RSS
16. zk., 2015eko urtarrilaren 26a, astelehena
- Bestelako formatuak:
- PDF (222 KB - 4 orri.)
- EPUB (196 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
XEDAPEN OROKORRAK
GIPUZKOAKO FORU ALDUNDIA
339
14/2014 FORU ARAUA, abenduaren 10ekoa, lanari utzi ondorengo egoera jakin batzuetarako zerga-tratamendu berezia ezartzen duena.
GIPUZKOAKO DIPUTATU NAGUSIAK
Jakinarazten dut Gipuzkoako Batzar Nagusiek onartu dutela «14/2014 Foru Araua, abenduaren 10ekoa, lanari utzi ondorengo egoera jakin batzuetarako zerga-tratamendu berezia ezartzen duena»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.
Donostia, 2014ko abenduaren 10a.
Diputatu nagusia,
MARTIN GARITANO LARRAÑAGA.
HITZAURREA
Krisi ekonomikoaren intentsitatearen ondorioz, azken urteetan garatu den politika fiskalak lehentasuna eman die, batetik, kontu publikoak berriro orekatzeari eta, bestetik, baliabide nahikoak biltzeari egoera ekonomiko latzak gastu publikoan eragin duen gehikuntzari behar beste bermerekin aurre egiteko. Horren erakusgarri dira, besteak beste, 2013ko abenduaren 27ko 13/2013 Foru Araua, zerga alorreko zenbait aldaketa onartu zituena, eta berriki onetsi diren zerga batzuen erreforma integralak, hain zuzen, Sozietateen gaineko Zergarena, Pertsona Fisikoen Errentaren gaineko Zergarena eta Ez-egoiliarren Errentaren gaineko Zergarena.
Gainera, Gipuzkoako Batzar Nagusiek jokabide berezia izan dute krisi ekonomiko eta finantzarioaren ondorioek gehien kaltetu dituzten zergapekoen kasuetan, hala nola finantza entitateekin hartutako hipoteka konpromisoei erantzun ezin izateagatik beren etxebizitza galdu duten pertsonen kasuan. Izan ere, halakoetan, Batzar Nagusiek salbuespenak eta aldaketak ezarri dituzte pertsona horiek etxetik botatzeko agindu judizialen ondorioz hipoteka exekutatzeko egiten diren eragiketen gaineko kargei lotutako tributazio arauetan.
Bestalde, ekonomia soziala deritzonak garrantzi handia du Gipuzkoako Lurralde Historikoan, zeinaren ezaugarri nagusietako bat den langileek beren enpresetan parte hartzea, bai auto-kudeaketa formularen bidez (sozietate kooperatibo edo lan sozietateetako kapitaleko partaidetzaren bitartez), bai langileek zerbitzuak ematen dituzten entitateari baliabide ekonomikoak emanez (kapitaleko partaidetzen edo maileguen bidez).
Azkenaldian, ekonomia sozialaren eremuan nabaritu da, bereziki, krisi ekonomikoaren gogortasuna. Izan ere, sektore horretako langileek inplikazio handia dute enpresaren kapitalean zein kudeaketan; horren ondorioz, enpresok oso egoera ahulean geratu dira ziklo ekonomikoaren une latzenetan, eta, kasu batzuetan, hartzekodunen konkurtsora jo behar izan dute, finantzaketa egoerak beste aukerarik eman ez dienean aurreko garai batean beren sektorean trakzio enpresa bihurtutako sozietateei.
Are gehiago, halako enpresetako langileek aldi baterako utzi zizkieten beren enpresei lan bizitza amaitu ondoren jaso behar zituzten baliabideak –eskubidez zegozkienak–, gainerako lankideei laguntzeko eta elkartasuna adierazteko neurri gisa, enpresaren jardunari eusteko eta palanka efektu finantzarioak ekar ditzakeen arriskuak murrizteko. Hori dela eta, langileok bereziki kaltetuta geratu dira entitateek azkenean konkurtso-prozedura eskatu dutenean.
Pertsona Fisikoen Errentaren gaineko Zergari buruzko arautze arrunta, errenta iturri guztiei aplikatzen zaiena, ez dago egituratuta egoera ekonomiko patologikoak aintzat hartzeko. Aitzitik, inguruabar ekonomiko arrunten gainean eraiki zen, eta, horregatik, arau espezifiko bat behar da aparteko egoerei erantzuteko nahiz ahalmen ekonomiko txikiena duten zergadunak izan litezkeen neurriz kanpoko ondorioetatik babesteko.
1. artikulua.– Aplikazio eremua.
Foru arau honetan xedatutako zerga tratamendua honako baldintza hauek betetzen dituzten Pertsona Fisikoen Errentaren gaineko Zergaren zergapekoei aplikatuko zaie:
a) Entitate batean bazkide gisa zerbitzua eman izana bost urtez, gutxienez, lanari utzi aurretik.
b) Jaso ez izana lanari utzi ziotenean bazkidea izateagatik eskubidez zegozkien zenbateko guztiak edo batzuk, arrazoi hauetako bat dela eta:
i) Zegozkien kopuruak ordaintzeko luzapena ezarri edo adostu izana.
ii) Langile horiek zerbitzuak ematen zituzten entitateari mailegu bat eman izana.
iii) Kopuru horiek bazkide ez-aktibo izanda kapitalari eman izana aldi baterako.
c) Zuzendaritza edo administrazio eginkizunetan jardun ez izana lanari utzi aurreko bost urteetan.
d) Entitateko kapitalaren zuzeneko edo zeharkako partaidetza portzentajea inoiz ere ez izatea 100eko 20tik gorakoa, lanari utzi aurreko bost urteetan. Portzentaje horretan orobat sartzen dira zergadunarekin harremana duten pertsonen partaidetzak; Aberastasunaren eta Fortuna Handien gaineko Zergari buruzko 2013ko abenduaren 18ko 10/2012 Foru Arauko 27.3.b) artikuluak zehazten du zein motatakoa izan daitekeen harreman hori.
e) Entitatea hartzekodunen konkurtsoan dagoela adierazteko autoa lanari utzi ondorengo bost urteetan eman izana.
f) Aurrekoaren ondorioz, aurrez ikustea zergadunak ezin izango dituela berreskuratu artikulu honetako b) letran aipatzen diren zenbateko guztiak.
2. artikulua.– Langileek lanari utzi ziotenean eskubidez zegozkien zenbatekoen ondoriozko ondare irabazien zerga tratamendua.
Bat.– Foru arau honetako 1. artikuluan ezarritako baldintzak betetzen dituzten zergadunek aukera izango dute lanari utzi ziotenean bazkidea izateagatik eskubidez zegozkien zenbatekoen ondoriozko ondare irabaziak egozteko; baina irabazi horietatik bakarrik egotzi ahal izango dute foru arau honetako 1. artikuluko b) letrako zenbatekoei dagokien zatia, eta foru arau honetako 1. artikuluko f) letran adierazitako ondare galera egotzi behar den unean.
Bi.– Aukera hori baliatzeko epea beste epe hau amaitzearekin batera bukatuko da: entitatea hartzekodunen konkurtsoan dagoela adierazteko autoa eman den zergaldiko Pertsona Fisikoen Errentaren gaineko Zergaren autolikidazioa egiteko borondatezko epea.
Hiru.– Artikulu honetan xedatutakoari heldu dioten zergadunek eskubidea izango dute foru arau honetako 2.bat artikuluko ondare irabaziak direla eta Pertsona Fisikoen Errentaren gaineko Zergan ordaindutako zati proportzionala itzul dakien. Kasu horretan, foru arau honetako 2.bi artikuluko aukera baliatu ondorengo sei hilabeteen barruan itzuliko die zati hori Zerga Administrazioak, baina berandutze interesik gabe.
3. artikulua.– Zergadunek jaso ez dituzten zenbatekoen ondoriozko galerak konpentsatzea.
Bat.– Foru arau honetako 2. artikuluan ezarritako araubideari heldu dioten zergadunek kasuan kasuko ekitaldiko Pertsona Fisikoen Errentaren gaineko Zergaren zerga oinarrian sartu gabeko ondare irabazien (foru arau honetako 2. artikuluan aipatuak) zatia erabiliko dute foru arau honetako 1. artikuluko f) letran adierazitako ondare galerak konpentsatzeko. Baina konpentsatu gabeko gainerako zenbatekoari ezin izango diote aplikatu Pertsona Fisikoen Errentaren gaineko Zergari buruzko 2014ko urtarrilaren 17ko 3/2014 Foru Arauko 65. artikuluan xedatutakoa.
Bi.– Artikulu honetan xedatutakoa gorabehera, zergadunek, artikulu honetan ezarritako tratamendu bereziaren ordez, ondare galerak integratu eta konpentsatzeko araubide orokorra aplikatu ahal izango dute, hau da, Pertsona Fisikoen Errentaren gaineko Zergari buruzko 2014ko urtarrilaren 17ko 3/2014 Foru Arauko 65. artikuluan ezarritakoa.
XEDAPEN IRAGANKORRA.– Foru arau hau indarrean jarri aurreko egoerak.
Foru arau honetako 1. artikuluko baldintzak betetzen dituzten zergadunek zerga tratamendu berezi honi heltzea erabaki ahal izango dute; horretarako, sei hilabete izango dituzte, tratamendu hori indarrean jartzen denetik aurrera, betiere lanari utzi badiote 2009ko urtarrilaren 1aren ondoren eta zerbitzuak ematen zituzten entitatearen hartzekodunen konkurtsoa 2013ko urtarrilaren 1aren ostean adierazi bada.
Zerga Administrazioak erregularizatu egingo du, ofizioz, preskribatuta ez dauden aurreko zergaldietako zerga egoera, xedapen honetan aipatzen diren zergapekoei dagokienez.
AZKEN XEDAPENAK
Lehenengoa.– Indarrean sartzea.
Foru arau hau Gipuzkoako Aldizkari Ofizialean argitaratzen den egunean sartuko da indarrean, eta 2014ko urtarrilaren bataren geroztiko eraginak izango ditu.
Bigarrena.– Gaikuntza.
Foru Aldundiari eta Ogasun eta Finantza Departamentuko foru diputatuari baimena ematen zaie foru arau hau garatu eta gauzatzeko behar diren xedapen guztiak eman ditzaten.
