu horretan aurreikusi diren klausulak direla-eta enpresa edo entitate esleipendunak dituen betekizunak eta horiek ez betetzearen ondorioak.

4.– Kontratazio prozeduretako administrazio baldintza berezien orrietan edo prestatze dokumentazio baliokidean, helburu berarekin burutu diren beste kontratu batzuen ondorengo direnean, klausula bat erantsiko da adieraziko duena enpresa edo entitate esleipendunak aurreko kontratua burutzeko gauzatu ziren lan harremanetan subrogatu beharko duela enplegatzaile moduan, beti ere Langileen Estatutuaren Legearen Testu Bateginaren 44. artikuluak, aplikagarri den hitzarmen kolektiboak edo foru erakundeek gaiaren inguruan onartutako erabakiek ezarri moduan.

II. KAPITULUA

GAITASUN ETA KAUDIMEN BALDINTZAK

1. ATALA

KONTRATUEN ERRESERBA

5. artikulua.– Kontratuen erreserba.

1.– Foru sektore publikoko kontratazio organoek parte hartzea mugatuko dute kontratu jakin batzuk esleitzeko prozeduretan eta kontratu horiek hainbat entitate eta enpresei erreserbatu ahal izango dizkiete, hain zuzen ere xede nagusitzat desgaitasuna duten edo egoera txarrean edo desabantailan dauden pertsonen gizarteratzea dutenei; halaber, kontratua erreserbatu ahal izango dute enplegu babestuko programen baitan burutzeko ere. Hori guztia, Sektore Publikoko Kontratuen Legearen Testu Bateginari jarraikiz.

2.– Kontratu erreserbatuaren kalifikazioa administrazio klausula berezien karatula eta orrietan, edo dagokion dokumentazio baliokidean, adierazi beharko da, baita lizitazioaren iragarkian ere. Berariaz aipatuko da erreserba ahalbidetzen duen Sektore Publikoko Kontratuen Legearen Testu Bateginaren xedapena.

6. artikulua.– Erreserbatu daitezkeen kontratuak.

1.– Aurreko artikuluan aurreikusitako erreserba egiteko, kontratua gauzatzeko eskulan intentsiboa beharko da, eta gainera, langile horiei lagundu eta jarraipen egokia egiteko aukera eman beharko du.

2.– Erreserbak kontratuaren xede osoari eragin diezaioke, edo lote bati edo hainbati bakarrik.

7. artikulua.– Erreserbaren deklarazioa.

1.– Erreserba deklarazioa lizitazio bakoitzeko egingo da.

Erreserbaren deklarazioak berekin ekar dezake erreserbaren onuradun diren entitateak salbuetsita izatea bermea jartzeaz, kontratuaren ezaugarriei jarraikiz.

2.– Foru Aldundiko departamentuek eta foru sektore publikoko gainerako entitateek urteroko aurrekontu proposamenean jaso beharko dute hurrengo ekitaldian lizitatu beharreko kontratuen artean zein izan daitezkeen erreserbatuak, beti ere aurrekontua egiteko onartzen diren jarraibide tekniko eta ekonomikoekin bat.

Lurralde historikoko aurrekontu orokorren urteko foru arauak foru sektore publiko osoak kontratu erreserbatuetarako gordetako zenbateko ekonomikoa zehaztuko du, aurreko paragrafoan aipatutako urteroko aurrekontu proposamenean jasotako aurreikuspenekin bat.

8. artikulua.– Gaitasun baldintza berezia kontratu erreserbatuetan.

Atal honetan aurreikusten diren kontratuak lizitatzeko, araudiak eskatzen dituen gaitasun baldintzak bete ez ezik, entitateek legalki egon behar dute eratuak, kalifikatuak eta, behar balitz, erregistratuak honako entitate gisa, beti ere horiek arautzen dituzten legezko xedapenekin bat: xede nagusitzat desgaitasuna duten edo egoera txarrean nahiz desabantailan dauden pertsonen gizarteratzea eta lan-merkaturatzea duten entitateak.

2. ATALA

EZGAITASUNA DUTEN PERTSONEI GORDETAKO LANPOSTUEN ERRESERBA KUOTA BETETZEA

9. artikulua.– Ezgaitasuna duten pertsonei gordetako lanpostuen kuota betetzea.

1.– Sektore Publikoko Kontratu Legearen Testu Bateratuaren laugarren xedapen gehigarriarekin bat, foru sektore publikoko entitateen kontratazio prozeduretako administrazio klausula berezien orriek edo horien baliokide den dokumentazioak jaso egin beharko dute 50 edo langile gehiagoko enpresek % 33ko ezgaitasuna edo gehiago duten pertsonei gordetako lanpostu kuota betetzen dutela egiaztatzen duen agiria aurkeztu beharko dutela, edota horiek osatuz edo horien ordez har daitezkeen neurriak betetzen dituztela egiaztatzen dutena, beti ere Ezgaitasuna duten pertsonen eskubideei eta haien gizarteratzeari buruzko Lege Orokorraren Testu Bateginak, 2013ko azaroaren 29ko 1/2013 Legegintzako Errege Dekretu bidez onartutakoak, eta hura garatzen duen araudiak ezarritakoarekin bat.

2.– Ondorio horietarako, ziurtagiri bat aurkezteko betebeharra gehituko da entitate edo enpresa lizitatzaileek aurkeztu beharreko dokumentazioari buruzko klausulan; ziurtagiri horretan plantillako langile guztien kopurua, nahiz ezgaitasunen bat dutenen kopurua jaso beharko da; eta legez ezarritako ordezko neurriak aukeratuz gero, salbuespen adierazpenaren kopia eta lizitatzailearen adierazpena hartutako neurriak zehaztuz.

3. ATALA

KAUDIMENA HIZKUNTZA ARLOAN

10. artikulua.– Kaudimena hizkuntza arloan.

Foru sektore publikoko kontratazio organoek kaudimen baldintza minimoak ezarriko dituzte, edo kontratuari giza baliabide nahikoak atxikitzeko konpromisoa eskatuko dute, indarrean dagoen hizkuntza araubidetik datozen betekizunak betetzeko, baldin eta betekizun horiek kontratuaren xedearekin edo bere gauzatzearekin zerikusirik badute. Baldintza minimo horiek kontratuaren iragarkian, administrazio baldintza berezien karatula eta orrietan, prestatzeko dokumentazio baliokidean edo eskaintza eskaeretan jasoko dira.

III. KAPITULUA

KLAUSULA SOZIALAK ETA INGURUMENEKOAK ESLEIPEN FASEAN TXERTATZEA

1. ATALA

XEDAPEN OROKORRAK

11. artikulua.– Klausula sozialak eta ingurumenekoak esleipen irizpideetan sartzea.

1.– Foru sektore publikoko entitateen kontratazio prozeduretako administrazio klausula berezien orrietan edo, hala badagokio, kontratazioaren prestatze dokumentazio baliokidean, esleipen irizpide bat edo hainbat jasoko dira, kontratuaren xedearekin lotura zuzena duten alderdi sozialak edo ingurumenekoak kontuan hartzeko, horien arabera proposamena balioesteko eta onuragarriena den eskaintza zehazteko. Entitate edo enpresaren proposamenak, esleipen irizpideari dagokionez, eskaintza hobetu egin behar du kontratazio organoarentzat kontratua gauzatzeko orduan.

2.– Esleipen irizpide horiek foru sektore publikoak lizitatu beharreko kontratazioetan hartu beharko dira kontuan, salbu eta kontratu txikietan, betiere kontratuaren ezaugarriek aukera hori ematen badute.

3.– Esleipen irizpideetan balioetsi diren alderdiak kontuan hartuz esleipendunak bere proposamen teknikoan zehaztutako betebeharrak, kontratuaren edukian sartuko dira kontratu betekizun modura.

12. Artikulua.– Esleipen irizpideen hautaketa eta haztapena.

1.– Esleipen irizpideak balioesten dituzten alderdiak zehazki adieraziko dira, hartara enpresa lizitatzaile guztiak baldintza beretan egon daitezen kontuan hartuko diren alderdien berri izateko orduan, eta modu homogeneoan interpreta ditzaten esleipen irizpidea eta balioespen modua. Orobat, alderdi horiek zehazki adierazteak balio izango du kontratazio organoak eskaintzen balioespen konparatibo bat egiteko.

Esleipen irizpideak zehazteko erak ezin du baldintzatu esleipenduna nor izango den erabakitzea, kontratazio publikoa arautzen duten tratu berdintasunaren, ez diskriminatzearen, proportzionaltasunaren eta gardentasunaren printzipioei jarraikiz.

2.– Esleipen irizpideak edo irizpideek balioespen alderdi bat edo hainbat jaso ditzakete, eremu material bakoitzerako kapitulu honetan xedatutakoari jarraikiz.

3.– Kapitulu honetan aipatu esleipen irizpideek gutxienez % 10eko pisua izango dute osoko puntuazioan. Obra kontratuetan gutxieneko pisua osoko puntuazioaren % 5 izango da.

Kontratazio organoak, salbuespenez, erabaki dezake kontratuaren ezaugarriak ez direla egokiak izaera sozialeko edo ingurumeneko esleipen irizpideak sartzeko, edo aurreko apartatuan aurreikusitakoa baino pisu txikiagoa eman diezaieke. Horrelakoetan, zuritu beharko da zergatik ez diren komeni irizpide horiek, espedientearekin batera joango den txosten arrazoitu batean.

4.– Kontratazio prozeduretako administrazio klausula berezien orrietan edo, hala badagokio, kontratazioaren prestatze dokumentazio baliokidean ezarriko da, neurriz kanpoko edo ezohiko balioak dituzten eskaintzak zehazte aldera, horrelako balioen ondorioz kontratua betetzea ezinezkoa dela irizteko parametro objektiboa izango dela eskaintzan agertzen diren prezioak baxuagoak izatea kontratuari aplikagarri zaion hitzarmen kolektiboan kategoria profesional bakoitzerako ezarrita dauden gutxieneko soldaten kostua baino; egoera horrek eskaintza baztertzea ekarriko du.

13. artikulua.– Hobekuntzak edo aldagarriak.

1.– Kontratazio organoak kontuan har ditzake lizitatzaileek eskaintzen dituzten izaera sozialeko eta ingurumeneko alderdiei buruzko hobekuntzak edo aldaketak, baldin eta kontratuaren xedearekin zerikusia badute, Sektore Publikoko Kontratuen Legearen Testu Bateginari jarraikiz.

2.– Administrazio klausulen orriek edo, hala badagokio, kontratazioaren prestatze dokumentazio baliokideak berariaz aipatu beharko dute badagoela proposamenetan izaera sozialeko eta ingurumenari buruzko aldaketak edo hobekuntzak aurkezteko aukera, zehaztuta zer elementuren gainean eta zer baldintzapetan aurkez daitezkeen. Orobat, lizitazioaren iragarkian jakinarazi beharko da hori.

14. artikulua.– Betekizunak ez betetzea.

Izaera sozialeko eta ingurumeneko irizpideei dagokienez, baita aurreko paragrafoan aipatutako hobekuntzei edo aldaketei dagokienez ere, enpresaren proposamenean dauden konpromisoak bete ezean, kontratua amaitutzat joko da baldin eta betekizun horiek funtsezko izaera badute, Sektore Publikoko Kontratuen Legearen Testu Bateginaren 223.f) artikuluari jarraikiz; bestela, arau horrek 212.1 artikuluan aurreikusten den zigorra ezarriko da, zeinaren zenbatekoa kontratuaren aurrekontuaren % 10 artekoa izango baita, ez betetzearen larritasunaren arabera.

2. ATALA

KLAUSULAK TXERTATZEKO ESPARRU MATERIALAK

15. artikulua.– Emakumeen eta gizonen berdintasunaren inguruko esleipen irizpidea.

Foru sektore publikoko entitateen kontratazio prozeduretako administrazio klausula berezien orrietan edo, hala badagokio, kontratazioaren prestatze dokumentazio baliokidean, esleipen irizpide bat sartu ahal izango da hartara eskaintzan genero ikuspegia sartzeko; haren bidez, ondoren zerrendatzen diren alderdi hauek balioetsiko dira, betiere genero ikuspegia bera kontratuaren xedearen ezaugarri tekniko bat bada:

a) Lanerako plan bat. Bertan jasoko dira enpresa edo entitate lizitatzaileak zein ekintza zehatz proposatzen dituzten kontratuaren prestatze dokumentazioan emakumeen eta gizonezkoen berdintasun arloan ezarri diren helburuak betetzeko.

b) Enpresa edo entitate lizitatzailearen konpromisoa emakume gehiago kontratatzeko emakumeen okupazio indize baxuko sektoreetan, betiere kopuru hori kontratuaren gauzatze baldintza gisa ezarritakoa baino altuagoa bada, batetik, eta, bestetik, gutxienez bost puntu altuagoa bada genero eta jarduera motaren araberako biztanleria aktiboaren Eustaten datu estatistikoetan jasotako batez besteko portzentajea baino.

c) Kontratua gauzatzeko, ardura postuetan emakume gehiago kontratatzeko konpromisoa.

d) Enpresa lizitatzaileek Berdintasun Plan bat aurkeztea kontratuan aplikatzeko, zeinak, kontratuari dagokionez, enpresaren berdintasun politikak zehaztuko baititu. Hauek dira kontuan hartu beharreko alderdiak: lanpostua eskuratzea, sailkapen profesionala, lan kalitatea eta egonkortasuna, lan egunaren iraupena eta antolaketa, prestakuntza, sustapena, soldata, lan arriskuen eta lan osasunaren prebentzioa, sexu jazarpena eta sexu ondoriozko laneko jazarpena saihesteko prebentzioa, eta beste batzuk.

e) Bizitza pertsonala, lana eta familia bateratzeko neurri zehatzak, nahiz emakumeen eta gizonen ardura partekatua sustatzeko neurriak enpresa lizitatzaileak kontratua gauzatuko duen langile taldeari aplikatzeko, beti ere gizonen eta emakumeen benetako berdintasunari buruzko 2007ko martxoaren 22ko 3/2007 Legeak ezarritako minimoak hobetuz; bereziki, baliabide propio, pribatu edo sozio-komunitarioak izatea adingabeei eta mendekoei arreta emateko: zerbitzu txekeak, jangelak, haurtzaindegiak, eguneko zentroak edo ludotekak, hobekuntzak lan-jardunaldian, eszedentziak, lizentziak edo baimenak, ordutegi malgua, edo zerbitzuak moldatzea edo birzuzentzea.

16. Artikulua.– Esleipen irizpidea lan merkatuan sartzeko zailtasunak dituztenentzat lanpostuak sustatzeko.

1.– Foru sektore publikoko entitateen kontratazio prozeduretako administrazio klausula berezien orriek edo, hala badagokio, kontratazioaren prestatze dokumentazio baliokideak esleipen irizpide bat jaso ahal izango dute enpresa edo entitate lizitatzaileak kontraturako enplegatuko dituen eta lan merkatuan sartzeko zailtasunak dituzten pertsonen portzentajea balioesteko, baldin eta kontratuak xede badu pertsona horien enplegua sustatzea. Lan merkatuan sartzeko zailtasunak dituzten pertsonen portzentajeak handiagoa izan beharko du baldintza teknikoen orrietan kontratua gauzatzeko ezarritako gutxieneko portzentajea baino.

Irizpide hori aplikatzeko, lan-merkatuan sartzeko zailtasunak dituzten pertsonatzat joko dira Diputatuen Kontseiluko erabakiz bidez zehaztutako pertsona taldeetakoak.

2.– Enpresak edo erakunde esleipendunak ezartzen duen portzentaje minimoa kalkulatzeko, kontuan hartuko da kontratua gauzatzeko enplegatuko diren langile guztien urteko lan ordu guztiak, azpikontratatutako enpresatako edo entitateetako langileen orduak barne. Ondorio horietarako, kontuan izango dira kasuan kasu azpikontratatutako enpresa edo entitateek kontratatuak dituzten pertsonen lan orduak, bai xede nagusitzat lan aurkitzeko zailtasunak dituzten pertsonen lan merkaturatzea duten enpresa edo entitatekoak, bai gainerako enpresa edo entitatekoak ere.

3.– Enpresa edo entitate lizitatzaileen proposamenetan zehaztu beharko da zenbat pertsona beharko diren kontratua gauzatzeko eta zenbat kontratu egingo diren artikulu honetan aipatu betekizuna betetzeko, langile bakoitzaren urteko lanorduak zehaztuz.

4.– Enpresa edo entitate esleipendunak egiaztatuko du bete dituela proposamen teknikoan hartutako konpromisoak. Horretarako dokumentazio hau aurkeztuko du:

a) Kontratua sinatu eta hilabeteko epean, enpresa edo entitate esleipendunak hautatu dituen pertsonen datuak jakinaraziko ditu, eta Gizarte Segurantzako altaren eta lan kontratuaren kopiak aurkeztuko ditu.

b) Hilero eta kontratua betetzen duen bitartean, enpresa edo erakunde esleipendunak TC1 eta TC2 dokumentuak eta enpresaren matrikula liburua aurkeztu beharko dizkio kontratuaren arduradunari, hartara betekizuna betetzen ari dela egiaztatzeko.

Kontratuaren arduradunak dokumentazio hori edo beste bat eskatu ahal izango dio enpresa edo entitate esleipendunari, hartara kontratuaren betetze maila kontrolatzeko eta ebaluatzeko; orobat eskatu ahal izango dio jarraipen bilerak egitea eta aldizkako ebaluazio txostenak ematea.

Kontratua aginduko duten administrazio klausula berezien orrietan edo dagokion dokumentazio baliokidean sartuko da dokumentazio hori aurkeztu beharra, kontratu betekizun gisa.

17. artikulua.– Esleipen irizpidea gizarte bazterkeria egoeran edo arriskuan daudenentzat enplegua sustatzeko.

1.– Foru sektore publikoko entitateen kontratazio prozeduretako administrazio klausula berezien orriek edo, hala badagokio, kontratazioaren prestatze dokumentazio baliokideak, kontratuaren xedea gizarte bazterkeria egoeran edo arriskuan daudenentzako enplegua sustatzea bada, esleipen irizpide bat jaso ahal izango dute enpresa lizitatzaileek halabeharrez aurkeztuko duten gizarteratze proiektua balioesteko.

2.– Artikulu honen ondorioetarako, eskumeneko zerbitzu publikoek egiztatuko dute bazterkeria egoera edo arriskua. Diputatuen Kontseiluak, Gizarte Politikako Departamentuaren proposamenez, gizarte bazterkeria egoeran edo arriskuan dauden pertsona taldeak zehaztu ahal izango ditu.

3.– Gizarteratze proiektuak alderdi hauek zehaztu beharko ditu, kontratuaren baldintza teknikoen orriei jarraikiz:

a) Enpresa edo entitate lizitatzaileak kontratatzeko asmoa duen gizarte bazterkerian edo arriskuan dauden pertsonen portzentajea. Portzentajea kalkulatzeko, kontratua gauzatzeko kontratatuko diren langile guztien urteko lanorduak hartuko dira kontuan. Ondorio horietarako, kontuan izango dira kasuan kasu azpikontratatutako enpresa edo entitateek kontratatuak dituzten pertsonen lanorduak, bai xede nagusitzat gizarte bazterkeria egoera edo arriskuan dauden pertsonen gizarteratzea duten enpresa edo entitatetakoak, bai gainerako enpresa edo entitatetakoak ere.

Eskatzen den portzentajea baldintza teknikoen orrietan gauzatze baldintza gisa ezarritako portzentaje minimoa baino altuagoa izango da.

b) Gizarteratzeko prozesuan laguntzen espezializatuak diren langile teknikoak.

c) Lan metodologia, gizarteratzeko ibilbideak egiteko aurreikusten dena; eta gizarteratzeko bakarkako prozesuen ebaluazio adierazleak, haien operatibotasuna eta egokitasuna kontuan hartuta.

d) Prestakuntza plan orokorra eta berezia.

e) Koordinazio proposamena, erakunde publiko eta pribatuekin, kontratuaren xede diren gizarteratze zereginetarako.

f) Gizarteratzeko kontratuak dituzten pertsonak ohiko lan merkatuan sartzeko aurreikusten diren mekanismoak.

18. artikulua.– Esleipen irizpidea proposamenaren kalitate sozialari dagokionez.

1.– Foru sektore publikoko entitateen kontratazio prozeduretako administrazio klausula berezien orriek edo, hala badagokio, kontratazioaren prestatze dokumentazio baliokideak, esleipen irizpide bat jaso ahal izango dute honako alderdi hauek balioesteko: aurkeztu diren proposamen teknikoak zenbateraino egokitzen diren zerbitzu publiko kontratatuen erabiltzaileen beharretara eta alor horretan jarduten duten eragileen koordinazio jardunera, hartara, kontratuaren gauzatzeari begira, eskaintza hobea izan dadin kontratazio organoarentzat.

2.– Esleipen irizpideak alderdi hauetako bat, hainbat edo guztiak balioetsiko ditu, arrazoituz:

a) Metodologia eta mekanismoak ezartzea kontratua diseinatu, hobetu, gauzatu eta ebaluatzeko zereginerako dagokion esparruko pertsona edo eragileek parte har eta erabaki dezaten: esaterako, organo kontratatzailea, profesionalak, zerbitzuaren erabiltzaileak edo onuradunak, edo esparru horretan laguntzen duten boluntarioak.

b) Kontratuaren xede den prestazio edo zerbitzuarekin lotura zuzena duen entitate publiko edo pribatuen jardunarekin koordinatzea eta jardun hori osatzea; bereziki hartuko da kontuan hirugarren sektorearekin jarduten denean.

c) Kontratua gauzatzen den aldian, lan sareetan parte hartzea eta lankidetza akordioak sinatzea tokiko elkarte sarearekin interes sozialeko eta komunitate intereseko ekintzetan, betiere kontratuaren xederarekin zerikusi zuzena badute eta prestazioan eragiten badute.

d) Boluntarioen parte hartzea kontratua gauzatzearekin zerikusia duten jardueretan, boluntario kopurua zehaztuta, zereginak deskribatuta eta kontratuko prestazioaren erabiltzaileen eta onuradunen arretarako dedikazioa zehaztuta, betiere kontratuarekin zerikusi zuzena ez duten zereginak egiten ez badituzte eta lanpostuak ordezten ez badituzte.

e) Kontratuaren edukia lurraldera, tokiko izaerara eta izaera soziokulturalera egokitzea.

f) Kontratua gauzatzearen emaitza formalak jakitera ematea: kontratuaren garapenaren, prestazioaren eta ondorioen inguruko argitalpen, azterketa edo komunikazioak, dela kontratua gauzatzen den bitartean, dela kontratuaren amaieran.

g) Kontratuaren xede nagusi den jarduera edo zerbitzuari buruzko informazio eta sentsibilizazio sozialeko jarduerak egitea.

h) Zenbateko jakin bat interes sozialeko eta elkartasuneko proiektuetara bideratzea, baldin eta kontratatua izan den jarduera hobe egiten edo zerbitzua hobe ematen laguntzen badute.

i) Tokiko garapean eta gizartearen kohesioan laguntzea, kontratuaren xedeari dagokionez.

j) Zerbitzua irisgarria izatea desgaitasun fisikoa, psikikoa edo sentsoriala duten pertsonentzat.

k) Proiektuaren edukia pertsona talde jakin batzuei moldatzea: bereziki baztertuak daudenei edo gizartearen babes handiagoa behar dutenei, hala nola, etorkinak, adinekoak, haurrak edo gutxiengo etnikoak.

19. artikulua.– Ingurumeneko esleipen irizpidea.

1.– Foru sektore publikoko entitateen kontratazio prozeduretako administrazio klausula berezien orriek edo, hala badagokio, kontratazioaren prestatze dokumentazio baliokideak esleipen irizpide bat jaso ahal izango dute eskaintzen duten produktuaren edo zerbitzuaren ingurumen alderdiak balioesteko, baldin eta horiek baldintza teknikoen orrietan edo alorreko arauetan ezarritako minimoa baino harago badoaz, betiere kontratuaren ezaugarriek aukera hori ematen badute.

2.– Ingurumen izaerako esleipen irizpidea, eskaintzen den produktuari edo azken zerbitzuari buruzkoa, edota produktua egiteko prozesuari edo kontratua gauzatzeari buruzkoa, alderdi hauen ingurukoak izan daiteke:

a) Natura baliabideen kontsumoa murriztea: esate baterako, lehengaiak, erregaiak eta ura.

b) Hondakin arriskutsuak eta ez arriskutsuak ahalik eta gutxien sortzea; berrerabiltzea eta birziklatzea.

c) Energia efizientzia eta energia berriztagarrien iturriak erabiltzea.

d) Hainbat etiketa ekologiko, UNE 150301 ekodiseinuko araua eta produktu edo zerbitzuaren kalitatearen inguruko beste ikur batzuk betetzea; orobat, etiketa horietan definitzen diren errendimendu edo eskaera funtzionalak betetzen direla egiaztatzeko beste modu batzuk ere onartuko dira.

e) Produktu ekologikoak, freskoak edota garaikoak erabiltzea jangelako eta catering-eko menuak egiteko, baita Jatorri Izendapen Babestua edo Adierazpen Geografiko Babestua duten produktuak ere, edo horien ezaugarri tekniko berberak dituztenak.

f) Kontratuaren xede den zerbitzuaren ingurumen planak aurkeztea.

g) Negutegi efektuko gasen emisioa murriztea: CO2, HFC, PFC edo SF6.

h) Emisio kutsagarriak murriztea: partikulak (PM10, PM 2,5), disolbatzaileak (COV) eta nitrogeno oxidoak.

i) 2000ko urriaren 23ko 2000/60/CE zuzentarauak, uren politiken inguruan komunitate jarduera marko bat ezartzen duenak, lehenetsitako substantzien isuriak uretara murriztea.

j) Ugalketarako arriskutsuak diren produktu edo substantzia karzinogenikoen, mutagenikoen eta toxikoen erabilera (CMR) ezabatzea edo murriztea; bereziki, R 50/53 arriskuko substantziak.

k) Azken produktuan material birziklatuak eta kalterik egiten ez dutenak sartzea.

l) Azken produktua biodegradagarria izatea.

IV. KAPITULUA

KLAUSULA SOZIALAK, INGURUMENEKOAK EDO BESTE POLITIKA PUBLIKOEI BURUZKOAK GAUZATZE FASEAN TXERTATZEA

1. ATALA

GAUZATZE BALDINTZAK HIZKUNTZA ARLOAN

20. artikulua.– Hizkuntzaren araubidea betetzea.

Foru sektore publikoko kontratazio organoek egindako kontratuek hizkuntz ofizialtasun bikoitzaren araudia bete beharko dute, hala nola, Euskadiko Estatutuaren 6. artikulua, 1982ko azaroaren 24ko 10/82 Legea, euskararen erabilera normalizatzeko oinarrizkoa, eta gaiari buruzko gainerako autonomia eta foru araudia.

2. ATALA

GAUZATZE BALDINTZAK BERDINTASUN ARLOAN

21. artikulua.– Baldintza teknikoen orrien berdintasun gaiko edukia.

1.– Genero ikuspegia bera kontratuaren xedearen ezaugarri tekniko bat bada, kontratuaren baldintza teknikoen orrietan honako eduki hauek jasoko dira:

a) Azterketa bereizia kontratuaren eremuan emakumeek eta gizonek bizi duten egoeraren gainean, kontratuaren bidez lortu nahi diren helburuen zehaztapena eta helburu horiek lortzeko neurriak, enpresa edo entitate esleipendunak bete beharko dituenak; enpresa edo entitate lizitatzaileak aurkeztu beharreko proposamen teknikoan plan bat aurkeztu beharko da, berdintasun arloko berariazko prestakuntza duen teknikariak egina, neurri horien aplikaziorako ekintzak zehazten dituena.

Halaber, aipatu dokumentazioan ezarri ahal izango da kontratua eskuratu nahi duten enpresa edo entitateek aurkeztu beharko dutela ezarritako helburuak betetzeko ekintza zehatzak; kasu horietan esleipen irizpide moduan baloratuko dira, 15.a) atalak ezarritakoarekin bat.

b) Memoria bat aurkeztu beharko dela kontratuaren objektuaren betetzea justifikatzeko dokumentazioan; bertan aipatu beharko dira kontrataturiko zerbitzuen erabiltzaile edo onuradunen eta kontratua gauzatu duen lantaldeko pertsonen datu bereiziak, eta dagokion adierazleak, beti ere hartutako neurrien eragina zein izan den ebaluatzeko. Inpaktuari buruzko memoria berdintasun eremuan berariazko trebakuntza duen teknikari batek egin beharko du.

2.– Aurreko atalaren ondorioetarako, genero ikuspegia ez denean kontratuaren xedetzat jotzen, hori justifikatzeko txosten arrazoitua aurkeztu beharko da.

3. ATALA

GAUZATZE BALDINTZA BEREZIAK

1. AZPIATALA

XEDAPEN OROKORRAK

22. artikulua.– Gauzatze baldintza bereziak sartzea.

1.– Foru sektore publikoko entitateen kontratazio prozeduretako administrazio klausula berezien orriek edo, hala badagokio, kontratazioaren prestatze dokumentazio baliokideak, alderdi sozialak, ingurumenekoak eta beste politika publiko batzuei buruzkoak balioesten dituzten gauzatze baldintza bereziak jasoko dituzte, hurrengo artikuluetan jaso moduan.

2.– Atal honetan aurreikusten diren gauzatze baldintza bereziak foru sektore publikoko kontratazio organoek egindako kontratazioetan sartuko dira, betiere kontratuaren ezaugarriek aukera ematen badute.

3.– Kontratazio organoak erabaki dezake, salbuespenez, kontratuaren ezaugarriak ez direla egokiak kapitulu honetan aurreikusten diren gauzatze baldintza bereziak sartzeko, edo zehazten direnak baino portzentaje edo betekizun apalagoak direla egokiak. Horrelakoetan, zuritu beharko da zergatik ez diren komeni irizpide horiek, espedientearekin batera joango den txosten arrazoitu batean.

4.– Enpresa edo entitate lizitatzaileek atxikimendu eta konpromiso dokumentu bat aurkeztu beharko dute, adieraziz beteko dituztela alderdi sozialei, ingurumenekoei edo beste politika publiko batzuei buruzko gauzatze baldintza bereziak.

23. artikulua.– Gauzatze baldintza bereziak ez betetzearen ondorioak.

1.– Foru sektore publikoko entitateen kontratazio prozeduretako administrazio klausula berezien orrietan edo horien baliokide den dokumentazioan ezarritako gauzatze baldintza bereziak bete ezean, kontratua amaitutzat joko da, baldin eta kontratu betekizunak oinarrizko izaera badu, Sektore Publikoko Kontratuen Legearen Testu Bateginaren 223.f) artikuluari jarraikiz.

Gainerakoetan, arau horretako 212.1 artikuluan aurreikusitako zigorra ekar dezake, zeina kontratuaren aurrekontuaren % 10 artekoa ere izan baitateke, ez betetzearen larritasunaren arabera.

2.– Ez betetzeari funtsezko izaera eman zaionean edo zigorrak ezartze aldera oso larritzat jo denean, ez betetze larritzat joko dira kontratatzeko debeku izateko ondorioetarako, beti ere Sektore Publikoko Kontratu Legearen Testu Bateginak dioena betez.

3.– Foru sektore publikoko kontratazio organoek kontuan hartuko dute gauzatze baldintza bereziak modu egokian bete izana administrazio klausula berezien orrietan edo horren baliokide den dokumentazioan ezarritako luzapenei buruz erabakitzean; bereziki, kontratuari atxikitako langileen lan baldintzak mantendu izana hartuko da kontuan.

Zehazki, ez dira kontratuak luzatuko entitate esleipendunak alde bakarreko erabakiz okerragotu badizkie kontratuari atxikitako langileei esleipen unean indarrean zegoen hitzarmen edo paktuan jasotako lan baldintzak.

Halaber, eskulanari buruzko lan izaerako alde bakarreko erabakiak hartzen badira eta, erabaki horien ondorioz, kontratuaren prezioa baldintzatu zuten funtsezko lan baldintzen txartze bat gertatzen bada kontratuari atxikitako langileei dagokienez, dagokion gestio neurriak hartuko dira indarrean dagoen kontratu horren prezioa berrikusteko, beti ere kontratu horren baldintza administratibo berezien orrian edo, hala badagokio, kontratazio arloko jarraibideetan ezarri moduan.

2. AZPIATALA

KLAUSULAK TXERTATZEKO ESPARRU MATERIALAK

24. artikulua.– Gauzatze faseko baldintza bereziak emakumeen eta gizonen berdintasunari dagokionez.

1.– Foru sektore publikoko entitateen kontratazio prozeduretako administrazio klausula berezien orriek edo dagokion dokumentazio baliokideak gauzatze baldintza berezi hauek, edo antzeko beste batzuk, jasoko dituzte emakumeen eta gizonen berdintasunari dagokionez.

a) Enpresa esleipendunak berdintasuna bermatuko duten neurriak ezarriko ditu, arlo hauetan: lanpostua eskuratzea; sailkapen pertsonala; sustapena; iraupena; prestakuntza; ordainketak; kalitatea eta lan egonkortasuna; jardunaldiaren iraupena eta antolaketa; eta bizitza pertsonala, familia eta lana bateratzeko neurriak, 2007ko martxoaren 22ko 3/2007 Lege Organikoak, emakumeen eta gizonen berdintasun eragingarriari buruzkoak, dioenari jarraikiz.

b) Sektoreren batean emakumeen presentzia urria bada, enpresa esleipendunak emakume portzentaje jakin bat kontratatu beharko du kontratua gauzatzeko. Portzentaje horrek bost puntu altuagoa izan beharko du gutxienez, genero eta jarduera motaren araberako biztanleria aktiboaren Eustaten datu estatistikoetan agertzen dena baino. Orriek berek zehaztu beharko dute zenbatekoa den emakumeen bataz besteko portzentajea jarduera sektore horretan Eustaten datuen arabera.

c) Enpresa edo entitate esleipendunak sortzen duen dokumentazio, publizitate, irudi edo material guztiek hizkuntza ez sexista erabili beharko dute, saihestu beharko dute emakumeen irudi diskriminatzaile edo estereotipo sexista oro, eta irudi jakin bat sustatu beharko dute, berdintasun balioak dituena, emakume eta gizonen presentzia orekatu bat, aniztasuna, ardura partekatua eta rol eta genero identitate plurala.

d) Enpresa edo entitate esleipendunak bermatu egin beharko du behar adina neurri hartuko direla sexu jazarpena eta sexua dela-eta laneko jazarpena prebenitzeko, baldin eta kontratua gauzatzeko langile taldean hamar langile baino gehiago badaude.

25. artikulua.– Gauzatze baldintza bereziak lan merkatuan sartzeko zailtasunak dituztenen enplegua sustatzeko.

1.– Foru sektore publikoko entitateen kontratazio prozeduretako administrazio klausula berezien orriek edo, hala badagokio, kontratazioaren prestatze dokumentazio baliokideak gauzatze baldintza berezi bat jasoko dute lan merkatuan sartzeko zailtasunak dituztenen enplegua sustatzeko, baldin eta kontratuaren ezaugarriek ahalbidetzen badute.

2.– Enpresa edo entitate esleipendunak lan merkatuan sartzeko zailtasunak dituzten pertsonak kontratatu behar ditu: gutxienez, kontratua gauzatuko duten langile guztien % 10. Zenbaketa hori egiteko, kontuan hartuko dira enpresek edo entitate azpikontratatuek prestazioa zati batean gauzatzeko enplegatzen dituzten pertsonak.

Portzentaje hori kontratua gauzatzeko enplegatuko diren langileen urteko lanordu guztien gainekoa izango da. Ondorio horietarako, kontuan izango dira kasuan kasu azpikontratatutako enpresa edo entitateek kontratatuak dituzten pertsonen lan orduak, bai xede nagusitzat lan aurkitzeko zailtasunak dituzten pertsonen lan merkaturatzea duten enpresa edo entitatekoak, bai gainerako enpresa edo entitatekoak ere.

3.– Lan merkatuan sartzeko zailtasun berezia duten pertsonatzat joko dira Diputatuen Kontseiluaren erabaki bidez aldiro zehazten diren taldeetan sartzen diren pertsonak.

4.– Enpresa edo entitate esleipendunak dokumentazio honen bidez egiaztatuko du proposamen teknikoan hartutako konpromisoak betetzen dituela:

a) Kontratua sinatuta, hilabeteko epean, enpresa edo entitate esleipendunak pertsona hautatuen inguruko datuak jakinaraziko ditu, eta, horrekin batera, Gizarte Segurantzako altaren eta lan kontratuaren kopia aurkeztuko ditu.

b) Hilero eta kontratuak irauten duen bitartean, enpresa esleipendunak TC1 eta TC2 dokumentuak eta matrikula liburua aurkeztuko beharko dizkio kontratuaren arduradunari, betekizuna egiaz bete dela egiaztatzeko.

Kontratuaren arduradunak dokumentazio hori edo beste bat eskatu ahal izango dio enpresa esleipendunari, hartara kontratuaren betetze maila kontrolatzeko eta ebaluatzeko; orobat eskatu ahal izango dio jarraipen bilerak egitea eta aldizkako ebaluazio txostenak ematea.

Dokumentazio hori aurkeztu beharra kontratua arautuko duten administrazio klausula berezien orrietan jasoko da.

5.– Langileak subrogatu behar badira, edo beste egoeraren bat gertatzen bada kontratua gauzatzerakoan eta ezin bada portzentaje hori bete, enpresak profil horretako langileak kontratatu beharko ditu kontratuaren iraunaldian behar dituen kontratazio, baja edo ordezkapen guztietan, harik eta portzentaje horretara iritsi arte.

26. artikulua.– Gauzatze baldintza bereziak gizarte bazterkeria egoeran edo arriskuan daudenentzat enplegua sustatzeko.

1.– Foru sektore publikoko entitateen kontratazio prozeduretako administrazio klausula berezien orriek edo, hala badagokio, kontratazioaren prestatze dokumentazio baliokideak gauzatze baldintza berezi bat jasoko dute, hartara gizarte bazterkeriaren arriskuan edo egoeran dauden pertsonen insertzio soziolaborala sustatzeko, baldin eta kontratuaren ezaugarriek ahalbidetzen badute.

2.– Enpresa edo entitate esleipendunak gizarte bazterkeriaren arriskuan edo egoeran dauden pertsonak kontratatu behar ditu: gutxienez, kontratua gauzatuko duten langile guztien % 10. Zenbaketa hori egiteko, kontuan hartuko dira enpresek edo entitate azpikontratatuek prestazioa zati batean gauzatzeko enplegatzen dituzten pertsonak.

Portzentaje hori kontratua gauzatzeko enplegatuko diren langileen urteko lanordu guztien gainekoa izango da. Ondorio horietarako, kontuan izango dira kasuan kasu azpikontratatutako enpresa edo entitateek kontratatuak dituzten pertsonen lanorduak, bai xede nagusitzat gizarte bazterkeria egoera edo arriskuan dauden pertsonen gizarteratzea duten enpresa edo entitatetakoak, bai gainerako enpresa edo entitatetakoak ere.

3.– Artikulu honen ondorioetarako, eskumeneko zerbitzu publikoek egiztatuko dute bazterkeria egoera edo arriskua. Diputatuen Kontseiluak, Gizarte Politikako Departamentuaren proposamenez, gizarte bazterkeria arriskuan edo egoeran dauden pertsona taldeak zehaztu ahal izango ditu.

4.– Administrazio klausula berezien orriek edo dagokion dokumentazio baliokideak zehaztuko dute zenbat teknikari espezializatu behar diren langileei gizarteratzen laguntzeko kasu bakoitzean. Laguntza hori zerbitzu publiko eskumendunek egin ahal izango dute, beren eskumeneko esku hartze soziolaboraleko programen markoan.

5.– Langileak subrogatu behar badira, edo beste egoeraren bat gertatzen bada kontratua gauzatzerakoan eta ezin bada portzentaje hori bete, enpresak profil horretako langileak kontratatu beharko ditu kontratuaren iraunaldian behar dituen kontratazio, baja edo ordezkapen guztietan, harik eta portzentaje horretara iritsi arte.

27. artikulua.– Gauzatze baldintza bereziak irizpide etikoei eta merkataritza justuari dagokienez.

1.– Foru sektore publikoko entitateen kontratazio prozeduretako administrazio klausula berezien orriek edo dagokion dokumentazio baliokideak gauzatze baldintza berezi bat jasoko dute enpresa edo entitate esleipendunak zerbitzua ematean edo hornidura entregatzean merkataritza justuko produktuak erabil ditzaten, beti ere kontratuaren ezaugarriek aukera ematen badute.

2.– Betekizuna hauen ingurukoa izango da:

a) Hainbat produktu erabiltzearen betebeharra, esaterako, kafea, tea, infusioak, kakaoa, ehunkiak edo beste batzuk.

b) Hainbat produkturen aurrekontu guztiaren zenbateko edo portzentaje bat merkataritza justuko produktuei gordetzeko betebeharra.

3.– Merkataritza justuko produktuak erabiltzen direla egiaztatzeko, nazioarte mailan dauden bi berme-sistemetako bat erabili beharko da: WFTO egiaztagiria, Merkataritza Justuko Munduko Antolakuntzak ematen duena, zeinak entitateak abalatzen baititu; edo Fairtrade zigilua, Merkataritza Justuaren Zigiluaren Antolakuntzak ematen duena, zeinak produktuak egiaztatzen baititu eta edozein enpresarentzat baita irisgarri. Baliokidea den beste edozein agirik ere balioko du.

4.– Kontratazio organoak berariaz adierazten duenean egokia dela, hornikuntza kontratuetako klausula berezien orriek gauzatze baldintza berezi bat jasoko dute, zeinak ezarriko baitu langileen oinarrizko eskubideak errespetatu behar direla ekoizpen kate osoan, baita Nazioarteko Lan Antolakuntzak ezarritako oinarrizko konbentzioak ere. Bereziki:

a) 29. eta 105. konbentzioak, bortxazko lanak desagertzeari buruzkoak.

b) 87. eta 98. konbentzioak, askatasun sindikalari, elkartzeko askatasunari eta negoziazio kolektiboari buruzkoak.

c) 100. konbentzioa, balio berdineko lanetan gizonen eskulana eta emakumeen eskulana berdin ordaintzari buruzkoa.

d) 111. konbentzioa, lana emateko edo lan baldintzak ezartzeko orduan arraza, kolorea, sexua, erlijioa, iritzi politikoa, estrakzio nazionala edo jatorri soziala direla-eta diskriminatzearen aurkakoa.

e) 138. konbentzioa, umeen esplotazioa eta lana ezabatzeari buruzkoa.

f) 182. konbentzioa, haurren lan txarrenak debekatzeari eta berehala ezabatzeko ekintzari buruzkoa.

Enpresa lizitatzaileak horiek betetzen direla egiaztatu beharko du:

a) SA 8000/Fair Wear Foundation, Made in Green edo baliokide den jarraibide kodearen egiaztagiriaren bidez.

b) Kanpoko enpresek egindako auditoria sozialeko egiaztagiriaren bidez.

c) Zinpeko aitorpenaren bidez edo zuzenbidean onartutako edozein frogabideren bidez, zeinak erakusten baitu betetzen direla Europako Parlamentuaren 2005/2245 (IMI) Ebazpenak merkataritza justuari eta garapenari buruz ezarritako estandarrak.

28. artikulua.– Gauzatze baldintza bereziak enplegu kalitateari eta oinarrizko lan eskubideei dagokienez.

1.– Foru sektore publikoko entitateen kontratazio prozeduretako administrazio klausula berezien orriek edo, hala badagokio, kontratazioaren prestatze dokumentazio baliokideak gauzatze baldintza berezi bat jasoko dute, kontratuaren ezaugarriek hala ahalbidetzen badute, helburu honekin: kontratua gauzatuko duten langileen lanari, Gizarte Segurantzari eta laneko segurtasun eta osasunari buruz indarrean dauden legezko xedapenak eta erregelamenduei buruzko xedapenak betearaztea.

Zehazki, gauzatze baldintza berezi horren bidez enpresa edo entitate esleipendunari betearazi nahi zaizkio enpresa kontratistaren jarduera sektoreko eremu txikieneko azken lan hitzarmen sektorialean ezarritako baldintzak, beti ere kontratuari atxikita dauden langileei dagokienez, eta indarrean egon litezkeen eta hitzarmen horietan ezarritakoa hobe dezaketen enpresako beste hitzarmen edo paktuen kalterik gabe.

Enpresa edo entitate esleipendunak aipatutako betekizunak betetzen dituela egiazta dezan kontratazio organoaren aurrean, administrazio klausula berezien orriek ezarriko dute nola egiaztatuko den bete direla Gizarte Segurantzako kotizazio betekizunak eta kontratua gauzatzeari lotutako langileen kontratuak formalizatzeko betekizunak eta laneko segurtasun zein osasunari buruzko dokumentu hauek egin direla: lan arriskuak prebenitzeko plana, laneko segurtasun zein osasunarentzako arriskuen ebaluazioa, prebentzio jardueraren plangintza.

2.– Aurreko atalean aipatu gauzatze baldintza bereziak barne hartzen du enpresa edo entitate esleipendunak azpikontratatzen dituen enpresei betekizun horiek betearazteko zeregina.

Ondorio horietarako, administrazio klausula berezien orriek, edo, hala badagokio, kontratazioaren prestatze dokumentazioak ezarri beharko dute enpresa edo entitate esleipendunak kontratazio organoaren aurrean egiaztatu egin beharko duela enpresa edo entitate azpikontratatuak bete dituela artikulu honetan aipatzen diren betekizunak.

Zehazki, dokumentazio horretan, gutxienez, honako betekizun hauek ezarriko dira, 4. artikuluaren 3. atalean ezarritakoaren kalterik gabe:

a) Azpikontratatutako jarduerari ekin aurretik, azpikontratatutako enpresa edo entitateetako langileen Gizarte Segurantzako alta eta afiliazioa egiaztatzekoa eta hori kontratazio organoari jakinaraztekoa.

b) Azpikontratatutako jarduerari ekin aurretik, lan kontratuak indarrean aplikagarri den araudiarekin bat egin direla egiaztatzekoa eta hori kontratazio organoari jakinaraztekoa.

3.– Halaber, gauzatze baldintza berezi bat ezarri ahal izango da, baldin eta kontratuaren ezaugarriek ahalbidetzen badute, zeinaren arabera enpresa esleipendunak kontratua gauzatzera bideratzen dituen langileen arteko % 30a kontratu finkodunak izan beharko diren; ekonomia sozialeko enpresa bada, portzentaje hori langile bazkideena izango da.

4.– Kontratazio organoak edonoiz eskatu ahal izango dio kontratistari erakuts ditzala betekizun horiek bete direla egiaztatzen dituzten dokumentuak; orobat, jarraipen bilerak edo aldizkako ebaluazio txostenak eska ditzake, betiere betekizun horiek betetzen direla zaintzearren.

29 artikulua.– Gauzatze baldintza bereziak elikagaien erosketa publikoari dagokionez.

1.– Foru sektore publikoko entitateen kontratazio prozeduretako administrazio klausula berezien orriek edo dagokion dokumentazio baliokideak gauzatze baldintza berezi bat jasoko dute, baldin eta kontratuak nekazaritza produktuekin zerikusia badu, zeinaren arabera eskatuko baita produktu ekologiko, fresko edota garaikoak, Jatorri Izendapen Babestua edo Adierazpen Geografiko Babestua duten produktuak, nahiz horien baliokideak kontsumitzea zerbitzuaren prestazioan edo hornikuntzaren edukian.

2.– Betekizun hori, kontratazio organoak zehaztuko duena, honela ezartzen da:

a) Hainbat produkturen gainean: barazkiak, fruta, haragia, esnekiak edota arraina, besteak beste.

b) 1. atalean aipatu produktuentzat zenbateko edo portzentaje jakin bat ezarriz, betiere produktu horientzat gordetako aurrekontu osoaren gain.

3.– Pertsona edo entitate esleipendunak elikagai horien dagokien faktura eta ziurtagiriak aurkeztu beharko ditu hiru hilean behin, adieraziz bai horien pisua, bai ziurtagiria ematen duen kontrol agintari edo erakundea.

4.– Foru arau honen ondorioetarako, nekazaritza ekologikotzat joko da honako hau, ekologia produktuen ekoizpenari eta etiketatuari buruzko 2007ko ekainaren 28ko CE 834/2007 Erregelamenduari jarraikiz: baliabide naturalak egoki erabiltzen dituen nekazaritza laborantza sistema, modu iraunkorrean eta orekatuan, produktu kimikoak edo genetikoki aldatuak izan diren organismoak erabili gabe, ez ongarritzeko, ez plagei aurre egiteko, hartara elikagai organikoak lortzeko, lurrek emankor jarraitzeko eta ingurumena errespetatzeko.

Egiaztatzeko, elikagai horien etiketan ES-ECO-026-VAS kodeak eta Euskadiko Nekazaritza eta Elikadura Ekologikoaren Kontseiluaren (ENEEK) zigiluak agertu behar dute; bestela, produktuaren benekotasuna egiaztatzen duen entitatearen izena eta kodea.

5.– Foru arau honen ondorioetarako, produktu freskotzat joko da Elikagaien Espainiar Kodearen testua onartzen duen 1967ko irailaren 21eko 2486/1967 Dekretuan produktua freskotzat jotzeko ezarritako baldintzak betetzen dituena, baita produktu bakoitzaren araudi espezifikoak horretarako ezartzen dituen baldintzak betetzen dituena ere.

6.– Foru arau honen ondorioetako, garaiko produktutzat joko dira administrazio klausula berezien orrietan edo dagokion dokumentazio baliokidean nahitaez jaso beharko den garaiko elikagaien egutegian ezartzen direnak.

V. KAPITULUA

ZIGORRAK EZARTZEKO ERREGIMENA

30. artikulua.– Ez betetzeak zehaztea administrazio klausula berezien orrietan.

1.– Foru sektore publikoko entitateen kontratazio prozeduretako administrazio klausula berezien orriek edo dagokion dokumentazio baliokideak kontratuaren esleipenean ezarri diren izaera sozialeko, ingurumenari buruzko edo beste politika publiko batzuei buruzko betekizunen ez betetzeen zerrenda jasoko dute, zigorrak ezartze aldera.

Ez da zigorrik ezarriko, kontratua suntsitu baizik, foru arau honen 14 eta 23 artikuluan ezarritakoaren arabera funtsezko izaera eman zaien betekizunak ez betetzeak.

2.– Ez betetzeak arintzat, larritzat edo oso larritzat joko dira.

Nolanahi ere, ez betetze oso larritzat jotzen dira honako betekizun hauek ez betetzea:

a) Genero ikuspegia kontratuaren xedearen ezaugarri tekniko bat den kasuetan, ez betetzea emakume eta gizonen berdintasuna lortzeko zehaztutako helburuekin aurkeztutako lan planeko ekintzak, baldin eta ekintza horiek kontratuaren prestatze dokumentazioan oinarrizkotzat jo badira, baita enpresa edo entitate esleipendunak ez badu bete kontratua gauzatzeko lan talderako edo lan talde horretako ardura postuetarako emakume portzentaje bat kontratatzeko bere konpromisoa.

b) Lan merkatuan sartzeko zailtasunak dituzten pertsonen enplegua sustatzea kontratuaren objektuaren parte denean, enpresa edo entitate esleipendunak ez betetzea kontratua gauzatzeko lan talderako perfil horietako dagokion pertsona portzentajea kontratatzeko betekizuna.

c) Bazterkeria egoeran edo arriskuan dauden pertsonen enplegua sustatzea kontratuaren objektuaren parte denean, enpresa edo entitate esleipendunak ez betetzea kontratua gauzatzeko lan talderako perfil horietako dagokion pertsona portzentajea kontratatzeko betekizuna, baita langile tekniko espezializatuen bidez gizarteratzeko laguntza emateko betekizuna erabat edo funtsean ez betetzea ere.

d) Jangela edo catering zerbitzuetako menuak egin behar diren kasuetan, ez betetzea honako produktu hauek erabiltzeko betekizuna: produktu ekologiko, fresko edo/ta garaiko produktuak, Jatorri Izendapen Babestuko edo Adierazpen Geografiko Babestuko produktuak edo ezaugarri tekniko baliokideak dituzten produktuak.

3.– Lan esparruan, ez betetzeak zehazte aldera, Foru Sektore Publikoko obra kontratuetan klausula sozialak txertatzeko 2013ko uztailaren 17ko 4/2013 Foru Arauak ezarritakoa hartuko da kontuan, bai enpresa edo entitate esleipendunaren zuzeneko betekizunei dagokienez, bai enpresa edo entitate azpikontratatuenen berme betekizun horiek dagokienez.

31 artikulua.– Zigorrak zehaztea klausula administratibo berezien orrietan.

1.– Administrazio klausula berezien orrietan edo dokumentazio baliokidean, zigorrak aurreikusiko dituzte enpresa edo entitate esleipendunek beren gain hartu dituzten betekizunak betetzen ez dituztenerako, eta zigorren gehieneko eta gutxieneko mugak ezarriko dituzte. Zigor horiek ezin izango dira inoiz izan kontratuaren aurrekontuaren % 10 baino handiagoak.

Exekuzio baldintza berezi moduan ezarritako betekizunak ez badira betetzen, honako zigor ekonomiko hauek jarriko dira, baldin eta kontratua suntsitzea ez badagokio:

– Ez betetze arinengatik kontratuaren prezioaren % 4 gaindituko ez duen zigorra jarriko da.

– Ez betetze larriengatik kontratuaren prezioaren % 4 baino zigor handiagoa jarriko da, baina prezio horren % 7 gainditu gabe.

– Ez betetze oso larriengatik kontratuaren prezioaren % 7 baino isun handiago jarriko da, baina prezio horren % 10 gainditu gabe.

2.– Halaber, dokumentazio horretan ezarriko da zigor horiek ordainketa oso edo partzial gisa ordaindu beharrezkotik dagokion zenbatekoa kenduz gauzatuko direla edo, hala balegokio, eratutako bermetik, aipatutako ziurtapenetatik kendu ezin direnean.

32. artikulua.– Kontratuaren jarraipena.

1.– Kontratazio organoak kontratua gainbegiratzeko eta prestazioa bermatzeko izendatzen duen pertsona edo entitate arduradunak egingo die jarraipen, kontratuari jarraikiz, enpresa edo entitate esleipendunak bere gain hartutako kontratu betekizunei.

2.– Kontratuaren pertsona edo entitate arduradunak foru arauan aurreikusten diren betekizunen balizko arau hausteen berri emango dio kontratazio organoari; hala badagokio, zigorrak ezartzeko edo kontratua suntsiarazteko prozedura hastea proposatuko du.

LEHENENGO XEDAPEN GEHIGARRIA.– Jarraipen eta aholkularitza organoa sortzea.

Diputatuen Kontseiluak jarraipen organo berezi bat sortu ahal izan du foru arau honen betetze maila egiaztatzeko, hartara argitzeko ea betetzen ari ote diren bertan zerrendatzen diren klausulak eta lortzen ari ote diren bilatzen diren interes orokorreko helburu publikoak.

BIGARREN XEDAPEN GEHIGARRIA.– Gizarte zerbitzuen esparruko kontratu-programak.

Alderdi sozialak, ingurumenekoak eta beste politika publiko batzuei buruzkoak balioesteko foru arau honetan jasotzen diren jarraibide eta irizpideak kontuan hartuak izango dira Gizarte Politikako Departamentuak eta bere menpeko erakunde publikoek Gizarte Zerbitzuei buruzko 2008ko abenduaren 5eko 12/2008 Legearen baitan egiten dituzten kontratu programetan.

HIRUGARREN XEDAPEN GEHIGARRIA

Gipuzkoako Foru Aldundiak dagozkion ekimenak onartuko ditu, lurralde historiko honetako foru-sektore publikoan eta toki-erakundeetan energia-errendimendu handiko ondasun eta zerbitzuak erostea lortzeko, dagokion Europako legeriarekin bat eginez.

LAUGARREN XEDAPEN GEHIGARRIA

Diputatuen Kontseiluak idatzizko informazioa emango die Gipuzkoako Batzar Nagusiei Foru Arau honen betetze mailari buruz aurreikusten dituen klausulak txertatzeari dagokionez eta lortu nahi dituen interes orokorreko helburu publikoen lorpenari dagokionez, bai eta, hala badagokio, haren helburuak era egokienean betetzeko sartu beharko liratekeen aldaketen proposamenak ere.

XEDAPEN IRAGANKORRA

Foru arau hau ez da izango aplikagarri berau indarrean jarri aurretik tramitatzen hasiak diren kontratazio eta esleipenetan.

AMAIERAKO XEDAPENA.– Indarrean jartzea.

Foru arau hau Gipuzkoako Aldizkari Ofizialean argitaratu ondorengo egunean jarriko da indarrean.

Azterketa dokumentala